Ka Nupepa Kuokoa, Volume III, Number 11, 12 March 1864 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE III.  HELU II.  HONOLULU, MARAKI 12, 1864.  NA HELUA PAU 120.

 

He mele puali inu wai no Panau.

 

He mele puali inu wai,

No na wahine me na kane,

Inanea i ka malu o ka ohia,

I ka olu o ka wai o ka Pohai,

O ka wai lipolipo noho i ka malu,

I ka ulu wehiwehi o ka nahele,

Alo aku makao o ka ua noe,

O ka ua awawa o ka mauna,

O ka leo o ka manu ka mea aloha,

I ke kani hone mai i ka laau,

Iiwi kani oe holu ka nahele,

He mapu leo lea i ke awakea,

Mahea kakou e naue ai ?

Ma ke one huli lua o Kalapana,

I ike i ka nani o Huiapa,

I ka holo kainapu o na lio,

I ka lawe kowehe a ka pau.

He mele puali inu wai,

No na keiki o Mikekini,

Hao makou la maloeloe,

Lai ai ka ihona e Kahuaiki,

A hiki wale aku i Panau,

Nana i ka lai o Paliuli,

Kawaha na pali o Pulama,

Auau i ka wai o Punaluu,

Hele aku makou o ke kula loa,

A wela i ka la e kaunaloa,

Huli aku nana ia Kalapana,

Alo ana Koimu i ka iuiu,

Iuiu makou ka ikena aku,

I ko makou lohe ana ae,

I ka nu hou makai nei,

Huli ae makou a ike pono,

Aloha nui oe T. Coana,

Ka makua hai ola o ka lehulehu,

pili no kau hana ma ka Baibala,

Olelo maikai a ke Akua,

I haawi ia mai ia makou,

Ua pau keia me ke aloha,

Ke huli hoi nei na keiki,

O ka uka iuiu la e ka Lehu,

Ua pau keia me ka mahalo,

            Maria Kawa.

 

Pane aku ia S. Iwiula.

 

            E ka Nupepa Kuokoa e ; Aloha oe :—Ua kaleleia iluna o makou na manao o S. Iwiula, me na kui e umii uwalu ana i ko makou mau aoao, ekeeke makou a kapalili, me ka liuliu no e pale ae ia makou iho, mai kekahi o na manao a ua S. Iwiula la i kapeku ae nei, ana i hoolelo ae nei ma ke kahua mokomoko o ka Buke III, Helu 7, nona ke poo i kauia " Hoike Kula ma Kohala."

            Wahi ana, " ua ike lea ia ma ka hoike ana o ke Kahukula i na kula, ma ka la 8 a me ka 9 o Dek., 1863.  A ua ike ia ka hemahema o na haumana ma na mea hoonaauao, oia ka Helu, Palapala Aina, a o ke oki loa hoi ma ke kakaulima ana."  A ma io pela, he oiaio ua mau mea la a S. Iwiula e kaena nei, alaila, heaha la ka mea i hoopau ole ia'i o na Kumu hana pono ole, e like me ka oukou i ike ae nei ma kana mau olelo palau ?  Eia no : no ka oiaio ole wale no o na mea ana i kapeku ae nei.

            Eia ka ninau. Owai la keia makua me keiki o Kumuleiwi i kapaia o S. Iwiula ?  Owai la ?  He kamaaina makou no ua wahi la, a nolaila ka ninau aku. Owai la ia ?  O oe no anei e J. B. K. i huna'e nei maloko o ka inoa S. I. ?  Auwene ! hewa aela ka hoi ka waha, eia ka ka pono o S. Iwiula, i ake ae nei e lilo i Kumuao no Niulii, a no kekahi kula e ae o keia apana ; aka, aole nae oe i hiki i ka pane poo o kau wahi i makemake ai.  A no ke aha ka hiki ole ana ilaila ?  No ke aha hoi !  Auwene ka hoi e !  Palau ka hoi ka hewa o ko makou mau waha.

