Ka Nupepa Kuokoa, Volume III, Number 11, 12 March 1864 — Page 2
| This text was transcribed by: | James Matsuzaki |
| This work is dedicated to: | test - put back into corpus |
Ka Nupepa Kuokoa
KE KILOHANA POOKELA NO KA LAHUI HAWAII.
No ka hiki ana mai o ke Kanikau a na 'Lii, no ka lakou Lani aloha i minamina nui ai, a e noho mokumokuahua nei hoi no kona aloha, a no ka maopopo no hoi ia makou o ke aloha Alii ka manao mua, a ka manao hoi ma ka panepoo o na puuwai Hawaii a pau; nolaila, ua hookuu makou i kahi o ko makou manao ponoi, no ke kanikau o ua lani aloha hiwalua ia nei, o Kalanikualiholihoikekapu. LUNA HOOPONOPONO.]
HE KANIKAU NO KAMEHAMEHA IV!
Kuu kane mai ka ua Nahua
Mai ka ua Lielehua i ke kula, I ke kula no ia ua o Kekaa;
Hookaawale mai nei oe ia'u,
Haalele mai nei oe i ka pili a kaua;
Ke aloha nei--au ia oe--a.
O oe ke hoa o ka ua o ka la,
O ke anu me ke koekoe,
A kaua e holoholo ai i uka i kai,
O ia uka anu o Nuuanu,
Anuanu huihui ke aloha o kuu kane,
Me he wai kuhenuhe la i kuu manawa,
Ke aloha nei--au ia oe--a.
Aloha ke kane o ka wa heu ole,
Mai na wa kamalii a loaa he keiki;
Lilo aku la olua i ke ala muku maawe ula a Kanaloa,
Loa ka imi ana ke au ana a ka maka e ike,
A oe ike ua nalo loa.
Ua hala'ku la aia i Pelehuna,
Ke aloha nei--au ia oe--a.
NA EMALANI.
Kuu kaukunane mai ka ua Kukalahale,
Mai ka ua puanaiea hohoiea i ke kula,
I ke kula no ia ua o Makauna;
Ua huna no au i ke aloha iloko,
O kuu waimaka nae ke hanini nei,
Ke aloha nei--au ia oe--a.
O oe o kuu mua kaikunane ke aloha,
I oili lelelani aku nei ka hele ana,
E Kalani hoi a Kamakuhina;
He kuhihia au he lihaliha i ke aloha,
Ua piha ae nei ahu i waho,
Ke aloha nei--au ia oe--a.
Aloha ka hoa o ka haiki pilikia,
Mai loko o ka hale pupuu hookahi,
Hookahi au o Kaulanaikipokii;
He pokii au he muli hope,
No'u mua kaikunane i hala aku nei,
Ke aloha nei--au ia oe--a.
NA V. KAMAMALU.
Kuu kaikaina mai ka ua Haao,
Mai ka ua lei Kamakahala i ke kula,
I ke kula no ia ua o Luakaha i Mal@ilua,
Elua maua e noho nei,
O ko kakou kaikuaana kaikaina ke kolu,
Ke aloha nei--au ia oe--a.
O oe no ka maka e kau mai nei;
Ke halialia mai nei me ke aloha,
E Kalani e Kamoopuuleiohua oe,
O oe ka'u aloha e noho nei;
O kuu kaikaina ua hele loa,
Ua nalo na maka.
Ke aloha nei--au ia oe--a.
Aloha ka hoa o ka aina pilikia pilikalahale,
E aalo ai i ka uluoa kanaka,
E pilikia ai ke ala ke hele ia,
Hele oe waiho iho i ke aloha,
Me kana ukana nui o ka waimaka,
Ke aloha nei--au ia oe--a.
NA L. K. KAMEHAMEHA V.
Kuu kaikuaana mai ka ua Lililehua,
Mai ka ua heekokoula i ke kula,
I ke kula no ia ua o Napili,
Pili mai nei ke aloha me ka minamina,
O kuu kino kai luhi i ke aloha,
Ke aloha nei--au ia oe--a.
O oe ka hoa o ka moku lewa i ke keai,
Mai na ale hulilua i ka makani,
A kakou e hele ai me ka lei o ke keiki,
He keiki ke aloha e hana nei iloko,
E wehe ana i kahihi paa a ke kanaka,
Ke aloha nei--au ia oe--a.
