Ka Nupepa Kuokoa, Volume III, Number 24, 11 June 1864 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

KA MOOLELO

O

IOSEPA.

 

HELU 19.

 

(Aole ka i pau ka moolelo o Iosepa.)

 

            LELO AE LA O IOSEPA PENEII kona poe hoahana, " I manao no oukou e hana ino mai iau'u, a hoololi mai ke Akua ia mea i mea maikai, e hana mai ai e like me ia i keia la, e hoola i na kanaka he nui loa. Mai maka'u, na'u no oukou e malama aku i ka ai, ame ka oukou poe keiki," a hooluolu mai la oia ia lakou a pau, a olelo lokomaikai mai la ma ko lakou mau naau.

 

            He mea oluolu paha keia i ko lakou manao, he mea keia e hoopalupalu ana i ko lakou mau naau! Ua kupono ia lakou kealoha nui aku i ko lakou hoahanau, no kona lokomaikai nui ia lakou ; a i ke Akua hoi ke aloha oi no kona aloha nui! No ka mea, na ke Akua no i hoololi ka lakou hana ino ana, i puka mai ai ka pomaikai ia Iosepa, ia Iakoko, ame lakou pu kekahi a pau.

 

            Hoi aku la na hoahanau o Iosepa i ko lakou ohana hale ma Gosena, kahi a lakou i noho hou ai. Mahuahua ae la lakou, a pomaikai hoi ma na mea pili i ka lako malalo o ke alii o Aigupita, me ka malama pono o ko lakou hoahanau i ke Kiaaina.

 

            Ua mau paha ka lokomaikai o Parao ia Iosepa, ame na'lii mahope ona, a mau ia ia ka oihana Kiaaina o Aigupita, e hooponopono maikai ana i na kanaka me ka oluolu, a ua alohaia e na kanaka a pau.

 

            Ua ola o Iosepa e ike i na keiki a Eperaima laua me Menase, a hooikaika oia e hoolilo ia lakou i mau keiki naauao, a hana lokomaikai loa oia ia lakou.

 

            A elemakule ae la o Iosepa, a manao oia ua kekoke mai paha kona wa e make ai, a houluulu ae la oia i kona poe hoahanau, a hai aku la oia ia lakou i kona kokoke ana i ka make. Kamailio oia i na olelo hoopomakai a ke Akua o na kupuna ia lakou, ame na mamo hoi a pau.

 

            I ae la o Iosepa i kona poe hoahanau a pau, " E make ano au, he oiaio no, e ike mai ana no ke Akua ia oukou; a e hoihoi aku ia oukou mai keia aina aku, o ka aina ana i hoohiki ai ia Aberahama, a ia Isaaka, ame Iakobo."

 

            Ua ike oia i ka pono no ka Iseraela e hoomanao mau i ka hoi ana i Kanaana, i lilo ia i mea nui iloko oko lakou naau.

 

            Hoohiki iho la o Iosepa me na hoahanau ona, (e like me ka lakobo hoohiki ana,) e lawe lakou i kona mau iwi me lakou, i ka wa e hoi ai lakou i Kanaana.

 

            Aole i haiia mai na olelo hope ana i olelo ai ia lakou, aole i liuliu iho, hiki ole ia ia ke olelo ae, a make aku la o Iosepa i ka makahiki 110 o kona ola ana.

 

            Ua wahiia kona kino kupapau a paa i ka pahu ma Aigupita; a i ka wa i haalele ai ka Iseraela ia aina, alaila, lawe pu lakou ia ia ma Kanaana, a e kanuia i Sekema, ma ka aina a Iakobo i kuai ai me na keiki a Hamora, oia hoi kana i haawi aku ai i na keiki a Iosepa.

 

            Ua manao paha o Iosepa, ina e malamaia kona kino kupapau ma Aigupita, a hiki i ka wa e hoi aku ai ma Iseraela i ko lakou aina, e mahalo nuiia auanei, a malama loa ia ua kino kupapau nei, a lilo kahi i waiho ai he wahi kaulana, a nui loa ka poe manao e hele ana ilaila e makaikai ai.

 

            Nolaila, loihi no hoi ka noho ana o lakou a hiki i ka wa a Mose i alakai aku ai ia lakou i Kanaana, a ua aneane 150 na makahiki ona.

 

            Ua make no o Iosepa, aka, me he mea la e olelo ana no kona kino kupapau i kona poe hoahanau i kela makahiki keia makahiki ma ka leo e hooloheia'i : " E ike mai ke Akua ia oukou, a e hoihoi aku ia oukou mai keia aina aku, a i ka aina ana i hoohiki ai ia Aberahama, a ia Isaaka, ame lakobo, e ike mai ke Akua ia oukou, a e lawe aku oukou i ko'u mau iwi mai ianei aku."

 

            Kupaipanaha na aoao a me na hana a ke Akua e hooko ana i kona makemake! Nana i hoolilo ia Iosepa i kona wa e ola ana, i mea nana e hoopakele i ka lahui Iseraela, mai ka pilikia loa i ka wi mai, i paa ia lakou i ka ike, ame ka hoomana ia Iehova ke Akua oiaio, a mailoko mai hoi o lakou i hoopukaia mai ai ka Hoola Mana, o Iesu ke Kalahala o ko keia ao.

