Ka Nupepa Kuokoa, Volume V, Number 16, 21 April 1866 — Page 2

Ka Nupepa Kuokoa

KE KILOHANA POOKELA NO KA LAHUI HAWAII.

 

Ka Nupepa Kuokoa

Honolulu, Aperila 21, 1866.

Nu Hou Misionari

Mai a Kekela mai. 

Uapou, Novemaha 22.

            Penei ka hana ma Puamau a ke kumu Pope.  Ina e hele ke kanaka i ka hana, e hana no, aole nae e loaa mai ka uku no ka hana ana, ke hele ole i ka pule.  E hana hoi a e hele i ka pule, a pela e loaa ai ka uku o ka hana hoolimalima ana a kanaka.

            Nui ka poe hele i ka pule Pope ma Puamauu, no ka manao e loaa mai ka lole.  O ka hana nui a na kumu Pope ma Hivaoa, o ke kanu pulupulu, a me ke kanu laka hoi kekahi.

            A no ka manao nui o kanaka ma ka waiwai, uuku wale no ka poe hele mai me maua ma ka pule, he 10, a he 20 i kekahi manawa.    Aole nae inaua i pauaho a molowa ina ka hana a ka Haku, ke hana nei, a e hana aku no, e like me ka makaukau i loaa mai mai ke Akua mai.

            He kaua no ina Hivaoa, ko Puamauu, ko Hekeani, Moea, Hanaupe poe, a hele aku e kaua i ko Hoomau, a ua pio kela poe, ua holo i Tahuata, a i Taaoa.  I ka malama iho nei o Sepatemapa, a me Okatoba keia kaua.

            I ka malama o Okatoba, ua hele ko Hanapaaoa poe i Atuona, a powa aku, hookahi no Atuona i lilo mai, a ua laweia pela na kanaka i Hanatakuua, i mea moepuu no ke Kaula i make ma Hanatakuaa.

            Hookahi i pepehiia ma Hanaiapa, a ua laweia ma Hanatakuua, a hookahi no Hanapateo, a ua laweia no ma Hanatakuua.  Akolu mau heanu i laweia no kela Kaula hou, ka mea i make ma Hanatakuua, i ka malama iho nei o Okatoba.

            He mea mau no ia ma keia pae aina, ina e make kekahi Kaula hou, e umiia kekahi heana i mea e mana ai ko lakou diabolo.  Ikaika no ka hana a ke diabolo ma keia mau aina o Nuuhiva nei.

            He kaua no hoi ma Fatuhiva, ko Oomoa poe, me ko Evaeva, a me Hanavave.  E hiki nae ia Kaiwi a me Kaukau, ke hele aku hele mai.

            Ke kupaa nei na hoahanau ekalesia ma ka pono o ka Haku, o Hose me kuna wahine, Teoho ma Hooumi i Nuuhiva, o Tomo inan Paumauu, iaia no na halawai ma Puamauu, ke hele au ma kahi-e.  O na hoahanau hoi ma Fatuhiva, he mai ko Aberahama Natua, e make ana paha.  Ma Fatuhiava o S. Kauwealoha i kela hebedoma i hala aku nei, a hoi mai no.  A ua holo pu mai au me S. kauwealoha i keia wa; a popo paha holo i Nuuhiva, i Hooumi ma kahi o Davida Hose ma.

 

Ka mea Aloha i naue iho nei.

            E ka Nupepa Kuokoa K; Aloha oe:--E oluolu oe a me kou Lunahooponopono, e hookomo iho i keia mau lalani i kau pu ia me ke aloha, a me ka walania pu no hoi.

            I ka la 9 o Aperila nei, ua make iho nei o loane Bapetite, ma Heeiauli; he keiki opiopio oia i aloha nuiia e kona mau makua; a ua manaoia no hoi e naueana na pua ahihi o ke kula, ke nui ae kona kiao, a mae wale ka lakou la mau pua hau, i ka hele a pupu kaula i Koialana.  Eia nae, ua hopu maluia mai la e ka make, kela powa aloha ole, a hele aku la a noho me ka Makua Mana Loa, ma ka aina hiwahiwa loa.  Ke u nei kona nui a pau loa, no ka i ala seku ana iho ia lakou nei.  Pupuhi ka i-a o Uko'a ia ia la la.  He hope loaa wale no i ka uhai aku.  Ke hoi nei no ko Heeia keiki i ke kalepa Oio.  Me ha mahalo nui.  T. Kanilao.  Heeia, Koolaupoko, Aper. 10, 1866.

 

No ko makou hui ana me J. F. Pogue.

