Ka Nupepa Kuokoa, Volume III, Number 10, 5 March 1864 — Page 4
| This text was transcribed by: | Patricia Ravarra |
| This work is dedicated to: | The Haumana of the Academy of Hawaiian Arts |
Ka Nupepa Kuokoa
KE KILOHANA POOKELA NO KA LAHUI HAWAII.
KA MOOLELO
––O––
IOSEPA.
HELU 7.
Hoike mai la ka luna kahu ai i kana moeuhane, penei : “He mau hinai palaoa keokeo ekolu iluna o ko’u poo, a iloko o ka hinai maluna iho, o na mea ai a pau i kahuia na Parao ; ai mai la na manu ia mau mea noloko mai o ka hinai maluna o kuu poo.”
No ka mea, ua kali pihopihoi loa paha oia e ike a e lohe maopopo i ke ano o kana moeuhane.
“O na hinai ekolu,” wahi ana, “ekolu la ia, a iloko o ia, mau la ekolu, e hookiekie aku o Parao i kou ppo mai ou aku, a e kaawe aku hoi ia oe ilun o ka laau ; a e ai mai na manu i kou io.”
He wehewehe kaumaha loa keia i ka luna kahu ai, aole nae i akaka pono kona manao ilaila.
I ke kolu o ka la mai ka wehewehe ana a Iosepa i keia mau moeuhane ; oia ka la hanau o Parao, he la olioli nui ia ma ka hale o ke alii, a hana iho la oia i ahaaina nui no kona poe luna a pau, a me na mea lawelawe imua ona. Iwaena o keia ahaaina, kauoha aku la ke alii e hookuuia mai ka luna lawe kiaha, i kona wahi mua ; ma ia la hookahi no, ua lilo hou oia i luna lawe kiaha no ke alii, a haawi hou ke kiaha uwaina iloko o kona lima.
Nolaila, ua lilo o Iosepa i mea oiaio ma ka wehewehe ana i na moeuhane, i mea e akaka ai, o ke Akua ka mea i ao aku ia ia no ia hoike ana. No ka mea, o ke Akua no , a o na kanaka ana i kokua ai, i loaa ka ike i ke ano o na mea e hiki mai ana.
Nui na olelo wanana o ka Baibala, i hoopukaia mamua iho o ke ko ana o na mea i hoikeia ; ma ke ko ana o keia mau olelo wanana, e akaka ai ka puka ana mai o na olelo mai ke Akua mai, a no ke Akua mai hoi ka Baibala, kahi i paa ai o ua mau olelo wanana la, a ua oiaio wale no.
Ua hai mai, ua hoopoina ka luna lawe kiaha ia Iosepa, i ka wa i hoihoiia ai oia i kana oihana mua ; aka, ua hoopoina wale oia i ko Iosepa lokomaikai ia ia i ka wa e noho ana malalo ona iloko o ka Hale paahao ; ame ka olioli i ka lohe ana i ko Iosepa wehewehe ana i kana moeuhane, me ko Iosepa noi ana ia ia, e hoike aku imua e ke alii i kona wale ana me ka hewa ole, a i laweia’ku hoi oia mai ia wahi aku.
Ke hoike nei keia hoopoina ana o ka luna lawe kiaha i kona lokoino nui, ame kona manao ole ia hai, ke hemo aku oia mai ka pilikia ame ka poino aku!
Auwe! nui ka kanaka e like me ia ma ka honua nei, e manao nui ana i ko lakou pomaikai iho, me ka manao ole i ko hai ! o na kamalii kekahi i hoopoina i na makua ponoi, ame ko lakou lokomaikai a pau, hookuli wale i ko lakou leo aloha ; kokua ole kekahi i ka wa mai, a i ka wa palupalu, a malaila i hoike ai lakou i ke ano hewa a lokoino o ko lakou mau naau.
Pela anei kekahi o oukou e na kamalii e heluhelu ana i keia palapala ? E noonoo oukou ; ke aloha io nei anei oukou i ko oukou mau makua ? Ke hoomanao nei anei oukou i ko lakou lokomaikai a pau ia oukou ? Ke aloha maopopo nei anei oukou i ko oukou mau makua, me ka hoolohe pono i ko lakou leo ? Ke hooikaika nei anei oukou e hooluolu aku i na makua o oukou?
E hoolohe oukou i ka Iosepa i olelo ai, no keia mea ma ka Baibala, i komo ia olelo iloko o ko oukou mau naau.
“E poino ke kanaka ke hoowahawaha i kona makuakane, ame kona makuahine ; a o na kanaka a pau e olelo mai––pela io no.
“O ka maka i hoowahawaha i kona makuakane, a hoole hoi, aole malama i kona makuakane, e kiko iho ka poe koraka o ke awaawa ia mea, a e ai iho no ka poe Aeto opiopio.”
A hala na makahiki elua mai ka hoihoiia ana o ka luna lawe kiaha i kana oihana, oiai e moe ana o Iosepa ma ka Halepaahao, me ka hoopoina ia eia, a loaa ia Parao keia mau moeuhane ano e elua ma ka po hookahi.
