Ka Nupepa Kuokoa, Volume II, Number 49, 5 Kekemapa 1863 — Page 1
| This text was transcribed by: | Malialani Cabaniss |
| This work is dedicated to: | Hawaiinuiakea School of Hawaiian Knowledge |
Ka Nupepa Kuokoa
KE KILOHANA POOKELA NO KA LAHUI HAWAII.
BUKE 11. HELU 49. HONOLULU, DEKEMABA 5, 1863. NA HELU APAU 106.
"KUOKOA," BUKE III.
No ke Kuokoa.--Ke neenee mai nei ka hope o keia makahiki, a me ka hope hoi o keia Buke 2 o ke Kuokoa, nolaila, e pono i na makamaka a pau, a me ka poe i lawe i ka pepa o keia Buke, ke hookaa koke mai. A o keia poe hoi e makemake ana e lawe i ke
Kuokoa, Buke III.,
oia no ka MH 1861. e pono e hoomakaukau iho ia lakou me na DALA ELUA: no ka mea, aole no e haawina ka pepa i kekahi mea, ke uku pau ole mai oia i na dala elua i ka hoomaka ana e ka makahiki.
He kanikau no Mere Tamara.
Kanikau aloha keia nou e Mere Tamara,
Kuu kaikamahine makahiapo a kuu kino,
Kuu kino hoi e u nei i ko aloha;
Kulu mau helelei ka pua o ka waimaka,
Me he makamaka ala ke aloha ke hiki mai.
Hoopilikia hoi i kuu nui kino, aloha wale.
Kuu kino manao aloha ia oe e noho nei,
Ua haalele mai oe i ka pili a ka makua;
Hele aku nei oe i ke ala hoi ole mai,
Kou mau makua ke noho pilikia nei,
Me ka nui o ko laua mau kini,
Kou mau kupuna ke kanikau mau nei.
Noho iho me ka u me ka minamina,
Me ke aloha pau ole ia oe,
Auwe kuu kaikamahine aloha--e!
Kuu kaikamahine mai ka wai huihu la e Waikui,
Mai ka malu kukui hale la e Kipaepae,
Kuu kaikamahine mai ka wai awili pu me ke kai la e Kapuai,
Kuu kaikamahine mai ka ai hoolaukanaka o ka aina,
Kuu kaikamahine mai ka ai hoomalo i ka wai,
Kuu kaikamahine mai ka pihe uwe hone leo a ka ohe ʻ ;
Kani hone ana i ka nalu o ke ahiahi,
Ua ahi wela loko paila i ko aloha,
Kuu kaikamahine mai ka malu o ka niu la o Helani,
He lani ka make ke kii mai he mea kieki;
Kuu kaikamahine mai ka uka malu ulu la o Kahaluu;
Luuluu kaumaha ka manao pilikia i ko aloha,
O ke aloha ka ukana nui a kuu kino e noho nei.
E kuko ai o ka po lia ke ao,
Auwe kuu hoa pili he keiki--e!
Kuu hoa pili o ka hale a ka makua.
He makua au he mea hooponopono ia oe;
Me kuu manao iho e nana mai ana oe ia ʻ ,
Ua kii mai ka make lawe aku la ia oe,
Me kou ahihi ole ina mea ino o keia ao,
Noho mau oe me ka mea nana oe i hana,
Iehova Sapaota ke alii lanakila mau,
Kuu hoa pili o ka uka anuanu la,
Kuu hoa pili o ka pii ana ame ka iho ana;
Kuu hoa pili o ka la wela ikiiki la o Kona,
Me ke kai malino pohu lai o ka aina hoi,
Me ka makani hooipo aloha la he kehau,
Me ka makani pa kolonahe la a ka eka,
Kuu hoa pili mai ka huakaihele a kou mau maku, aloha ino;
E hele ana mai kahi o kou father a hiki aku i kahi o kou Mother,
Kuu hoa pili o ka ua ke anu, ame ke koekoe,
Auwe kuu pua lei aloha hoi--e!
