Ka Nupepa Kuokoa, Volume III, Number 42, 15 ʻOkakopa 1864 — Page 1

KA NUPEPA KUOKOA

Ke Kilohana Pookela no ka Lahui Hawaii.

BUKE III.  HELU 42.  HONOLULU, OKATOBA 15, 1864.  NA HELU A PAU 151.

“KA NUPEPA KUOKOA.”

HOOPUKA MAU IA MA HONOLULU

I kela Paoono keia Paoono.

$2.00 no ka makahiki,

ME KA HOOKAA MUA MAI.

NA OLELO HOOLAHA-aole i oi mamua o 10 laina no ka hoopuka hookahi ana, $1.00; alua komo ana, he $1.50; hookahi malama, $2.00.  E uku mua ia mai ke dala o na olelo hoolaha a pau e hoounaia mai na e pai.

KANIKAU-he hapalua dala ka uku no ka aoao hookahi o ka pepa leta, oia hoi 4 keneta no ka lalani hookahi-penei : he 25 lalani, $1.00; 50 lalani, $2.00; a pela’ku.

KA UKU NO NA OLELO HOOLAHA-ka uku pepa, a me ka uku o ka Kanikau, e haawiia no ma ka lima o na Luna o ke Kuokoa, a i oleia e hookomo mai no ma ka leta, a hoouna mai i ka Luna Pai.

O NA UKU PEPA A PAU E HOOKAA MUA MAI NO-aole e kauia ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua.  E pono ke hiipoiia keia mau rula, no ka mea, he emi no ka auhau no keia nupepa.  H. M. WINI, (Luna Pai.)

KA “NUPEPA KUOKOA.”

Is published in Honolulu

EVERY SATURDAY,

$2.00 per annum………..in advance.

ADVERTISEMENTS not exceeding 10 lines, inserted once for $1.00; twice for $1.50; and $2.00 for one month; all advertisements must be paid for in advance.

KAKIKAUS will be charged 1.00 per page, or 4 cts. a line.

PAYMENTS FOR ADVERTISERMENTS, Subscriptions or Kanikaus, may be paid to any of the Agents of the Kuokoa, or may be enclosed in a letter to the Publisher.

ALL SUBSCRIPTIONS must be PREPAID.  No names, either of foreigners or natives, will be inserted on the subscription list, until paid for.  This rule must be strictly adhered to on account of the low subscription price.

            H M. WHITNEY.

            Publisher.

Volume I and II of the KUOKOA, bound, for sale, $3.50 each.

Persons having complete sets of the above, can have them exchanged for bound volumes, by paying $2.00 each.

Makemake wale.

E KA NUPEPA KUOKOA E; Aloha oe: Aia ma ka Helu 18 Buke 3 o ka Nupepa Kuokoa; ua ikeia na manao o kuu hoa, oia hoi o J. W. H. Kamohai e olelo ana, “Pau ae la ka hoi kuhihewa,” ke pane aku nei kou wahi hoa, “Pau kuhihewa ia wai?”  Ke-i mai nei kuu hoa, “Ka-i no hoi i kela wahi i haiia’e la.”  “Ae.  Pela io no.”

