Ka Nupepa Kuokoa, Volume IV, Number 46, 18 November 1865 — Page 1

Page PDF (1.51 MB)

KA NUPEPA KUOKOA :
KE KILOHANA POOKELA NO KA LAHUI HAWAII.
BUKE IV. HELU 46. HONOLULU, NOVEMABA 18, 1865. NA HELU A PAU 207.


" KA NUPEPA KUOKOA.,"
HOOPUKA MAU IA MA HONOLULU
I kela Poaono keia Poaono.
$2.00 no na mahina he UMIKUMAMALUA,
$1.00 no na mahina eono, ME KA HOOKAA MUA MAI.


NA OLELO HOOLAHA — aole i oi mamua o 10 laina no ka hoopuka hookahi ana, $1.00 ; alua komo ana, he $1.50 ; hookahi malama, $2.00. E uku mua ia mai ke dala o na olelo hoolaha a pau e hoounaia ana mai e pai.
KANIKAU — he hapalua dala ka uku no ka aoao hookahi o ka pepa leta, oia hoi 4 keneta no ka lalani hookahi — penei : he 25 lalani, $1.00 ; 50 lalani, $2.00 ; a pela'ku.
KA UKU NO NA OLELO HOOLAHA — ka uku pepa, a me ka uku o ke Kanikau, e haawiia no ma ka lima o na Luna o ke Kuokoa, a i oleia, e hoouna mai ia Kauka Kulika.
O KA UKU PEPA A PAU E HOOKAA MUA MAI NO — aole e kauia ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua. E pono ke hiipoiia keia mau rula, no ka mea, he emi no ka auhau no keia nupepa.
AIA KE KEENA O KA NUPEPA KUOKOA — ma ke kihi hema o ka Hale Hookipa Luina (Sailor's Home.) O na hora hana, mai ka eiwa o kakahiaka, a i ka ha o ke ahiahi.
L. H. KULIKA, (Lona Hooponopono.)


KA " NUPEPA KUOKOA."
Is published in Honolulu
EVERY SATURDAY,
$2 00 per annum, or $1.00 per six
months, in advance.


ADVERTISEMENTS not exceeding 10 lines, inserted once for $1.00 ; twice for $1.50 ; and $2.00 for one month ; all advertisements must he paid for in advance. KANIKAUS will be charged 1.00 per page, or 4 cts. a line.
PAYMENTS FOR ADVERTISEMENTS, Subscriptions or Kanikaus, may be paid to any of the Agents of the Kuokoa, or may be enclosed in a letter to the Publisher.
ALL SUBSCRIPTIONS must be PREPAID. No names, either of foreigners or natives will be inserted on the subscription list until paid for. This rule must be strictly adhered to, on account of the low subscription price.
THE OFFICE OF THE KUOKOA is in the South corner of the Sailors' Home. Office hours from 9 A. M. to 4 P. M.
L H. GULICK.
Publisher.
Volume I. II. and III of the KUOKOA, bound, for sale, $3.50 each.
Persons having complete sets of the above, can have them bound by paying $1.50 each.


JOHN H. PATY !


Mea Hooiaio Palapala, Honolulu, Pae Aina Hawaii.
AIA KONA KEENA HANA MA KA HAle Banako o Bihopa ma. 195-6m


HALE PAI KII.


               AIA KO'U HALEPAI KII MA KA HALE e pili ana me ka Hale Leta, maluna'e o ke Keena Pai o ka " Nupepa Kuokoa," Ua emi loa ke kumukuai o na kii.
H. L. CHASE (Keiki.)
274-1y Mea Pai Kii.


S. KUPANEA.
J. W. KEAWEHUNAHALA.
Loio ! Loio !


               KE HOOLAHAIA'KU NEI I NA KANAka a pau o keia Aupuni, ua makaukau na mea nona na inoa maluna e Kokua, a e lilo hoi i LOIO no na mea a pau e loohia ia'na i ka hihia, a e pale ana no kekahi hihia imua o na Aha Hookolokolo o keia Aupuni. He mau mea laua i aoia i ka OIHANA HOONAAUAO ma ke Kulanui o LAHAINALUNA, a ua aoia hoi ma ka OIHANA Kanawai, a me ke kakau ana i na Palapala o kela ano keia ano, e ka Mea Hanohano G. M. ROBERTSON (LOPIKANA.) A o ko laua Hale Oihana, aia mauka iho o ka huina o ke Alanui Hotele a me Maunakea ma Honolulu, Oahu.
Honolulu. Feb. 6, 1865. 167-y


