Ka Nupepa Kuokoa, Volume II, Number 43, 24 ʻOkakopa 1863 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

BUKE II. HELU 43. HONOLULU, OKATOBA 24, 1863.            NA HELU A PAU 100.

 

"KA NUPEPA KUOKOA,"

HOOPUKA MAU IA MA HONOLULU

I kela Poaono keia Poaono.

$2.00

No na mahina he UMIKUMAMALUA!

$1.00 no na mahina eono.

ME KA HOOKAA MUA MAI.

----------

NA OLELO HOOLAHA—aole i oi

mamua o 10 laina no ka hoopuka hookahi

ana, $1.00; alua komo ana, he $1.50;

hookahi malama, $2.00. E uku mua ia mai

ke dala o na olelo hoolaha a pau e hoounaia

ana mai e pai.

KANIKAU—he hapalua dala ka uku

no ka aoao hookahi o ka pepa leta, oia hoi 4

keneta no ka lalani hookahi—penei: he 25

lalani, $1.00; 50 lalani, $2.00; a pela'ku.

NA UKU NO NA OLELO

HOOLAHA—ka uku pepa, a me ka uku o

ke Kanikau, e haawiia no ma ka lima o na

Luna o ke Kuokoa, a i oleia, e hoouna mai ia

Kauka Kulika.

O NA UKU PEPA A PAU E

HOOKAA MUA MAI NO—aole e kauia ka

inoa o kekahi haole a kanaka maoli paha, ma

ka inoa o ka poe lawe pepa ke ole e hookaa

e mai mamua. E pono ke hiipoiia keia mau

rula, no ka mea, he emi no ka auhau no keia

nupepa.

AIA KE KEENA O KA NUPEPA

KUOKOA—ma ke kihi hema o ka Hale

Hookipa Luina (Sailor's Home.) O na hora

hana, ma ka eiwa o kakahiaka, a i ka ha o ke

ahiahi.

L. H. KULIKA. (Luna Hoopuka.)

 

KA "NUPEPA KUOKOA."

Is published in Honolulu

EVERY SATURDAY,

$2.00 per annum, or $1.00 per six

months, in advance.

ADVERTISEMENTS not exceeding

10 lines, inserted once for $1.00; twice or

$1.50; and $2.00 for one month; all

advertisements must be paid for in advance.

KANIKAUS will be charged 1.00

per page, or 4 cts. a line. PAYMENTS FOR

ADVERTISEMENTS, Subscriptions or

Kanikaus, may be paid to any of the Agents

of the Kuokoa, or may be enclosed in a letter

to the Publisher.

ALL SUBSCRIPTIONS must be

PREPAID. No names, either of foreigners or

natives, will be inserted on the subscription

list, until paid for. This rule must be strictly

adhered to, on account of the low

subscription price.

THE OFFICE OF THE KUOKOA is

in the South corner of the Sailors' Home.

Office hours from 9 A.M. to 4 P.M.

L.H. GULICK.

For the Publisher.

Volume I, II, and III of the KUOKOA,

bound, for sale, $3.50 each.

Persons having complete sets of the above,

can have them bound by paying $2.00 each.

 

KA MOOLELO

O

ELEIO.

HELU 8.

            ALOHE O KAULULAAU IA MAU olelo a Pahulu, no ka pau loa o ke akua oia wahi i ka make i ka nalu, alaila, ninau hou aku la o Kaululaau i ke akua ona ia Lono, “Pehea kaua e hele, no ka mea, ke olelo mai nei o Pahulu, ua pau loa ke akua o keia wahi i ka make i ke poiia e ka nalu.”

            I mai la hoi o Lono, “Auhea oe, mai hoolohe wale aku oe i ka olelo mai a Pahulu, no ka mea, no iala ka oleloia ana, he hana lepo ulaula ko ke akua, he poo huna ko iala i ke aouli; e aho e kali kaua maanei i keia po, a i hiki hou ole mai hoi ke akua, alaila, ua pau io i ka make, o ko kaua hele ka hoi ia ma kau wahi e aku e noho ai.”