Eia no kana moeuhane, “E hele ana oia ma kapa o ka muliwai o Nile, a ike aku la oia i na bipi maikai ehiku, a kaha ke kino, a hoea mai la mailoko mai o ka muliwai, a ai iho la lakou ma kahi weuweu. A hooea hou mai la mahope mai o lakou, mailoko mai o ka muliwai he mau bipi inoino ehiku, a olala ke kino, a ku pu mai la lakou me kela mau bipi ma kapa o ka muliwai ; a ai iho la na bipi inoino ehiku, a olala ke kino, i ua mau bipi maikai nei a kaha ke kino.”
Ala mai la ke alii, a moe hou oia, a loaa ia ia kekahi moeuhane hou i ano e, e like me ko ka mua.
Eia ua moe hou la, “Hua mai la na opuu palaoa ehiku i ke kumu hookahi, he ohaha a maikai, a hua mai mahope mai o lakou na opuu hou ehiku, he wiwi a mae i ka makani mai ka hikina mai ; a ai iho la na opuu wiwi ehiku i na opuu ehiku i ohaha a maikai ; a hikilele mai la o Parao, aia hoi he moe nana.”
A ao ae la ua po nei, anoninoni iho la kona naau no keia mau moeuhane ; no ka mea, manao iho la oia, he ano nui ko keia mau moeuhane, e pono ia ia ke ike. Ia wa koke no, hoouna aku la ke alii e kii i na kilo a pau o Aigupita, ame na kanaka naauao a pau o ia wahi, i na paha e hiki ia lakou ke hoike mai i ke ano o ua mau moe la.
O keia poe kilo ame na kanaka naauao a pau, oia ka poe i manaoia he akamai i ka wehewehe ana i ke ano o ua mau moeuhane nei a ke alii, a hoomaopopo i na mea e hiki mai ana, ua ike no nae lakou, he hoopunipuni wale no ka lakou hana ; ua hiki ia lakou ke hana hoopunipuni wale aku no i na kanaka, ua hopohopo nae lakou ke hoao e hoakaka i ke ano o ka ke alii mau moeuhane.
Nolaila, hoole lakou, aole i maopopo ia lakou ke ano o keia mau moeuhane ano e, a ua oi aku ko ke alii kaumaha ame kona pilikia no ke akaka ole o ke ano o kana mau moeuhane ia ia.
Ia wa, hoomanao iho la ka luna lawe kiaha ia Iosepa, me kona noi ana aku ia ia, e hoike aku ia ia imua o ke alii.
Ala mai la kekahi manao lokomaikai iloko o kona naau ; i aku la oia i ke alii, “Ke hoomanao nei au i keia la no kuu hewa.”
Alaila, hai aku la oia ia Parao i ko Iosepa wehewehe ana i na moeuhane o laua me ko la luna kahu ai, i ka wa i paa ai laua i ka Halepaahao.
Ia manawa, puiwa mai la ke alii i keia moolelo, a i ka noonoo o Iosepa i kona hoakaka pololei ana i kela mau moe ; a kauoha aku la oia e lawe koke ia mai o Iosepa i ona la, i lohe maopopo ai ke alii i ke ano nui o kana mau moeuhane.
A hoomakaukau iho la o Iosepa, ame kona hoomaemae ana ia ia iho, a hele aku la i ka Halealii, a lawe ia aku la oia imua o ke alii.
A hai mai o Parao i kana mau moeuhane, aole hoi he mea e hiki ai ke hoomaopopo aku, i aku la ke alii, “Ua lohe au nou, aia a lohe mua oe i ka moe ; alaila, he hiki ka ia oe ke wehewehe i ke ano.”
Ua manao ke alli ma ko Iosepa akamai iho i hiki ai ia ia ke hana pela, e like me ko ka poe kilo ame na kanaka naauao i olelo ai na hiki ai lakou ke hana ; aole oia i ike i ke Akua oiaio, a ia ia wale no, ame na kanaka ana i ao mai ai, i hiki ai ke nana aku imua, a hoakaka i na mea e hiki mai ana.
Ina ua manao kalohe o Iosepa, ua hiki no ia ia ke hoomau i kela kuhihewa o Parao no kona ike i ka wehewehe ana i ke ano o ka moeuhane ma kona akamai wale iho no. Aole nae pela ko Iosepa manao, ua makau oia i ke Akua ; aole e hiki ia ia ke hooakamai imua o na kanaka, a olelo aku ma kona akamai wale iho i hoike ai oia i na moeuhane, no ka mea, ua ike oia, o ke Aku ka mea nana e kokua ia ia, a nona wale no ka hoonaniia ame ka pomaikai.
Olelo aku la o Iosepa ia Parao, i aku la, “Aole na’u ia, na ke Akua no i hai lokomaikai ia Parao.”
“Aole na’u ia.” E hoomanao oukou i keia olelo a Iosepa, he pololei kana olelo hoike, aole iloko ona ke ano hoopunipuni ; malaila no oukou e pomaikai ai ma ka hana like. Aole e hiki i kekahi ke hoopunipuni aku imua o ke Akua me kona ike ole, ua ike oia i na mea huna a pau o ka naau.
