Ka Nupepa Kuokoa, Volume IV, Number 9, 2 March 1865 — Page 4

Ka Nupepa Kuokoa.

Ka Uhane ka Pohaku nani.

Ina e hele ana kekahi kanaka i ka makaikai ma ka waonahele, me kahi pohaku nani hookahi, aia iloko olaila kona waiwai a pau, aole e ole ana kona makau i na ia e lohe a ike aku paha i kekahi poe e paa ia mai ana e na powa, no ka mea, ina e lilo keia pohaku ana, o kona nele iho la no ia i ka waiwai ole. Ke hai aku nei au ia oe o oe no e kuu hoa, o oe no ke kanaka makaikai ; o keia pohaku nani, oia no kou uhane ; o ka waonahele, oia no ka honua nei. E kaahele ana oe mawaena o ka poe hewa a me na lehulehu o na uhane ino a me na hoowalewale a pau o keia honua. O lakou no na powa e kali ana i kou uhane a ina he mea hiki ia lakou ke hooikaika ino loa i ka paa ana ia oe aole oe e hele i ka lani, aole loa no oe e hiki ilaila.
He hiki i na poho e ae ke hookaaia, aka, ina e haule kou uhane, o ka haule no ia o ke Akua ia oe, haule o Kristo, haule ka lani, a haule na mea a pau loa. E imi oe i wahi e pakele ai keia pohaku nani au, o kou uhane make ole. E nana'ku i ka paku, Nahuma l : 7 ; i ka hale paa, Hal. 31 : 2 ; a ike kulanakauhale o ke ola, Heb. 6 : 13 ; a ia Iesu Kristo, ka mea nana i hoola'ku na mea a pau i hele mai i ke Akua ma ona la. Heb. 7 : 25, a o ka mea hoi nana e malama lakou i kona Aupuni Lani, 2 Timoteo 4 : 18.

He wahi keiki Maalea.

                He wahi keiki kane, eha wale no ona mau makahiki, i hele i ka lawaia, a lohe i na nuhou mai na aina e mai, a i kona hoi ana i kona home, hoomanao oia i na mea i loheia, a noonoo keia i ka hana hiki ia ia, i loaa i wahi kokua no na aina e. O kona makuakane he kanaka hana barena, a me na mea ono. Hele ua keiki la i kona makua, a noi aku ia ia penei, " e haawi mai ia'u ka mea oki ia i ka wa e hana ana oe i na popo barena nui, a me keia e hana ana au i mau popo barena uuku, a e kuai aku ana i loaa mai ia'u kekahi kokua, i hoouna ia aku na Baibala a me na kumuao i na keiki ilihune, naaupo, ma na aina e."
            I aku kona makua ia ia, " aole paha kuai na kanaka i kou mau popo belena makalii, makehewa kou hana."
            Aka, no ka paa o kona manao e hoao i keia hana, hele no ua keiki la a noi hou i kona makuakane, me ka olelo ana, e kuai aku no, a na ka mea i kuai e uku mai ia'u e like me ko lakou manao, ina nui na popo i lilo no ke keneta hookahi, a pela no.
            Ae no ka makua a haawi i wahi braena i kana keiki e hana i na popo, a na ka makua i hoomoa ma kana imu nui. Ua kuai aku no keia balena, a hana hou ke keiki, a ma keia hana, loaa ia ia hookahi dala me ka hapawalu, ikaika ua keiki la ma ka hana no ka nui o kona makemake e hoouna ia aku ka barena e ola'i na kanaka a nui wale, e make ana ma ka naaupo.
            E na keiki, aole anei hiki ia kakou ke hana i kekahi mea e loaa ai ia kakou kahi kokua no na aina e, i ole nele kekahi poe i keia barena e ola ai, no ka makou hana ole. E hoao, a loaa no paha ke ikaika ma ka imi ana, e like me keia keiki.

I ke Kahunapule Hou.
HELU 3.

