Ka Nupepa Kuokoa, Volume III, Number 50, 10 December 1864 — Page 2

Page PDF (1.58 MB)

Ka nupepa Kuokoa.

Ka Nupepa Kuokoa.
HONOLULU. DEKEMABA 10, 1864

$125.00 !
MAKANA GULA !!
- I KA -
POE MAHI PULUPULU !

                Me ke ake nui o ka manao, e hoohoihoi aku i ke kanu ana o ka Pulupulu, ua manaopaa loa au, e haawi aku i na kanaka Hawaii, i na makana manawalea malalo nei i ka poe e kanu ana, a e mahi nui ana i ka Pulupulu, iloko o ka M. H. 1865,— (Mai ka la mua o Ianuari, a hiki i ka la hope o Dekemaba, M. H. 1865.)

 

KE ANO O KA HAAWI ANA NA MAKANA.

                1.— E loaa no i ke kanaka e hooulu nui ana i ka Pulupulu, a me ke kanaka hoi i oi loa aku na paona o kana Pulupulu — He Kanalima Dala Gula ($50.)
            2.— I ka lua, malalo iho ka nui o kana, i ka ka mua.— He Kanakolu Dala Gula ($30.) 3.— I ke kolu — Iwakalua Dala Gula ($20.) 4.— I ka ha.— Umi Dala Gula ($10.) 5.— I ka lima.— Umi Dala Gula ($10.)
            6.— I ke ono.— Elima Dala Gula, a me ka Buke 1, 2, 3 o ke Kuokoa i humuhumuia.
            7.—I ka hiku.—E haawi no au ia ia i ka Buke 1, 2, 3 o ke Kuokoa i humuhumuia.
            8. — I ka walu — E haawi no au ia ia, e like me ka'u haawi i ka hiku, ekolu buke Kuokoa i humuhumuia.

NA RULA O KA MAKANA ANA AKU.

                Rula 1.— Aole o'u manao nui ma ke ano o na pulupulu, ina no ka Helu 1, 2, 3. Aia wale no ko'u manao o ka nui.
            Rula 2.— Na ke kanaka wale no nana e mahi i ka pulupulu, ia ia wale no e loaa aku ai ka makana, aole ka pulupulu a kekahi mea e ae i kanu ai.
            Rula 3.— Aole e loaa aku kekahi o keia mau makana, aia he Kanaka Hawaii, (koe na haole.)
            Rula 4.— O na pulupulu a pau loa, i loaa ai i keia mau makana, e kuai mai lakou ia'u, a na'u no e malama pono i Buke Hooponopono no na paona a kela mea keia mea i kuai mai ai.
            Rula 5.— Mahope iho o ko'u hoolaha ana i na inoa o ka poe e lawe nui mai ana ia'u i ka pulupulu, alaila, i mea e hooiaio mai ai kela kanaka keia kanaka, nana i kanu ka pulupulu, a i loaa pono ai hoi ka makana ia ia, e pono ia ia e lawe mai i kekahi palapala hooiaio i kau inoa ia e ka Lunakanawai apana, a me kekahi haole oloko oia apana.
            Rula 6.— E haawiia aku no na makana iloko o ka malama o Ianuari, M. H. 1866.
            Nolaila, e o'u mau Makamaka mea aina, e ala ae oukou ; a e hooikaika nui ia oukou, e hana paupauaho ole, a mai hoopalaleha, no ka mea, e loaa auanei ia oukou na makana maikai. I ka poe i hana hooikaika, me ke akamai e loaa no ia lakou ua makana maluna ae nei.
            O ka poe e makemake ana i na hua kanu, e loaa no ia lakou ma ko'u Halewili Pulupulu.
H. M. WINI.
Honolulu, Dek. l, 1864.

KUOKOA — BUKE 4 !

OLELO HOOLAHA !
I NA LUNA A ME NA POE E LAWE ANA I KE KUOKOA.

