Ka Nupepa Kuokoa, Volume III, Number 7, 13 Pepeluali 1864 — HE KANIKAU NO KAMEHAMEHA IV! [ARTICLE]

HE KANIKAU NO KAMEHAMEHA IV!

Kuu kane mai ka ua Nahua, Mai ka ua Lielehua i ke kula, I ke kula no ia ua o Kekaa; Hookaawale mai nei oe ia'u, Haalele mai nei oe i ka pili a kaua; Ke Aloha nei—au ia oe—a. O oe ke hoa o ka ua o ka la, O ke anu me ke koekoe, A kaua e holoholo ai i uka i kai, O ia uka anu o Nuuanu, Anuanu huihui ke aloha o kuu kane, Me he wai kahekahe la i kuu manawa, Ke aloha nei—au ia oe—a. Aloha ke kane o ka wa heu ole, Mai na wa kamalii a loaa ke keiki; Lilo aku la olua i ke ala muku maawe ula a Kanaloa, Loa ka imi ana ke au ana a ka maka e ike, A oe ike ua nalo loa. Ua hala 'ku la aia i Pelehuna, Ke aloha nei—au ia oe—a. Na EMALANI. Kuu kaikunane mai ka ua Kukalahale, Mai ka ua puanaiea hohoiea i ke kula, I ke kula no ia ua o Makahuna; Ua huna no au i ke aloha iloko, O kuu waimaka nae ke hanini nei, Ke aloha nei—au ia oe—a. O oe o kuu mua kaikunane ke aloha, I oili lelelani aku nei ka hele ana, E Kalani hoi a Kamakuhinia; He kunihia au he lihaliha i ke aloha, Ua piha ae nei ahu i waho, Ke aloha nei—au ia oe—a. Aloha ka hoa o ka haiki pilikia, Mai loko o ka hale pupuu hookahi, Hookahi au o Kaulanaikipokii; He pokii au he muli hope, No'u mua kaikunane i hala aku nei, Ke aloha nei—au ia oe—a. Na V. KAMAMALU. Kuu kaikaina mai ka ua Haao, Mai ka ua lei Kamakahala i ke kula, I ke kula no ia ua o Luakaha i Malailua, Elua maua e noho nei, O ko kakou kaikuaana kaikaina ke kolu, Ke aloha nei—au ia oe—a. O oe no ka maka e kau mai nei, Ke halialia mai nei me ke aloha, E Kalani e Kamoopuuleiohua oe, O oe ka'u aloha e noho nei; O kuu kaikaina ua hele loa, Ua nalo na maka. Ke aloha nei—au ia oe—a. Aloha ka hoa o ka aina pilikia pilikalahale, E aalo ai i ka uluoa kanaka, E pilikia ai ke ala ke hele ia, Hele oe waiho iho i ke aloha, Me kana ukana nui o ka waimaka, Ke aloha nei—au ia oe—a. Na L. K. KAMEHAMEHA V. Kuu kaikuaana mai ka ua Lililehua, Mai ka ua heekokoula i ke kula, I ke kula no ia ua o Napili, Pili mai nei ke aloha me ka minamina, O kuu kino kai luhi i ke aloha, Ke aloha nei—au ia oe—a. O oe ka hoa o ka moku lewa i ke kai, Mai na ale hulilua i ka makani, A kakou e hele ai me ka lei o ke keiki, He keiki ke aloha e hana nei iloko, E wehe ana i kahihi paa a ke kanaka, Ke aloha nei—au ia oe—a. Aloha ka hoa o ka ua Makaupili, Ke kahiko mai la i ke kula, Kuu hoa nana o na hono Piilani, I hoolanilani no hoi au ia olua, O ka hele ana ka hewa haalele ia makou, Ke aloha nei—au ia oe—a. Na W. C. LUNALILO. Kuu kaikunane mai ka ua kualau ma ka moana, E hehi kapalili ana i ka ili o ke kai, I kai no ia ua o Kona i ka maka o ka opua, Pua mai ana ko lohe kaumaha loko, Mihi au o kuu haalele ana ia oe, Ke aloha nei—au ia oe—a. O oe ke hoa o ka aina kai paeaea, Mai na lae makawalu o Kapulau, He kananakahi ia a ka poli o Kikau, Kau hewa ko'u manao ia hai, Haalele ino iho au ia oe, Ke aloha nei—au ia oe—a. Aloha kuu kaikunane mai ka lai malino a Ehu, Ke linoa mai la e ke kehau a hinu ke kai, Pohu lailua ke o Kona a Kamauai, Aiaina i ke aloha kumakena, Hemo ka lima paumako ia e noho nei, Ke aloha nei—au ia oe—a. Na R. KEELIKOLANI. Kuu keiki i ka ua Kihenelehua, Mai ka ua kaheelehua i ka uka, I ka uka no ia ua o Lanihuli e, E huli e hoi mai la e kuu iei, E kuu pua lei aloha a maua me kuu kane, Ke aloha nei—au ia oe—a. O oe o kuu keiki leilei makani, Ke hoihoia mai la e ke Kiowao, E ka ua lei kahiko o Nuuanu e! Oia o kuu kane ka mea aloha, O ka hoa luhi o ua keiki nei la, Ke aloha nei—au ia oe—a. He aloha ka nui ke kini o makou, Ke keiki o ka wa i hala aku la, Oia ka'u aloha a makou i noho ai, He keiki he inoa kane he mau kane io no, He hoa hoolaukanaka no ua wahi nei, Ke aloha nei—au ia oe—a. Na H. K. KAPAKUHAILI. Kuu keiki mai ka ua Waahia, Mai ka ua popo kapa i ke kua, I ke kula no ia ua o Mauuenaena,

Enaena ke aloha me he umuenaena la, I ka hele o ka luhi o kuu kane aikane, Ke aloha nei—au ia oe—a. O oe o kuu kamalei aloha kekahi, Ua hala aku la aia i Hiikua, Ke hele la paha i ke ala a Kahewahewa, Ua hewa iona ua hele malu, Ua haalele iho nei i ke aupuni o lakou, Ke aloha nei—au ia oe—a. Aloha ka hoa o ka aina makani lauwili, Me a'u wahine ahe lau makani, Aia lakou a pau i Kuahea, E hea mai oukou, Eia mai ke keiki ke imi aku la ia oukou, Ke aloha nei—au ia oe—a. Na C. KANAINA. Kuu keiki mai ka ua lei maka Anuenue, Mai ka ua Mananaoa i ke kula, I ke kula no ia ua o Kuia, Kuikui mai nei ke aloha i ke kino a eha, Hele awali opa loko i ka minamina, Ke aloha nei—au ia oe—a. O oe no ka'u i imi aku iloko o na lani awaawahia, I moe ai i ka Maunaloa, I loaa ia'u i ka la pilikia, Pilikia au mauna i kuu kino, i ioaa mai ka mea hihiu, E haalele mai ana ka hoi oe, Ke aloha nei—au ia oe—a. Aloha ke hoa o ka aina kaipala Iliahi, Kai Iliahi i ka i-a a ka Moae, Me a'u kini wahine opua i ka lai, Aia ma kapa kahakai o Hookahaia, Ke kaha ana aku la no ia, Aole i ikeia ka hele ana 'ku nei, Ke aloha nei—au ia oe—a. Na M. KEKUANAOA.