Aloha ka hoa o ka ua Makaupili,
Ke kahiko mai la i ke kula,
Kuu hoa nana o na hono Piilani,
I hoolanilani no hoi au ia olua,
O ka hele ana ka hewa haalele ia makou,
Ke aloha nei--au ia oe--a.
NA W.C. LUNALILO.
Kuu kaikunane mai ka ua kualau ma ka mo-
E hehi kapalili ana i ka ili o ke kai. [ana,
I kai no ia ua o Kona i ka maka o ka opua,
Pua mai ana ko lohe kaumaha loko,
Mihi au o kuu haalele ana ia oe,
Ke aloha nei--au ia oe--a.
O oe ke hoa o ka aina kai paeaea,
Mai na lae makawale o Kapulau,
He kananakahi ia a ka poli o Kikau,
Kau hewa ko'u manao ia hai,
Haalele ino iho au ia oe,
Ke aloha nei--au ia oe--a. [Ehu,
Aloha kuu kaikunane mai ka lai malina a
Ke li@oa mai la e ke kehau a hinu ke kai,
Pohu lailua ke o Kona a Kamauai,
Aiaina i ke aloha kumakena,
Hemo ka lima paumako ia e noho nei,
Ke aloha nei--au ia oe--a.
NA. R. KEELIKOLANI.
Kuu keiki i ka ua Kihenelehua,
Mai ka ua kaheelehua i ka uka,
I ka uka no ia ua o Lanihuli e,
E huli e hoi mai la e kuu lei,
E kuu pua lei aloha a maua me kuu kane,
Ke aloha nei--au ia oe--a.
O oe o kuu keiki leilei makani,
Ke hoihoia mai la e ke Kiowao,
E ka ua lei kahiko o Nuuanu e!
Oia kuu kane ka mea aloha,
O ka hoa luhi o ua keiki nei la,
Ke aloha nei--au ia oe--a.
He aloha ka nui ke kini o makou,
Ke keiki o ka wa i hala aku la,
Oia ka'u aloha a makou i noho ai,
He keiki he inoa kane he mau kane io no,
He hoa hoolaukanaka no ua wahi nei,
Ke aloha nei--au ia oe--a.
NA. H. K. KAPAKUHAILI.
Kuu keiki mai ka ua Waahia,
Mai ka ua popo kapa i ke kua,
I ke kula no ia o Mau@enaena,
Enaena ke aloha me he umuenaena la,
i ka hele o ka luhi o kuu kane aikane,
Ke aloha nei--au ia oe--a.
O oe o kuu kamalei aloha kekahi,
Ua hala aku la aia i Hiikua,
Ke hele la paha i ke ala a Kahewahewa,
Ua hewa iona ua hele malu,
Ua haalele iho nei i ke aupuni o lakou,
Ke aloha nei--au ia oe--a.
Aloha ka hoa o ka aina makani lauwili,
Me a'u wahine ahe lau makani,
Aia lakou a pau i Kuahea,
E hea mai oukou,
Eia mai ke keiki ke imi aku la ia oukou,
Ke aloha nei--au ia oe--a.
NA C. KANAINA.
Kuu keiki mai ka ua lei maka Anuenue,
Mai ka ua M@nanaoa i ke kula,
I ke kula no ia ua o Ku@a,
Kuikui mai nei ke aloha i ke kino a eha,
Hele awali opa loko i ka minamina,
Ke aloha nei--au ia oe--a.
O oe no ka'u i imi aku iloko o na lani awa-
I moe ai i ka Maunaloa, [ahahia,
I loaa ia'u i ka la pilikia,
Pilikia au mauna i kuu kino, i loaa mai ka
E haalele mai ana ka hoi oe, [mea hihiu,
Ke aloha nei--au ia oe--a.
Aloha ke hoa o ka aina kaipala Iliahi,
Kai Iliahi i ka i-a a ka Moae,
Me a'u kini wahine opua i ka lai,
Aia ma kapa kahakai o Hookahaia,
Ke kaha ana aku la no ia,
Aoli i ikeia ka hele ana'ku nei,
Ke aloha nei--au ia oe--a.
NA M. KEKUANAOA.
KANIKAU ALOHA
Nei nou e IOLANI,
E KA MAKA O IOULA.
Ke huli wale nei no ka wahine,
Ka hoa pili@ o ke kane,
Aoha kane, he haku no ka la o Kona,
He makua no kahi makua ole,
He hoikeike no kahi i ike ole ia,
HE alakai no ke kai loa e,
Loa wale hoi ka hele ana e Kalani,
Halulu aku la i Nuumehalani,
Nakolokolo aku la i Hanakewa,
I ka hele a ka uhane Alii,
O Hikikaualiakamalama,
Hiki Makalii Kaelo ia Kaulua,
Alua a'u mau Lani i hala aku nei,
O Kalani makua, o Ka Haku o Hawaii,
Minamina ino.
