Ka Nupepa Kuokoa, Volume IV, Number 15, 13 ʻApelila 1865 — Page 1

ʻaoʻao PDF (1.48 MB)

KA
NUPEPA KUOKOA
Ke Kilohana Pookela no ka Lahui Hawaii.
BUKE IV. HELU 15. HONOLULU, APERILA 13, 1865. NA HELU A PAU 176.

" KA NUPEPA KUOKOA.,"
HOOPUKA MAU IA MA HONOLULU
I kela Poaha keia Poaha.
$2.00 no na mahina he UMIKUMAMALUA,
$1.00 no na mahina eono, ME KA HOOKAA MUA MAI.

NA OLELO HOOLAHA — aole i oi mamua o 10 laina no ka hoopuka hookahi ana, $1.00 ; alua komo ana, he $1.50 ; hookahi malama, $2.00. E uku mua ia mai ke dala o na olelo hoolaha a pau e hoounaia ana mai e pai.
KANIKAU — he hapalua dala ka uku no ka aoao hookahi o ka pepa leta, oia hoi 4 keneta no ka lalani hookahi — penei : he 25 lalani, $1.00 ; 50 lalani, $2.00 ; a pela'ku.
KA UKU NO NA OLELO HOOLAHA — ka uku pepa, a me ka uku o ka Kanikau, e haawiia no ma ka lima o na Luna o ke Kuokoa, a i oleia, e hoouna mai ia Kauka Kulika.
O KA UKU PEPA A PAU E HOOKAA MUA MAI NO — aole e kauia ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua. E pono ke hiipoiia keia mau rula, no ka mea, he emi no ka auhau no keia nupepa.
AIA KE KEENA O KA NUPEPA KUOKOA — ma ke kihi hema o ka Hale Hookipa Luina (Sailor's Home.) O na hora hana, mai ka eiwa o kakahiaka, a i ka ha o ke ahiahi.
L. H. KULIKA, (Lona Hooponopono.)

KA " NUPEPA KUOKOA."
Is published in Honolulu
EVERY THURSDAY,
$2 00 per annum, or $1.00 per six
months, in advance.

ADVERTISEMENTS not exceeding 10 lines, inserted once for $1.00 ; twice for $1.50 ; and $2.00 for one month ; all advertisements must he paid for in advance. KANIKAUS will be charged 1.00 per page, or 4 cts. a line. PAYMENTS FOR ADVERTISEMENTS, Subscriptions or Kanikaus, may be paid to any of the Agents of the Kuokoa, or may be enclosed in a letter to the Publisher.
ALL SUBSCRIPTIONS must be PREPAID. No names, either of foreigners or natives will be inserted on the subscription list until paid for. This rule must be strictly adhered to, on account of the low subscription price. THE OFFICE OF THE KUOKOA is in the South corner of the Sailors' Home. Office hours from 9 A. M. to 4 P. M.
L H. GULICK.
Publisher.
Volume I. II. and III of the KUOKOA, bound, for sale, $3.50 each.
Persons having complete sets of the above, can have them bound by paying $1.50 each.

A. F. JUDD,
ALAPAKI, (oia ke keiki a Kauka.)
LOIO !

Ma ke kihi o ke Alanui Papu, a me Kalepa
Honolulu, Oahu, Iune 30, 1864. 151-3m.

S. KUPANEA. J. W. KEAWEHUNAHALA.
Loio ! Loio !

                KE HOOLAHAIA'KU NEI I NA KANAka a pau o keia Aupuni, ua makaukau na mea nona na inoa maluna e Kokua, a e lilo hoi i LOIO no na mea a pau e loohia ia'na i ka hihia, a e pale ana no kekahi hihia imua o na Aha Hookolokolo o keia Aupuni. He mau mea laua i aoia i ka OIHANA HOONAAUAO ma ke Kulanui o LAHAINALUNA, a ua aoia hoi ma ka OIHANA Kanawai, a me ke kakau ana i na Palapala o kela ano keia ano, e ka Mea Hanohano G. M. ROBERTSON (LOPIKANA.) A o ko laua Hale Oihana, aia mauka iho o ka huina o ke Alanui Hotele a me Maunakea ma Honolulu, Oahu.
Honolulu. Feb. 6, 1865. 167-y

Na Buke i Pai ia e ka Papa Hawaii.