 

            Na ke Akua i hoolilo ka make ana o Iosepa i mea e paa ai ka manaoio o ka Iseraela i no olelo hoopomaikai i ko lakou mau makua ; ame ka hoola mau ana i ka makemake iloko o ko lakou mau naau e hoi i kahi i hanauia'i o ka Mesia, kahi hoi i noho kino ai oia, a i make ai no hoi, kahi i puka aku ai ka olelo o ke ola, kona Euanelio, a pili i na welau o ka honua.

 

            O na moeuhane ano i loaa ia Iosepa i kona wa kamalii, no ka uhane o ke Akua mai, oia kai hoomakaukau ia ia no na hana kupaianaha a ke Akua ia ia ; ua manao oia he hana nui kana, aole nae oia i ike pono i ke ano o ia mea. Ua lilo paha ia i mea e noonoo ai oia, a hoomakaukau ia ia no kahi kiekie e noho ai oia ma ia hope.

 

            O ka hookoia'na hoi o kana mau moe kai hoonui i kona manaoio i ke Akua, ua ike oia i ke kulou ana o kona poe hoahanau a pau imau ona.

 

            A mahope iho, ua ike no oia i na makua, a me na hoahanau, a me ko lakou ohana e noho ana iloko o ke Aupuni, i hanaia ia lakou e kona lokomaikai, a malamaia hoi e kona mana Kiaaina.

 

            (O na pua o kona mau hoahanau, ua kulou io no i kana pua, a ua kulou io no hoi ka La, ka Mahina, ame na Hoku he umikumamalua imua ona!)

 

            He hana nui ka ke Akua a Iosepa e hana ai, pela kakou i ike ai ma na mea i hoike ia ma keia moolelo, a paa ia hana, lawe oia i kana kauwa i ona la.

 

            He ano maikai ko Iosepa e pono ai oukou a pau ke hoohalike me ia ; i ka manao ana ia ia, ua pono oukou ke kuko aku i kela Kanaana a Iosepa e noho nei - oia ka lani.

 

            E nana iki kakou i kekahi mau ano o Iosepa, a i ka nana ana, e pono oukou ke hooikaika e hana like. He ikaika ko Iosepa manaoio ana i ke Akua, aole ana ikemaka i ke Akua, aka, ma ka manaopaa loa i kona Akua, ua manao hoi oia he Akua mana loa ia, pololei loa, a oiaio loa.

 

            Ua manao oia i kona pili ana i ke Akua, a ua kuleana ke Akua iloko ona, e nana ana i kana hana, kona mau manao, me kana olelo, a e lawe ana ke Akua iloko o kona aupuni ka poe i aloha ia ia, a hoolohe i kana kauoha, a e kipaku loa aku i ka poe hewa mai kona alo aku.

 

            Olelo o Paulo no Iosepa penei : "Ma ka manaoio, i ka pau ana o kona ea i olelo ai o Iosepa i ka hele ana'ku o na mamo a Iseraela, a ua kauoha aku lo no kona mau iwi." O keia manaoio ola, hana, oia he kumu o na mea maikai a pau ona, o kona mau manao, olelo, a hana i ka mea kupono i ko ke Akua makemake.

 

            Aia no anei ia oe ia manaoio i ke Akua? He manaoio anei oe i na mea a pau ana i ao mai ai ia oe ma ka Baibala - ame na kauoha a pau, ame na olelo hoopomaikai a pau, ame na olelo e pili ana i ka hoahewaia.

 

            Ina ua manaoio oe i na olelo a pau a ke Akua, ua manaoio anei oe, a ua ike paha, aia ke ola ma ka mihi io i kona hewa, ame ka hilinai ia Iesu Kristo, e hoike maoli ana kou manaoio ma ka hoolohe ana i ka ke Akua mau kauoha, a e hana mau ana i kona makemake.

 

            O kekahi hope pono o ko Iosepa manaoio i ke Akua, oia kona aloha maoli ame ka hoolohe i kona makua. He ano maopopo loa ia iloko ona.

 

            He pono i na keiki ke aloha, a hoolohe i na makua i ka wa e noho pu ana ame ka wa kaawale, ma na mea uuku kekahi, aole i na mea nui wale no ; i ka pilikia ame ka wa pilikia ole, ma na mea e pili ana i ka uhane, i ke Akua, ame ke ola mau, ame na mea o keia ao.

 

            Eia hoi kekahi hope o ko Iosepa manaoio i ke Akua - o ka manao oluolu, aloha i kona mau hoahanau, a he makemake e hana maikai i ka poe hana ino ia ia.

 

            Ua like anei oe me Iosepa ma ia mea? Ua hana anei oe i kou ma@ hoahanau e like me kana hana? Ua hoihoi anei oe i ka maikai no ka ino.

 

            Ua manao o Isoepa, e nana mau ana na maka o ke Akua ia ia i na wa a pau loa, oia kahi mea i lilo ai oia ma ka hana pololei i kela hana keia hana.

 

            Ua manao oia, he pono ia ia ke hai aku i kona makuakane i ka hana ino o kona mau hoahanau, aole hoi ona makau ma ia hoike ana i na mea i mokuahana ia ia.

 

            Ua hoolohe mua oia i kona makuakane i ka hele ana i Sekema, a mahope i Dotana, e ike ina hoahanau ona, ua manao nae oia e hana ino mai paha lakou ia ia.