                Ma ka pau ana o ka Buke 3, o ka NUPEPA KUOKOA, oia no ka Helu 52 e hoopukaia'ku ana ma ka la 24 o Dekemaba, e hoopau ana au i ka'u Oihana Luna Hooponopono no keia pepa, no ka mea, ua hoolilo aku au i ke Kuokoa ia Kauka L. H. Gulika. A mahope aku o ka la mua o Ianuari, 1865, e hoopukaia aku no oia, ma kela pule keia pule, e like me kuu hoopuka ana aku i keia wa.
            Nolaila, ke kauoha aku nei au i na Luna e aie mai ana ia'u no ka uku pepa iloko o ko lakou mau apana, a no na Olelo Hoolaha hoi kekahi, e hoouna koke mai i na koena dala, no ka mea, makemake au e hoopau i na helu dala o keia pepa i keia wa. Ua noiia no hoi na poe a pau i aie no ka lakou nupepa, no ka Buke 1, 2, a 3 paha, e uku koke mai i ko lakou mau aie i na Luna pepa o ko lakou apana, a ia'u paha, ma Honolulu nei.
            Mahope o ka la mua o Ianuari, e pono no oukou ke hoouna ia Kauka Gulika i na palapala a pau, e pili ana i ka lawe pepa ana, na Olelo Hoolaha, na Kanikau, a me na manao no hoi e pai ai iloko o ka Buke 4 o ko kakou Pepa Kaulana oia no ke " Kilohana Pookela o ka Lahui Hawaii."
Na'u na H. M. WINI.
Honolulu, Nov. 26, 1864.

NA MEA HOU O HAWAII NEI.

                MANUWA RUKINI.— Ma ke ahiahi o ka Poalua iho nei, ua ku mai ma ko kakou awa nei kekahi manuwa Rukini, mai Calio mai. O Varigi ka inoa o ua moku la.
            EHA I KA PU.— I ka kipu aloha ana i ka Poakolu iho nei o ko kakou Aupuni nei, no ka manuwa Rukini, ua eha elua kanaka, o ka poe e ki ana i na pu o Puowaina ; ua hele ko laua mau maka a uhi i ka pauka.
            HULA HAOLE.— Ma ka po o ka Poaha iho nei, ua haawi ae na keiki haole i kekahi ahaaina hula, ma ka hale pohaku o Kimo. Ua lohe lauahea mai makou, i haawi ua poe keiki la, no ke Kapena o ka moku Kalepa nui o Dreadnaught, no kona hoi ana i ka Poaono, a i ole ia i ka la pule paha. Nani wale kona ike ana'ku i ka huakai lua o Nupepeki.
            MAKE.— Ua ili mai iluna o makou ka ukana menemene, a kaumaha i ka hai ana'ku ua lawe na lima menemene ole o ka make, i kekahi o ko makou mau hoa paani Daniela Naone, hoa imi naauao, a hoa kea pua hoi o na kula o Kehehuna. Ua lawe ia'ku oia i ke kakahiaka-nui o ka Poaha iho nei, a ua haalele iho i kana wahine me kana elemakule, a me kona ohana, iloko o ka-u a me ke kaumaha.
            HE HAOLE PENA KII.— Ua olioli makou i ka hai ana'ku i ko makou mau hoa puni nupepa, eia ma Honolulu nei kekaki haole o Perry kona inoa, i akamai loa i ke pena ana i na kii, a like loa me ke ano kanaka, o ke kii o ke Kahunapule o Corwin, o Kaukeano ka makou i ike i ke kulike loa. Ua lohe mai makou ua manao ka ohana Alii e haawi i ua haole nei i kekahi hana, ma ia ano.
            WILI KO MA KONA.— Ua halawai mai makou me kekahi palapala a Kalaiokona, e hai ana no kekahi wili ko hou ma Kona, pomaikai no hoi paha oukou. A penei kana :