            Owau ka malihini e makemake ana e ike ia mau wahi kaulana, ke kuhikuhi pono mai nae kuu hoa i ke alanui e hiki aku ai i ka’u wahi i kau nui ai; oia hoi o Haehae, a me ke ano o ka hele ana, o hele aku auanei ka malahini a Kamiloholu i Waiakaea, kaahele hema aku; i kaahema aku kahia, ku ana i ke awa kau waa o Kula; i naue hele aku ka hana ma ka hikina akau, kau ana mawaho ae o Kapele; i kaahele hikina hema aku kahia mai Kukii aku, ku ana i ke kumu niu i Paeohana; kuhi paha i ka uliuli o ke a-a i ka mawae he wai, i lele aku ka hana ku ana ka lae i ka pohaku; kau a-mea o ka hikaka o ka manao o kuu hoa i kikikoele mai nei ma kona kukulu manaoana: Oia nae paha, i kuu noho ana i Kau ko kaikai ana'e ia Haehae ma ka hikina akau o Kumukahi, a me Kumukahi ma ka hema o Waiakaea, a me Waiwelawela ma ka hikina hema o Kukii.  O oe hookahi ke keuo ka ikaika i ka ahai ik ka aina, a waiho ma kau wahi i makemake ai: Nolaila, ke kauleo aku nei au ia oukou e na makamaka, i noho a hele e makaikai i keia mau wahi kaulana i hai ia'e nei, mai hele oukou ma kahi a keia J. W. H. Kamohai i kuhikuhi ai, o loaa auanei ia oukou na wahi i hai i ma keia kukulu manao: Oiai hoi, he wahi keiki kupa no au no ua mau wahi kaulana la i haiia'e nei e kuu hoa, aole nae au i ike, he Haehae aku kekahi ma ka hikina akau mai Kumukahi aku; a he Kumukahi ma ka hema mai o Waiakaea aku; a he Waiwelwela mai Kukii aku ma ka hikina hema.  Aole pela ka pololei i ka'u alawa ana iho: Menei ka pololei; o Kumukahi mai Waiakaea aku, aia ma ka hikina.  A o Haehae mai Kumukahi aku, ke hoopololei ia ma ka ano iliwai ia, aia ma ka hema.  A o Waiwelawela hoi mai Kukii aku, aneane hikina akau iki, aole hoi kupono loa i ka hikina.  Pela ka'u mea i ike.  Aole i pau kuu manao, o ka uuku o ke kuleana ka mea i pilikia'i, ke oki nei au maanei, a mahope hoopuka hou aku.  Me ke aloha no i kuu hoa.

S. K. WAHINEHUHU.

Kau, Hawaii, Sept. 27, 1864.

HE MOOLELO

NO

William Kelly.

            AIA E NOHO ANA MA IRELANI kekahi luina me kana wahine, ame ka laua wahi keiki.  O ka inoa o ua luina nei o Kelly, a o ka inoa o ka laua wahi keiki o Wiliama.  He kanaka ilihune o Kelly, o ke dala i loaa mai iaia no kana hana ana maluna o ka moku, oia kona mea e malama ai i kona ohana, a ua oluolu likelakou a pau.

            He makemake loa ia i kana wahi keiki; a oia no hoi kekahi i makemake i kona makuakane.  O ka hana mau a keia kanaka, o ka holoholo maluna o ka moku i Inia Komohana, a i kona hoi ana mai, lawe mai noia i na lani maikai, ame kekahi mau mea maikai e ae na kana wahi keiki na Wiliama.  Hoomakaukau hou o Kelly e holo hou i Inia Komohana, a i ka manawa i kokoke ai e holo, waiho aku la ia i na dala he iwakalua ma ka lima o kana wahine o Mrs. Kelly.  Holo aku la ia no na mahina he nui wale, aole ia pela e holo mau ai, he akahi wale no keia holo ana.

            O ka hana mau a Wiliama, o ka hele ma ka ipuka o ka hale e nana'i, a e kuko ai hoi no ka hoi mai o kona makuakane, a po ae ana he la; plela ia e hana mau ai.  Eha mahina i hala ae, aohe mea hou i hiki mai.  Manao iho la o Mrs. Kelly, ua loaa ka'u kane i kekahi poino nui.  Ua makau ia, me ka manao ua piho ma ka moana, a i ole no hoi ia, he pilikia e ae paha.  Ua manao kaumaha loa o Wiliama no kona makuakane no ka nalowale loa.  Mahope iho, he kanaka e noho kokoke ana, hele maila i kahi o Mrs. Kelly, a hai mai la, ua loaa iaia kekahi nu hou kaumaha ma kana mau nupepa.

            Olelo aku la ia, "O ka moku o ko kane i holo ai, ua puhiia e ka makani ino (gale of wind) iluna o kekahi ailana a-a, ua nahaha ka moku, a ua manaoia ua pau na mea o luna i ke a-leia e ka moana.  O kanaka o kekahi moku e aku, o lakou kai lele iuka, a loaa na pepa, a me na apana laau o ka moku, malaila lakou i ike ai o ka moku o Kelly."  Kaumaha loa iho la ka manao o kana wahine.  Kulou iho la oia ilalo, uwe iho la, a ea ae la iluna me ka waimaka, a hai aku la i kana makahiapo (ia Wiliama.)  I ka manawa i lohe ai o Wiliama, ua hoonui loa ia iho la kona aloha i kone makuakane, a naauauwa iho la.  No ko laua mea ole nana e kokua mai, hoomanawanui ia i ka hana i mea e ola ai kana keiki.  Aka, ua maikai ia, ua maikai no hoi kona ola.