 

            No ka pololei o kana hana i ka wa i noho kauwa ai oia ma ka hale o Potipara, ua hooliloia i luna no na mea a pau.

 

            Ua lohe paha o Parao i kona ano i ka wa i noho ai me Potipara, a ma ka Halepaahao kekahi, a ua manao oia e hiki no ke hilinai ia ia ma ka pono maoli.

 

            Hookeikei ae la o Parao ia Iosepa a kokoke i ka noho alii, a lilo oia ke Kiaaina o ka aina a pau o Aigupita ; no ko Iosepa hana pololei, a lilo oia i ka pomaikai. Pela e pili mai ai ka pomaikai i ka hana pono ; a pela e pili mai ai ka pomaikai ia oe ke hana pololei i like me Iosepa.

 

            Eia kekahi mea e mahalo ai kakou i ko Iosepa ano, no kona manao kupaa i ka wa i hoowalewaleia'i.

 

            Hoowalewale mai la ka wahine a Potipara ia ia e hana hewa pu me ia, aole nae oia i puni wale aku ; i iho l kela, "Pehea la auanei wau e hana'i i keia hewa nui, a hana ino aku hoi i ke Akua." Pela e pono ai oe ke hana, i ka wa e ku mai ai ka hoowalewale imua ou, a e pomaikai wale oe.

 

            O kekahi ano pono hou o Iosepa, oia ka haahaa o kona naau. I ka wa i laweia mai ai oia imua o Parao e wehewehe i na moeuhane, aole ona manao hookiekie. I iho la kela, " Aole ia'u keia hana, na ke Akua e hoike mai i keia mea."

 

            I kona noho Kiaaina ana ma Aigupita, he haahaa wale no kona ano i ikeia imua o kona poe hoahanau, ame kona makuakane.

 

            Ua kokoke loa e pau keia wahi moolelo o Iosepa, ke keiki a lakobo.

 

            A pehea kou manao ia Iosepa, aole anei he mau ano pono kona e waiwai ai oe ke hoohalikel Ua hiki no ia oe ke loaa kona mau ano maikai, eia nae kahi e hiki ai, ma ka kaawi ana ia oe iho i ke Akua, a i lilo ai hoi mamuli ona.

 

            A ina pela, nana no e alakai ia oe i ka pono o Iosepa, ame kona hope. Oia no ko'u makemake ame ko'u pule i ke Akua no'u.

 

Ke ala pokole e pakui hou ia'i

E HOOEMI HOU IA AI HOI O NA

MAKAHIKI ELIMA O KO KAKOU OLA ANA.

 

            He mea i mahalo mau ia ke ala ana i ka wa kakahiaka nui: - Aka, he mea makehewa nae. No ka mea, ua manao na kanaka o ka hoohui hou ana mai i na hora hiamoe, ka mea e oluolu ai, a e lealea ai paha ka hiamoe ana ; A oia iho la ke kumu i like ole ai na makahiki o na mea a pau. Aka, o ka hora i hoopaumanawa ole ia a hoomaunauna wale ia paha i kela la i keia la, ka mea i nui ai ka like ole o ko kakou ola ana, ka mea a kakou e noonoo iho ai ma keia kumu hoohalike hookahi malalo nei.

 

            O ka mua, e olelo kakou penei. O ka awariga o na hora e ala ai, a e hana ai hoi ke kanaka, he umikumamaono ia, i kela keia iwakalu-kumamaha hora o ka la, a e walu hora e moe ai. Alaila, 365 ai la i ka makahiki, aka hoi, ina he kanaka e paa mau ana i ka hiamoe, a he hookahi wale iho no ona hora e ala ai i kela la i keia la, ua hoopokole ia i kona mau makahiki i 365 hora wale no, i like me 23 la ; no 16 hora o ka la, e like me ka awariga i olelo ia'e nei. E kikoo aku kakou i ka huina o na makahiki he kanaha a e nana pono i ke emi ana, a me ka hoonui hou ia'e o na makahiki.

 

            I na he kanaka e hiamoe ana i ewalu hora o ka la, e piha pono auanei kona awariga, a e pono e olelo ia he kanaha ponoi kona mau makahiki ; ina hoi, i ewalu ona hora e hiamoe ai i kela la i keia la, alaila e akolu ana haneri a me kanaha-kumamalua na la ona i ka makahiki. A he kanakolu-kumamahiku a me ka hapa wale no na makahiki ona iloko o kona hiki ana i ke kanaha makahiki, ma keia mea hookahi, ina e moe ia i ehiku hora i kela la i keia la, he 388 auauei na la ona i ka makahiki, a i ke kanaha o kona mau makahiki, ua ola ia he kanaha-kumamaiua a me ka hapa makahiki ; a ina he aono hora hiamoe kona i ka la, alaila 411 la o kona makahiki, a ua ola ia i 45 makahiki, i ke kanaha paa o kona mau makahiki.