OLELO HOOLAHA !
I NA KANAKA HAWAII ;


               Aloha oukou :— No kuu makemake e ike kela a me keia kanaka Hawaii i kahi e hiki ai ke hoowaiwai ia ia iho, nolaila, ua pai au a ke hoouna'ku nei i keia palapala ma na kihi eha o keia mau Mokupuni, ma ka loa hoi a me ka laula o ka aina ; a ke nonoi aku nei au ia oukou, e hoomaopopo i na olelo i hoikeia mahope nei.
               Ke hai aku nei au ia oukou a pau loa, ua makaukau au e kuai i ka Loli ; a penei ke kuai ana, a me ka hana ana no hoi, i maikai ai, a i makepono ai no hoi oukou ka poe e lawe mai ana i ka Loli :
               Ka hana ana o ka Loli :— Aole e hoopakuia ka naau o ka Loli ; o ke one ka mea hoolei aku, aole e kahaia ka opu, aka, e kaha no ma ke kua, i akahi iniha ke kaawale mai ke poo mai, alaila, hoomaka aku a koe hookahi iniha, alaila, e hookomo iloko o ka Ipuhao i ke kai maoli o ka moana, a e hoolapalapa i elua paila ana o ka wai, a pau ia, kaulai a maloo maikai. A ina pela e hanaia'i, alaila, e kuai koke no au ia.
               Ke Kuai ana :— Aole e kuaiia ka Loli i emi malalo iho o ka eha (4) iniha ka loihi — mai ka eha iniha a pii ae iluna ka loihi o ka Loli i makemakeia, a o ke kumukuai penei noia. Ina EHA A ELIMA INIHA, he EONO KENETA ka uku o ka paona ; a ina EONO iniha, he EHIKU KENETA ka uku o ka paona ; a ina ehiku iniha, alaila, he EWALU KENETA no ka paona, a pela no hoi e pii ae ai ka uku, e like me ka pii ana'e o ka nui o ka Loli.
               No ka Pepeiao Laau :— Ua makemake no au i ka Pepeiao Laau, a e uku no au i ke kumukuai makepono ke lawe ia mai i o'u nei, no ka paona hookahi.
               Lala Mano :— E kuai no au i ka Lala Mano a ka poe a pau e lawe mai ai io'u nei, i IWAKALUA KENETA o ka paona.
               Aia ko'u Halekuai ma ke Alanui Nuuanu, ma ka aoao makai o ka Halekuai o Ake (A. S. Cleghrn,) ma ka aoao hikina Alanui Nuuanu. Me ka mahalo.
KIULANA,
Pake Kalepa. Honolulu, Oct. 25, 1865. 204-6m


Na Buke i Pai ia e ka Papa Hawaii.


Eia na buke kuai, a me ke kumukuai,
Baibala nui no na Awai o na Halepule, $4 00
  " Ohana, ano nui, me na kii, } { 2 50
a me na Moohana, } 5 00
  " Ohana uuku iho, me na Moohana, ili ulaula, } 1 00
  " Ohana, me na Moohana wale no, 62 1/2
  " Okoa, - - - 50
Kauoha Kahiko, i paiia i ka M. H. 1838, 25
Kauoha Hou, me ka pepa lahilahi o waho, 12 ½
Kauoha Hou, hapa haole (Haw. Eng.) 25
Haiao, - - - - - 25
Hele Malihini Ana, - - - - 25
Wehewehehala, - - - - - 25
Lira Hawaii, - - - - - 25
No ko ke Akua Ano, - - - - - 25
Lira Kamalii, - - - - - 25
Kumumua Hou, - - - - - 12 1/2
Moolelo Ekalesia, - - - - - 50
Hoike Palapala Hemolele, - - - - -25
Himeni Hawaii me na Leo Mele, 1834, 25
Ninauhoike, - - - - - 12 1/2
Ui Kamalii no na Kula Sabati - - - - 12 1/2

Eia na buke i haawi walei a.
Haawina Baibala.
Ui.
Na Dawida Malo Kumumanao.
Ko Olelo Ao Liilii.
Ka Moolelo o Batimea Puaaiki
L. H. Kulika.
Kakauolelo o ka Papa Hooko o ka Ahahui Euanelio o Hawaii


Ka Nupepa Kuokoa.


He Puu Kaulana o Kauwiki
ma Maui Hikina.


LANIPILI, MOKULEIA, WAIALUA, }
Novemaba 1, A. D. 1865. }

He Moolelo no Kauaiki.


