Ka Nupepa Kuokoa, Volume IV, Number 30, 29 July 1865 — Page 1
KA NUPEPA KUOKOA
KE KILOHANA POOKELA NO KA LAHUI HAWAII.
BUKE IV. HELU 30. HONOLULU, IULAI 29, 1865. NA HELU A PAU 191.
" KA NUPEPA KUOKOA.,"
HOOPUKA MAU IA MA HONOLULU
I kela Poaono keia Poaono.
$2.00 no na mahina he UMIKUMAMALUA,
$1.00 no na mahina eono, ME KA HOOKAA MUA MAI.
NA OLELO HOOLAHA — aole i oi mamua o 10 laina no ka hoopuka hookahi ana, $1.00 ; alua komo ana, he $1.50 ; hookahi malama, $2.00. E uku mua ia mai ke dala o na olelo hoolaha a pau e hoounaia ana mai e pai.
KANIKAU — he hapalua dala ka uku no ka aoao hookahi o ka pepa leta, oia hoi 4 keneta no ka lalani hookahi — penei : he 25 lalani, $1.00 ; 50 lalani, $2.00 ; a pela'ku.
KA UKU NO NA OLELO HOOLAHA — ka uku pepa, a me ka uku o ka Kanikau, e haawiia no ma ka lima o na Luna o ke Kuokoa, a i oleia, e hoouna mai ia Kauka Kulika.
O KA UKU PEPA A PAU E HOOKAA MUA MAI NO — aole e kauia ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua. E pono ke hiipoiia keia mau rula, no ka mea, he emi no ka auhau no keia nupepa.
AIA KE KEENA O KA NUPEPA KUOKOA — ma ke kihi hema o ka Hale Hookipa Luina (Sailor's Home.) O na hora hana, mai ka eiwa o kakahiaka, a i ka ha o ke ahiahi.
L. H. KULIKA, (Lona Hooponopono.)
KA " NUPEPA KUOKOA."
Is published in Honolulu
EVERY SATURDAY,
$2 00 per annum, or $1.00 per six
months, in advance.
ADVERTISEMENTS not exceeding 10 lines, inserted once for $1.00 ; twice for $1.50 ; and $2.00 for one month ; all advertisements must he paid for in advance. KANIKAUS will be charged 1.00 per page, or 4 cts. a line. PAYMENTS FOR ADVERTISEMENTS, Subscriptions or Kanikaus, may be paid to any of the Agents of the Kuokoa, or may be enclosed in a letter to the Publisher.
ALL SUBSCRIPTIONS must be PREPAID. No names, either of foreigners or natives will be inserted on the subscription list until paid for. This rule must be strictly adhered to, on account of the low subscription price. THE OFFICE OF THE KUOKOA is in the South corner of the Sailors' Home. Office hours from 9 A. M. to 4 P. M.
L H. GULICK.
Publisher.
Volume I. II. and III of the KUOKOA, bound, for sale, $3.50 each.
Persons having complete sets of the above, can have them bound by paying $1.50 each.
KA BUKE UNUHIOLELO A ANERU !
UA PAA UA BUKE NEI, E HOIKE ANA I ke ano o na hua olelo Hawaii, a ke kuai ia nei ma ka Hale Kuai Buke o Wini. Elua ano o ua Buke la ma ke kuai ana, $5 Dala ko kekahi, $6 Dala o kekahi. Eli-
ma haneri me kanalima kumamaiwa aoao iloko o keia BUKE UNUHIOLELO, a ua piha loa i ka momona o ka naauao.
H. M. WINI. Mea Hoopuka Honolulu, Mei 22, 1865.
S. KUPANEA. J. W. KEAWEHUNAHALA.
Loio ! Loio !