 

            Ma keia mea ua ike kakou, iloko ona makahiki he kanaha ; ma ka mikiala i elua hora o ka awariga e ala e a-e ai oe mai kou wahi moe mai i kela la i keia la, e pakui hou ia mai ai o Elima makahiki, a ma ka moe hou ana iho i elua hora i oi ae mamua o ka awariga e hoo-emi hou ia iho ai Elima makahiki. No keia mea hoi ; e ka mea e heluhelu ana i keia, e noonoo, mai hooloihi i kou hora hiamoe, a pela hoi i kou wa e ala ai Me ke aloha no.

                                                                                                                                                                                                G. WILLE.

            Hana, Maui-hikina, Mei 19, 1864.

 

Pehea na Malihini?

 

            Ma ka la 25 o Feberuari, makahiki 1843, ua hele mai kekahi haole Enelani maanei a ua lawe oia i ke ea o ka aina, ka aina a ke Akua i kaawi ai ia Kamehameha i hooilina paa loa nona a no kana poe mamo, mai ia wa mai a hiki wale i keia wa, ua kiai mau kekahi poe i keia paeaina. Ua kuko lakou i ka aina o na alii Hawaii, me ke ake nui e lilo ia lakou ; me he mea la ua nele lakou i ka aina; a ke makemake nei e kauo aku ia Hawaii i panalaau no Beritania. Aole keia he mea hou Ua loheia no ma na aina e ; a ua paiia no hoi ma kekahi mau palapala haole keia makemake o kekahi poe Enelani. Nolaila, pehea kakou i na malihini e noho mei me kakou?

 

            He manao akea maikai a me ke aloha wale no ko makou i na malihnii a pau e noho mei. Aohe no o makou makemake e hoino wale aku. E ake loa makou e mau loa ka noho aloha ana me lakou, Aka, oiai ua ike lea makou i ka manao ino o kekahi poe, ke i nei makou, aole he pono ke hoopunahele koke i na malihini. E akahele; alia e lawe koke ia lakou i poe hoa kuka ponoi. Malia paha eia iwaena o kakou kekahi poe opu inoino e hana maalea nei. E kali, E hoao i na malihini. Ma ko lakou hua e ike ia aku ai ko lakou ano.  KANAKA HAWWAII.

 

Moa Nu Hou.

 

            E KA NUPEPA KUOKOA E; ALOHA OE. - E hoolaha ae oe i keia wahi nu ma kela wahi keia wahi o keia mau mokupuni, i ike mai ai ka poe e lawe ana i kou kino, a me na keiki puni nu hou mai Hawaii a Kauai.

 

            Eia ua wahi nu hou la, ua hanau mai he ohana Moa na kekahi kanaka ma Waipio, Hawaii, o Nauhanelua, ka mea nana ua ohana moa nei, a mailoko mai o keia ohana moa, kekahi moa kupanaha, penei kona ano: He moa keiki eleele, o ke ano nae, he moa maoli no ; aka, eia kona wahi kupanaha, he ekolu ona mau wawae, o na wawae kahiko e like no me ke ano mau o ka moa, a o ke kolu hoi o ka wawae, aia malalo iho o ka pupua, ma ka aoao hema o ka puka hoomaha.

 

            Aia ma ka wawae kupanaha, me he mea la, elua wawae malaila ; aka, hookahi no iwi, e like me ka wawae okoa, a he kuekue malalo iho, a hiki aku i ka mahae ana o na manamana, malaila, ua kaawale ekolu manamana malaila, a ma kekahi mahele o ua wawae la, elua manamana, huiia, elima manamana ma ka wawae kupanaha, ewalu hoi manamana ma na wawae kahiko, huiia he 13 manamana wawae o keia wahi moa ano kupanaha! Nani kau mau hana e ke Akua. Ke ola nei no keia wahi moa.

                        A. W. P. WAILELEOHIILAWE.

            Waipio, Hamakua, Hawaii, Aper. 29, 1860.

 

            Ahaaina Lulu Dala o na

KUPA O KA LAI O HAKALAU.

 

            E KA NUPEPA KUOKOA E; - ALOHA KAUA. - Oiai au ua kono ia mai e ka makani Moae, ka makani moani ala halihali a ka Puulena, hoope pua hala o Kanehoa, no kela mau hua poo e kau anoano ae la maluna, e hoike aku ia oe no na mea hou ma kela wahi keia wahi o kou mau palena, a nau ia e hoolaha aku ma ke akea, a me na huina paailiono o kou mau mokupuni, i ike mai ai na kini makamaka o kaua e lawe ana i keia mea he "Nupepa."

 

            Ma ka la 23 o keia malama oia hoi ka poaono hora 12 o keawakea, akoakoa nui mai na mea a pau ma ka luakini ma Pomaikai; na kan,e wahine, a me na kamalii, na luna, na kumu, na koahanau, na poe opio makapalupalu no hoi, a me na kupa o ka lai o ka malu kukui o Lele, na hoa o ka iu o ke anu o ka aina ua nui o Hilo, ua luia e ke ala me ke onaona, ka pauhia pu ia i ke ala o ka nahele me ka lehua, o ka ieie hoi me ka palai, a me ka maile-laulii o Kapena, e haiamu ana maluna o ka papa-aina, i hoonaniia hoi o loko o ka Luakini i na lau Inia uliuli lipolipo maikai i ke awakea a me ka awapuhi. Ia manawa ua akoakoa na mea a pau, a ku mai la o Rev. T. Coana ke Kahunapule, a hoomaikai mai i ke anaina. Heluheluia ka Himene 153, a mele mai ka poe mele o Beza ka Leo, a pau ke mele ana, pule a pau.