E ka Nupepa Kuokoa e; Aloha oe:

            Ma ka la 12 o Maraki, oia hoi ka Poakahi, oia ka la i hiki mai ai o Rev. J. F. Pogue, ma Waiohinu, Kau, a ma ka la 15 ae oia ka Poaha, he halawai ma ka luakini.  Ma ke Sabati ae hoi, ua hele mai na hoahanau me ka piha o ka nanu i ka hauoli. 

            A ma ka la Sabati ae, oia ka la 1 o Aperila, ua malama ia ka ahaaina a ka Haku.  I ka hoomakaukau ana o ka ahaaina, kulu ko makou mau waimaka mehe la o Iesu maoli no ina ka papa aina, kau a mea o ke eehia, a pau ka ahaaina a ka Haku, o ko makou hoi mai no ia me ka lana o ka manao.  Nani ko makou pomaikai, a me ka lanakila, no ka mea, iloko o na Sabati i hala aku nei, o ka poe i komo ma ko Katorika, a me ka Molemona, ke hele nei lakou e lohe i ka olalo a ka Akua Mana Loa.  O na haole no hoi kekahi, ke hele mau nei lakou iloko o ka Luakini, me ka lohe i ka olelo o ke ola, he ike nei makou, ua uliuli na kihapai, "ua hala ka hooilo, ua puka mai ke kau."  C. J. Kekuahauli. 

Kiao, Kau, Hawaii, Maraki 3, 1866.

 

            Hakaka:-Ma ka Poalua iho nei:-Ua hoopaapaa kekahi mau kanaka no ka ia ma ka Moiliili, a ia laua i hoopaapaa loa ai me ka manao e ulele iho, aka, ua uwao koke ia e ka opu akahai e ku koke ana.  Ke ninau nei makou, no ke aha ka mea i hoopaapaa ai o keia mau kanaka?  No ke kokoke mai no paha i ka wi.

 

Ka  Nupepa Kuokoa.

Honolulu, Aperila 21, 1866.

 

Ka hookahuli ana i ke ano o na Kula.

            I ka hoomaka ana mai a ka Papa Hoomaauao i ka lakou hana malalo o ke kanawai hou no na kula a me ka noho ana mai o ka Bihopa o ka Ekalesia Katolika i hooponopono hou ia i lala no ia papa; ia manawa ua hoopau koke ia na kumu kula ao i ka olelo Beritania ma na kula a pau i kokua ia e ke Aupuni.  -Ma ia hope mai ua hoonoho hou ia no kekahi o lakou a ua hoopau loa ia'ku kekahi o lakou.

            O kekahi hapa nui hoi o na Kahukula mua, a me na Puuku mua, ua hoopau ia no lakou, a ua hoonoho ia he mau Luna kula hou ma ko lakou hakahaka.  O kekahi o keia poe Kahukula a Puuku kula hoi i hoopau ia, oia no na makamaka oiaio o keia lahui i haalele i ko lakou aina hanau o Amerika i ka wa naaupo o Hawaii nei, a ua hoolilo i ko lakou ikakai mo na makahiki he kanakolu a keu i ka hoopomaikai anan i keia lahui.--Oia poe ka i hoopau ia, a ua hoonoho ia mai ma ka lakou mau oihana Kahukula a Puuku kula kekahi poe haole i hoike ole i ko lakou aloha i keia lahui; a he poe hemahema no kekahi o lakou e ike ole nei i ka olelo Hawaii, a hiki ole e hoike i na kula a e alakai i na kumu kula.  Ina la e hoike ia na kula, hilahila wale paha lakou i ka ike ana mai o na haumana a me na kumu kula i ka hemahema a keia poe Luna Kula naaupo.

            Ke ninau nei ka lehulehu, heaha la ke kumu o keia hookahuli ia ana o na kula Aupuni; o ka hoopau ia ana o kekahi mau kumu kula ao i ka olelo Beritania, a me ka hoopau ia ana o kekahi mau Kahukula.

            Eia ko makou manao paa malaila, i lohe oukou e na makamaka.  I keia wa ua hoowahawaha ka Papa Hoonaauao i na kumu mai Amerika mai, ua hoowahawaha i ka pono Euanelio--a o ka poe a pau e hilinai ana ma ia pono, e hoopau ia lakou.  Ka lakou manao paa no ia, a o ke ano no ia o ka lakou mau hana e hana nei.

            I mea e hooko ai keia makemake nui a lakou, e kinai i kekahi aoao hoomana, ua hoomaka lakou ma kau wahi, e mahele i na keiki.  Hookaawale ia na keikiane a hookaawale ia na kaikamahine ma na kula kaawale.  O ke ano nui o keia hana ana, he mea ia e kaili aku ai i kekahi hapa o na keiki mai ka hoomana a ka lakou mau makua i malama ai ka hoomana e.