Eia na huke kuai, a me ke kumukuai, Baibala nui no na Awai o na Halepule, $4 00
  " Ohana, ano nui, me na kii, } { 2 50
a me na Moohana, } 5 00
  " Ohana uuku iho, me na Moohana, ili ulaula, } 1 00
  " Ohana, me na Moohana wale no, 62 1/2
  " Okoa, - - - 50
Kauoha Kahiko, i paiia i ka M. H. 1838, 25
Kauoha Hou, me ka pepa lahilahi o waho, 12 1/2
Kauoha Hou, hapa haole (Haw. Eng.) 25
Hoikehonua, Hoikemanawa, ame Kuhikuhi no ka Moolelo, } 25
Haiao, - - - - - 25
Hele Malihini Ana, - - - - 25
Wehewehehala, - - - - - 25
Lira Hawaii, - - - - - 25
Na Olelo Hoopomaikai, - - - 25
No ko ke Akua Ano, - - - - - 25
Lira Kamalii, - - - - - 25
Kumumua Hou, - - - - - 12 1/2
Moolelo Ekalekia, - - - - - 50
Hoike Palapala Hemolele, - - - - -25
Himeni Hawaii me na Leo Mele, 1834, 25
Ninauhoike, - - - - - 12 ½

Eia na buke i haawi waleia.

  Haawina Baibala.
Ui.
Olelo Ao i na Wahine Hawaii.
Ko Dawida Malo Kumumanao.
L. H. Kulika.
Kakauolelo o ka Papa Hooko o ka Ahahui Euanelio o Hawaii.

PAHU KUPAPAU !!

                AIA I Ka MEA NONA KA INOA MALALO nei, na PAHU KUPAPAU o kela ano keia ano, no ke kumukuai emi loa. He mau Papakaukau, Hale-pa, a me na mea waiho lole.
F. KAISER. Hilo, Hawaii, Feb. 1,1865. 166-3m.

OLELO HOOLAHA.

                UA HOOPII MAI O NALEPO(W.) KUE I kana kane mare ia ALINA (PAKE k.) no Honolulu mamu, e hooki i ko laua mare ana no ka nalowale ana no na makahiki ekolu o ua ALINA (PAKE k.) nei ma ka aina e, aole i lohe ia mai. E hanaia keia hoopii imua o ka Mea Hanohano R. G. Davis kekahi Lunakanawai o ka Aha Kiekie ma ka la 23 o Iune, i ka hora 10 o kakahiaka, aia ma ka Hale Hookolokolo ma Honolulu, Oahu.
WM. HUMPHREYS. Hope Kakauolelo o ka Aha Kiekie. Honolulu. Feb. 20, 1865 169-4m

KA MOOLELO O KEPAKAILIULA !
MOKUNA XXV.
KA HAALELE ANA O KEPALAILIULA IA
KUAIHELANI, A ME KA LOAA ANA O
KONA MANA, A HALAWAI OIA ME
HIIAKA LAUA O PELE.