KE HOOLAHAIA'KU NEI I NA KANAka a pau o keia Aupuni, ua makaukau na mea nona na inoa maluna e Kokua, a e lilo hoi i LOIO no na mea a pau e loohia ia'na i ka hihia, a e pale ana no kekahi hihia imua o na Aha Hookolokolo o keia Aupuni. He mau mea laua i aoia i ka OIHANA HOONAAUAO ma ke Kulanui o LAHAINALUNA, a ua aoia hoi ma ka OIHANA Kanawai, a me ke kakau ana i na Palapala o kela ano keia ano, e ka Mea Hanohano G. M. ROBERTSON (LOPIKANA.) A o ko laua Hale Oihana, aia mauka iho o ka huina o ke Alanui Hotele a me Maunakea ma Honolulu, Oahu.
Honolulu. Feb. 6, 1865. 167-y
HUA KUKUI, HUA KUKUI.
E IKE AUANEI NA MEA A PAU LOA O ke kua aina, owau o ka mea nona ka inoa malalo iho nei, he hoaloha no oukou no na kau i hala ae nei, ma ke kuai Pepeiao Laau ana. Ua hala aku la ia kikina, he AU HOU keia, a ke kahea aku nei au, e kuai no au i na HUA KUKUI i kalua ia a moa, alaila, e ki-ke ia ka iwi a pau, a o ka IO wale no ke lawe mai, e hoomaemae i ka la a maloo maikai. A e haawi no wae EKOLU DALA ME HAPALUA ($3.50) no ka barela hookahi. I ka poe e imi ana i keia, a lawe mai, e loaa no wau ia lakou ma ka Halepohaku o M. Kekuanaoa, ma AIENUI.
E WIKI, MAI KAULUA !
CHUNG HOON & CO. Aienui, Honolulu, Mei 1, 1865. 2-3m
HALE PAI KII.
AIA KO'U HALEPAI KII MA KA HALE e pili ana me ka Hale Leta, maluna'e o ke Keena Pai o ka " Nupepa Kuokoa," Ua emi loa na kii. Elima dala no ke Kakini Pepa Kii hookahi. A elua wale no dala no ke kii aniani.
H. L. CHASE (Keiki.)
174-6m Mea Pai Kii.
KUOKOA HUMUHUMUIA.
EKOLU BUKE — BUKE 1, 2, A
ME 3.
Umi Kala ke kumukuai no na buke ekolu. No ka akahi buke $3.50. E ninau ma ka Hale buke o H. M. WINI.
Na Buke i Pai ia e ka Papa Hawaii.
Eia na buke kuai, a me ke kumukuai, Baibala nui no na Awai o na Halepule, $4 00
" Ohana, ano nui, me na kii, } { 2 50
a me na Moohana, } 5 00
" Ohana uuku iho, me na Moohana, ili ulaula, } 1 00
" Ohana, me na Moohana wale no, 62 1/2
" Okoa, - - - 50
Kauoha Kahiko, i paiia i ka M. H. 1838, 25
Kauoha Hou, me ka pepa lahilahi o waho, 12 1/2
Kauoha Hou, hapa haole (Haw. Eng.) 25
Haiao, - - - - - 25
Hele Malihini Ana, - - - - 25
Wehewehehala, - - - - - 25
Lira Hawaii, - - - - - 25
Na Olelo Hoopomaikai, - - - 25
No ko ke Akua Ano, - - - - - 25
Lira Kamalii, - - - - - 25
Kumumua Hou, - - - - - 12 1/2
Moolelo Ekalesia, - - - - - 50
Hoike Palapala Hemolele, - - - - -25
Himeni Hawaii me na Leo Mele, 1834, 25
Ninauhoike, - - - - - 12 1/2
Eia na buke i haawi waleia.
Haawina Baibala.
Ui.
Olelo Ao i na Wahine Hawaii.
Na Dawida Malo Kumumanao.
Ko Olelo Ao Liilii.
Ka Moolelo o Batimea Puaaiki
L. H. Kulika.
Kakauoleloo ka Papa Hooko o ka Ahahui Euanelio o Hawaii.
Ka Nupepa Kuokoa.
KE KAAO O ASIMEDA !
HELU 9.
(I unuhiia noloko ae o ka Buke Moolelo a Geberiana.)
