Ka Nupepa Kuokoa, Volume V, Number 14, 7 April 1866 — No Kalani "Kauikeaouli Kamehameha III." [ARTICLE]

No Kalani "Kauikeaouli Kamehameha III."

I ke ku o Hinaiaeleele la hanau, O ka hanau la no ia nei, O ka hauli la no ia nei Pupuu a oni la no ia nei, A ene a pai la no ia nei, O kolo Kalani. O hookuku la 1. O kaʻi la 2. O hele la 3, O noho iho ka 4, o uhola ka moena Ono i ka ai, ai paha Kalani? Ke ai nei ; Ina no iluna kana ai e ai ai, O ka hua walewale mea ono a Makalii, O ke kalo ulu wehiwa lani, O ulu wehiwa lani ka ai e ai ai, Ai paha Kalani? Ke ai nei. Ono i ka i-a, I na no iluna kana i-a e ai ai, O ka i-a nui "Leleiaka," E kau ana i ke kohiana o ka po, I ka mokuna o ka Pawa, ka huli ka i-a, O ka I-a ia––Ai paha Kalani ? Ke ai nei, Ono i ka wai––I na no iluna kona wai e inu ai O Ahiu, o ke kiowai kapu ona, Oia wale no ke inu mau, oi'la 'ku hoi kekahi, O ke keiki Kualiholiho a Kalani ma i hanau, Inu paha Kalani? Ke inu nei, O holoi ka lima, I Kahiki ke kapu noa ka ai-na, No––a, A pili na moku, Ka hoopilipilina o na moku e pili ai, O Kaula, o Kamokupapa i ke kai la, O kona lua no ia, o laua no ia, Ka hoopilipilina o na moku e pili ai, O Niihau, o Lehua, o kona lua no ia, o laua no ia, "Hookahi Kauai o "Mano" kona lua, O Pipiii, o momoe, o moe lea wale ka hiamoe–e, O pu|u wale ke aka i ke aloha—e, O ke kulu hao a ka waimaka—e, A o ia e—e kulu ana, A kulu ka noe i Alakai—e, i ka lehua, O ka pua ka'u mea i aloha—e, Ua mohala aku la i ka noe, Aloha wale ka noe o Alakai—e— A ui ke kapuna.— "O huki kuemaka luku o ka la lena, Ike ole i na pua koa o Lilikoi, Ua lili wale ka ua i ka laau, He pahi ia na ka ua ele malino, I oki i ka eka mu-o o ka hala, Aui ka pua noho e e i ke ka, Ahu ino i ka lu ia e ka makani, Mo-ka i ke alanui o Hamakua—e E aloha—e. He kua o ka awa la ia o maia, Mama wale i ke aloha, me ka hoka awa —la hae, Me he awa lena la ka lena o ke koolau, Ka palalena i ka la o ka Makalii, Kahuli ae ke kino ouli hou, Noho mai he lipo ka lau o ka palai, He ko luea Kona i ka ua ia, Naowao ka laau hihi ke kaunoa, Kuu welu iho i ke oho o ke kukui, O ke alanui mauka o Waiau—e, E aloha—e. E u ana no au i ke aloha, I kuu manao no a o i pau––a,—hae. Na KEAHOLAWAIA. Aole i pau.