Minamina ino oe e Welehulani,
Ka maka o Haulili, ka maka o ke Kolea,
Kani haalilo ka Lani ka manu Alii,
Ka ua kahi io nei i kuahiwi o Kona,
I Kapeku i Koolau o Kuihewa;
I ke au o Laapuni, o Ahukini,
No Ahukini ke one hauli Alii.
Eia ke hopu makawalu ia nei,
Ke miha ia nei e Kalani mae--eia.
Eia ka momokuahi anapa lani,
Ke kukuni la i Kauai o Kawelo.
E welo Wailuanui e hoano--e,
Aloha, aloha, a he aloha nui.
Nui ka ia hahi manawa o ke aloha,
Ka ia kuia pa ili honi kanaka,
Pa i ka ili walea no ia ia laka,
Me he kahu no la ka walea ana,
Kona ane maumaua no ia o kona kai kohu,
E kohu ai ka moe,
Nana aku ana ia pii,
Ua oki na ia pii mai i ka moe--a,
O ka moe anei keia e Kalani la?
Oia no--a.
Kuu kane mai ka uka o Haiakamalama,
Ke malama nei no au i ko aloha,
E kui ana au a lawa i lei no'u,
I hoa moe no ka poe kane ole,
Auwe kuu kane haku--a.
Kuu hoa alo ua Waahila,
Kip@ hau anu o Maunakilohana,
Ulu nahele paoa i ke ala,
Ala au hoolona ia oe,
O oe o ke Kamalei aloha a kaua,
Auwe kuu kane haku--a.
Kuu kane mai ka hale malumalu a ke koa,
Kipeapea i ka lau o ke kukui,
I hala ka pakaua o ka Hooilo,
Hoomehana aku i ke kapa a ke aha,
Auwe kuu kane haku--a.
Kuu hoa hoolono leo kahuli,
Ke hai mai nei ka pololei ia'u,
Aia kuu kane i ka maka o ka Opua,
E kilohi ana i luna o Hanakewa--la,
Auwe kuu kane haku--a.
Kuu kane nana ohu kolo i na pali
I hehia e ka ua a wali ka maka o ka lehua,
Wali pu no me ke kino i ka manao,
Owau no ka hoi ka ke aloha e apa nei--a,
Auwe kuu kane haku--a.
Kuu hoa mai ke awalau o Puuloa,
Hoa nana Ohai o ke Kaha,
E maalo ana ke aka me he kanaka la,
Keokai makani a ka Malua,
Elua a'u mau Lani e u nei,
Auwe kuu kane haku--a.
Kuu kane mai ka malu o ka wiliwili,
Mai ke kula la o Peekaua,
Ka ke aho i ka malu o ka Inia,
Hoomaha aku i ke ahe Kaieulu o Lalo,
Auwe kuu kane haku--a.
Kuu hoa lehua i Halalii,
Ke ahai'na la e ka Unulau,
Uluku mai nei Kaula i kuu manao,
I kahi a maua i hele ai me kuu kane--la,
Auwe kuu kane haku--a.
Kuu kane au kai o ka moana,
E nana ana i ka hono o na moku,
Na kuahiwi haliuliu i ka lai,
E waha mai ana ke kua kekahi mauna--la,
Auwe kuu kane haku--a.
Kuu hoa mai ka piina ikiiki e Aalaloloa,
E wawe ana i hala ka loa o Pohakuloa,
Hoomaha aku i ke ahe a ka makani,
Ike aku i ke one kuakii o ke Kaha--la,
Auwe kuu kane haku--a.
Kuu kane mai ka malu Kuawa o Wailuku,
Mai ka ia uwahi nui o ka aina,
Aina kuahiwi lua i ka malie,
A malie ohi ka ia ka kehau o Kula--la,
Auwe kuu kane haku--a.
Kuu hoa mai ke kai hawanawana o Kawaihae,
E wawalo ana i ke oho o ka niu,
Alo aku maua i ke anu o Uli,
I ka ua Peepakaieulu o Waimea--la,
Auwe kuu kane haku--a.
NA LILIA K. DOMINIS i haku.
