Ka Nupepa Kuokoa, Volume IV, Number 42, 21 October 1865 — Page 3
| This text was transcribed by: | Charlene Hara |
| This work is dedicated to: | Kamehameha Schools |
Ka Nupepa Kuokoa
KE KILOHANA POOKELA NO KA LAHUI HAWAII.
HUNAHUNA MEA HOU
O na’ Alua e.
HE KAHUNAPULE HOOPOINO I KE OLA.---He Kahunapule Lutera ma Lanabuka, Suekena, ua kau ia ka hoopai maluna ona, e oki ia kona poo, no kona hana ana i kekahi mea make iloko o ka waina ahaaina a ka Haku, a ua make eha o kona mau ekalesia. Ua olelo oia, ua like loa lakou me ka hiki ana mai o na kaumaha maluna o ka ekalesia, a ua paulele aku oia no ke kala ia mai o ka hewa i kela ao aku.
E ULU ANA PAHA, AOLE PAHA. ---I kekahi po hulahula, olelo akua la kekahi wahi kanaka i kekahi kaikamahine opiopio, "aole no anei oe i manao e ke kaikamahine opiopio e ulu mai ana ko'u mau umiumi?" Ia wa pane koke aku la ke kaikamahine, "e ka haku e ulu mai ana no paha, aka, aole nae i puka mai." Akaaka ka poe i lohe i ka hooniele a kahi haole kane.
HE LEHULEHU WALE NA KOA NEGERO. ---I keia wa ua ha@ia mai e kekahi nupepa, ua hiki aku ka nui e na koa Negero i ka akahi haneri tausani. A na ke aupuni e uku nei ia lakou. Paapu no ka ua koa negero o Amerika. Ina paha ma ka hoomoana ana ma ke kahua kaua, pehea la ko lakou kulana?
KA NUI O NA KOA. ---Eia malalo iho nei ka nui o na koa o kela mokuaina keia mokuaina i hele mai nei i ke kaua, i ka wa o ke kaua kuloko ma Amerika Huipuia. No ka mokuaina mai o Maine he 66,669 na koa; no Varemoneta he 34,490; no Konekituka mai he 54,468; no Rodilana mai he 25,355; no Viregenia Komohana mai he 29,012; no Matiguketa mai he 153,706; no Nu Hemasire mai he 33,258; no Kanasa mai he 21,948; no Peniselavenia mai he 360,000; no Iowa mai he 72,358.
HE EMPERA HOU. ---Ua haii mai, ke makemake nei ke Aupuni Berazila e hooliloia ke Alii (Prince de Joinville) ke kaikoeke o ka Empera Berazila, i Empera no na mokuhai o La Palata. He kaikuana no hoi ia no ka makuakane o ka Empera o Mexico. O ke kolu keia o na Empera o Amerika i noho ia e na ohana o ka mokuaina o Nu Olina.
HOOMANAO IA ABERAHAMA LINEKONA. ---O ka poe negero e noho ana iloko o Wasinetona, a ma na wahi e pili koke mai ana, ua houluulu ae lakou i ka puu dala nui he ehiku tausani. A ua manao lakou e kukulu i kia hoomanao no ko lakou mea nana i hookuu ae, mai ka noho ana kuapaa nui a ka noho ana oluolu e like me na mea e ae. Owai ua mea la a lakou e hoomanao ai? O Aberahama Linetona no ua mea la a lakou e hoomanao ai, mai keia hanauna'ku a hiki wale aku i na moopuna.
GEN. MAKALELANA. ---Ua haohao paha ko makou poe heluhelu i keia kanaka nui o Makalelana, i ka lohe ole ia o kona kulana a me kana hana. Ke hai aku nei makou, he Luna nui oia no ka Oihana Kinaiahi o Na loka. O kona uku he umi tausani dala no ka makahiki. Aohe no he pohaku a kana mai.
GEN. HAOAKA (HOWARD. ---Ua hoopuka ae a Gen. Haoaka he olelo papa, ina e hookuu ole aku na kanaka mahiai i ko lakou mau @a hookauwa kuapaa ia mamua i keia mau ia alaila, e lalau mai no na lima o ke Aupuni a hookuu ae i ka poe hookauwa kuapaa, a lalao aku i na kanaka e e mahi aku i na aina. No Marilana lalo, ka olelo papa a keia Gen. Haoka, no ka mea, nia paha iaia ka mana o keia mea.
HE HALE KUMUKUAI NUI E KAPILI IA ANA. ---O ke kanaka nana ka Nupepa Leda (Ledger) o Piledelapia, ua makemake oia e kukulu hou i hale oihana nona, no na lilo e hiki aku ana ka nui i ka ekolu haneri tausani dala ($300.000.) Aohe no he dala a kana mai a keia kanaka, he on a miliona no ka paha keia.
HE MAI HOU. --- Ke loaa nei na kanaka o Sana Beteroboro i ka mai, he ekolu haneri a hiki paha i ka ekolu haneri me kanalima i kela la keia la. O ka Averika paha o ka make i kela la keia la, he kanaiwa ka nui. Ke nui loa ka mai ma ia wahi a e piha pono loa'ku ana paha ma ka Akau a me ka Hema.
