Ka Nupepa Kuokoa, Volume II, Number 31, 1 August 1863 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

BUKE II.  HELU 31  HONOLULU AUGATE 1, 1863. NA HELU A PAU 88

 

"KA NUPEPA KUOKOA,"

HOOPUKA MAU IA MA HONOLULU

I kela Poaono keia Poaono.

$2.00

No na mahina he UMIKUMAMALUA!

$1.00 no na mahina eono.

ME KA HOOKAA MUA MAI.

----------

NA OLELO HOOLAHA—aole i oi

mamua o 10 laina no ka hoopuka hookahi

ana, $1.00; alua komo ana, he $1.50;

hookahi malama, $2.00. E uku mua ia mai

ke dala o na olelo hoolaha a pau e hoounaia

ana mai e pai.

KANIKAU—he hapalua dala ka uku

no ka aoao hookahi o ka pepa leta, oia hoi 4

keneta no ka lalani hookahi—penei: he 25

lalani, $1.00; 50 lalani, $2.00; a pela'ku.

NA UKU NO NA OLELO

HOOLAHA—ka uku pepa, a me ka uku o

ke Kanikau, e haawiia no ma ka lima o na

Luna o ke Kuokoa, a i oleia, e hoouna mai ia

Kauka Kulika.

O NA UKU PEPA A PAU E

HOOKAA MUA MAI NO—aole e kauia ka

inoa o kekahi haole a kanaka maoli paha, ma

ka inoa o ka poe lawe pepa ke ole e hookaa

e mai mamua. E pono ke hiipoiia keia mau

rula, no ka mea, he emi no ka auhau no keia

nupepa.

AIA KE KEENA O KA NUPEPA

KUOKOA—ma ke kihi hema o ka Hale

Hookipa Luina (Sailor's Home.) O na hora

hana, ma ka eiwa o kakahiaka, a i ka ha o ke

ahiahi.

L. H. KULIKA. (Luna Hoopuka.)

 

KA "NUPEPA KUOKOA."

Is published in Honolulu

EVERY SATURDAY,

$2.00 per annum, or $1.00 per six

months, in advance.

ADVERTISEMENTS not exceeding

10 lines, inserted once for $1.00; twice or

$1.50; and $2.00 for one month; all

advertisements must be paid for in advance.

KANIKAUS will be charged 1.00

per page, or 4 cts. a line. PAYMENTS FOR

ADVERTISEMENTS, Subscriptions or

Kanikaus, may be paid to any of the Agents

of the Kuokoa, or may be enclosed in a letter

to the Publisher.

ALL SUBSCRIPTIONS must be

PREPAID. No names, either of foreigners or

natives, will be inserted on the subscription

list, until paid for. This rule must be strictly

adhered to, on account of the low

subscription price.

THE OFFICE OF THE KUOKOA is

in the South corner of the Sailors' Home.

Office hours from 9 A.M. to 4 P.M.

L.H. GULICK.

For the Publisher.

Volume I, II, and III of the KUOKOA,

bound, for sale, $3.50 each.

Persons having complete sets of the above,

can have them bound by paying $2.00 each.

He Uhane no Samuela.

He uhane he aloha nou e Samulea.

Ka uhame hele loa mahu ole mai, e aloha oe,

Auhea oe?  Hoi mai kaua he anu Koolau - e.

Kuu kaikunane i ka ua lei koko ula,

Lei awili lehua o Kanakea,

I hoopuluia i na lehua o Kukalia i Maunaloa,

Auhea oe?  Kuu kaikunane hoi.

Aloha kuu kaikunane mai ka ua pohina mai i ke kuahiwi,

Mai ka moae kuehu kai e ka moana,

Ana wale hoi au i ko aloha - e;

Auwe, kuu kaikunane hoi.

Noho makou me ka u me ke kanikau ia oe,

O ko aloha ka hana a loko e lia mau nei,

E haloi nei na waimaka i ko aloha pau ole ke noho - e.

Auhea oe?  Kuu kaikunane hoi.

Ua wehe hookao i ka pili me ka wahine,

Ka hoa ohunu o ka po loloa o ka hooilo,

Hoa kuwili haihai olelo o ka manao iini a loko - e, ilaila ke ola,

Auwe, kuu aloha pau ole ke noho - e.