Ua olelo mai ka Baibala, “Mai manao mahalo oukou ia oukou iho, aka, me ka manao hoohaahaa, e hoomaikai ia hai ; ua kue aku la ke Akua i ka poe haaheo, a haawi mai la hoi i ka lokomaikai i ka poe hoohaahaa, ame ka maluhia o ka noho ana.”
(Aole i pau.)
He Oiaio ia Manao.
E ka Nupepa Kuokoa e ; Aloha oe : ––Ua kapalili maikai mai ko’u akeniau, ame ka hoihoi nui loa mai o ke akemama no na huaolelo a ko kakou makamaka a W. Pinehasa Wood, e paipai mai ana i kona mau hoa, oiai he mau waha olelo lakou no na makaainana iloko o ke kau ahaolelo kau Kanawai o ko Hawaii nei Pae Aina e hiki mai ana. Penei ka mea i nui loa mai ai o ko’u hoihoi ame ka olioli no hoi.
Eia no ia : O kana olelo kauoha i kona mau hoa Lunamakaainana i kohoia iho nei no keia makahiki, ma ka la kiei mai ma Kumukahi, a ka la lawe a Kanoa i ke kai o Lehua. Eia no kana olelo kauoha i kona mau hoa, “E pono ia kakou e na mea i kohoia iho nei i waha olelo no ka lehulehu no keia kau Ahaolelo e hiki mai ana, e hui mua aku kakou me na makaainana o ko kakou mau apana i kohoia iho nei i mau Lunamakaainana kakou nana e noonoo i na mea kupono, i ina manao kupono ole e haiia mai imua o kakou, a i hiki hoi ia kakou ke wehewehe pono aku i ke ano kela ame keia.
He oiaio no ia, pela io ko’u manao, no ka mea, i ka lani no ka ua, waele e no ke pulu o lalo nei. Pela hoi keia, mamua e hui e ai kakou, o oukou o na Lunamakaainana, a o makou hoi o na makaainana, hui pu kakou kamailie i na mea kupono, o noho auanei kakou a loaa mai i ka olelo o Solomona, penei: “Hilihewa ka manao ke ole ke kuka.”
He oiaio no ia, aka, ina he oluolu ka makou mau Lunamakaainana e like me kou manao maikai la, alaila pono, no ka mea, he nui loa no na mea i like me ko W. Pinehasa Wood manao, o ko makou apana o Honolulu nei, mai Maunalua, a Moanalua. Eia nae, aole he wehewehe iki mai o ua poe maua nei, eia iho la no paha ko lakou manao, ua pono iho la no makou, hookahi a makou mea nana aku o ka hiki mai o ke kau Ahaolelo, he mau poheo ka makou o ka pule. Ina pela ea ? Ahea hemo ae keia mau pilikia, ame keia kaumaha ? A auhea ko oukou mea i lilo ai i mau Lunamakaainana ? Aia anei malalo o ka puu dala ; ina pela, aole pono ke ku mumule, a nana i ua puu dala la.
Eia no ka pono io maoli, e kuikahi mai ka manao o oukou e like me ko W. P. W., o hele ma a Maunalua, a Wailupe, Waikiki, a holo loa aku i Moanalua ; a pela hoi ko Ewa, Waialua, ame Hauula ; a pela no hoi ko Kauai, Hawaii, Maui, ame Molokai, a pela aku. Ina pela ka oluolu like o ko oukou manao, alaila, e ola auanei ka lahuikanaka ame Aliiolani Kamehameha V., i na aole oukou e hana pela, alaila, nalowale na manao maikai e ai a pau, a lilo i mea ole loa. Me ka mahalo. W. H. Mana,
Kakoko, Honolulu, Oahu, Feb. 15, 1864.
He Kanikau no Mere Kaupe.
E ka Nupepa Kuokoa e ; Aloha oe.––Ua loaa mai ia’u ka manawa pono e kamailio pu aku me oe, a nau hoi ia e waiho aku ma kou mau eheu mana, i ike mai ai kona mau makua ame kona mau kupuna e noho ana mai Hawaii, a Niihau. A penei kona make ana : Ma ka la 29 o Sept., ma ka hora 10 o ke kakahiaka, oia kona manawa i haalele mai ai i kona makua, o kona ano he kaikamahine, he ano maikai ame ka oluolu o kona noho ana me kona mau makua, a ua hanau oia ma ka M. H. 1851, i ka la 29 o Aperila, a o ka nui o kona mau makahiki, ke umikumamalua (12,) a ua komo oia ma ke ekalesia ma Hilo, Hawaii. A no ka nui mai o ko’u aloha, nolaila, ua haku iho au i wahi kanikau nona malalo nei.
He kanikau aloha keia nou e Mere Kaupe,
Kuu kaikamahine mai ka la wela o Kona la,
Mai ka makani anu he kehau e,
E nana i na pea hulilua i ka moana la,
Auwe kuu kaikamahine.
Kuu kaikamahine mai ke kai hawanawana o Papaolelo,
Mai ke kai huahuai kanaka e Poopookumu,
Mai ke kawa opu e Paaoao la,
Mai ka ulu niu anana e Lehuula la,
Hoomaha aku ka wela i ka olu o na kou la,
Mai ke one piha i na kanaka la,
Kuukaikamahine mai ka wai lamalama kukui e Lehupueo,
Ua haalele mai ne oe i ka poli o ka makua,
Ua noho aku la oe i ka hale makamaka ole,
Hookahi no makamaka o ke akua la,
Auwe kuu kaikamahine e.