E KUU HOA ALOHA ;
            Mai lilo oe i hoa hele, i hoa noho, a i hoa pili me ka poe hoomaloka, me ka poe palaka, me ka poe hoowahawaha i ka pono ; aka, e launa nui oe me ka poe i ike ia he makaala ma ka pono, ma ka pule a ma na hana pono a pau a ka Haku.
            O ka poe hoahanau o kou ekalesia i makaala, oia kau poe punahele, a pela hoi ina no ka ekalesia e, e wae oe i ka poe haipule makaala, a kuoo, i poe hoa aloha nou.
            Me na Kahunapule euanelio o ka ekalesia e pili koke mai ana i kau kihapai, a me na Kahunapule a pau o kou Ahahui, e launa pinepine, ma ka halawai kino paha, a i ole ia, ma ka halawai palapala ana paha. Mai noho a huna wale ia oe iho, kou mau manao; ina he manao hauoli, a ina paha he manao kaumaha kai loaa ia oe, oia kau e hoike koke aku i kou mau hoahanau ma ka oihana Kahunapule. Aia a ku kokoke kekahi koa ma ka aoao o kekahi koa, aia a ku lalani, ku pili na koa, alaila, holo ka hana a lanakila ma ke kaua ana. Mai ku kawalawala kakou o hina wale auanei, aka, e ku akoakoa, ma ka hoike pinepine ana i na manao a me na pilikia kekahi i kekahi. E hoi mau oe i na hui ana a pau o ka Aha Hui Euanelio, o ka Apana au i noho ai, a me ka Aha Hui makahiki o ka Aha Hai Euanelio Hawaii. Ina elua, a eha paha hui ana o kou Aha Hui i ka makahiki, mai haalele mau oe i ka hele mau. Ma ia mau aha e loaa ai ia oe ka ikaika, ka makaukau, a me ke ao ia no na hana o kau oihana. He kula nui no ia mau aha, kahi e naauao ai na Kahunapule. He wahi hoana no ia kahi e hookala ai ke koa a ka Haku i kona pahikaua a oi, i hiki iaia ke paio ikaika aku i ka paio manaoio. He kuhihewa loa kou, ina e manao oe he mea uuku ka hui ana me na Kahunapule e, ma na hui apana paha, a ma ka hui nui ana paha ma Honolulu i ka hui makahiki. Ina e hoohala wale kekahi Kahunapule i na halawai hui me kona mau hoa, e lilo auanei oia i malihini ia lakou, alaila, e paulele kapekepeke auanei lakou iaia, Mai noho oe a hoolilo ia oe iho i malihini, aka, i hoalauna, a i hoa aloha pumehana loa me kou mau hoahanau. Ua ike no kakou ekolu hui nui ana o ka Iseraela a pau ma Ierusalema i ka makahiki, e hoomana ia Iehova. A pehea kakou e na Kahunapule hou, ina ekolu a eha hui ana i ka makahiki, e manao ana anei kakou he luhi makehewa ia ? Aole loa !
            Eia hou no keia oleloao hookahi i koe, a pau keia.— Mai aea wale oe mai kou kihapai aku. Mai hele pinepine oe mai kou ekalesia aku no na hana kino a no kou pono iho, e imi hana ana, a e imi lealea ana paha ma kahi e. Ma kou kihapai ponoi ka nui o kau hana, a ina e aea pinepine aku oe i kahi e, pehea la e holo ai ka hana a ka Haku ma kou kihapai ? He nahelehele wale ke kihapai o o ke kanaka mahiai i aea loihi aku ; a lilo hoi i ka hehi waleia e na holoholona na mea kanu. E kiai pono kakou i ka pa waina a ko kakou Haku, o komo mai na alopeke liilii, a hana ino i na huhui waina, a o komo mai ka puaa hae o ka nahele a hehi iho, i ko kakou wa e haalele ai i ke kiai ana.
            O ka Ahaolelo kau kanawai o ka aina, kahi i hukiia'i kekahi poe Kahunapule. E noonoo pono kakou ma keia mea, a mai ae wale e lilo ma na hana liilii o keia ao, a poino mau na uhane o kanaka ma ko kakou lilo ana i o a ianei.

Na Palapala.

Ka Hookahuna ana ia James H. Moku,

                Ma ka la Sabati, ua hookahunaia o J. H. Moku, ko kakou makamaka, a hoaloha ma ke ano Mikionare.— He la malie ua la la, malino ke kai, aole i ikeia aku na keiki o Pailolo me ka maka huhu, a me ka makani hoi.— Me he mea ala, ua ae lealea mai ka Haku i keia hana, aole oia i hookaumaha mai. Akahi no oia a wanikiia, a hoolilo loa ia e kau i Kuahu o Olopana, a e mohai aku i na mohai aloha, na mea ala oluolu i ka Haku.
            Ma ka hora pule, ua akoakoa mai na kanaka o ia apana.— A na Rev. S. W. Nueku ka haiolelo imua o ke anaina, no ka mea, ua loohia o Rev. W. P. Alexandero i ka maimai, nolaila, ua lilo ka haiolelo ia Rev. S. W. Nueku, a o ka pule hookohu ia Rev. W. P. Alexandero.
            Ia Nueku ka pule mua.— Na Mr. Pogue i heluhelu ma I Tim. Mokuna 3, a me ka Himeni 306.— Ia Nueku ka pule a me ka Himeni 307.— Aia ke pooolelo ma Hebera 12 : 15.— A pau ka haiolelo, na Mr. Pogue i ninau aku i kekahi mau ninau i ke Kahunapule hou a me na hoahanau a pau o ka Ekalesia.
            A pau ia, kau ka lima o na Kahuna.— Rev. W. P. Alexandero, Rev. J. F. Pogue, Rev. S. W. Nueku, Rev. H. Manase. Ia Alexandero ka pule hookohu.— A pau ka pule hookohu, ua haawi like lakou i ko lakou mau lima akau aloha.— A o makou hoi i ko makou mau waimaka a me na naau eehia.