            " O Paul Emmert, (Emeka) ka ona nona ua wili la ; ua o-o ke ko, a ua paa ka wili ; he wili laau, ua paa ka hale e puhi ai ke ko, a me ka hale e wili ai ; ua hai mai kela ia'u, e hoomaka ka wili ana i ke ko ma ka pule mua o ka malama o Decemaba ae nei."
            Ke ala mai nei kekahi o na kanaka maoli o keia apana e kanu iho i na pulapula ko, mamuli o ka paipai ana o Daniel Montgomery kekahi haole kalepa e noho nei iwaena o keia apana. O ke ko ma keia apana, he ko maikai loa ke kanu ia ma na kihapai hohonu o ka lepo.
            HE MAKE ALOHA.— Ua heluhelu iho makou ma ka nupepa Friend, kekahi pepa i paiia ma Honolulu nei, no ka make ana o kekahi keiki opiopio o Arthur Landers, i haule i ke kai, i kona wa e malama ana i ke kauoha a kona makuakane, (me ka hai pu ia aku no e malama o haule auanei iloko o ke kai,) ua lawe koke ia aku ua keiki nei, e na a menemene ole o ka moana, a ua haalele iho i kona makuakane me ka u maluna o ka papahele moku. Ua ku iho ka makuakane, me ke keiki, no ka manawa hope e nana aku kahi i kahi, a iloko o ka manawa pokole loa ua laweia aku ke keiki. Aole e hiki paha a kakou ke haawi aku i ka maha, i ka naau o ka makuakane, ka mea hiki no ke puana, e like me Davida, " e hiki auanei ia'u ke kaohi mai ia ia ? Owau no ke hele aku io na la, aole nae ia e hoi mai io'u nei."
            HE KALO NUI.— Ua palapala mai kekahi o ko kakou mau hoa puni nupepa, no kekahi kalo nui, a penei kana :
            " Ua loaa ia'u ma ka la 24 iho nei o keia malama o Novemaba he kalo nui ; nona kela mau hua e kau ae la maluna ; a penei kona nui 1 1/2 kapuai ka anawaena, 1 kapuai me 7 1/4 iniha kona loa, a o ke kaumaha ma ke kaupaona ana he 14 paona noia." He kalo hou mai keia. Ua oleloia ; no na aina pake mai, a ua kapaia'ku kona inoa e ka poe nana i kanu he (kalo pake,) he kalo ono loa ma ka ai paa ana, ke kanu ia ma na wahi kupono e like me ke kalo maoli.
            O keia kalo, he kalo ulu nui loa, aole o kana mai o ua mea he ulu ke kanu ia ma na kahuahale a me na wahi momona loa o ka lepo ; e like me na loi poho a pela aku. Ua haiia mai au e ka mea i ike pono i keia kalo, ua hiki ke ulu i na makahiki eono a ewalu paha me ke ino ole.
            E KANIKAU ANA.— Ua halawai mai makou me kekahi, i kela Poaha aku nei, ua kahiko iaia iho me ka paa eleele mai luna a lalo, a me ka papale piwa ; i ka makou ninau ana aku. Heaha ke kumu o ke komo ana i ka paa eleele, i mai kela, " E kanikau ana au no ka mea ua pokole ko'u pakeke i ke keneta." Mahope iho lohe mai makou e holo ana iluna o ka manuwa Rukini.
            " E Sambo," wahi a kahi negero, " ua ike anei oe i ka mea i ulu hiki wawe ai ke kulina, ke kawili ia me ka lepo manu ?" I mai no hoi kahi nika, " ua hooikaika ia paha ka lepo oia ka mea i ulu hikiwawe ai !" "Na. aupo oe i ka wa a ka hua kulina e honi ai, i ka hohono o ka lepo manu, alaila aohe ona makemake e hoomanawanui loa i ka honi ana ia mea, nolaila ke kumu o kona wikiwiki loa e hooikaika, a hala ka lepo manu malalo."