Kuu kaikamahine mai ka piina wela o Kukuipalaoa,
Hoolai aku ka hahana o ka ihu o ka Lio i ka Loulu la,
Kuu kaikamahine mai ka wai kaikai i ke poi e Waihou la,
Mai ka wai puolo i ka lau-ki la,
Auwe kuu kaikamahine e.
Kuu kaikamahine mai ka makani anu he kilioopu la,
Elua kaua i alo aku ai i ke kuluaumoe la,
Moe iho nei au e ole oe i loaa ia’u la,
Auwe kuu kaikamahine e.
Kuu kaikamahine mai ke kula mehameha o kahi nihinihi la,
E nana ana paha i ka ihu o na lio i ke eku mai i ka nahele la.
Kuu kaikamahine mai ka la enaena e Kahilinai,
Mai ke kula mehameha o Huehua la,
Auwe kuu kaikamaahine e.
Kuu kaikamahine mai ka pahoehoe loa e Wailea,
Ua walea ka uhane i ke kui lehua la,
Kuu kaikamahine mai ke a maka uliuli e Kaniku la,
Mai ka makani o launiu o Kekaha la,
Kuu kaikamahine o ka piina wela e Puupa la,
Mai ka ua apuupu anu he Waikaloa la,
Mai ka lepo kuehu mai i Lihue la,
Mai ka ohu kokolo mai i ka luna e Puukapula,
Auwe kuu kaikamahine e.
Kuu pua rose haule ole i ka manao la,
Kuu mea minamina pau ole he keiki la,
Kuu kaikamahine mai ka ua loko mai iloko o Hiku la,
Ku la uhane i ka luna e anuenue kulua la,
Aloha ia wahi a kaua e hele ai la,
Hele oe i ke alanui a ka Polikua a Kane la,
Noho iho nei makou me ka u me ka minamina i ko aloha la,
Auwe kuu kaikamahine e.
Kuu kaikamahine mai ka makani kolonahe o ka aina he Kahoolawe la,
Lalawe ke aloha pukukui i kuu puuwai la,
Kuu waimaka e hakoi nei i ka po me ka ao,
Lei aku la ka uhane i ka rose lani la,
Noho aku la oe ma na eheu o na Kelupima,
Kuu kaikamahine o ka po ua nui oka hooilo,
Mai ka la ikiiki la o ka Makalii la,
Ikiiki au i ko aloha la,
Auwe kuu kaikamahine e.
Kuu kaikamahine olelo mai iluna o ka lauhala
Kuukaikamahine mai ka ua kukalahale e Husekona la,
Kuu kaikamahine mai na pali o Hilo la,
Mai ka ua nihi mai i na pali la,
Kuu kaikamahine mai ka ua kokoula ma ka moana la,
I ka ‘ulu wehi a ka hala la,
Hala le oe o kuu a-i la,
O ke kupuna ka mea aloha la,
I ka ike ole ana i kou kino la,
Auwe kuu kaikamahine e.
Kuu lei hulu mae ole i ka la,
Kuu kaikamahine mai ka wai o Mahana la,
E hone ana i ke kuluaumoe la,
Aloha ia wahi a kakou e hele ai la,
Auwe kuu kaikamahine e.
Kuu kaikamahine mai ka i-a naonao i ka pohaku e Maulua la,
Kuu hoa pili oia wahi makamaka ole la,
Hoa hele oia kula mehameha kanaka ole la,
Aloha ka olelo mai i ka makua la,
Ua pau ka ui ka ninau ana la,
Auwe kuu kaikamahine e.
J. W. Heleloa.
Mokuaniki, Hilo, Dek. 18, 1868.
He kanikau no Sara Hooulu.