Kuu pua lei rose nupanupa o ka aina kula,
I kukupu maikai ai i ka pukana mai o ka la,
I lai nohea ai ka aluna o ke ahiahi;
Hiki mai ana ko aloha ia ʻ u i ke kuluaumoe,
Moe au a hoolono i ka nehe a ke kai o lalo,
Me he ne ʻ la na ke keiki aiwaiu i ka poli o ka maku,
E uwe hone nei i ka puuwai o ke kanaka,
Ua paila wela loko maeele i ko aloha,
Alohe ke ao opua hoohikikii lua i ka lewa;
Aloha no hoi ke ao naulu o ka aina la.
Aloha ka ua kokoula nenee mai i ka moana,
E Mere Tamara hoi--e; aloha nui oe,
Kuu pua pili mau i ka ua me ka la,
Pua pili hemo ole i ke anu me ke koekoe,
Pua hoolaukanaka o kahi anoano,
Kuu pua ohumu o kahi mehameha,
Aloha nui oe e Kauwila, ua hala e aku,
Ka mea e noho ana i ke ala onaona o ka hala o Puna,
Hala oe ilaila ike ole i ka luhi o kakou,
Ua haalele mai oia ia kakou i na kini,
Ua hoi i ka poli o Kane laua me Kanaloa;
Auwe kuu lei aloha he keiki--e!
Kuu hoa pili o na makahiki elua.
Pau ko makou ike ana i kou mau maka onaona,
Pau ko makou lohe ana i kou leo kilinahenahe,
E Mere Tamara, e honi kaua i ko aloha a nohe ae au.
Wahi mele aloha no i kuu kamalei,
Ua hala kuu lehua ala Kookoolau,
I ka nae Kolopua
Ulili nae Olopua,
Haihai pua o kuu manawa--e.
Eia hoi wau la ua haiki Kilauea,
Ua kupu lia halia i ka manao--e.
Ke hoopale mai i kuu manawa,
I ke aloha la,
I ka hele o ka hoa pili he keiki--e,
Me ka waimaka aloha--e,
Auwe kuu kamalei--e.
J.W. KAMAUNUPAU.
Kahaluu, Kona, Hawaii, Nov. 28, 1868.
HE KAAO
--NO--
ANA ONOHI GULA,
--KA--
NANI LUAOLE O PELEKANE
HELU 2.
NO IOSEPA AME KIMO.
HE MAU KAMANA LAUA NO IA wahi, a he mau mea waiwai loa no hoi, no ka mea, he mau kanaka powa nae laua: a na laua na hipa ainena kao ame na mea e ae he nui wale.
O Kimo ke kaikaina, o Iosepa ke kaikuaana, na ka makua hookahi laua ma ka hanau ana.
I ka wa ahiahi molehulehu, komo ae la na hipa iloko o ka pa, o na kao hoi i ko lakou pa; ma keia komo ana, o Ana Onohi Gula kekahi i komo iloko o ua pa hipa nei.
I kona komo ana iloko, ua hu loa na hipa me ka holoholo ma o a maanei iloko o ka pa, a no keia hu ana o ka hipa, ua lohe o Kimo ame Iosepa na kahu.
Nolaila, haohao loa laua i keia ahiahi no ka hu ana o na hipa, nolaila, olelo aku la o Kimo ia Iosepa, "Ea! e hele ae oe e nana i ka pa, heaha la ke kumu o keia hu ana o ka hipa a kaua?"
Hele aku la o Iosepa e nana i ka pa o na hipa, ia ia i hiki aku ai, nana aku la oia i keia mea ula wena iwaena o na hipa, a nalu iho la iloko ona, "Eia ka ka mea i hu ai ka hipa, kai no he mea e ae, eia ka hoi he kanaka ko loko o ka pa."
Ia manawa, kahea aku la oia me ka leo nui loa, "Ea! ina he kanaka oe e o mai?" O mai la no hoi o Ana Onohi Gula, "E--o! owau no."
Kahea aku la o Iosepa, "Hele mai," hele mai la o Ana Onohi Gula a hiki imua a Iosepa, kulou iho la oia me ka hilahila ilalo ma ka honua.
Ia Iosepa i ike aku ai i ke kino holookoa o ka mea hemolele o Ana Onohi Gula, ua hoomauleia kona mau aa lolo e ka nani lipolipo o ka mea kaulana, a ua mae wale kona mau onohi ike ma ka nana ana.
