Ka Nupepa Kuokoa, Volume IV, Number 16, 20 April 1865 — Na Palapala. Ka Moolelo o Kamehameha 1. [ARTICLE]

Na Palapala.

Ka Moolelo o Kamehameha 1.

E na Makama. Ma ko kakou Pepa o ka pule i hala iho nei, ua ike akea oukou i ka olelo hoike a ka pepa e pili ana no ka Moolelo o Kamehameha. A nolaila, aole paha oukou i nele i ka iini manao kanakamakua e hoopuka kokeia ua moolela la: He oiaio, ua ae aku au e hoopukaia ua Moolelo la ma ko kakou Nupepa; aka, aole owau wale ka mea kuleana iloko oia moolelo, elua mau mea e ae i hoohui pu mai me aʻu e kakau, a e imi hoi i ka moolelo o ka mea nona ka inoa maluna. O ua mau hoa hui la oʻu, he mau kanaka i like ole ka ili me koʻu, he mau kanaka kaulana laua; a mamuli o ke kauoha a ia mau mea i kuleana ai wau iloko o keia moolelo. A o ka mea e hiki ai au e hoopuka ia moolelo ma ke

akea i ku i ka maikai wale no, aia a haalele mai oʻu mau hoa i ko laua kuleana ma keia moolelo, alaila e hoopuka no au ma ke ano akahele, malia paha, o lilo au i mea e hooheneheneia mai ai ma keia hope aku, mamuli o koʻu ana mahaoi paha, a ano kanaka hou o keia wa. A nolaila e kali no au me ke akahele i keia mau la, a hiki i ka wa maopopo. A nolaila, ke waiho aku nei au he wahi olelo hoakaka e pili ana i ka Moolelo o Kamehameha. 1 Ko Kamehameha hanau ana 2 Kona wahi i hanau ai 3 Ka hana a Kalaiopuu me Keoua mahope iho o ko Kamehameha hanau ana 4 Kona wahi i hanaiia'i 5 Na uha nana i hii (hanai) 6 Kona mau hoa ai waiu 7 Kana mau punahele 8 Kona ao ana i na mea Kaua 9 Kona haipule ana i ke Akua 10 Kana mau Kahuna 11 Ke ano o kana malama ana i ka Oihanakahuna 12 Kona Kaua ana a me kona Lanakila ana. 13 Kona ku ana i ka moku, a me kana mau hana maikai a pau i pili i ka naauao. Ma ka hoomaopopo ana i keia moolelo, aneane akolu makahiki ka imi ana, a hooponopono hou ana i keia moolelo, ua nui no hoi na alu a me na awawa o ka imi hoomanawanui ana i keia moolelo me ka hoolilo i na dala he kanawalukumamaha me akolu hapawalu. Aka, me ko makou hilinai nui e malama no ka hanauna mahope aku. A mamuli o kaʻu mea i olelo mua ae nei, ke noi aku nei au ia oukou ano. Mai uluhua oukou mamuli o ka makou nee malie ana e hooponopono i keia moolelo a hiki i ka hookoia ana o ko oukou makemake. A o ko makou malama ana i keia moolelo ma ke ano maikai wale no; aole e hiki ia makou ke olelo mamua o kona laha ana, ua kina ole makou ma keia kakau moolelo ana. S. N. Haleole.