Ka Nupepa Kuokoa, Volume II, Number 33, 15 ʻAukake 1863 — Aloha ole maoli. [ARTICLE]

Aloha ole maoli.

E ka Nupepa Kuokoa e; Aloha oe; Ke hai aku nei au ia oe i ka hana aloha ole o kekahi poe kanaka ma Mauka. Penei no ia, ma na la hope iho nei o Iune, hele mai la kekahi wahine mai Kau mai, o Kanehailua ka inoa, i huli mai i kana kane ua hele e mai ke kane mamua. A hiki oia ma ka aina i kapaia o Mauka, poelelele loa, kipa ae la oia ma ka hale o kekahi poe kanaka, olelo aku la ua wahine nei, "Manao au e moe maanei; a ao hele au e huli i kuu kane." "Aole oe e pono ke moe maanei, he ai no nae kau?" Wahi a Kaopua, kekahi o ia poe kanaka. "Aole o'u pololi, he ai no ka'u" o kuu moe iho ka la a ao ae, "Wahi a ka wahine." No ka ae ole o keia poe kanaka i kona noi aku e moe malaila, kona hele aku la no ia i ka poeleele i loko o ka ulu ohia, me kona lio e kai hele ana. Iaia i loko o ka ulu ohia, me kona ike ole aku he awawa keia E puiwa aku ana ka lio o ka haule no ia i loko o ke awawa, a make loa ka lio, pakele mai kona ola, mai haule pu i loko o ke awawa hookahi. Kau maila ma makau iaia, hoi hou oia a hiki i ka hale o keia poe kanaka ana i kipa mua ai, pane maila ua poe kanaka nei, "Eia hou no oe?" "Ae i hoi hou mai nei au ianei e moe ai." Ua make kuu lio ua lapuia e ke kua, ua haule i ke awawa, a make loa, "Wahi a ka wahine." "Aole oe e pono ke moe maanei, no ka mea, aole a makou ai." kupu hou mai la iloko ona ka manao makau. He manao koho wale iho kona, e powaia paha auanei au e keia poe kanaka, o kona hele hou no ia iloko o ka ulu ohia e moe ai ia po a ao ae, hele loa oia e huli i kana kane, o kona hoa hele o ka lio, ua waiho kona kino kupapau maloko o ke awawa. E na hoa heluhelu o nei mea he Nupepa, ke ike pu ae la no kakou i ke aloha ole o keia poe kanaka i ka wahine i loaahia i ka pilikia. O ke kipaku ana a keia poe kanaka a o Hilo o ka aina ua nui, o ka make no la ia i ka opili i ke anu. E na makamaka o ka pae aina o Hawaii nei, mai Hawaii o Keawe, a Kauai o Manokalanipo, a i halawai hou kakou me ka pilikia i like me keia e hookipa ka pono, mai nana maka e like me keia poe. Eia ka Iesu, "E aloha ae i kou hoalauna, me oe ia oe iho. E aloha auanei. J. B. N. KAEHAKOLONAHE. Honomalino, Kona, Hawaii, Iulai 16, 1863.