I aku la o Iosepa ia Ana Onohi Gula me ka olelo nahenahe, "E kuu haku, e hoi kaua ma ka hale."
Ae aku la no hoi keia me ka olioli nui. "Ae, hele aku kaua."
Ia laua i hiki aku ai i ka hale, ike mai la o Kimo i ke kino o Ana Onohi Gula, ua hoomoe loa ia kona mau manao a pau loa malalo o na manea wawae o ke kii holookoa o ka mea hemolele, a ua hookaumaha loa ia kona manao i ka nana ana.
Ia manawa, pane aku la o Kimo me ka leo mama lahilahi loa, "Auhea oe e ka mea nani luaole a maua i ike ole ai mamua? Eia ko maua manao ia oe, e hoolilo aku ana maua ia oe i kaikuahine ponoi no maua mai loko mai o ka makuahine hookahi, ame ka makuakane hookahi, a i kaikuahine oe no maua, a i mau kaikunane hoi maua nou."
Wahi a Ana Onohi Gula, "Ae, aole au e hoole aku ia olua, no ka mea, o ka olua e olelo mai ai, malaila ka olua kauwa e hana aku ai."
Ia manawa, hoauau iho la laua i ka wai, hoaahu i ke kapa, a hanai i ka ai, a pau keia mau mea i ka hooponopono ia, alaila, hoi aku la o Ana Onohi Gula e moe ma ka rumi i hoomakaukauia nona.
Ia Ana Onohi Gula e moe ana, i aku la o Kimo i ke kaikaina ia Iosepa, "E hana kaua i hale no ke kaikuahine o kaua." "Ae," wahi a Iosepa.
Alaila, hana iho la laua i ka hale, o kona nui, he umikumamalua hale, o waho he momi, o loko he daimana, a maloko loa ke gula hoonani.
(Maanei, e kamailio uuku kakou no ka hana ana i ka hale, ame ke kumu i hiki ai ka nui o na hale i ka umikumamalua.)
Ua noonoo o Kimo laua o Iosepa i ke ano ame ka helehelena o Ana Onohi Gula, a ua maopopo, pela no ka hale e hana ai e like me kona nani ame kona maikai luaole.
A o ke kumu hoi i hiki ai i ke kieki loa o ua mau hale nei, eia, he mea mau ia Kimo ame Iosepa ka hele ana ma kekahi Kaona e aku, i mamao loa mai ko laua hale aku, he elima ka mila ka loa, ame ke akea hiki i ua Kaona ala.
Aia ma ia kaona na hale lealea, a me na hale o na ano a pau loa e nanea ai ka noho ana, a he mea mau ia laua ka hele ana ilaila i kela hebedoma keia hebedoma.
Nolaila, manao iho la laua e hana i hale kiekie loa no ko laua kaikuahine e noho ai. a e hoomama ka puka o ka hale i ua kaona ala, i hiki ia laua ke nana mai i ka a aku o ka malamalama o Ana Onohi Gula.
No ka mea, o ka maikai ame kona nani. ua malamalama ia e like me ke ahi, a oia no ke kukui o kona hale i ka po a ao, aole he mea e ae e like me ko kakou malamalama.
A paa ua hale nei, hana iho la laua a makaukau na mea a pau loa, alaila, hoonoho iho la laua ia Ana Onohi Gula i ka umikumamalua o ka hale, a hoohamama pono aku la i ka puka i kahi a laua hele ai.
O na mea a pau ka luaa i hoomakaukau, o kahi o Ana Onohi Gula e moe ai, he noho i hoopihaia i ka pulu, a he papakaukau ma ke alo ponoi i hoolakoia i na mea ai, o na ano a pau, a o ke ki o na hale a pau loa, a me ke ki o ka hale pa waiho mea ai.
A pau keia mau mea i hanaia e Kimo ame Iosepha, alaila, hai aku la laua ia Ana Onohi Gula i neia mau mea a pau loa, a hoomakaukau iho la no ko laua hele ana.
