Ka Nupepa Kuokoa, Volume IV, Number 28, 13 July 1865 — Page 2
Ka Nupepa Kuokoa.
E na Makamaka o ke Aupuni Hawaii.
O ka pepa mua keia o keia hapalua makahiki, a ua like no ka uku me ko ka hapa mua, oia hoi hookahi dala ($1.00.) E hookaaia ke dala mamua o ka haawiia ana o ka pepa iaia.
Nolaila, ke kauohaia'ku nei oukou e lawe oukou i ke Kilohana Pookela o ka Lahui Hawaii, no keia hapa makahiki.
I keia pule ae, e hoopukaia ana ka pepa i kela Poalima keia Poalima. He hiki no i kela mea keia mea e hoouna mai i na kauoha me na dala pu. Eia na inoa o na Luna nui o kela mokupuni keia mokupuni.
NO HAWAII HIKINA.
Kaupakuea, Gilbert Waller Esq.
Onomea, S. L. Austin Esq.
Hakalau. Rev. T. Pohano.
Waiakea Hilo { Rev. D. B. Laimana.
{ Rev. T. Koana.
Kapaliiuka, Kau, Rev. J. Kauhane.
Waiohinu, Kau, Rev. O. H. Kulika.
NO HAWAII KOMOHANA.
Kaawaloa, Kona H., Rev. J. D. Parisa.
Kapalilua, Kona H., Rev. S. W. Papaula.
Napoopoo, Kona H., Capt. Cummings.
Helani, Kona A., Rev. J. W. Kupakee.
Kailua Kona A., Rev. G. W. Pilipo.
Kohala Akau, Rev E. Bona.
Kohala Komohana, Rev. S. C. Luhiau.
{ Rev. L. Laiana,
Kohala Hema, { Rev. A. Pali,
{ me D. Manuia.
{ Rev. L. Laiana,
{ Rev. S. Kukahekahe,
Hamakua, { A. W. Pupulenui,
{ S. Kamelamela,
{ me D. Kaanehe.
NO MAUI.
Lahaina, D. D. Baluwina.
Lahainaluna, Rev. J. F. Pokuea,
Wailuku, Rev. Alekanedero.
Honuaula, Rev. H. Manase.
Kaupo. J. Naloloa.
Hana, { S. E. Bihopa,
{ Rev. S. Kamakahiki.
Makawao, { Poka Kelina,
{ me P. Nui.
Kaanapali, Rev. J. H. Moku.
NO MOLOKAI.
Kaluaaha, { Rev. A. O. Forebe,
{ me Hikikoke.
Halawa, Rev. S. W. Nueku.
Kalaupapa, B. W. Kaawa.
NO KAUAI.
Waioli, Rev. E. Ioane.
Anahola, Rev. Helekunihi.
Koloa, Rev. J. M. Kamika.
Lihue, Paulo Isenberg Esq.
Waimea, J. Kauai Esq.
Niihau, D. S. Kupahu.
NO OAHU.
Wailupe, Z. Poli.
Waimanalo, { Waiwaiole,
{ me Kane.
Kailua, Kaneohe, Heeia, Puhili.
Kaneohe, Rev. B. W. Pareka.
Koolaupoko, { Daniela,
{ Holokahiki.
Punaluu, Kaaimanu.
Hauula, G. B. Ukeke.
Ewa, { Rev. J. Bikanele,
{ me Kauwahibaka.
Waianae, { Rev. A. Kaoliko,
{ me Keauiaole.
Waialua, { Rev. Kuaea,
{ me S. N Emesona.
NO HONOLULU.
Kawaiahao, Kekauohanui.
Alanui Nuuanu, Hu.
Alanui Liliha hiki i Kalihi, Keomoku.
Waikiki-kai, Kamoana.
Kamoiliili, Kawainui.
Manoa, Kahuena.
Pauoa, Kealoha.
Maemae, Pualewa.
No na Katolika, Kamai.
Moanalua me Kalihi, Kolunaaina.
Palolo, Kanepuu.
La Hoihoi E-a.
Eia malalo iho nei ka inoa a me ke ano, o na Komite mau i kohoia noloko mai o na Komite i kohoia e ka halawai hoomanao la Hoihoi E-a ma Kawaiahao, ma ke ahiahi Poakahi la 3 o keia malama. A na ia mau Komite e hooko na hana i hoakakaia na kela a me keia Komite.
KOMITE NO NA MEA AI.— His R. H. M. Kekuanaoa, E. H. Boyd. (Ailuene) W. Pinehaka Wood, J. H. Kahai, J. Maluaikoo.