            Eia hou iho :  " He mea pono paha i na makua, na kahu, na Luna Kula, a me na Kumu o keia apana, ke noonoo i na kumu i hemahema loa ai o na keiki a kakou."  Pane aku " Ae."  Ua noonoo ae nei nae kekahi o na makua, a me na Kumu no keia manao paipai a ke hoa.  Ua loaa'e nei ka mea e pau ai o ia hemahema ; o ia ke kuene pono ae ia oe ma kahi hakahaka o na kula 7, (ole wale,) a kapae ae ia lakou 7, na Kumu ka poe ao hemahema, a me ka hoonaaupo i na keiki.

            E ke hoa e ! kunihi mai nei oe, me ka manao e hahau ia makou i ka mea e eha'i.  Aole nae hoi oe i ike, he nalo hope eha ia e ku ai o ko iwihilo.  E iala e !  " O ka mea wikiwiki o na wawae, aole hoi e nele ana ka okupe a hina iho."  Pela no oe ; auwe a holo ae nei oe i o, i o lakou la, a e laa la, ku oe ia Manaiakalani ke lolo-u la.

            A mai noho a ninau iho, nawai la hoi au i hou mai nei ?  Haina.  Na ke anu paha.  E hamau no makou a nou hou mai oia i ka mea e eha ai, e kaiehu aku no makou, oiai ua kahela ka nalu mai Maliu a Lilei.  Me ka mahalo.  S. K. Hauailiki.

            Kohala A., Hawaii, Feb. 24, 1864.

 

KE KAAO MOOLELO

—NO—

MARY STUART!

KA MOIWAHINE NANI O SEKOTIA.

HELU 1.

KE KAHUNA (PRIEST) O LINDOLES.

 

            O KE AWA SEKOTIA O NUBUGA, ua lilo no he wahi kulanakauhale nui i ka wa o ka kakou moolelo nei i hoomaka ai—oia hoi ka M. H. 1565.  Ua kokoke ia wahi i ka lae o ka muliwai nani, nona ka inoa o Tay (Te,) ma kekahi hoi o na auwai nana e hoohanini ana ka wai iloko o ka Moana Akau, a he awa kumoku maikai no hoi o Nubuga, a ua ane hiki no i na moku nui ke komo iloko.

            Iloko no o ia wa kahiko, ua nui no na moku i komo ilaila, a oia ke awa kumoku lulumi nuiia e na moku i oi ae mamua o na awa e ae o na awa ma ka palenakai hikina o Sekotia.

            O ka Halepule o Linadoa (Lindores,) kekahi mea i nani loa ai ia wahi ; no ka mea, iloko o ia manawa, e hoomaka mai ana ke kue iwaena o na poe Katolika oiaio, a me na hoolepope ; aka, aole nae i hiki mai ka manawa i hoikeia mai ai ka poino loa ana o ka mua, i ka hana ino me ka hooikaika ana a na poe hoolepope.

            Ma ke ano o na mea i hooakaka mua ia'e nei maluna, e hiki no ia kakou ke ike iho, he wahi waiho malie ole ia wahi ; aka, he wahi i piha i ke ano o na hana a pau ; aka, ma ke kakahiaka nae i hookumuia'i o keia moolelo, ua oi ae ka holo-ke o na kanaka mamua o ke ano mau o ka noho ana o ia wahi.

            O ka malama ia o lune, o ka makahiki i haiia maluna 1565, o waena konu ia o ke kau ; aka, ua puahiohio nae ka makani, a ua hoonioniia ke ana kau malie o ko ka moana waiho lai ana.

            O ke ao naulu panopano o na makani, ua auamoia'e ma na papalina o ka lani, a o ka makani hoi e pa mai ana ma ke kukulu akau, me ke anu i awili pu ia, a ua nee ae me ka puahiohio nui ma ke alo o ka muliwai o ke Tay.  Nana aku no hoi oe, uliuli a kiekie no hoi na nalu e haale mai ana mai ka moana Geremania mai.  A i ka hai ana mai a ua mau nalu nei i kaha one, poha ae ka halulu me he mau hekili la ; a no ia mea, oiai no hoi e hookaumaha mai ana na helehelena o na ao, me ka hookau iho o na ao o ka lani i ka helehelena kuemaka nui, pela no hoi ka honua e hoike ana ia ia iho ua ane e inaina loa.