            Eia hou no.  Ua ike ka Papa Hoonaauao o na mele a me na Limeni i hakuia e na misionari Euanelio a i paiia ma ka olelo Hawaii, i hoolaha ia ma ka Himeni Hawaii, ka Lira Hawaii, a me ka Lira Kamalii, he mau mele no ia e alakai ana i ka naau o ka poe e mele ana, i ka ike i na pono nui a pau i ao ia e na kumu mai loko o ka Baibala.  No ko lakou ike ana i keia, a no ko lakou makau o kukulu ia auanei keia pono ma ka hapaiia o ia mau mele ma na waha o na kamalii, nolaila, ua papa loa ia a ua hookapu ia ke ao ana i ka himeni ma na kula Aupuni.  Aole no he kumu nui e ae no ka hookapu ia o ke no himeni ana ma na kula aupuni a ma na hora kula.  Nani ko lakou makau i ka pono!  Ikaika maoli no lakou i ke kinai ana i ka pono Euanelio!

            Ke ike nei ka lehulehu i ka lakou hehi ana i ka pono i lawe ia mai i Hawaii nei, ka pono i hapai ae i keia lahui holookoa mai ka nenelu poho o ka noho ana pegana a i ke kulana kiekie a naauao kahi e ku nei keia lahui i keia wa.  Ma na hua ke ike nei kakou i ka lakou hana.

            Ekolu o na lala o keia Papa Hoonaauao, he mau hoahanau o ka Ekalesia Katolika i hooponopono hou ia; a o ka luna hooko a keia papa, oia no o Aberahama (A. Fornander Esq.) he Katolika Roma no ia i ka makou nana ana.

            O na hana a keia Papa Hoonaauao, aole ia ka hoonaauao i na keiki o keia lahui, aka o ka hoouhi no ia lakou i ka pouli a me ka naaupo.

            Ua kapa hewa ia lakou, "O ka Papa Hoonaauao!"  I ka makou ike ana i ka lakou mau hana, eia ka inoa kupono no lakou, "O ka Papa Hoonaaupo!"

 

            Ua hiki mai he palapala na N. W. Kekapa, o Kona, Hema, Hawaii, e hai mai ana no ka hele o kekahi mau kanaka malaila e ohi ai i na dala me ka hoopuoipuni, a me ka i ana, ua hookohu ia laua i mau luna ohi dala no na aina i kuai ia.

 

Makee la Sabati.

            Ua ninau makou iloko o makou iho i kela ninau.  He pono anei i ke Kahunapule ke hele i umi a iwakalua mile paha i ka la Sabati?  Ua hookui pinepine ia mai ko makou mau pepeiao e na lohe, ua hele kekahi mau Kahunapule, a me kekahi mau heahanau i na mile he 15 a oi ae paha i ka la Sabati, a na ia lohe i koi mai i ko makou mau manao, e hanana, a e noonoo i ka pono io, aka, mamuli o ka makou noonoo maikai ana, ua hoahewa mai ko makou mau lunaikehala i ka ponoole o ia hana ana a ua mau Kahunapule la, a mau hoahanau paha.

            Ina he hana ka ke Kahunapule, a hoahanau paha, i kauoha ia mai e hele ia mau mile i na la e ae, no ke Sabati  hiki mai ana, alaila, ke hai akea nei makou, o ka wa ihola no ia ona e hooko ai ia kauoha, aka, o ke kali ana aku a ka la Sabtai, alaila, hooko, ke hoole loa nei makou i ka pono o ia manao.  Oiai, o kou holo ana ia mau mile, he alakai no ia no kekahi poe e nana mai ana i kau huakai hele o ka la Sabati.

            A me he mea la aole no e ole ko lakou hoopili mai, a hele mamuli o kau alakai ana.  No ka mea, o oe e ke kanaka e lawelawe ana i ua oihana nui la me ka malama ole ia oe iho mai ka malu mai o kona la hoano, a manao iho mamuli o kou manao kanaka, he mea uuku ua huakai hele la au o ka la Sabati, alaila, ke hai nei makou, e kau mai no auanei ke alina o kau mau hana maluna o kau oihana, a me kau poe hipa.

            A ina paha e holo ana oe i ka la Sabati ia mau mile i hai ia maluna, mahope iho o ka pau ana o kau hoomaikai ana, a hoonani ana iloko o ko ke Akua Luakini, oia hoi ka pau ana o kau hana hemolele, a hookuu oe i ke anaina, me kou manao e hoi oe i kou home iho iloko o ia la, ke hoole hou nei no makou i ka pono o ia mea, oiai, o kou wahi paa au i hookahua iho ai, aole ia wahi e holo aku ana mai a oe aku, in a oe e kakali a ka la noa, hoi aku.

