Ka Nupepa Kuokoa, Volume III, Number 52, 24 Kekemapa 1864 — Page 1

KA
NUPEPA KUOKOA
Ke Kilohana Pookela no ka Lahui Hawaii.
BUKE III. HELU 52. HONOLULU, DEKEMABA 24, 1864. NA HELU A PAU 161.

" KA NUPEPA KUOKOA."
HOOPUKA MAU IA MA HONOLULU
I kela Poaono keia Poaono.
$2.00 no ka makahiki, ME KA HOOKAA MUA MAI.

NA OLELO HOOLAHA — aole i oi mamua o 10 laina no ka hoopuka hookahi ana, $1.00 ; alua komo ana, he $1.50 ; hookahi malama, $2.00. E uku mua ia mai ke dala o na olelo hoolaha a pau e hoounaia mai ana e pai.
KANIKAU — he hapalua dala ka uku no ka aoao hookahi o ka pepa leta, oia hoi 4 keneta no ka lalani hookahi — penei : he 25 lalani. $1.00 ; 50 lalani, $2.00 ; a pela'ku.
KA UKU NO NA OLELO HOOLAHA — ka uku pepa, a me ka uku o ka Kanikau, e haawiia no ma ka lima o na Luna o ke Kuokoa, a i oleia e hookomo mai no ma ka leta, a hoouna mai i ka Luna Pai.
O NA UKU PEPA A PAU E HOOKAA MUA MAI NO — aole e kauia ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua. E pono ke hiipoiia keia mau rula, no ka mea, he emi no ka auhau no keia nupepa. H. M. WINI, (Luna Pai.)

KA " NUPEPA KUOKOA."
Is published in Honolulu
EVERY SATURDAY, $2.00 per annum...........in advance,

ADVERTISEMENTS not exceeding 10 lines, inserted once for $1.00 ; twice for $1.50 ; and $2.00 for one month ; all advertisements must be paid for in advance.
KANIKAUS will be charged 1.00 per page, or 4 cts. a line. PAYMENTS FOR ADVERTISEMENTS, Subscriptions or Kanikaus, may be paid to any of the Agents of the Kuokoa, or may be enclosed in a letter to the Publisher. ALL SUBSCRIPTIONS must be PREPAID. No names, either of
foreigners or natives, will be inserted on the subscription list, until fully paid for. This rule must be strictly adhered to, on account of the low subscription price.
H M. WHITNEY.
Publisher.
Volume I and II of the KUOKOA, bound, for sale, $3.50 each.
Persons having complete sets of the above, can have them exchanged for bound Volumes, by paying $2.00 each.

Hoohoka ia ke kanaka hanai
HIPA A LAKI HOI O TOMA.