            Alaila, hai aku la o Kaululaau i kona manao ia Lono, “Akahi no au a hoomanao mai i ke aloha i o’u mau makua i keia manawa, no ka mea, ia kaua i hele mai nei, elua wale no wahi puna ko, oia iho la ka ai o ka hele ana o keia wahi makamaka ole; no ka mea, ma ka hale o ko’u mau makua, he nui loa ka lakou mau mea ai e ai ai i kela la i keia la.”

            Olelo mai la o Lono, “Mai aloha oe i ou mau makua, no ka mea, ua kiolaia mai oe e make i ke akua o Lanai nei; no ka mea, i na oe e aloha i ou mau makua a hoi hou oe i Maui, alaila make oe, aole oe e ola, no ka mea, he keiki oe no Mauhaalelea, a ua kiola loa ia oe no ka make. Aka hoi, i na kaua e noho i keia aina, a pau ke akua o keia wahi a puni ka aina i ka lukuia e oe, a kaapuni kaua i keia aina, a i loaa ole kekahi akua hookahi ia kaua, alaila, hoi mai no kaua a keia wahi la, ia nei no oe e ho-a aku ai i ke ahi; a ike mai ou mau makua i ka a aku o ke ahi, malia o manao iho ou mau makua aole io no oe i make i ke akua, alaila, o ka laweia mai ka hoi ia o ka ai nau, ai iho oe ono ka ui ana, no ka mea hoi, ua make ae la ka hao paio.”

            Ma keia kamailio ana a Lono ia Kaululaau, ua lilo ia i mea oluolu loa i ko Kaululaau manao; a noho io iho la laua malaila ia po, no ke kali ana i ka hiki hou mai o ke akua. I ke kali ana o laua i ua po nei, aole wahi mea a hele mai o ke akua, hookahi wale no akua i hele mai, o ka ahailono no a laua nei, oia hoi o Pahulu.

            Eia nae, i ka ike ana mai o Kaululaau, o Pahulu hookahi wale no ka mea i hele mai ia po, alaila, olelo aku la o Kaululaau ia Lono, “E aho e pepehi ae kaua ia Pahulu a make, no ka mea, oia hookahi wale no koe, aole hoi paha ana make, nolaila, hookahi wale no ia, elua pu hoi kaua.”

            Alaila, olelo mai la o Lono ia Kaululaau, “Aole pono kaua ke pepehi ia Pahulu, no ka mea, i na kaua e pepehi ia Pahulu, alaila, aole e puni o Lanai nei ia kaua, no ka mea, o Pahulu, oia no ka mea i ike i kahi e noho nui ai o ke akua, a oia no hoi ka mea nana e hoolohe mai ka kaua mea e makemake ai e hana aku, a malaila wale mai no o Pahulu; a oia no hoi ka waha mana, e kamailio aku maluna o ka nui o ke akua o Lanai nei, nolaila, mai koi oe e pepehi ia Pahulu.”

            A i ke kakahiaka ana’e o kekahi la ae, ia wa, hele hou mai la o Pahulu, a olelo mai la ia Kaululaau ma, “E aho e hele kakou a hiki i ka lae o Kahoomano, (o Kalaehi kekahi inoa oia wahi) ilaila kakou e noho ai i kekahi mau la, a na’u no hoi e hoolauna aku me ka nui o na akua o makou e noho ana ma ia wahi; a ina hoi lakou e ae mai ia’u ma ko makou launa ana, alaila, ua ike iho la no hoi oe i ke kumu i pau mai nei ke akua o kela wahi ia oe, a pela no hoi oe e hana ai  i keia wahi.”  

            A pau ka Pahulu kamailio ana i kana pono ia Kaululaau, ame Lono, alaila, kakali aku la o Lono, o ka ui mai o Kaululaau ia ia i ka pono o ko laua hele ana, ame ka pono ole.

            Alaila, ninau mai la o Kaululaau ia Lono, “Pehea kaua, ua pono anei ka ianei e olelo mai nei ia kaua e hele kakou, i na e nana mai oe a ua pono, alaila, pono kaua ke hele, ina no hoi oe e nana mai aohe no hoi he pono, alaila, e aho no hoi ko kaua noho ma keia wahi.”

            Alaila, olelo aku la o Lono, “Ua oi aku ka pono o ko kaua hele ana mahope o ka olelo a Pahulu, no ka mea, o ianei no ke kamaaina o keia wahi, a o ianei no ka mea i ike pono i ka pau ana o ke akua o keia wahi a kaua e noho nei, nolaila, ua pono ia kaua ke hele mahope o ka Pahulu olelo i keia manawa.”