Kanikau he aloha no ia’la la,
No Sara Hooulu no he inoa la,
He uwe helu mai ke kaikaina la,
O Hooulu liilii no he inoa la,
Aloha ino no kuu kaikuaana la,
Kuu hoa hele o ke Kapa la,
O ka na ko luna o maua ko lalo la,
No Sara Hooulu no ke aloha la,
Hiki mai ana ke aloha i ke kino la,
Hoolailai ana ka manao la,
He manao no ko’u e ike la,
I ke kino wailua oia’la la,
He uwe helu mai he makua la,
O Peelua no he inoa la,
Aloha ino no kuu keiki la,
O ka ua haaheo i ka nahele la,
Hele hookahi aku ka uhane la
I ke ala hoi hou ole mai la,
He uwe helu mai he kupuna la,
O Nahuakai no he inoa la,
Aloha ino no kuu moopuna la,
Kuu lei aloha o na pali la,
Kuu hoa noho o ka hale la,
O ka malu hale o Manuahi la,
Manuahi ke aloha i ke kino la,
He uwe helu mai o Kuewa la,
Aloha ino no kuu keiki la,
Kuu hoa pupu o ke ana la,
O ka po hoa ole ke moe la,
Moe au hoolohe i ka leo la,
O Kekahuli leo lea i ka nahele la,
He uwe helu mai he kupuna lo,
O kaholoai no he inoa la,
Aloha ino no kuu moopuna la,
Kuu hoa hele o ke alanui la,
Kuu hoa pili o ka nahele la,
O ke ohu kolo mai i ka mauna la,
Mauna ke aloha i ke kino la,
Ke auwana nei ka manao la,
Kanikau he aloha no ia’la la,
No Sara Hooulu no he inoa la,
Aia ka uhane i ka lewa la,
I ke ao lipolilo ke noho la,
He uwe kanikau he makua la,
O Nahau no he inoa la,
Aloha ino no hoi kuu keiki la,
O ka la welawela o Holei la,
O kahi wai huihui o Lana la,
Lana mai ka manao e ike la,
Hopu hewa i ke kino wailua la,
He uwe helu mai he kupuna la,
O Umauma no he inoa la,
Aloha ino kuu moopuna la,
Kuu mea minamina pau ole la,
Kuu lei mae ole he aloha la,
He uwe helu mai he makua la,
O Samuela no he inoa la,
Aloha ino no kuu keiki la,
Ka pua rose a ka manao la,
Kuu keiki o ka wa heu ole la,
Kuu makamaka o keia wahi la,
He uwe helu mai he kupuna la,
O Maria no he inoa la,
Aloha no kuu moopuna la,
O ke kai huli loa o Keopuka la,
Kanikau he aloha no ia’la la,
No Sara Hooulu no he inoa la,
Aia ka uhane i Kumukahi la,
I ka la puka mai ma Haehae la,
Haehe ke aloha i ke kino la,
He uwe kanikau he makua la,
O Kauahi no he makua la,
Aloha ino kuu keiki la,
O ka ua kualau ma ka moana la,
Ua ana ua luhi i ko aloha la,
He uwe helu mai he kupuna la,
O Maria no he inoa la,
Aloha ino kuu moopuna kualua la,
O ka la kanaka o Manuahi la,
O ka haki nua mai a na lio la,
I ka luna wale a Kapaakea la,
He uwe helu mai he makua la,
O Kukaa no he inoa la,
Aloha ino no kuu keiki la,
He mea ole ka loa o na pali la,
I ka lohe ana i ka pilikia la,
Kaumaha luuluu ka manao la,
He uwe helu mai he kupuna la,
O Palaoa no he inoa la,
Aloha ino no kuu moopuna la,
O ka i-a waha eha o ka aina la,
Ua eha ka manao i ke aloha la,
He aloha ko kino wailua la,
Elua mea nui e noho nei la,
O ka u me ka minamina ia oe la,
Kanikau he aloha no ia’la la,
No Sara Hooulu no he inoa la,
Aia ka uhane i Haleakala la,
I ka luna wale o Kolekole la,
He uwe helu mai he makua la,
O Ikoa no he inoa la,
Aloha ino no kuu keiki la,
O ke kai hone o Makaiwa la,
A he aiwaiwa ke aloha la,
E lohi apa nei i ke kino la,
He uwe helu mai he makua la,
O Mahoe no he inoa la,
Aloha ino no kuu moopuna la,
O kahi wai huihui o Kalokoiki la,
He uwe helu mai he makua la,
O Ilikualani he makua la,
Aloha ino no kuu keiki la,
Kuu hoa o ka imi naauao la,
Ua hala e aku nei oe la,
I ke ala hoi hou ole mai la,
Ke u nei makou ia oe la,
Na hoa kula nei la,
He uwe helu mai he kupuna la,
O Ikeole no he inoa la,
Aloha ino no kuu moopuna la,
Hoolau kanaka o ka hale la,
O ka O-o leo lea o ka nahele la,
Kanikau he aloha no ia’la la,
No Sara Hooulu no he inoa la,
Aia ka uhane i ke Komohana la,
I ka welo ana a ka la i Lehua la,
Hu wale mai no ke aloha la,
He uwe helu mai he makua la,
O Moku no he inoa la,
Aloha ino no kuu keiki la,
O ka lailai o Lailea la,
He uwe helu mai he kupuna la,
O Haole no he inoa la,
Aloha ino no kuu moopuna la,
O ka manu leo leo lea o uka la,
Iwi polena o ka nahele la,
Haalele i ke kini lehulehu la.
Mereana Kaaua.
Pulupulu!
A UA MAKAUKAU NO HOI AU E KUAI
aku i ka pulupulu, penei:
PULUPULU i pau i ka waeia, 20 keu. no ka paona.
PULUPULU ma ka anoano i wae olela, 6 ken. no paona.
E lawe no au i ka welu lole a me ka pulupulu i uku no ke Kuokoa.
H. M. WINI
100-2m. Luna Pai o ke Kuokoa.
OLELO HOOLAHA
KE HAIIA AKU NEI KA POE A PAU E HOOLUUIA ko lakou mau lole o na ano a pau, ola hoi ke Kihei, Holoku, Lolewawae, Kuka, ame na mea ano lole silika, ame na lole huluhulu i ka waihooluu Melemele, Eleele, Ulania, &c., &c. O na Kihei kahiko i mae, e hooluuia a maikai. Aia kahi e hooluuia’i ma ko’u wahi ma Moanalua.