HALE KUAI HOU.--Ma keia la, ua wehe ae o Bartow a me Stillman, i ko laua hale kau mea ai, ma ke kihi komohana o ko Daimana ma hale kuai, ma ke alanui Alii. A ke noho makaukau nei laua me na kanaka Hawaii a pau e oluolu ana e hele me laua e kuai ai. Ua kamaaina no ia kakou o Mika Pako, he kamaaina kahiko loa ia no Honolulu nei a me Lahaina, a no ia mea, ke lana nei ko makou manao e hele nui ana na poe kuai mea ai me Mika Pako e kuai ai. Aka, ua ahona no ko oukou kipa kino ana'e ilaila, i pau ai ko oukou kuhihewa.
NA MEA HOU
MA KA MOKU
"SMRYNIOTE!"
Eia iho mahope nei ka wehewehe ana o na mea hou a pau i hiki mai ma ka moku Smryniote, Kapena Burditt, penei no ia. Ma Amerika Huipia, me he mea la e ku malie ana na puali koa a pau o ke Aupuni, no ka nui o ke anu, a me ka ino o ka hooilo, a o kahi wale no i pa-pa wahi kaua mai nei, aia no ma Nokevili, (Knoxville,) iloko o ka mokuaina o Tenesi. O Generala Grant, Meade, a me Gilmore, ua @ haele nui mai ko lakou puali aku, he mea no ia e hoike mai ana, aohe manao e kaua koke iho iloko o keia mau la.
Ma ka aoao hoi o na kipi, ua oleloia ke hoomakaukau nei lakou no ke kaua nui aku ia Tenesi, a me Tenetuke, me ka manao paa e hoi hou mai ko lakou mau apana aina i lilo aku i ka poe o ka aoao Aupuni, iloko o ia mau mokuaina; aka, ina aole e pio hou o Katanuge ia la-kou, alaila, o kahi pomaikai wale no i na kipi, o ke kimopo, me ka hoolele aku i ka oili o ka poe koa Aupuni e noho nei ma ia mau wahi.
O Gen. Morgan, (Mogana,) ka mea i hoopioia mamua e na koa Aupuni ma Ohio, ua holo malu mailoko aku o ka Halepuuhao i paa'i, a ua hiki hou mai ma Rikemonn, a ua hoonohoia he Luna Koa Nui maluna o ka puali kaua lio, he 5,00 ka nua a e hele ana e kimopo ia Kenetuke. E nui ana no paha ka poina e hanaia aku ia wahi, no ka mea, o ka puali kaua lio, no kona hikiwawe a me ka mama loa, nolaila, ua hiki ole ke hoomakaukauia na mea e hiki ai ke pale aku i na poino mai ia poe mai.
Ua ike iho makou i ka hapaiia ina o ka manao e koho hou ia a o Aberahama Linekona, I peresidena no Amerika Huipaia, a e waihoia mai ana no paha kona inoa no ia mea, a ina pela, alaila, e komo hou ana no ia. O ka hoololi ana i ka Peresidena iloko o keia wa, nole e nele ke komohia mai e ka poino iloko o ia hana ana.
He ano nui na mea hou o Europa mai nei, a o na mea e pili ana i ke kumu hoopaapaa e waiho nei iwaena o Denemaka, a me Geremania, ua hoohalehale loa ke ao nauli o ko lakou noho kueana, a o ka hoopii loa ia ana mai nei o ke uku o ke dala a na poe mea dala o Enelani, a me Farani, he hoike kupono no ia nana e hooia mai i ke oki koke ole ana o keia kaua o kaua mai.
NA MEA HOU LOA MAI
O ke ku ana mai o ke Kometa, i ka Poaha iho nei o ka pule i hala, he mea no i manao mua ole ia. O na mea hou ma ona mai nei, he 15 la mahope o na mea mua i lohea mai nei e kakou, a ua pakela loa kona holo mamua o ka moku A. A. Eldrige, he 24 hora kona holo ana mai mamua, a he hope mai ke Kometa; aka, ua ku e kela ianei, a i ka Poaono mai ke ku ana mai o ka moku nona ka inoa i haiiae la malua. A o na mea ou ma ona inai nei, ua hookau iho i ka helehelena ano e loa ma ne mea e pili ana i ke kahuakaua ma Amesika Huipunia, a ua hoike mai no hoi i ka hoomaka ana o na puali kaua a pau, no ke kaua ana, a ua manaoia e holo ana ke kaua ana ma na wahi a pau e nohoia nei a na poe koa.