Kuu kaikunane mai ka pohu lai o ka aina,

Mai ka hono o na moku,

Moku kakou, okiia e ka make, pale ka ike,

I ka hoa pili la he wahine,

Mai na kai ewalu, mai na ale o Pailolo - e;

Auwe, kuu kaikunane hoi.

Kuu kaikunane mai ka wai awili pu me ke kai o Punaolohe,

Wai lumilumi houpo a ka uhane hoohiu - e;

Auhea oe?  Hoi mai kaua, he anu.

Kuu kaikunane kui lehua maka noe,

Mai ka lehua puakea o Makanou.

A Papiohuli au u ana i ko aloha - e;

Auhea oe?  Hoi mai kaua, he anu.

Kuu kaikunane o ka wai hoope ili o Waipahu,

Lea ke kaawili wai a ka ua i ka nahele,

Ke hehi mai la i ka liko o ka Ohia,

I hoopulu ia e ka lau o ka Awapuhi - e;

Auwe, kuu kaikunane hoi.

Kuu kaikunane mai ka makani o Kapuulena,

Mai ka wai iniiniki lehua o Pohakupili - e;

Auhea oe?  Kuu kaikunane hoi.

Kuu kaikunae mai ka wailele o Moaula,

Me he kapa kea la i kuu mau maka,

O ka huna o ka wai kai pili me ka leo o ka manu - e;

Auwe, hoi mai kaua, he anu Koolau.

Kuu kaikunane mai ka wai o Niheukawa,

Ke hooipo la me ka lipo i ka nahele,

Me Laukiamano i ke kui pua la - e;

Auwe, kuu aloha pau ole.

Kuu kaikunane mai ke kula loa o Kuala,

Mai ka hulei makani he Waikoloa,

Kainepu ka holo ana a Samuela,

Aia ka ilina i na Puukolu - e;

Auhea oe?  E maliu mai.

Kuu kaikunane mai ka malua halau loa a ka makani,

Mai ka malu kukui o Lanikaula,

E nana ana i ka pali o Kaukini.

Ka uhane kino wailua o Samuela - e;

Auhea oe?  Hoi mai kaua, he anu Koolau.

Kuu kaikunane mai ka i-a ka wawae o Hilia,

Hili hewa kau hopu ana i ka Loli,

Kela i-a nui loihi maka ole,

O ka makamaka no na lima,

Nana i kii anoi ka manao e hopu,

I ka uhane kinowailua o Samuela - e;

Auhea oe?  E maliu mai.

Aole oe he kaikunane, he hoa pili no ke ala,

No kela aina makamaka ole o Punaluu,

Luuluu ka naau kaumaha i ke aloha - e,

Auhea oe?  E maliu mai.

Kuu kaikunane i ka ua poai hala o Kahaluu,

I lu ia e ka hala onaona o Kekele,

Mai na lehua popohe i Kaana la - e;

Auwe, kuu kaikunane hoi.

Kuu kaikunane i ke koa mokumoku o Heeia,

Mai ka makani wehewehe lua o Nuuanu,

Anu ka po o ka wahine, ua hele oe la - e;

Auhea oe?  Hoi mai kaua, he anu

LOSE OPEALU.

Puaho@uli, Lahaina, Maui Iulai 21, 1868.

HE KAAO

NO KE KEIKI ALII OPIO

CAMALAZAMANA.

A ME KELII WAHINE OPIO

BADOURA.

I unuhua neloko mai o ka Arabian Nights, hoomakaia mai ka po hookahi haneri me kanahiku a pau i ke koena o ka po elua haneri me kanaha kumamaiwa.

"KA MOOLELO O NA KEIKI A CAMALAZAMANA, O AMIGIADA ME ASADA."

HELU 10

MAHOPE IHO, IHO AKU LA UA kaikamahine kauwa nei e pepehi ia ianei, a no ka ikaika loa o ka hiliia ana, nolaila, maule iho la keia; a waiho aku la ua kaikamahine nei i ka palena ame ona kiaha waikai, a hele aku la ua kaikamahine nei.  Iwaena konu o ka po kona pohala ana ae, ua paa i na kaulahao, a ua puni kona kino i ka eha; a haha ae la keia ma kona poo, loaa ia ia ka papaa palena ame ke kiaha waikai, alaila, ai iki iho la keia i ka palena, a inu iki ae la i ka waikai, i mea e mau ai ke aho, a noho iho la me ka hiaa a ao ua po nei.