            He lehulehu wale na kanaka i akoakoa ae ma na kapakahakai, e holo ana i o a ianei no hoi, me ka ohi mai i na mea i loaa ia lakou mai ke kai mai ; a o kekahi poe no hoi, ua komo maoli no iloko o ke kai, me ka huli i na mea a pau, e like me he kanaka la.

            O kekahi o na Kahunapule Katolika o ka Halepule (Abbey) o adores ilaila, me ka huipu me na kanaka o ua wahi kulanakauhale nei, e hoohoihoi ana ia lakou, a e ao mai ana no hoi.

            " Ua pono e kuu mau keiki !  Ua pono,"—pela ka olelo a ua kahuna nei.  " Ua pono ko oukou hooikaika ana e imi i ko oukou poe hoa, me ka aua hoi ia lakou mai ke kanuia ana iloko o ka luakupapau anuanu o ka moana, i loaa ai ia lakou ke kanuia me he mau Karistiano la iloko o ka lepo hemolele.  Aka, e ao oukou i ka oukou mau keiki," hoomaka ua kahuna nei e ao mai, " i ko oukou kiola ana i ko oukou ola : no ka mea, e hoomanao oukou, he nui wale ka poe e hilinai nei ia oukou no ko lakou ola, oia hoi ka oukou mau keiki, me ka oukou mau wahine, a aia mai a oukou aku ka berena o ko lakoa ola ana."

            "Me he mea la e ka Makua Hemolele," wahi a ka mea aa loa o ke aniana e ku ana.  " Ua hooholo iho na ia o ka moana, e hoolilo i ka poe a pau o luna o ka moku i ili mai ai i ka po nei i ai na lakou iho, oiai hoi ke paleia mai nei ka poe a pau e au aku ana, e ka ikaika o na nalu."

            E hoomanao nae ka poe a pau, i ke ahiahi iho i ili ai o ka moku, ua loaa hookahi kanaka noluna mai o ua moku nei i ili ai, he kane ui oia, a he keiki hiwahiwa no hoi a ka nani. Ua maule oia i kona wa i loaa ai ; a ua laweia'ku e ka poe ona i loaa'i a hiki i kekahi hale hookipa, a ua hoopumehanaia, a iwaenakonu o ua po nei, akahi no a pohala'e ua keiki nei.

            I kona pohala ana'e, haha koke iho la no kona lima ma kona umauma, a loaa no he wahi poki dala uuku e waiho ana no ma kana wahi i waiho ai ; me he mea la, he mea nui loa ia i kona manao ; no ka mea, apo koke aela ia a kaomi paa mai la ia mea ma kona umauma.

            Nune iho la na kamaaina o ka hale hookipa ana i moe ai, i ke kulana o ua keiki nei, no ka mea, o kona helehelena, ua maikai loa, a o kona aahu hoi, ua hanaia noloko mai o na lole hihiu loa.  O na manamana lima ua palupalu, a o kona mau wili lauoho ua hele a lupelupe apiipii maikai, ua puni loa no kona ano a pau i ka nani.

            I ke kakahiaka a kakou nei i hoomaka ai i keia moolelo, o ke ao ana'e ia o ka po o na keiki nei i hoihoiia'i a waiho i ka hale hookina i olelo mua ia'e nei.  Nolaila, i ko ke kahuna pule lohe ana hookahi mea i pakele mai luna mai o ka moku ili, nolaila, hele koke aku la oia i ka hale hookipa i kapaia o ke Queens Arms, kahi hoi o ua keiki nei i hiamoe ai.

            Maanei, e waiho kakou i ke kahuna, a e hoi hou kakou a kahi o ua kiki nei i waiho ai.  I ka wa kakahiaka nui, hoomakaukau iho la ka mea hale i na mea ai maikai loa na ua malihini nei, a i ka hapalua o ka hora elima o kakahiaka, ala'e la ua keiki nei a paina iho la.