Ke hele nei o Gen. Sherman me nakoa he 30,000 i Mobile, a o ka lohe hope mai nei, ua hiki ae oia i kahi i kapaia o Meridian; he wahi ia i kokoke loa i ka palena mokuaina o Misisipi, a me Alabama, mai Vikibuga mai kona hele ana mai.
O Generala Polk, a me kona mau koa kipi, ke emi hope nei mai mua mai ona. A no ka mea hoi, o Adimerala Farragut ka mea ia ia na moku kaua malaila, e hana hui ana me Gen. Sherman, nolaila, aole paha e loihi ka wa e hala, a e lohe no kakou i ka hoouka kaua ana malaila. O na mea hope loa i loheia mai ka puali a Gen. Shermana, mai na kipi mai no ia, e hiki ana i ka la 10 o Feb. iho nei, e hoike mai ana, he kaua kai hooukaia mawaena o Sherman a me Polk ma kahi i kapaia o Enterprise, he 10 mile o ia wahi, ma ka hema aku o Meridian. A ua hoopoinoia no hoi kekahi alahaku nui e hiki ai ke holo i Mobile, e na koa o Gen. Sherman, a ma ia mea, ua hiki ole i ko Polk mau koa ke holo hope aku i Mobile. Ma ka nana ana i na mea a pau, me he mea la e pumehana ana na mea e hanaia mai ma ia wahi, a aohe no hoi i kumu ole ke kau o ka weli o ka noho ana o nakanaka o ia wahi, e like me ka mea i hoike hope loa ia mai nei e nua hou make Telegrapu.
Ma ka la 12 o Feb., hiki ae ke kauoha i o Gen. Grant la, a me kona puali he 80,000, e hele aku i ka Hema, a o kahi a lakou e hele nei, o Atalumata, ka mokuaina o Georgia, ke keena poo hoi o na koa kipi, malalo o Generala Johnson. O kekahi mahele o ko Gen. Grant puali, malalo o Gen. Logan, ua hele ae la mamawaena kona o Alubama, i hiki ai ke komo noao iloko o Atalanta, a i ole ia, e hele e komo e kokua i na kon aupuni ma Mobile, e like me ka mea i makemakakeia.
I mea paha e kaua aku ai ka wa hookahi, nolaiala, ua ike iho makou, ua hoounaia he mau aumoku kaua a me na puali koa aina, mai Hilten Head Karolina Heme, e hele aku e kaua ia Savana. O keia mau hoomakaukau kaua e hoomakaukauia mai nei, me he mea la hookai no ano nui; oia hoi, e kaua ana na puali a pau ma na wahi a pau i ka wa hookahi; a ma ia hana ana e hiki ole ai i na koa kipi o kekahi wahi, ke hele aku e kokua i kekahi wahi. Ina he oiaio na nu hou i hiki mai nei, alaila, e hiki no ka hilinaiia, ua hoohamamaia na ipuka o ka wa kaua o ke kau.
O na nu hou i hiki mai nei, e pili ana i ka moku powa Alabama, a makou i hoike mua'ku ai i ka pule i hala aku nei, a makou hoi e hoike nui aku nei i eia pule, ua hooia mai no ia i na mea a kakou i lohe mai ai, no kona manao e hele i ke kai o kina, e ulu-pa ai i na moku kalepa o laila.
Ma ka la 2 iho nei o Ianuari, ua hiki ae oia i Amoy e kapili ai i kona mau wahi i nahaha, a e hooponopono hou ai no hoi i kona mau wahi hemahema a pau. A aia no hoi iloko oia awa ka mokumahu kaua Wyoming o ke Aupuni, a aole no paha e nele ana o ko laua kaua, mamua o ko laua holo hou ana'ku. Ua holo ae ka moku kaua Jamestown mai Kanagawa a i Amoy, a e hiki ae ana ilaila iloko o Ianuari, a mamua paha o ko ka Alabama inakaukau ana e holo aku.
O na mea hope loa i lohea mai Europa mai, ua hoike mai, aia ka Alabama i kahi i kapaia o Rangoon, ma ka la 5 iho nei o Ianuari. Aka, he kuhilewa loa keia, no ka mea, he awa kumoku o Rangoon no Burmah, he 1500 mile mai Amoy aku. Malia paha ilaila oia i ka "la 5 o Dekemaba," a o ke kumu o ke kuhihewaia o ka la, no ka hoouna ana'ku i ka lono a puni ka honoua. O Amoy, he awa kumoku ia no Kina, ma ke alo aku o ka mokupuni o Formosa, he 200 mile ma ka akau ae o Hona Kona, (Hong Kong) a he 800 mile ohi, ma ka hema komohana o Kanagawa, Japan.