                    He Puu hanohano ole o Kauwiki i ka nana'ku, he ano poolipilipi, me he ihu moio la e luu ana i ka moana. Ma ka hikina akau kekahi pali uliuli o Mapuwena, a ma kona poli ke one hanupanupa o Kapueokahi, me ke awa ku moku, a me ka nalu o Keanini. Ma ka hikina o Paliuli, he wahi ana poepoe a poopoo ; a malaila i huna ia'i ke alii wahine kaulana o Kaahumanu iloko o na hoouka kaua a Kalaiopuu me Kahekili ma Maui Hikina ; i ka A. D. 1775 me 1778. (Malaila o Kaahumanu i alakai aku ai ia W. Rikede e kuhikuhi i kona wahi i huna ia'i me kona wahi i hanau ai o Mapuwena, i ka 1830.) Ma ia alo iho e moe ana he puhi kaulana o Kapuhiolaumeki, a maloko o ke ana, ke kumu o Kauwiki, e hoonaueue ana ia luna.
               E alo iho ana kahi moku-kani, e ho ana i ka makani kohola o Mokuhano. Ua paniia kona waha nui e kani ai i ka pololu kauila, a piha pono, he hana kupaianaha na kekahi alii, o Kalaikini kona inoa. (Ke waiho nei na laau a hiki i keia la) Ua alua haneri a keu makahiki mamua'ku nei.
               Ma ka hema, e ulu ana he uluniu, " Aole e loaa na niu a Kane ia oe," me ka pali uliuli o Kaihalulu.
               Ma ka aoao komohana me ka akau, e waiho ana he aina palahalaha, a malaila ka aina mahiko o Hana. E kokoke ana i ke kumu o ka puu ke koele kahiko a na'lii, o Kuakaha ka inoa a me na Haiau, o Honuaula me Kuawalu. Malaila ka umu pikao kanaka kaua i ka lawe pio ana a Kahekili i ka puu o Kauwiki i ka A. D. 1782.
               Maluna aku o ka wai o Punahoa ke kahua o Kawalakii, ma kahi kokoke i ka pane poo o ka puu, malaila ka hulili o ka Puu o Lanakila, o ka ohia o Kealakomo, paio i kela kau paa ka hulili.
               Ma ka pane poo o ka Puu e huli ana i ka hikina o Hawaii Kuauli, a ma ka aoao hema o Makokiloia, Makopalena, a ma ka akau hikina ae o Mapuwena, mawaena ke kahua o Wananaiku.
               I ka nana ana mai a Hawaii ia Kauwiki. E alo ana ia Kaihuakala, iuka o Puuokahaula ; i kai hoi Alau me he moku pale ua la. Oia ka hanohano, a me ke kilakila, me he manu la, e oni ana iluna me he lae no ka noio au-kai la o Mokuhano, me he kaha ana la na ka uwau o Kaihalulu me Kapueokahi. Ilaila i hou ae ai kekahi alii i kana pololu i ka lani. No ke kaulana o Hana, " O Hana ua lani haahaa,"

KAULANA O KAUWIKI.