KOMITE NO KA LANAI A ME KA HOONANI.— H. R. H. M. Kekuanaoa, J. H. Brown, D. Lima, W. L. Moehonua, P. Naone.
KOMITE NOONOO I HAIOLELO.— Hon. C. C. Harris, E. H. Boyd, Hon. W. P. Kamakau, W. Pinehasa Wood, J. H. Kahai.
KOMITE KI-PU.— H. R. H. M. Kekuanaoa, Maj. W. L. Moehonua.
KOMITE NO KA PILA A ME NA LEO MELE.—Hon. D. Kalakaua, W. N. Pualewa, S. W. Mahelona, J. K. Kaunamano, J. W. Pauli.
KOMITE NANA E KAUOHA NA MALIHINI MA KA AHAAINA & KA HULA HAOLE I KA PO.— W. P. Ragsdale, (Bila) J. Komo, W. Pinehasa Wood.
KOMITE NO NA AHI-KAO.— F. H. Harris, H. Thompson, W. Pinehasa Wood.
KOMITE NO NA DALA.— Hon. W. P. Kamakau, Maj. W. L. Moehonua, E. H. Boyd.
KOMITE PAI HAE.— W. P. Ragsdale, (Bila) E. H. Boyd, (Ailuene) W. Pinehasa Wood. He Ahaaina ma ke ao, a he hula ma ke ano Europa ma ka po.
W. P. RAGSDALE, (BILA) Kakauolelo a ke Komite. Mokuaikaua, Honolulu, Iulai 12, 1865.
Palapala mai a H. M. Wini mai.
[ Eia malalo iho ka palapala a H. M. Wini, i kakau mai nei i kona makamaka aloha i ke Kuokoa.]
MALUNA O KA MOKUMAHU ' KUMUKANAWAI,' } Kokoke i Panama, N. G. Mei 13, 1865. } E KE " KUOKOA E :"
Aloha oe:— Ua ulu ae kekahi manao iloko o'u, e kamailio me kuu hoa i aloha nuiia ka " Nupepa Kuokoa," a me o'u mau makamaka kahiko, ka poe lawe hoi i ua nupepa la, no ka mea, o ko'u aloha ia oukou a pau loa, a ia ia hoi, ua nui loa. I kela la keia la, ua hoomanao au ia oukou, aohe o'u mea e ae e mananao nui nei, hookahi wale no o ko oukou pomaikai, a me ko oukou mahuahua ana ma na mea e kokua ana i ua pomaikai la i keia manawa, a i ka manawa aku mahope.
Ua lohe no paha oukou a pau i ko'u haalele ana ia Honolulu, no ka holo makaikai ana ia Nu Ioka, a i keia manawa, eia makou ma Panama, a e hoomanao iho oukou, o ka puali ololiia e hoohui ana i na Ainapuniole elua, o Amerika Akau, a me Amerika Hema. Mamua o ka hiki ana aku o keia palapala ia oukou, e hiki no makou i Nu Ioka, i ke kulanakauhale nui o Amerika. Eia makou maluna o kekahi mokumahu nui a nani no hoi, o kona inoa o " Kumukanawai" (Constitution), a he 26 ko makou nui, na ohua mai Hawaii mai, a eia ko lakou mau inoa : Rev. Loela Kamika ma, o Hulipahu (Torbert) ma o Waihee, o Williama Jourdan Makai ( o kona inoa kapakapa, o Uilama makapuu), H. M. Wini a me kana keiki, o J H. Kole ka Luna Kudala, o Mika Makarika (McGregor) ka Luna hana o ka mala ko a Wale ma Hanalei ; o Wiliama Aneru, o J. E. Barnard, ke Kakauolelo a ke Kuhina Noho o Amerika Huipuia, a me kekahi poe e ae; oiai he poe Hawaii makou, aka aole o makou wale no na eepakeke, ua oi aku mamua o ka 350 na ohua. He mea mau i keia mau mokumahu nui ka lawe nui, i kekahi manawa, he 1,000 a hiki i 1,500 kanaka ke lawe i ka manawa hookahi. O ka loihi mai Kapalakiko a Nu Ioka ma ke ala o Panama, 5,800 mile, oia nae he 23 wale no la hiki na mokuahi holo loa me na eemoku. Ua lohe wale iho nei au, iloko o kekahi mau malama e hiki mai ana, iloko paha o Ianuari 1866, e holo ana keia mau mokuahi mai Kapalakiko a i Kina, hookahi holo ana i ka malama, a e ku iki ana ma Honolulu i ka holo ana'ku a me ka hoi ana mai Kina mai. Ina e holo lakou, ewalu wale no la hiki i Kina, a pela no ka hoi ana mai, no ka mea, he 275 mile ka holo i ka la hookahi, o ka loihi ma waena o keia mau awa he 2,100 mile. Ina e hoomaka ko lakou holo ana, e hiki no ia kakou ke hoouna i ka alani, ka maia, ka hala-kahiki, ka manako, a me kekahi mau hua e ae i Kapalakiko, me ka makau ole i ke poho no ka hooili ana'ku maluna o ka moku. Ua makemake nui na kanaka o Kapalakiko e kuai i ka kakou mau hua, a e kuai ana no lakou i na mea a pau a kakou e hooulu ai. Nolaila, ke koi ikaika aku nei au ia oukou e ko'u mau hoa aloha, e kanu nui i ka alani, me ka manako. Aole no paha e nui na makahiki au e kali ai, e ohi no oe i ka hua o kou luhi. E kanu no i ka maia a me ka hala-kahiki a nui, no ka mea, e imi nui ia aku ana ia mau mea, mamua o ka hiki ana mai o ka hopena o keia mau makahiki ae, e na kanaka e noho ana i keia aina waiwai a nani hoi o Kapalakiko nei.