            A mahope iho o ka pau ana o ka paina ana, laweia mai la kona kapa komo ponoi, ua kaulaiia a maloo, a komo iho la oia i kona kapa komo, a uku nui loa aku la ua keiki nei i na mea nona ka hale, no ko laua malama ana ia ia.  Aka, mahope iho o kona hookaa ana, ninau aku la oia i kahi e loaa'i ia ia ka lio kuai, a me ka pahikaua pu no hoi.  Hele pu aku la ka mea nona ka hale me ia a kahi o ka lio kuai, a me ka pahikaua pu hoi; kuai iho la no ua malihini nei me ka hoohalahala ole i ka uku i noiia mai no ua mau mea nei ana i makemake ai, a hele koke aku la ia me ka ninau ole aku i na kamaaina i ke alanui o kana wahi i manao nui ai e hele aku ; a aole no hoi na kamaaina i ninau mai, " e hele ana oe i hea ?"  A no ia mea, e hiki paha ia kakou ke manao wale ae, he kumu paha ko kona ninau ole ana, a i ole ia, he kamaaina mua no nona i ke alanui ana i manao aku ai e hele.

            O ka lio ana i kuai ai he lio maikai loa o ka helehelena ; aka, o ka like o ka maikai o ua lio nei ma ka holo, a me ka maikai, e ikea no ia ma keia hope aku.

            Nani launa ole ke kino o ua keiki nei i kona kau ana'e iluna o ka lio, e hoike mai ana no hoi ia i kona akamai launa ole i ka hololio.  He iwakaluakumamalima paha kona mau makahiki ia wa, a o ke ano o kona ili, ua like me ke ano Oliva ; me he mea la nae, aole o Sekotia kona one hanau, aka, me he la o ka Hema kona wahi paa o ka noho ana, oia hoi, no Roma mai paha, a i ole ia no Italia mai paha.

            He kino loihi kona, aohe i lilo loa i ka wiwi a nawaliwali la hoi, a aole no hoi i lilo loa i ka puipui, o mahie ole ai la ; aka, ua hoike mai kona helehelena i na mea a pau e pili ana i ke ano o na huaolelo ui a me ka hiehie, me ka awili pu iho no hoi o ka ikaika.  He mau maka aai eleele kona, a o na loina o kona helehelena, ua hoike mai no i kona maikai, ua uhiia hoi e na kuemaka eleele, a he mau umiumi no hoi kona i hele a aikamanu i ka lehua o Haili ; a o kona mau niho, me he la ua oki maoli ia ka hele a like, ua hele maoli no kona papalina a " ohaha i ka hau, i ka noe o ka mauna."  A o ke ano holookoa no o ua keiki nei mailuna a hala i lalo, he maikai maoli no, ke hele la a pau " ilaila no ono a kiakaunu."  Aohe no hoi he poe o ka aoao oolea i ike ia ia me ka mahalo ole, aiwaiwa loa aku hoi ka poe o ka aoao palupalu.

            I ka hiki ana'ku i ke kula, hoao keia i ka holo o ka lio ana i kuai ai ; aka, mahope iho o ka hala ana o kekahi mau hora, a nolowale mai la ke kulanakauhale o Nubuga, kahi ana i moe ai, aia hoi ike iho la ia i ka nawaliwali o ka lio ; no ka mea, olelo iho la ia iloko ona iho.

            " Heaha la hoi auanei ka hewa, ina no au e hiki i ka hopena o ka'u huakai maluna o keia holoholona, alaila, he maalahi maoli hoi ia.  Heaha la ka loihi o ka'u wahi e hele aku ai ?  Ma ke alanui hea la wau e hele ai ?  E ninau mua ia'ku nei no la hoi paha i ka hale hookipa a'u i moe ai.  Mai ninau mua no au, e ole no kuu hooholo mua ana e noho makaala loa mai, o haupu ia mai auanei ke ano o ka'u huakai e hele nei, a mai like io la paha pela, e ikeia mai nei ke ano o ka'u ukana e hii nei."  Papai iho la ia i kona umauma, kahi hoi i waiho ai o ua poki dala nei a kakou i ike mua iho nei.  Oiai oia e kamailio ana ia ia iho, aia hoi ike aku la oia i kekahi mea e hele ana imua loa.

            (Aole i pau.)

 

KE KILOHANA.