                Ma kekahi Kulanakauhale o Nu Ioka i kukuluia maluna o ka muliwai o Hudesona, ka mea nona na wai uliuli lipolipo, e hoohiolo i kai e hoopiha ai i ka moana nui ana ole, noho iho la kekahi kanaka, a o kona kulana he Diakona no kekahi Halepule, a he kanaka no hoi a ke ao nei e kapa'ku ai he Karistiano. Aka, aole no paha kakou e hoopaapaa'ku ana no kona pomaikai uhane, aka ma keia moolelo nei, ua ikeia he kanaka oia i manao nui i na mea o ke ao nei, mamua ae o kona noho Diakona ana. Ua like ua Diakona nei me kekahi o na kanaka mahiai e ae o Nu Ioka ka kalua holoholona ka hana. Kona kuai ana iho no hoi ia i kekahi mau kumulau hipa maikai loa, a hookuu aku la ia lakou i ka mauna, me ke kuai ole i ua poe hipa nei, no ka poina paha, a no ka loaa ole paha o ka manawa e kuni ai ; aole makou i ike i ke kumu i kuni ole ai.
            Ua hala ka pule mahope iho o kona kuai ana i ua mau hipa nei, ike ia aku la ua Diakona nei e noho ana iloko o kona rumi hookipa pumehana, me kona me Toma, he wahi kanaka poupou, me na maka poopoo e uiuiki mai ana, me he mea la e hai mai ana i ka hailona o ka olioli a me ka pomaikai, oiai ua lawe ia'ku kona manao holookoa e ke kamailio ana a ke Diakona.
            " E Toma," wahi a ka Diakona, "aia ma kela aoao o ka puu kahi e pili kokoke ana i kahi o ka'u mau hipa, aia malaila kahi i holo ai na hipa a Squire Tufts ; a ina oe e hele i kela po keia po a lawe mai i mau hipa, alaila e haawi no au ia oe i ekolu hapaha no kela hipa keia hipa au e lawe mai ai, a aohe no hoi mea nana e manao mai ua hana hewa kaua, no ka mea he Diakona no ka Halepule, a he hookani pele hoi oe ; a aohe mea nana e ike ka kaua hana ana. O kaua a i elua no ka Halepule hookahi kaua, pehea kou manao i keia ?"
            Hoohauoli ia mai la na maka o Toma, a aka ae la me ka leo nui, olelo aku la "owau kou keiki, a ka la apopo hookala oe i ko pahi a oi, a e lawe mai no au i elua hipa, no ka ekolu hapaha o ka hipa hookahi."
            Mahope iho o ka ka laua kamakamailio ana, haawi mai la ua Diakona nei ia
            Toma i kekahi kiaha pia, a puka aku o Toma iwaho me ka olioli ana i ke mele, " Mai makau, aia he manawa maikai e hiki mai ana." A puka aku la oia iwaho me ka olioli, a me ka mama o ka naau, e olelo ana ia ia iho, " e Toma e hooikaika ae i kou mau a-a huki, a e lawe i ka ukana koikoi maluna ou, me ka makau a me ka wiwo ole, no ka mea e loaa mai ana ka pomaikai ia oe, a aohe no hoi mea nana e olelo mai i ilihia mai keia pomaikai maluna ou, ma ka hana ino, no ka mea, wahi a Diakona B — he kanaka huki bele oe, a ua manaoia e ka lehulehu he kanaka pono oe."
            Hoi aku la keia me ka nolu o keia mau manao iloko ona, a hiki i kona hale, i iho la keia, " aole o'u makemake e aihue, a aohe no hoi au i hana ia mea, a aohe au i ike heaha la auanei kau mea e hana ole ai. Na'u no e hooponopono ia ia ; no ka mea ua like no ke kahiko o ko'u poo me kona." Wauwau ae la ia i kona poo, no keia mau manao, a noonoo iho la ia, pehea la auanei e loaa ai iaia ka ekolu hapaha o ka hipa hookahi me ka aihue ole.
            Ua iho aku ka la iloko o kona kaa gula e napoo, a ua ike ia'ku hoi na hoku e houiuiki mai ana hoi mailoko mai o na pale maka lani, a e nana mai ana hoi ka mahina me he popo ahi, maluna ponoi o ke kuemaka pali, ike ia'ku la kekahi kanaka, e hoopio ana i kona alanui ma kela aoao o ka puu, i kahi a na hipa e houluulu ana, a e hooluolu ana hoi ia lakou iloko o ka paumako o ka hiamoe. Hiki aku la ia iluna o ka puu, a i kahi hoi ana i nakui loa ai. Hopu aku la ia i na hipa nui momona elua, nakii iho la i ko laua a kiola ae la maluna o kona mau poohiwi, a hoi aku la me ka lanakila i kahi o Diakona B —. I kona hiki ana mai i kahi o ka Diakona, halawai mai la oia me ke Diakona, a hoomaikai mai la oia i ka holopono o ka hana a kona hoa, a lawe aku la ua Diakona nei i ua mau hipa nei i kahi pepehi holoholona, me ka manao ole e uku mai ia i kona hoa ; aka hahai aku la o Tom ia ia, a mahope hoapono mai la ke Diakona, no ka poina i ka haawi ole mai iaia i kona uku, a haawi mai la ia Toma he hookahi dala me hapalua.
            Lele haaheo aku la na malama o ka makalii, a hiki wawe mai la ka manawa e hoihoi ia ai na holoholona o ke kula, mai na kula uliuli mai, a iloko o na hale holoholona, i ole e poino, i na kulu paka ua o ka hooilo e hiki mai ana, a aohe no hoi mau hipa a kekahi poe e ae i nalowale, a i ke kahaha nui o na hoa aloha, ike mai la lakou ia Toma e kukulu ana i wahi halekuai iwaena konu o ua wahi Kulanakauhale nei, a e huki pakeke ana hoi ia i ke dala i kela la keia la, a hoopau aku la ia i kana olelo ae like me ke Diakona, me kona manao ua loaa iaia he mau haneri dala mai ia Toma mai, no na hipa a pau i haawi mai ai iaia, ma ka Toma aihue ana.
            I kekahi la malie, hele aku la ke Diakona e kii ana i kana mau hipa e hoa mai iloko o ka hale e hoomoemoe ai. I kona hiki ana'ku ilaila aole lakou ! uila koke ae la iloko ona ka manao ! no ka mea ua lohe pinepine ia i kekahi aka henehene ; i na wa a pau ana e hookaa'ku ai ia Toma i kona uku, a ia manawa ua ike iho la oia i ke ano o kana aka ana. Ua kuai aku no o Toma iaia i kana mau hipa ponoi ! hoi aku la ia me ka hoka nui, (aohe he wahi hoka keiki, he hoka no nae o Hamohame) me ka noonoo heaha la auanei kana mea e hana'i. I kona maalo ana ae mamua pono iho o ka halekuai o ua wahi Toma nei, haawi mai ana, na poe e ku ana malaila i kekahi mau hulo nui ekolu, a i ka pa ana iho maluna o kona mau pepeiao, eha iho la kona manao, aka hoomau mai la no lakou i ka hooho ana, a me ka hoomaikai mai no hoi ia ia no kana hana maikai, ma ka hoowaiwai ana ia Toma, a hoohoka iaia iho. Lilo ae la ia Kulanakauhale i wahi ino iaia, a lawe ae la i kona wahi ukana, a nee aku la i ke Komohana loa.