Mamua o ka hiki ana aku o keia i ka Pae Aina Hawaii, e lohe no oukou i na nu hou olioli o ke kaua ma Amerika, a ke emi hopuhopualulu mai nei i kona hopena, a o ka poe kipi hoi i kue loihi iho ai i ka mana o ke Aupuni Amerika, ua kauohaia lakou e waiho i ka lakou mau lako kaua, a e haawi aku i ke Aupuni. O ke ala ana ae me na lako kaua a kue i ke Aupuni, he kipi no ia, aole no ia he mea pono; aia wale no a hookaumaha ke Aupuni i na kanaka ; aka, ina e ala ae na kanaka e kue i ke Aupuni Kuokoa, a i ke Aupuni maikai loa i loaa ma ka honua nei, o ka lakou hana, he Karaima ino loa ia, i like me ka Iuda i hana'i, ka mea no hoi nana i kumakaia ko kakou Kalahala. E olioli kakou a pau no ka hiki ana mai o ka hopena o keia kipi ino, no ka mea, e olioli koke no ka honua holookoa a pau, i na hua o ka maluhia ma ke emi ana o na kumukuai kiekie a kakou e uku nui no na ano lole a pau, a me na mea like.
Ke hoouna aku nei kou mau hoalauna Hawaii e kau nei maluna o keia mokuahi i ko lakou aloha i ko lakou mau makamaka ma ia mau Mokupuni. Ke manao lana nei au, i keia malama ae o Okatoba, e hehi hou no ko'u mau kapuai wawae ma ko'u one hanau ma Hawaii, me ke aloha aku ma ka lulu lima ana i ko'u mau hoa'loha he nui wale. Me ke aloha a me ka mahalo nui.
H. M. WINI, Luna Pai o ke " Kuokoa."
HOIKE KULA MA KOOLAUPOKO.— Ua haiia mai nei makou e Nahua, o Luluku, Koolaupoko, Oahu, no ka hoike ana o na kula ma ia Apana, mai Waimanalo a. Kualoa, na Kale a Kauka i hoike. Ko Waikane a me ko Kualoa na kula oi ma keia hoike ana, ma na palapala i ao ia ia lakou. He mau paio kekahi i hanaia malaila. Mahope iho, ku mai ke Kahu, a papa mai i na kumu, aole e pono ke ao hou i na mea lealea i na keiki. Ia J. W. Kea ka olelo paipai hope, a o ka pau ia.
Ka Nupepa Kuokoa.
HONOLULU IULAI 15, 1865.
[Na Mr. Holo no Beritania keia Haiao. Iaia ka hana ma Kawaiahao i ke kakahiaka o ka la Sabati, Iulai la 2 iho nei. Ke manao nei makou he mea waiwai keia no na makamaka a pau, a nolaila ua unuhiia mai mai ka olelo haole mai.
He Kahunapule keia o ka aoao Euanelio, aole no ka aoao Katolika, aole no hoi no ka aoao Katolika i hooponopono hou ia. Ke holo nei ia i Maikonisia maluna o Hokuao, a mailaila'ku e holo ana i Nu Zilani, malaila kana hana Misionari.]
He Haiao.