I kekahi la, hele aku la o Tamala imua o ka Epitobo, a olelo aku i na mea a Asimeda i olelo aku ai, me ka i aku, " I hele mai nei au imua ou e hai aku i na mea a kuu kane i olelo mai nei, me kuu manao no nae, aole e pono ana ia mea imua ou i na e olelo aku ana wau ia oe." I mai la ka Epitobo, " Heaha ia mea ?" I aku la o Tamala, " Ma ke awakea o ka la i nehinei, olelo mai la kuu kane ia'u, e hoi maua i kona aina, i ike mai na makua o maua, a me kona Aupuni pu."
A lohe ua Epitobo Nui nei i keia olelo, ua ano-e kona manao ia manawa, me ka haohao no hoi i ke kumu i emoole ai ko Asimeda manao e u-hai i ka olelo aelike ana i kakau inoa aku ai malalo o ka palapala hoopaa i kakau ia i ka la o laua i mareia'i : A liuliu iki, pane aku la ua Epitobo nei, " E hoi oe i keia wa, a loaa ia'u ka wa pono, alaila, e hiki aku no au i o olua la ; aia nae a hala ka hapalua o ka hora." Hoi aku la o Tamala, a mahope hiki aku la ua Epitobo nei i ka manawa ana i olelo ai ia Tamala.
Ike mai la o Asimeda ua ano-e ka helehelena o ka Epitobo, noonoo nui iho la o Asimeda i ka manao e pono ai oia ke olelo aku.
I aku la ka Epitobo, " He oiaio anei, e manao ana oe e puka hou ana iwaho me kau wahine mai keia wahi aku ?" I aku la o Asimeda, " Aole au e manao ana e puka wale aku iwaho ; o ka'u mea no i olelo aku ai ia ianei e olelo aku ia oe, no kuu makemake nui e hoi aku au i kuu Aupuni i ike mai ai ko'u mau makua ia'u a me ka'u wahine." I aku la ka Epitobo, " Aole e hiki ia oe e puka aku iwaho mai keia wahi aku, aole loa no hoi e hiki pu me kau wahine, no ka mea, ua kakau oe i kou inoa malalo o keia palapala hoopaa, a pehea la e hiki ai kou manao ?"
I aku la o Asimeda, " Aole na'u iho ko'u manao, aka, na ka Haku mai no." Alaila, olelo mai la ka Epitobo, " E ke Keiki ! mai kuhihewa oe. Aole e hiki i ka Haku ke olelo mai ma ka mea ku ole i ka maikai, e like me kau maikai ole e hana mai nei, mamuli o kau pale ana i ka hoohiki ana." I aku o Asimeda, " E ka Makua ! He oiaio, ua kakau inoa aku au malalo oia palapala me kuu manao maikai. Aka, o ko'u manao ia ko ke kanaka, he okoa loa ko ka Haku manao." I aku la ka Epitobo, " Na ka Haku anei oe i olelo mai e hoi oe i kou aina me ko kaili pu aku i kau wahine ?" " Ae," wahi a Asimeda, no ka mea, ia'u ma ko maua hale nei, heluhelu iho la au i kahi hapa o ke Kauoha Hou, ike iho la au, penei : " O ke kane ke poo o ka wahine, e like me Iesu ke poo o ka Ekalesia." A nolaila, ma keia mea, aole he kuleana e ae maluna o keia Tamala, owau wale no, ma ka'u wahi e hele ai, malaila pu au me ka'u wahine : A ua oleloia no hoi ma ka moolelo o ko ke Akua hana ana i ke kanaka. " He IWI AOAO ka wahine no ke kane." No ia mea, ua oluolu kuu manao e lawe i kuu wahine ma ko'u aina mamuli o keia mau kuhikuhi a'u e olelo nei. A o ko'u kakau inoa kuhihewa ana, ke mihi nei au i ke Akua ma ia mea."
Ike ihola ka Epitobo, ua ano ole kana mea i manao ai, a ua ku hoi i ka Baibala ka Asimeda mea i kamailio ai, nolaila, hoopuka koke ae la oia i olelo ae e hoi o Tamala me kana kane i ke one hanau o kana kane : Hooki loa ae la ka Epitobo i kana olelo.