                MA KEIA MOKUNA HOI, UA oleloia iloko o keia Moolelo, elua anahulu oia nei i noho ai malaila, ia manawa nae ana i noho ai, hookahi wale no ona hoa olelo o ke kupunowahine, oia ua Moo nei, kela luahine nana i hoihoi i ka hale, e like me ka mea i hoikeia ma ka Mokuna 24 o keia Moolelo. Ua haawi maoliia mai ia Kepakailiula ka mana i oi ae mamua o Aukelenuiaiku, a nolaila, eia malalo nei e ike ai kakou i ka olelo, a me ke kauoha a ka luahine.
            Ia laua e noho ana i ka lae kahakai o Kuaihelani, o Kawini ka inoa oia lae, alaila, olelo aku la ka luahine, " E ! e Kalani," alaila i mai la o Kepakailiula, " Heaha ka'u," alaila, i aku la ka luahine kaikapu, " E ninau aku ana au ia oe, heaha kou makemake nui i manao ai oe e hele ma na aina ?" Alaila i aku la keia, " Ka ! ua hai mua'ku no hoi au ia oe he makaikai, i kuu la i pae mai ai i kinohi." Alaila, i mai la ka luahine, " Ae, ka inoa e ninau aku ana au ia oe, a i na e akaka mai ia oe, alaila, e haawi aku no au ia oe he wahi makana, oia hoi ka'u wahi uku ia oe." Alaila i aku la keia, " Heaha kau uku e haawi lokomaikai mai ai na'u ?" Alaila i hou mai la ua luahine la, " O keia manu, oia kou kokoolua. Eia nae ko wahi mea e hipuu ai la a paa i ka pola o ko malo, o keia wahi unahi la, o kau mea malama loa ia, aia a malama oe i keia mea alaila pomaikai oe."
            Alaila i mai la o Kepakailiula i ua luahine la, " Heaha la na mea e pomaikai ai au ke malama i na wahi mea ?" Alaila i mai la ua luahine la, " Eia kou pomaikai, o ka pili ana o keia wahi mea ia oe, o kou wehe pilikia keia, eia ia ia nei ko pono au e hana'ku ai, i na e loaa kou hoapaio, a he hiki ia oe ke hana'ku i kekahi mea e e like me kou makemake, ina no ka make, e make no, ina no kekahi mea e ae, e ko ana no, a pela'ku no oe e hana'i. Aohe mea e ae e lanakila mai maluna ou, a ke kauoha nei au ia oe, o hele a i hiki i kou wa e hoi mai ai, mai hele loa'e ma ka moana. Ina oe i hoi mai maanei, alaila, hana'ku au ia oe a pono, alaila hoi aku i Hawaii. No ka mea, nou ke Aupuni, a nou oluna me lalo, nou na wahi a pau, nou ke akua nui, ke akua iki, nou hoi ka po, nou hoi ke ao. O makou a pau e noho nei ma keia aina, he poe kauwa makou nau, a o ko makou poo no oe, no ka mea, i na olelo mai oe, ua lohe makou a pau ka poe o ka po, a hiki i ke ao nei. Nolaila, mai hoi loa ma ke ala, i na oe e hoolohe ole i ka'u, alaila, aohe pomaikai e loaa ia oe i kou wa ui, a e noho oe me ka nele loa a hiki i kou wa e make ai."
            Alaila i aku la ke Alii, " Aole au e hoi loa'e ma ka moana, e hoi mai ana no au ma ou nei." Alaila i mai la ua luahine moo nei, " A e malama e ke Alii i ka hua a ka waha." Alaila ae aku la keia me ka makau pu no ko ia la ano e ia wa o laua e olelo ana pela, a oki iho la ka laua olelo ana. Alaila, hoi aku la o Kepakailiula i ka hale, a nanea iho la me na'Lii kamaaina, a ua hele mai no kekahi oia poe oia ano e noho pu me ia nei, a hiki i kona wa i hele aku ai. Eia nae ka mea kupanaha a ua Kepakailiula la i ike ai ma ua aina la. Aole oia i ike iki i ke kahu ia ana mai o ka ai, ka ia, a me ka puaa, me ka moa, a me na mea ai no a pau e like me ko Hawaii nei. He mea malihini ia i kona mau maka, a hiki wale i kona wa i haalele aku ai ia Kuaihelani, a holo hou aku la ia i ka moana kai hohonu a ka ino i waiho ai me ke aloha nui.