No Jeff. Davis.
Aia ma kekahi o na Nupepa i hiki hope mai nei, ua ike iho makou i kekahi olelo e pili ana ia Jeff. Davis, a penei no kana mau olelo:
"O Kauka Carvena, (Craven) ka mea i hoonohoia'ku ma ka papu o Monroe, e malama ia Jeff. Davis, ua hele wikiwiki aku oia e ike i kona Home ma Nuareka, Nu Ierese. A ua haawi mai oia i kekahi mau mea e makemakeia'i, no na mea e pili ana i ke kulana o kana poe paahao. Ua hai mai oia, ua maikai no ke ola o Jeff. Davis, aka, ua kaumaha nae kona naau. Ua ae ia o Kauka Caravena e kamailio pu me Jeff. Davis, aka i kekahi mau la mamua iho, ua halawai o Kela (C. C. Clay) me Jeff. Davis ma kekahi kahua, a ua kamailio pu laua ma ka olelo Farani, a ua lohe ole ka mea nana e kiai ana i ka laua olelo. No keia kamakainailio ana o laua ma ka olelo e, nolaila, ua hookapu loa ia, aole kekahi mea e kamailio me Jeff. Davis. a aole hoi e kakau palapala'ku i kekahi @es@"
O Kauka Caravena, aia kona wahi nolo ma Nu lerese. I ka wa i hoomaka'i ke kai a ua komo aku oia i ka puali koa, ma ke ano Kauka, ua hana oia ma Pota Roiala ma ia ano, mahope iho na papu Monoro.
Gen. Wariza (Wertz.)
Ke hookolokoloia nei o Gen. Wariza, he Gen. nana i malama maikai ole i na koa pio o ka Akau ma Adonavile. I keia wa e hookolokoloia mai nei, ua kaumaha loa ka naau o ka mea hoopiiia, a o kona mau hiohiona, me he mea la no e hoike mai ana i ka hewa o kana hana. O ka poe a pau e akoakoa ana malaila, ua olelo ae lakou, aole oia e ola hou houkahi malama, ke hookuuia mai ola mai kela hookolokoloia ana. O ka mea i ike hope ia mai nei, ua hoike ia he kanaka hoike.
He wahine opiopio a me ke keiki
uuku elua la ma ka moana.
Ma ka mokuahi Bellona i ku ae ma Nu Ioka ma ka la 4 o Augate, ua hai kokeia'e he wahi moolelo uuku no ke ola ana o ka wahine opiopio a me ke keiki uuku. O kekahi kane o F. Maea (Franz Meyer) a me kana wahine opiopio he 19 makahiki, o Ana kona inoa. He mau eemoku laua mai Canetona mai Suitalani, maluna o ka moku popilikia o Uilama Nelasona, ka moku i pau i ke ahi ma ka moana. I ka wa pilikia o ka moku, no ka a ana ae o ke ahi, ua nui lo@ ka walaau, a ia wa, ua kaawale aku ke kane mai kana wahine aku, a ua imi iho ke kane i kona ola, a haalele aku la i kona koolua opiopio e make. Iloko o keia wa pioloke, ua loaaa koke ae ke kane i kekahi mau waapa o ka moku poino. Aohe liuliu mahope iho, loaa mai la lakou i ka moku kialua, a law. ia ae la lakou me ke ola. O kana wahine opiopio hoi me ka laua keiki uuku he .14 la, ua waiho ia iho laua e make. A ma ka ma nao wale iho no o ka makuahine, paa iho la ia i kana keiki uuku iluna ke alo, a lele aku la iloko o ke kai me ka makau ole.
Elua la, a elua po o ka malama ana o keia wahine iaia iho a me kana hanau kahi ma luna o kekahi i-a o ka moku poino, me ka a ole i ka ai, a me ka inu ole i ka wai. Ua hanai iho oia i kana keiki i ka a-e o kona waha, ia laua e lana malie ana ma ka ili o ke kai. I ka lua o ka la, o ka moku a ke kane e noho nei, ua manao ia poe, aohe e loaa hou ana kekahi mau kino ola, aka, ua lokomaikai ke Akua, a ua hoohui mai i ke kane, ka wahine a me ke keiki uuku me ke ola pakahi, e hui hou maluna o ka moku a ke kane e noho ana. I ko lakou hiki ana'ku i Havere, Farani, ua lilo koke ke keiki i ke Kanikela Perusia e noho ana ma ia awa ku moku, me he me la, oia maoli ka makua o kela keiki. I ka lohe ana o na wahine o Havere i keia mea, ua komohia lakou e ke aloha i keia wahine wiwo ole, a me kana kane, a ua olelo aku lakou e holo laua ma ka moana Atelanita e imi ai i wahi noho no laua ma ke komohana.
He mau Mahoe Hookahi Puu-
wai, o Kana (Chang) a me
Ena (Eng.)