KA NU HOU

Hoouka aku na Kipi ia Atalanata, a hoohokaia.
Ke hana mai la o Sheremana ma ke kua o Hood, a o Gen. Thomas mamua ponoi mai ona.
Hoouka aku na Kipi mamua o Papu Stedman o na laina o Grant, a ua hoohokaia.
Ka lawe pioia ana o ka moku Kipi Florida.
Ke houluulu la o Sheridena i kona puali ma Winchester.

                I ke ku ana mai o ka moku Kalepa Seamar's Bride, i ke ahiahi o ka Poaono o kela pule aku nei, ua lawe mai noia i kekahi mau mea hou o ka hikina ; a i ke awakea o ka Poaha iho nei ua ku hou mai no kekahi o ko kakou mau moku lawe leta, oia hoi ke Comet, a ua lawe mai no hoi oia i na nupepa a hiki i ka la 16 o Novemaba, a mai loko mai olaila, ua lawe mai makou i na mea nui, o na nuhou.

Mai Atalanata mai.

                CHATANOOGA, Nov. 11.— Ua hiki mai ka lono i o makou nei e hoouka kaua mai ana na Kipi, i ko makou mau laina, i ka wehe ana o ke alaula o ka Poakahi nei, ma ka hema mai o Atalanata nei, aka ua haule hou aku lakou ihope.
            I ke kakahiaka nui o ka Poakolu ua hoouka hou mai na Kipi ia Atalanata nei, ua kiola mai i na poka pahu. Ua hoouka ia mai kekahi hoouka kaua weliweli, ma na alanui hema. Na kaua pukaa ua komo mai lakou a aneane 100 ia ke kokoke mai i ko kakou mau papu lepo. Ua hoala ia ae ko makou mau kanaka mai ko lakou hiamoe ae, a hoolalelale ae ia lakou no ka popilikia e kau mai ana, a hoopuehu aku la i na Kipi, me ka hoihoi aku ia lakou i ko lakou wahi i hele mai ai. Ua hoi loa aku nae lakou a hiki i Macona. Aohe no o makou poe make. Ua maikai loa ke ola o ko makou poe koa, a ua paa pono no hoi makou i ka ai.

Na wahi e pili ana ia Sheremena.

                WASINETONA Nov. 11.— Ua olelo ka nupepa Star o keia ahiahi, aohe he mea kaena wale na hana a Sheremena i keia manawa ; no ka mea ua paa pono loa na aoao o Sheremena, a ua paa pono loa no hoi kona mau kaua lio o kona poe kanaka i nele i ka lio a hele wawae, ua kau hou lakou maluna o na lio. Ka puali no hoi malalo o Thomas e alai mai nei ia Hood ma ke alo, ua hoopuipui, a ua hooikaika hou ia mai no hoi, a he mea no hoi e hoaka aku ai ia Hood aole e mahole, kau wahi apana o Tenesse, a me Kenetuke, na wahi ana e haka pono nei. Ke hoonoho nei o Sheremena i na puali koa elima, ma ke kua o Hood, a aia lakou mawaena o Hood, a me ka laina e hiki ia ia ke puka, i na e manao ana ia, e nee i ka hema, ke ike ia o ka mea pono ia ana e hana ai.
            1 ke komo hou ana ae o Sheremena ma keia hoohalua hou ana, ua palapala mai oia me keia, " ua komo ae o Hood iloko o Tensesee, a aia o Georgia a me Carolina Hema malalo o ko'u ahonui, a e uhau ana au ia lakou. Mai lelele ko oukou oili no'u. Ua hiki pono loa au."

Mai ia Grant mai.

                WASINETONA, Nov.— Ua hiki mai kekahi palapala i kela la aku nei, e hai mai ana ke mau nei no ko lakou kulana, aohi i loli ae. Ke kukulu nei na kanaka i na hale puha laau, a ua pa iho nei kekahi makani ikaika.
            Nov. 6.— Ua kaua ia he kaua liilii mawaena o ko makou mau koa paku, a me na Kipi, i ka po o ka Poalima, a he mau kanaka kakaikahi i make ma kela aoao, keia aoao. Inehinei ua ki nui mai na pukaa, ia makou, me ka make ole o ko makou poe. I ka po nei ua hoomaka mai lakou i ke kipu mai i ke ano ahiahi, a ua hoomau mai lakou a ao ka po ; a i ka hora 11 o kakahiaka nei ua hoao lakou e kii mai i na wahi i lilo ai i ko makou mau koa paku.
            Ua hiki mai kekahi kanaka o loko o Rikemona, iloko o ko makou laina i keia kakahiaka, i holo mai i mea e pakele ai i ka pololi. Ua hai mai no hoi ia i ka hune a me ka wi iloko o Rikemona ; a ua hai pu mai no hoi oia, ke eli nei na Kipi ma ke alo o Peterobuga, malalo ponoi o ko makou mau papu, aka aole makou i manaoio loa i keia lono mai.
            Na wahi hoomoana o ka puali koa o ka Potomaka, Nov. 11.— Ma ke ahiahi o ka Poakolu, ma ka hora 7, ua ike ia aku ka nee ana mai o kekahi mau puali o na Kipi, ma ke alo o ko kakou laina, e pili ana i ka papu Stedman. Ia wa wehe mai la na pu o ka papu, a hoihoi aku la ia lakou, i ko lakou mau pale ikaika. Ia wa koke no ki mai la na pu o ko lakou mau batari, aka ua hoohamau ia aku ko lakou kani ana mai, e na poka Boma o ka papu. Ua hele mai kekahi poe he haneri me kanalima o na Kipi, me ka manao e komo mai iloko o ko makou laina, aka ua hoohalawai ia aku lakou, me na elele o ka make, mai ko makou mau pu nui aku ; a ua wikiwiki lakou i ka hoi hou ana i ko lakou wahi i hele mai ai. E like me ka manao ana a na Kipi i hooholo ai e ki mai no lakou, i na kanaka a pau loa o ko makou aoao, a lakou e ike mai, ua kono ia mai ko makou poe e kai a huakai'ku imua o lakou, a hoopuehu aku la ia lakou ma o a maanei.