 

            Ua hoomaka hou ia kekahi Himeni i haku ia e pili ana i ka ahaaina, a ua mele hou mai ka poe mele, na leo kane me na leo wahine me ka hoohaihai, ua maikai a eleu no hoi ka hana ana, me ka mahaloia no hoi e ke anaina, a ua hoonaueia ke ana kaumalie o ko makou mau puuwai no ka piha i ka olioli. A pau ke mele ana, ku mai la ekolu Luna, o B L. Keawe, no ka Apana o Kamaee, a o J. S. Paku no Honomu, a o W. P. Kawainui no Hakalau.

 

            Penei hoi ka hoomaka ana : Ua kahea pakahi mai na Luna i na Apana o lakou, e weheia na hipuu paa mai ko lakou mau poli ae ; a ia manawa, o ka eleu mai la no ia o na mea a pau, a hele pakahi mai kela mea keia mea e hookupu maluna o ka papakaukau. Ekolu nae puu, na maheleia ma na Apana penei: Apana o Kamaee, palua dala i na kane a emi mai; pakahi no hoi ka na wahine a emi mai i ka hapaha. Ma ka Apana hoi o Honomu, hookahi no kane i haawi mai $2.00, a o ka nui o na kane a pau, pakahi dala wale no a emi mai, a pela no hoi i na wahine. Ma ka Apana hoi o Hakalau, he keu o ka eleu, a he puahi no hoi ma ka haawi dala ana, oia hoi na kupa aiau oia uka; i hoopuluia hoi i ka ua kanilehua o Panaewa, i paiia mai hoi e ka makani oluolu kolonahe o ke aloha pumehana o ko lakou ma puuwai, oia hoi na kane opio, na kupa no hoi oia uka i pulu i ka ua noe, he palua dala wale no ko lakou haawi, a ekolu wale no poe i emi malalo o keia kulana.

 

            O na opuu rore hoi o Salona, oia hoi na Nunu makaonaona aki pohe o ka nahele, na kaikamahine maka palupalu naau haahaa a ke aloha kau malie, na kupa heenalu o ka ahiu, o ka malu haimuku o Pueke, e kahiko ana i na lehua o Meleakini, he kini kohu ia no ka lehua Makanoe.

 

            O na opuu rose o Salona, oia hoi na Nunu makaonaona, he pakahi dala ko lakou, pela no hoi ka poe i oo, a me na hapauea palupalu, i piha i ke aloha a me ka olioli, ua like wale no ko lakou haawina me Limanui, he umi ka poe i emi malalo iho o ke ana iliwai o ko lakou kulana maikai.

 

            O na haumana kula hoi o Hakalau a me Honomu, na keiki mahuahua a me ka poe liilii, ua noho wale i ka malu kukui o ka palai, a me ka olu o ka wai o Kolekole, e hookapeke ana i ka wai Oehaa, (Huli mao,) ka ua mea o ka eleu a me ka maikai o na keiki ma ka haawi ana, he hapawalu pakahi ka lakou haawi ana, ua mahaloia ka lakou haawi ana, oia hoi na kamalii, nolaila e ae aku i na kamalii nuku ke hele mai i o'u nei, pela ka Iesu olelo i kana poe haumana.

 

            Eia iho malalo ka papa houluulu o na dala e na Apana pakahi, penei :

 

            Apana 1, ma    Kamaee…………..$19 00                  $4 50 balota.

               "          2,       Honomu………….. 19 25                              pau loa.

       "   3,                      Hakalau……………51 75                  6 00 balota.

Dala I hoaie ia mamua, uku hoopanee,   7 00

                                                                                               

                        Huina houluulu o na dala,   $97 00       $10 50

                                                                                                 10 00

Huina pau loa o na dala i haawiia

            ma ka lima o Rev. T. Coan,      $107 00

 

            Mahope iho o ka pau ana o ka lulu dala ana a pau hoi i ka hooponoponoia, ua haawi aku o Mr. Zataio, ka Puuku, ma ka lima o Rev. T. Coan, ia manawa, ua piha loa ke anaina i ka olioli, ua hoopuka ae o Mr. Keawe, he wahi olelo pokole, penei : "Hipa ! Hipa !! alaila, Huro ! Huro !! like ke anaina a pau, me ka hosana olioli o na puuwai i ke kapalili, no ka hoihoi i na hana maikai a ke Akua.

 

            Hoomaka ka paina ana o na mea a pau ma ka papa aina, i makaukau i na mea ai o na ano he nui wale, ua ai na kamaaina a me na malihini i naue mai e ike i na mea hou, ua lawa like ka makemake o na mea a pau, a o ka pau no ia, hookuu ka Aha, a hoi kela mea keia mea me ka olioli o ka naau.

 

            Auhea oukou e na hoa o ka iu o ka ua nui o Hilo, e loku ana i ka muo o ka hala. na Ekalesia hoi e noho ana me ke aloha o ka naau E naue hou mai oukou me na hipuu aala o ka Lipoa moe pooli . Mokihana, ma ka pule hope o Iulai e hiki mai ana, oia ka manawa ahaaina hou. Oia kahi kauleo aku ia kakou, ka poe hoi ma ko Iehova aoao, na Ekalesia e noho ana me ke aloha i ka Haku.  He ma-u ia wahi manao, o ka hoomanao iho ka pono.