            A holo ka olelo no ka hele ana, ia wa koke no, o ko lakou nei hele aku la no ia a noho ma ka lae o Kahoomano.

            A poaha ko lakou noho ana malaila, a o na hana a pau a Kaululaau i hana’i ma Waiahoolae, oia no ka mea i hanaia ma Kahoomano.

            A pau ko lakou noho ana ma ka lae o Kahoomano, alaila, nee ae la lakou noho ana malaila, o ka Kaululaau hana kahiko no nae i hoomakaia’i ma kahi ana i noho mua ai, o ia no kai hanaia ma Kahaulehale; ia lakou nae e noho ana ma Kahaulehale, a hele aku la oia ma ia wahi aku, alaila, halawai aku la o Kaululaau me keia mau kanaka e noho ana i ka lae kahakai.    Ia lakou i halawai ai, a ike pono aku la keia he mau kanaka io no, alaila, kamailio pu iho la lakou me ua mau kanaka nei.

            Alaila, olelo aku la keia i ke akua ona ia Lono, “Kupanaha maoli, olelo ia hoi keia aina he aina kanaka ole, he akua wale no kanaka, eia ka hoi he aina kanaka no.”

            Alaila, olelo mai la o Lono, “Aole no he kanaka o keia aina, o ke akua wale no, i na e ike ia ke kanaka, alaila, he olulo ia kanaka, no Molokai mai paha la, ua holo mai nei a make i ka moana, au mai nei paha a pae mai ianei, oia kau i ike iho la he kanaka. Aka, eia nae ka pololei, e ninau pono aku no oe i ua mau kanaka la, a na laua no ia e kamailio pono mai ia oe, anoai aole io he mau kanaka, he mau akua io no paha, kuhihewa kaua he akua, aole ka!”

            Ia wa, pane aku la o Kaululaau ia Lono, “E aho nau e kamailio aku ia Pahulu, e nana pono ae ia i ke ano o ke akua o keia aina; a ina e hoole mai oia, aole pela ke akua, a he mau kanaka io kela, alaila, na’u hoi ke kamailio e pono ai, no ka mea, ua ku ae la hoi i ko’u aoao i ko ke kanaka.”

            Nolaila, lilo ka nana ana ia Pahulu, ia wa, olelo mai la oia ia Kaululaau ame Lono, “Aole keia he mau akua, aole pela ke ano o ke akua o ko makou aina nei.”

            I ka hoole ana mai a Pahulu aole he akua, alaila, lilo hou ke kamailio ana na Kaululaau me ua mau kanaka nei.

            Hooneenee aku la o Kaululaau a kokoke loa me laua la, aliala, aloha aku la keia ia laua la, “Aloha hoi paha olua e nei mau kanaka?”

            Aloha mai la no hoi laua la, “Aloha no hoi paha oe e nei keiki opiopio maikai.”

            Ia manawa, hoomaopopo aku la o Kaululaau i ua mau kanaka nei i ko laua wahi i hele mai ai a hiki ai hoi i Lanai.

            Alaila, olelo pono mai la ua mau kanaka nei ia Kaululaau, “No Molokai mai maua, i holo mai nae maua e holo loa i Maui, o ka make e nei i ka moana, o ka au hele mai nei paha ia la, pomaikai ka pae ana mai i Lanai nei. Eia hoi ka hewa, ua pakele mai nei hoi i ka make o ka moana, o ka make hoi paha auanei a ke akua koe, nolaila aole i ikea ka pono, oia ka maua mea e mihi nei la, no ka mea, he aina akua keia.”

            Alaila, i aku la o Kaululaau i ua mau kanaka nei, “Aole olua e make, no ka mea, he mau kanaka makua olua, aole ka hoi au i make ke kamalii, make hoi olua.”

            A ike aku la o Kaululaau i ka mokoi paeaea o ua mau kanaka nei, alaila, ninau aku la o Kaululaau, “He mea aha keia a olua e hana nei?”

