Ka Nupepa Kuokoa, Volume III, Number 23, 4 Iune 1864 — Olelo hoolaha a Ka Moi. [ARTICLE]
Olelo hoolaha a Ka Moi.
Ua hiki mai io makou la i na kuaaina Makaainana o ke Aupuni Hawaii, keia olelo nona ke poo e kauae la maluna. Ua pohihihi wale ia makou kona ano. Ua kuhi hewa makou, ua pili i lea Ahaolelo 0 na'lii a me na Lunamakaainana, ka hana o ka hoololi ana i ke Kumukanawai. Aole 1 anei pela ? Me he mea la, e haalele aua i na Kanawai o ka aina, ma keia hana, a e hoole ana i ka hana i hanaia iho nei, o ke koho Lunamakaainana ana. Aole anei keia he ano hoowahawaha i na Lunamakaainana a na kapaka, na Mikaainana a ke Aupuni i koho ai ? Me he mea la e lilo ana ka hana o keia Ahaolelo hou, ka hana i ku pono i ka Ahaolelo maoli. O " ke kuka pu hoi no ka pono o ka lehuluhu, a me ka noonoo ana i ka hemahema o na lala o ke Aupuni, i mea e hikiai na hana o ke Aupuni." O ka manao ona Makaainana kuaaina o ke Aupuni Hawaii nei, ua pili keia hana i ka Ahaolelo; Ua makemake makou e hoike mai oe, ma kou pepa maikai, ke " Kilohana pookela o ka Lahui Hawaii nei," i k©u manao, i pau ko makou kuhi hewa. He hau Makaainana.