NA MR. HOLO NO BERETANIA. Ina au e hoi i Beritania, e oluolu no na kanaka o ia aupuni e lohe i na hana a ka Haku i na kanaka Hawaii, a ua loaa mai no hoi ia manao ia'u e makemake ana no hoi paha oukou e lohe i na hana a ka Haku ma Beritania, oiai o ka olelo maikai a ke Akua a kakou e paa like nei ke kulana o ko lakou hoomana Lahui. O Keristiano ka mea maluna o na mea a pau, ka mea nana i hookiekie o Beritania ; na ia mea oukou i hoomaikai, a e lilo ana no oukou i Lahui nui. He mau wahi kekahi e like ole ai mawaena o kakou, ma ke ano kanaka. Aka, he mau kumu nui e ae no kekahi o ka like ana ; a ehiku o ia mau kuma e hoohui ae ana ma na hana a ka Lahui a me ka hoolaha ana'e o ka hoomana oiaio.
Kumu 1. E like me ko oukou aina, he mau mokupuni pela no ko'u. Ua hoopuniia kakou e ka moana, a me na aoao a pau ua loaa ia kakou ke alanui o ka honua nei kahi a kakou e holo makaikai ai maluna o na moku i na aupuni a pau ; a ua weheia no hoi ka honua ia oukou.
Kumu 2. Aia makou ma ka moana. Atelanika, he wahi oioina no na moku, e like me oukou e noho nei he oioina no na moku e holo nei ma ka moana Pakifika. Ke nana nei makou i keia he pomaikai nui, a ma keia hope aku e loaa ana no ka pomaikai ia oukou. Kumu 3. He mau Keristiano na Lahui a i elua. O ka pomaikai i loaa i ko makou Lahui, ua loaa mai no ia mailoko mai o ka pono Keristiano. Ua ike iho makou maloko o ka moolelo o ka poe Roma i lanakila maluna o ka poe Beritania, aneane 2000 makahiki i hala'ku o na kanaka o ia manawa, he poe hoomanakii, aohe o lakou kulanakauhale, aohe halepule, aohe buke, aohe kula, a ua hele olohelohe aku lakou i ke kaua a hakaka me na newa, ma na pana a me na pua. He hilahila makou ke hoomanao ae i ka naaupo a me ka lapuwale o lakou i ka wa mamua'ku o ko lakou huli ana mai ma ka hoomana oiaio.
Kumu 4. O ko lakou hoomana ia mau la, he hoomana ino a he hoomana hookahe koko. Ua mohai aku lakou i na kanaka i pepehiia maluna o na kuahu pohaku iloko o na luakini kaupaku ole, a ua noho iho lakou me ka makau i ko lakou mau kahuna a me na 'lii. " Ua mohai aku lakou i na diabolo, able i ke Akua."
Kumu 5. Ua like loa ka laweia ana o ka pono Keristiano ma na aupuni a i elua. Ua hana ino o Opukahaia ma Amerika i pono no kona lahuikanaka ma keia mau mokupuni ; a na ka poe Anakalo Sakesona (Anglo Saxon) hoi i laweia i Roma na lakou i hoala i pomaikai no ko lakou poe hoahanau ma Beritania. I ka manawa i ike ai o kekahi kanaka maikai ia lakou ma ka makeke o ka poe kauwa, ninau aku la ia i ko lakou wahi i hele mai ai, me kona mahalo mai ia lakou i ko lakou maikai a u-i hoi, me ka olelo mai no hoi aole lakou e lilo i poe Anaka-lo, aka i poe Anela ina lakou he poe Keristiano. Nolaila, koi aku ia i ka ekalesia ma Roma e hoouna i mau misionari i Beritania. I ka manawa i hoounaia mai ai na misionari i keia mau mokupuni mai Amerika mai, a ia lakou i ku mai ai, aole i kii mai na'lii a hookipa ia lakou, e like me na'lii nui o Beritania ka makemake ole i na misionari. Aka, hookahi kanaka elemakule o laila i ku ae ma ko lakou aoao a wehewehe pololei aku. Ua hoohalike iho ia iaia iho me kekahi manu i lele ae maluna o kekahi ahi i ka po. " Eia kakou maanei iloko o kahi malamalama uuku, wahi ana. " E like me kela manu, ua puka mai makou mailoko mai o ka pouli, a ke hele nei no kakou iloko o ka pouli, aole nae kakou i ike. Ina i hoike mai keia malihini ia kakou i ko makou wahi i hele mai ai, a i ko makou wahi e hele aku ai iloko o ka inoa o na akua, e pono iaia e hai mai !" Ia wa, i ae mai ai lakou. Ia manawa hookahi no, he kanaka opiopio i lawepio ia, mai kekahi mokupuni a kekahi mokupuni o Beritania Nui, ua huli ia ma ka hoomana oiaio, a ua ake ia e hoolaha i ka pono ma kona aina, a ua hoi aku ia a loaa kona alanui e hiki aku ai i ka ahahui a na'lii. He mea mau malaila ke kukulu ana i ahaaina makahiki na Baala ; a o Pele hoi. Ua hoa-ia ke ahi ma na puu a pau. Aka o ka mea e ho-a ana i ke ahi mamua o ka hoa ana o ke alii i kana, e make no ia. Eia nae, ua loaa iho ia Paterika ke alanui e hiki aku ai i kekahi puu aole i mamao loa'ku ma ka puu a ke alii a me kona alii malalo iho i akoakoa ai a malama i ka ahaaina. Mahope iho o kona ho-a ana i ke ahi, hoounaia mai Ia ia. Wehewehe aku la ia aole ia i hewa. me kona hai aku, o kona hiki ana iho no ia ia aupuni, a he kanaka Keristiano ia e hoolohe ole ana i kekahi mea, aka i ke Akua ola a i ke Akua oiaio wale no, ke Kiaaina, ka Lunakanawai hoi o na mea a pau. Iaia e olelo ana i ka hanohano o ke Akua, i ke ola, i ke aloha, a me ka make ana o ka Haku Iesu, a i ke ao e hiki mai ana, ua oluolu iho ka puuwai o ke alii wahine, e like me ko oukou me Keopuolani, a ua uwao iho ke alii wahine, a ua kalaia o Paterika, a ua ae ia hoi e hai i ka olelo a ke Akua, a mamua o kona make ana, ua kukuluia na hale pule he 365.