            Mahope iho, loaa ia i ka mai, a hanau mai la ia he kaikamahine.  Ilihune loa iho loa ia, a nui ae la kona aie i ka aina.  He kanaka ino loa ia, law aku ia i ka pakaukau a Mrs. Kelly, a hookuku aku la iaia iwaho o ke alanui me kona ohana.

            Nui loa iho la kona mai, a hele aku la ia me ka pilikia nui i kahi o kekahi kanaka mahiai, hookahi mile ka loihi, me ka manao e kokua ia kona pilikia.  Aka, aole mea i haawi ia mai iaia.  Nui loa iho la kona pilikia, o ka ilihune, o ka mai, o kahi ole e noho ai, a o ka mea ole nana e kokua mai.  Kokolo aku la ia iloko o kekahi hale lio, a noho iho la maluna o ka mauu.  Malaila kona wahi i noho ai no kekahi manawa, me kana wahi kaikamahine e hii ana ma kona lima, a o Wiliama maluna o kona uha.  Aole ona makamaka nana e kokua mai.  Ia manawa koke no huli ae la kona manao i ka makamaka maikai, oia hoi ka makamaka o ka poe ilihune a me ka poe kaumaha.  Iaia i hoomaka aku ai e pule, a me ka mihi ana i kona hewa, a me ke noi ana aku e wehe mai i kona pilikia.  Aole hoi ia i ike i kekahi kanaka e maalo ae ana ma ke alanui; oiai e hoomanao ana oia i kona mea nana i hana, "Ina la o kona noho pilikia ana me ke kane ole ia wa."  Ia manawa, e hele wawae ana kekahi kanaka, a i ka ike ana o ua kanaka nei i keia wahine me na keiki; hele aku la ia e hoomaopopo pono ia lakou; a ku iho la ma ka aoao o ua wahine nei.  I ka manawa i pau ai ka pule ana a Mrs. Kelly, owaka ae la kona mau maka, ai hoi, he kanaka e ku ana ma kona aoao.  Ike koke aku la no ia he kanaka luina, (sailor) me kona hoomaopopo pono aku no hoi i ke ano o kana kane no keia.  Aka ua oki pu wale iho no ko ia nei manao, no ka mea, ua make hoi i a(pela ka manao ia.)  Ia manawa, hai aku la ka luina i kona inoa, aole nae i lohe o Mrs. Kelly i ka hai ana'ku i kona inoa, a mawaena o ka makau a me ka olioli, maule iho la ia.  Hai aku la o Kelly, "Owau no keai."  Alaila ala mai la o Wiliama Kelly mai ka hiamoe mai, a uweiho la lakou.  "Oiai ua loaa mai na kaomi pumehana a ke aloha maluna iho o lakou a pau ia wa.

            A pau ko lakou hooluu ana i ko lakaou mau lihilihi i na kulu waimaka a ke aloha, ia manawa, hai aku la o Mrs. Kelly i kona Mooolelo i kana kane, a mahope iho o ka pau ana o ke kamailio ana o kana wahine i kona Mooolelo, alaila hai mai la kana kane i kona Mooolelo, peni: "O ka moku a'u i holo ai, ua ili a nahaha ma kekahi aina a-a, ua pau ko makou nui i ka make! koe au me kakahi mau mea elua.  Lawe ia makou a Inia Hikina e kekahi moku.  Haalele makou ia moku, holo aku maluna o kekahi moku i Enelani, a hiki mai nei au a halawai pu kakou i nei wa me ke aloha nui iloko o nei mau mahina ewalu."