Ia laua i hele ai, hiki aku la laua i ua kaona ala, nanea iho la laua i ua la nei a ahiahi poeleele, nana aku la lakou i kahi o Ana Onohi Gula e noho ana, ua malamalama loa ia me he ahi la, pela laua i hoomau ai i ka nana a ao ia po, a hiki hou mai kekahi ahiahi, nana no laua, oia mau no.
A hala ia mau ahiahi elua, hiki hou mai kekahi ahiahi hou, o ke kolu ia, nana aku la laua, aohe a mai o ka malamalama e like me mamua.
Nolaila, olelo aku la o Iosepa ia Kimo, "Ea! make ko kaua kaikuahine."
Olelo mai la o Kimo, "Heaha ka mea e make ai? Noho wale iho la no oe a kuko wale iho la no."
Pela laua i hoomau ai i ka nana ana, a hala keia po, hiki hou mai ua ahiahi hou, o ka eha ia, nana hou laua aohe a mai, pela laua i nana ai a ao ia po, alaila, hoi laua.
NO KA HIKI HOU ANA MAI O KA LUAHINE NOI MEA AI IMUA O ANA ONOHI GULA.
(Maanei kakou e olelo hou ai no ka luahine hoi imi mea ai, a e kapae iki kakou i ka olelo no Kimo ame Iosepa.)
Ia Ana Onohi Gula i nalowale ai ma kahi mua i ikeia ʻ i e ua luahine nei, ua imi ikaika loa oia ma na wahi a pau loa, aohe nae he loaa iki o Ana Onohi Gula, nolaila, hoomau loa ua luahine la i ka imi ana.
Ma keia huli ana, ua loaa o Ana Onohi Gula ma keia aoao o ka mauna, a hiki ua luahine la, nana aku la oia i ka noho mai o Ana Onohi Gula iluna o ka hale, a nonoi aku la oia ma ka olelo maikai loa.
"E kela wahine maikai loa,
Ka mea aole malalo iho o ka la,
O ka mahina, o na hoku,
Na ʻ u kekahi mea ai."
"Pii mai," wahi a Ana Onohi Gula, pii aku la ua luahine la a hiki iluna, olelo mai la o Ana Onohi Gula, "O oe no ka mea lima, lalau mai i ke ki eia malalo o ʻ u e waiho nei, ki aku i ka rumi waiho mea ai,"
Ia wa koke no, lalau aku la ua luahine la i ke ki, a ki aku la i ka rumi a hemo, a ohi iho la i ka mea ai a piha kana eke, ki aku la a paa, waiho aku la ia Ana Onohi Gula, a hoi aku la.
Ma keia hoi ana, aole oia i hoi ma kona hale ponoi, aka, hoi aku la oia ma ke alanui e hiki aku ai i kahi o ke kaikamahine alii. ka mea i olelo muaia ma ka Helu mua ae nei, mamuli o ka hana kue a ka luahine.
KA OLELO A KE KAIKAMAHINE ALII I KA LUAHINE NOI MEA AI.
(Maanei kakou e hoolohe hou ai i ka olelo a ka luahine noi mea ai, me ke kaikamahine alii huhu, a pakaha wale i ka nani o ka mea hemolele luaole.)
A hiki ua luahine malalo o ka hale noho o ke kaikamahine alii, a noi aku la me ka leo nui.
"E kela wahine maikai loa,
Ka mea aole malalo o ka la.
O ka mahina, o na hoku,
Na ʻ u kekahi mea ai."
Olelo mai ke kaikamahine Alii, "U! e ka luahine, heaha ke kumu e loaa aku ai ka makou ai ia oe? Aole no hoi oe i noi i kekahi noi ana a e loaa ana, hele hou mai la hoi e noi mea ai, kupanaha!
I aku ka luahine i ke kaikamahine Alii, "No ke ino no o kou kii, nolaila, inoino no kau olelo. Aole no e like me Ana Onohi Gula, no ka maikai no o kona kii, maikai no kana olelo."
A lohe ke kaikamahine Alii i keia mau olele a ua luahine nei, olelo iho la ia penei, "kupanaha! kainoa ua make ua enemi nei o ʻ u, aole ka ! make oe ia ʻ u."
