Ka Nupepa Kuokoa, Volume III, Number 7, 13 February 1864 — KANIKAU ALOHA Nei nou e IOLANI, E KA MAKA O IOULI. [ARTICLE]

KANIKAU ALOHA Nei nou e IOLANI, E KA MAKA O IOULI.

Ke huli wale nei no ka wahine, Ka hoa pili o ke kane, Aohe kane, he haku no ka la o Kona, He makua no kahi makua ole, He hoikeike no kahi i ike ole ia, He alakai no ke kai loa e. Loa wale hoi ka hele ana e Kalani, Halulu aku la i Nuumehalani, Nakolokolo aku la i Hanakewa, I ka hele a ka uhane Alii, O Hikikaualiakamalama, Hiki Makalii Kaelo ia Kaulua, Alua a'u mau Lani i hala aku nei, O Kalani makua, o Ka Haku o Hawaii, Minamina ino. Minamina ino oe e Welehulani, Ka maka o Haulili, ka maka o ke Kolea, Kani haalilo ka Lani ka manu Alii, Ka ua kahi e io nei i kuahiwi o Kona, I kapeku i Koolau o Kuihewa; I ke au o Laapuni, o Ahukini, No Ahukini ke one hauli Alii, Eia ke hopu makawalu ia nei, Ke miha ia nei e Kalani mae—eia. Eia ka momokuahi anapa lani, Ke kukuni la i Kauai o Kawelo. E welo Wailuanui e hoano—e, Aloha, aloha, a he aloha nui, Nui ka ia hahi manawa o ko aloha, Ka ia kuia pa ili honi kanaka, Pa i ka ili walea no ia ia laka, Me he kahu no la ka walea ana, Kona ane maumaua no ia o kona kai kohu, E kohu ai ka moe, Nana aku ana ia pii, Ua oki na ia pii mai i ka moe—a, O ka moe anei keia e Kalani la ? Oia no—a. Kuu kane mai ka uka o Hanaiakamalama, Ke malama nei no au i ko aloha, E kui ana au a lawa i lei no'u, I hoa moe no ka po kane ole, Auwe kuu kane haku—a. Kuu hoa alo ua Waahila, Kipu hau anu o Maunakilohana, Ulu nahele paoa i ke ala, Ala au hoolono ia oe, O oe o ke Kamalei aloha a kaua, Auwe kuu kane haku—a. Kuu kane mai ka hale malumalu a ke koa, Kipeapea i ka lau o ke kukui, I hala ka pakaua o ka Hooilo, Hoomehana aku i ke kapa a ke ahi, Auwe kuu kane haku—a. Kuu hoa hoolono leo kahuli, Ke hai mai nei ka pololei ia'u, Aia kuu kane i ka maka o ka Opua, E kilohi ana iluna o Hanakewa—la, Auwe kuu kane haku—a. Kuu kane nana ohu kolo i na pali, I hehia e ka ua a wali ka maka o ka lehua, Wali pu no me ke kino i ka manao, Owau no ka hoi ka ke aloha e apa nei—a, Auwe kuu kane haku—a. Kuu hoa mai ke awalau o Puuloa, Hoa nana Ohai o ke Kaha, E maalo ana ke aka me he kanaka la, Kaokai makani a ka Malua, Elua a'u mau Lani e u nei, Auwe kuu kane haku—a. Kuu kane mai ka malu o ka wiliwili, Mai ke kula la o Peekaua, Ka ke aho i ka malu o ka Inia, Hoomaha aku i ke ahe Kaieulu o lalo, Auwe kuu kane haku—a. Kuu hoa lehua i Halalii, Ke ahai'na la e ka Unulau, Uluku mai nei Kaula i kuu manao, I kahi a maua i hele ai me kuu kane—la, Auwe kuu kane haku—a. Kuu kane au kai o ka moana, E nana ana i ka hono o na moku, Na kuahiwi haliuiiu i ka lai, E waha mai ana ma ke kua kekahi mauna—la, Auwe kuu kane haku—a. Kuu hoa mai ka piina ikiiki e Aalaloloa, E wawe ana i hala ka loa o Pohakuloa, Hoomaha aku i ke ahe a ka makani, Ike aku i ke one kuakii o ke Kaha—la, Auwe kuu kane haku—a. Kuu kane mai ka malu kuawa o Wailuku, Mai ka ia uwahi nui o ka aina, Aina kuahiwi lua i ka malie, A malie ohi ka ia ka kehau o Kula—la. Auwe kuu kane haku—a. Kuu hoa mai ke kai hawanawana o Kawaihae, E wawalo ana i ke oho o ka niu, Alo aku maua ike anu o Uli, I ka ua Peepakaieulu o Waimea—la, Auwe kuu kane haku—a. Na LILIA K. DOMINIS i haku.