            A i ka pau ana o na hahai ana a laua i na Mooolelo o laua.  A maia hope iho, kuai aku la ia i kekahi aina, a hookuonoono iho la.  Kanu iho la o Wiliama ina pua maikai he nui wale, a me na laau maikai i oi ka nani mamua o na laau o ka honua a pau, pela no hoi na pua, a me he mea la ia mau mea kanu a ia nei, e u-me mai ana i ka naau o na aoao palupalu a pau, pela hoi ka aoao oolea.  Eia kahi mea lea loa'ku, ina e maalo kekahi poe mawaho o ua pa nei, o ko lakou wahi iho la no ia e nanea'i i kela la i keia la, e hoolohe ana i ke kani a na manu hoolealea, a me ka moani aala maikai o ke e-a o na pua o ke kihapai.  A eia ka mea oi loa'ku, i ka hoomaka ana o ka ulu ana o ke kanaka maikai o Wiliama, alaila ua hoomaka pu mai ka maikai o kana mala pua.  I kona wa e puka'i iwaho e nana i kana mala, o ka manawa iho la ia e makaika nui ia'i, no ka mea, ia manawa e olelo pu ai na manu aloha me ia nei.  Eia hoi kekahi; he mea mau i na opuu rose (rose buds) ka nana hoohie mau ia ia nei i na wa a pau, me he mea la, he pae uwini (fair wind) ka makani.  Ua kapaia ka inoa o ua mala la o "Hoolailai wale ands." 

            I. KAAUKAI.

            (Aole i pau.)

Na hana a na Misionari Amerika

ILOKO O KEIA PAE AINA.

            Ua hiki mai ko lakou poe mua ma ka A. D. 1820 maanei, ma ka la 30 o Maraki o ia makahiki, ma Kawaihae i Kohala Hema ko lakou hiki mua ana.  Aia no o Kamehameha II ma Kailua ia manawa, oia hoi ka Moi II ma ka Noho Alii, mahope iho o ka make ana o Kamehameha I i ka po i o Hoku, o ka walu ia o na la o Hinaiaeleele, (oia o Mei) o ka A. D. 1819.

            Na hana mua a lakou.  Holo mai lakou a hiki i Kailua, halawai lakou me Liholioho ko kakou Moi II ma ke Aupuni Hawaii nei.  Ia wa, ae lokomaikai aku ke Alii ia lakou e noho mai, me ka hoao nae i ka lakou mau hana mamua, he maikai paha, aole paha, i na he maikai ka hana, ae aku ia lakou e noho loa maanei, i na he maikai ole, aole he ae o ke Alii ame na 'Lii e noho mai lakou maanei, no ka mea, ua malama loa paha ke Alii ame na 'Lii i kela olelo ao a Vanekoua ia Kamehameha I., i ka la 12 o Ianuari, A. D. 1894, (e nana ma ka Moolelo Hawaii,) a oia paha ke kumu o ke kanalua iki o ke Alii ame na 'Lii.

            A penei no kekahi olelo ao a Vanekoua ia Kamehameha, "Mai hoonoho oe i ka haole i Hawaii nei, i elua wale no haole e noho i Hawaii nei, o Olohana ma laua o Aikake, aka, o ka nui o na haole, he mea opu inoino loa, he kanaka huhu wale, he poe hoomakaulii aina, aole loa e pono ka haole ke noho mai ma ko oukou Pae Aina, o hihia oukou."  Aka, ua ae no ke Alii e noho mai na Misionari, a hoomaka i ka lakou hana e like me ka wehewehe ana malua.

            A he oiaio no, ua kupono no i ka Moi ame na 'Lii o ia kau ke komohia ana mai o nei mea he kanalua ia lakou, i na poe malihini ano maopopo ole no kahi e mai, oia ua loaa mua mai i ua poe Alii noho Aupuni la ka lono e pili ana i na hana  i haiia maluna, na keia poe i kaina like na waihooluu (ilikeokeo,) a e like me ka lakou like, pela e like ai na hana, oia paha ha manao.

            Na hana elua a lakou.  Eia ka lua o ka lakou mau hana, mahope o ko lakou aeia'na e noho mai ma keia Pae Aina, ua hoomaka koke no lakou i kekahi hana, ua mahele ia lakou iho ma kela wahi keia wahi e noho ai, e like me ko lakou nui i hiki mua mai ai ia nei, ua akaka ia hana a lakou i kakou, ke noho nei na koena oia poe ma kakou i keia wa, ua ohi aku ka hopena o na kino i ka nui o lakou.