Kupanaha Maoli.

                He nui wale no na mea ano kupanaha ma ke ao nei a puni i ikeia i kekahi manawa, aka, aole nae he kulike loa o ka ike ana a na kanaka i na mea ano kupanaha ma kela wahi keia wahi.
            No ka mea, ua ano okoa na mea kupanaha e hiki mai ana, ma kela wahi keia wahi, nolaila, ua ane huikau ole paha na mea i manao ia, he mau mea kupanaha.
            Aka hoi, no kela huaolelo e kau ae la ma ke poo, o keia kukulu manao ana, nona ka inoa i kapa pono ia, " Kupanaha Maoli."
            Nolaila, he pono no kakou ke hoomaopopo iho ia kakou, me ka ninau ana iho no ia kakou hookanaka, " Kupanaha hoi i ke aha ?" " Kupanaha hoi paha i ka lauwili, i ka lolelua, i ke pakauakee, i ke nahili, i ka hookukahilo ame ka hoopau manawa."
            No ka mea, o ka huaolelo " Kupanaha maoli," ua hoopili ia no ia kupanaha i ka hana a na Lunamakaainana e noho nei, i ke kau kanawai ma ka Hale Ahaolelo.
            No ka mea, i ka nana maoli io aku no me na maka, ame ka hoolohe maoli aku no me kou mau pepeiao, he ane komo maoli mai no iloko o ka poe e hoolohe ana ka manao kanalua, me ka olelo ana iho iloko o ko lakou mau manao, me ka ohumu malu ana iho me kela hoa keia hoa, me na leo hamumumu, e hawanawana ana, me he mumuhu ana la a ka nalo paka ma kapa o ka punawai, me ka lokahi like loa ana, e hooho ae me na leo e olelo aku, " Kupanaha maoli."
            Kainoa no kakou i paulele mai ai ia Lunamakaainana ma, me ke ake nui mai hoi e loaa io mai ana na pono hou i ike mua ole ia e kakou mamua aku nei, eia no ka aole, aole no hoi o ka o-le a-ole.
            Maikai nae hoi, he pau akoakoa no na Ole a kahi hookahi, a pela no hoi na Ku, he pau pono no hoi ia a kahi hookahi no. Nolaila, o ka lokahi like ole o na manao ame na noonoo o na Elele makaainana, e kauo like ma ke kula hookahi o na pomaikai makaainana, no ia mea, ua kau pono ia no malaila, ka huaolelo " Kupanaha maoli." Aole nae hoi au e olelo ana, ua hooluu like loa ia oukou a pau i na waihooluu like loa o na ano. Aole no hoi au e olelo ana, ua pena like ia oukou i na pena keokeo wale no. No ka mea, e like me ka Leopaki, kai hiki ole ke hoano-e ae i kona mau kikokiko, pela no hoi ka hiki ole ia'u ke hoouhi mai ia oukou i na aahu kanikau hoohalikelike loa.
            Aka hoi, o ke alaiia ana mai o ko kakou mau manao e na uiki pelekunu, ke hoomaopopo mau mai nei no ia, i kona mau po e a hopipi ai.
            Ke manao nei no hoi au, aole no paha i poina i kela apana koho keia apana koho, ko lakou mau Elele makaainana i hoouna mai ai ; a ina pela, alaila, ua poina like pu ole no hoi ia kakou a pau. Aka, i kuu lohe ana mai nae, ia Paumakemake ma o Hawaii, he makemake loa ka lakou e lohe pono ia ka hana ana a ko lakou mau Lunamakaainana, aole nae o lakou lohe pono iki aku.