            Ia ia i noho loihi ai malaila, aole oia i ike i kekahi kanaka, a wahine hoi, aole loa no, o na'Liii wale no, a hiki i ka manawa i lana'i kona waa i ke kai, ia manawa, ua piha loa mai o uka i na kanaka ui, a me na wahine ui, me na elemakule i hele a kuakea ke poo i ka hina, a me na luahine i hele a kolopupu e naue ana me kahi kookoo i kahakai, ia manawa, hoolana malie mai la keia i kahi waa oia nei, me ka haka pono mai o kona mau maka nani i ka ahakanaka, i pani ia iho ke one ulaula o Kuaihelani paapu, ia wa hoi, " I wale iho la no keia, ka ! kupanaha, he kanaka no ka hoi la, i hea la hoi keia poe i ko'u wa e noho ana ? Kupanaha maoli kanaka o keia aina:"
            Ia manawa no ana i lana malie mai ai, me ko ia nei manao e hookahuli iho i kahi waa oia nei, i kuhuli la, a noho hou iho keia i Kuaihelani, no ka mea, ua ike mai la keia i na wahine ui opiopio, i hele na kiionohi a lipolipo i ka noho i ka malu, e ku aku ana mauka, me ka haka pono mai o na maka i kai i o ia nei la. Aole i liuliu ma ia hope iho, me he mea i paia'e ko ia nei papalina, i alawa'e auanei ko ia nei hana e nana hou aku i uka, aohe ka aina, ua nalowale, eia keia i ka moana kahi e lana nei, na ke au e lawe la. Alaila, i wale iho la no keia, " kupanaha, he lohe pepeiao hoi ko'u i Hawaii i ka oleloia, he aina akua o Kuaihelani nei, akahi hoi a ike maka'e nei."
            I keia manawa ana e holo nei, aia i ka lewa, he manu ke kokoolua, hele wale aku la no keia i ka lepo, ko ia nei holo no ia ia la a po, mai po a ao, mai ia la a po, mai po a ao, a awakea, ike keia i ka aina, e uliuli mai ana o uka, hele a nee i ke kai. O ke kani ae la no ia o kahi manu, a o ka holo aku la no ia, a aui ka la a pae i uka, i kahi kuono iloko. I ko ia nei pae ana i uka, e noho ana elua kaikamahine opiopio ui, hookahi kaikamahine nui, hookahi kaikamahine uuku palahalaha, o ke keu aku nae ia o ka ui mamua'e o ka mea nui. Ia ia nei e hapai ana, alaila, hea mai la kekahi, " E ! mai na maua e hapai ko waa," hoole no keia, a paakiki loa no ua mau kaikamahine nei i ka hapai, a hapai pu no lakou. O ka inoa o keia mau wahine, oia o Hiiaka laua o Pele. I ko laua wa kamalii, ko laua hookane ana, a hoowahine ana me Kepakailiula. I ka manawa a lakou i hapai ai i kahi waa oia nei, ia manawa, koi mai la ua mau wahine la ia ia nei e hoi i ka hale, a ae aku no hoi keia, o ko lakou nei hoi aku la no ia a hiki i ka hale e ku ana ma kapa o kekahi loko nui, he lokoia na ko laila alii, a hiki lakou nei i ka hale, i e-a aku auanei ko ia nei hana, aohe kanaka e ae maloko, o ua mau wahine nei wale no ko ka hale, aole ka lehulehu.
            Alaila, ninau aku la keia, " Ka ! auhea hoi ka lehulehu o ko olua hale ?" Alaila i mai la ua mau wahine la, " Aohe lehulehu, ekolu wale no makou, o maua elua, a me ko maua kaikunane (Kamohoalii,") " Auhea la hoi ia" wahi a Kepakailiula ? " Ka ! aia'ku nei i uka i ka mahi uala, he uala ka ai o ko makou nei wahi," pela mai la ua mau wahine la ia ia nei. Alaila i aku la keia, " E kii aku ia ia a no," alaila, hookonokono aku la o Pele ia Hiiaka e kii, i mai la no hoi kela, " o oe no ke kii ae." Alaila i ae la o Kepakailiula ia Pele, " O oe ke kii aku i ke kaikunane o olua, a o maua me ia nei ke noho ae." * * * * * * * *
(Aole i pau.)