               Ua kaulana o Kauwiki, no ka hoho ana o Aikanaka me kana wahine me Hinahanaiakamalama. He alii o Aikanaka i hanau ma Kowali o Muolea, ma Hoolonokiu i hanau ai, o Kue ke'we, o Hanaluukia kahua, o Alau ka piko, o Kaohaikahua i Hinihiniula ka aa, i Waikanonono ka inaina.
               O Makaliihanau ke kahua i hanaiia'i. Ua oleloia he alii maikai, a he alii malama i na makaainana, he alii mahiai.
               Ma ko Maui me ko o Oahu Moolelo. O Heleipawa ka makuakane o Aikanaka ; a o Kapawa ko Heleipawa makuakane, ua maopopo kahi i hanau ai kela alii. Ma ko Hawaii moolelo, a kuauhau, aole i oleloia kahi i hanau ai. Ua pohihihi kahi i hanau ai, aole akaka, o Hulumanailani.
               Ua oleloia o Hinahanaiakamalama no Ulupaupau, aia i Kahiki, nolaila mai oia, a lilo i wahine na Aikanaka. I ko laua hoao ana a lilo i kane a i wahine. Maluna o Kauwiki laua i noho ai.
               Ua hanau mai na keiki hoehaa, a mahope hanau mai o Punaimua, a o na kauwa a Hinahanaiakamalama, o Kaniamoko me Kahapouli. O ka wai auau o Puna, Aalae ma Kawaipapa. Makemake na kahu e malama i ke keiki a ko laua Haku.
               O ko laua Haku, ua lawe i kela aina i keia aina, me ka ike ole ia o kana hana, e hooluhi ana iaia ihe, me ka ike ole o kana kane, a me kona mau kahu. A hiki i ka wa i hanau ai ke keiki hope o Hema, ua maa kana hana ina keiki mua, me ka ike ole o kana kane me kona mau kahu. Ke manao nei na kahu wahine ke lawe nei i ka wai o Punahoa, a i Waikoloa e lawe nei i ka welu a me ka honowa o na keiki. Ke lawe nei ka kela i Papahawahawa, a ma ka aoao, o Koolau hoi i Ulaino.
               Ua oleloia ma kona moolelo ; no kona luhi, a me kaaikena i ka holoholo i-o ia-nei. Ua ohumu oia e lele i ka mahina.
               O Wanaikulani kahi i lele ai, i ka po i o Hoku. I ka po i lele ai, e lalau ae ana ke kane i kekahi wawae, a moku i ke kuli. Ua kapaia o Lonomuku e kau mai nei i ka mahina. He oiaio paha, aole paha.
               Ua lilo o Puna i Oahu, a o Hema, ua hanaiia maluna o Kauwiki, a lilo i kanaka maikai, a kaulana no ke kanaka maikai o ke alii. Mauka o Iao kekahi kaikamahine alii maikai, o Luamahehoa, na Luamaheau. I ka hoao ana o Hema laua o Luamahehoa. I ke ku mua o ka malama, kaa i ka iloli, i ka lua o ke ku, ono i ka hiaai, akolu aha, alima ka malama. Manao iho la o Hema e holo i Kahiki i ka palala no ke keiki, oia na makua o Hinahanaiakamalama, na kupuna o Hema.
               O ka palala e kii ai, he Apeula, a he Apoula. Aka, ua holo o Hema i Kahiki ; a loaa na makua, a me ke kupunawahine o Hinahanaiakamalama. Ma ia Aupuni, ua pau na maka o kanaka oia aina i ka Aaianukeakane, he poe lawaia aholoa ; nana akua, na Kane ma laua o Kanaloa. O ka maka o ke kanaka ka maunu o ka ia — Nolaila, ua aihue ia ka maka o kela kanaka o keia kanaka i ka po.
               O na maka o Hema kekahi ilio i ka Aaianukeakane, a noho makapo i Kahiki.
               Ua kakali ka wahine a Hema o Ulamahehoa, no na malama e hoi mai ai ke kane, a hala ka manawa, a kokoke i ka puni hanau. Ua hoi o Ulamahehoa iuka o Loiloa i Haunaka ma Iao ; a malaila i hanu ai o Kahainui a Hema.
" O Hema ke'lii o Kauwiki,
I hanau i Hawaiikuauli,
I ka Pueokahi i ka lulu i ka lai,
I ka makani kahi aoao,
O Punahoa la ke'we.
Ka aa i Kawalakii,
O Kuakaha ka piko,
ka piko o ke alii,
Lawe iluna i Mapuwena,
He alii no Kaihalulu i Mokuhano,
O Wananaku kahua,
He kahua olina na Hema,
I imi a loaa ka wahine,
O Luamahehoa a Luamaheau ia,
Loaa Kahai ke koiula a Kane,
Kauhua hookahi ka malama,
Kaa i ka iloli alua akolu,
Aha alima ka malama,
Holo Hema i Kahiki,
Kii i ke Apeula,
Loaa Hema lilo i ka Aaia,
Haule i Kahiki i Kapakapakaua,
Waiho ai i Ulupaupau,
Ilaila na maka o Hema.
                    " O Hua kekahi alii i noho i Kauwiki, ke keiki a Kupuaimanaku, he alii kaua keia, nana i kukulu na Haiau o Honuaula me Kuawalu.
               O Kaniuhoohie ka inoa o kana kaua, i hakalau i Hawaii. O ka laau alomakauwahi ka inoa o kana laau, a ua lukuia na'lii o Hawaii ma Hakalau. Oia ke kaua kahiko loa i manaoia.
               He nui na'lii i noho ma Kauwiki a ma Hana. O ka ohana a Hana, o ka ohana a Kanaloa, a o ka ohana a Kalahu, oia na ohana alii i noho ma Kauwiki, a ma Hana, i na makahiki mahope mai o Hua a hiki ia Piilani.