A maopopo ia Asimeda ka pono o kana mea i manaolana ai. Nolaila, hoouna aku la o Asimeda i ka Ahaiolelo i ka Puuku Nui, e hookaawale i puu dala na ka Epitobo Nui mamua o ko laua haalele ana i kahi o laua i mare ai.
He mau la mahope iho, hoohuiia ae la ka lehulehu ma ka luakini, i hai aku ai laua (Asimeda ma) i ko laua manao mamua o ko laua haalele ana i kela wahi.
Ia manawa, lilo mua ae la ka olelo i ka Epitobo, a pau kona manao, ku mai la o Tamala imua o ke anaina, a olelo mai la me na mapuna waimaka i hiolo iho ma kona mau papalina lahilahi iho.
" E na makua, na kupuna, na kaikuaana a me na kaikaina, ka poe i kapaia he poe haipule : Mai ko'u wa kamalii mai a hiki i ka loaa ana o keia kane ia'u, ua hookiekie ae oukou ia'u, a hoolilo hoi ia'u i Pookela maluna o oukou. A owau hookahi ka mea nui ma keia wahi, ua hookaawale ae hoi oukou ia'u mai ka lehulehu ae mamuli o ko kakou haipule a hemolele hoi. Aka, i keia la, e kaawale loa ana wau mai o oukou ae, a e hele ana au mamuli o ka mea nona ka lima akau a'u i hoopaa ai, aole nae he kumu e ae o ko'u kaawale ana mai o oukou ae, eia wale no ; o ka Haku a kakou e hilinai nui ai, oia ka Mea nana i olelo mai, " O ke kane ke poo o ka wahine." A ua olelo hou mai hoi, " E hoopili aku ka wahine i ke kane, e lilo laua i hookahi io." A mamuli o keia mau mea, ke hoopili nei au mamuli o kuu kane a kakou i oluolu like ai, e like me ka ka Haku kauoha, a ke hele nei maua a kaawale loa, aka, me kuu manao kaniuhu, a me ke aloha kuhohonu i ko kakou noho ana, ke manaolana nei au i ka Haku e loaa ana no ia'u ka hooluoluia mai, ke loohia mai au e ka naau haalulu no ke aloha ia oukou. A mamuli o ko'u kaawale ana ma kahi e, mai Kaumaha oukou no'u, me ko oukou manao, o haulehia ana au iloko o na hoowalewale e kaawale ai ka manao kupaa haipule mai a'u ae : No ka mea, o ka Haku pu me a'u ma keia kaawale ana."
Ku mai hoi o Asimeda, a olelo mai la, " Mamuli o na mea a oukou i lohe ae nei mai ka'u wahine ae, ka " HUA HOI O KO OUKOU OPU," he mea nui no ia ; aka, mamuli o ko oukou ano haipule a me maua pu nei, mai kaumaha oukou ma keia kaawale ana o maua, no ka mea, ke manaolana nei au i ka Haku."
A mamuli o keia mau mea, ua hoohaniniia mai na mapuna waimaka o ka lehulehu, no ke kaawale ana'ku o ka lakou mea i hoalii ae ai. A pau keia mau mea, puka aku la o Asimeda me kana Lady (Aliiwahine) iwaho, a hiki aku la ma ka Hale Alii o Cinigamalaina. NO KA HALE ALII O CINIGAMALAINA. I ka la a Asimeda ma i komo ai iloko e mare ai, nonoi koke ae la na kaikamahine a Ginigamalaina i ko laua makuakane, e hoihoiia'ku ka mana o ka Hale Alii malalo o laua, i hana aku ai laua i ka mea hiki ia laua ke hana. Aka, ua nani ia mea i ko laua makuakane, nolaila, lilo ka mana o ka Hale Alii ia laua. I kela hoi ana mai hoi a Asimeda me Tamara, me ka manao ma ka Hale Alii ana i noho mua ai, malaila e hui aloha ai o Asimeda me Ginigamalaina, a kaawale aku i ka lewa o ka moana, nolaila, hele pololei ai o Asimeda ma ma ua Hale Alii nei. Aka, i ka hiki ana aku o laua nei, aole i ae ia o Asimeda e komo hou kona poo iloko o ka Hale Alii, mamuli o ka maluhia o ka Hale Alii malalo o na kaikamahine.