Ka Hoomana Kahiko.
HELU 13.
NO KA AI KANAKA O HAWAII NEI.

                Eia kekahi mea i akaka'i ka aikanaka o keia Pae moku, o ke ao ana o keia lahuikanaka i ka Lua a akamai, oia ka lima iki, a he haihai kakahi inoa. Akaka ka ai, oia ke kaina, me ke akamai io, me ka paanaau, a me ka loaa pu hoi o ka puka e hemo ai, penei e maopopo ai : O A, he haumana i aoia i ka Lua, a me E, ua akamai pu laua, ua pii pu ko laua ike, na A nae e hopu ia E a paa loa, e like me kana kaina i manao ai e hopu, na E hoi ka wehe maikai a hemo, ua kapaia ia wehe maikai ana o E he puka. O ka ai lolo ka hana hope, he puaa i kaluaia, me ka puunaue na kana poe haumana a pau. Eia ka ai lolo hope, o ke kii no e pepehi i ke kanaka, a make ke kanaka, ua pau loa na lala i ka laweia o keia kanaka make, a waiho imua o ka lakou kumu ; na ka lakou kumu e hana, ua kawili puia me ka apu awa, na maka o ka mea i loaa ia lakou, o ka mea pahee o ka maka i kapaia he walewale, ua pau ia lakou i ka inuia me ka hoopailua ole. Pela no ma na mea like e ae, ua pau ia lakou i ka ai ia, he " noke" wahi a lakou, " he kamumu ! he kamumu ! ! O ke koena, ua waihoia ma kekahi ipu, ua kapaia ua ipu la e na kumu, he ipu hoolau pepeiao ; ua kapiia i ka paakai, ua oleloia, ua hu ka liu o ka paakai mawaho o ua ipu nei.
            Pela mai na Alii, a na kanaka, ka poe e ao ana i keia mea o ka Lua, o ka poe wale no iao ole ke koe, a me ka poe iao i ka Lua aole nae i ai lolo i ke kanaka, oia paha kekahi poe i koe ; a hiki mai nei i keia wa maluhia. Nani ka pomaikai !
            Eia kekahi ; ua oleloia, he aikanaka kamaaina o Halemano i Oahu, ua pau kanaka ia lakou i ke kaluaia. E nana mai ana no lakou a ike i ke kanaka e hele aku ana i ko lakou la wahi, o ka ho-a no ka ia i ka imu o ke kanaka, hele e no ka laulau hoolua no ke kanaka, hoomakaukau mua na ipukai, anai mua na pa laau. Ua oleloia, na lakou no kekahi e kii i ka poe malihini e hoowalewale e pii i ko lakou wahi, a hiki ilaila, ua pau i ke kaluaia e lakou.
            Ua oleloia, he mau ipukai ia pohaku kekahi a lakou, malaila lakou e hoonuu ai i ke kanaka, ua hele ka a hinuhinu ua mau ipukai pohaku la i ka momona o ke kanaka i kaluaia, ke koe nei no paha ka mamo aikanaka o Halemano, ke waiho la no paha na pa pohaku a lakou i kalai ai a hiki i keia wa a kakou e noho nei.
            Ua oleloia e ka poe kahiko, o Kahakuloa kekahi poe ai i ka naau o ke kanaka, he poe holehole i ka iwi o kanaka i mea makau, a i mea pana iole, ua olelo lakou, ua like ka ono o ka naau kanaka me ko ka naau Ilio ke kamumu, ua oleloia e lakou, hookahi anana o ka naau o ke kanaka.
            Eia kekahi ; ma Hawaii kekahi mau keiki i ai i ka naau o Lono, oia hoi o Kapena Kuke, ua kuhi laua he naau ilio i ka wa i hooholoia'i kona mau iwi.
            I ko'u manao, o na Kahuna kekahi i ai i ke kanaka i ka wa kahiko, ka poe malama heiau, noho pu me na'Lii. O keia Pae aina kekahi i kauia ma ka Papa Helu o na aina aikanaka. S. EKAULA.
[No ke Kuokoa.]

Mai Pake.