KA LOKOINO ALOHA OLE O KA LUAHINE, I KA MEA HEMOLELE KINA OLE, OIA HOI O ANA ONOHI GULA.
Kahea mai ke kaikamahine Alii, nele mai, a hiki ua luahine nei imua o ke kaikamahine Alii, ninau mai ke kaikamahine Alii, "Ke ola mai la no anei o Ana Onohi Gula?" "Ae," wahi a ka luahine.
Ninau hou mai la ke kaikamahine Alii, "Pehea la i maopopo ai ia oe e ola ana?" Wahi a ka luahine, eono mahine i hala ae nei o kuu huli ana maanei, aole loaa, alaila, huli au ma kela aoao o ke kuahiwi, malaila loaa ia ʻ u o Ana Onohi Gula, e noho ana iluna o na hale he umikumamalua.
A nana mai nei ka ʻ u eke mai ae e paa nei. haalele aku nei no au e noho ana, hoi mai nei au a hiki i ou nei.
I mai ke kaikamahine Alii, "Ae, heaha la hoi, e hoi hou oe i kahi au i ike ai ia Ana Onohi Gula, a hana aku oe i keia mau mea make." "Ae," pela aku ka luahine.
Wahi a ke kaikamahine Alii, eia a ʻ u mau mea make elua, o ke pina lauoho ma ke poo, a komo ia, a o ke kamaa mai ma na wawae, a komo ia, hui ko laua ikaika, o kona manawa ia e make ai, pau ke ola.
A i make, alaila, hoi mai oe, a e uku aku au ia oe i Hookahi Tausani Dala.
A pau keia mau olelo a ke kaikamahine Alii, ku ae la ua luahine nei a hele hou aku la imua o Ana Onohi Gula, a waiho iho la i ka eke mea ai.
A hiki ua luahine nei imua o Ana Onohi Gula, nana mai la o Ana Onohi Gula, a kahea mai, "hoi hou mai la no ka hoi oe," ae aku keia, "Ae."
I aku ua luahine nei, "Hoi aku nei no hoi a kahi i noonoo ai, i ka hoi wale aku no a ka hale, noho wale iho no, aohe hoa kamailio, nolaila, hoi hou mai nei, ianei kaua e nanea ai, a ahiahi hoi aku au."
Ia laua e noho ana, i aku ka luahine ia Ana Onohi Gula, "e nauke aku au i ko poo, malama ua maneo, no ka mea, aohe ou lima e pno ai ke kahi.
I aku la o Ana Onohi Gula "Mai ko ʻ u la i hanau ai a hiki i keia la, aole i kau ia e ka maneo ko ʻ u poo."
I hou aku la ka luahine. "Aole ae la he maneo, malia he liha, oia no ka makua o ka maneo."
Hoole loa mai o Ana Onohi Gula, "aole loa no he liha o ko ʻ u poo."
I aku ka luahine, "a o no la hoi au e pono e nauke wale aku no hoi i ko poo, malama hoi ua maneo; ua pono ia hoole au, ina hoi paha o ko wa lima.
Pela ua luahine la i hoowalewale ai, a loaa ke poo o Ana Onohi Gula, hoonanea iho la ia a walea o Ana Onohi Gula, ho-o-malu iho la i ke pina ma ka lauoho o ke poo, a i ke komo ana o ke pine, hoomaka mai la ka hiamoe, ho-o mai la keia i ke kamaa ma na wawae, a i ke komo ana, ua hui ka wela o ke pina me ke kamaa, a kau mai la ka hiamoe make maluna o Ana Onohi Gula, ka mea hemolele kina ole, a waiho iho la e hiamoe ana.
A make o Ana Onohi Gula, hoi aku la ua luahine nei ma ke alanui ana i hele mai ai. a hiki oia imua o ke kaikamahine Alii.
Ninau mai la ke kaikamahine Alii, "pehea?" Pane aku la ka luahine, "Ua make mai nei ia ʻ u, haalele aku nei au e waiho ana ua make, a hoi mai nei au.