            E aho hoi ou e hoakaka iki aku ia oukou e Paumakemake ma o Hawaii. E hele pu kakou a ma Kau i Hawaii, malaila kakou e hele makaikai mai ai, mai noho nae hoi alua **moloa ia kakou. No oukou e na makaainana o Kau, ua holopono no ka oukou koho ana mai nei i ko oukou Elele, no ka mea, ke makemake nei no oia e loaa mai no kekahi mau pono no oukou, nolaila, ua hooikaika loa oia e imi i ko oukou makemake, aole no oukou i makehewa ke hoouna hou mai ia ia i ka Ahaolelo o ka makahiki 1866.
            E hele mai kakou a kipa ma ka apana o Hilo, a nana i ka hana a ka Elele oia apana, o Hilo iho ia a ka Paeleku i noho ai, mahalo no nae hoi au i ka Luna o Hilo, i ka hoole ana i ka bila puhi rama, aka, no kona hoala hou ana e noonoo hou ia ka bila haawina, no na dala no ke Paipalapala, oia hoi he $1,500, he kuhihewa ko'u, he Luna elemakule la hoi ko Hilo, nolaila, pono ia hoi ke hopohopo, o kau mai no auanei ka auhau kaumaha oia mau dala maluna o kona kino nawaliwali, a ili aku i kana mau keiki. Aole ka, eia ka kai ala, he pii aku i ka lala pali o kaualalai. I kuhihewa paha ka Luna o Hilo ia Mokuola i Hawaii, a me Molokini, mawaena o Kahoolawe me Honuaula, ame Mokuhooniki i Molokai, ame Mokualae ma Koolau o Oahu, ame Lehua, Kaula, ame Niihau, he mau mokupuni kai nohoia e na kanaka, me ka manao paha, na keia mau mokupuni i haiia ae nei maluna, e hoakaka mai ana i keia mau dala he $1,500 o ka Oihana Paipalapala Aupuni, i wikiwiki ai e noi aku me ka ae aku no hoi e hooko kuhihewa. He hoomaka wale ana no keia, a mahope aka e hoomaka hou kakou i ke puhi Opiuma.
            Ke waiho aku nei au i ko'u manao ma ke akea, no ka hai ana aku i ka huaolelo e kau ae la maluna.
            A ua hiki mai ka makou huakahi makaikai ma na a-e kahakai o Hilo one, a ua kamakamailio iki malaila me na hoa makaainana oia aina a ka ua i noho ai. He nui ka hoohuoi o na hoa makaainana no ka hana a na kauwa Elele makaainana oia aina. He mea mau paha i ko laila Luna ka noii, ka noelo me ka hauwanawaua ia mea aku ia mea aku, e kokahe hele ai me ka olelo ana i ka ono ino o ka Luna o mea, i ka inu rama hoi o ka Luna o mea, a pela wale aku.
            Ma ko'u manao, elua wale no ana bila e koi nei e hoopau ia. 1. O ke koi ana, me ka ae aku i ka hookiekie i ka uku o na bila haawina. 2. O ka ahiahi wale aku i ka hewa o kela hoa keia hoa Lunamakaainana.
            No ka mea, me he mea la, ua hoouna ia mai oia e na makaainana o Hilo, i Luna helu i ka nui o ka poe ona o ka Hale Ahaolelo.
            Aole loa, ua hoouna ia mai oia e nana pono i na mea e pomaikai ai na makaainana, a ina oia i ike i kekahi mea e pomaikai ai na makaainana o kona apana, he pono oia ke ae koke aku, aka hoi, ina hoi oia i ike aku i ka mea e kaumaha ai, alaila, he pono loa oia ke hooikaika e hoopaapaa i mea e kaawale aku ai ia uahi ma-o, he makole koonei.
            Nolaila, i ka hiki hou ana'ku ia Kau Ahaolelo hou aku, e hoomoe aku hoi ka pono i keia mau Luna ma ka papa, a e hapai hou ae hoi oukou e ko Hilo i ka noonoo i ka mea kupono e pani i ko laua nei hakahaka.
            O keaha hoi ka oukou e Kona Akau ? O ke ako no i kauhale a ka hoopilimea'i, a nolaila ka piliwale, kapili ka pala a wale mai hoi o Kohalauapaapaa.