Ka lawe pio ia ana o ka moku Kipi Florida,

                BOSTON, Nov. 8.— Ua hiki mai ka mokuahi Aupuni Kearsage i ka po nei, a ua lawe mai oia i na pio o ke kaua, ke 'lii wili ki, a me ke 'lii waapa o ka moku Alabama, ke Kauka, a me na kanaka he 16 o ka moku Kipi Florida. Ua komo aku la Florida iloko o Barezila, ma ka po o ka la 9 (o Okatoba.) I kona komo ana aku e ku mai ana ka mokuahi Aupuni Wachusett iloko o ke awa, e kali ana i ka nanahu. Manao iho la o Capt. Collins o ka mokuahi Aupuni, e hoopoho iaia iloko o ke awa, a holo aku la io na la, me ke ki poka pahu aku, aole nae i nui ka ino i loohia aku ia ia. Kahea aku o Collins e haawi pio mai, a i ole e ae mai e hoopoho ia po oia. Olelo mai la ka Lutanela mua, he ae no ia ma kekahi ano e e lawe pio ia ai oia. O kona Kapena o Morris a me ka hapalua o kona mau luina ma kula lakou. Aohe mea i make ; ua lawe pio ia he 12 mau alii, a me na luina he 58.

Mai ke awawa mai o Shenandoah,

                WASINETONA, Nov. 12.— Ua hiki mai kekahi mai ke awawa mai o Shenandoah i keia la, e olelo ana, o ka hapa nui o ko Sheridena puali, aia i Winchester kahi i hoouluulu ai, aia hoi ka poe kipi i New Market, e paipai ana i poe koa hou. Aohe mau kaua nui i kaua ia.

            NU IOKA, Nov. 12.— E hai ana ka nupepa Cemmercial, ua hoohokaia o Early, i kona wa i hoouka mai ai ma ko makou aoao. Ua hoihoi hou aku o Sheridena ia ia ihope, a me ke pani pu no hoi i na wahi a pau ona e hiki ai ke na'e, i na paha ma ke ala-hao o Baltimoa, a me Ohio, a nolaila, ua hoohoka loa ia oia.

Mai Mesiko mai.

                NU IOKA, Nov. 12.— Kekahi palapala mai Matamoras e olelo ana, i ka wa ilohe ai na kanaka Kalepa, e hiki aku ana o Mejia ilaila, ua noi aku kela kanaka keia kanaka, i ko lakou mau Kanikela e malama ia lakou, a me ko lakou waiwai. O Beldin kekahi kanaka Kalepa no Crownsville, a he Kanikela hoi no ka poe kipi, ua ike ia mai oia e Cortinas. Ua paa pono o Montery i na koa Farani malalo o Decasing. Ua hoouna aku oia ia Gen. Bidaurri i ke Capitala i mea e hoohiki ia'i oia, e noho me ka maluhia malalo o ka Emepera Maximiliana. Ua maikai ka noho ana o na koa Aupuni, a me na koa Kipi ma ka muliwai Rio Grande, a aole no hoi kekahi o laua i holo aku e hana-ino kahi i kahi. Ua hai ia mai ua hiki mai ma Brownsville ekolu mau pu-kaa nui, na na kipi ; a ke kakali hou nei lakou o ka hiki hou mai, i mea e hoouka aku ai i na koa Aupuni e noho ana ma Brayos. He kakaikahi loa na koa o na aoao a i elua. No Europa.
            Ua manao ia ua hoouka aku ka mokuahi Laurel mai Liverpool mai i kona mau luina, a me na lako kaua maluna o ka mokuahi ALABAMA HOU, mawaho ae o Modena.
            Ua olelo ae ka nupepa Times o Ladana, o ka lawe pio ana i ka moku kipi Florida, he hana powa ia, oiai e ku ana no oia iloko o kekahi Mokuaina i noho aloha pu.
            Ua loohia o Lo Laiana o Beritania (Lord Lyons) i kekahi piwa ino, he typhoid ka inoa o ua piwa la, a aia oia ke waiho nei ma kahi moe.