I ke kakahiaka ana ae, iho hou aku la no ua kaikamahine kauwa nei, a huki ae la i ko ianei lole; ua oki loa ko ianei mau wahi lole i ke koko, a ua pipili i ka ili, nolaila, i ka wa i hukiia mai ai o ka palule, ua lilo pu mai la me ka ili; nolaila, uwe ae la keia a nui, "Auwe!" a kahea ae, "E kuu haku, i na he pono keia i kou manao, alaila, e hoonui mai; no ka mea, aole oe e poina ana i ko'u mea nana e hana ino! nolaila, e hoopai oe ia ia no'u!"

I keia manawa a pau loa e hanaia nei keia eha maluna ona, e kali mai ana kona kaikuaana ia ia , a awakea o ia la; a no ka hoi ole ana aku o ke kaikaina, nolaila, lelele ae la kona oili; a ikaika loa mai la ka eha no ke kaawale ana aku o ke kaikaina, uwe iho la oia.  Ia manawa, iho mai la oia mai ke kuahiwi mai, me ka waimaka e hiolo ana i na papalina, a komo ana keia iloko o ke kulanakauhale, a hele loa aku la no keia a hiki i ka makeke, ninau ana keia i ka inoa oia kulanakauhale; a pane mai ke kanaka, "Ua kapaia keia o ke Kulanakauhale o ka Magiana, a o ka nui o kanaka o keia wahi, he hoomana i ke Ahi, mamua o ke Akua Mana Loa."

Alaila, ninau hou aku la no keia no ke kulanakauhale o Eboni, a pane mai no lakou la.  "O ka loihi mai anei alaila, ke hele mauka, hookahi makahiki; a ma ke kai hoi, eha malama, o Amanasa o laila Moi, a he Moi no hoi kana hunona, o kona inoa, o Camalazumana."  I ko ianei lohe ana i ka inoa o kona makuakane, uwe iho la keia; a no ke akaka ole no hoi kekahi ia ia o kahi e hele ai a hiki ma ia wahi.

Ia manawa, kuai iho la keia i wahi mea ai nana, a hele aku la keia i kahi e pee ai, a noho iho la e paina; aka, i kona hoomanao ana ae i ke kaikaina, uwe iho la keia, a pau koke ae la no kana paina ana, a pau ia, hele aku la keia maloko o ke kulanakauhale e ninau ai no ke kaikaina.

Loaa aku ia ia he Mahomeda, he Kelahumu lole kana hana, e noho ana no iloko o kahi hale ona; a noho aku la no hoi keia ma ko iala aoao, a hai aku la i kona moolelo; a olelo mai ke Kela, "Ina oia ua loaa i kekahi o ka poe Magiana, alaila, aole paha oe e ike hou ia ia; malia paha o hoohui hou mai ke Akua ia olua."  Mahope koi mai ua kanaka nei e noho pu laua; ae aku la no hoi keia.

He nui na la o ko laua noho pu ana, me ka imi o ke Kela i mea no ianei e lana ai ka manao, a aoia mai no hoi keia i ka humuhumu, a akamai loa keia.  Mahope iho, hele keia ma kahakai e holoi ai i na wahi lole ona; a i ka hoi ana mai, hele keia i ka auau, a komo hou i wahii lole hou nona, a hele aku la keia ma ke kulanakauhale e makaikai ai.  Ia ia e makaikai ana, halawai oia me kekahi wahine maikai, aohe lua o kona nani; a i kona ike ana mai ia ianei, wehe ae la oia i kona uhi maka, e awihi mai ai ia ianei, a olioli mai i keia mau wahi mele:

"Ua ike aku au ia oe e hele mai ana, a kulou iho ko'u mau maka ilalo, me he mea la, o oe ka la e puka mai ana.

"No ka mea, o oe ka nani loa i hoea mai, a ua oi aku i keia la, mamua o nehinei

"Ina e maheleia ka nani i hookahi hapalima, a o ka hapa o ka lima, no Jusaia.

"A o ke koena iho nou a pau loa; e hooliloia na uhane a pau oa, i mohai no kou!"

I ko Amigiada lohe ana i ka iala mele, piha ae la kona puuwai i ka olioli, a neenee aku la keia i ona la, mahope hoopuka aku ia no hoi keia i kana wahi mele.  I ka pau ana ae, koi mai kela e kamailio laua; nolaila, olelo aku keia, "O oe ke hele mai i ko'u wahi, a i ole, owau ke hele aku i kou wahi."  Alaila, kulou iho la ko iala poo ilalo no ka hilahila, a hoopuka mai no ka haawi ana mai a ke Akua i ka mana i kane maluna o ka wahine.