Na Pogue i ao aku i ke Kahunapule hou.

— Penei ke ano nui o kana mau olelo ao.
—" E kuu kaikaina e, he oihana nui keia, aole he oihana nui e ae e like me keia.

                — Aole he oihana nui wale no, he oihana hanohano hoi.
                — Aole he oihana e ae e like ka hanohano e like me keia oihana. &c — He oihana kaumaha nae.
            1. E malama pono oe i kou noho ana, kou ohana &c.
            2. E pule mau oe i ke Akua.— E komo mau ma kou keena mehameha &c.
            3. Kau mau hana e hana ai,— (1) Haiolelo, heluhelu i ka Baibala &c.— (2) E launa me na hoahanau. (3) E malama i na keiki o ka Ekalesia. (4) Mai haalele i ka halawai o ka Ahahui Lunakahiko, ke ole he mea keakea.
            A pau na olelo ao i ke Kahunapule hou, na Manase i hai aku i ka olelo ao i ka Ekalesia.
            Penei ke ano nui, 1 e malama i ka inoa maikai o ka oukou kumu. Ina oukou i ike i kekahi kiko eleele iki ona, e hele pololei aku no ia ia, 2 E hanai pono i ka oukou kumu. 3 E pule nui no ka oukou kumu.
            Mai huhu i ka oukou kumu i kona hooponopono ana i na mea kekee iloko o ka Ekalesia.
            A pau ia, ia J. H. Moku ka pule hookuu. A holo aku la ka moku iloko o na kai o keia ao me na pukoa o ka pilikia, e pae i ke ao.
            A ma ke ahiahi o ia la, ua malamaia ka Ahaaina a ka Haku. Na kamaaina a me na malihini. Na ke Kahunapule hou i hoomaka ke kukulu ana i ka Ahaaina me ka Himeni 183, pule, a me ka heluhelu ana ma ka wanana a Isaia 53. He wanana pili pono ia Iesu, ka mea nana i hookumu ka ahaaina hoomanao no kona makemake ana e like me na wanana.
            Na Rev. S. W. Nueku ka wawahi Barena ana, a ia Rev. H. Manase ka lawelawe ma ko ke kiaha wahi.
            Ua malu no ka malama ia ana o ka Papa Ahaaina. Ia J. H. Moku ka Himeni 258, a a me ka pule, a hoi mua aku la makou. Me ke aloha. L. AHOLO.
Kakauolelo o ka Aha. Lahainaluna, Maui. Ian. 30, 1865.

I na Makua mea keiki e hookomo ana i na keiki a lakou i na Kulanui.

