Ka Nupepa Kuokoa, Volume III, Number 16, 16 April 1864 — Hoike ke kula Beritania MA HILO. [ARTICLE]

Hoike ke kula Beritania MA HILO.

Eka Nupepa Kuokoa e ; Aloha oe Ka uwea Talegarapa nana no e poloai aku imua o na inakamaka o kaua, mai ke one anapanapa o Waiolama, a hiki aku i ke one kani o Nonohili. He wahi lei lehua akea ka'u e hoouna nei ia oe, a nau ia e kau iho ma kahi kaawale o kou kino holookoa, i na nae he. mea pono i ka manao o kou Luna Hooponopono. Eia no ia ; ma ka la 17 ame ka la 18 o Maraki nei, ua hoike ke kula haole ma Hilo nei, o H. K. Hitchcock a me Miss E. Lyrnan na kumu okeia kula. Ma ka la 17 i ka hora 6 o ke kakahiaka, ua kani no ka pele o Haili, ua akoakoa mai no na haumana a pau o keia kula, na kumu, ame na kahu oke kula. He nui loa na kanaka i hele mai e nana, na kane, na wahine, ame na kamalii; o na haumana o ke kula hanai kekahi, ua hele no a hooke i ka nui o na kanaka i hele mai e ike. Ua kahiko ia no na haumana i na aahu maikai, e like no me ka mea mau o na keiki imi naauao, o na kaikamahine he mau aahu keokeo me na hupa, ame na lei lehua i haku ia a nani ma ko lakou mau poo, ame na lipine ulaula ma na ai.