            I ko makou halo ana, a nana ana, me he mea la ke haalele nui mai nei kekahi poe i ka pono o ka hele ana ma ke alanui hele lani i keia kau, oiai, ke komo nui mai nei na haole mai na aina e mai, a no ia komo nui ana mai paha, ke holoholo nui nei no lakou i na la Sabati.  A no ko makou ike e ana i keia, nolaila ke kau leo e aku nei ko oukou makamaka, ke Kuokoa, mai hoohalike aku kakou me ka hana a ia poe.  E kupaa kakou ma ke kahua o ka makee la Sabati.

            Ina e hahai aku kakou mamuli o ia lealea pau wale, alaila, e kue ana kakou i ke kapu a me ka Hemolele o ua la Hanohano la.  No ka mea, o ka la Sabati, he la ia nona mau, aole no na mea e ae, nolaila, e Hemolele!  Hemolele!!  Hemolele loa ka la Sabati, mai uhai iki i kakahi o kona mau kapu.

            Aole makou i makau a kuemi i ka oleloia, he kanawai wale iho no keia na ka poe Puritano, aole mai kahiko mai, oiai ke kupaa nei no ke Kuokoa ma ke kahua o ka malama ana i ka la hoana o ka Haku, Nui kaulana, o ke ao nei, e like me ka ka Baibala kuhikuhi.

            Ina e haalele ia ka malama ana i na kapu o ke Sabati, alaila, ke hai nei makou me ka wiwo ole, e emi pu mai ana no ka malama ia ana o na kanawai o ka aina nei.  A ina pela, e hoomanao ae kakou i ka olelo kaulana a weliweli maloko o ka Baibala.

            "E auhilihia ilalo i ka po na lahuikanaka i hoopoina ia Iehova."

 

Hunahuna mea hou o Hawaii nei.

            He lohe Lauahea.  I kekahi la o keia pule e anehe nei, ua lohe lauahea wale mai makou, ua kaawe kekahi haole iluna o ka laau a ua make ma Makawao, Maui, o Hanare Manuahi ka inoa.

            Ka la e wehe ai ka Ahaolelo.  E like me ka olelo kahea a ka Olelo Kuahaua a ka Moi, e weheia ana ka Ahaolelo o keia makahiki ma ka Hale Hookolokolo ma Honolulu ke hiki aku i ka la 25 o Aperila.

            Kahuhula Nui.  Ma ka Poakahi iho nei, ua hoi mai ke Kahuhula Nui mai na palena mai o ka mokupuni o Oahu nei, mai kana huakai hele hoike i na kula Aupuni ma keia mokupuni o Oahu nei.

            Kau no i ka lewa.  Ua wehe aenei o Samuela Alekanedero i hale hooluolu no kona makuahine a me kona kokoolua o keia mau la, maluna o ke kuahiwi o Waihee, Maui, ma kahi i kapaia o Opoloke.  ua laweia na laau o ua hale la maluna o ua kuahiwi la, maluna o na ai o na paahana.  He nu hou no ia ma Waihee, ke ku ana oia hale maluna o kela kuahiwi kalali alo i ka ino.

            Malihini na naka.  Ua loaa mai ia makou kekahi palapala mai ka malu Ulu mai o Lele, na ka mea nona ka inoa G. W. P. Pehu Kukahi.  A maloko o ia palapala makou i ike iho ai, i ka haiolelo ana o Rev. C. B. Aneru ma ka Luakini o Wainee ma ka la Sabati, Aperila 8.  Ua hai mai ua mea kakau manao la, o ka mua ia o ko laila poe lohe ana i kona ieo, mai kona wa i haalele mai ai ia Lanainaluna, a hoi wale aku e noho i ka ua ukiukiu o Makawao.  Malihini na maka i ko Lahaina poe ke nana aku, oiai akahi no a lohe hou ia kona leo ma ua Luakini hanohano la o ka malu Ulu o Lele.

Hale Kuai bipi hou.  Ma ka Poaono o kela pule aku nei, ia makou i naue aku ai makai o Ulakoheo, ua ike aku makou, he wahi hale kuai bipi hou e ku mai ana.  I ninau aku ka hana i kanaka, nowai la ia hale kuai bipi?  Hai ia mai ana no Pinehasa.  O ko makou okalakala ae la no ia, a olelo ae la, u! hele e Hawaii imua.

            Hale Loio hou.  Ma ka Poaono o kela pule i hala'ku nei, ua ike iho makou i ka nee ana aku o Alabati, keiki makuakane.  A o ka hale ana i noho mua iho nei, ua lilo ae la i hale oihana Loio no W. C. Jones, kela Loio a makou i hai aku nei i kela pule i hala'ku nei.