 

            E ka Nupepa Kuokoa e ; Aloha oe :—Ua hiki mai ka manawa a me ka pono e olelo.  Ua hiki ke hooiaio a hooko iho me ke kanalua ole ; oia hoi, ua paa loa ke kanawai hanau maluna o ke kanaka, e like me kona haawi hemolele ia mai—kona ano, ka pono o kona ola ana, kona pono lahuikanaka, a me kana olelo iho.  He mau pono nui loa keia o ke kanaka i haawiia mai nona, aole i hiki i ka hooakami wale o kekahi uhane ke hoololi wale ae i ka maikai a me ka hemolele o kona ano paa, ke ole e hanaia ka uhane olelo oloko i kana olelo iho, a i ke kino, e hoololi naauao ana i kona ano maoli.  Ua like no me ia ka pono paa loa o na pono pili paa, a i pakui kanawai ia malalo o ka hoohiki hemolele, i laweia a hooalii ia maluua o kekahi kanaka, a o ke aupuni, a o ka lahui okoa, i pono nona iho.  Ua hiki no nae ke weheia i kekahi manawa e like me ke kumu e wehe ai, ke kuikahi like, ka hemolele o na aoao nana i hoopaa.

            O na kanawai hoohaiki wai ona o ke aupuni e noho nei, oia paha ke kilohana pookela o ka lahui Hawaii.  Aole aupuni o ka honua i hookaokoa ia ia iho, e like me ka pae aina Hawaii, i lawe ia ia i pono pili paa hanau kupa nona.  Ua aoia ka uhane Hawaii oloko e ike pono i ka waiwai nui o ka hookae ana aku i na wai ona.  Ua ae mai na aupuni hanohano o ka honua i keia pono o ke aupuni Hawaii.  Aole o lakou kuleana e keakea wale mai i ko kakou pono, nolaila, ua hoomau ke aupuni i ka pono o kona hoohaiki ana iloko o kona aina iho.

            E nana, ua paa loa na kumu hooko hana lahuikanaka, a me na aupuni no ka hoomalu ana i ka pono o ko lakou papapale alii kuokoa iho.  O ka hui lokahi o kona mana ka mea e paa ai, penei e oleloia'i ka hoopaa ana o kona mana, " O ka hana ole i ka mea a ke kanawai i koi mai ai e hana, he hewa nui kona."  Ina o ka aina okoa a pau ka mea hana ole, ua kapaia, he aupuni ole, he hoomokuahana, no kona hooko ole i k@na mau olelo paa iho, a i na pono o kona mau kanawai ; o kona lilo i mea ole, oia kona hewa i oleloia.  Ina he alii ka mea hana pela, ua kapaia he kipi, no ke kue i ko lakou pono iho, ina he kanaka hookahi a keu, oi ole i ka palua, he karaima nui a me ka hoonele i kona pono ka hoopai.

            Ua pili pono ke hoahewa kanawai ia mai, a me ka haunele mokuahana kanawai ole, i ke aupuni hooko ole i kona hoohiki kanawai ana, no ka pono o kona poe kanaka, ua kupono ke hoopai, a ohi, a hoonele loa me ka ilikole i ke alii hana kipi.  Ua kupono ka hoopai io eleele hoomalu papale alii o ka Halepaahao, i ke kanaka hoohaunaele ino, kupono ka hoonele ana o ke Kumukanawai ia lakou, e noho ole ma ka Ahaolelo.  O ka hana ole a me ka hooko ole i na kanawai o ko lakou noho alii ana, oia ke kumu o ia mau hoopai ino weliweli nui loa.  Ua pili pono loa no hoi i ka lahuikanaka ola hanu, i ke alii kipi paha, a i ke kanaka hoohaunaele ino, a i ke kokua, i ka hoopoho a me ka alunu i ka waiwai o hai, ua kapaia he aupuni ino, he alii a he lahukanaka ahaolelo i ka hewa a me ka poino, no ka lolelua o ka naau a me ke kau kanawai pono ole.  No ka haiki a me ka hooko ole i kona mau kanawai, a i ka manao ole i kana olelo hoohiki nona iho, i hoolana hewa a puni o hai me ke poho, a i ke kokua ole i ka pono o kona aina iho, oia ke kumu pono no ka hoohewa kanawai ole ana pela.