NU HOU HOPE LOA.

Inehinei, ua ku mai kekahi moku kalepa, a ua lawe mai i na nupepa o ka la 17 o Novemaba iho nei.
Ke Kiaaina Brown o Georegia. Ke mau la no kona makemake e Kipi aku ia Jeff Davisa o ka Hema.
Ke manao la na Kipi e hoouka koke ia Rikemona.
He makani ikaika loa ma Inia. 110 Moku i poho, a he 12,000 kanaka i make.
He haunaele ma Bahia i Bararyila.

                Nu Ioka, Nov. 14.— Ua hai ae ka Nupepa Examiner o Rikemona, i ka hiki ana mai o kekahi mau mokuhao he umikumamakahi, me na poka pahu iloko o ke kai, a aia lakou ma City Point. Ua ike ae na Kenela akamai, aia he kaua hahana loa ma keia mau la'ku, malalo aku o Rikemona ; i lohi wale no ua kaua la, i ka paa pono ole ae o na ala wai o Dutch Gap. I ko lakou manao e hui mai ana o Sheridana me Grant, ma na laina o Rikemona, Peterobuga, a ma ka hema aku, ke hoouka ia mai ua kaua la.
            Ua hoopuka ae o Gov. Brown maloko o kana palapala penei : " Ua olioli au i ka ike ana'ku i ka hapa nui o keia Mokuaina e kue ana i na hana a keia Aha Kipi. E malama pono kakou i na kumu nui, nana i kono mai ia kakou e komo poo iloko o keia kaua kaulike ole, e hana ia mai ai maluna o kakou, e ko kakou Aupuni." Ua kokua mai no hoi ia no ka hana i kuikahi me ke Aupuni. No na gorila, ua olelo no ia penei : " Na poe e haalele mai nei i ko kakou mau puali, a me na puulu kaua-lio liilii, e noho ana malalo o ka poe kipi, ke mau nei ka lakou powa ana, a ha-o wale ana i ko kakou poe kanaka. Ua hookomo mai no hoi oia i kekahi pauku e hooholo e ki-poka ia ka poe e haalele wale ana, me ka hookolokolo ole ia poe. Ua mahalo no hoi ia i ka hoohana ia ana o na nika, aohe nae ma ke ano koa."

 

No Inia.

                Ua pa mai kekahi makani ikaika loa ma Calcutsa, ma ka la 5 o Okatoba, a ua hai ae na nupepa o Parisa, he 110 mau moku i poho, a he 12,000 kanaka i poho iloko o ke kai. Ua holo a wai ia ka hapanui o ke Kulanakauhale o Calcutta ; a o na Kauhale e ku ana ma kapa o ka muliwai, ua nalowale pu i ka wai.


No Beregila.

                Ua hoopuka ae ka nupepa Mercury, ua hoohaunaeleia ka Halenoho o ke Kanikela Amerika e noho ana ma Bahia, ua kono ia ke Kanikela e holo i ke kai, a ua kipaku ia'ku mailoko aku o ke Aupuni. Ua kena'e na Luna Aupuni o Beragila e hoopau i ka hoohaunaele.

No Iapana.

                Ua komo pono loa'ku na moku a makou i olelo aku ai kela pule aku nei, iloko o na papu o Iapana, a ua loaa ia lakou ke ala e komo ai ma ke kowa o Simonosaki ; aka, ua halawai mai lakou me ka poina nui. Ke noi mai la o Iapana e Kuikahi like.

[No ka Hokuloa mai.]
Ka olelo Hooholo a ka Ahahui Euanelio o Hawaii Hikina.