Nolaila, akaka aku la no hoi ia Amigiada ke ano, e i mai ana kela e hele ma ka ianei wahi e makemake ai; lilo iho la ia ianei ke alakai, a no kona hilahila i ka lawe ia iala i kahi o ke Kela, nolaila, hele aka la oia mamua, a hele mai la ka wahine mahope; a hele aku la laua nei mai kekahi alanui a kekahi alanui, pela ka ianei hoolalau hele ana a maloeloe ka wahine, olelo aku, "E kuu haku, aia i hea kou hale?"  Pane aku keia.  "Eia mamua o kaua, he wahi iki no hoi koe hiki aku."

Huli ae la laua nei he alanui okoa, o ianei no mamua, o ka wahine mai no mahope, a hiki laua nei i ka pau ana mai o ua wahi alanui nei.  Huli ae la keia nana ma ka aoao maluna o ke alanui, ike aku la keia i ka puka o ka hale me na noho elua, ua lakaia nae ka puka; nolaila, noho iho la keia iluna o kekahi noho, a o ka wahine iluna o kekahi noho, a olelo mai kela, "E kuu haku, heaha kau mea e kali nei?"  Kulou iho la keia ilalo a ea ae, olelo aku la, "E kali ana au i kuu kauwa, aia ia ia ke ki o ka puka o ka hale, a ua olelo aku au, "E hoomakaukau oe i ka mea ai, ame ka mea inu no maua i kuu wa e hoi mai ai mai ka auau mai."  Alaila, olelo iho la keia iloko ona, "Malie o kakali kela a molowa, hele aku a haalele iho ia'u i anei."

Aka, no ka uluhua loa o ua wahine nei, nolaila, olelo mai kela, "E kuu haku, lohi maoli ka hoi ko kauwa, aole kaua e kala e kali nei maanei, aohe noho a hiki iki mai."  Alaila, ku ae la ua wahine nei, a hehi aku la i ka puka a naha, a hemo ae la ka puka; olelo aku keia, "Heaha keia ou i wahi iho nei i ka puka o ka hale?"

Pane mai la kela, "Aole anei keia o kou hale?"

Pane aku la keia, "Ae, aka aohe kumu nui o ka wahi ana o ka puka."

Aka, komo aku la no ua wahine nei, a pihoihoi loa iho la keia no ka maka'u i ka mea nona ka hale; a pane hou mai no ka wahine, "Heaha kou mea e kono ole mai nei, e kuu haku, ka malamalama o ko'u mau maka, ame ka anoi a ko'u puuwai?"

Pane aku keia, "Ua lohe au, a ke ae aku nei; aka, ua lohi maoli ke kaawa, aole no hoi au i ike, ua hoomakaukau paha oia i ka'u mea i kauoha aku ai ia ia."  Alaila, komo aku la keia me ka maka'u i ka poe nona ka hale, oloko o keia hale, ua hoonaniia a maikai loa, a ua hoolakoia i na mea ai he nui wale, ame na mea inu e kau ana iluna o ke pakaukau.

I ko Amigiada ike ana iho la ia mea, pilikia maoli kona mano, a i iho la iloko ona "E make ana ka wau?  He oiaio, no ke Akua kakou, a i ona'la no e hoi aku ai?"

Aka, o ka wahine, ua piha loa oia i ka olioli, a olelo ae, "Ma o Alahe, e kuu haku, aohe i poina ko kauwa i kana hana; no ka mea, ua pau ka hale i ka burumiia, a ua moa ka mea ai, a ua hiki mai nei au i ka manawa kupono."  Nana aku la keia me ka hoaa i ka maka'u i ka poe nona ka hale; pane hou mai kela, "E kau haku, heaha kau e ku nei?"  Alaila, hoai mai la ua wahine nei ia Amigiada, a uina e like me ke kukui i ka wa e wahiia iho ai, alaila, olelo hou mai la kela, "Ina oe i hoomakaukau i keia mea no kekahi mea eaku, alaila, owau kana kauwa."