He pono la auanei ke noho malie aku ia manawa'ku.

                E nana pono ia Kona Hema me ko Hamakua, ua kupono no ia oukou ke hoouna hou mai ia laua i mau Kauwa na oukou, no ka mea, o laua no kekahi o na Alae e ke-u nei i ko oukou mau pono, a mahope aku oukou e ike maka'i, a no laua hoi auanei ka hoi hou mai i ka Ahaolelo, kamau mai hoi ko Punaakeonaona,
            E nana ia Hana, i na o Hana la he i-a iki. He makepono no ia oukou e ko Hana ke hoomau mai no i ka hoouna mai i ka oukou Kauwa makaukau, e malama nae i na pepeiao, o piha hewa i na olelo ano ole.
            Ke mau nei no i ka la luu-loli o Wailuku, e aho ia mamua o kahi mau Apana i Hawaii.
            E akahele nae e ko Makawao, e nihi ka hele mai hoolawelawe.
            E nana i ka pohu o Hauola i ka malu o ka ulu o Lele, hookahi no manu i hou ia ka nuku, he hapapa wale iho no hoi ka ka ua paupili. E nana'ku ia Molokainuiahina me Lanaiakaulahea, o ka noho malie iho no ka Kaululaau iuka o Lanaihale, ke waiha mai la no hoi ke kai o Hilia, mai Hilia no a Hoolehua.
            O S* nae, ka mea nana ka Haiolelo Kaulanana luaole, aole nae ipuka mai ka hua mua oia hana ana, ke kauoha maopopo ia'ku nei ko Lanai a me Molokai, e opu ao, e nana, e hoolohe, e hoomakaulii, o like hou auanei me na kupuna o kakou, ka olelo iho, " O ka newa, a o ka laau mahea oe, ma ka hoka ? "
            E nee mai i Oahu o Kuihewa, a e nana i ka hana a na Elele makaainana, ekolu wale no i paa ma ka'u buke hoomanao, i ke kaapuni ana i ka mokupuni okoa, a ua loaa ia'u, ekolu wale no, elua no Honolulu, a hookahi no Waialua, a ua kupono no lakou ke hoi hou mai i ka Ahaolelo, a o ka hapanai, na hihia lihilihi wale aku lakou ma ka umiumi o na keiki o Kauai, hookahi huakai a ia poe.
            Ua poina ia'u ka apana o Kaanapali, aole no i poho ko oukou lilo e na makaainana o Kaanapali no ko oukou Luna, he kauwa ikaika no ia, i kupono ke lawelawe i ka oukou mau kauoha.
            I ka houluulu ana i ka huina helu o ka poe kupono no ka Ahaolelo mai Hawaii a Kauai, aole ia i oi aku mamua o ka poe manao ole i ka pono o na makaainana mai o a o.
            E na makaainana mai Hawaii a Kauai, e hoomanao pono oukou ia oukou iho, e nana i ka mea kupono i ka paulele io i ko oukou mau pono, a aia ka mea pono e hoouna mai ai. Me oukou ke aloha nui. KAUAKUKALAHALE.
Honolulu, Dek. 21, 1864.