A mamuli o keia mea, hoi aku la o Asimeda ma maluna o ka moku, me ka ike no nae i ke kumu o kona hooneleia ana ma ua Hale Alii nei. A no ka pau ole o ko Asimeda manaolana e launa pu hou me Ginigamalaina no na hana maikai pau ole he nui i hooiliia mai maluna ona iloko o kona mau la ma ka Hale Alii. A i mea e pono ai oia, nolaila, hoouna aku la o Asimeda i palapala kauoha ma ka lima o kona Ahaiolelo Penei :
I KA MOI LOKOMAIKAI }
GINIGAMLAINA }
ALOHA OE :
Ua hiki hou mai maua me ka'u Alii Wahine mawaho o ka puka pa o kou Hale Alii Hanohano, me kuu manaolana nui e halawai maka hou ana kaua, mamua o ko'u haalele ana i kou Mokupuni nei, aka, ma ka mana nui o na Kanawai o kou Hale Alii, ua haule paho ko'u manaolana koikoi e halawai me oe, mamuli o ka huaolelo pokole a na Koa Kiai ou i pane mai ai : " E hoi olua, no ka mea, ua lele aku ka maluhia o ka Hale Alii nei mai a oe ae." A no keia mea, ua minamina nui au no ko kaua halawai pu ole, a nolaila, ke nonoi aku nei au ia oe e ae mai ia'u e halawai pu kaua he maka no he maka, maluna o kekahi o ko'u mau moku manuwa nei.
Owau no me ka mahalo,
ASIMEDA,
Kau Kauwa.
A hiki aku la keia palapala ma ka puka pa o ka Hale Alii, oiai ma ka lima o na koa kiai, lawe loa ia aku la ua palapala nei ia Ginigamalaina, aka, aole nae i loaa aku keia palapala ia ia, no ka mea, ua lilo e i na kaikamahine; ia manawa no i loaa aku ai ma ka lima o ua mau kaikamahine nei, ua hoopau kokeia kela palapala i ke ahi, me ka ike ole o ko laua makuakane. I mai la nae ua mau kaikamahine nei i ke koa nana i lawe aku i ka palapala a Asimeda : " E hoi aku oe a ka mea nana i lawe mai keia palapala, e hai aku, ua hoopau kokeia ka palapala i ke ahi me ka ike ole o Ginigamalaina."
Hoi aku la ke koa a hiki ma ka puka, hai aku la i ka Ahaiolelo no keia mau mea, e like me ke kauoha a na kaikamahine. Nolaila, hoi akula ua Ahaiolelo nei, a hai aku la e like me ka olelo a na koa kiai. Ia manawa, noonoo nui iho la o Asimeda i mea e pono ai oia ke pane aku i na kaikamahine Alii, no ka mea, ua minamina nui oia no ka loaa ole ana aku o kana palapala ia Ginigamalaina, nolaila, palapala hou aku la o Asimeda i palapala e like me mamua, a hoouna aku la i ka Ahaiolelo, me na dala he hookahi haneri, i mea e uku kipe aku ai i na koa kiai puka o ka Hale Alii, i hiki ponoi aku ai ka palapala ia Ginigamalaina, me ka ike mua ole o na kaikamahine. A mamuli oia ano, ua loaa pono aku ka palapala a Asimeda ia Ginigamalaina. Ia manawa, hoopuka koke aku la o Ginigamalaina i kana palapala penei :
I KA HOOILINA ALII }
ASIMEDA }
ALOHA OE :
Ua minamina kuhohonu loa wau no ka loaa ole ana mai o kau palapala mua ia'u, mamuli o ka hoopau ana ae o ko'u mau Hooilina Alii i kau palapala i ke ahi. Aka, ua hoahewa au ia'u iho no kuu wikiwiki ana e haawi i ka mana a pau loa o ka Hale Alii nei malana o ka'u mau kaikamahine, mamuli hoi o ka laua nonoi koke ana mai ia'u mahope iho o ko olua komo ana aku iloko e mare ai. Ua menemene no hoi au no ke kipaku ana aku a na koa kiai puka ia olua, a nolaila, mamua o ko'u hele ana aku e halawai maka me olua, e kupaa olua e kala mai ia'u ma ka inoa o ko olua Akua. Ke noi hou aku nei hoi au ia oe, e palapala hoahewa mai i ua mau Hooilina Alii la o'u, no ko laua hana pono ole ana i kau palapala, i ike ai olua, aole au i hui pu me laua e hana ino aku ia oe ma ka hoopau ana i kau palapala i ke ahi ; malia paha ua ku ia hana ana a kuu mau kaikamahine Alii i ke Kanawai o kou Aupuni. Owau no me ka mahalo.