No keia mea, akaaka ae la o Amigiada me ka manao i piha i ka huhu; alaila, hele aku la keia a noho ma ko iala aoao, a olelo iho, "Auwe kuu make mainoino i ka mea nona ka hale, ke hoi mai oia?"  O ua wahine nei, aohe ona wahi manao pilikia iki; noho iho la oia a hoolale mai ia ianei e ai; a ai aku la keia me ka ono ole, me ke kau no o na maka ma ka ipuka, a hiki wale i ko iala wa i maona ai; alaila, lawe mai la ua wahine nei i ke kiaha uwaina a haawi mai ia ianei, a hopu aku la no hoi keia, a olelo iho, "Heaha la auanei ka'u mea a ike ai, ke hoi mai ka mea nona ka hale?"  Ia ia e paa ana i ke kiaha, a e nana ana no iwaho, e hoi mai ana ka mea nona ka hale.

O kekahi luna ia o ke kulanakauhale, a nana no i hoolako ua hale nei no kona lealea iho; ia la, ua kauoha aku eia i kekahi hoalauna ona e hele mai, oia ke kumu o kona hoomakaukau ana i ua hale nei.  O ka inoa o keia kanaka, o Bahadela; he kanaka oluolu nae oia, a he lokomaikai no.  I kona hiki ana aku i ka hale, loaa aku ia ia ka puka e hamama ana; a i kiei mai kona hana, ike mai la oia ia Amigiada ame ka wahine, me ke pa hua momona mamua o laua, ame ka uwaina.

Ia wa e paa ana no o Amigiada i ke kiaha uwaina i ka lima, a e nana ana no keia ma ka puka, i ka wa i halawai ai o kona mau maka me ko ka mea nona ka hale, ua kahuli ka ike o kona mau maka, a haululu na a-a o kona mau aoao.   I ka wa o Bahadela i ike mai ai i ke ano e o ko ianei helehelena, kau mai la oia i ka manamanalima ona i ka waha, ame he mea la e olelo mai ana, "Mai pane oe, a e hele mai i o'u nei."  O ko ianei waiho iho la no hoi ia i ke kiaha, a hele aku la; i kona ike ana aku ia Bahadela, akaka iho la no ia o ka mea ia nona ka hale.

Ia manawa, hele aku ia keia a honi aku la i ko iala lima, a olelo aku, "Ma o Alahe, e kuu haku, ke noi aku nei au ia oe, mamua o kou hana ino ana mai ia'u, e lohe mua oe i ka'u olelo."  Alaila, hai aku la keia i kona moolelo mai ka mua a ka hope, i ke kumu o kona haalelo ana i kona one hanau.

I ko Bahadela lohe ana i ko ianei moolelo, ame kona ike ana iho la he keiki keia na ka Moi, nolaila, komo iho la ke aloha iloko ona, a olelo mai, "E hoolohe oe e Amigiada i ka'u mau olelo, alaila au hooia aku i kou pakele, mai kau mea e maka'u nei; a ina oe e hoolohe ole i ka'u, alaila make oe ia'u."  Pane aku keia, "E olelo mai oe i kau mea e makemake ai, a e hoolohe aku au."

Alaila, olelo mai kela, "E komo hou oe iloko o ka rumi, a noho ma kahi au i noho mua ai; a mahope au komo aku, o Bahadela ko'u inoa, a i ko'u wa e komo aku ai nuku mai auanei oe ia'u, a olelo mai, 'Heaha ke kumu o kou noho loa ana?'  Mai noho oe a kala mai ia'u ke mihi aku, aka, ku ae oe a hili mai ia'u; a ina oe e hoike i kou aloha ia'u, alaila oe make ia'u.  Nolaila, e komo aku oe a e hooluolu i kou manao, a o kau mau mea a pau loa e makemake ai, na'u e haawi aku; o keia po nou, apopo oe hele.  Pela wau e hoike ai i ko'u aloha i ka malihini; no ka mea, he aloha au i ka malihini."

O ko Amigiada komo hou aku la no hoi ia iloko o ka hale; a mahope iho, olelo aku keia i ka wahine, "Ma o Alahe, e kuu wahine, ua lawe paha kuu kauwa i kekahi mau lei gula o'u, a oia ko'u mea i hele aku nei e huli, a loaa aku nei no ma ko lakou wahi; aka, aole nae au i ike i ke kumu o kona noho loa ana a hiki wale i keia wa, nolaila, e pepehi ana au ia ia ke hoi mai."  Noho iho la laua nei, inu, hana lealea a hiki i ka napoo ana o ka la.