                E KA NUPEPA KUOKOA E ; ALOHA OE :— Auhea oukou e na makua mea keiki mai Hawaii a Niihau, a hala loa aku i ka poe e noho ana iwaena o ka poe ike ole i ka malamalama nui i oi ae mamua o ka malamalama o ka la a me ka mahina ; e makemake ana e hookomo i ka oukou mau keiki i na Kulanui :— ALOHA OUKOU.
            Aia ma na wahi huaolelo i kauia'e la maluna, ka halialia aloha a kuu puuwai e ekemu aku nei imua o oukou e na makua mea keiki, a me ka lehulehu a pau, no kekahi mau mea e pono ai oukou na makua a me na keiki.
            E ao i na keiki i ka hooponopono ana i ko lakou aahu iho, a me na pono kino e pili ana ia lakou. He nui a he lehulehu wale ka poe e hele nei i na kulanui ; he poe waiwai kekahi i poe a he poe waiwai ole kekahi, aka nae, o ka ike ole i ka hooponopono ana nona iho, oia kekahi mea e pilikia ai oia a me oe pu hoi me ka makua kekahi. Ke olelo mai nei kekahi poe makua, " o keaha auanei ko makou mea e pilikia ai ?" O kou ao ole ana i kau keiki ma ka hooponopono ana i kona aahu iho. Oia kekahi hemahema nui o na keiki e hele nei i na kula nui, o ka ike ole i ka hooponopono no kona kino iho. Kakaikahi wale ka poe i ao ia e ko lakou mau makua no ka hooponopono ana i kona aahu iho, mamua o ka noho ana ma ke kula ; no keaha hoi ? aole anei no ke aloha o ka makua i kana keiki ? Oia no.
            No ke ano o ke keiki ; E noonoo e oe e ka makua no kau keiki mamua o ka hookomo ana i ke kula nui, no kona ano i ka pono a me ka pono ole. Oia kekahi mea e pilikia ai na makua i ka wa e komo ai ke keiki i ke kula, a hala kekahi mau la o ka noho ana ma ke kula, o ka hoohehelo aku la no ia i ka aoao o ka makua, a o ke kipakuia mai la no ia e na kumu, loaa kahi olelo a ka poe kahiko ia ia, "Ahu ka hoka i Kapaakai." E aho hoi ia, he ole loa aku ka mea i noho a ekolu makahiki, a pela aku ; o ka uku pu kekahi o ka noho ana ma ke kula, i ka wa e hoi ai i kahi o ka makua. Nolaila o noonoo e oe e ka makua i ke ano o ko keiki, mamua ae o ka hookomo ana, i ole oe e poho hewa ka luhi ana au e ka makua, no ka imi ana i na mea e pono ai kau keiki no ka noho ana ma ke kula.
            E malama loa oe e ka makua i kau keiki, ke hoi mai me oe i ka hoomaha. He nui ka poe a'u i ike ai, aohe malama i ka lakou mau keiki. Nolaila, e malama oe e ka makua i kau keiki, aole pono e hookuu ia ia e hele pu me ka poe helehewa, aole no hoi e hoolauna aku me ia poe, a komo pu hoi iloko oia pua, o ku-ia kona wawae, a okupeia, a o ka palaha no ia, Aka, e puliki ia ia malalo o kou malu, e like me ka moa i kana mau keiki malalo o kona mau eheu, i ole ai e komo kau keiki iloko o ka pahupaa o ka hewa, kahi hoi e ulupuia'i na waiwai makamae a ka makemake. O kau ao ana, he waiwai makamae no ia au e ka makua e haawi ana i ka maemae i kau keiki. Ke hooki nei au i ka'u kamailio ana me oukou e na makua mea keiki, ke hoi nei au i ka olu o ka Inia, ke huaipuia mai la ka lau e ka makani, he Malua. Me ke aloha no nae. S. W. KULUA.
Halai, Hilo.

HALEKUAI HOU MA HILO — Ua poloai ia mai makou e J. A. Kealohanui o Hilo, Hawaii. E hai mai ana i ka pomaikai o ka poe malaila no ko J. H. Coni hoala hou ana ae i hale kuai hou, a me kona hoa hui pu hoi oia o Mr. Kini (King.) Ke ku hoolai nei oia ma Kaipalaoa, e hookipa mai ana i na iwa puu Bele o ia kaona lailai wale a ke aloha i noho ai, malaila hoi na mea e hauoli mau ai na maka, a e kinikohu ai no hoi ke kino a pau.

Ahahui Makahiki o ka Ekalesia o Waiohinu. Kou, M. H.

