Ka Nupepa Kuokoa, Volume II, Number 46, 14 November 1863 — He Kanikau no D. Kaniau. [ARTICLE]

He Kanikau no D. Kaniau.

E oluolu paha oe e hookomo iho i keia wahi puolo waimaka ma wahi kaawale, a nau ia e ahai aku i ka lono, i lohe ai hoi o maua mau kini e noho la me ka lohe ole mai Hawaii a Niihau. O ka'u kane aloha nui, o D. Kaniau kona inoa. Ua make oia ma ka la 25 o Okatoba, M. H. 1863, hora 12 awakea, oia ka la Sabati, ma Waikalua, Kaneohe, Koolaupoko, Oahu. O kona mai i make ai, he puu mao ka opu, me he keiki la ka oni iloko o ka opu. A no kona make ana i keia mai, nolaila, hu mai la ko'u aloha i ke kane, ame kona poe a pau loa. Ke noho nei lakou me ka u mo ka minamina ia oe, no kou nalo ana aku nei.

Ū k • .■■io'. i. he akahn., h- r:v- - I,i jr.a ■ ;.i k-ūk:. u'»ho «-;:{»-.!?? rr. d ka n?'. a peīa aku. A no kona ano maika ma ka hana ana, nolaila, nana i koi mai i kuu puuwai e haku i mele kanikau nona. He kanikau aloha keia nou e D. Kaniau. Kuu kane mai ka la wela o Honolulu —e, Hoolailai ana i ke kuluaumoe—e, Moe iho nei au aole oe, Hopu hewa au o ko kino wailua—e. Elua hana a loko e hana nei. O ka u o ka minamina ia oe—e. Kuu kane, kuu hoa aloha—e Kuu kane mai ka malu o ka hau —e, E ano wale mai ana ia'u ko aloha —e. Aloha kahi o kaua e noho ai—e, E alo ai i ka ua me ka makani—e, Ke anu me ke koekoe—e, Koekoe iho nei ka po hoa ole — Kuu kane kuu hoa aloha—e Kuu kane mai ka lai o Eku—e, Mai ka la paku kanaka o ka aina—e Ke hahi mai la i ka ili o ke kai—e, Makaikai loko i ke aloha—e. Aloha au manao ia oe—, I kahi a kaua e hele ai—e, Hele oe nalo loa—e, Noho au me ka luhi o kaua—e Kuu kane, kuu hoa aloha—e. Mrs. E. KALAMA KANIAU. Kuu makuakane mai ka makani o lalo—e. Ia makani he Malualua—e, Kuu makuakane mai ka la ala i ka po —e. Aloha ia'u ke kai o Makaawale —e. Ia kai aloha a kaua e hele ai—e. Hele oe kaawale ka noho ana—e, Pau ka pili ana me ka makua —e, Kuu makuakane, kuu hoa aloha—e. ME@E KAAKA@. Kuu makuakane mai ka ua—e, A ke Kamakahala o Nuuanu —e, Ke hehi la i ke kawelu o Lanihuli—e, I huli iho nei au aole oe—e, Mahea la oe i naue iho nei—e? Kuu makuakane i ka wai o Hauhele —e. Oia wai awili pu me ke kai—e. E kuu minamina ia oe—e, Kuu makuakane, kuu hoa aloha—e. MOSE KAUANEHU Kuu kupunakane mai ka wai o Kekualoa—e Aloha ia'u ke kula o Panioi—e, Kahi a kaua e hele ai—e. Piina na ka lio o Pohakuloa —e, [anu —e] Kuu kupunakane mai ka ua kuahine o NuuUa anu kaua i ka ua a ka noe—e, Kuu kupunakane, kuu hoa aloha—e. MARIA KALAMALIILII. Kuu kane mai ka makani e Waikalua—e, Mai ka la ulili o Kalawao—e, Mai ka ua kualau i ka moana—e. Ke nihi mai la i Mokuoloe—e. Kuu kane mai ka malu o ka Inia—e, Mai ka ulu wehi o Wainaku —e, Aloha ia wahi a kakou e noho ai—e, Kuu kane, kuu hoa aloha—e. ZELUIA KAILIHAUNA. Kuu kane mai ka makani he Kehau—e. Mai ka ua kualau i ka moana —e, E hoa ana i ke oho o ka neki—e, Kuu hoa pupuuanu —e, Mehana kaua i ke kapa a Kahiki—e. Hiki mai nei ke aloha me ka manao—e, Hoolau kanaka i ka leo —e, Kuu kane, kuu hoa aloha—e. ELIKAPEKA AWA@A. Kuu kaikunane mai ka ua Kukalahale o Honolulu—e, E nana ana i ke kaona o ka aina—e, Kuu kokoolua o ka hale kane —e, Hale kuleana ole a kaua e noho ai—e, Kuu kaikunane mai ka ai uwahi ole—e, Ia ai haaheo o ka aina—e, I ka poli no ke ola—e. Hoomahuahua i ka waha—e. EULOKIA KAPAHOANUI. He kanikau aloha keia nou e Kaniau—e. Kuu makuakane i ka ua haliipili—e, I pili ia e kaua na kai eha—e, Mai na aie hulilua o Pailoio— : e, E nana ana i ka hono o na moku—e, ! Mai ka lai aku o Lahaina—e, Auwe! auwe !! kuu makuakane—e, Kuu aloha no hoi—e. Aloha wale ia kaha a kakou e hele ai—e, Mai ka makani kulai kanaka—e, O Ukumehame—e, Mai ka piina loa o Aalalolo—e. Mai ka malu o ke kuawa o Wailuku—e, Mai ku makani Kilioopu o Waihee—e, Mai ka ua Ukiu o Makawao—e, Mai ka paia ala i ka hala—e, Mai ka nahele aku o Oopuola—e Mai na pali o Keanae—e, Kuu makuakane, kuu hoa aloha—e. IONA MAUL. He kanikau aloha keia la nou e D. Kaniau. Kuu makuakane mai ka po loloa o ka hooilo, Mai ka la wela o ka makalii—e, Hiki mai ana ke aloha me ka manao —e, I kuhi ae nei au o oe ia—e, O oe ka ia e opua lele iluna o Hilopaliku—e, Pa ka Uluau makani o Hilo—e Ko ae ia Makahanaloa —e, Ua loa ka hele ana a ka makua—e, Hoi ole mai i ke ao malamalama—e, Kuu makuakane, kuu hoa aloha—e. SAMUELA. Kuu makuakane mai ka hale leo ole—e, Hoolaukanaka o ua wahi nei—e, Kuu hoa o ka Halewai—e, Me he kanaka la ka ua iluna o ka hau —e, He aloha ko'u me ka minamina ia oe—e, O oe ka ia e opua memele Lihue na ke Kehau—e, Ke mae mai ia ka makani waiopua—e. E hone ana i ke kupukupu—e, Kuu makuakane, kuu hoa aloha—e. LEPEKA KAAUWAEAINA. Kaneohe, Koolaupoko, Oahu, Nov. 4. 1863.