O ka poe a pau e makemake ana e HOOLUUIA ko lakou mau lole, e lawe ae a waiho i ko lakou lole ma ka Halekua! Papa o Samuela, ma Honolulu. Aohe no he pii loa o ka uku.
JAMES L. DOWSETT (Kimo Palakana.)
Honolulu, Feb. 5, 1864. 115-1m
Na ke Aupuni.
No ka mea, ua hai ia ka Papa Ola, e ka poe i kohoia e kiai, ua haumia loa a pilau hoi ke kulanakauhale o Honolulu i keia manawa, i na mea e mai ai a e make ai hoi o kanaka ! a no ka mea hoi, ua manaoia, o ka nui o ka mai i loaa’i i kanaka iloko o ke kau hooilo i pau iho nei, ua loaa ia no ka malama ole ia o na Rula i hoopuka ia e ka Papa ola i ka malama o Ianuari M. H. 1860.
Ua hooholoia, e kauoha ia ke kakauolelo e hoolaha hou ia mau Rula ma ka olelo Hawaii a me ka olelo Beretania, me ka hoomaopopo hoi i na mea a pau i pili, ma keia hope aku e hooko maoli ia ana kela mau Rula.
O keia Rula malalo iho nei no ka kanu ana i ka poe kino kupapau, ua hooholo pono ia i keia la ; eia hoi.
Aole no e kanu ia kekahi kino kupapau iloko o kekahi hale noho, aole hoi ma kahi e pili koke ana i ka hale noho, aole no hoi e emi ka hohonu o kekahi lua kupapau malalo o na kapuai eono, e hoopoaiia ka poe nana e kanu i na dala, aole e oi mamua o na dala i hookahi haneri.
T. C. Heuck.
Kakauolelo.
Keena Hana o ka Papa Ola, Ianuari, 7, 1860.
Na Rula hooponopono
A KA PAPA OLA.
1. He hiki no i ka Papa Ola a me na luna i hooholoia e ka papa ke hele a makaikai i na Hale Pakaukau Ia, kuai mea ai ulu, kuai Pipi, a io e ae papa a i na wahi e ae paha e kuai ia ana kela mau mea, i na manawa a pau a lakoku e makemake ai, a e kena aku e hoomaemae koke ia kela mau wahi, a o na opala ino a pau e hookaawale aku ma kahi e.
I na ua kukuluia kela mau wahi kuai ma na wahi i manao ia ua kue i ke ola o ka lehulehu, he hiki no i ka paha ola ke kenu aku e honee ia kela mau wahi, ma kahi kupono.
2. Aole e kukuluia kekahi Hale pepehi pipi, a holoholona e ae paha maloko o na palena o ke kulanakauhale o Honolulu, a ma na alanui laula e hele ia ana e ka lehulehu, a ma kapa o kekahi Muliwai, a auwai paha e inu ia ana ka wai, a hana ia ma na mea ai ; a ma kekahi wahi e ae paha, aia a ae ia e ka papa ola.
3. Aole e kapi a kalana kekahi mea i na Ili maloko o ka palena o ke kulanakauhale o Honolulu, a ma na wahi e pili koke ana, a mauka paha o ke kulanakauhale, a i kahi e ae paha, ma kahi no i ae mua ia e ka papa ola.
4. O na Hale hanalepo, lua lepo, auwai wai lepo, a kio wai paha, e ku ana ka wai lepo iloko, a me na mea pelapela e ae a ua manao ia e ka papa ola ua kue i ke ola o ka lehulehu, ma ke kena a ka papa ola, a me na luna paha e hoomaemae koke ia kela mau mea, e ka poe nona kahi, e hai mua aku nae ka papa ola a me na luna i kela poe, i ka manao e hoomaemaeia a ma keia hope aku e eli ia na luna hana lepo a pau, i eiwa kapuai ka hohonu, a i eha kapuai ka laula.
5. He hiki no i ka papa ola a me na luna ke makaikai a nana i na hale a pau, a lakou i manao ai ua ikiki ka noho ana o na poe ma ia mau hale, no ka makani ole, a no ka nui loa paha o ka poe e noho ana ma ka hale hookahi ; a e kena aku i ka poe e noho ana e hoohamama i na hale i nui ka makani, a i ole ia e hooemi ka nui o na poe e noho ana ma na hale, e like me na mea i ike ia he pono.
6. O ka ia, aole i kapi pono ia, a ua waiho ia iloko o kekahi Hale a pa hale paha a ua ike ia ka pilau, e honee koke ia e ka mea nana ia waiwai, ma ka hooakaka ana’ku o ka papa ola’a me na luna no ia mea.
7. Aole e hanai ia kekahi puaa maloko o ka palena o ke kulanakauhale o Honolulu, mahope o ka la mua o Maraki, M. H. 1860.
8. Aole e hoolei kekahi poe i na holoholona make ma na aianui a ala loa paha.
9. I na ue hake kekahi poe i kekahi o na rula hooponopono i hai ia maluna, e hoouku ia ia i ka uku hoopai aole e oi aku mamua o hookahi haneri dala.