            Na hoa Hanohano o ka Ahaolelo:  Ua hiki mai kekahi poe Hanohano o ka Ahaolelo ma ko kakou nei kulanakauhale, aka, aole nae i pau loa mai.  Eia paha kekahi poe o lakou ma ka moana e holo mai nei, a o kekahi poe paha ke maka-pa mai la i ka moku ole.  Mai hai aku paha makou i na inoa o na hoa Hanohano in a ua kipa mai lakou ma ko makou keena nei.

            Ua hiki mai i o makou nei kekahi makamaka aloha o makou o ka ua kanilehua, a ma on a la makou i lohe mai ai, he nui wale na kanaka i holo mai maluna o na moku okohola me ka manao e ku ana maanei.  Ua malamaia ua poe la e ke Kapena me ka Hanohano nui.  He Kapena ka hoe olelo wahi a ka mea i hai mai.

            Hookohuia.  Ua ike iho makou ma ka nupepa haole a Hanale M. Wini, ua lilo ae nei o Rupe Laimana i Kakauolelo na ke Kiaaina alii o Hawaii, a i Luna nui hoi no na aina Moi.  Ma ka la 31 iho nei o Maraki, ua haalele iho oia ia Honolulu nei, a ua kau aku oia maluna o ke kialua Nahienaena me kona iwi-aoao palupalu.  A aia paha laua ke hoopulu ia ala e na paka-ua o ka ua Kanilehua.

            Kapena Hanamu.  Ke lohe ia nei ma ka waha o ka lehulehu, ua make ka wahine a Kapena Hanamu, ke kuene a me ka ilio mawaena o Tahiki a me Valaparaiso.  Ua lohe wale ia he nawaliwali ko ka wahine, aka, ke ninau nei makou.  No ke aha la ka mea i make ai o ke kuene?  Aohe hoi i hiki i ke one hanau, haulehia e ia hoi e ka pilikia.

            Menemene ole.  Ma ke awakea o ka Poaha iho nei, ua oki menemene ole iho kekahi Pukiki i kona pulima hema, a ua kaawale loa.  Ua hoihoi ia ua Pukiki la iluna o ke okohola, me ka manao e holo i ke okoholo, aka, ua makemake ole paha kela ia manao, a ua oki iho i kona lima.  Ua makehewa ke oki ana i kona lima, oiai, ua kepa ia e holo i na kai anu me ka lawe aku i ke dala a ka haole.  Maluna no o ka moku okohola kahi anan i hoomaunauna ai i kona ola.  He keu keia a ka wa ano e loa.

            Wahine pupule a nalowale.  Ua loaa mai ma ko makou nei Keena kekahi palapala a S. W. Olehulehua, a maloko olaila makou i ike iho ai i ka loohia ia ana o kekahi wahine e ka mai pupule i ka malama o Feberuali ma Kalapana, Puna, Hawaii.  Mai ia malama mai a hiki i keia la, aole i ike hou ia kona mau maka.  Ua haalele mai oia i kona hale paha i ka wa e kau ana kela mai iaia, a na ia mai i koi mai iaia e hele auwana.  Aloha ino ia.

            No ka moku Haleakala.  Ua holo aku o Haleakala i ka auina la o ka Poalua; a ia ahiahi no, o ka hoomakaukau mai la no ia o ke Kuke e oki i ke Kapena i ke koi; a no ia pilikia, ua hoi hou mai ka moku Haleakala; a ua hoopaaia ke Kuke a me kekahi kanaka e ai i kokua ia hewa.

            Pakele mai poino.  Ua hai mai o Daniela Kauwe ia makou ma kana palapala, e olelo ana, pakele kona ola mai ku i na hao winiwini o ka bipi hihiu o ka mauna o Haleakala.  Ma ka la ewalu o keia malama, ua holo aku oia a me kona mau hoahele eha maluna o na lio ma ka mauna o Haleahala, aka ia lakou e ho-a hele ana i na bipi, holo mai la kekahi bipi a hou mai la i kona lio, a no ka hiki ole i kona lio ke holo, nolaila, ua ku malie iho oia.  Aka, ma ke ahonui o kekahi hoa on a, ua hoohei mai oia i ua bipi hihiu nei, a ua paa iaia.  Ekolu paha hoao ana o ua bipi nei e hou iaia, ua hele nae a kau ka weli iluna on a.  E ole wale no e paa i kona kookoolua pakele ai kona ola.  E lio nunuha aha no la ia o ka hele ana i ka mauna.