            Alaila, olelo mai la laua, “He mea paeaea na maua, penei e hana ai, o ke kaula no o ka waa, oia no ke aho, o ka o no o ka pea, oia no ka mokoi, a o kekahi uha puaa no, o ia no hoi ka maunu, nakiikii ka uha puaa i ke aho a paa: aia a poeleele iho, alaila, kiola aku iwaho o kahi papaa hale nei o maua la, ia manawa, kii ae la ke akua, a paa iho la i ka uha puaa, alaila, hapai mai la ka mokoi, paa mai la ke akua, ia wa, kaikai mai la maua a hookomo iho i ka eke, a lomi iho mawaho o ka eke, make iho ana ia akua, i na no eha akua, pau no a eha i ka make i paa mai ai i ka uha puaa.”

            Alaila, olelo aku la o Kaululaau, “Ae, he wahi hana maikai io no hoi ka olua e hana nei? Heaha la hoi auanei ka hewa, e aho no e hana no hoi olua i ka olua hana, malama o pau no hoi koonei akua i ka olua hana, alaila, o ko olua aina iho la no hoi ia; a owau hoi, e hele aku no hoi au ma keia wahi aku e noho ai, a ike ia hoi ka pono, alaila, o ka pono ka hoi ia o ka noho ana o keia aina makamaka ole.”

            O keia mau kanaka nae e kamailio pu nei me Kaululaau, oia hoi na kanaka o Molokai mai. Ua manao ia, o laua no na kupuna i loaa mai ai na kupuna o Lanai. A ma o laua la i loaa mai ai o Lonoikapuokoko, a ma ona ala i puka mai ai o Kaluaikeaokiikii, a malaila e pili ai ia hanauna me na mamo a Kaiakea a me Puhene.

            A nolaila, ua oleloia ia moolelo ma ko Molokai olelo ana no ke kaha pili a Kaiakea.

            A pau ko lakou kamailio ana, alaila, hele aku la o Kaululaau a noho ma ka lae o Kaena, a noho kela me ka luku aku i ke akua o ia wahi e like me kana hana mau o ka hoopunipuni i ke akua i mea e pau ai lakou i ka make.

            Ua noho loihi loa lakou malaila i kekahi mau la, a ike o Pahulu i ka pau o ke akua o ia wahi, alaila, olelo aku la o Pahulu ia Kaululaau ame Lono, “Ua pau ke akua o keia wahi, e aho e hele kakou a me kela aoao o Honopu, malaila kakou e noho ai, malama ua nee aku nei paha ke akua ma ia aoao e noho ai, no ka mea, ke nana hele nei au ma keia wahi aole akua i koe, nolaila, ua makehwa kakou ke noho maanei i keia mau la loihi loa.”

            A mamuli o kei aolelo ana a Pahulu; alaila, ua nee io aku no lakou a noho ma Honopu, aia ia wahi ma kahi e ane kokoke aku ana i ka pali o Kaholo, aka, o Kaumolopau nae kahi e pili pu ana me Kaholo.

            A hiki lakou nei ma Honopu, a noho malaila i kekahi mau po, aole nae he akua o ia wahi, no ka mea, ua kaapuni hele o Pahulu ia mau la a me ia mau po ma ia apana mai o a o, mai kai a uka, aole ona halawai iki me ke akua, nolaila, aole o lakou kuleana e noho hou ai malaila.

            Nolaila, ua nee hou aku la lakou a noho ma Kaunolu, a malaila ua noho loihi hou lakou ma ia wahi, no ka mea, ua ike o Pahulu he wahi akoakoa ia o ke akua.

            Nolaila, olelo aku la o Pahulu ia Kaululaau, “E aho e noho kakou i anei, no ka mea, ua ike mai nei au, aia iluna pono o Kahilikalani ke akua kahi i noho ai. Eia nae ka mea hai aku ia oe e Kaululaau, e luku a uanei oe i ka nui o ke akua a pau; a o ke akua auanei e kapaia’na la o Kanemakua, alaila, mai pepehi auanei oe ia ia, no ka mea, he hana nui kana. O kana hana, oia ke kamaaina mau o keia wahi, a nana no e malama i kela i-a o ke kai. Oia ke akua, no ka mea, ina oia e make, aole mea nana e kiai pono i keia lae akua, no ka mea, malama paha e pau io ana ke akua o keia aina ma keia hana au e hana nei, a e noho mai ana paha ka mea i like pu me kou ano a’u e ike aku nei, alaila, ua koe iho la no ke kumu e laka mai ai o ke akua, a ma ona la e hiki ai ke kaumaha aku, a e lilo o Kanemakua i aumakua lawaia no ia poe.”