Ua kupono ke mahalo nui ia ka hana ana a ke Kapena o ka mokukaua Jamestown, ma kona huki koke ana i kona heleoma a holo aku i Amoy, i kona wa i loha ai nia ilaila ka Alabama, oiai hoi e pa ana he makani ikaika, a ua hoonupanupaia hoi na ale o ka moana, a nani wale hoi ina ua hiki ae oia, i kokua ai i ka Wyoming, ikoko o liona mokomoko ana me ka kamaeu hiwahiwa o ka Hema. Akahi paha nuanei a loaa ka manawa pono e kaua kaulikeia'i ua kamaeu la. Heaha la ka hewa ina e kaua ia iloko o ke awa maluhia ma na kanawai ku i na Aupuni ku i ka wa? No ka mea, pela no o Beritania i hana'i iloko o ke au kaua o ka M. H. 1812. Ua kii maoli no na moku Beritania a kaua aku i ka moku Amerika Essex, malalo o Com. Porter, iloko o ke awa maluhia ku i ka wa o Valaparaiso. A i ka wa i pau ai o ke kaua ana, he mau wahi palapala wale no kaihoounaia i waena o Enelani a me ke Aupuni i komo wale ia, a o ka hoopau wale ia no ia o ia hihia; o ahaina o hoi ina e hana mai pela na Kapena o na moku Amerika ma ke'awa o Amoy?
Penei iho ke ano o ka haiia ana'e o na mea e pili ana i ka Alabama. Ua kekauia keia palapala mahope iho'nei, e kekahi mau haole kalepa e noho ana ma Iapana, a penei ua leta la:
"KANAGAWA, Ianuari 7, 1864. Messrs. Macondray & Co.
Aloha Oukou : - Ua loan ia makou ke kumu e hiki ai, no ka lohi ana iho nei o ka moku Ada D. Rogers no ka pohu, e haawiaku ia oukou i ka nu maikai, oia hoi aia ka moku powa Alabama i ka uapo i Amoy, Kina. A o ka Wyoming, Kapena McDougall, ke kiai ei ia ia. A kemanaolana nei makou ua hiki mai ka hopena o kana mau hana. A ua hiki ae la paha ilaila ke Jamestown, mamua o keia manawa, Ma ka moku Morey Copen, ka hiki ana mai nei, o keia nu, a he oiaio no.
Ka oukou
Me ka oiaio,
WALSH, HULL & Co."
O na oleloa maluna ae nei, ua hooiaioia mai e ke Kapena o ka mokua Ada D. Rogers, ua hai mai oia, ua halawai ka mokumahu Po-Kien, me ka moku kaua Wyoming, manawaho iho o ke awa o Amoy, ma ka la 2 o Ianuari, a ua hai mai o Kapena Mcdougall, aia ku Alabama iloko o ua awa la kahi i ku ai, e hoopili ana i ka uapo. Ua haalele iho ka moku kaua Jamestown IA Kanagawa, ma ka la 26 o Dekemaba, a ua oleloia ilaila, ua holo aku oia i Amoy.
He eono pu olona o ka moku kaua Wyoming, a he elua mau pu nui kauia iluna o kekahi huila ano pokakaa. O ke Jamestown, he moku kaua kiakolu pea no ia o ke ano kalaiko. Ina oia e kuae i ka wa kupuno, alaila, me he mea la e maopopo ana ke pio o Kapena Semines a me ka Alabama. Aohe kekahi Aliikaua i haawiia ku wu kupono e hookaulana ai ia ia iho, e like me Kapena McDougall. Ina no oia e hopu ia Kapena Semmes, iloko o ka uapo ma Amoy, aohe no he mea nana e kua mai, hookai wale no o ka Moi o Kina. A ua lilo nui loa kona manao ma na mea o ka lani, e manao ae ai la no ia wahi mea uuku o ka hopu ana i ka powa, ina paha ma ia hana ana la, e hoopaewa a e uhaki loaia'i na mea e pili ana i na Kanawai pili Aupuni.