Ia wa, hoi mai ana o Bahadela, ua hooano e i na wahi lole ona, a honi iho iho la i ka lepo imua o Amigiada, a opea ae la i na lima i e kua, ame he mea la e ae mai ana i kona hewa.  Alaila, nana aku la o Amigiada me na maka huhu; a olelo aku, "Heaha ke kumu o kou hele loihi loa ana?"

Pane mai kela, "I noho aku nei au e holoi i o'u mau wahi lole, aole no hoi au i ike, ua hoi mai nei oe; o ka wa i oleloia e kaua, o ka po kou wa hoi mai, aole o ke ao?"  Pane aku o Amigiada, "He kauwa wahahee oe! nolaila, e pepehi aku ana u ia oe."

O kona ku ae la no hoi ia iluna, a kulai aku la ia Bahadela, a hahau malie iho oia me ka laau; aka, ku ae la ka wahine a kaili mai la i ka laau a Amigiada, a pepehi aku la ia Bahadela me ka ikaika loa, a uwe maoli kela no ka eha.  Alaila, olelo aku o Amigiada i ka wahine, "Mai hana oe pela?"  Olelo mai kela, "E hookuu mai ia'u e hooko i ko'u inaina maluna ona."  Alaila, kaili mai la keia i ka laau, a ku ae la o Bahadela iluna, a holoi ae la oia i kona waimaka; a mahope iho, hele aku la oia e borumi i na rumi, a e ho-a i ke kukui.

I na wa a pau a Bahadela e hele mai ai, a puka aku, nuku aku la ka wahine; nolaila, huhu o Amigiada ia ia , a olelo aku, "Ma o Alahe, e waiho malie oe i ko'u kauwa, aole oia i maa i keia mea."

Ia manawa, noho iho la laua nei ai, inu, a kuene mai la no hoi kela; a aumoe, luhi kela, a moe iho la iluna o ka papahele; no ka nui loa o ka ona o ua wahine nei, nolaila, olelo mai la ia Amigiada, "E ku ae oe, a e lawe i keia pahi e kau nei, a oki aku i ke poo o keia kauwa; ina aole oe e oki, alaila, imi au i kumu nou e poino ai?"  "Heaha nei ou," wahi a Amigiada, "i makemake ai oe e pepehi i kuu kauwa!"  Pane mai kela.  "Aole e holookoa ko kaua hauoli, ke make ole oia; ina aole oe e ku ae, alaila, owau no ka mea nana e oli kona poo."

Ia wa, ku ae la ua wahine nei, a hopu aku la i ka pahi, me ka manao paa e pepehi i ua kauwa nei; alaila, i iho la o Amigiada iloko ona.  "He kanaka keia i lokomaikai mai ia maua, a ua malama mai no hoi ia maua, a ua hoolilo ia ia iho i kauwa na'u; a pehea la e hiki ai ia maua ke hookaa aku i ko maua aie ma ka pepehi aku?  Aole au e ae ana ia mea!"  Alaila, olelo aku oia i ka wahine, "Ina he make oi ko kuu kauwa, aiaila, owau ka mea kupono ke pepehi aku ia ia."

Alaila, kaili mai la keia i ka pahi mai ka lima mai o ka wahine, a oki aku la i kona poo, a haule iho la ke poo iluna o ka mea nona ka hale; a puoho ae la kela, a ike mai la ia ianei me ka pahi ua oki loa i ke koko.  A nana aku la keia a ike ua make ka wahine; nolaila, ninau mai la oia, a hai aku la o Amigiada i na olelo a ua wahine nei, me ka olelo aku, "Ua hoopaakiki loa kela e make oe, a o kona hoopai keia."  Ku ae la o Bahadela, a honi mai la i ko ianei mau lima, a olelo mai, "E kuu haku, ke kalaia aku nei oe, hookahi wale no mea i koe, o ka lawe ia ia e huna mamua o ke ao ana."

Ia wa, o ko ianei wahi iho la no ia a paa ke kupapau o ua wahine nei, a olelo mai ia Amigiada, "He malihini oe, nolaila, aohe au mea i ike, e noho oe a wanaao au hoi mai; ina wau e hoi ole mai, ua imi ua i kahi e loaa ai o ko kaikaina; a ina i puka ka la, aole au i hoi mai, alaila, manao iho oe, ua hookoia ko ke Akua makemake maluna o'u; alaila, me oe ka oluolu, a o keia hale ame na mea a pau, nou wale no."