GINIGAMLAINA.
A hiki keia palapala ia Asimeda, ia manawa, hoouna aku la oia he palapala i na kaikamahine penei :
DIANAMURA & SENEBADY }
NA HOOILINA O KA NOHO ALII }
Ua loaa mai hoi ia'u ka palapala hoike mai ko olua Makua Moi mai, no ka hiki ole ana aku o ka'u palapala mua ia ia, mamuli o ka olua hoolilo ana i ua palapala la a'u i lehu iloko o ke ahi. A mamuli o keia mea, a no ke ku ana o ka olua hana i ke Kanawai o kuu aina ma ko olua ano Karaima Nui, nolaila, e hoomaka no au e hoopii ia olua imua o na Aha Hookolokolo ma ka inoa o kuu Aupuni.
ASIMEDA
Ka Hooilina Alii o Beritania.
Laweia aku la keia palapala a hiki i na kaikamahine Alii, ia manawa, ike iho la ua mau kaikamahine nei, ua hiki ka palapala a Asimeda ia Ginigamalaina, ua nui ko laua huhu i ko laua makuakane, ia wa, hele aku la laua imua o ko laua makuakane me ka i aku, " Pehea la oe i hana mai nei i keia ino mawaena o maua a me oe ? No ka mea, ua hiki mai nei ko maua wa e hoahewaia'i ma ke Kanawai o Beritania, ma na Aha Hookolokolo o ka aina nei ; a nolaila, e pono ia oe e hai mai i pono no maua ma keia hewa o maua e hoopiiia nei. A ina aole e hiki ia oe, e hoi mai i mea e pono ai maua, e hoomaka no maua, e hookaawaleia maua mai keia Hale Alii ae."
(Aole i pau.)
KA MOOLELO.
— O —
HAWAII NEI.
HELU 7. NO KE KAAPUNI MAKAIKAI I NA WAHI KAU-
LANA A ME NA KUPUA, A ME NA'LII KAHIKO MAI HAWAII A NIIHAU.
NO WAOLANI
He aina o Waolani no ka lahui kanaka eepa. Ua oleloia penei ma na moolelo ; " Ka makole la i Waolani, ka hapakue la i Waolani, ka oopa la i Waolani, ka ohule la i Waolani, ke kuapuu la i Waolani, ka halepahu la i Waolani, ka iliili la i Waolani, ka mana i Waolani, ka moi la i Waolani, ka paehumu la i Waolani." He poe kanaka keia i ka helu kanaka ana a na kolea, ma ka moe a Moi a ke kahuna mana. Ua helu pakahi a na kanaka a puni o Oahu nei, a elua aina i mahuahua iki na kanaka, o Waolani, a o Ulehawa, ma Waianae, a o ka nui o na aina, mai ka hookahi a hiki i ke eono, a o ka pakahi ka nui o na kanaka o na aina. Penei e helu ai. O Kapinao ko Kapalama, o Kahaoi ko Kalihi, o Kahau ko Kahauiki, a pela aku.