Ko Honolii Mea Hou.

                E KA NUPEPA KUOKOA E ; Aloha oe : — Ke " Kilohana Pookela o ka Lahui Hawaii," e oluolu kou Lunahooponopono e hookomo iho i keia mau hua e kau ae la ma ke poo.
            Oia hoi keia, " ka mea hou o Honolii." Penei no ia ; ma ka la 8 o Nov., o keia makahiki no, ua hele aku au mai ko'u hale aku, oia hoi ka pa hana ma Kaiwiki, no kekahi haole, o Keoni kona inoa, a hiki au ma Honolii, o ka hora 9 ia o ke kakahiaka, ike aku la au i ka paa ana o ka muliwai i ka iliili a me ke one, o ko'u hele aku la no ia me kuu lio a kau ma kekahi aoao, o ka ike mai la no ia o na kanaka, o ka uwa mai la noia me ka leo nui ; akahi wale no a paa keia muliwai iloko o keia manawa, aole pela mai ka wa kahiko mai i na 'Lii i hala'ku i ka aoao mau o ka honua. Aka, i keia Moi hou, akahi a ikeia keia mea hou ma Honolii nei i keia wa ; o keia muliwai ma kahi i paa'e la, he 5 anana a oi ae ka honu, a he mea hou no ia i na kamaaina o keia aina, ua elemakule kekahi poe, a ua luahine hoi kekahi i ka noho ana, akahi no a hanaio mai ke kai i keia muliwai.
            Mai ka wa kahiko mai, he a-u wale no malaila, a ma ka waa hoi kekahi e hikia. Aka, i keia wa hoi, ua hana ia he ka-o Aupuni, o ka mea e hiki ai o ka lio a me ka bipi, a me kela mea keia mea.
            Nolaila, i ka wa i lohe ai o na kanaka i keia paa ana i ka iliili, o ka hele no ia e makaikai i ka mea hou ma Honolii, a i ko lakou ike ana, alaila, olelo lakou, penei ; " He mea hou keia, he mea hou keia ma Honolii nei." He hana paha ka ke Akua Kiekie loa ma keia aina mahope aku ? Aia no ia iaia ka hoolilo na muliwai i wahi maloo, a me kahi maloo i wahi wai. Nolaila, ua nui kahi manao o kau wahi Kauwa haahaa loa, a nau ia e ku-u pau aku ma na palena o ko kaua mau Mokupuni mai Hawaii a Niihau. Ke hooki nei au i ko'u pulima i ke kakau ana, no ka mea, ke noe mai nei ka ua ma Mokuola. Me ka mahalo.
J. W. ALAPAI.
Kaiwiki, Hilo, Hawaii, Nov. 12, 1864.

He manao Paipai no ka poe la-
WE OLE I KA NUPEPA KUOKOA.