                                                            Owau no me ka mahalo.

                                                                        S. K. NALEHUAPANE.

            Hakalau, Hilo, Hawaii, Aper. 25, 1864

Leo Kahea!

E KA NUPEPA KUOKOA E ; - ALOHA KAUA.

            No ke kokoke ana mai o kou Helu 27, molaila, ke kahea aku nei au ika poe e makemake ana e lawe i kou kino holookoa, i ike lakou i na mea hou o keia kau Ahaolelo e hiki mai ana i ka la 4 o Iulai, a me na mea hou o na aina e.

 

            Ina he makemake ko oukou e ka poe e noho ana mai Kahaluu a Hakipuu, e hele mai oukou ma ko'u wahi ma Waikane, e hele mai nae me ke $1.00 ma ka lima, alaila, e loaa no ia oe ka pepa mai ka Helu 27 aku E puka mau no ka pepa i kela poaono keia poaono ke pilikia ole au, aka, ina e pilikia wau, e puka no ma ka poakahi ma ko oukou mau hale ; aole no hoi wau e molowa ke loihi kou wahi i noho ai iloko o na mile 5, 6 7, a oi aku. Aohe ua, aohe anu i ka mea a ko'u manao i iini ai.

 

            Eia hoi kehaki ; o ka poe i lawe i ka pepa mai ka Helu 1 mai, ka poe hoi i haawi mai $1.00, ke kokoke mai nei ka Helu 26 e pau ai kela dala hookahi i hookaaia mai, a e haawi hou mai hoi oukou i ke $1, i koe no ka makahiki okoa, mamua ae nae o ka puka ana mai o ka Helu 26. Mai kanalua ka manao e na hoa i ka puni a kakou o ka Nupepa. Ina aole oukou e hookaa mai i ke dala, alaila, ke koekoe aku nei ka pepa ia oe, aole hoi oia e ike aku ma kou ipuka hale, a hele loa no kela ma ke ala.

 

             Ina ua pilikia oukou no ka loihi o ko'u wahi, e haawi no i ke $1.00 a me ka inoa pu hoi ia Kaehuaea, ma Waiahole; a nana no e haawi mai ia'u oia ko'u hope Luna lawe pepa. E noonoo oukou e ka poe lawe pepa, o nele oukou ika mea nanea. Ia oe aku ia e ka "Nupepa Kuokoa" i hau hana, ke hoi nei ke keiki o Waikane, ua hulili aku la ka la i ke kula o Kaapoko.

                                                                                                S. E. K. PAPAAI.

                        Luna lawe "Nupepa Kuokoa."

            Waikane, Koolaupoko, Iune 7, 1864.

 

Ka nui o na kanaka ma Niihau.

 

            E KA NUPEPA KUOKOA E ; ALOHA OE: - E like me ke noi a ka Hokuloa, e hai aku ika nui o na kanaka o ka mokupuni o Niihau, a me na halepule, a me ka nui o na hoahanau iloko o ka Ekalesia o ka Haku. Eia mai no ka oiaio o na kanaka ma ka helu ana i ka nui, mai na kane, wahine, keiki nui, keiki liilii, na wahine kane a me na wahine kane ole, na kaikamahine nui a me na kaikamahine liilii. A eia mai no ka papa kuhikuhi.

 

Na       kanaka kupono                        -                       -                       -                       187

"           wahine mea kane,                    -                       -                       -                       110

"           wahine kane ole,                     -                       -                       -                       29

"           keiki nui kupono,                    -                       -                       -                       18

"           keiki uuku iho,                        -                       -                       -                       50

"           kaikamahine nui,                     -                       -                       -                       27

"           kaikamahine uuku iho,            -                       -                       -                       36

"           keiki ai waiu,                           -                       -                       -                       12

"           kanaka pupu,                           -                       -                       -                       51

"           luahine,                                                -                       -                       -                       39

"           hoahanau kane,                       -                       -                       -                       36

"           hoahanau wahine,                   -                       -                       -                       31

 

                                                                                                Huina pau loa,             626

 

            Eha hoi halepule ; ekolu no ka aoao hoole Pope, a hookahi no ka aoao Katolika. O ke kahu nae o na hipa o ka aoao Hoole Pope mai Waimea Kauai, a hiki i Niihau, oia hoi o Rev. G. B. Rovela, a o D. Maui a me Anadarea na kokua kahu. E like hoi me ke noi e hai aku, e hiki no ke hai aku. O kekahi poe nae ua pau i ka hele ma kela wahi keia wahi. Oia iho la no kahi kanaenae a ke keiki o ke komohana la, a ke hoi nei au i ka mahi pa-o-o, ua ua ka ua Naulu.

                                                                                                P. R. HOLIOHANA.

            Kaununui, Niihau, Mei 19, 1864.

 

            HALE PAI KII.

 

MALUNA AE O KA KEENA PAI O O KA

 

"Nupepa Kuokoa,"

 

Emi ka uku no ke kii. E paiia no ke kii iluna o ke

 

ANIANI a me ka PEPA.

 

E hele mai e na makamaka e pai i ko oukou mau kii.