Aia ma Amerika Huipuia i keia wa, he mau Mahoe hookahi puuwai no Siama mai. Ina makahiki he kananakolu i kaa hope ae nei; e kaahele ana laua ma na moku aina hui o ka Akau, me ka hoikekeia laua iho, i kela mea kupanaha i loaa ia laua, oia hoi, o ka hookahi ana o ko laua puuwai. Ua nana nuiia e na Kauka akamai o Amerika, a ua ikeia hookahi o laua puuwai, a o kahi i waiho ai o ko laua puuwai, aia mawaena konu o kahi i hui ai ko laua mau kino a elua. I ka loaa ana o ka laua mau dala noloko mai o ka laua Oihana hoikeike imua o ka lehulehu, ua kuai aku laua he wahi aina ma Carolina Akau. Malaila laua i noho kokoolua ai a mare like laua i na wahine; a ua hua mai na laua he umikumamakolu keiki a kekahi, a pela no hoi ka kekahi. Ua noho oluolu like lakou a pau me ka maikai; a hiki i ka hoomaka ana mai nei a ke kaua huliamahi a Amerika, Ka mea nana i lawe ku aku i ko laua waiwai. A ua hoike ae laua i keia wa, e hele hou i ka Oihana mua a laua i kinohi, oia hoi ka hoikeike iho ia laua imua o ke akea, i mea e hoi iki mai ai kau wahi waiwai o laua i lawe wale ia'ku ai me ka menemene ole iho i ka waiwai a na kanaka i hanau eepa ia mai ai. A ua hoike hou ae no hoi laua, i kekahi wa, e hele no ma ka Akau e hoikeike ai, a i kekahi wa hoi i ka Hema.
Eia mai ka mea kupanaha i ua mau Mahoe nei, I ka hoomaka ana mai nei o ke kipi nui, ua ikaika loa ke kuee ana mawaena o laua no na mea e pili ana i ke Aupuni. O Ena, ua ikaika loa kona manao i ke kokua i ka poe kipi, a o Kana hoi, ua ikaika loa kona kokua anai ka poe o ka Akau. Ia wa, huki o Ena i ka Hema a he mau kapuwai, naenae in, a pau loa kona aho, a hoomana iho la. Ia wa, huki aku la o Kana, a hala kahi a laua i hoomaka mua ai, a oi wale aku, naenae ia. Ilaila laua i aumeume ai a pau na ano, nui ka hanu, kaka na hou, a kua ka luhi. A noho oluolu laua mahope iho, a i ka lohe ana o laua e hiki mai ana o Gen. Butala ma ua wahi la, a laua e noho ana, ulu hou ka hoopaapaa o laua, a hana hou e like me mamua. I kekahi wa, nui loa ka ikaika o Ena, a o ka mea hope loa i ike ia aku, ua lanakila o Kana. Mahope iho, hoopai ae la laua i ko laua manao ho'opaa, a hoi aku a kau hale, haalelele na pu a me na pahi, a noho wale iho la. Ike mai la na wahine a me na keiki, a olelo iho la laua, aole e hana hou e like me keia. Eia kahi mea apiki, ina e make kekehi o laua, pehea la auanei ke kokoolua? Make pu paha, aole paha?
______________________
Ka Moolelo o Persia mamua'ku nei.
I ka makihiki 1258 o ka era Kristiano, auhulihia ke aupuni o ka poe Sarekena i ka, poe Tata (Tartars.) A lilo ka hooponopono ana o Peresia i ka poe Tata no kahi mau manawa he nui. A mahope, mai lilo i na'lii ka hoomalu ana i ke aupuni; o Sopisa (Sophis) a me Sa (Shahs) na inoa'lii. O ka mua o keia mau alii, o lsemaela, he kanaka oia no ka ohana o ka poe Sarekena. Lilo ia ia ka Noho Alii ma ka ikaika, a Noho Alii iho la oia i na makahiki he 23.
O ka mea nui o keia mau Alii, o Sa Aba (Shah Abbas.) Noho oia maka Noho Alii i ka makahiki 1589. Kaua aku oia i ka poe Tureke a loaa ka lanakila maikai iaia. A ua lawe ae no hoi oia i na aina o ka poe Pukiki ma ka hikina.
Aka, o ka mea oi loa o keia poe Alii, o Sa Heseni (Shah Husseyn;) oia no hoi ka mea hope loa, a i oi o ka pomaikai. Hoomaka oia e noho ma ka Noho Alii i ka makahiki 1694. A halawai iho la o Heseni a me kona mau luna me na popilikia he nui, a kipaku ai oia mai kona Noho Alii ae.
Mamua iho o kona wehe ana i kona papale Alii mai kona poo ae, hele ae la o Hesini ma na alanui o Isepahaoa, oia hoi ke kulanakauhale nui. Paiauma mai la na kanaka me na waimaka a me ka uwe kanikau. A hooluolu aku la ke Alii Lokomaikai ia lakou.
Hai aku la oia ia lakou, o ke Alii hou o Mamouda (Mahmouda,) aole ona aloha i na kanaka, e like me ia la (Hesini;) aka, ua ike no nae oia i ka hooponopono ana ia lakou a me ka hoolanakila maluna o na enemi. A wehe ae la oia i kona papale alii, o kona wahi mea pilikia wale no ia, a aloha aku la oia i kona poe kanaka.