            Ka hihia mawaena o Lowela a me kekahi nau hoahanau.  Ma ka la Sabati iho nei, ua hiki mai ma Honolulu nei o Lowela o Kauai, a me kekahi mau hoahanau ma Waimea.  O ke kumu i holo mai nei o lakou, ua hoopii o Lowela imua o ka Aha Kiekie ma ke Keena no kela Halepule ma Waimea, Kauai.  No ka mana hiki ke lawe no Lowela, a no ka hiki paha ia J. Kauai a me na hoahanau he lawe no lakou iho.  Ua hookolokoloia no keia hihia imua o na Aha Hookolokolo malalo iho a ua hoohoka pinepine ia no.  A no ka pau ole o kona manao e hoopii, nolaila, ua unuhi loa ae ia i ka Aha Kiekie ma ke Keena.  Ua lawe mai na aoao a elua i na hoike.  O Kamikana a me Stanley na Loio o Lowela, a o Alabati a me Jones na loio o kekahi aoao.

            He palapala ka i hiki mai i o makou nei, e hai mai ana i ka pilikia o na kumukula o ka apana o Hana, no ka hele i na pali koolau e ao ai i na kula, a e hoike ai paha.

            Mr. G. Haina:  Ua hai ia mai makou ua Sabaati o Haina ma Waialua i ka la 15 o keia malama, a i ka Poakahi ae, haalele oia ia Waialua, a hele ao i Waianae, e halawai pu ai oia me na hoahanau o ia wahi.

            Lai ka o Waiokinu.  Ua hai mai o D. Alawa o Waiohinu, Kau, ia makou, i ka lai ka o keia wahi i haiia ae la, " ma ka noho ana, a hana ana hoi; aka hoi o ka nele i ka ai ka hewa, aia ka i ka ihu o ka lio ke ola wahi ana."

            Aloha Ino: Ma ke kakahiaka nui o ka Poalua i hala ae nei; ua hou iho no o Lobe iaia iho i ka pahi, a i ke ahiahi no o ia la make loa.  Aloha no paha! hoi ka lepo i ka lepo.

            He mau olelo henehene.  Ua hai pu mai o J. W. B. Makuakane o Lanai, i kona manao e pahenehene anan i ka hoomana Kalavina, a o ka "hoomana Mamona no ka oiaio," wahi a ua Lanai nei.  Pela ka oiaio, kai noa aia ma ka hana e ike ia'i ka oiaio.

            Aihue hou no:  Ma ka Poalima o kela pule i hala aku nei, ua laweia ae kekahi kanaka koa i ka hale hookolokolo, i ka ninau ana aku i ke kumu o kona laweia ana, hai ia mai ana, ua loaa keia kanaka, ua aihue i kekahi mau mea aole nona iho.  Ua hookolokoloia ua koa la imua o ka Lunakanawai Hoomalu, a ua hoopaiia no ka hana oolea ma ka hale paahao ma Kawa, kahi i hookaawaleia no ia poe.  O ko makou mea hilahila loa, ka ike ana i kekahi poe e lawelawe ana i ka oihana aupuni e hookolokoloia ana no ka hihia ino loa, he aihue.

            O ke "Au Okoa" o ke Aupuni, Mahea oe?  Aia ma ka nupepa Au Okoa o kela pule ka olelo aia nupepa, e olelo ana "ke nune nei wale no iloko o'u, mahea la i olelo ai ke Kuakoa, he buke waiwai ia ia kaua Loio Hawaii ka buke a Robaka Davis i hooponopono iho nei, oia hoi ka olelo hooholo a ka Aha Kiekie."  Auwe! kupanaha ka nupepa Aupuni i ke kue iaia iho.  Ke kuhi nei makou o na Loio kanaka, he poe ike iki ma na olelo e, eia ka aole, wahi a ka nupepa Aupuni.  Auhea ke kanaka e noho nei i ka oihana aupuni e like me keia, ka hupo?  Ua ahona ka o Hika mamua o na Loio Hawaii, i na e like me ka ka nupepa Au Okoa e olelo nei.

            Pilikia ma Kaiwiki, Hilo, Hawaii.  Ua loaa mai ia makou kekahi palapala i kakau inoa ia e ka mea nona ka inoa Keoki.  A ma ia palapala makou i ike iho ai, ke noho la na kumakahiki o Kaiwiki me ka ui-ha, oiai, ua pau ka wa i olelo ae like ia ma ka palapala.  Ke ninau nei makou i ke mea nana i kakau mai, he oiaio anei ka keia palapala e olelo nei?  Ina aohe oiaio a keia mea, alaila, ke i aku nei makou iaia, mai palapala mai ia makou.  Ina he oiaio, alaila ke hai aku nei makou, aohe o makou mana e hoohemo ai ia oukou, o ka Lukanawai ka mea mana malaila.