                I ka malama o Okatoba i hala iho nei, ua mahele ia ka apana o Kau, i elua kihapai a i elua ekalesia, a ua hoonoho ia o Rev. J. Kauhane no ka ekalesia o Keaiwa me Punaluu.
            No ka pumehana ana o ke aloha iwaena o na hoahanau o keia mau ekalesia elua, a no ka noho pu ana i hookahi ekalesia i keia mau makahiki he iwakalua kumamaha i hala iho nei, nolaila ua kono aku ko Waiohinu ekalesia, i na hoahanau o ko Keaiwa ekalesia, e hui mai me lakou i ko lakou hui makahiki ana ; a ua hui mai no kekahi o ko laila mau hoahanau a me na Puuku. O ke kahu o ia ekalesia ua hala aku i Maui, e imi ana i kona iwi aoao, aia la ma ka aina malumalu o Waikapu.
            Hui ka aha ekalesia o Waiohinu ma ka Luakini o Waiohinu i ka Poaha, Ianuari 5, makahiki 1865.
            Hookahi hora i hooliloia no ka pule ana a me ka hoomana ana i ke Akua, me ka hoomanao ana i na kumu manao pule i hoomaopopo ia ma ka Hokuloa o Dekemaba, no ka hebedoma pule hoomau.
            Hoike mai ka Puuku o ka ekalesia, oia hoi ke kahu ekalesia, no na dala a na hoahanau o Kau i haawi ai i keia makahiki e kokua i ke kukulu ana i ke Aupuni o ka Haku, iwaena o lakou a no ko na aina e.
            Eia ka huina o na dala a ko Kau poe hoahanau i haawi ai i keia makahiki.
            Dala Mahina Hou $ 213 51 " Hanai Kumu 76 00 " Hoomaikai Luakini 285 97 " Ma ka hana i ka L. K. Punaluu 25 00 " Kukulu hale no ke Kahu hou o Keaiwa a me Punaluu 50 00
$ 650 48
            Pau ka hoike ana a ka Puuku, ua hooholo ka aha e hooili aku na dala mahina hou o keia makahiki, i ka Puuku o ka papa o ka aha Euanelio o Hawaii, a na ka papa e hoolilo aku, no na hana a ka Haku.
            Pau ia. Heluhelu mai ka poe i koho mua ia e haku manao ma na kumu manao i haawiia ia lakou.
            Heluhelu o K. Bolabola i kana, ma ke kumu manao. " Ua haalele mai anei ke Akua i keia Ekalesia ?" Manao ia aole no i haalele mai ke Akua, no ka mea ua hoomaikai mai oia me ka haawi ana mai ia makou i ka ai, a nui, i ka ia, a lawa, i Kahunapule hou no kekahi hapa o keia kihapai. Aole no ke Akua i haalele mai ia kakou, aka ua haalele paha kakou ia ia.
            Heluhelu mai o Keaweheana o Honuapo, i ka manao ana i kakau ai, ma kona haawina ; eia ia. " Heaha na hana kupono na na makua haipule e hana'i e hooulu ka pono ma ka lakou mau ohana." Manao oia e ao pono aku na makua i ka lakou mau keiki me he mau kumu kula la, e alakai ia lakou me he mau kahu la, a e makaala e kiai aku ia lakou la o lilo i ka pono ole.
            Heluhelu o J. W. Hanu, i kona manao no ka ninau, " heaha na hana kupono i ka la Sabati, a heaha hoi na hana kupono ole." Helu mai oia i na hana eono i kupono no ka Sabati, a me na hana he 25 i kupono ole i ke Sabati. Ua hai mai hoi i na pauku hoomaopopo no ka oiaio o kekahi mau manao ana.
            Heluhelu mai o B. Haoa i kana manao ma ka ninau i haawiia iaia, " ua poho anei na dala i lilo i ka mahina hou ?" Ua maikai kona wehewehe ana a ua hoike mai hoi oia i na pauku pili.
            Heluhelu mai o Kalauokalani he manao i haku ia e ia, no ke Kumumanao. " Heaha na hana e ulu mai ai ka pono o keia ekalesia, i keia makahiki ?" He nui kona mau manao no ka hoala ana i na halawai, a me ka paipai ana no ka pono, a ua ao ikaika mai kela me he luna nui la i ke Kahu a me na puuku ekalesia.
            Pau ka heluhelu ana o na manao ua hooholoia i keia makahiki e haawi keia apana mai Honuapo, a Manuka, i ($150.00) hanai kumu.
            Himeni ia a pule hoomaikai ia i ke Akua no ka makahiki hou, a hookuuia ka aha.
H.
Waiohinu, Kau, Feb. 6, 1864.

Hoike makahiki o ka Puuku a
me ke kahu Ekalesia o
Waiohinu Kau no
ka M. H. 1864.

DALA MAHINA HOU.
He koena mai ka M. H. 1863. 1,49
Kokua mahina hou.
Keaiwa he umi malama 24,63
Punaluu " " 29,06
Honuapo 18,32
Naalehu a me Waikapuna 11,24
Kahuku 27,13
Waiohinu poe makua 50,21
Kula Sabati o Waiohinu 52.92 — 213,51
Huina pau no ka makahiki 1864 $215,00

DALA HANAI KUMU.
Keaiwa 15,25
Punaluu 4,38
Naalehu a me Waikapuna 6,25
Kahuku 16.12
Waiohinu 34.00
$76,00

DALA LUAKINI O KEAIWA
Ke koena dala mai ka M. H. 1863
1864. 75,35
Jan. 6, Dala mai ka lima o Kaonohi 5,00
Feb. 20 " " 20,00
$100,35