Kumu 6. O ka oihana misionari ma na aupuni a i elua mahope koke iho o ko laua hooliloia ana i mau aupuni Keristiano kekahi kumu e like ai. Ua hele aku na misionari mai Beritania a me Irelani ma Europa e haawi aku ana i ka naauao a e hoolaha ana i ke akamai o ke Akua. A no ia mea, ua kapaia o Beretania ka " Mokupuni o na Haipule." Ke hoouna nei no ia he mau haneri misionari i kela makahiki keia makahiki ma na wahi a pau o ka honua nei ; a ua olioli au i kuu ike ana iho o oukou no kekahi i komo pu iloko o ka oihana misionari ma na mokupuni o Fatuhiva a me Maikonisia, a ke paulele nei au e mau no ko oukou hooikaika ana a hiki i ka wa e kaulana ai ko oukou inoa, a e kapa mai no na kanaka he nui wale o ka Pakifika ia oukou " he pomaikai." Aole i pau.
Mea hou o ke Alo Alii.
Ua maikai iho nei ke ola o ka Moi i keia mau la iho nei, a i ke ahiahi o ka Poakolu ua holo aku ia i Molokai maluna o ka moku o Kapena Hanehama. Ua naue pu aku meia ka Mea Hanohano J. O. Dominis, a me ka Mea Hanohano F. W. Hutchison, e like me ka makou mea i hai mua aku ai i kela pule aku nei. E holo ana lakou i Molokai, a me Maui, a hala loa aku paha i ka ua kanilehua o Hilo. E ola ka Moi i ke Akua.
Ua maikai no ke ola o ka Mea Kiekie M. Kekuanaoa, aia no ia ma Papakanene. Ke hooikaika nei oia me kona kino maoli no ka la hoihoi ea o ke Aupuni Hawaii nei, nolaila, e hoomanaoia kona inoa a hiki i ka hopena.
Ua maikai ke ola o ke Kama Alii Wahine Vitoria K. Kaahumanu, a me ke Alii wahine Kanemake H. K. Kapakuhaili. I ka Poakahi iho nei, ua hele aku ke Kapena o ka Puali Kaua Lio o Kale Kauka a noi aku i ka Mea Kiekie Kalohelani e ae mai e haawi mai iaia i ka hanohano o ka ukali ana i ke Kama Aliiwahine ma ka la 31 o Julai. He mea olioli loa ia i ke Kama Aliiwahine, a o makou kekahi i komo pu iloko o ia hauoli hookahi me ke Kama Alii no ka hoomanao ana i ka la i hoihoi ia mai ai ke ea o ko kakou Aupuni nei; a ua lohe mai makou ua haawi manawalea ae ua Kama Alii Wahine la i na dala hookahi haneri no ka ahaaina ma ua la la.
No na Palapala.
Ia oe e Kailiula o Hilo, Hawaii, ua loaa mai ia makou kau Olelo Hoolaha, aole nae makou e pai ana no ka loaa ole ana mai ia makou o ke dala.
Ia oe e Mrs. Kaaea o Waipio, Hamakua, Hawaii, ua loaa mai no kau Olelo Hoolaha ia makou, aole nae he dala i hoouna ia mai, a no ia kumu aole makou e pai ana.