Aponoia e ka papa ola i keia la 31 o Ian.
M. H. 1860.
Robert Mc. Kibbin, Jr. M. D.
113-3m Kakauolelo.
HALE PAI KII.
Maluna ae o ka keena pai o ka
“Nupepa Kuokoa,”
Emi ka uku no ke kii. E paila no ke kii iluna o ke
ANIANI a me ka PEPA.
E hele mai e na makamaka e pai i ko oukou mau kii.
H. L. CHASE (Keiki.)
112-6m Mea Pai Kii.
MEA HOU, MEA HOU!
AIA MA KA HALE KUAI LAPAAU
O
KAUKA HILIBARANI MA,
ma
MONIKAHAAE!
ma ke kihi hikina o ke
Alanui Hotele me Alanui Papu,
kahi e loaa ai na
Laau Lapaau!
o na ano a pau, oia hoi
KA LAAU HOOMAEMAE KOKO,
HUA ALE, AILA,
AILA PUUPUU,
PAAKAI HOONAHA,
LUPEPA, (Laau Luai,)
a me na laau o na ano a pau.
Omolo Hanai Waia no na Keiki hou.
Eia kekahi, aia malaila na waiala o na ano a pau, ola hoi
KA HUALUKINI, (Musk,)
LUBIN’S EXTRACTS, oia na waiala maikai loa,
WAIALA ILIAHI,
Na AILA LAUOHO MAIKAI LOA, &c., &c.
E hele nui mai, mai lohi, he holopono ke kuai ana o na mea a pau o keia hala. Eia hoi, o AILUENE, he (Haole Olelo o) ka mea kuai ma kela Hale Kuai. O ka mea aole i kuai pu me ia, e pono e hoao i pau kuhihewa, ka ua mau he holopono ke kumu kuai o na mea a pau oia hale ke kuai pu me ia, a he oleloia no oia.
111-3m.
LAAU LAPAAU!
aia ma kahi o
KAKELE ME KUKE
Ma Honolulu.
J. T. GOWER.––Makawao, Maui.
J. D. HAVEKOST.––Wailuku, Maui
C. H. WETMORE.––Hilo, Hawaii.
J. W. SMITH.––Koloa, Kauai.
HE LAAU KAHIKO, A HE MAOPOPO
NO HOI.
Laau hoopau Naio me na Koe.
A DR. JAYNE.
HE NUI NA PILIKIA O KAMALII I KA Naio a me ke Koe, a pela hoi na kanaka makua. O ka hope oia mau kolo, oia ka lolo. Oia mau mea kolo hope oia ka lolo, a o ka make hoi i kekahi manawa, a nolaila mai na mai e ne kekahi, e like me ka lepo paa, naiulu, pehu, ukake, a me na mae e ae.
O ka laau no keia e pau ai ua mau mea ino nei.
Eia hoi kekahi. O ka laau ku pono keia i ka poe pilikia i ka wela o ka houpo; i ka ono ole i ka ai; i ka nawaliwali o ke kino i ka mai pehu; i ka nalulu hoopailua; i ka pono ole o ka mai wahine; a me na mea like.
Penei no e inu ai i ka laau hoopau naio me na koe:
Ina no kamalii, e hanai aku i hookahi hapakolu o ka pana ki, i ka manawa hookahi no ke keiki malalo iho o ka makahiki hookahi. Mai ka makahiki hookahi a hiki i na makahiki ekolu, elua hapakolu o ka puna ka pono. Malaila a i na makahiki eono, hookahi no puna okoa ka pono, a malaila aku a i ka wa kanaka makua, e hanai i elua, a i ekolu paha puna i ka wa hookahi. I ka wa e inu ai, e hui i ka laau me ka pa ha o ka wai maoli. Oia hoi, in a hookahi ka puna laau, alaila, e huiia me na puna wai maoli eha; a pela no e inu ai ma ke kakahiaka awakea a me ke ahiahi. Aka, i nui ka pilikia, alaila, pono no elima inu ana i ka la, penei; kakahiaka, kiekie ka la, awakea, auwi ka la, ahiahi.
E inu mamua o ka ai ana, aole kokoke mahope iho.
Laau hoopaa Hi a Dr. Jayne.
JAYNE'S CARMINATIVE BALSAM.
--------
He laau maikai a oluolu hoi keia no ka Hi, ka Nahu, Nalulu, Wela o ka Houpo, Haoa, Hoopailua wale, Luai, Luai moku, ono ole i ka ai, Nahu me ka uwe no hoi o na keiki uuku, a me na mai like he nui.
Emo ole ka oluolu o ua mau mai nei i keia laau.
Penei e inu ai, i ka inu ana hookahi. Ina he keiki akahi paha ona malama, a elua paha, he umikumamalua paha kulu a hiki i ka iwakalua ka pono.
Ina he keiki mai na malama eono a hiki i na malama ewalu, he hapalua puna ki ka pono. Mai ka makahiki hookahi a hiki i elua, e inu no ia i puna ki okoa. Mai ka hiku a i ka walu o ka makahiki, elua puna ka pono, a no kanaka makua, he puna nui ka e inu ia i ka manawa hookahi.