I ka makahiki 1730, lilo ae la ka Noho Alii o Peresia ia Kouli Kana (Kouli Khan.) A kapa iho la oia iaia iho o Nadira Sa (Nadir Shah.) Oia ka mea lanakila kaulana, a make powa ia oia ma kona hale lole mahope mai o kona Noho Alii ana i na makahiki he 17.
Ia wa i make ai o ke Alii, ua nui ke koko i hookahe ia ma Peresia. O na kanaka hanohano, makemake mau lakou e noho i ka Noho Alii, a e hoohui i ke anaina ma ke kaua huliamahi. O ke Alii ma ia hope mai, ua oleloia he kanaka maikai ae oia mamua o na'Lii mamua ae ona.
Noho mau ke Alii ma ke kulanakauhale o Teherana (Teheran.) Aka, he Halealii maikai no kona ma Isepehana, i kapaia ka Halealii o na Kia he kanaha. Ua kokuaia kela kia keia kia e na liona kii pohaku mapela keokeo eha. O ke kino holookoa o ua Halealii la i ka nana'ku, me he mea la ua kapili pu ia me na moni, ke dala, a me ke gula a me na pohaku makamae e ae.
Ke hoopau nei au i ka moolelo o Peresia maanei. E like me ka lehulehu o na aina e ae ma ka hikina, i hoopuniia me na kaao lokoino, ke kaua, ka hookahekoko ana. I ka wa kahiko, ua hoomana na kanaka i ka la, a ua kulou imua o na kii. Aka, iloko o ma makahiki he tausani a oi aku ua lilo lakou i poe manaoio i ke Kaula wahahee ia Mahometa.
Aole loa lakou i launa iki me ka mananio o Kristo, ka mea i ao mai ia kakou e noho akahai, a e kala aku i kekahi i kekahi, a no ia mea, ua noho mai ka lokoino iwaena o lakou.
He aina olulu maikai o Peresia, ua hoopuni ia oia e ka nani a me ke ala onaona o na laau a me na pua. O na kanaka o keia wa, aole puni kaua loa e like me ko ka wa mamua. O ka poe waiwai noho no lakou ma na hale Alii nani, a o ka poe ilihune ma na pupupu hale lepo. Ua uuku ke Aupuni o keia wa ke hoohalike ia me ke Aupuni o Kereke (Xerxes). Peresepolisa (Persepolis) ke kapitala kahiko, a i keia wa ua lilo oia i puu opala o na mea i hoohioloia.
A o keia mau mea i hai ia aku nei aole paha e makemake ia ana ke ano o ko Peresia; aka nae aole i pau loa i ka hana hewa. O na kanaka, ua makemake no i ka heluhelu a me ka hahai ana i na moolelo hoonaauao; he nui no o ia mau mea i kakau ia mai ia wa mai a ua oi koa no ka nani. He makemake no hoi na kanaka i na mele, a me he mea la, ua makemake i ka nani o ka noho ana, a me ke aloha i ka pono.
Makani Ikaika.
Ua hiki ae he palapala i na Luna Aupuni o Amerika, he makani ikaika kai hiki ae ma na mokupuni o Borabora a me kekahi mau mokupuni e ae nona na inoa haole Harvy, and Palmerston. O kekahi o na mokupuni o Palmerston, e ku ana ma ka hikina akau, ua puhi ia'ku ka lepo a koe wale no o na pohaku akoakoa i nahaha, me he mea la, ua wawahiia e na ale kupikipikio o ka moana i ka wa malie. O keia mau mokupuni a pau ua ike wale ia no e ka poe holo ma na moku okohola, aia lakou me ke kai Hema.
Aa Palapala.
Palapala mai Uapou mai.
-------
E KA NUPEPA KUOKOA; E OLUOLU OE.--- Ua loaa mai ia’u he palapala mai a S. Kauwealoha mai, ma ka la 25 o Sepatemaba aku nei, i kakauia ma ka la 6 o Iune, e hai mai ana, ua ili ae maluna ona, a me Rev. Kekela, na makamaka o kakou e noho mai la ma ka pae aina o Fatuhiva, ka hoahewa ana o na kahuna Pope, a me ke Kiaaina ma Nuuhiwa ia laua, no ka lawe ana mai i Oahu nei i na kanaka o Fatuhiva, a me Honomanu, ma Hivaoa, ma ka moku Hokuao, me ka hai mua ole aku ia lakou. Ma keia mea, ke olelo la lakou, “ua hewa na misionari mai o Oahu mail.”
A ma keia mea, e hoakaka iki ae au, no ka mea, owau kekahi oia huakai ma ua moku Hokuao la, i hoouna elele ia ma ke kauoha a ka Papa Misionari Hawaii, oiai ua hookuu ia au mai ka oihana aupuni ae, e like me kuu hele elele ana, mamuli o ke kauoha ana a ko ke aupuni kino e holo i Kaliponia, i hoike no kekahi hihia mawaena o ke kanaka Hawaii, a me ke Aupuni Amerika mamoa ae nei; a pela no keia huakai a’u o ka hele ana aku nei, ma ka hoouna ana a ka Aha Misionari, ma na mea e pili ana i ke aupuni o ka Haku ma ka honua nei.