Ia oe J. S. P. Kalauieie o Hilo, Hawaii, aole makou e pai i kau palapala i hoouna mai nei, no ka mea, aole oe i hoike maoli mai i kou inoa, a ua kakau hoepaepa mai nei oe.
J. B. A. Keliihune, ina ua makemake oe e lawe i ka pepa no keia hapa makahiki, e hele oe a kamailio pu me ka Luna o kou Apana me J. Kauai, a nana ia e hai mai ia makou.
Aha Hookolokolo
MA KE KEENA IMUA O ROBAKA G. Davisa.
Iulai 2. No ka waiwai o Akoni Katalina no Waikapu, ua kohoia o Louzada i Luna Hooponopono.
Iulai 10, Palapala hooilina o ka waiwai o Kanakaole, Kalihi, na Manuahi Kaaihuenui i noi mai, a ua hooholoia oia ka hooilina.
Iulai 11. Ua noi mai o Akau e haawiia mai na dala $132.50 mailoko ae o ka waiwai o Akai i make aku nei. Ua ae aku ka Aha ia noi.
Iulai 12. Palapala Hooilina o ka waiwai o Aihulu i make aku nei ma Kualoa, na Opunui kana wahine mare i noi mai. Ua hooholo iho ka Aha, oia no ka hooilina.
Aha Hoomalu.
IULAI 6. Kahilahila, hoopaiia $11.75 ; Peter Gough, ona, hoopaiia $6.00 ; Kookina, hoeha wahine, hoopaiia $13 ; A. McGregor, holonui, hoopaiia $11 ; Geo. McGough, holonui, hoopaiia $12.00.
IULAI 7. Kamahana, holonui, hoopaiia he $13.62 ; Moke, holonui, hoopaiia $14.50 ; Lukela, ona, hoopaiia $3.00 ; Kihulu, hakaka $7.00 ; Kaali, ona, hoopaiia $3.00.
IULAI 10. Kauhi, ona, hoopaiia $3.00, me $1.00 koina ; Jno. Bareker ; ona, belaia $6 ; Apana (Pake) hoeha wahine, hookuuia ; aka, he hiki no nae i ka Aha ke hookolokolo hou ia ia ma keia hope aku.
IULAI 11. H. A. Cooper, ona, belaia $6 ; Kapua, aihue lio, hookuuia ; Napoliona Nihi, holonui, hoopaiia $12.00, me $5.25 koina ; Kamauoha, hoeha wahine, hookuuia ; J. H. Black, hoeha Pake, hoopaiia, $10.00, me $3.00 koina ; Iosepa Kawainui, hoao e aihue, hookuuia.
HUNAHUNA MEA HOU O HAWAII NEI
MAHINA HOU MA HILO.— O ka manawalea Mahina Hou ma Hilo no Iulai, he $85.00. Hele mau imua o Hilo.
KA HOKU AO.— Ke kali nei ka Hoku Ao ia Mr Done mai Kalaponi mai. Ua haalele ia ia Nu Ioka i ka la 20 o Mei, a e holo mai ana i Kapalakiko maluna o ka mokuahi. O ka hiki mai koe.
HOONANI HOU IA NA WATI ;— I ka Poakahi iho ne, ua pena hou ia na wati o ka Luakini o Kawaiahao, a ua maikai maoli ke nana aku, ua hoi a like me ke ano mua, ina hoi e kani ana maalahi loa la hoi.
KE TELEGARAPA HOAILONA MOKU :— Ua ola hou ae nei ka laau hoailona moku, na Kapena Baraunu i ohi iho nei na dala a ka poe e makemake ana e hoala hou i ke ola o ua laau hoailona moku la, a ke hana ia nei e like me kona ano mau.
Ua hoopuka ia'e ka leo papa mai ke Kulana Kiekie Loa, e o-ki ke kapulu ana i na mea haumia wale ma na kapa o ke kahawai o Waikiki. O kakou pu no ia manao hookahi, mai ke poo a ka hiu; menemene ole no hoi paha ka poe e hana ana pela.
HOIKE KULA MA NAPOOPOO.—Ua hai mai nei.o J. W. Kaluna o Keei, Kona, Hawaii, i ka hoike ana o na kula ekolu o Napoopoo. Ekolu kula hoole pope, a hookahi kula Katolika. O ka oi o keia mau kula wahi ana, o ke kula ma Keei, ua makaukau na keikikane a me na kaikamahine.
NO J. S. EMEKONA.— Ua kohoia o Emekona i Elele e holo i Maikonisia, e ka Papa Hawaii, a ua ae no e holo. Pomaikai na makamaka Hawaii o kakou ma na Pae aina o Tarawa me Ebona, i ka halawai pu ana me kekahi mea i loaa ke kamailio ana ma ka olelo Hawaii, a he Misionari makua no hoi.
