Ka Nupepa Kuokoa, Volume V, Number 26, 30 June 1866 — Na mea hou o Kaaawa. [ARTICLE]

Na mea hou o Kaaawa.

E KA NUPEPA KUOKOA E; ALOHA OE: - E oluolu paha oe a me kou Lunahooponopono. E hookomo iho ma kahi kaawale o kou mau holookoa. I kela mau hua e kau ae ia maluna. "Na mea hou o Kaaawa." I ke mai ai na hoa puni mea o kaua, mai Hawaii o Keawe, a hiki aku i Kauai. Manokalanipo. KE ANO O KA AINA. He aina palahalaha keia ma ke kahakai, he wiwi ma ke kuahiwi, he pali ma kela aoao keia aoao o ka aina. He maikai no nae ka noho ana, oluolu kupono ke kino; no ka pa ana mai o ka makani maikai ma ka akau hema. HE PA NUI ANAPUU. Ua hoomakaia ka pa ana o keia pa nui, iloko aku nei o kela makahiki 1865, a hiki iho nei iloko o keia makahiki 1866 ua paa. Ka loa o keia pa, 2 mile me ka 1/2 paha. Eia kahi kupanaha loa, ia'u i naue aku ai hiki aku la au ma ka Lae o Kaio, hoomaka ko'u hele makaikai ana me ka pololei o ke alanui. A ma ia wahi hoomaka ke anapuu iloko iwaho. Ka hele aku la no ia o ke anapuu a hiki loa aku i ka Lae o Makaua. Ninau aku la au i na kamaaina o ia wahi, no ke aha la i hana anapuu ia'i keia pa? Hai mai la lakou; "no ke kuleana aina o kanaka, kahi e anapuu la iloko no ka haole oia wahi; kahi hoi e huake nei iwaho he kuleana ia wahi." Pau ae la kona kanalua no ia mea.

NO KA ULU ANA O KE KO. Ua uliuli maikai ka ulu ana o ke ko ma keia aina, no ka momona o ka lepo i ka wai, nolaila, hikiwawae ka ulu ana o ke ko. He uuku nae kahi i paa i ke kanu ia i ke ko; he nui kahi i koe. Ke eku nei nae ka ihu o ka palau ilalo o ka lepo ma kahi i koe. A ina e pau keia wahi, alaila, he oi aku keia o na aina momona ma keia hope aku. NO KA WI O KA AINA. He nui ka wi ma keia aina, iloko o keia mau la; ke ai nei i a wahi huli opiopio, ola kekahi mau la. Aka, o ka hapanui o ka noho ai ole. "Ke olelo nei na kamaaina o ka ai aku i ke ki o ke kuahiwi koe." Heaha la ke kumu o keia wi? Eia, no ka palaualelo o kanaka, aohe mahiai, no ka mea, he nui ka aina; aole nae he mahi ia, nolaila hiki mai ka wi. Aia kokoke mai ka pilikia, o ka wa iho la ia e hoopapau ai i ka mahiai. O ka pono anei ia e ola ai keia ola kino ana, aole ia o ka pono, lalau na lima i ka o-o, hanaku me ka ikaika i loaa ia oe. KA HANA A KA HAKU. I ku'u nana ana i ka hana a ka Haku ma keia wahi, kakaikahi loa ka poe malama i ka pono o ka Haku. O ka hapanui, ua lilo i ka lealea, aohe malama iki i ka pono o ke Akua. Aloha ino o lakou. Auhea oukou e ka poe e makemake ana, e naue mai no e ike i ka lai o keia mau aina, i pau ko oukou kuhihewa. He ma-u ia mau wahi mea hou a ka oukou wahi kauwa nei. Me ke aloha no. AEKAIOKUALOA Koolaupoko, Oahu, Iune 16, 1866.