A inu ea, e hui me ka wai maoli uuku, (a like a like ka wai me ka laau,) a pela e inu ae ai. Ekolu, eha elima paha inu ana i ka la hookahi, e like me ka nui o ka pilikia.
I akaka nae. Ina he nui ka wela, a ina ua komo kekahi ai pono ole iloko o ka opu, e aho e moni e mamua i mau Hu'ale Ola, a i ole, e inu i wahi paakai, a i wahi aila paha, i hemo e ka mea ino oloko, alaila e inu i keia Laau hoopaa hi.
Ina e luai ka mea mai, mahope o ka inu ana i ka Laau, a pau a i ka luaiia, e hanai hou aku no e like me mamua; a pela no a pinepine, a oluolu hoi ko loko, a waho malie no hoi ka laau ma ka opu.
Aohe a makou mea e noi aku ai i ka lehulehu, hookahi wale no o ke kauoha aku ia lakou e HOAO PONO i na
LAAU KUNU O KAUKA JAYNE
hoike aku ai i ka ola o na mea a pau i hoakakaia no kana mua laau. Ua hoola, a e hiki ana no ke hoola i ka mai ia.
KUNU, NAHU, a me ke ANU,
a me na mai e ae no hoi he nui wale; a o na mai HOKII no i ola nui, na mai i ola ole i na laau e ae. E aho e hoao oukou o ka poe i mai ia.
HE KUHA KOKO ANEI KOU?
HE KUNU ANEI KOU?
HE EHA ANEI KOU KANIA-I?
HE KUNU UMII ANEI kou me ka NAE?
AOLE ANEI OU MAI KUNU?
AOLE ANEI OU MAI NAENAE?
AOLE ANEI OU EHA ma ka UMAUMA?
AOLE ANEI OU KUNU KALEA?
AOLE ANEI OU HUI ma ka Iwiaoao?
A ina ua loaa ia oe ia mau mai, alaila, e ike oe i ke ola keia LAAU KUNU a Kauka Jayne.
NA MAI HOOPAILUA.
Mai o ke Ake.
Mai Nalulu a me ka mai Dyspepsia.
(O ka nawaliwali o ka puu hoowali ai, iloko o ko kakou mau waihona ai.)
He pono ke ai koke i ka laau a Huaale Ola a Kauka Jayne, he laau oluolu, a he ola no hoi. Aohe no he mai i nele ke makemake i na laau hoonaha; a mai nui no hoi ka poe e ola ana, me ka oluolu no hoi, ina e hoomaopopoia, a e inu ia no hoi ua mau laau la. Aole no e oluolu pono kekahi mea oiai e inoino ana oloko o kona kino; a ua ulu nui ae no hoi ka mai, a i kekahi manawa ua make no, a ina e malama pono ia a e inu hoi i na Huaale Naha, alaila, oia no. No ka hooiaio ia ana mai o keia mau mea, nolaila, ke hoolaha ia aku nei ka
HUAALE OLA A DR. JAYNE.
Me ka hiki ke hooia'ku i ka maikai, a na ka hoao ana i hoike maopopo mai i ka oi o ke ola keia laau mamua o na laau e ae, a me ka maikai no hoi o ka inu ana, a me ke ola maoli no hoi. A ina no e inu ana ia laau, aole no he mau mea i hookapuia, oia ka ai ana a me ka inu ana. Aole e ino ke waiho loihi, no ka mea, ua hana ia no a maikai loa. A ina e inu ia ua hikiwawe loa ka hehee iloko o ka puu waiho ai. Ma ka inu ana ma ka haawina liilii, he maikai loa no ka naha ana, a he oluolu no hoi, a me ka holoi pau i ke ino oloko o ka opu.
DISIPEPESIA.
(Oia ka mai ono ole o ka ai i kekahi manawa, a me ka hoowalipono ole ia hoi o ka ai iloko o ka puu moni ai.)
O keia Huaale Hoola a Kauka Jayne, he maikai loa no ka hooikaika ana ia mau oihana o ko kakou mau kino. Ina ua loihi loa ka mai ana, alaila, e hikiwawe ke ola ke inu puia ka
Huaale me ka Laau Hoomaemae Koko
a hoopau NAIO me na KOE, A Kauka JAYNE,
Like me ka mea i kuhikuhiia mawaho o ka wahi o ka laau.
NO NA MAI MA KE AKE,
MAI LENA,
MAI MA KA OPU HANAWAI,
NA MAI WELA,
KA HAALULU,
KA MAI O KA ILI,
KOKO INO,
MAI NALULU,
PAA O KA LEPO,
MAI KUNA,
MAI WAHINE,
ame ka MAI HOOPAILUA.
Ua maopopo loa ke OLA o keia mau HUAALE. A o ka mea wale no i koe i ka lehulehu o ka hoao pono ia mau hua. A he maikai no hoi na laau o Kauka Jayne, no ka hoola ana i na mai
PUHA,
ALAALA,
KAOKAO,
PUUPUU,
PEHU,
KUNAKUNA,
Hanene, Lolo,
na mai wahine, a me na mai e ae, no ke KOKO a inoino ma kana
LAAU HOOMAEMAE KOKO.
88-1y