               O Kakaalaneo ka Moi o Maui, ma Kauwiki i noho ai o Eleio i alii — Mahope o laila noho alii ka ohana a Kanaloa, me Kalahu. O Kalaehaeha, o Lei, o Kamohohalii, o Kalaehina, a me Hoolae. (Aole au e hai aku i ko lakou moolelo, aia a hanaia ka moolelo o Maui. Aia hoi a makemake nui e lawe i ke Kuokoa i e 4000, a e 5000 paha, alaila, hiki ia'u ke hoomanawanui i ke kakau i ka moolelo Hawaii.)
               O keia wahi kanaka o Hoolae, he wahi kanaka poupou ; he 4 kapuai paha kona kiekie, a o kona mau lima, ua wili a nao, ua ikaika kona mau helehelena mailuna a lalo, a ua koa hoi, no ka mea, ua hanau oia no ka ohana ikaika. Maluna o Kauwiki oia i noho ai.
               Ua imi o Kihaapiilani i wahi e ku ai ka makaia, a me kona hoomaewaewa ia. Ua kuhikuhi ia mai ia Kahuakole me Waialanahua, he mau kanaka akamai e noho ana i Kawaipapa.
               Ua lilo o Kihaapiilani i keiki na Kahuakole, a ua hoopunaheleia, a he kanaka maikai o Kihaapiilani, aole ona puu mai luna a lalo, ua nani kona oiwi. Ua hele pu kona hoa me ke kapa ana ia ia he kaikuahine, oia no o Kumaka.
               Ua maa ke kaikamahine alii o Hana i ka heenalu i Keanini —(Ka manawa ia e hiki ana i Punahoa ka nalu.) O ke kaikamahine a Hoolae o Koleaamoku ka inoa.
               He keiki akamai o Kihaapiilani no Waikiki i Oahu, no ka nalu o Maihiwa me Kalehuawehe, ua ailolo i kana hana, aole aio pae ole, mai ke kawaha ale a nalu.
               Olelo aku o Kahuakole ia Kihaapiilani, " e hele oe i ka heenalu me ke kaikamahine a Hoolae."
               A hele aku la o Kihaapiilani i ka heenalu. A ike mai la ke kaikamahine a Hoolae i keia kanaka maikai, a ua akamai i ka heenalu, a kuko mai la me ka hooipoipo. Ua kapu o Koleaamoku, aia a noa ia Lonoapii, alaila moe i ke kane.
               I ka lua i ke kolu o ka heenalu ana, ikaika loa ke kuko ino ia Koleaamoku. Olelo mai o Kahuakole ia Kihaapiilani, " Mai hele hou oe i ka heenalu," ae aku la o Kihaapiilani. " Ae."
               Nana mai la o Koleamoku, a aole hele hou aku o Kihaapiilani i ka heenalu. O ke kai a huakai noia ma Waikaakihi a Waikoloa, a hiki i Kihahale, aia ma kai o Kawaipapa. Malaila laua i hoao ai, a lilo i wahine na Kihaapiilani, a kukui aku la ka lono a lohe o Hoolae, " ua hoao ko kaikamahine me ke keiki a Kahuakole" O ka hoopale mai la no ia o Hoolae, me ka hoohiki kanawai, " Aole e ike."
               Noho iho la o Kihaapiilani me Koleaamoku, a hapai i ke keiki, oia hoi o Kauhiokalani, a huli, a kolo.
               Olelo aku la o Kihaapiilani ia Koleaamoku, " he punahele no oe i kou mau makua ?" I aku la kana wahine, " He punahele au na ko'u makua, owau no ka nui, aole mea nui e aku, owau wale no, o ka'u mea e noi ai, oia ka ko'u mau makua e hooko mai."
               Olelo aku la o Kihaapiilani, " E hele oe e noi aina no kaua, i wahi e mahiai aku ai. Ina e haawi mai i ka aina o Hana mai-o-a-o o ka aina, e hoole aku oe. Eia na aina au e noi aku ai, o Honomaele, o Kawaipapa elua, o Wananalua ekolu."
               I ka hiki ana o Koleaamoku, ua haehae ke aloha o na mkua no ka moopuna, a ua kupinai ka uwe, a ua hoolako ia na mea a pau. Mahope o ka ahaaina ana.
               Ninau mai la ka makuakane o Koleaamoku, o Hoolae, " Heaha kau huakai nui e kuu kaikamahine i hiki mai nei ?" Kulou iho ke kaikamahine ; a ea'e la, olelo aku i ka makuakane, " I hoouna mai nei kuu kane ia'u i aina mahiai no maua."
               Olelo mai la ka makuakane, " Eia ka moku o Hana, mai Puaaluu a Heleleikawai." Olelo aku ke kaikamahine, " Aole makemake i ka pau loa, ekolu wale no aina i noi mai nei."
               Ninau mai ka makuakane, " Owai ? Owai ?" Olelo aku la ke kaikamahine, " O Hanomaele, o Kawaipapa, o Wananalua." Kulou iho la ka makuakane a loihi, ea mai la a olelo mai la i ke kaikamahine, " He kane alii ko kane o Kihaapiilani." " Pehea oe i ike ai o Kihaapiilani ?"
               Olelo aku o Hoolae i ke Kama, " Aole i makemake ko kane i aina mahiai — I aina kaua me ke kaikuaana me Lonoapii. O Honomaele, o ka ohia a Kealakomo, paio i kela kau paa ka hulili o ka Puu. O Kawaipapa, o ka a-la kanawao a ku iluna o ka Puu, o Wananalua ka honua kaua, no ka Puu kaua o Kauwiki."
Aole e pau ua lolo e kuu lima.
S. M. KAMAKAU.