            Aloha wale na kaikamahine o ka ua Kanilehua.  Ua poloai mai a A. W. P. Mahoe o Punahoa, Hilo, Hawaii, ia makou ma kana palapala, e olelo ana i kona aloha i kekahi mai kaikamahine o ka ua Kanilehua o Makaulele, no kona ike ana i kekahi mau kaikamahine e auwana hele ana me na luina o na moku okohola i ku aku malaila.  Ina he oiaio ka Mahoe e olelo nei, alaila, o makou pu no hoi kekahi i komohia mai e ka manao aloha ia lakou.  Oiai o ka hana no hoi ia a na kupuna o lakou i hala'ku nei, eia nae, aohe wahi waiwai iki i loaa ia lakou.  O na mai ino a me ka hoemi mai i ka Lahui ka mea i ike ia ia lakou.

            Ua hala aku la ka mea aloha.  Ua hai mai o G. P. K. Moowini o Waiahole, Oahu, makana palapala ia makou i ka make ana i kekahi kaikamahine opiopio ma ia wahi.  He kaikamahine hoolohe a malama i na kanawai o kona mau makua.  O ka loihi o na la o kona ola ana  in a keia ao, he 13 makahiki a me 9 malama.  He nui oia, a he punahele hoi na kona mau makua a me na mea pili.  O ke kumu o kona make ana, no ka lilo no i ke kukahekahe a na kahuna kanaka.   A ma ia kukahekahe wale no na makua i hoolohe ai, a haalele wale mai la no ke kaikamahine i keia ola ana.  O ka inoa o ua kaikamahine make la, o Miss Kamakaiwa.  Aloha ino ka pua i ako e ia mai la e ka make.

            Ola Mahunehune.  Me e ko makou kaumaha a me ka weliweli i ka ike ana iho i ka palapala a J. W. Hamakua, o Kohala, e hai mai ana i ke ola mahunehune ana o kekahi keiki, nona ka inoa Kiliona ma ka mahi-ko o Kohala.  O ke kumu o ka pakele ana mai make, " o ka lalau ana i ke ko malalo o ka papa lawe ko, i lalau aku ka hana, hihia kahi palule, lilo ilaila kahi i hoka ai o ke poholo aku la no ia paa ka lima i ka papa lawe ko."  Ua hoopaa koke ia ka mahu o ka huila, a i ke kii ana aku iaia, ua pilikia loa ke keiki.  I kona kauo lupe ia ana a ka hale, i nana iho ka hana, ua haihai kona lima hema.  O kona makuakane a me kona makuahine aia no ma Hamakua, aole nae i ike i ka wa i loohia ai ka laua keiki i ka pilikia kaumaha.

            No ka Eli ana i ke awa o Honolulu---Ua ike iho makou i ka Olelo Hoolaha a ke Kuhina Kalaiaina, e kahea ana i ka poe makemake e eli hou ia ke awa o Honolulu ke Oiai, ua ike ia ka papau ma kau wahi @ kakou awa.  A no ia papau, ke makemake @ nei e loaa na kanaka kupono na lakou @ a hohonu iho ko kakou awa, i komo @ moku nui.

            Poholo iloko o ke kai.  Ma ka hora @ paha o ka po o ka Poalua i alu aku ne @ inu iho kekahi haole kamaaina o Honolulu nei i ka rama, a kau mai ka noe o A@ huelani ae la oia e holo i kai iluna o ka @ ku; aka, aole i hiki pono lilo e oia i ke @ a kona hoa kuwili o na kau a pau oia @ Rama, e lele iloko o ke kai, i ka lele @ nae mai make koke no ia wa, aka loaa e na keiki kupa o ka uapo pakele ia wa.  A hoihoiia iloko o ka Haukipila Amerika, @ @ make loa.  Alua mau uhane i haalele i ke kino i keia la hookahi.

            Ka uinihapa.  Ma kela pule i hala'ku nei, ua hoike aku no makou i ke kaluaia ana ka uinihapa, a i keia pule hoi, ka mea nana ua moa no, aole nae i paakiki loa, ano  palupalu no, i ka i mai o ka haole nana i hana, no ka nui ole o ke ahi ke kumu o ka paakiki ole.  A ua hoano e ia ae ke kalua ana i ka Poakahi i hala ae nei, hookahi no @ ai i  ka lanahu, paniia a paa na puka nui e pani ai, a he puka uuku loa ke hoohamama @ komo ka makani.  A ina e pono ana @ alaila pela mau aku e hana'i, a e kukulu ana paha i wili lepo i mea e wili ai i ka @ a aeae loa.