            Alaila, ua maikai ia mea i ko Kaululaau manao. A noho lakou malaila, me ka hana aku i kana oihana mau o ka pepehi aku i ke akua o ia wahi, a malaila hoi o Kaululaau i ao ai i ka paeaea ana i ke akua, e like me ka hana ana o na kanaka o Molokai i pae mai ai ma Kahaulehale, a no ka lehulehu o na hana maalea i loaa ia Kaululaau mamuli o ke ao-ao ana mai a kona akua a Lono, nolaila, ua pau na akua i ka make o Kaunolu.

            A pau ka lakou hana ana ma Kaunolu, alaila, manao iho la lakou e haalele ia wahi, a e nee hou aku ma kekahi wahi hou aku. Nee iki ae la lakou a noho ma Mamake, a malaila i luku ia aku ai.

            (Aole i pau.)

Pane Hope.

E ka Nupepa Kuokoa e: Aloha oe:

            Ua halawai mai au me na manao o Inoaole, nona ke poo i kakauia “I ka lehulehu,” i hoopukaia hoi ma ka helu 41 o ke Kuokoa, o ka la 10 o Okatoba. A e pale ana hoi i kela mau huaolelo a’u a Kimo N. Keoni nei i kapa aku ai ia Kaai w. “he Kahuna hoopunipuni i like me ka hekili pamalo.” Eia ka’u pane aku. O kela mau olelo a pau loa i puka ma ka helu 27 o ke Kuokoa, he oiaio kela. He nui no hoi na hana hoopunipuni e ae a Kaai w, i hana’i iloko o ia manawa, a no kuu manao o alakai hewa aku ia i ka lehulehu ma ke ano o ka lapaau hoopunipuni, nolaila wau i hoike ai ma ke akea; aka, aole nae hoi au i ike o Inoaole kekahi malaila, i na la mua o ka hoomaka ana e lapaau, a lawe mua i ka $10 mai ka lima aku o ka mai, me ke kanalua ole. Aka, olelo iho la kela, e ola ana no ia ia; aka, i ka nana aku, he ano ola ole ia ia, a i aku o Kahopuna, “ina he pono ole ia oe, alaila, e aho e imi hou aku i Kahuna.” Aole nae he kamilio iki mai o Kaai w, a mahope pane mai kela “Aohe Kahuna e ola’i, e lapaau wale no Kahuna aole e loaa ia lakou keia mai, owau mai no ke ola.” A no keia mau olelo a ke Kahuna, pau loa ae la ko makou imi Kahuna hou ana’ku. A no ka nui o na akua noho iluna o ua Kahuna nei, oia no hoi kela i hoikeia ma ka helu 27, oia hoi o Pua, Kapowaimakanui, Keawenuikauohilo, Kuamu, a he nui aku no koe. Olelo iho la keia mau akua ma na mea nui e pili ana i ke ola o Kamakolu, a puka mai la ka lakou mau olelo a pau ma ko Kaai waha, a o ka makou ia i manaoio ai, kuhi makou e ola io ana, eia kauanei aole. Nolaila, lilo iho la na olelo a pau ana i olelo mai ai, i pahele e haule ai oia iloko o ke meti, a kapa aku la wau ia ia he hoopunipuni.

            Aka hoi, ke ninau nei kuu hoa kamailio, “Owai la o Kimo N. J.?” Eia ka ekemu malaila, owau no ia, aole au i huna i ko’u inoa. Aia ko’u wahi ma ka malu o ka Inia o Hamau, ka hale noho o Laaupana. Owai hoi oe i huna ai i kou inoa, no ka mea, aole au i ike a i lohe hoi i kekahi kanaka i kapaia o “Waimanalo.” A no kau olelo hoolike ia Kaai me na haole, ke i aku nei au, aole i like na haole me Kaai, no ka mea hoi, aohe akua noho mai iluna o na Kauka haole; aka hoi, o oe i kou huna ana i kou inoa, ua like oe me kela Kahuna, a ua like kau mau olelo me ka olelo a kela poe akua hoopunipuni.