He Moolelo no Arabia.


               O ka poe o Arabia, he mau mamo no lakou na Isemaela ke keiki a Aberahama. I ka wa mamua aku nei, ua wanana e ia no oia penei ; " e kue aku no kona lima i kela kanaka i keia kanaka, a e kue mai no hoi ka lima o kela kanaka keia kanaka." A ua hooko ia no keia wanana i na wa aku nei mamua e kana poe mamo ma ko lakou ano enemi i ka poe e, a kue no hoi ka poe e ia lakou.
               He nui na mokuaina kukaawale iloko o Arabia a me na kanaka. Penei kona mau palena, ma ka Akau o Palesetina, Mesopotamia a pela aku ; ma ka hikina ke Kaikuono o Peresia a me ke Kaikuono o Oremuza, ma ka hema ka Moana Iniana, a ma ke Komohana ke kai Ula.
               He poe hanauna aea wale no ka poe Arabia, noho lakou maloko o na halelole mawaena o na waoakua e waiho palahalaha mai ana ma ka hapa nui o ko lakou aina. A ua maopopo lea loa ko lakou moolelo o ka wa kinohi loa. A o ka mea nui mua, oia no ka ka hanau ana o Mahometa. Ma Meka oia i hanau ai, he kulanakauhale oia ma kapa o ke Kai Ula, a oia no hoi ka makahiki 570 o ka era Kristiano.
               I ka wa he 25 makahiki o Mahometa, he hoemu Kamelo kana hana ma ka waoakua. A mahope mai, hoolilo nui oia i kona manawa ma ka hele hookahi ana oia wale iho no ma na wahi mehameha. Kona hale noho, he ana mehameha, malaila hoi oia i hoolilo ai i kana hana o ka pule. A i ke 40 o kona mau makahiki lilo oia i Kaula.
               Kukala ae la oia imua o ka lehulehu me ka i ana, ua hoouna mai ke Akua ia ia, e hoike aku i ko ke ao nei i ka hoomana hou. Aole nae i huli aku na kanaka o Meka i kana hai ana i kinohi. No ka mea, he kanaka no oia i hanau i waena o na kanaka o Meka, he hoa Kamelo kana hana, a nolaila aole ona hemolele ana, ua like no lakou. Eia ke-kahi mea ana i hoike aku, ua holo oia maluna o ka huki iloko o ka lani me Gaberiela ; a e like me keia, pela no ka nui o kona moolelo wahahee. Nolaila, manao iho la na kanaka o Meka e pepehi ia Mahometa, a no keia mea holo oia i Medina, he wahi kulanakauhale okoa no ia ma kekahi wahi aku o Arabia. A malaila i mahuahua ai kana poe hauman iloko o ekolu makahiki. A hai aku la oia i kana poe haumana ; e kue aku i ka poe eae e komo ole mai ana iloko o ka hoomana Mahometa, me ka ikaika.
               No keia mea, ua ulu mai ke kaua ana iwaena o na haumana Mahometa, a me kahi poe e ae o Arabia. A lanakila mau o Mahometa, a lilo oia i poo no ka aina a pau, a hala loa aku i Suria.
               I ka nana'ku, ua lilo maoli oia i Alii maoli. He kanaka ano weliweli loa oia ke nana aku, a pela no hoi kana poe haumana, no ka mea, i kona wa e huhu ai kakau ke a-a o kona kuemaka. A o keia ka mea e weliwele ai.
               A pii mau ae la ka nui o kona hoomana, aka, make e oia i ke 62 o kona mau makahiki. A ua kanu ia oia ma Medina. Ua olelo ia eia no kona pahukupapau maloko o ka luakini Mahometa, (Mosque,) a hiki i keia la, e kau lewa ana iloko o ka hale, me ka ume like ana o ka Makeneti, i kau ia maluna a malalo. He nui na malihini e hele ana ma ia wahi e makaikai ai i kela makahiki i keia makahiki.
               Ua aneane e pau loa o Asia a me Aferika, i ka huli ana i keia hoomana, a ke manaoio nei na miliona kanaka ia hoomana. A ua kakau ia kana mau kauoha iloko o ke Korana (Baibala Mahometa.) Me kona i ana, na Gaberiela i lawe mai i na olelo oloko o ke Korana mai ka lani mai.