            Ua hala akula: Ma ka la 28 o Maraki i hala aku nei, ua lawe ia aku o Iosia Kawaa e ka make, a ua waiho iho i kona kinolua iloko o ke kumakena o ke kanikau ana. O keia Iosia Kawaa, he kumukula oia no kekahi mau makahiki ma Maui, a he Lunakanawai i kekahi wa.  A ma ka la i haiia maluna, ua make oia iloko o ka mai Lepera a kakou e hookaawale nei.  Eia kahi mea kupanaha, ua kapili e ia kona pahu kupapau a ua ike no oia i ua pahu la, a he mau @ waiho ana o ka pahu, a make loa aku ia. Ke uwe nei no kona mau kini makamaka iaia.

            E hoopau i na manao ano ole: Ua loaa mai nei ia makou he palapala mai a L@ K K. mai o Keanae, Maui, e hai mai ana i ka pakele ana i kekahi wahine mai make i ke kai, a penei no ia.  Ma ka la 27 o Feberuari ua hele kekahi wahine i ka hooluuluu ma kahi i hai ia maluna.  "A iaia i hoomaka ai e hoonoho i kana hinai, pule aku la oia i ka Haku, i ka ike ana he moe ino ka po.  I ka amama anan ae o hana pule, au aku la oia ma kana wahi i makemake ai, a @ koke no, loohia mai la oia i ka ona, a pau kona ike.  A hoihoi ia aku la oia i kapa kahakai, a malaila i lomilomi ia ai, a p@ hou.  Ua ike no he moe ino ko ka po, la@ nei e lalau ai.

            Oki pau no hoi o M. Hoakula: I ke aha la hoi?  I ka make hoi paha i ke kaeko i ke kakau ia ana o Davida Muraka maloko o ke Kuokoa, ua pono no ke Au Okoa, eia nae ka hewa, o ka hue ia ana mai o na mea ua @ la, ua popo, a ua lehu, oiai, aole i hoike @ ma ke Kuokoa ia mau mea.  O ke ano maoli o ka mea i kakau ia ma ke Kuokoa, ke makee maoli aku i kona hooikaika ana i @ mea he naauao, mai lalo mai, a kau i ke kula 'lii mai laila aku, komo i ka Punahou Haila hoi oia i hoonuu iho ai i na mea @ o ka naauao; aka, aole oia i hoonuu, ono e oia i na mea o ka hooluhi ia mai.  I ka nana aku aole i noonoo pono ka mea nana nana i kakau i keia manao pegana, ina i loaa ia ano, aole la e hoala ia mai na aumakua o ka po.

            He keu keia a ka wa ano e loa o ka @ ana: Ma ke kulanakauhale'lii o Honolulu nei, kahi a na nupepa eono e puka mai nei, ua nui ka lono ma kela wahi keia wahi, e olelo ana, " he keu keia a ka wa @ loa o ka noho ana," a ia makou no e kamailio ana, lohe ia mai ana, ua komohia ka halekuai o J. T. Halewai e ka aihue, i ke awakea kukonukonu o ka la Poakahi iho nei e ka mea nona ka inoa Kapohiwa, a ua lawe aku he mau iwilei kilika me ka manao e nalo, aka, hai wale ia ae no kahi o ka pilikia.  Ua hookolokoloia imua o ka Lunakanawai Hoomalu o Honolulu nei, a hoopai ia, e noho ma ka hale hooluhi o ke Kanawai no na makahiki elua, me ka uku pu i ke koina.

            Na mea hou o Waikiki-waena.  Pomaikai.  Holo ka pono i na hoahanau ma ko makou mau apana nei, oia hoi ka apana o Makiki, Waikiki-kai, a me Kamoiliili.  Ke pa-e mau nei ka leo o na bele ma na halawai po, a me na kakahiaka.

            Pio ka Hula.  Neoneo mai nei nae hoi ka leo o ka pahu hula a na kaikamahine a Keinohoomanawanui ma.  Ka mea hoi e kuku-paupau kapa ana ua o Kaluahine ma.  Ahu no hoi ka pala o ua hana uko ole.

            Hoopunipuni.  Ua puni makou ia Kekaula kahuna elemakule hoopunipuni, me ka paha iho e ola ko makou mai kahiko oia hou o John Grahame, aole hoi i hana, o ko iaia holo malu no ia me ke dala, ma ka wanaao o ka la Sabati, oia ka la 8 o keia malama.

            Ua hoomaha.  Ua ike iho makou i ka hoomaha ana iho nei o na wahine oki mauu a L. McCully, o Waikiki nei i neia mau pule, e hooluolu ana i ka eha wahi a lakou.  O keia poe paahana, ua haawi lakou i kekahi wahi mea iki o ka hua o ka lakou hana no ka Mahinahou a me ka hanai Kumu.  G. J. Riona.