                HE OLELO PANE AKU. IA OE E KAUKA KULIKA ; ALOHA OE :—
            Aia ma ke Kuokoa, Mar. 30, aoao 2, kekahi olelo me nei, " Ua haiia mai, ua hoola ae o Kauka Baluina i kekahi mau mai o keia ano. He oiaio anei keia ? Ina he oiaio, pono ia ia ke hai mai ia kakou." O keia ninau ka'u e pane aku nei. He oiaio no, ua ola kekahi mau mea i ka laau a'u e hanai nei i ka poe " mai Pake." Elima, oia ka nui o ka poe i ai i keia laau ma Lahaina nei. Ekolu o lakou i ola pono ; elua, aole laua i malama pono i na Kanawai o ka laau, a huli koke laua mamuli o kela laau keia laau a kanaka Hawaii e hana nei no ka " mai Pake." Nolaila, haalele loa au ia laau. Ua haawi au i keia laau no kekahi wahine ma Koolau, Oahu ; a ua lohe au, ua ano ola kona " mai Pake."
            Aole au i manao e haawi i keia laau i na mai he lehulehu i kinohou ; aka, e kali, i ike ia ke ano o ka laau, ke kupono, a me ka ole paha. Nolaila, ua kiai nui au i keia poe a'u i lapaau ai ma Lahaina nei ; a ua lana kuu manao, e ola na mai Pake a pau o Hawaii nei i keia laau. Aole nae e kaena nui kakou, no ka mea, ua haawiia keia laau no ka mai e like me nei ma na aina e, a ua oleloia, ua ola kekahi, a paakii ka mai o kekahi. O ka " mai Pake," ua kapaia ; iwaena o na Kahuna lapaau naauao, lepera ; o lepera no kona inoa ; aole nae like loa kona ano me ka lepera o ka poe Iseraela. Ua hai mai kekahi mau Kahuna lapaau o Europa, ina he lepera hou, hiki ke hoola ; ina he lepera kahiko, aole e ola. O kahi Kahuna akamai ma Farani, olelo mai oia, o na mai lepera a pau ana i ike ai, na mea hou a me na mea kahiko, ua ola ma keia laau hookahi wale no.
            Ina olelo kakou no ka lepera kahiko, e hai au i kekahi o keia mau mai Pake i ola ma Lahaina nei. He kane oia ; kanalima a keu kona mau makahiki ; umikumamaha makahiki kona waiho ana i ka mai Pake ; pehu ino kona maka, a puupuu, hakuhaku, kanununu, hinuhinu, manoanoa ka pepeiao ; pehu na lima me na wawae ; he ino na manamana wawae a me na manamana lima, aole i hiki ia ia ke hapai i kekahi hana. Ua lapaauia oia e na Kauka o Lahaina ; ua haawi au ia ia i na laau he nui loa, me ka emi ole o kona mai. A loaa ia'u keia laau a'u e hana nei, haawi au ia ia hookahi hua ale i ke kakahiaka, a hookahi i ka po. Pela kona ai ana i keia laau, i na la a pau, a hala na malama ekolu a me ka hapalua o ka malama. Akahele kona ai ana. Emi aku kona mai ; a, i ka pau ana o ia mau malama, ua ola loa. Hookahi makahiki keia o kona ola ana, aole i puka hou ka mai.

HE LEPERA KAHIKO KEIA.