A lohe ke kaikamahine Alii, olioli loa iho loa iho la ia, no ka make ana o kona enemi, alaila, haawi mai la ia i hookahi tausani dala i ka luahine, a hoi aku la no hoi ua luahine nei me ka olioli i kona hale.
KA HOI ANA O KIMO A ME IOSEPA I KA HALE, KA MAKE ANA O ANA ONOHI GULA.
A hoomaka kakou e olelo maanei, alaila, e hoomoe loa ka olelo no ka luahine, a e kali iki hoi kakou no ke kaikamahine Alii a mahope aku. [Maanei kakou e olelo ai no Kimo a me Iosepa.]
A hiki o Kimo a me Iosepa i ka hale, kahi a Ana Onohi Gula e noho ana, pii aku la laua a hiki i ka umikumamalua o ka hale, wehe aku la laua i ke pani o ka puka, i nana aku ka hana, e waiho mai ana o Ana Onohi Gula, ua make.
Lalau iho la laua, a hoonioni, aohe ala ae. aohe nana, aohe no hoi he leo i pane mai, ia wa, uwe iho la laua me ke kanikau, no ke aloha a me ka minamina loa ia Ana Onohi Gula.
A pau ko laua uwe kanikau ana, olelo aku o Kimo ia Iosepa, "Eia ka he oiaio kau olelo, hoole ana wau," (oia kela olelo i hai mua ia.)
Alaila, olelo aku la o Kimo ia Iosepa, e kapai kaua i pahu no ko kaua kaikuahine, a lawe aku ma kekahi kuahiwi lipolipom i kahikoia i na lau nahelehele o kela ano keia ano, a malaila e waiho ai, malama o loaa i kekahi mea e pili ana i ka ohana Moi o Pelekane nei.
Kapili iho la laua i ka pahu, he momi maloko, he daimana aku, he gula aku, a he koa mawaho loa, i uhiia i ke gula melemele, me ka wai ala e ae ana, (oia hoi eha pahu) maikai no ka hana ana.
A maluna o ke pani o ka pahu mawaho loa, na hua olelo palapala e kau ana, penei no na olelo:
"Ua make o Ana Onohi Gula,
Ka mea hemolele kina ole,
I la 22 o Ianuari, MH 1810,
Ma ka Hale o Maunahila."
He oiaio, ina o ka mea nana e lawe i keia pahu kupapau a waiho ma na ilina kupapau o na Moi o Pelekane nei, alaila, e loaa ia ia ka uku i oi ae mamua o na mea noho Alii Kalaunu o Pelekane nei, a e ohi oia a hiki i ka pau ana o kona ola.
Kakauia, a hooiaioia i keia la 5 o Ianuari, MH 1810, ma ka Hale Maunahila, i ke kualapa uliuli o Naue, kuahiwi laau o Pelekane.
JOHN ARAM KIMO.
RIVE AARON IOSEPA.
A ma ka aoao o ua pahu kupapau nei, ke ki, a me kahi e laka ai.
Alaila, ho-o iho la laua ia Ana Onohi Gula iloko o ka pahu, me ka hoailona o ko laua aloha, oia ke komo daimana, a me na hoku ewalu e kau ana, a he palapala ma na onohi, penei ke ano o ua palapala la:
"Owau o John Aram Kimo,
Ke waiho nei au i keia komo,
I hoike no kuu minamina,
I ka mea hemolele kina ole,
Iloko o ka pahu huina-ha,
Ka mea e iho ana i ka waha o ka honua."
Pela no o Iosepa, he lipine gula hinuhinu lilelile loa, i kau ia i ke kii o ka Aeto, a me na apo mahina elima e kau ana, a he palapala maluna i kakauia, penei:
"Owau o Rive Aaron Iosepa,
Ke waiho nei au i keia lipina gula,
I hoike no kuu aloha ia Ana Onohi Gula.
I ka mea hemolele kina ole,
Iloko o ka pahu huina-ha like,
E iho ana i ka popo a me ka palaho."
Papani iho la laua a paa ka waha o ka pahu, a ma ia hope iho, auamo laua i ka pahu a malalo o ke kumu o ke kuahiwi, kahi e luhe ana o na lau lipolipo o ka nahele, kahi hoi e muimuiia ana e ke ala a me ke onaona, kahi hoi i nui na waihooluu ke nana aku.
