Ka Nupepa Kuokoa, Volume III, Number 20, 14 May 1864 — He kanikau Aloha keia no P. KAMOHAI. [ARTICLE]

He kanikau Aloha keia no P. KAMOHAI.

Halulu uina i Puupehe ka lele ana, Keehi kulani aku la oili i ka moana, Oili pulelo i ka moana ka lilo ana; Ke kaha ana ka lei ana'ku nei liuliu, Ua ka'ku la ke aho e ike hou aku, I na koa lawaia e lawaia ai ; E hai mai ana he keiki no ke kai, Kaili pau ka hanu pale ka ike, Lele mahui lani waiho ke kino wailua, I oni aku la paha e hahai i ka pae Opua ; Pua ia ka makua ua haalele kea, Owala lua lauahi na lima o ka pahoe, I kua iho la ka pihe i au mala Lehua, Ua luluu kaumaha au Lehua i ke kai, Kiai lehua o makou i makila ua hala, Auwe no hoi kuu makuakane--a. He makuakane inoa makua io no'u, Inoa makua no'u mai na makua mai, Ke kumu ia ke kuleana i noho mai ai, He kane he inoa kane a kuu makuahine, A kuu makuahine i hala aole keia,— Ke pine hoopaa i makua ai no'u, Auwe no hoi kuu makuakane—a. Kuu makuakane mai ka ia kanakanui, Mai ka ia haaheo o ua wahi nei, Ua anoi makalahia moe ole ka po, Ua ulu pau ia mai kawa uka, Ka noho hale malu ulu malu kukui, Huia kawa kai puia lonalona, Puia no eo ula ke kai aha; O-e ka mapuna kani ka poo kai Halakaa, Ua kaa ia a'u ua haalele niai oe, O'u poe makua lawaia i hele aku nei, Hele i ke ala ula maawe iki a Kanaloa, Ke ala makoli maawe iki a ka hinihini ula, Auwe no hoi kuu makuakane—a. Hia ke kao lele ka pua ku i ka houpo, Kani hui e ka eha loku i ka manawa, Haa kokohi mehe kua koko la ka eha, Kikoni ku ka eha i ka puuwai; Ua naoa mai ka poli ana loko, Ua lele lioa lio loko i ke aloha, Ua mokumoku manahua ka naau, Ua nawali e, ane opai i ka makani, Kani ka ula wela hahana loko i ke aloha ; Aloha kupouli like me ou kini e noho nei ; Auwe no hoi kuu makuakane—a. Kuu makuakane mai ka la wela hulili nopu, Hulili nopn ka la wela haoa i ke kula, Kolili ka la no ao i ke kula o Pahoa, Hoa o ka ua ka la ke anu me ke koekoe, Huikau loli ka nahele ka uka o Kahili, Loli ka ua kiawe puehu iluna o ka laau, Ka ua kiawe onohi ki-hee ula i ke kula, Ua kauaula wai kunaha—e, Naha kaawale ka pili me ka makua, Me kuu makuakane aloha i hele aku nei, I hele hookahi aku nei oia wale no, Na hele kohana kino wailua ia, Haalele i ka nui ka lehulehu, Ka nui ke aloha au o au moopuna, O au mau keiki e na aku nei, Ua nini hoona i ko aloha, E moe poo ana iloko o ka moino, Auwe no hoi kuu makuakaue—a.— Kuu makuakane mai ke kai o Punahoa e, loa— Loa wale hoi ke kau la na ke nloha i kuu maka E haka loa nei no aole i nalo; Ke aloha o kuu makuakane aohe i pau e. J. B. Kawelo. Lahaina, Aperila, 16, 1864.