Ua hanaiia o Kahanaiakekua ma Waolani; o Kahihikuokalani kekahi inoa. O Kahano a Newa ka mea nana i hanai, a o Kahano ka mea nana i kikoo na lima i kukulu o Kahiki, a maluna o na lima i hele mai ai ka lahuikanaka i kapaia he Menehune.
Ua kiiia lakou i kanaka no Kahihikuokalani.
Ua oleloia na lakou i hana kuapa o Oahu, a me na Haiau. O Mauiki o Kaheiki o Kawaewae. O Eku, Kamoalii, o Kuaokala.
O Kuleonui ko lakou luna kala. O Kailua ka aina e noho ai ka Menehuna. Iluna o Manoa e kahea ai ai o Kuleonui. Penei e kahea aku ai. " E ka Menehuna o Kailua — e;— Hehana." Menehuna ; " Heaha ka hana ?" He hale, o ka iwi o ka manu ka pou, o ka iwi o ka manu ke oa, a o ka iwi o ka manu ka aho, ka naau o ka manu ke kaula ;" " Aole hoi ha he hana, he pupu kahi wale ae no."
Ua noho ka Menehuna ma Puowaina, a o ka lua hanalepo o Pauoa. A he mea kaulana no hoi ia i ka wa kahiko.
" A Nuuanu popoi ka huna a ka ua, Kukuku ka ale a ka makani, Hololua, holo pili, Holokake i ka pili ka makani,
I ka wa i lilo ai ka la, a pouli ka honua ; a o Kahano ka mea nana i kii ka la a loaa, a oia keia malamalama a kakou e ike nei.
[E huli kakou a e nana hou mai mamua loa o ka hokumu ana o ka honua.
Ma ka Moolelo a Kaloheaulani a me Kapaahulani i na la o Kualii ke'Lii o Oahu no ka hana ana i ka honua, a me ke kanaka mua.]
MOKUNA I.
He umikumamaiwa hanauna mai a Kumuhonua mai a me Haloiho kana wahine, a hiki ia Iwahinakiakea ke kane, Umiwahinakiipapa ka wahine.
Ua nana mai ke Akua i ka lewa ; ua hoopuniia oia e ka malamalama, a ua paepae ia oia e ka nani ano-e alohilohi lua ole. Ua kipaepae ia i ka momi o ka walua o ke Aloha.
Ia wa i piha mai ai oia e ka hoopailua a me ka hoowahawaha no ka pono ole o ka honua.
Nolaila, ua hoolilo mai ke Akua i ka lani a me ka honua i ahi. Ua wela ka lani a me ka honua ia ia.
MOKUNA 2.
NO KA LANI HOU A ME KA HONUA HOU.
Hana iho la ke Akua i na uhane no ka lewa ; a hoonoho ia Ku, ia Lono, ia Kane a me Kanaloa i mau Alii Uhane.
A hana iho la ke Akua i ka lani a me ka honua.— He umeke ka honua, a he poi ka lani, o ke ao ka pala, o ka la me ka mahina, a me ka hoku, o ka anoano ka hoku o ka lani, ma ka ha o kona waha
" Hookumu ka lani,
Kumu ka honua,
Ka paa ka paa,
Ka naki ka mau,
Ka hihi ka pipili ka aaki,
Pipilikani, a owaka lele,
Lele hoaka ka paku,
Lele hoaka ka lani,
Hoaka ka lani,
Hoana kaka,
Kukui ka laai,
Hoene kaka, ne-i ka lani,
Hoene i hoene i kukuku ku aku — e,
Ku ka lani iluna ne-i,
Ea ka lani ke kui kapalulu,
Ke kui kapalili."
Ua paa ka lani, ua paa ka honua, ua maheleia na Haawina a pau.
Olelo mai la ke Akua ia Ku, Lono, Kane me Kanaloa. E hana kakou i kanaka. Ololoimehani ka inoa o ka aina, o Kahakahakea ke one, o Hikiauola ko ke Akua wahi i noho mai ai e nana. Kauoha mai la ke Akua, e hana oukou kanaka e ku ia oukou. Lawe ae la o Ku o Lono a me Kane ; kahakaha iho la i ke one ; a hana iho la, a ku ke kii o ke kanaka. Olelo aku la o Kane ia Lono, " O kau o ka hoolohe, ia oe hoi e Ku, o kau hoi o ke ku iluna ; e hoolohe olua i ka'u e olelo aku ai."