            Ke i mai nei ua o Kapilimeaiki, ua lohe ka ia ua hele aku au o Kimo N. J. nei i kahi o ka ahaaina hoomanao la make, a uwe malaila, a hula malaila i na mele haumia.

            Ke ninau nei au, i lohe oe ia wai? I moe hewa paha oe i ka po nei? I moe no i Kaniku i ka loa o Alakai. O kou koena kamalii paha ia e ka hoa, o kou lawe ana mai i na olelo o ka moeuhane, a me ka lohe pepeiao, a hoike wahahee imua o ka lehulehu. Aole au pela e ka hoa, ka lawe mai i ko hai ike, a me ko hai lohe a hoike ae ma ke akea, he ikemaka maoli ko’u, a he lohe pono loa ko’u. Ke hoole aku nei au aole wau i uwe, a aole no hoi au i hula ma ia ahaaina hoomanao la make.

            Nolaila, eia ka’u ninau; O oe io no anei e Kaai keia e pane mai nei iloko o ka nupepea a he mea e anei? I kuu manao ana he mea e no. Ke ninau hou aku nei au, i hea iho nei la oe i ka wa i hoopuka ai au i ka’u mau olelo, i ka la 27 o Iune, i ke kaapuni paha oe ma ka ilihualala o ka honua, i lohe ole ai oe? A i ole ia he kuli paha kou pepeiao, e ohikihiki ke kokuli. Ina paha i lohe kahiko oe ina la ua ekemu kahiko mai, akahi no ka oe a lohe.

            Nolaila ua hoike ia iloko o ka pepa o ka pule i hala aku nei, he keiki kupa oe no Waimanalo, a ke hoole mai nei na ole eha (4) o ka Mahina kau, a me na ole ekolu (3) o ka Mahina hiki mai, a ke hoole mai nei na kamaaina o Wamanalo aole oe he kupa kanaka. A ke olelo nei oe, ma ke kukulu hope o kou manao, ina ka owau he kanaka maikai aole la e alawiki i ka hoolaha, mai pono no ia ina la he kane o Kaai, aole la he olelo ana, nolaila, ke i @ho nei au, he makapo ka paha kuu@hoa, i ike ole ai i ka olelo i hoolahaia no Waahia. A ina o oe e ke hoa he kanaka i ku i ka rula o ka poe maikai, heaha kou mea i papa ole aku ai ia mea. E nana i ka Palapala Hemolele no Adamu, a me ka hewa o Ewa. Aole ke Akua i huna malu ia hewa, e like me kau e kapulu mai nei, oia hoi kahi mele i oleloia: hai ka lauaalii ka lawakua, popo lu i ke ala i Kalokini lumilumia ka pali o Waialoha.

            Aole o’u manao e hooloihi i kuu olelo ana, aka, no kuu mana, o aui a uanei ka manao o ka lehulehu ma ka olelo a keia kanaka, nolaila, ke kuupau nei au i ke kihikihi, a koe no kekahi.

            E ka Luna Hooponopono o ka Nupepa Kuokoa, e hoomanawanui oe i kuu wahi ukana, e hookomo iho ma ka pepa o keia pule. Me ke aloha.                        KIMO, N. JOHN.

            Waimanalo, Oct. 14, 1863.

Inu papipi ma keia apana

O WAIMEA

            Ke inu nei na kane a me na wahine i ka papipi, ina i lohe lakou aia ka papipi ma ke kaha, a i ole ia, ma ke kau wahi e aku paha, ka hana iho la no ia o ka lio, eia ka lakou olelo, “Aloha oukou he ala lio ko makou,” o ka holo iho la no ia.

            O ka hana a ka poe inu papipi o ka hele o na kane a me na wahine a me na keiki, me na lou ma ko lakou lima, a me na ipu, e waiho ai o ka papipi.

            O ka na keiki papipi he mea ai no na lakou, ina he makua inu papipi ko kakahi keiki, o ka lilo aku la no ia i ka makua kana kapipi. Ua hooinu no paha kekahi mau makua i ka lakou mau keiki, ina pela, ua hooinu na makua i na keiki. Aloha ino na keiki i ke komo ana i ka luamimilo a na makua inu papipi.