Aka hoi, he mau la elua mamua ae o ko makou haalele ana iho i ko kakou kulanakauhale Alii nei, ua kauohaia mai au e kekahi mea Hanohano o ka Aha Kiekie, e hele aku wau malaila. A malaila hoi i haiia mai ai ia’u, ua kauoha ae na komite ia Bikanele, a me ke Kapena o Kokuao, no ka lawe ana mai i na kanaka oia lahui i anei, ke makemake mai lakou, a ke ae pono mai na’lii o lakou. A i ko makou hiki ana ilaila, aole no a’u hana no keia mea, a hiki wale hoi i ko makou haalele ana ia mau mokupuni, a hiki hou mai i ko kakou kulanakauhale Alii nei. A oiai hoi, aohe i pau loa i ka lele aku i uka na Fatuhiva, a ma ka la elua ae o ko makou hiki ana iho, ua kauohaia mai au e kekahi mau mea o ua poe komite la. Halapu makou ma ka moku Hokuao, oiai laua me a’u ma ka moku ia wa, oia ke Kuhina Waiwai, a me Dr. Hilipalani, e noi mai ana ia’u, ma’u e malama ka hapa oia poe i koe ma ka moku, nolaila, ua lawe mai au ia lakou ma ko’u hale. Akahi no au a hooko ma ka lakou kauoha mai ia’u e malama i keia poe ma ko’u hale, e like me ke kauoha a ka Haku, “E aloha aku i kou hoalauna, e like me oe ia oe iho.”
Aohe o'u manao, ua pono ole ka lawe ana mai a lau'la ma'ke kauoha a na komite, no ka mea, ua maopopo i ko'u manao, o ka hoonaauao ana ia lakou a naauao, a akamai ma na hana a pau, a hoi aku ma ko lakou aina, loaa hoi ka poe nana e ao aku, no ka mea, aia ma Honomanu kekahi kanaka i hoonaauaoia ma Hawaii nei, ma kona noho pu ana me Rev. J. Bikanele, ina makahiki elua a ekolu paha; he kanaka kamaaina no ia wahi, o Honiae kona inoa, he kumu kula oia i keia wa no ia awawa, he 10 ana haumana a oi ae, ua ike lakou i na mea ana i ao aku ai. I kuu was ma Oomoa, ua kokoke e hoi mai makou, ike ae lau au'i ka uluaoa o ka poe makemake e holo pu mai me makou. Ia wa i olelo mai ai o A. Nakua ia'u, e hoouna mai ana ia i kana mau keiki elua, e ao ia maanei i ka naauao a kamai, alaila hoi aku e like me Honiae, pela mai kana ia’u. Ina no peia, aole pono ke olelo, “ua lawe aihueia mai lakou,” e like me ka moku Peru mamua a kakou i lohe ai. Ua oki au me ke aloha.
John. Ii.
Mililani, Honolulu, Ock. 10. 1865.
---------
He lohe wale ana.
------
I KA NUPEPA KUOKOA KA MANAO NUI. ---A no ka mea. o kela haina maluna, eia no ia: “He lohe wale ana” ma ka la 5 o Okatoba iho nei, oiai hoi wau a me kuu mau makamaka, e u iho pu ana makou i kai ma Alanui Papu, oiai makou ua haalele ae i ke Keena Kalaiaina. Hai mai kekahi o laua ma ko laua lohe, no ka hoopiiia o ka L. K. A. o Kipahulu, a me ka L. K. K. o ia Apana 2, no ka hoopai K. ole ana ka o ia mau Aha, wahi a laua.
A heaha la ia ma ko’u manao ana ia wa a laua e olelo mai ana. A i ka hora 2 kakahiaka, o ka la 7 mai, ala mai la ko’u lunamanao, a noonoo mai la i ka mea a’u i kohe ai ia laua’la; no ka mea, ua hooiaio mai ia lohe ia’u, no ko’u lohe ana i kekahi hihia o keia ano like loa, oiai au ma Nuu, i Kaupo, Maui; ua hiki au ilaila ma ka la 6 o Mei, a ma ka lehulehu o na kamalii o ia wahi ka’u nana ana; a no ia mea, olioli mai la kahi manao, a ninau ae la, “ke ao ia nei no nae paha ma ke kula? Ae, wahi a na kamaaina, a ua pau iho nei nae ke kula, no ka pau ana o ke kumu nana e ao. A no ka hiki ana mai o kekahi haole Farani nana i hoohuli iho nei i na makua ma ia hoomana, a ua pau pu me na keiki malaila. A i ka hoakoakoa ana o na keiki me ia kula, ua lawe pu ia me ka Manu keiki malaila. A i ka lohe ana o Manu i keia, ua kii oia i kana keiki e hoihoi mai, aka aole nae he loaa mai, no ka mea, ua paniia ka puka o ka hale. A no ia mea hoi, kahea aku la o Manu ma ka inoa o kana keiki, a o mai la. Kahea aku la no o Manu ia ia e puka mai iwaho, a puka koke mai la ia, a loaa ia Manu. A no ia mea, lele koke mai la ua haole nei e pepehi ia Manu, nolaila, holina koke o Manu i ua haole nei, a ua hoopiiia i ka L. K. A. o Kipahulu, a ua hoopaiia.
