Ka Nupepa Kuokoa, Volume IV, Number 44, 4 Nowemapa 1865 — He wahi Moolelo no ko Hanaia make ana, he kaikamahine Fatuhiva. [ARTICLE]

He wahi Mooolelo no ko Hanaia make ana, he kaikamahine Fatuhiva.

Ma ka la 12 aku nei o Okatoba nei, make aku la o Hanaia, ke kaikamahine Fatuhiva e noho ana ma ka hale o John Ii, ma Mililani. He 12 paha kona mau makahiki. Ua manaoia, he mai no mai kona aina hanau mai, a ua hooponopono ia no me ka manaoia e pau ana ia mea, aka, ua hiki ole loa nae, no ka hoolohe ole no. Oiai o Ii ma na aina e, kona mea wale no ia e lohe ai. Pela ka nui ana o ka mai ia ia, a ua manaoia no, aia ma ka aoao akau kona mai, no ka mea, ua pala pu ia aoao i kona make ana iho. Ia ia nae e waiho ana iloko o ka nawaliwali loa ana, aole i poina ia ia o Ii, a e ake no e launa mau laua. Ina e lohe ana ia i ko Ii leo e pae ana mawaho o kona wahi e

moe ana, alaila, pae koke mai la kona leo uwalo, "E Ii e." Pela wale no oia e hana ai, a hiki wale i ka la ana i haalele mai ai i keia ao, me kona i mai, "Makau wau i ka make." Mai makau oe i ka make, he hiamoe wale iho no ia, a ala hou mai no. Ua kuaiia kakou i ke koko o Iesu Kristo ma kona make ana a ola hou mai la ia, a pela no kakou, e manaoio ia ia. Ina paha oe e hiki e aku malaila, a mahope aku nei hoi au, alaila, e kahea mai oe, "Hele mai kaua." A ma keia haina, he mea e ka olioli o kona mau hiohiona a pau o kona mau maka, a puliki paa mai la kona mau lima a i mai la, nui kuu aloha ia oe, e hai aku oe i keia mea i o'u mau kini ma ko'u one hanau, a o ko'u mau wahi lua kapa e hooili no lakou, a mahea au e waiho ai; e! na'u ia mea e malama, i hou mai la, e pule i ka Haku. A i ka pau ana o ia a me ka hooko ana, paa mau mai la kona mau lima, a ia'u i kaawale iki ai ma kahi o ke kauka, o ko ia la wa no ia i naue aku ai, hoi mai au ua hala e aku kela.