            Na hana ekolu a lakou.  Eia ke kolu o ka lakou mau hana, i ke kaawale ana o na haawina o lakou, e like me ka mahele ana o ka haku nona ka aina mahi i kana poe kauwa lawelawe.  I ko lakou nana iho i ka hapa mua o kakou iloko o ia kau, he nui ka pouli ame ka hewa e uhi paapu ana maluna o keia lahui, a e like me na mauna i hoouhiia i ka hau keokeo noenoe olinolino, pela no ka noho ana o keia lahui, aole i mahele ponoia ka pouli ame ka malamalama, ame ka laua mau hana a kaawale, aole he Kumukanawai, aole no hoi he kanawai hoopai karaima, aole he mau pono Kivila i pili paa loa i kela ame keia mea, aole loa no, &c., &c., no ka mea, aole i puka mai ka La o ke Ola ia nei mamua'ku, akahi wale no a hiki mai ka Lamaku oiaio, a Iesu Kristo, na keia poe malihini no i lawe mai keia waiwai makamae.

            He nui no na moku i hiki mua mai ia nei, mamua aku o ka hiki ana mai o keia poe, no Beritania mai, no Amerika mai, mai ke kii ana mai o Kapena Kuke ma Kealakekua nei, mai ka A. D. 1778, a hiki ia Vanekoua i ka A. D. 1792, i ka la 3 o Maraki, a o na moku i ku mai iloko o ia mau makahaiki, ua umikumamalima paha a oi aku, ma Kealakekua nei, a ma na wahi e ae o keia Pae aina.

            Ia mau moku i ikeia'i ka bipi, ame ka lole, ia mea'ku ia mea aku, na mea pili i ke kino; a na ia mau moku no i lawe mai i kekahi mau mai ino i pili paa loa i ka iwi, ame ka io o keia lahui, a mai ia la mai i laha ai i ko Kauai poe wahine a me ko Kawaihae (paha) poe wahine ia mau mai ino, a hiki i keia la, ua kupu, ua lau, ua laha, ua kawowo, ua hua awahia a ia mau moku i lawe mai ai, o ka mai ame ka make kai lawe muaia mai e ia mau moku iloko o keia lahui; a ke ike maka maoli nei no kakou i ka hua i lulu ia e ia poe, aole he lohe pepeiao, a ke ume nei ia mau mai i ka elua hapakolu o keia lahui iloko o ka honua.  Eia nae, ua hoomahui wale mai ka mea Kaulana o ia kau (Vanekoua) ia Kamehameha, penei: "Aia ke Akua maluna ma ka lani, ina i makemake oe i kaipule ea, e hoi au a Beritania, a na'u no ia e noi aku i ke Alii e haawi mai i Kahuna nau, a i hiki mai ua Kahuna la ea, e ai-noa oe, ole pono ka ai kapu, he mea hoopunipuni no ia, aohe Akua ma ka honua nei, a ia no ke Akua ma ka lani."

            He oiaio loa ia olelo ana a Vanekoua ia Kamehameha, aka, hookahi wale no hemahema nui, o ka hakalia loa ana, he 67 a keo na makahiki, akahi no a hookoia mai ia olelo a Vanekona ia Kamehameha IV., eia ke noho punei kakou me ia mau Kahuna no ke Akua kiekie loa.  A oia na mea mamua iho e pili ana i keia lahui i ka wa i hiki mai ai na Misionari o Amerika, a kakou e hoomaopopo ai; nolaila, ma keia alanui a'u e ulakai nei ia kakou, e akaka ana ia kakou pu ka pili pono maoli io ana o ke aloha kuhohonu o keia poe Misonari Amerika i keia lahui.