                Hooholoia.— Ke hoole nei keia Ahahui Euanelio, aole pono ke mare ka hoahanau me ka hoomaloka, a me ka poe i oki ia no ko lakou kue ana i ke Kanawai o ka aina, i ka wa e ola ana ka mea nana i oki aku ; a e kokua like no hoi na lala o keia Aha i keia olelo hoole ma ke ao ana'ku.
            Hooholoia.— No ka hookuu ana o na hoahanau.
            1. Ina e hele ana kekahi hoahanau ma ka moku e, a me ke kihapai e paha, he pono e kii aku i kona Kahu i palapala hoike no ko na noho pono ana ma ka berita o kona Ekalesia.
            2. Ina no ka pilikia paha, ua hele aku kekahi hoahanau i kekahi Ekalesia malalo iho o keia Aha, e ae ia e ahaaina pu me ua Ekalesia la ke loaa ka hoike e maopopo ai kona noho pono ana ma kona Ekalesia iho.
            3. O na hoahanau a pau e hele loa ana e noho ma ke kihapai okoa, e hele lakou me na palapala hookuu o ko lakou Kahu aku, a e hookomoia ma ka Ekalesia a lakou i huli aku ai.
            4. O na Ekalesia a pau i apo mai i kekahi hoahanau no ka Ekalesia e mai, e hoike koke aku kona Kahu, nana i hookuu aku i ua hoahanau nei, i ka manawa i hookomo ia'i kela hoahanau. Aole hoi e kakau ke Kahu nana i hookuu aku, i kona kaawale ana, a lohe pono ia ua apo ia oia e kela Ekalesia ana i hookuuia'i e komo.
            5. He mea pono i kela Ekalesia keia Ekalesia e kiai loa, a e huli hoi i na hoahanau malihini i hele wale mai no kahi e mai, me ka palapala hoike ole, a maloko o ka auwana wale, a o ka hihia maoli paha — a he pono no i ke Kahu e ae e kiai a e malama ia poe, me he mea la nana ponoi kela poe auwana la. Aia a maopopo ka mihi ana o ka mea auwana, a o ka mea hihia maoli paha, alaila, e hoihoi iaia ma ka pa-hipa o ke Kahu Nui, a e hoike koke aku hoi i ke Kahu o ka Ekalesia nona mai ua hoahanau hihia la.
            Hooholoia.— I ka wa e hoonoho ia'ku ai kekahi Kahu Ekalesia maluna o kekahi kihapai, he pono i ka Ekalesia o ia kihapai e hoomaopopo i ka nui o ka hanai kumu a lakou i manao ai e haawi ia ia, a e hoomaopopo i hale nono, a he pono i kela Ekalesia keia Ekalesia ke hooko i ka lakou mea e lakou i ae ai no ka hanai kumu no kela makahiki, keia makahiki.
            Hooholoia.— Ma Kau ka hui hou ana o keia Aha ; a e lilo na lala paa o keia Aha e noho nei ma Hilo, i Komite e hoomaopopo i kahi kupono a me kalo o Aefrita, e kukulu ia'i ka Aha ; a ina no ka pilikia mai ke Akua mai, e hui ole ka Aha i Aferita, alaila e lilo no lakou i Komite e hoomaopopo i ka manawa a me kahi kupono e kukulu ia'ku ai ka Ahahui.
            Hooholoia.— E kokoia o Mokapu a me Hanu i elele i ka Ahahui Euanelio o Hawaii nei ; a o Kaonohi a me Pahio ko laua mau hope.

Na Palapala.

Hawawa a me ke Akamai.