LILO AKU.
Hooiliia i Amerika e kuai bele Maraki 1864. 90,00
Dek. 31, Koena dala ma ka lima o ka Puuku 10,35
$100,35

DALA LUAKINI O PUNALUU.
Koena dala o ka M. H. 1883 47,32
Na dala i kokua maoli ia e na hoahanau mai Manuka a Kapapala, i keia M. H. 220,69
Na dala i loaa mai ma ke kuai ana'ku i ke koena papa a me ke pili 42,95
$310,96

LILO AKU.
Ma ke kuai ana i na papa aho hale 87.71
" " pili koa no ka Papala mai 150.00
Na na kui, pena, aila, &c a no na kamana 73.25
$310.96
Pau pono na lala o Punaluu, aole he koena me ka Puuku.

DALA LUAKINI O KAHUKU.
Ke koena mai ka M. H. 1863 1864. 71.06
Jan. 2, Loaa no na koena pili i kuai ia 3.00
Dek. 7, Loaa mai ka lima o Mokapu 21,00
Dek. 31, o Mokapu 2.28 26.28
$97.34

LILO AKU.
Mei 11, 1864. No na papa kalakala 1209 kap. 4 1/2 ken. 54.41
Dek. 10, No na auka a me ka uku moku, uku kaa 14.45
" " Papa hole 64 kap. 5 1/2 ken. 3.52
" " Pena, aila, kui &c 14.46
" " Na kanaka i hana ka papa hele 10.50
$97.34
Pau pono na dala o Kahuku aole koena e waiho nei.

DALA LUAKINI O WAIOHINU.
Nov. 3, 1864. Loaa mai ka lima o Kama Kaluna $14.00

LILO AKU.
I ka mea hookani pele a malama hale 8.00
No ka Baibala hou 4.00
Koena ma ka lima o ka Puuku 2.00
$14.00
Hoikeia imua o ka Ahahui Ekalesia o Waiohinu, Kau : Jan. 5, 1865.
O. H. KULIKA. Puuku a kahu Ekalesia. Ua nanaia a aponoia Jan. 5, 1865. J. W. HANU. Luna nana Buke Helu Ekalesia.

No Kona Hema, Hawaii.

                HALAWAI HOOMAU MA KONA HEMA.— Ua loaa mai ia makou, he palapala mai ia John A. Kahookaumaha, e hai mai ana oia i ka malamaia ana o ka " Halawai Hoomau ma Kona Hema." A no ka loihi loa, nolaila, aole e hiki ia makou ke hookomo a pau loa ma ke Kuokoa. Aka nae, ua lawe ae makou i na mea nui e hookomo ma ko kakou nupepa. A eia iho no ia malalo nei :
            " I ka la Sabati, oia hoi ka la 1 o Ianuari, 1865. He pule manaoio, ia J. D. Parisa ka haiolelo.
            Poakahi, Ian. 2. He pule no ko na aina e, ia J. G. Hoapili ka haiolelo. Luk. 10 : 2.
            Poalua, Ian. 3. He pule no ke Aupuni Hawaii, ia S. W. Papaula ka haiolelo, Isaia 60 : 12.
            Poakolu, Ian. 4. He pule no na luina Hawaii a me ia poe aku, ia J. A. Kahookaumaha ka haiolelo. Mataio 18 : 11.
            Poaha, Ian. 5. He pule no na keiki Hawaii, ia S. W. Kapali ka haiolelo. Sol. 3 : 1, 2.
            Poalima, Ian. 6. He pule no na Ekalesia hou a me na Kahunapule hou, ia Rev. S. W. Papaula ka haiolelo. Oih. 20 : 28.
            Poaono, Ian. 7. He pule no ka ninini ana mai o ka Uhane Hemolele maluna o na kanaka, ia Mr. Kamauoha ka haiolelo, Isaia 32 : 15.
            Sabati, Ian. 8. O ke kumumanao o ka Poaono, oia no ko ia la, ia Rev. J. D. Parisa ka haiolelo. Luka 24 : 49.
            Iloko o keia mau la ewalu, ua nui na kanaka i hele mai maloko o ka hale halawai, me ke kokua ana i ka hana, i ka haimanao ka kekahi poe, o ka pule ka kekahi poe. E like me ka piha i ka la mua, pela no a hiki i ka la hope o ka halawai. A ua hauoli maoli na kanaka i ka nana aku, aole manao nuiia o ka ai a me ka i-a, a me na mea e hoowaiwai ai i keia noho ana. A no ka paila loa o ka manao iloko, me ka wela i ke ahi o ke aloha ma ka nana aku i na ouli a me na helehelena i piha a hu, a nou, a hu a hanini i waho, no na kikiao makani o nei mea he olioli nui."