                                                            H. L. CHASE (Keiki.)

            112-6m                                                Mea Pai Kii.

 

J. P. HUGHES.

 

MEA   HANA

NOHO            LIO!

 

AIA MA KA HALE KUAI O KA MEA nona ka inoa maluna nei, he Noholio Pelekane a he Noholio Mei ka, a me na Noholio Wahine, o na ano a pau, na Noho Paniolo Nu Hou.

 

Na Hao Waha a me na Kepa o na ano a paa,

            Na Kaulawaha, a me na mea e pono ka lio,

                        Na Ili Kauo o na ano a pau,

                                    Na Hoa Keehi,

                                                Na Palaki Lio,

                                                            Na Kahi Lio,

                                                                        Na Eke Iii,

                                                                                    Na Huipa.

A me na mea e ae pau loa o pili ana i na Lio a me na Kaaholo, a e kuai ana no ia mau mea,

 

NO KE KUMUKUAI MAKEPONO LOA!

 

            Aia no ke waiho mau nei malaila na Pela Mauu.

            O na Pela Pulu, na Pala Hulu a nae Pela Uwaea. E hanaia no e like me ka mea i kauonaia mai.

            Ua hanaia no na Kaa Lealea u e ka maikai loa, a me ka makepono hoi.

            Ua hana hou ia na mea a pau e pili ana i ka'u oihana me ka maikai.

            E malama pono ia no na mea a pau i kauohaia mai e pili ana i ka'u oihana. E loaa no wau ia oukou ma Monikahaae, ma ke kihi o ke Alanui Hokele a me ke Alanui Papu.

                                                                                                            J. P. HUGHES.

            Honolulu, Sept. 17, 1862                                            100-@y

 

LAAU LAPAAU!

AIA MA KAHI O

 

KAKELA ME KUKE

Ma Honolulu.

 

J. T. GOWER, - Makawao, Maui.

J. D. HAVEKOST. - Wailuku, Maui.

C. H. WETMORE, - Hilo, Hawaii.

J. W. SMITH, - Koloa, Kauai.

 

HE LAAU KAHIKO, A HE MAOPOPO

NO HOI.

 

Laau hoopau Naio me na Koe.

 

A DR. JAYNE.

 

HE NUI NA PILIKIA O KAMALII I KA Noia a me ke Koe, a pela hei na kanaka makua. O ka hope oia mau mea kolo, oia ka lolo. Oia mau mea kolo hope oia ka lolo, a o ka make hoi i kekahi manawa, a nolalia mai ua mai e ae kekahi, e like me ka lepo paa, naiulu, pehu, uleule, a me na mai e ae.

            O ka Laau no keia e pau ai ua mau mea ino nei.

            Eia hoi kekahi. O ka laau ku pono keia i ka poe pilikia i ka wela o ka houpo; i ka ono ole i ka ai ; i ka nawaliwali o ke kino i ka mai pehu; i ka nalulu hoopailua; i ka pono ole oka mai wahine, a me na mea like.

            Penei no e inu ai i ka Laau hoopau Naio me na Koe:

            Ina no kamalii, e hanai aku i hookahi hapakulu o ka puna ki, i ka manawa hookahi no ke keiki malalo iho o ka makahiki hoekahi. Mai ka makahiki hookahi a hiki i na makahiki ekolu, elua hapakola o ka puna ka pono. Mailaila'e a i na makahiki eono, hookahi no puna okoa ka pono, a mailaila aku a i ka wa kanaka makua, e hanai i elua, a i ekolu paha pona i ka wa hookahi. I ka wa e inu ai, e hui i ka laau me ka pa ha e ka wai maoli. Oia hoi, ina hookahi ka puna laau, alaila, e huiia me na puna wai maoli eha; a pela no a i@ ai ma ke kakahiaka awakea a me ke ahiahi. Aka, i nui ka pilikia, alaila, pono no elima inu ana i ka la, penei ; kakahiaka, keikie ka ia, awakea auwi ka la, ahiahi.

            E inu mamua o ka ai ana, aole kokoke mahope iho.

 

Laau hoopaa Hi a Dr. Jayne,

 

JAYNE'S CARMINATIVE BALSAM.

 

            He laau maikei a oluolu hoi keia no ka Hi, ka Nahu Na@, Wela o ka Houpo, Haoa, Hoopailua wale, Luai, Luai moku, ono olo i ka ai, Nahu me ka uwe no hoi o na keiki uuku, a me na mai like he uui.

            Emo ole ka oluolu o ua mau mai nei i kela laau.

            Penei e inu ai, i ka inu ana hookahi. Ina he keiki akahi paha ona malama, a @ paha he umikumamalua paha keia a hiki i ka iwakalua ka pono.

            Ina he keiki mai na malama eono a hiki i na malama ewalu, he hapalua puna ki ka pono. Mai ka makahiki hookani a hiki i elua, e inu no ia i puna ki okoe. Mai ka hiku a i ka walu o ka makahiki, elua puna ka pono, a no kanaka makua, he puna nui ka e inu ia i ka manawa hookahi.

            A inu ea, e hui me ka wai maoli uuku, (a like a like ka wa me ka laau,) a pela e inua ae ai. Ekolu, eha elima paha inu ana i ka la hookahi e like me ka nui o ka pilikie.