MAI PUUPUU ULALII :— Ua puka hou mai ka mai puupuu ulalii, i laulaha mua ae ai ma keia pae moku i ka makahiki 1848 i hala aku nei, a eia hou ua hiki hou mai nei ke lulu nei oia i na pua nani o na kihapai Hawaii, aka, aole nae i nui loa ka poe i make i ua mai puupuu liilii nei, he maalahi wale no ke malama pono ka mea mai iaia iho.
ELEU MAOLI :— Ke ohi nei na Luna ohi dala no ka la hoihoi ea, a ua ike maka iho nei makou i ko lakou eleu. Ei nae hoi kahi apiki o ke alu like ole o na mamo Hawaii. E pono ia oukou ke haawi i ka oukou mau hapaha, hapalua, a pela aku no ka Hae Hawaii, ka hae hoi a oukou e noho maluhia nei
malalo o kona malu.
HOOMAEO NO HOI KA HELE I KA PO.— He mea mau i na kaikamahine a ma na keikikane o keia mau la, ke koi a hoohihi launa ole e hele i ka po, me ka makau ole i na apu koheoheo a Satana. E ake no e hoholo ma kahi e lelekowali ana i ka po, a ma kahi e muimuia ana na hana lealea. No ka inu-ki ka olelo ana, eia ka uanei i manua.
KAHUNA HOOPUNIPUNI.— Ua loaa mai nei no ia makou kekahi palapala mai a Punini mai o Lahaina i ka hana lapuwale a kekahi kanaka a Kumaewa, penei : Ua aihue kana keiki i ka mala a kekahi kanaka, a na ia kanaka i hoopii a hoopaiia e ka Lunakanawai, i ka wa i hookolokoloia'i ua keiki nei ana, hana iho la ia i mea e pakele ai kana keiki, aka, ua polohuku e no i ke kolopa a ke Kanawai.
NAUE I KE AO POLOHIWA A KANE.— Ua poloai ia mai makou e J. G. Hoapili, o Napoopoo, no ka hele kohana ana'ku a ko Toma Martin kokoolua o keia ola ana ma kela aoao o ka luakupapau, kahi a kakou e hele kohana aku ai. Ua make oia ma ka la 30 o Iune, o ka hanau keiki ke kumu o kona make ana. Ke noho la kana kane me ka u a me ka minamina nui.
HANA ALOHA OLE A KA ILI-ULAULA.— Ua kakau mai nei o J. P. Kanuikino o Mana Kauai ia makou, i ka hoopaapaa ino o na kanaka o Mana me V. Knudsen (Kanuka), me ko lakou olelo iho, aohe mana o na haole maluna o ka aina, o ka Moi wale no ka mea mana. Nawai hoi ka ole o ka mana o ka mea aina ? He mana ko Kanuka maluna o ua aina la, nolaila, he mea pono i na kanaka ke hoolohe i ka olelo a ka Haku Aina, a mai hookiekie oukou maluna ona, oiai ua ikeia kona ano oluolu.
LULU DALA ANA MA HAKALAU.— Ua haiia mai makou e W. Kawainui no ka Luakini o Hakalau, e pili ana i ka apana o Kamaee. Na B. Keawe a me kana wahine i kukulu i na kulana maikai o keia hana. Mamuli o ka mea i hooholoia, ua kaheaia ka Apana o Honomu me Hakalau, e hele ma ka Apane o Kamaee, malaila hoi na mea ai i hoomakaukauia. Aole nae hoi i naue mai ka poe o ka Apana o Honomu. Ua maikai no ka papa aina, a mahope iho o ka paina ano, ua helelei mai na hunahuna a ke aloha me he paka ua la no ua aina la. He mau hoahanau Pope kekahi i komo pu iloko o ia hookupu ana. O ka nui ona dala i loaa, he iwakalua ($20.) Mahope iho o ka pau ana o ka paina o ka Apana o Hakalau, ua lulu iho lakou i na dala he iwakaluakumamakahi me ka hapalua ($21.50.) O ka huina a pau o na dala he $41.50.
The Soldier Bird.