            O keia manao no kekahi, makemake no e kokua i ka pono o ka mahiai Hawaii, o ka aina a me ko lakou kalepa ana, ke noonoo ia kona pono.  Ua makemake i ka hoopii pu me lakou, a i ke noi e wehe i na pilikia e keakea ai i kekahi o na mea mahiai Hawaii e noho nei, i mea e holo ai kana hana, pela no ka manao, ua like pu ia-me ke kokua i ka pono a me ka maikai o na kanawai hoohaiki wai ona o ke aupuni e noho nei.  Oia no kekahi mau pono o ka aina e waiho nei i manao nuiia ; aka, ua kapae aku kekahi pono i kekahi pono, no ke kumu no i aponoia ma ke akea.

            E nana paha i na kanawai hookapu wai ona, a i ka pomaikai a me ka pomaikai ole ia ia.  Ua nui loa ka waiwai loaa mai i ke aupuni, ke dala maoli, a me ka hanohano i ahu ia ma ka waihona maluhia o kela kanaka keia kanaka nona iho, mai ka wa o kona hooko ana a hiki i keia wa, i ko ka aina a me ke aupuni o ka Moi.  Aole nae komo na hoopai papale alii, ia mahalo ana no na hoohaiki wai ona, no ka mea, ua okoa kona ano a ua mau loa.  I ka nana pono ana i na mea i hanaia iloko o ka aina, ua pomaikai loa ka hana, a me ka maluhia o ke aupuni i kona waiwai.  Ua kokua nui oia e hoomama i ka auhau o na kanaka no ka maluhia, a ua wehe akea i ka pilikia o na kanaka kupa o ka Moi.  Auwe aloha ino ka pomaikai !  E lawe ia'ku ana anei kona aloha a me kona kokua io ana i ka pono o kanaka Hawaii, a me na haole i maluhia pu me lakou ?  Ua aloha nui ia ka pono o kela mau kanawai hoohaiki kinai wai ona, no kona kokua nui i ka ilihune o kona poe kanaka ponoi.  No ke aha la ka lokoino, aloha ole, a me ka uhauha wale no i kou waiwai a me kou pomaikai iho ?  Ina ua hoopauia kona mana ma keia aina, a emi iho kona kumu hoomahuahua dute wai one e laweia mai, aole anei e nele kou waihona hookupu auhau no kou maluhia iho ?  Ina i nele, aole anei i makaukau ka maluhia e auhau hou iho maluna ou ?

            E nana i ka loa a me ka laula o ka aina, mai kela pea a keia pea, ua nui no na waiwai mahiai e ae, kupono i ka hooulu ia iloko o ka aina, me ko lakou kino okoa iho, me ka hoololi wai ona ole ia, a e lawe hoi i waiwai kalepa aku i ka aina e.  No ke aha ka palaualelo a me ka mahiai ole o na kanaka ia mau waiwai kalepa i pomaikai no lakou iho, no ka aina a me kona aupuni iho ?  E nana i na haole a me na lahui olelo, a no ka lakou manao iho, ka hana mahiai nui ma ka aina a me ke kalepa i keia wa.  No ka nele paha i ka ninau ole ka mea e holo ole ai ka lakou hana ?  Oia paha kekahi kumu noonoo no ka mahiai kalepa Hawaii, a me ka ninau i ko lakou mana iho.

            Ke mahalo aku nei, ua maikai a ua oiaio ka palapala kuokoa a ka mea naauao, noonoo pono me ke akahele, i paiia me ke puhi rama Hawaii.  E olelo ana ka mea naauao, e pomaikai ana ka hune o ka aina, a o na kanaka a me ke aupuni i ka hana puhi rama Hawaii, ke ae kona Ahaolelo.  He oiaio maoli keia, a ua pono e kokua nuiia ka pono o ke puhi rama ma keia pae aina.  Ua kupono loa ka hana puhi wai ona, e kokua i ka poe ilihune mahiai i na mea kanu palahu wale i mahiia iloko o ka aina, i poho pinepine i kela kau keia mahiai.