KA LA HANAU O WASINETONA.— Ma ka poakolu o kela pule i hala aku nei la 22 o Febeluari, ua malamaia ka hoomanao ana i ka la hanau o Wasinetona, e na puuwai aloha Amerika, ma ka huki ia ana ae no hoi o na hae, e kalahea'na ka la hanau ia o Wasinetona, " Ka makua o kona aina," Ka mua i ka malu,— ka mua i ke kaua,— a ka mua hoi iloko o na puuwai o kona makaainana."

LAAU LAPAAU!

AIA MA KAHI O
KAKELA ME KUKE
Ma Honolulu.
J. T. GOWER, — Makawao, Maui. J. D. HAVEKOST. — Wailuku, Maui. C. H. WETMORE, — Hilo, Hawaii. J. W. SMITH, — Koloa. Kauai.
HE LAAU KAHIKO, A HE MAOPOPO NO HOI.
Laau hoopau Naio me na Koe, A DR. JAYNE.
            HE NUI NA PILIKIA O KAMALII I KA Naio a me ke Koe, a pela hoi na kanaka. O ka hope oia mau mea kolo, oia ka lolo. Oia mau mea kolo hope oia ka lolo, a o ka make hoi i kekahi manawa, a nolaila ma ia mai e ae kekahi, e like me ka lepo pou, nalulu, pehu, uleule, a me na mai e ae.
            O ka Laau no keia e pau ai ua mau mea ino nei.
            Eia hoi kekahi. O ka laau ka pono keia i ka pau pilikia i ka wela o ka houpo: i ka ono ole i ka ai; i ka nawaliwali o ke kino, i ka mai pehu; i ka nalulu hoopailua; i ka pono ole o ka mai wahine, a me na nea like.
            Penei no e inu ai i ka laau hoopaia Naio me na Koe.
            Ina no kamalii, e haawi aku i hookahi kupakolu o ka paua ki, i ka manawa hookahi no ke keiki malalo iho o ka makahiki hookahi. Mai ka makahiki hookahi a hiki i na makahiki eono, elua hapakolu o ka puna ka pono. Mailaila'e a i na makahiki eono, hookahi no puna okoa ka pono, a mailaila aku a i ka na kanaka makua, e hanai i elua, a i ekolu paha puna i ka wa hookahi. I ka wa e inu ai, e hui i ka laau me ka pa ka o ka wai maoli. Oia hoi, ina hookahi ka puna laau, alaila, e huiia me na puna wai maoli eha; a pela no e inu ai ma ke kakahiaka, awakea a me ke ahiahi. Aka, i nui ka pilikia, alaila, pono oe elima inu ani i ka la, penei; kakahiaka, kiekie ka la, awakea, auwi ka la, ahiahi.
            E inu mamua o ka ai ana, aole kokoke mahope iho.
Laau hoopaa Hi a Dr. Jayne,
JAYNE'S CARMINATIVE BALSAM.
            He laau maikai a oluolu hoi kela no ka Hi, ka Nahu, Nalulu. Wela o ka Houpo, Haoa, Huapailua wale, Luai, Luai moku. ono olo i ka ai, Nahu me ka awe no hoi o na keiki uuku, a me na mai like he nui.
Emo ole ka oluolu o ua mau mai nei i keia hana.
            Penei e inu ai, i ka inu ana hookahi. Ina he keiki akahi hiki i ka iwakalua ka pono.
            Ina he keiki mai na malama eono a hiki i na malama ewalu, he hapalua puna ki ka pono. Mai ka makahiki hookahi a hiki i elua, e inu no ia i puna ki okoa. Mai ka hiku a akaa a i ka walu o ka makahiki, elua puna ka pono, a no kanaka makua, he puna nui ka e inu ia i ka manawa hookahi.
            A inu ea, e hui me ka wai maoli uuku. (a like a like me ka wai me ka laau,) a pela e inua ae ai. Ekolu, eha, elima paha inu ana i ka la hookahi, e like me ka nui o ka pilikia.
            I akaka nae. Ina he nui ka wela, a ina ua kumu kekahi ai pono ole iloko o ka opu, e aho e moni e mamua i mau hua'ale Ola. a i ole, e inu i wahi paakai, a i wahi aila paha, i kumu e ka mea ino oloko, alaila e inu i keia laau hoopaa hi.