            Na hana eha a lakou.  Eia ka ha o ka lakou mau hana, ua ike ae nei kakou i na mea maluna, ua ae ia lakou e noho, ua loaa kahi e ku ai na hale, kahi e mahi ai, e hanai na holoholona, mamuli o ka ae ana o ke Alii e noho, aole ma ka waha o ka pu ame ka pahikaua, a ua launa mai hoi kekahi poe uuku ia lakou, ua hai aku lakou he Akua a ka lani, he la hookolokolo, he lua ahi hoopai no ka poe hewa, he ola mau loa ma o Iesu Kristo la, e manaoio aku ia ia, ua alakai ia ma ka pule mehameha, ua kukuluia na papai halepule i wahi e akoakoa ai ka poe e makemake mai ana e haipule, a ua aoia aku e malamaia ka la Sabati.

            Aole i pau maanei ka lakou mau hana, o ka hoomaka wale ana ko keia, e like me na muli wai nui o ka honua nei, o ke poo uuku, o ka hoomaka ana ia, pela no ka pono ame ka maluhia i puka ma keia Pae Aina, na keia poe Misonari Amerika no i kukulu me ka ahonui lua ole, ame ke aloha hookamani ole.  Eia kekahi, ma keia mau hana mua i hoomakaia, ua owehewehe mai na kukuna malamalama o ka la o ke ola, e lilelile mai ana maluna pono iho o keia lahui holookoa &c., &c.

            Na hana elima a lakou.  Eia ka lima a ka lakou mau hana, e like me ke keiki omowaiu, a e mano ana na makua e hoomaamaa i ke keiki ma ka ai-paa, a pela'ku e hoowalea ai a hiki ae i ka wa e ikaika loa'i ke keiki, pela no keia lahui holookoa, mai ka la hiki i Makanoni, a hiki aku i ka la welo i Lehua, he no keiki, he kuli, he paakiki, he naaupo, &c., a o ka makua a mau makua nana keia mau hana hoomanawanui, na keia poe Misonari Amerika no.

            Ua kukuluia na Luakini kupono, na halekula, ua paiina na buke liilii hoonaauao, ua hoounaia na Kumukula kanaka maoli i loaa mua ka ike, ua loaa ka ike i na'lii, i ka Hu, ua lohe o Iehova ke Akua hookahi, aohe akua e ae, ua malamaia ka la Sabati, ua loaa ke heluhelu palapala i kela ame keia mea i ikeia ka hewa he hewa, ame ka pono he pono, ka maikai ame ka maikai ole, ua hookaawale ikiia, a pela aku.

            Na hana eono a lakou.  Eia ke ono o ka lakou mau hana, ua ike lakou ua kokoke e kanakamakua loa na kanaka o Hawaii nei, a pela io no ka ike i loaa i na'lii ame na Hu, ua hala ka wa keiki, ua pau ka wa aiwaiu ana; a heaha na mea i koe?  Eia, e nana kakou i ka hua o ka hana ana a ua poe Misionari Amerika nei i lulu ai.  Eia ka hua mua i ike ia e kakou e pili ana i ka lakou mau hana.  Akahi, o ke aloha kuhohonu maoli o ke Akua i keia lahuikanaka holookoa, a he oiaio kona aloha ia kakou; nolaila, oia i hoouna mua mai ai i kana poe kauwa kupono e hele mai io kakou nei, i lohe pololei loa'i kakou i kana mau olelo hemolele, aole hoi i ka poe i kauleo mua ia kakou "e hoouna mai i kahuna," Alua, o ke kupono loa oka lakou mau hana i ka pono maoli e like me ko kakou ike nei, a e like hoi me ka pololei loa o ka Baibala nui, ko lakou alakai kulanalana ole.

            Eia kekahi mau hua o ka lakou mau hana, ua mihi oiaio kekahi poe i ko lakou mau hana, ua mihi oiaio kekahi poe i ko lakou hewa, na kanaka ame na'lii, ua manaoio ia Iesu Kristo, ua lilo i poe kahunapule kekahi poe, ua loaa ke Kumukanawai, ua kukuluia na kanawai, ua lilo kekahi poe i Kiaaina, i Kakauolelo, i Lunakanawai, i Loio, i Luna Helu, i Luna Auhau, a i Kahukula, &c., &c.