            I akaka nae. Ina he nui ka wela, a ina au komo kekahi ai pono ole Hoko o ka opu, e aho e moni e mamua i mau Hu'ale Ola, a i ole, e inu i wahi paakai, a i wahi aila paha, i he@ ka mea ino oloko, alaila e inu i keia Laau hoopaa hi.

            Ina e luai ka mea mai, mahope o ka inu ana i ka Laau, a paii a i ka luaiia, e hanai hou aku no e like me mamua: a peia no a pinepine, a oluolu hoi ko loko, a waiho malie no hoi ka Laau ma ka opu.

            Aohe a makou mea e noi aku ai i ka lehulehu, Lookahi wale no o ke kauoha aku ia lakou e ROAO PONO i na

 

Laau Kunu a Kauka Jayne,

 

hoike aku ai i ke ola o na mea a pau i hoakakaia no kana mua aau. Ua hoola, a e hiki ana no ke hoola i ka mai

 

KUNU, NAHU, a me ke ANU,

 

a me na mai e ae no hoi ne noi wale ; a e na mai HOKII no h@ i ola nui, na mai i ola ole i na laau o ae. E aho e hoao oukou e ka poe i mai ia.

 

HE KUHA KOKO ANEI KOU?

HE KUNU ANEI KOU?

HE EHA ANEI KOU KANIA-I?

HE KUNU UMII ANEI KOU me ka NAE?

 

            AOLE ANEI HE KUNU OO OU?

            AOLE ANEI OU MAI KUNU?

            AOLE ANEI OU MAI NAEN AE?

            AOLE ANEI OU EHA MA KA umauma?  

            AOLE ANEI OU KUNU KALEA?

            AOLE ANEI OU HU MA KA iwiaoao?

 

            A ina ua loaa ia oe ia mau mai, alaila, e ike oe i ke ola i ka LAAU KUNU a Kanka Jayne.

 

 

NA MAI HOOPAILUA.

Mai O Ke Ake!

 

Mai Nalulu a me ka mai Dyspepsia.

 

            (O ka nawaliwali o ka puu hoowali ai, Hoko o ko kakua mau waihona ai.)

 

            He pono ke ai koke i ka laau a Huaale Ola a Kauka Jayne, he laau oluolu, a he ola no hoi. Aohe no he mai i nele ke makemake i na laau hoonaha ; a mai nui no hoi ka poe e ola ana, me ka oluolu no hoi, ina e hoomaopopoia a e inu ia no hoi ua mau laau la. Aole no e oluolu pono kekahi mea, oiai e inuinu ana oloko o kona kino ; a ua ulu nui ae no hoi ka mai, a i kekahi manawa ua make no, a ina e malama pono ia a e inu ho@ na Huaale Naha, alaila, ola no. No ka hoelalo ia ana mai @ keia mau mea, nolaila, ke hoolaha ia aku nei ka.

 

Huaale Ola a Dr. Jayne.

            Me ka hiki ke hooia'ku i ka maikai, a na ka nono ana i @ maopopo mai i ka oi o ke ola o keia laau mamua o na laau e ae, a me ka maikai no hoi o ka inu ana, a me ke ola maoli no @ A ina no e inu ana ia laau, aole no he mau mea i hookapuia, oia ka ai ana a me ka inu ana. Aole e ino ke waiho loihi, no ka mea, ua hanaia no a maikai loa. A ina e inu ia ua hikiwawe loa ka hehee iloko o ka puu waiho ai. Ma ka inu ana ma ka haawina liilii, he maikai loa no ka naha ana, a he oluolu no hoi, a me ka holoi pau i ke ino oloko o ka opu.

 

DISIPEPESIA.

 

            (Oia ka mai ono ole o ka ai i kekahi manawa, a me ka hoawali pono ole ia hoi oka ui iloko o ka puu moni ai.)

            O keia Huaale Hoola a Kauka Jayne, he maikai loa no ka ihooikaika ana ia mau oihana o ko kakou mau kino. Ina ua oihi loa ka mai ana, alaila, e hikiwawe ka olu ke inu puia ka.

 

Huaale me ka Laau Hoomaemae Koke

a hoopau NAIO me na KOE,

 

A Kauka JAYNE,

 

e like me ka mea i kuhikuhila mawaho o ka wahi o ka laau.

 

NO NA MAI MA KE AKE,

            MAI LENA,

                        MAI MA KA OPU HANAWAI,

                                    NA MAI WELA,

                                                KA HAALULU,

                                                            KA MAI O KA ILI,

                                                                        KONO INO.

                                                                                    MAI NALULU,

PAA O KA LEPO,

            MAI KUNA,

                        MAI WAHINE,

            eme ha MAI HOOPAILUA.

 

            Ua maopopo loa ke OLA o keia mau KUAALE. A o ka mea wale no i koe i ka lehulelia o ka h@ pono ia mau hua. A he maikai no hoi na laau a Kauka Jayne, no ka hoola ana i na ano

 

PUHA,

            ALAALA,

                        KAOKAO,

                                    PUUPUU,

                                                PEHU,

                                                            KUNAKUNA,

                        Hanene, Lolo,

 

na mai wahine, a me na mai e ae, no ke KOKO a inoino mai a @ i kana.

 

LAAU HOOMAEMAE KOKO

                                                                                                @ 1y