            O ka lakou mea e inu nei, ua like me ke koko a ka bipi a me ka puaa i hou ia i ka pahi, pela ka ulaula, o na lima o ka poe nana e hoowali ka papipi, ulaula no, a me ka ulaula pu no o kahi kapa.

            O na kino o kekahi poe inu papipi, olohelohe wale no, ua like me ka pupule; o ko lakou waha, ohi wale mai no i ka makani, o ko lakou maka, hoolelehu mai me he mea a@a ua pula i ka lepo.

            Eia kekahi hana a lakou, o ka ahaaina, kalua ka ai a nui, alaila, kalua ka puaa, inu na papipi, a ona, hakaka kekahi poe, huikau aku me na kane moekolohe, pela na wahine moekolohe. Nui ko lakou hololio i ke ao a me ka po, ke hoka wale nei no lakou i Heleloa i kahi nui o ke ahuawa.

            Ua lohe mai no au i kekahi kanaka o Niihau, he oi loi aku o ka inu papipi malaila.

            Nui ko’o aloha i keia makamaka o kakou, ke komo nei lakou iloko o ka nenelu o Maunahina, e hiki aku ai i Aipo.

            Ua makapaa paha na maka o na makai, ua makapo maoli paha.

            O keia hewa e ulu nui nei maanei, o ka wa e pala ai o ka papipi. Pehea la e pio ai keia pele o Kilauea e a nei maanei.

            J. W. KAPEHE.

            Waimea Kauai, Oct. 2, 1863.

“I can’t.”

            Heaha la ke ano o keia huaolelo i kakauia maluna? Eia no, “Aole hiki ia’u.” He wahi kano ka’u e hai aku nei ia oukou no keia huaolelo. Ua ike au i kekahi keiki, he umikumamalua paha kona mau makahiki, ua maa loa oia i keia olelo. Ina ua kauohaia, a ina ua noiia e hana i kekahi mea, eia wale no kana pane, “aole hiki ia’u.”

            I ka wa e noho ana iloko o ke kula,aole paa pono na haawina, a ina ao mai ke Kumu ia ia no ka paa ole o ke haawina, eia wale no kana olelo, “aole hiki ia’u ke hoopaa.” Manao iho la ke Kumu, he loihi loa paha na haawina i haawiia, he oiaio paha aole hiki ke hoopaa; nolaila, hoopokole mai oia i na haawina, a hoopokole hou, aka, he mau no ia olelo ia ia, “aole hiki ia’u.” Manao iho la ke Kumu he pono ole keia, pono ia’u ke hoopau i keia; no ka mea, ina e hoomau keia keiki, aole no e holo mua ana ma ka ike, a e lilo no i kanaka lapuwale.

            Noonoo nui ke Kumu, a mahope manao o ia e like me ka hana a me ka olelo a keia keiki, pela no ia e hana aku ai maluna ona. I kekahi kakahiaka, i ka hoomaka ana o ke kula, e heluhelu ana na haumana ma ke Kauoha Hou, olelo ke kumu aole heluhelu o Holaki, no ka mea, oia hoi ka inoa o ua keiki iki nei.

            A liuliu iki, noi aku la o Holaki i ke Kumu e ae mai ia ia e kii i kona penikala, ua haule ma ka papahele. Pane aku ke Kumu ia ia, “na’u e kii aku i kou peni, no ka mea, ua manao au aole hiki ia oe ke kii.” A hiki mai ka wa hoomaha no ke kula, kauoha aku la ke Kumu ia Holaki e noho mai maloko o ka hale kula, aole hele iwaho e paani ai me kamalii, me ka i aku, “he mea hiki ole paha ia oe ka paani?”  Pela ka hana a ke Kumu; a kokoke pau ka wa kula, ninau aku la o Holaki ia ia, “aole oe e ae mai ana ia’u e kula hou ma na haawina!” Pane aku la ke Kumu, “ua makemake loa au ia oe e kula ma na haawina a pau; aka, ke olelo mau mai nei nae oe ia’u aole hiki, a ina he oiaio ia olelo au, he mea hiki ole io no ia oe, alaila, aole pono ia’u e kauoha aku ia oe e hana i kekahi mea hiki ole.” Ninau aku la o Holaki i ke Kumu, “e hele hou mai anei au i ke kula?” Pane aku ke Kumu, “ae, ina he mea hiki ia oe, e hele mai no.” Ma ia wa, uwe waimaka iho la o Holaki, me ka olelo ae, “ma keia hope aku, e hooikaika nui ana au i paa pono ka’u mau haawina kula a pau.” Lanakila ke Kumu. Ma ia hope aku, ua paa pono na haawina a pau a keia keiki, a aole hoi i puka hou mai kela olelo ma kona waha, “Aole hiki ia’u.” Aka, ua hoomau aku kona hooikaika ana ma na haawina kula a pau, no ia mea hoi, ua olioli loa ke Kumu i ka holo mua o keia keiki.