Kuu ih la laua i ka pahu, a wehe aku la i ka lau o ka Awapuhi, a me ka Palai, a papale ae la i ka Maile, a waiho iho la laua i ka pahu malala, a hoi aku la laua i ko laua hale, me ka naau minamina.
(Aole i pau.)
Leo kahea i ko Waialua, Oahu.
E ka Nupepa Kuokoa e: Aloha oe:
No ka hoopuka ia o ko ʻ u inoa ma ke akea, no nei mea he Lunamakaainana, a no ke kokoke loa mai o ke kau o ia hana, nolaila, he pono ia oe ke hai mua aku i ka lono i ko Waialua Oahu, i ka makemake o ka mea nona ka inoa malalo.
Ua makemakeia na kanaka a pau loa o na aoao hoomana a elua, maloko o ka apana, o Waialua Oahu, e akoakoa malie ma ka Halepulepule kalawina, ke hiki aku i ka la 15 o Dekemaba, hora 10 o ke kakahiaka, e noonoo a e kukakuka no ko lakou Lunamakaainana kupono a makaukau hoi, e hele iloko o ka Hale Ahaolelo o keia makahiki ae; e imi a hana no ko lakou mau pono a me ka pono o ka lahui mai o a o.
Ua makemake pu ia hoi na mea e manao ana, oia ka Lunamakaainana, e hele mai ia la ma kahi i hoakakaia iloko o ka manawa i oleloia maluna, he manawa kupono hoi ia no ko lakou haimanao kuloko ana imua o ke anaina, i hiki ai i ke anaina makaainana ke ninau kumu ia lakou, ma na mea a pau o ko lakou mau pono.
He pono i na mea a pau ke hele mai ia la, i ike ai lakou i ka manao pakahi o na Lunamakaainana i manao ia no lakou, a i lohe hoi i na kumu maopopo o ka manao ana e hele i ka Ahaolelo. Oia la, me oe ka paipai, me lakou mai ka eleu. Owau no me ka mahalo. J.W. KEAWEHUNAHALA.
Honolulu, Oahu, Nov. 24 1863.
[He hana maikai io no keia o ka hookaokoa ana ʻ e o na makaainana o ka Moi, e kuka, a e hapai hoi i ka noonoo ana, no ka poe a lakou e makemake ai e hoolilo i Lunamakaainana e huli i ko lakou mau pono iloko o ka Ahaolelo e hiki mai ana. E pono io i ko Waialua e hele ae e hui. LUNA HOOP.]
E hoomanao mai i ka aie
O KA NUPEPA
Ia oukou e na makamaka puni "Nupepa Kuokoa," ma ke kauoha a keia pepa ia oukou i na la i kaa hope ae nei. Ke kauoha aku nei au ia oukou e na hoa a pau, i aie i ka Nupepa Kuokoa i kela makahiki 1862, e pono oukou e hookaa koke mai, no ka mea, ua pomaikai oukou, ua ko ko oukou iini, a o ka poe nona ka Nupepa, ua pilikia maoli no. A e like me ia pilikia i loaa ia lakou, pela no hoi ka poe kauwa, lawelawe ma ia hana, nolaila ea, e hoomanao iho, he mea pilikia ka aie, o lilo auanei ia wahi mea uuku, i mea nui, a lilo io i mea e pilikia ai ka noho ana.
O keia kauoha ana, ua pili no ia i ka poe i kakau ia ka inoa ma ka ʻ u papa inoa, a oia poe aie i ka Nupepa la, oia ka ʻ u e kauoha nei, a ina no hoi he poe aie e ae kekahi i ka Nupepa ma kahi apana e ae e like me keia. e pono no e hoomanao iho i keia wahi leo paipai, i mau ai ka holo ana o keia "Nupepa Kuokoa," ma ko kakou mau ipuka hale, a loaa no ka mea nana o ke ahiahi, a me ke awakea.