            Ina e luai ka mea mai, mahope o ka inu ana i ka Laau, a pau a i ka luaiia, e hanai hoi aku no e like me mamua; a pela no a pinepine, a oluolu hoi ko loko, a waiho malie no hoi ka laau ma ka opu.
            Aohe a makou mea e noi aku ai i ka ka hui uku hookahi wale no o ke kauoha aku ia lakou e HOAO PONO i na Laau Kunu a Kauka Jayne, i hoike aku ai i ke oia o na mea a pau i hoakakaia oa kana mau laau. Ua hooia, a e hiki ana no ke hooia i ka mai KUNU, NAHU, a me ke ANU, a me na mai e ae no hoi he mai wale ; a o na mai Hukii no ho i ola nui, na mai i ola ole i na laau e ae. E aho e hoao oukou o ka poe i mai la.
HE KUHA KOKO ANEI KOU?
HE KUNU ANEI KOU?
HE EHA ANEI KOU KANIA-I?
HE KUNU UMII ANEI KOU me ka NAE?
AOLE ANEI HE KUNU OO OU ? AOLE ANEI OU MAI KUNU? AOLE ANEI OU MAI NAENAE? AOLE ANEI OU EHA MA KA umauma? AOLE ANEI OU KUNU KALILI? AOLE ANEI OU HU MA KA iwiaoao?
            A ina ua loaa ia oe ia mau mai, alaila, e ike oe i ke ola o ka LAAU KUNU a Kauka Jayne.
NA MAI HOOPAILUA.
MAI o ke Ake!
Mai Nalulu a me ka mai Dyspepsia.
            (O ka nawaliwali o ka puu hoowali ai, iloko o ko kakou mau waihona ai.)
            He pono ke ai koke i ka laau a Huaale Ola a Kauka Jayne. he laau oluolu, a he ola no hoi. Aohe ae ke mai i nele ka makekemake i na laau hoonaha ; a mai nui no hoi ka poe e ola ana, me ka oluolu no hoi, ina e hoomaopopoia, a e inu ia no hoi ua mau laau la. Aole no e oluolu pono kekahi mea, oiai e inoino ana oloko o kona kino ; a ua ulu nui ae no hoi ka mai, a i kekahi manawa ua make no, a ina e malama pono ia a e inu hoi i na Huaale Naha, alaila, ola no. No ka hooiaio ia ana mai o keia mau mea, nolaila, ke hoolaha ia aku nei ka Huaale Ola a Dr. Jayne.
            Me ka hiki ke hoola'ku i ka maikai, a na ka hoao ana i hoike maopopo mai i ka oi o ke ola o keia laau mamua o na laau e ae, a me ka maikai no hoi o ka inu ana, a me ke ola maoli no hoi. A ina no e inu ana ia laau, aole no he mau mea i hookapuia, oia ka ai ana a me ka inu ana. Aole e ino ke waiho loihi, no
ka mea, ua hanaia no a maikai loa. A ina e inu ia ua hikiwawe loa ka hehee iloko o ka puu waiho ai. Ma ka inu ana ma ka haawina liilii, he maikai loa no ka naha ana, a he oluolu no hoi, a me ka holoi pau i ke ino oloko o ka opu.
DISIPEPESIA.
            (Oia ka mai ono ole o ka ai i kekahi manawa, a me ka hoowali pono ole ia hoi o ka ai iloko o ka puu moni ai.) O keia Huaale Hoola a Kauka Jayne, he maikai loa no ka hooikaika ana ia mau oihana o ko kakou mau kino. Ina ua loihi loa ka mai ana, alaila, e hikiwawe ke ola ke inu pu ia ka Huaale me ka Laau Hoomaemae Koko a hoopau KAIO me na KOE A Kauka JAYNE, e like me ka mea i kuhikuhiia mawaho o ka wahi o ka laau.
NO NA MAI MA KE AKE, MAI LENA,
MAI MA KA OPU HANAWAI, NA MAI WELA, KA HAALULU,
KA MAI O KA ILI, KOKO INO,
MAI NALULU,
PAA O KA LEPO, MAI KUNA,
MAI WAHINE, a me ka MAI HOOPAILUA.
            Ua maopopo loa ke OLA o keia mau HUAALE. A o ka mea wale no i koe i ka lehulehu o ka hoao pono ia mau hua. A he maikai no hoi na laau a Kauka Jayne, no ka hoola ana i na mai PUHA, ALAALA, KAOKAO, PUUPUU, PEHU, KUNAKUNA, Hanene, Lolo, na mai wahine, a me na mai e ae, no ke KOKO a inoino mai no i kana LAAU HOOMAEMAE KOKO.
162-1y