            Nolaila, e o’u mau makamaka opiopio, aole loa e olelo, “Aole hiki ia’u;” aka, e hoola i ka ikaika a pau o ko oukou manao, a e hoohauoli i ka naau o na makua, a me na Kumu a oukou, ma ka hooikaika ana e hoolilo ia oukou iho i poe naauao a me ka pono, no ka mea, o ka poe pono io, o lakou wale no ka poe kaulana io. Me ka mahalo.    O.

Hoike Kula ma Maunaohukia.

E ka Nupepa Kuokoa e; Aloha oe

            Ina he mea pono i kou manao ke hookomo iho ma na wahi kaawale o kou mau aoao i keai mea maikai a’u i ike ai.

            Eia ua mea la. Ma ka la 22 o Sepatemaba nei, ua hui ia ka hoike o na kula ekolu mai Paauhau a Kaala, ma ko makou luakini ma Maunahoano, ma ka hora 9 o ke kakahiaka o ua la la. Ua puka mai o D. Waiau, ke Kahukula, a me ke kula o Paauhau, a me kekahi mau keonimana e ae i hele huakai mai maluna o na lio, a mahope mai ke kula o Kaala, a ua puka mua mai hoi ke kula o Maunahoano, a e hoolai ana lakou ma kahi i hoomakaukauia no ka hoouka aku.

            Ia manawa, ua kohoia e ke Kahukula eha mau Komite, o J. P. Kekoi, A. M. Kenway, J. W. Kahiamoe, a me L. Kaoo; i mau mea nana i na haumana oi ma na palapala i aoia ma kela kula keia kula. Ma ia hope koke iho no, o ka hoomaka no ia o ka hoike ana ma ka heluhelu, Huinahelu, Helunaau, Palapala Aina, Pa-ko-li, Helukamalii, Kumumua ano hou, Hookui hua me ka A, Haiolelo kekahi mau haumana o ke kula ma Maunahoano.

            Ua maopopo ma keia hui ana a ke Kahukula i ka hoike ana ma kahi hookahi, e akaaka ai ke kula oi o ke akamai ma na palapala i aoia i na haumana, ua holo mua ka naauao ma keia mau kula ekolu, a o ke kula oi nae ma keia hoike ana, o ke kula ma Paauhau, a o ke pookela oia kula, o Kaukaahalani.

            Mahope iho o ka pau ana o ka hoike, ua hoike mai na Komite i ko lakou mahalo i na mea i hanaia e na haumana a me na Kumu, a o ke Komite i oi ka hooikaika ma ka paipai ana i na haumana a me na makua, oia hoi o A. M. Kenway. Ma ia la i akoakoa mai ai na makua a me na makaikai a piha pono ka luakini, e hoopuka ana i ko lakou mahalo ma ka paipai ana o na lima, a me ka pane olioli ana mai ma ka waha.

            Ina pela e hooikaika mai ai na makua, na Kumu, a me na haumana, ma ka imi naauao a me ka malama ana i ka pono, alaila, e ko ana ka olelo kuahaua a ka Moi Kamehameha IV, “O ke kanaka malama i ka pono, oia ko ke ‘lii kanaka.”

            Ke waiho aku nei au i ko’u manao aloha i ka Luna Hooponopono, a me ka poe paahana o ka halepai, a me na makamaka o ka Nupepa Kuokoa, mai ka la puka i Haehae, a ka la welo i Lehua. Aloha no kakou, ke hoi nei au e luu i ka wai o Kopalinahenahe.

            S. KAMELAMELA

            Hamakua, Hawaii, Sept. 28, 1863