Ina paha e lawa mai o Kap. McDougall i Kapalakiko, ia Semmes, me ka hoopaa ia i ka hao, oiai mae ua hookau mua ia ka hao iluna ona ilojo o na palena o Kina, aole no he pilikiea nui e uluhia maiana noloko o ia, hana ana. E aho e hoomanao oia ka moku Hatteras, alaila, aole he wahi pehihihi o kana mea e hana aku ai. "E ka moke e!" (Ship ahoy) wahi a ke kahea ana'ku a ke Kapena o ka moku Hatteras. E pane ia mai ana (e ua Semmes nei no.) O ka moku o ka Moiwahine o Spilfire, (ke kuha ahi,) a ia wa koke no hoouna ia mai he poka, a poho iho la ka moku aupuni. O ua o Semmes nei no ka mea nana i hana i keia mea ino nui. Ua lawe o Kapena McDougall i ka mana iluna ona iho, i ka wa i kipu ia mai ai ka moku Pembroke, e Satsuma, iliko o na kai o lapana. A ke manaolanaia nei hoi e hana'ku oia pela i keia mea. Alta.
Ke Kulana o ka Alabama.
O ke awa o Amoy, he wahi uuko no, aku he hohonu nae, a he maluhi no hoi. Aia ma kela aoao mai o ka mokupuni o Formosa. O ka uapo e kapiliia nei ka Alabama, he pohaku, a ua hanaia e kekahi poe kalepa Pake. Aia ma ke kihi komohana o ka mokupuni o Amoy, malaila hoi i ku ui ke kulanakauhale i kapaia ma ia inoa, mamuu ponoi mai o kahi mokupuni uuku o Ku Lang Su.
He ekolu alanui e hiki ai ke komo mai wahi mai o ke awa, a kahi o ku uapo a ka Alabama e pili nei- hookahi mawaena o Amoy a me "Poina maoli, a he papau wale no nua kahi e pili ana i ka aina maoli, a he ane hiki ole ke holo, a he kupono wale no i ka poe pailaka pake; a o na wahi e ae elua, he hiki pono no ke hookeleia e na mokunui. Oia mau kowa, hookahi e holo ana ma ka hema o Ku Lang Su, a kookahi hoi e holo ana mawaena o Amoy a me Ku Lang Su.
I ka manao o ke Kapena (o ka Ada. D. Rogers,) aole e kai ana na mokukaua elua o ke Aupuni, me ka manao e paa wale aku no i ke awa; aka, e komo maoli ana no laua e kaua aku i ka moku powa, oiai oia e waiho hemahema ana; no ka mea, ina aole ona hemahema, alaila, e pakela ana no kela maluna o ka moku pea Jamestown, oiai hoi, hookahi wale kowa e hiki ai i ka Wyoming, ke pani, a ke kiai no hoi.
E holo mai ana ka moku kiakolu Bringham Young, a me ke kialua Glencoe mai Kanagawa ae a Kapalakiko, iloko o na pule elua mahope iho o ka holo ana mai o ka moku Ada. D. Roger, a e hiki koke mai ana peha na mea hou e ili ana i ka Alabama, iloko o keia ku ana mai a ka Yankee; no ka mea, he llohea mau ia mai no mai Amoy a i Iapana, a me Kina, oiai he kipa mau mai no na moku o ia wahi i Amoy.
Aole he mau pakaua ma Amoy, no laila, ina no paha e makemake ke Aupuni Kina ke keakea i ka kaua ana iloko o ia wahi, aole no e hiki ia ia ke keakea mai. Aka, ua manaoia ana, aia ao ae manao a pau o na Luna Aupuni o Kina mamuli o ke kue i ua poe powa la, a me ko lakou mokumahu pu boi, (Alabama).
Ka Palapala Kaena a Semmens
Mamua'ku o ko ka moku Ada. D. Rogers haalele ana ia Kanagawa Iepana. Ua hoikeia mai i kona Kapena ka hiki ana'e o kekahi leta a Kap. Semmens, i ka Kapena o ka mokukaua Jamestown, ma loko o ka Eke leta. O ke ano ana o Eke leta la, e bai ae ana o Semmes i ua Kapena la o ka moku Aupuni, i kona wa ka i hoopio ai i ka moku kahope Camleres. a mamua hoi o kona puhi ana i ua mokula i ke ahi, ua loaa ia ia iloko o keena o ke Kapena he mau ukana mea mea walea aku na wa Kapena nei o ka aioku Aupuni, i kona mau makemake ma NuIoka; a ua malama maikai oia ia mau inea, a nana no e haawi kipo aka i ka poe i hoouneia'ku ai, i kona wa e hoku kina aku ai me kona moku (a mana moku paha,) a hiki i Nu loka. O ka wai lua aku lai ia O Maui HIkina.