            Ina e hanaia keia, e lilo io no ko lakou ino popopo a palahu wale i ka hoomaemae ia, a ano hou ae kona waiwai io iloko, a he kupono hoi i ka malama loihi ia, a e kupaia a paa i ka pahu, a hoolilo aku ia ia i waiwai kalepa aku i ka aina mamao.  Oia maoli no ka pomaikai o na mahiai ilihune a puni ka aina, ke loaa io mai ma ka kakou hoopii ka pono o ka hoonoa ana i ke puhi rama.  Ua akaka no paha, o ka mahiai i na mea ulu hua i kowiia ka wai, oia ka mahiai nui piha loa ka aina iwaena o kanaka.  O ka poe ilihune ka poe hana nui i keia mahiai iloko o ka aina, ua hiki i ka ilihune hookahi a keu ae, a i ka ohana hale okoa a keu aku ka nui, ke mahi no a puhi rama, ma na ipuka hale o lakou iho me ka luhi ole i ke kahu ana.  Okoa ke puhi, okoa ke kaomi, okoa ka awiawi.

            O ka pomaikai io maoli e loaa mai ana i na poe mahiai ilihune, a i hiki ai ia lakou ke hooko i ka hana io ana, oia ka pono maole e kokua ia e ka hoonoa ana i ke puhi rama Hawaii.  Pehea, ina haawi ka poe hoopii mahiai puhi rama pala wale i uku kivila kanawai i ke aupuni no kona ae ana.  Ke hai nei oia i kona manao, aole oia e noonoo iki no ka pono a pono ole o ka ae a me ka hoole, no ka uku kivila ana i ke aupuni pela ; aole hoi i ka pono o kona ae mai a me ka ole, me ke kue a kue ole ia ia iho.

            Eia wale no ka manao maopopo i ka noonoo i keia wa no kela ninau o ka poe mahiai puhi rama Hawaii.  Ina e hooiaioio mai ka manao o ka poe mahiai hua poho wale, a he oihana mahiai maoli no ka hana puhi wai ona, e hana mau ia iloko o ka aina i pomaikai maoli no ke ola o ka lahui, a o kanaka, a me ke aupuni.  Eia ka ninau maoli malaila, no ke aha ka auhau kivila o kona aupuni i ka mahiai ponoi kupono maoli o kona aina iho ?  Ina he kupono ka auhau ana pela, no ke aha ke kau ana i ka uku kaumaha koikoi maluna o ia poe ?  Ina he hana maikai maoli ka mahiai o ia ano i na hua pala wale a me ke kahu ana i moa pono, a lilo i waiwai oiaio.  No ke aha ke kau ana i ka uku auhau no ka hana ana i ka hana oi o ka maikai ?  Ina e kauia he uku i ke aupuni no ka ae ana e puhi i ka rama Hawaii ; eia ka ninau, e lilo io ana anei ua puhi rama la i mea kokua io i ke poho o ua poe mahiai pela wale la ?  Ina pela ka hoola ana o ka palapala ae puhi rama i ka ilihune o ka poe hune ?  E aho ka hune o ka puaa, he ola i ka anaanai.

            E noonoo pono na mahiai ilihune a me ka poe makemake, ina he pomaikai io ko lakou ke aeia ka lakou noi puhi rama, a e noonoo pono hoi lakou i ka pomaikai o keia wa me ke puhi rama ole.  Pehea ?  Ina he tausani dala a keu ka uku no ka palapala ae i ke puhi rama i ke aupuni, eia ka ninau maoli.  Ehia kanaka mahiai ilihune e loaa na palapala ae ?  Ehia hoi ka nui o kapuahi puhi rama Hawaii ma keia pae aina ?  Ehia dala e loaa mai i ka waihona aupuni no na palapala ae kivila puhi rama ?  Ehia dala loaa i ke aupuni i keia wa no ke dute malalo o na kanawai hoohaiki wai one e noho nei ?