A ma ka manawa a ka Aha Kaapuni o ia Apana i hiki ai malaila, ua hoopii ua haole nei imua oia Aha. A mahope o kana nana ana i na olelo hoike a pau o kela keia aoao, ua hoopuka ia ka olelo hooholo, ua hewa no ka haole. A nolaila, olelo ka ua haole la, “E hoopii ana wau i ko’u Aupuni no keia mea.”
He palapala kumu no nae paha kona? Aole, wahi a na kamaaina. Oia nae paha ke kahuna oia aoao ma keia wahi? Aohe, he mea e ae no ia, aohe ana kamailio. Auhea ia haole? Auhea la, aohe ike ia. Pela ka lohe ana. E oki au me ke aloha. J. h.
Aha Kaapuni, o Hawaii, Apana 3.
---
Eia malalo iho nei ka nui o na hihia o ka
Aha Kaapuni o Hawaii, ma ke kau hookolokolo o Sepatemaba, ma
WAIMEA.
Ke Alii kue ia Kalio, Kaona, a me Kamaunu (k). Hoopiiia no ke puhi hale, a ua hookuuia. O W. P. Ragsdale (Bila) ke kokua o ka poe i hoopiiia ma ka ae ana mai o ka Aha.
Ke Alii kue ia Kale; hoopiiia no ka aihue, a ua hoopaiia. O J. Kamolamola no ka aoao i hoopiia.
Ke Alii kue ia -------; hoopiiia no ka aihue ana i ka waiwai mai ka Halekuai-lole mai o ka poe Hui o ka Mahiko o Kahala, a ua hoopaiia.
Ke Alii Kue ia Kaaua; hoopiiia no ka lawelawe i na mea hooweliweli, a ua waihoia.
Ke Alii kue ia Hana (w); ua hoopiiia no ka mare lehulehu. Ua ae aku no oia i kona hewa imua o ka Aha, ua hoopaiia ma ka hana oolea no ma malama ekolu, me akahi dala uku.
Ke Alii kue ia Joseph Ravens alias , Keo Puhipaka; hoopiiia no ka pue wahine; a ua hoopaiia ma ka hana oolea no na makahiki elua, a me $1. me ke koina pu.
Na hihia Kivila.
Geo. Davis kue i na Luna Aina Aupuni. Ua waihoia imua o na Lunakanawai Kiekie ma Honolulu, Mamuli o ka ae like ana o na aoao elua.
Ua hoolohe no ka mea Hanohano i na hoopii he nui no ke oki mare, a e koi mai ana e mare hou.
MA HILO.
Ke Alii kue ia Keawekane, Kaukuna, Maikai (k), a me Keakuahooulu (w); ua hoopii ia no ke kuamuamu ino, a ua hookuuia. O W. P. Ragsdale (Bila) ka mea kokua i na mea i hoopiiia, ma ka ae ana mai o ka Aha.
Ke Alii kue ia Daner; a ua hoopiiia no ka lawelawe i na mea hooweliweli, ua hookuuia. O Bira ka mea kokua i ka mea i hoopiiia ma ka ae ana mai o ka Aha.
Ke Alii kue ia Kahalawaia, Kahele; ua hoopiiia no ka wawahi hale a me ka aihue, a ua hoopaiia elua makahiki ma ka hana oolea me ke koina pu. O W. P. Ragsdale (Bira) ke kokua o ka mea i hoopiiia, ma ka ae ana mai o ka Aha.
Ke Alii kue ia Mahoe a me Hana; hoopiiia no ka moekalohe, a ua hoopaiia e ka Lunakanawai Kaapuni, a ua hoopii hou aku laua imua o ke Jure, a ua hoopaiia no.
Ke Alii kue ia Mokuhalii a me Keona; ua hoopiia no ka moekalohe, a ua waihoia.
Ke Alii kue ia Hakuole; hoopiiia no ka wawahi hale a me ka aihue. Ua ae aku no ka mea i hoopiiia i na hewa elua.
Ke Alii kue in Puhau; ua hoopiiia no ka wawahi hale a me ka aihue. Ua waihoia e ka Aha.
O ka Mea Hanohano E. H. Allen, ka Lunakanawai nana i hoolohe i keia mau hihia.
----
Na Luna Kula i hookohuia e ka Papa Hoonaauo.
----
HAWAII.
Apana.
1. Hilo, G.S. Kenway.
2. Puna, J.H. Helelube.
3. Kau, C.N. Spencer.
4. Kona Hena, P. Cumings.
5. Kona Akau, H.N. Greenwell.
6. Kohala Hema, D. Manuia.
7. Kohala Akau, D.K. Naiapaakai.
8. Hamakua, G.W.D. Halemanu.
MAUI.