No Europa.
O na mea hou o Europa mai nei, ua nui no mea e hoolele mai ai i ko kakou oili. No ka mea, e like no me ka makou i hai mua'ku ai i ka pule i hala'e nei, ua lohea ka leo o na pu, a ua hookui aku a hookui mai kela i keia, ua hoolu@ ke kaua ma Europa, a ke hoomaka mai nei ke kai makakoholua o kona palaha ana ae. Ua homakaia keia kaua, ma ka hooukakaua ana eono hora, ma ka la 3 iho nei o Ianuari, o na puali koa Denemaka, me na koa Geremania.---Perusia, ma kahi i kapaia o Misunadi, (Mi@) a ua hooemi hope ia'ku na Geremania, he 200 ka poe Dena i make, a he 300 a keu loa ae ko na Perusia; aka, o na poe Perusia ka poe hoouka aku, a o ke pale wale aku no ka na poe Dean, ua like me he la he poe kanaka e kii mai ana e pepehi i ke kanaka e noho ana iloko o ka hale; aka, ua paa nae ka puka i ke ki ia. Ua hemo ae nei ka puka, a o ke komo mai no hoi koe o Enelani, a me Farani, a ina pela, alaila, o ka lele liilii mai no ia o ke ahi o kapuahi ma Europa a puni.
I na Opuu o ka Lahui.
E ka NUPEPA KUOKOA E; Aloha oe;-- Ina he mea hiki ia oe me ke koena ole, ke hookomo iho i keia mau wahi mamala olelo e kau aheahe ae la maluna, nona ke poo i ka kauia "I na Opuu o ka Lahui," oia hoi na keikikane opiopio aka o ka Lahui Hawaii, i ka manao o keia hoa opiopio o lakou, e kau leo aku nei, e aloha i ka Lahui.
Ma ko'u nana ana, ame ke kiei ana aku, a makaikai i na manao o ka poe kukulu manao, e kuu pau mai ana i na kumu nui i emi ai keia Lahuikanaka; nolaila, ke kumu o ko'u kau leo ana aku, e aloha i ko kakou Lahui, no ka mea, he mau makahiki mamua aku nei, ua hai ae kekahi haole, aole e hala he 20 makahiki, e pau no keia Lahui, a i ka nana ana iho, ke emi nei keia Lahui, a ke nui mai nei na Lahui o na aina e mai, ea! no keaha ke kumu o keia emi ana! Aole ane no na kumu i hoakakaia ma ka Buke II o ke Kilohana i hala ae nei, a ka A.D. 1863 i mo@ aku la, i ka nana @, oia no. Ma keia kukulu manao ana, ua loaa he wahi ninau a kakou e noonoo ai, eia no, "He poe aloha anei kakou i ko kakou Lahui?"
Mahea la e akaka ai ke aloha o keia Lahui i kona Lahui iho? Ma ke kuu lala ana anei o na Opio o ka Lahui io, a ina anei e hooko ana i na iini o ko lakou naau ma na lealea o ko lakou kino iho, me ka nana ole i ka hope o ka lakou mea i hana'i? I ka nana aku, aole e akaka malaila ke aloha; eia ka mea e akaka ai, he mau mea ia e emi ai keia Lahui, a he hope poino hoi; pela ka ikena iho, nolaila, ninau mai paha auanei kekahi o oukou me ka i ana, "Auhea ko aloha?" wahi a ka mea e ninau mai ana. Eia, o ka hoolilo ana o na keiki opiopio @ ame na kaikamahine opiopio o keia Lahui i poe noho malie; e hoopiha ana i ka lakou manawa, e hooikaika ana i ka imi ana i ka naauao, ame ka loaa o ka @ pono ia lakou e malama ana i ko lakou kino, ame ko lakou Uhane; e @ ana i kona @ iho a e makau ana i ka @ Mana Loa. Alaila, o ka Opuu i loaa ia ia keia mau mea i haiia ae la maluna, oia kai olelo ia, ua @ i kona Lahuikanaka, ame na mea e pomaikai ai keia Lahui. Me ke aloha i ka Luna Hooponopono. H. D. Kauwa.
Waipu@, Wai, Maui, Feb 19, @
E hoolaa ana ka Moku @ o Honolulu i kekahi poe ma ka halepule (Catherdreal,) @ ka hapalua o ka hora eiwa o ka la apopo, (La Sabati.)