Makau o Ku laua o Lono ia Kane o make laua nei, i ke ko ole o na mea a Kane e pane mai ai. E lalau ae ana laua nei i kekahi uhane, hahao iloko o ke kii a lakou nei i kahakaha ai, a i hoopuupuu ai i ka lepo.
Ku mai la o Kane a kahea mai la, penei : " I Hiki-au-ola-ola — I Hiki-au-ola-ola." Ohi ae ana ka lepo. " I Hiki-au-ala-ala — I Hiki-au-ala-ala."
E ala mai ana a noho iluna. " I Hiki-au-e-ku-ku — I Hiki-au-e-ku-ku."
E ku mai ana kela iluna, a lilo ke kanaka i uhane ola. Ua kapaia ka inoa o WELAAHILANINUI.— O ke ano : Wela ka lani, wela ka honua.
" Ua wela ka hoku ka malama, Ua wela Makalii Kaalo ia Kaulua, Kaiehu ka moku Papapa ka aina, Haahaa ka lani, Kaikoo ka mauna, Ha-ka moana, Popoi Kilauea, O mai Pele i ona kino, Hakikili ka ua mai ka lani, Nei ke olai ka honua, Ha-ka Ikuwa ka poha-koeleele."
Ike mai o Kanaloa ua loaa ka lakou nei kanaka ; aole hoi i lilo ka ia nei kii lepo i kanaka ; nolaila, ohumu iho la o Kanaloa, a hana iho i na mea awaawa, e hoawahia ai i ko ke ao nei. A ma o Kanaloa la i puka mai ai na mea ino he nui wale.
" Ka papa holahola,
I awahia mulea,
I ke kukai halelo.
Ka auhuhu akia mulea ka lani,
I wahi makua ia."
Hana iho ke Akua he kanaka wale no kai loaa, nolaila, olelo mai la ke Akua ia Ku, ia Lono a me Kane, e hana oukou i wahine i kupono ia ia, e like me kona kanaka maikai.
A ma keia kauoha a ke Akua, e haehae iho ana o Ku, o Lono a me Kane i ke kino o Wela, a lawe o Kane i kana wahi a hana iho i wahine i kupono hoi ia Wela. O Ku hoi a me Lono, hookuikui hou laua ia Wela, a lilo hou ae no i kanaka e like me kona ano mua.
Alakai mai la hoi o Kane i ka wahine imua o Ku, o Lono a me Wela, a i ka hoopili ana'e ua like. A ike aku hoi la o Wela i ka mea maikai i laweia mai imua ona, a ua kapaia ka inoa o Owe. Oia ke ano, haehae, nakeke, nekeke, nakekeke.
" Halulu, nei, nehe, owe,
Nakeke, nehe, oweowe,
Mo ka lau lele ka oulu,
Mohola ka waha,
Ua kupono ka alihi,
Kau pono ka niao,
Ua pono ka waha,
Ouo ihu ouo hope,
Ku mai no o Kuolowao,
Ahi kuli, ahi lono,
I kaulana ihu,
O ke okooko ahi kapa ia o Keaka." O Welaahilaninui ke kane, o Owe ka wahine, oia no hoi na kupuna mua o Hawaii nei. Ua hanau mai na laua o Kahiko Luamea. Ua oleloia he kanaka haipule, a he alii maikai ia o na kupuna kahiko. Olalowaia kona aina, o Kupulanakehau ka wahine, ua hanau mai na laua na keiki, o Wakea, Lihauula, a me Makuu.
Ua hooliloia o Wakea i haku, a i alii no ka ohana e loaa ana mai a Wakea. O Lihauula, ua hooliloia kana poe mamo no ka oihana kahuna. O Makuu, ua lilo kana poe mamo i poe kauwa lawelawe ma ka hana.
(Aole i pau.)