E huli kakou a nana i ka Nupepa "Ka Hoku o ka Pakipika," he aha ke kumu o ka make, a me ka nalo ana iho nei? Eia no, o ka aie o ka poe lawe, a me ka pono ole o na Luna kekahi, nolaila, pilikia ia hoa kaana, pela no hoi keia, ina aole hookaa kakou, e pilikia ana no. Nolaila, e na hoa o ka malu ulu o Lele, e hookaa mai i ka aie, alaila, e olioli pu kakou, a kuu aku ka luhi. Me ka mahalo.
D. KAHAULELIO.
Lahaina, Oct. 9, 1863.
He wahi manao kokua.
E ka Nupepa Kuokoa e: Aloha oe:
Ua ike au ma kou helu 40, ka Buke 11 o ka aoao elua oia Buke, e hoike ia ana e M.P.K. no ko lakou kaumaha, no ka lilo ana o Mose Kuaea, ko lakou kahunapule i Waikane. Nolaila, ua hai mai oia i kona mau manao e 3 penei:
1. Ina e hele o M. Kuaea ma kahi e, owai la auanei ka mea kupono e pani ma kona hakahaka, aole paha kanaka makaukau i like me ia ma ka haiolelo ana, &c.
2. Ina paha e hele io ana ia, aole paha e holo na hana ma ia kihapai, &c.
3. Ina e kaawale aku oia, e lilo ana kela kihapai no ka Moremona, &c. Auhea oe e M.P.K., ke mahalo aku nei au i kou manao, no ka mea, ua mahele pono mai nei oe i na mea e kaumaha io ai kou manao, ma keia mau kumu 3 i haiia maluna. No ke aha la hoi ko oukou mea i malama ole ai i ka oukou kahunapule, a hookuu ia ia e hele ma kahi e, oia hoi ko oukou kokua ole ia ia i na makahiki elua, ma ka aie ana i na dala 600.--O kuu haohao i ko huna ana i kou inoa, nolaila, ke ninau aku nei au ia oe, owai kou inoa ponoi? No ka mea, ua makaukau loa au e launa pu me oe, me kuu manao, ua akamai no oe i ka mahele pono ana i na manao maloko o keia mau kukulu manao ou i hai mai nei. O kuu kuhihewa nae, aole anei oe o M.K? E hai mai, i pau keia hokuku. Owau no.
NAPAHUELUA
Naunaiki, Honolulu, Oct. 14, 1863.
Hana Naaupo.
E ka Nupepa Kuokoa e; Aloha oe:
I ka la 16 o keia malama, ua hoopii o Hanare ia Aneru imua o D.K. Naiapaakai ko makou Lunakanawai Apana, no ka mahuka ana o Aneru mai o Hanare aku, oia kona haku hana, a i ka hookolokolo ana, ua ko ka hoopii a Hanare, a ua ahewaia o Aneru no ia mea, ua hooholoia ka hoopai no Aneru, e hoihoi hou ia ia me Hanare, e hana ʻ i no na malama elua, a no ka aie ana o Aneru ia Hanare $6.00 me na koina o ka Ahahookolokolo $3.50 hui pau loa $9.50 a ua hai aku ka Lunakanawai i ka manawa hana no ia mea, hookahi malama me ka hapa hui pau loa ka wa e hana ʻ ua i Aneru nei me Hanare, ekolu malama me ka hapa.
A hooholo ka Lunakanawai pela, ku mai ua Aneru nei a hoole aole oia e hoi me Hanare, a no ka ikaika loa o ka hoole o ua Aneru nei i ka hoi me Hanare, Kena ka Lunakanawai i kekahi makai e hoihoi ia Aneru ma kahi o Hanare, ia wa nanao koke o Aneru iloko o kona pakeke lole wawae, a unuhi i ka pahi e o ia ia iho, a ua kokoke loa no e ku oia i ka pahi, kena koke ka Lunakanawai i ua Aneru nei e hopuia a hoopaa ma ka halepaaheo, hopuia no e na makai, a ua laweia ma ka halepaahao.
He hana weliweli maoli keia a keia haole, a he naaupo maoli no hoi. Nolaila, e ko ʻ u mau makamaka haole, pukiki, mai hana naaupo pela. Me ke Aloha no.
E. KEKAULA.
Iole, Kohala A., Hawaii, Oct. 30, 1863.