                E KA NUPEPA KUOKOA E ; Aloha oe : — Elua mau kanaka Pake ma Kona Hema Hawaii, ma Napoopoo kekahi, ma Hookena-uka kekahi, o Pou (Pake) ma Napoopoo, a o kana hana he hana mea ono a me ka hanai Hipa, a o ka Kuia (Pake) hana ma Hookena-uka ; he hana noho Lio a me ke Sumeka kamaa. Aka, ua ike no kekahi i kekahi mamua'ku, a ua kamaaina no laua ia laua iho no, aka, mahope mai, ua kaawale a hala kekahi makahiki okoa ; a no ka ono loa o Kuia a me kana wahine i ka Hipa, aole nae he ko oia ono : A i kekahi la Poaha, hiki mai o Pou mai Napoopoo mai, me ka Hipa hookahi. He nui no na Hipa a Pou i kalewa mai ai (kuai) he 15, a lilo aku i ke kuai ia ka nui i Keei, i Honaunau, a me Kealia, a koe hookahi Hipa, hiki mai i ko Kui (Pake) hale, ike mua ka Kuia wahine, olioli loa ia i ka Hipa, kuhi i lawe ia mai na laua, ma ke ano Pake, aka, hiki mai la o Pou, a aloha ke kamaaina me ka malihini, ninau o Kuia ia Pou, " E hele ana oe i hea ? " " E hele ana wau e kuai i kuu wahi Hipa i koe." Ninau aku ke kamaaina, (Kuia) " Pehea ke kumukuai o ka Hipa ? " " Elima dala," wahi a Pou, i aku o Kuia, " Na'u ka Hipa, i ekolu dala, no ka mea, he ono loa kuu wahine a me a'u i ka Hipa." " Aole, wahi a Pou, no ka mea, pa-lima wale no auanei na dala o na Hipa he 14 i lilo aku nei, aole wahi Hipa i emi iho, e aho hoi ha i eha dala, wahi a Kuia." " Aole," wahi a Pou. " E hele au," " o hele hoi ha," wahi a Kuia, hele aku la o Pou.
            He mau minute ma ia hope iho, hele aku la o Pou me kana Hipa, a hala aku la kela, me ka manao e hele ma Kapalilua, ia manawa, olelo mai la ka Kuia wahine, " Kupanaha hoi oe i haalele ia'ku la ka Hipa, a heaha ko mea i minamina'i ia mau wahi dala uuku ? I aku o Kuia i kana wahine, " Ua ono loa no oe i ka Hipa ? " Ae," wahi a kana wahine. " Ina pela, e kii au i ka Hipa a kela Pake me ke Kumukuai ole." ia manawa, hopu ae la o Kuia i kekahi paa-kamaa maikai, uwi, (kani) Helu 6. O ka hele aku la no ia, aka, aole nae i hele aku o Kuia ma ke alanui a Pou i hele ai, me ka Hipa, hele keia ma ke alanui nahelehele ma ke ala kamaaina, a no ka lohi o ka Hipa a me Pou, hala e o Kuia mamua, a kipa ma ke alanui a Pou ma e hele mai ai, a nana o Kuia i ke alanui, aole laua i hala, ia manawa, waiho keia i kekahi kamaa akau ma ke alanui, hoi ae keia ma ka nahelehele e pee ai, aole i liuliu, he mau minute ekolu paha ; hiki mai o Pou me ka Hipa, a ike i ke kamaa, olioli loa oia, hopu iho la i ua kamaa nei a nana ; a alaalawa ae la i ka lua o ke kamaa, aole nae i halawai kona mau kiionohi me ka lua o ke kamaa, a minamina iho la oia i ka lua o ke kamaa, no ka mea hoi, aole ke kamaa hema, hookomokomo iho la oia i ua kamaa nei, kupono no i ka wawae, olelo iho la ma ka olelo Pake, " Pomaikai paha wau i na o na kamaa no a elua, e lawe paha wau i keia kamaa ; ka ! ina he lua la," (i lohe mai au ia Kuia) ka haalele iho la no ia, hele aku la no me ka Hipa, a hala aku kela.
            Ia manawa, kii aku la o Kuia i ke kamaa akau a loaa, holo aku la a mama, a kipa ae la no ma ke alanui, aole laua i halawai, a puka mua o Kuia mamua, a waiho aku la keia i ke kamaa hema, aole i liuliu iho, hiki ana o Pou me ka Hipa, a ike i ke kamaa, lele ae la ka oili, ike iho la o ka lua no keia o ke kamaa ana i haalele ai, olioli loa iho la keia, olelo iho la ma ka olelo Pake, " Pomaikai au i keia la, e kii hou au i kuu kamaa a'u i haaleaku nei, e lawe ia mai nei no ka hoi e a'u, aole la hoi e luhi hou."
            Ka nakii iho la no ia i ka Hipa, a waiho pu iho la no me ke kamaa hema, kii i ke kamaa akau, a hala hoi kela, kii aku la hoi o Kuia i ka Hipa a me ke kamaa, " Hao ke Koolau pau na mea'loha." Ka lawe mai la no ia, hoi no i ka hale ma kona alanui no i hele mai ai, a hiki i ka hale, Waiho i ka paa-kamaa, lole i ka Hipa, a ka-lena i ka ili ma kahi o laua i kamailio mua ia'i, malama loa ia'e la ke poo o ka Hipa, supa ia ka io, palai ia ke ake. E nana hoi kakou ia Pou — A hiki o Pou i kahi ana i waiho ai i ke kamaa, i nana iho a nei ka hana aole, ka-haha ! kupanaha ka hoi !! maanei iho nei no hoi kuu