                Aole au i hai i ka inoa o ia laau, no ka mea, he laau make ia, ke hanaia e ka mea hawawa. Aole pono kanaka Hawaii e lawelawe ia laau. Pono i na Kahuna i aoia, a ia lakou wale no.
            Aole ia'u wale no keia laau no ka mai Pake. Aia no ia i na Kauka Haole a pau o Hawaii nei, a ua ike pono no lakou i ka hana ana i keia laau no ka poe lepera. Ua hanaia keia laau iloko o ka wai i kekahi manawa, o ia laau hookahi no ia. Ua haawi na kauka o Honolulu i keia laau a me kekahi laau e aku i kahi mau mea mai Pake, a ua ola lakou. Ua hai mai na Buke lapaau i keia laau, he mea kupono loa i ka mai lepera. O Dr. Good ma Ladana, he haole naauao loa ma ka lapaau ana, i mai la oia, " Aohe laau e ae i mana a me ka maikai e like me keia, no ka hoola i na mai lepera ma na aina a pau." Ua kuka pu au nie na kauka o Honolulu no keia mai, a ua hana o Dr. Judd i kekahi laau no'u. Ua haawi o Kauka Mika, o Koloa i keia laau, a olelo mai ia'u, he laau kupono ia. O Kauka Wetemore, no Hilo, kai kokua nui ia'u ma keia hana, a olelo mai, " E hoao oe i keia laau ma na mai Pake o Lahaina."
            Ina me ia ka makaukau o na Kauka Haole no keia mai, nohea ka pilikia no ka mai Pake iwaena o kakou ? Eia ka pilikia, o ka nui o na mai Pake, he naaupo loa lakou. E ake lakou e ola koke, a ke holo nei lakou mamuli o kela lapuwale keia lapuwale i kapaia, he laau e ola'i. He lehulehu na kanaka Hawaii, kanaka naaupo e lapaau nei i ka mai Pake, e kuhikuhi ana i kela laau keia laau, he laau haole kekahi, a me na laau Hawaii. Olelo kekahi poe, " E ola no i ka awa." Nui na mea mahalo i ka penikila ; okioki kahi poe i ko lakou io i ke aniani, a ke hoomau nei kekahi poe, ma Lahaina nei, e ai i ka popoki ; no ka mea, ua olelo kahi Pake. Ina e ai lakou i ka io o ka popoki, e ola ka mai. I ka makahiki 1863, he 50 na mai Pake ma Lahaina — a he umi o ia poe i make ia makahiki no. Aole i ino loa ka mai o kahi poe o lakou, a make no. I kuu noonoo, make lakou i ka lapaau ino ia. I keia mau la, o kahi mea o makou i loaa ia mai, he ikaika kona kino, oluolu, ono ka ai, e holoholo ana i o a ia nei i kona wa ikaika, make koke no oia. Heaha la ia ? He kanaka makapo kona kahuna lapaau. Ina hoopaiia keia poe no ka pepehi kanaka, pono loa.
            Pomaikai ka aina i ke kanawai pololei no ka mai Pake, i hooholoia iho nei i keia makahiki. Pono e hookaawaleia ia poe, o piha ka aina ia mea ino. Aole nae au manao, ua pono e kau ia poe mai ma na moku a lawe i kahi moku e, o haumia na moku. E aho he mau hale liilii e noho ai lakou — elua ma Hawaii, elua ma Maui, a hookahi hoi ma Oahu, a pela'ku. Ina pono ka hana, a na na Kauka Haole e lapaau, lana kuu manao, aole hala na makahiki elima, a nalowale ka mai Pake mai ka aina aku. Me ke aloha no,
D. BALUINA.

No,ka mahiai.
HELU 1.