One of the Wiconsin regiments, 8th, has carried through the War a live eagle. He was taken from a nest in July 1861 by a Chippewa Indian. He was named " Abe"— the name he bore and to which alone he deigns to answer. He could be seen a little above the heads of the soldiers, close by the flag. This position of honor was never disallowed him. The perch upon which he sat was borne by a young man in Company C, to whom his safe keeping was exclusively intrusted. When the regiment marched into Camp Randall, the instant the men began to cheer, he spread his wings, and taking one of the small flags attached to his perch in his beak, ke remained in that position until borne to the quarters of the late Col. Murphy. Ever since he was mustered into the service, his wings have been instantly outstretched on the occasion of any cheering by the regiment. To similar demonstrations in adjacent regiments he pays no regard. He has been in all the battles of the regiment, equally exposed with the troops.— At the battle of Farmington, May 9th 1862 the men were ordered to lay down. The instant they did so, it was impossible to keep him on his perch. He insisted on being protected as well as they, and when liberated, flattened himself on the ground, and there remained till the men arose, when with out-spread wings he resumed his place of peril and held it to the close of the contest. At the battle of Corinth the rebel Gen. Price having discovered him, ordered his men to be sure and take him if they could not kill him, adding that he had rather get that bird than the whole brigade. This eagle has, with his regiment served out his term of enlistment, and at its close was presented to Governor Lewis of Wisconsin. He now rests on his laurels, living in apartments fitted up expressly for him in the State House Park at Madison.
Governor Lewis has consented to his coming to the Great Northwestern Fair in May to exhibit himself for the benefit of the sick and wounded soldiers — his companions in arms. A beautiful Album picture is being prepared in oil colors of this eagle. Boys and girls over the land are invited to order card de visites of the eagle " Abe."
AHAAINA LULU DALA MA PELEULA.— I ka Luna Hoopuka Nupepa Kuokoa : Ke nonoi nei au ia oe, e hookomo iho i keia wahi manao ma kahi kaawale. He wahi Ahaaina na na wahine ; a ua kapaia ia Ahaaina, " O ka Hui Manaolana." O na dala i loaa mai ma ia lulu ana he $35.50. O ke ano o keia lulu ana, he mea e hoomahui ana i na hanauna hou, i maa'i lakou i ka hapai i na hana manawalea kuloko, a me na hana manawalea kuwaho. ]
Na Komite { KANEKAPOLEI (w.)
{ MAUAE (w,)
I KE KUOKOA : Ke ike nei au ua paiia iloko o ka Papa Helu Ekalesia no 1865, ma ka Helu 25 o ke Kuokoa, ka huina o na dala kokua o ka ekalesia o Kaluaaha, Molokai, he 333.94. Ua hewa nae kela kakaa ana, a na'u no ka lalau o ka maka a me ka peni i kela kakau ana, oiai owau no kekahi o ke komite i hoomakaukau i kela Papa Helu. Aole nae au i ike i kela lalau, aia a heluhelu wau ma ka nupepa. Nolaila, ke hoopololei aku nei au i kela hua helu, penei. O ka huina o na kokua dala o ka ekalesia o Kaluaaha no ka makahiki i hala iho nei he $596.68 3/4 oia hoi, o na kokua Luakini he 333.94. Kokua mahina hou 105.12 1/2. Hanai Kumu 157.62 1/2. A. O. POLEPE.
NO VITORIA KA MOI WAHINE O BERITANIA :
— Ua lohe mai nei makou i ka pakele mahunehune ana mai nei o ke Kuini Vitoria i ka hina ana a kekahi laau nui ma kahi i kapa ia o Home Paka (Home Park). E holo ana oia maluna o kona lio Sekotia mawaena o na laau elema (elm) ma Winesoa (Windsor) kahi hoi i ike ia he wahi hololio no ka Aliiwahine Elisabeta i kona mau la e ola ana. E holo pu ana ia me kona wahi kahu lio, mamua no nae ia a mahope mai kona wahi kahu ; a ia laua e holo ana, kahea mai ia kona wahi kahu lio iaia me ka leo nui i kona wa i ike aku ai i ka laau e hina mai ana maluna pono iho o ua Moi Wahine la. I lawa no i ka Moi Wahine a hala iki aku ma mua kamumu ana ua laau hookalakupua la ilalo, mai paki liilii ia ; he mau iwilei wale no kona kaawale mai ka laau aku.
Ua loaa iho i kekahi keiki Alii o Hinedu he umi miliona dala i kela mahahiki aku nei no ka pulupulu ma Inia.
NA KOKUA MAHINA HOU NO KA EKALESIA O
KAWAIAHAO NO KA MALAMA O IUNE.
Honolulu - - - - $27 12
Maemae - - - - 1 62
Kunawai - - - - 1 12
Kapalama - - - - 2 25
Pauoa - - - - 3 25
Kaakopua - - - - 1 00
Maunakiekie - - - - 62
Manoa - - - - 8 75
Makiki - - - - 62
Kamoiliili - - - - 9 37
Waikiki-kai - - - - 4 00
Palolo - - - - 1 25
Huina $60 00
Ka huina kokua no ka mahina o Mei $67.80