KA HOPE O KA MOOLELO O KA
POE SAREKENA.

               O ka poe Arabia i hahai mamuli o Mahometa, ua kapaia ko lakou inoa he poe Sarekena. A mahope mai o ka make ana o ko lakou alakai, hoolanakila ae la lakou maluna o Tureke, ma Asia, a me kekahi mau aina e aku he nui wale. A o ka inoa o ko lakou kulanakauhale alii o Bagada maluna o ka muliwai, e like me ka mea i hoike ia ae nei ma kela mau helu o ke Kuokoa i hala aku nei.
               O Ali oia kekahi o na panihakahaka o Mahometa, a he moopuna no hoi oia na Mahometa. Kue iho la o Agesa (Agesha) ka wahine a Mahometa iaia. Ua oleloia no hoi nana no i pepehi ia Mahometa.
               Hoakoakoa oia i mau koa nona a hele aku e kaua ia Ali. I ka wa i kaua ai, noho no o Agesa iluna o ka manele i kau ia maluna o ke kua o na Kamelo. Na kekahi no o kona mau koa e paa ke kaulawaha ; a ua olelo ia ua pau i ka make kona poe koa he 70, no ka lilo i ka paa i ke kaulawaha, make aku ana hookahi, a pela aku ana, a hiki i ke kanahiku. A lanakila iho la o Ali maluna o na haumana a Mahometa, a me na aina i lilo mua ia lakou.
               Pela i hanaia ai ke Aupuni o ka poe Saredena. O na 'lii ua kapaia ko lakou inoa Alii, o ka poe Kalipa (caliphs.) A ua noho Alii ae lakou ma Bagada no na makahiki 620. A hookahi mea kaulana o lakou o Mamuda Gazui (Mahmud Gazui.) Oia ke koa nui nana i hoohui ae ia Inia me kona Aupuni.
               Aia hoi kekahi kanaka ilihune, hele aku la oia e uwe aku imua o ke Alii Mamuda Gazui, me ka hai ana aku i ke kipaku ia ana e kekahi koa ona me kona ohana a lilo ka hale iaia i na po a pau. I ka wa o ke Alii i lohe ai i keia mea, ike ihola oia o kana keiki ponoi no. A olelo aku la oia " ina e hana pono ole hou oia ia oe, alaila e hele hou mai oe e hai ia'u."
               A mamuli hoi o ia mea, hele hou mai la ua kanaka nei e hai aku i ke Alii i ka hanaino hou ana o ke koa i kona hale. A lalau koke ae la ke Alii i kana pahikaua, a hele aku la i ka hale o ua kanaka nei, a mamua o ke komo ana iloko o ka hale, kauoha ae la oia e kinai ia ke kukui a pio, i ole ai e hoopalupalu ia mai ko'u naau ma ka ike ana aku i na maka o ka mea hana hewa.
               I ka pouli ana oloko o ka hale, komo aku la ke Alii a hahau iho la i ke koa me kana pahikaua. A kahea ae la ke Alii," e lawe ia mai ke kukui." A lawe mai la kana kauwa. A paa ae la ke Alii i ke kukui a hoani ae la oia, a ike ia iho la e waiho ana ke kino kupapau o ke koa ua paumaele i ke koko, a ike ia ihola ua pololei no ka pepehi ana ; oia no hoi kana keiki ponoi.
               O ke 'lii hope loa o Mosetasema (Mostasem,) he Alii haaheo loa oia. Ina e nele ka uhimaka gula iaia, aole oia e hele imua o ka lehulehu.
Ia wa akaa ia ae la ka uhi maka o Mosetasema e Hulaki kekahi Alii o ka poe Tata, a hoo ola ia oia iloko o ke eke ili, a kauo hele ia aku la oia ma na alanui ana e holoholo ai.
               Pela i make ai o Mosetasema. Iaia no hoi i pau ai ka poe Sarekena, i ka makahiki 1258 o ka era Kristiano.
               O ka hoomana ana nae o keia Aupuni i ka hoomana a Mahometa, aole i pau ke hoomana nei no, a ke mau nei no ma kau wahi o Asia, a me Apenka.
(Aole i pau.)