1. Lahaina, C. E. P. Nahaolelua.
2. Wailuku, A. M. Kahalewai.
3. Hana A. Unna.
4. Makawao, P.Nui.
5. Molokai, R. W. Myer.
6. Lanai, H. E. P. Nahaolelua.
OAHU
1. Honolulu, W. Jas. Smith.
2. Ewa a me Waianae, J. P. S. Halulu.
3. Waialua, J. F. Anderson.
4. Koolauloa, R. Moffit.
5. Koalaupolo, C. H. Judd.
KAUAI.
1. Waimea, V. Knudsen.
2. Koloa, J. W. Smith
3. Nawiliwili, P. Isenberg.
4&5. Koolau, D. Nuuhiwa.
6. Niihau _____
W. JAS. SMITH
Kakauolelo o ka Papa Hoonaauao.
Keona Hoonaauao. Oct. 6, 1865.
----
Aha Hoomalu.
Oct. 12. Hoopiiia o H. McCubbins no ka ona, bela ia $6.00. Edward Brown hoopaaia no ke kuai waiona me kekahi kanaka $10.00, koina 3.50. Oct. Kawakipi w. hoopaiia no ka holo nui, bela ia $10.00, koina $2.00. Kekia w. hoopiiia no ka holo nui, bela ia $10.00, koina $2.00. Kaaipuupuu hoopaiia no ka holo nui he $10.00, koina $3.62 1/2. Hugh Johnson hoopiiia no ka ona bela ia $5.00. Geo. Byland hoopaiia no ka hana i na mea ino wale $25.00, koina $3.00. Adamau hakaka, hoopaiia $6.00, koina $1.50.
Oct. 17. Kailua hoopiiia no ka holo nui, bela ia $10.00, koina $2.00. Kala holo nui bela ia $10.00, koina $2.00. Makole w. hoolo nui bela ia $10.00, koina $2.00. Keola holo nui, bela ia $10.00, koina $2.00.
Oct. 18. James Duncan holo nui hoopaiia $10.00, koina $3.37. Wahineanao holo nui hoopaiia $5.00, koina $3.37. Kalaauhopoole aihue, hoopaiia $15.00, koina $1.37, a me ka hana i ka hana oolea 2 makahiki.
Oct. 19. Makahi holo nui, bela ia $10.00, koina $2.00. Keliiwaaole aihue rama, hoopai 6 malama e hana’i i ka hana oolea, no ke koina $3.25. Wm. P. Ragsdale, pepehi i kana wahine mare, Hoopanee ka Aha i ka hoopai.
---
He paihakahaka Helu Ekalesia no
ka Aha Euaneli o Hawaii.
Komohana.
---
INOA O NA KIHAPAI.
1. Pau loa o ka poe komo hoike mai.
2. Pau loa o ka poe komo palapala mai.
3. Komo hoohiki i keia makahiki iho nei.
4. Komo palapala i keia makahiki iho nei.
5. Pau loa i hookuu ia aku.
6. Hookuuia i keia makahiki iho nei.
7. Pau loa o ka poe i make.
8. Make i keia makahiki iho nei.
9. Waiho ia aku i keia makahiki i hala ae.
10. Pau loa o ka poe i okiia.
11. Okiia i keia makahiki i hala ae.
12. Na hihia i hoihoi ia mai i keia makahiki iho nei.
13. Huina o na hihia e noho ia mawaho.
14. Pau loa o ka poe e noho paa nei.
15. Na keiki a pau i Babetisoia.
16. Babetiso ia i keia makahiki iho nei.
17. Na mare i keia makahiki iho nei.
18. Huina dala kokua i keia makahiki i hala.
-----
MARE.
Oct. 12, ma Honolulu, mare o kanaulu (k.) me Kapaalua, no keia kuianakauhale laua. Na Rev. H. H. Pureka i mare.
Oct. 18, ma Honolulu, mare o B. Kiha (k.) me L. Kanihokapu (w.) no Waikahalulu lana. Na Rev. H. H. Parcka i mare.
-----
HANAU.
Sept. 23, ma Kumuhau, Waimanalo, Oahu, hanau o Iankea (k.) na Kane me Maalo.
-----
MAKE.
Sept. 30, ma Hamohamo, Waikiki-kai, make o Kumauna (k.)
Oct. 4, ma Kaluanui, Koolauloa, Oahu, make o Mele Kalikolani Punihaole (w.)
Oct. 7, ma Kowaka, Waikiki-kai, make o Kalaina (w.)
Oct. 16, ma Kawehewehe, Waikiki-kai, make o Kalaoone (k.)
----
E. C. McCandless. Capt. Paty.
E. C. Makanedala ma.
(E. C. McCandless & Co.)
AIA MA KE KIHI O KE ALANUI
Papu a me ke alanui Alii. Ua makaukau makou no
kekahi mau mea ai i makemakeia e ko Honolulu nei, a
me ko na mokupuni e ae; eia no ia mau mea malalo nei.