                Auhea oukou e ko'u poe hoa mahiai, ke hoowahawaha nei kanaka hoohanohano i ka kakou oihana, kekahi poe hookohukohu Loio. na haumana hookiekie o na kula nui, me na wahine kilohi.
            No ka haukae ka o ko kakou mau kino, a me ka lole, e paele ana i ka lepo me na oo mahiai.
            Aka ea, ua pakela oi aku ka hanohano o ka kakou oihana mahiai, me ka hanai holoholona, mamua loa o ko lakou noho wale me ka hookiekie.
            No ka mea, o keia oihana ke kahea o ko kanaka ola kino a pau loa. Mai ke'lii nui a hiki i ka lopa hele wale, aole kanaka i pakele i ke kike ma ko kakou mau ipuka, a noi mai, " I ai," i ke kakahiaka, me ke awakea ; a me ke ahiahi, i kela la i keia la.
            E hoopio i ka mahiai, a e oneoneo koke ana o Honolulu nei i ke kanaka ole, a me ka haole ole, aole kalepa i koe, aole poe moku o ike hou ia ma na kai o kakou, a e ku popopo, a oneoneowale na wili ko a pau loa e mahi nei. Aole anei he hanohano maoli ka kakou oihana ? Ua pakolu ke kulou ana o kanaka a pau loa ia kakou i ka la hookahi, a paniia ko lakou houpo lewalewa, aole emo, a hoi hou mai lakou ia la no, a hoopili mea ai ia kakou. No loko ae o ka mahiai ko lakou mau mea e paa ai ka pololi, ke kalo, uala, pia, palaoa, raiki, kulina, papapa, akaakai, kakipi, ohia, na ipu poe, ipu haole, ipu ala, na hua laau ono hoi e aimaka, na ulu, na maia, alani, lemi, ohia ai, na niu, peaches, ohelos. Ke kope hoi a na haole e inu nei, na laau lapaau mai kekahi, ia mea aku ia mea aku e ulu ana mai loko ae o ka lepo i hoowaliia, a waele ia paha. Na kakou aku ka io bipi, io puaa, hipa, kao, na pelehu, moa, koloa, nene, me na hua o lakou. Pela hoi ke ko ai, ka waiu, ka waiubata. No kakou aku na holoholona ikaika i ka lawelawe, na lio, me na bipi kauo, na hoki, me na piula.
            Ke hilinai nei ka lehulehu maluna o kakou. Ina e pio ka oihana Alii, ua pakele nae kanaka ia kakou ka poe mahiai. Ina e pio ka milo lole, e hiki nae kanaka ke helewale, a noho olohelohe, ke maona ka opa. aka, ina e pio ka oihana mahiai, uo pio pu meia na oihana e ae a pau loa.
            Nolaila, o ka mahiai ka oi aku o na oihana kino a pau loa, ka mea hanohano loa hoi. Oia ka manao o LUHUA.

Kumumanao.
HELU 2.
EIA KA LUA O KEKAHI O NA HOAILONA O KA LAHUI
KANAKA MAKE, HE LAHUI KANAKA INA
OLE NO I KA MALAMA ANA I KO
LAKOU OLA KINO IHO.

                O kekahi mau lahui, ua hookauwa ae na Iehova, ua kau no i na kanawai kue ole i ko ke Akua mau kanawai. Ua kuhihewa no, ua malama ia, a ua hoolohe pono ia no hoi paha ua mau kanawai la. Aole hoi i hoopoina, ua hoomanao no ; aka, aole nae ka ike i ka malama ana i ko lakou ola kino ana. Ka ano no ia o kekahi mau lahui o ka honua nei, aole ike i ka malama ana i keia ola kino ana. Aole no hoi he waiwai e ae i oi o keia ao mamua o keia ola ana, " No ka mea, heaha la ko ke kanaka pomaikai ke loaa ia ia keia ao a pau, a lilo aku kona uhane ?" He ole, he nele, ke ola mua no ia, a mahope ke ola uhane ana, aia ma kela ao.
            O kekahi kumu o ka ike ole ana i ka malama ana i ko lakou ola iho, oia no ka naaupo. He kumu nui keia o ka make ana o na kanaka he nui wale. Ina loohia kakou i ka mai, he mau kahuna naaupo, a he laau hawawa, make aku la, aole ola.
            O ko lakou noho ana, he naaupo no, noho huikau wale, a pela aku no. E noho ana iloko o na ana o na pali, e like me na manu Koae, a iloko o na lua, e like me na manu Uau, a me na Alopeke. Iloko hoi o na hale pupupu liilii a pelapela no hoi. E moe ana iluna o na lau laau, a iluna o na pohaku, a me na moena pelapela, a e loaa mai auanei na mai he nui wale, o ka hope no ka make.
            O ko lakou ai ana, he naaupo no ; ai nui i kekahi wa, lili-o na opu, pilikia na keiki liilii a me na lopi makalii oloko. Nanaha mai, luai, manawahua, hi, a pela aku. Paina pinepine no hoi, paina liilii, paina ka po, paina ke ao. I kekahi wa, nele i ka ai ole, aole he paina pinepine, aole ai nui ; aka, aole maoli i ka ai, maalahi mai na maka, hakahaka nui ko o ka opu, poniuniu, a hina iho la a make.