                Auhea oukou e o'u hoa kaana o nei mea he Nupepa. Ina 'Lii, na Makaainana, ka poo waiwai, na aoao hoomana Akua, ka poe ike i ka heluhelu, me ka poe imi waiwai. Aloha oukou.
            Ke nui ae nei na la o ko kakou Buke 3 o ka hoomanawanui ana, a ke kokoke mai nei na la o kona halawai pu ana me kakou, a ke aneane aku nei e kuu kona luhi, a e kau paha auanei kona poo ma ka uluna o Hilinama ka malama, A e lilo paha auanei kona Okana ia Buke 4, ka mea e ku mai ana a holoholo mai Hawaii a Niihau, mai Fatuhiwa hoi a Maisonitia, a i na hau anu aku hoi o Kaleponi a me Keamouhalewa, ua hoomanawanui ia e ka Buke 3, iloko o ka luhi inea a kaumaha, i ka wa ua a me ka wa malie, i ka wa anu hoi a me ka wa wela. Nolaila, hoomanawanui no o Buke 3 i ko kakou makemake — A o kakou. Pehea la ? Ua hooikaika anei oukou e uku pololei i ke dala o ka Buke 3, oia na dala elua ($2.00.) Aole paha, malia paha o kekahi poe ua uku pono, a o kekahi poe paha, aole lakou i uku pololei, no ka mea, ke ike nei au i ka manao o ka Luhooponopono, ke paipai mai nei oia i na Luna haawi pepa o kela wahi keia wahi, nolaila, manao wale au aole i haawi pono ia kona ola, ina pela, ke olelo nei au, aole paha auanei e hanai ponoia ke ola o ka Buke 4 ? A pehea la auanei kakou e milimili ai iaia ? Ke ole haawi pono ia ke ola o ko kakou Kauwa, ka mea nana e hali pololei mai ko kakou makemake, oia hoi na nu hou, na kaao, na mele, na na kaua o na Aupuni Nui.
            Nolaila, e launa oluolu kakou me ko kakou Kauwa ahailono, no ka mea, ke launa mai nei oia me kakou, ke kiai mai nei, ke halo mai nei, ke alaalawa mai nei me ka manao e o-ia mai, e kunou ia, e hookipa ia, e hooipoipo ia, e launa manuahi, e hoaikane, e hale kipa, e hai aku i na mea e oluolu ai ka manao i ka ike i na mea hou, o kela wahi keia wahi, oia hoi, hale pau ahi, moku make ma ka moana, waa kahuli, keiki haule lio, keiki lelepali, na pono ili wale mai, na pono o ke Aupuni, a me kona Makaainana. O keia mau mea a pau, o ka Nupepa ka mea e pono ai, e ike ai, e olioli ai, me ka iini o ka manao ; a uwe aku no kou lohe ana mai ua poino o mea, ua make o mea. Nolaila, o kona ola $2.00 wale no, uuku o mailuilu, pikanele, ku piki-mola ma ka olelo a ka ilikeokeo, ma ka moana wale no e holo nei na moku, mai Hawaii mai a Oahu nei $1.00. A mai Oahu aku nei hoi hou i Hawaii $2.00 o ke kino, aohe holo ma ka aina, pela ka lio, ma ka honua wale no e holo ai, aole ma ka moana, ke uku ia nei laua. O ka Nupepa Kuokoa hoi, o ka moana, o ka honua, o ka pali, o ke kahawai, o ka puu, o ke awawa, ke holo nei oia me ke kanalua ole, a o kona uku, he uuku loa. O ka Loio, he akamai hoololi kona, ke pii nei kona uku, o ka Amara, Sumeta, Kamana, Kera, hana lakou a kuai i waiwai, a i ola. O ka Nupepa Kuokoa, o kona ola wale no kana e manao nei, aole o ka waiwai, nolaila, aole paha i nui ka poe aloha ia ia ?
            Auhea oukou e na makani hulilua o ka aina, a me na ale hanupanupa o ka moana, o'u hoa o ka luhi o ke kino a me ka manao. E pau ka maua, ke pii, ka aua, ka lokoino, ke aloha ole, ka hoowahawaha, ka paweo, ka ike noiele, ke kulou, ka opu ke-e moa. E ala pono mai a nana i ka hoa o ka Nupepa Kuokoa, o ka Buke 4, e ike ia ia, e hokipa, mai hoohewahewa a pai hewa i ka lae — Oia ko'u manao paipai ia kakou e na Haku kanu o ka aina mai ka po mai, na kupuna, na na makua, na kaikuaana, no pokii, na kaikuahine, na hoa paani o ke wa naauao, a me ka wa naaupo. E lawe nui kakou i ka Nupepa Kuokoa. Me ka mahalo.
I. W. P. KEOLANUI.