Kamano lo ula maikai loa – Popo Palaoa.
Berena oolea – Berana liilli – Meaono.
Ko keokeo – Kope- Ko ula –Kopa.
Aila – Kukaepele polu – Kolu hooluu.
Lole – Pia lole – Hinai – Pakeke – Hue ie.
Kulina – O ka ai a ka Lio – Hulta – Barana.
(ili o ka hulta) – Pia kuiina – Omaka haole.
(Sardine.)
E hele mai oukou e nana i na mea a oukou i makemake ai maloko o keia Halekuai mea ai.
---
OLELO HOOLAHA.
---
LUNA HOOPONOPONO WAIWAI
o MAELE (K.)
EIKE NA KANAKA A PAU I KEIA E like me ka mana i loaa ia’u wai ka Luna Kanawai Kaapuni Apana Ekolo, Mokupuni o Hawaii; Nolaiia, ka kahea aku nei ku i ka poe i aie mai ia MAELE (k.) o Laupahoehoe, Hilo, Hawaii, i make aku nei, a me ka poe ana i aie aku ai. E hele mai lakou ma kuu halenonoma Laupahoehoe, Hilo, Hawaii; no ka hookaa’ku, a me ka hookaa mai i na aie e like me na olelo maluna, iloko o na malama Elua mai keia la’ku.
J. J. PORTER.
Luna Hooponopono Waiwai.
Laupahoehoe, Hilo, Hawaii, Oct. 2, 1865.
__
OLELO HOOLAUA.
---
EIKE AUANEI NAKANAKA A PAU E nana mai ana i naia Olelo Hoolaha. Owau o ka mea nona ka inoa malalo iho; ua hoonoho ia mai au a me Kauhi (e.) i mau hooliina no Iosepa Maimai (k.) o Makila, Lahina, i make aku nei. e F. W. Huighison ka Luna Kanawai Kaapuai mua iho nei, a ua mahele la ko’u wahi, a me ko Kauhi (w.) wahi, oiai o maua no kona mau pili kino elua i koe ma ko makou hanau ana. A ua koho no mana la M. Ihihi a me D. Kahauielio, a me G. W. Kahulu, a me D. H. L. Hakuole i mau Komite mahele like no na wahi waiwai paa o ko maua kaikuaana i make. 1 Apana aina wale no kai maheleia e na Komite. penei ka lakou mahele ana, ma ke kua o ka hele hai au mauka, a ma ke alo o ka hale hoi aku o Kauhi (w.) ma kai, oia no ko maua kaikuahine ponoi me Iosepa Maimai. Aloha oukou.
E. Kekua.
Makila< Lanaina, Maui, Oct. 1865.
---
Haalele ia Hawaii.
---
KE HAALELE NEI MAUA I NA KALAulu o Hawaii nei, a ke weio nei ka hae o D. C. Murray, o kahea mai ana ia mana e kau aku malena e kona mau pelekai. Ke haawi aku nei maua i ko mauo aloha no ka poe a pau a maua i kanna oluolu ai. E hele ana maua e imi i mau Lole ana hou no ko kakou nei Kaona Alii. Iua e loaa, aiaua, e hoi mai no maua, aka, aole nae i ikeia ka manawa. E hoohiki aku ana paha ia Kalepooi, aole paha. Nolaila, i keia ia maua e nalo ai ko maua mau make mai o oukou aku. Me ke aloha no.
AKAKA.
AKO.
Honolulu, Oct. 7, 1865.
---
Laiki me ka Ili!
EIKE AUANEI NA KANAKA A PAU I kaua i ka laiki a ua hua nui mai, a eia ma ko oukou mau hale papaa. Ka poe ma Oahu nei, a mo na Mokupuni e ae o kela Aupuni. Ke makemake nei ka mea no ka inoa makelo nei, e uku aku i ke kumukuai kiekie no ka paona laiki me ka ili, ke lawe ia mai ma ka Hale Wili Laiki ma PUNALUU, Oahu, a i ole ia, ma ka Hale Kudala o ka Luna Kudale o Hanale W. Severance ma Honolulu, Oahu E uku la no me ka oluolu kupono i na mea a pau ma ke kamailio ana me ka oluolu.
HANALE W. SEVERANCE.
Ageno ka Rice & Co.
Honolulu, Oahu, Oct. 7, 1865.
----
OLELO HOOLAHA!
EIKE AUANEI NA KANAKA A PAU.
Ke papa aku nei au i na kanaka a pau e kua wahe ana
a e lawe aku ana i wahie mai ka Aina aku o ke
Kulanui o Kapunahou,
mauka o MANOA. Ina e kua kekahi i keia Olelo papa, alaila,
e hoopila no ma ke Kanawai.
W.E. ALXANDER.
----
Olelo Hoolaha!
UA MAKEMAKE IA I ELUA
mau Buke o ka
“Hoku Pakipika”
o ka makeiki mua, i Elima Dala ($5.00) ke kumaka) a e la we mai ma ke Kema o ke “KUOKOA.”