            Nolaila, auhea la ka pilikia kuloko o keia lahui holookoa i hanaia e keia poe malihini i hookipaia'i e ko kakou Moi II o ke Aupuni Hawaii nei?  Aole no no kuu lohe ana i keia leo a mau leo e wawalo ana iloko o keia Pae moku, e olelo ana, "he poe hewa loa na Misonari Amerika, he poe hoopunipuni, he poe puni waiwai, a he poe hewa loa no!"  Aohe i pau malaila ko lakou hoahewaia, e like me ka nui o ka lakou mau hana maikai i keia lahui i ikeia e kakou, pela no ka nui o ko kakou hoahewaia.

            Aole no paha kakou e olelo ana he nuhou ka lohe ana i ka ahewaia o ka poe nana i kukulu i na hana maikai, aole no, he nukahiko no ia.  Ina e nana kakou iloko o ke Kumukanawai paa (ka Baibala) kahi i kukuluia'i, na kanawai o ka pono io maoli, e akaka ana ia kakou na mea i ili mai ai maluna o keia poe e kauia nei ka ahewa ia lakou.  Nolaila keia kukulu manao ana o'u a me kuu helu papa ana'ku i ka lakou mau hana mai ua hiki mua e lakou a hiki i ka "pae umikumamalua o ka poe misionari." (18-48)

            He wahi keiki no wau i ka wa i hiki mua mai ai na misionari Tatina ma, ma ka apana o ko'u wahi hanau ai, malaila no i ka wa i kaapuni ai lakou i ka mokupuni o Hawaii, e hoomaka i ka lakou mau hana; a owau no kekahi i kapa aku ia lakou "he poe kahuna anaana," ma ka lohe i ko'u poe makua.  O ko kakou ano mau no ia, mai ia wa a hiki i keia la a'u e kakau nei; nolaila i keia la, i ko kakou lohe ana i ko lakou leo aloha i keia lahui mai hoahewa hou ia lakou.

            Auhea oe e ke Kuokoa, e ahonui oe e hookomo ma na laina kaawale o kou kino holookoa, me ke aloha i kou Lunahooponopono.

            J. A. KAHOOKAUMAHA.

            Kuleihale, Kona, Sept. 22 1864.

Kama ole.

            E KA NUPEPA KUOKOA E; ALOHA OE: - Ka Hokuloa malamalama o na Aupuni nui, ina he mea oluolu ia oe ke hookomo iho i kela hua e kau ae la maluna, i ike mai ai na kini o keia mea kama ole.

            Eia no ia: Ia'u noho ana ma ko'u wahi moe, oiai e hoolai ana au maluna e kahi noho koki, ia wa puiwa ae la au i ka leo e kahea ana, "Luahine pupule! luahine pupule!!" eu ae la au mai ko'u hoolai ana, holo aku la au iwaho, a ninau aku la au, "heaha ia?" pane mai la o Kama, "he wahi luahine pupule, aia i kahawai aole wahi kapa, mai make, i na he ua nui ko nei po, kahe mai la ka wai lilo, ina ua make," ia hele ana aku o makou, e pupue anai kahawai, e waiho ana he wahi eke puawa, koi aku la au e hoi kaua i ka hale, hoole mai la kela, eu ae la e ku aole e hiki, ua opili na wawae, hapai ae la au a hiki i ka hale o Kaaea ma, hoaahu ia e Hamanalau i ke kapa, mea aku hoi e ai, "aole ai au i ka ai," pane hou kela, "Makau wale ka haole o kuu make no ka keia," nolaila, nui ko makou aloha nona, akahi a akaka mai ka mea kama ole, e hookuu wale ia nei aole keiki.

            Auhea oukou e na keiki, mai kookuu wale i na makua i palupalu, o ike ole ia kona wahi e poino ai, a hoomaewaewa ia hoi ka iwi o kamahele, e malama i ka wa pilikia a me ka wa pilikia ole, i ka wa pupule a me ka wa pupule ole, ina he pupule, he pono no ke nakii i ke kaula e like me nei luahine, ina he keiki ka nei luahine pupule, e pono ke hoopaa i ke kaula ma ka hale, mai hookuu wale ia ia e like me keia ka ike wale ia o na iwi.

            Oia la me ke aloha no ia kakou hookanaka, "o kipa hewa ke aloha i ka ilio."

            S. F. NAPUA OPIO.

            Kalihi, Oahu, Sept. 3, 1864.