Ka Hoomana Kahiko.
HELU 28.


               Ka loulou, ka ooihe, ka honuhonu, ke kuikui i ka wa kahiko ; eha noonoo ma keia kumu manao. 1. Ka loulou, 2. Ka ooihe. 3. Ka honuhonu. 4. Ke kuikui i ka wa kahiko.
               1. Ka loulou, eia kona ano. Oia no ka hoolou ana'e i ka manamana miki-poi o kekahi a me kekahi a paa me he makau ia, a i ko laua wa e kuu pau ai i ko laua ikaika. Alaila ; e wili ae kekahi ma ka aoao akau, a pela no hoi kekahi ma ka aoao hema. A ina e mohala aku ka manamana o kekahi i kekahi, o ke eo aku la no ia i kekahi o laua, a o kona kapaia'ku la no ia, he kanaka ikaika i ka loulou. He hana lealea no keia ma Hawaii nei i kekahi manawa. A he hana hakaka no hoi i kekahi manawa me ka haihai o na wahi manamanalima ke ku aki kekahi aoao, no ka makana i kona hoa loulou i ka wa a laua i loulou mua ai. Oia iho la no ke ano o ka loulou a me kana hana.
               2. Ka ooihe, o ka ooihe. He hana nui keia iwaena o na'lii a me na Alihikaua o ka wa kahiko a hiki wale mai i ke kau ia Kamehameha III. Aka, mamua'e o ka hana i keia hana, e ao no a makaukau i ka hele ana o ka wawae, a me ke ku ana o ke kino a me ka pahu ana i ka ihe, a me ka pale ana. A makaukau i keia mau loina, alaila ua kupono ia ia ke ku aku imua o kona hoa paio, o ka ihe e ao ai, he hau no ia i wahi ia o mua i ka welu a nolunolu, i ole e eha i ka wa e ku ai. A i ka wa e ailolo ai, alaila, o ka lalau aku la no ia i na ihe oioi o mua me ka manao ole i ke ola o kekahi a me kekahi, i ikeia'i ke akamai o ka haumana. Eia na ihe maikai, ke kauila, ka mamane, ka lama no hoi. Aia no i na laau paa, aole pono i ka laau palupalu. He hana maikai no keia o ka ooihe, he hana hoopale aku i na pilikia o ka makua.
               A he hana no hoi i ike ia ke akamai o na'iii a me na Alihikaua, ua olelo mai ka poe akamai aole ka e ku i na ihe, he kanaha a oi aku ke pahu ia i ka manawa hookahi. Penei, ina e loaa ka hoa kaua o kekahi alii, a i ko laua wa e kuu pau ai i ka laua mau mea eha, ino o ia kekahi aoao, ka pahu mamua, alaila, o ka pale kai kekahi aoao. A ina e ku kekahi o laua i kekahi, alaila, ua oi aku ke akamai o kekahi aoao.
               3. O ka honuhonu. Oia no kekahi hana lealea ma Hawaii nei. Penei ka hana ana ; e hoouka ae i ka wawae akau maluna o ka uha hema, a pela no hoi ka wawae hema, e hoouka'e maluna o ka uha akau, a pela no hoi kona hoa honuhonu. Aole pono keia hana lealea i ka mea hookahi, elua ka pono ; aia i ka wa e makaukau ai keia mau mea elua, alaila, e apo ae i ka lima akau ma ka poohiwi hema, a o kona lima hema ma ka aoao o kona hoa honuhonu, a pela no hoi kekahi o laua, a i ko laua wa e makaukau ai, alaila, e hoohuli ae kekahi ma ka aoao akau, a pela no hoi kona hoa ma ka aoao hema. A ina e huli i kekahi o laua, alaila, o ke eo aku la no ia i kona hoa. O keia hana a'u i ike ai, he hana lealea no, aole au i ike i ka hakaka o keia hana e like me ka loulou.