            Minamina ke kokua a me ke kokua ole i kela ninau no ke puhi rama.  E kokua ka noonoo kaulike i kona pono a me kona naauao.  Ua lana ka manao e kokua ka pono o keia mau hoopii elua i haawiia ; aka, aia no i ka manao o ko lakou Ahaolelo ka hooholo e like me ko lakou ike ana i ka mea e pono maoli ai ka aina.  Aole no he manao maloko o na aoao hoopii, ua kue ka naauao hooholo kanawai o ka Ahaolelo i kona Kumukanawai ; ke hilinaiia kekahi o ia mau pono, a i ole ia, o laua pu paha elua, iluna a ilalo i ka manawa hookahi.  Aka, he mea paha e hookaumaha i ka manaoio o na naau lehulehu.  Heaha ia ?  He lapuwale, eia ka oiaio.  O ke ola o ke kino ika ai a me ke kapa, oia ka waiwai oiaio no ke ola o ke kino a me ke ola mau.  O ka naauao o ka hana ana me ke kuhihewa ole i kekahi a me kekahi, oia ka hoomana oiaio.  Oia no ke kilohana oiaio no ka pono a me ke ola o ka lahui Hawaii a me ke aupuni.

            Heaha la ia mea he oiaio ?  Aka, he ninau maoli ia, a ua lehulehu wale kona ano, o ka oiaio a me ka maoli, " O ka hana mahiai i ka honua, a o ka maluhia kona papale alii."

            E na kamalii mahiai o ka aina, ina o ka hana ka maikai o ka mahiai, a o ka mahiai ka maikai o ka hana, e maikai auanei ka hana, he ahiu ka maikai.

            E hoomaikai paha na kamalii i ka maikai o ka oihana mahiai, ke pookela o na hana a pau mai ke alo mai o ke Akua, i ku ilalo o hana, i ka piko o Wakea, he malumalu no Kane ma laua o Kanaloa.  O ka pomaikai maoli no ka mea i manaoia, he pono no ke kanaka Hawaii.  S. P. Kalama.

            Honolulu, Feberuari 22, 1864.

 

He leo i na makamaka.

 

            E ka Nupapa Kuokoa e ; Aloha oe:—Me kou opu i piha i ke ahonui, a me ka hoopomaikai i ka lehulehu, ke hooili aku nei a'u ia oe i ko'u manao pili no ka lehulehu, e noho ana i waena o keia apana. (Kohala Akau.)  Iloko o keia mau la iho nei, ua hui kekahi poe he iwakalua a oi ae, e kuka no kekahi mea a lakou i makemake ai, na kahi o ko makou Lunamaainana D. K. Naiapaakai.  O ka mea nae a lakou i makemake ai, oia no ka Ahaaina, me ka hoolako no ia lakou i na aahu like ma ko lakou mau kino holookoa, me ke kahea aku i kekahi poe e hele mai i ua ahaaina 'la.

            Ma kou nana ana, he hana maikai ka lakou e kukulu nei, a na ia maikai i hookomo ka'u mea i makemake ai, e kamailie aku imua o ka lehulehu.  Aia nae iloko o ko lakou kamailio ana, ua loheia mai kekahi olelo pono ole, o kekahi o ua poe la, penei ua olelo 'la, " Aia a hele mai kuu poe i hoino ai, haawi aku kakou i kuekue ka lakou ia e ai ai."

            E na makamaka, a me na wahine maka palupalu, na kaikamahine maka onaona, a me na keiki puukani o Edena, ke ike ae la no kakou, i ka manao o kekahi o keia poe hui, malia aia iloko o oukou ua poe la hoino ia ; nolaila, e makaala oukou o komo auanei iloko o ka mea i hoomakaukau ia na oukou, (oia no wahi kuekue.)  Loaa hoi ka mai nui la, he hilahila.

            E ka mea kue a hoino hoi, e hoolohe oe i ka olelo ma Mataio 7 : 1, 2, " Mai manao ino aku, o manao ino ia mai oukou.  No ka mea, me ka manao ino a oukou e manao ino aku ai, pela e manao ino ia mai ai oukou ;" nolaila, ua oki ka waha i ka pane apaapa.

            Ke paipai nei au ia oukou me kuu manao, he oi ka pono o ka noho ana mamua o ka hele ana i ua ahaaina la, ke hooki nei ka peni i kana hana, hoolono aku o ka pane ia mai.  Ke hoi nei ko Kohala keiki, ke paa mai la ka ohu i na pali.  Lima.

            Kohala Akau, Ianuari, 27, 1864.