I ka pau ana o kana olelo, hopu iho la oia i ka pakeke-ie kahi i waiho ai ke kupapau, a hele aku la keia ma ke alanui e hiki aku ai ma kapa kahakai; a i kona kokoke loa ana aku i ka a-e kai, huli ae la keia nana i hope, ua puni oia i na Lunakanawai ame na Makai.  I ko lakou ike ana mai, hopu mai la lakou i ka pakeke-ie a wehe ae la, a ike iho la lakou, he wahine make ko loko; o kona hopuia iho la no ia, a hoopaaia i ke kaulahao, a pau ke koena o ia po.  Ia kakahiaka ana ae, laweia aku la keia imua o ka Moi, me ka pakeke-ie i waiho ai ke kupapau.  I ka ike ana iho la o ke alii, piha loa oia i ka huhu, a olelo mai, "E make ana oe!  Peia kau hana mau, a pepehi oe i kanaka a hoolei iloko o ke kai, a hao wale oe i ko lakou waiwai!  ehia au mea i pepehi mamua o keia?"  Aka, kulou iho la ko ianei poo ilalo.  A ninau hou mai no ka Moi, "Owai ka mea nana i pepehi keia wahine?"  Pane aku keia, "Owau kona mea nana i pepehi; a hookahi wale no mea mana o ke Akua."

Nolaiia, piha loa iho la ke alii i ka huhu, a kena ae la oia e liia keia lawe aku la ke kanaka ia ianei e li, a hele aku la ka Lunakanawai me ke kanaka nana e kahea ma ke alanui i na kanaka a pau e hele mai e makaikai i ka liia ana o Bahadela.

I ke kakahiaka ana ae, a no ka hoi ole ana aku o Bahadela, olelo iho la keia, "Heaha la ka poino i loaa ia ia?"  Ia ia e nalu ana pela, lohe keia i ke kukalaia aku e hele na kanaka e makaikai ia Bahadela, e liia'na oia ma ke awakea o keia la.  I ko Amigiada lohe ana ia mea, a uwe iho la oia, a olelo ae, "He oiaio, no ke Akua kakou, a he oiaio, i ona la no kakou e hoi aku ai; no ka mea ua ae kela i kona make no'u, a owau ka mea nana i pepehi ka wahine?  Ma o Alahe, aole e hookoia ana ia mea."  O kona ku ae la no ia a hele aku la a ku ana imua o Bahadela, a huli ae la keia a olelo aku i ka Lunakanawai, "Mai pepehi ia Bahadela, no ka mea, aohe ona hewa?  Ma o Alahe, owau ka mea nana i pepehi ka wahine?"

I ka lohe ana o ka Lunakanawai i keia olelo, hopu mai la oia ia Amigiada, a lawe aku la ia laua me Bahadela imua o ka Moi, a hai aku la i kana mea i lohe ai i ka Moi.  Nana mai la ka Moi ia Amigiada, a olelo mai, "Nau oi no anei i pepehi ka wahine?"  Pane aku keia, "Ae."  Alaila, olelo hou mai la ka Moi, "E hai mai oe i ke kumu o kou pepehi ana i ka wahine, a e hai pololei mai i pakele ai oe."

Alaila, hai aku la oia i kona moolelo, ame ko ke kaikaina pu kekahi.  He mea kamahao maoli ia i ko ka Moi mau pepeiao; ia wa koke no, hooliloia ae la keia i Kuhina; alaila, haawi mai la ka Moi ia laua nei me Bahadela i na lole hanohano, a haawi mai i hale maikai no Amigiada me na kauwa; a ina mea no a pau ana e makemake ai.

(Aole i pau.)

Olelo pane ia Kauakanilehua.

oia no o J.A. Kaelemakule.

E ka Napepa Kuokoa e Aloha oe:

E oluolu paha oe i keia wahi olelo pane a kau wahi kauwa haahaa e hookomo iho ma kou kowa kaawale o kou puhaka.  Eia @ ike au i ka olelo pane a "Kauakanilehua" ma ka Helu 82 o kou kino puipui.  Nolaila ua lele hakoi ae na aunaki puuwai a ka manao e pane aku iaia, ke loaa nae ke aloha ia mai e oe, ame kou Luna Hooponopono.  Eia no ia, ke waiho aku nei au i ke kope o kuu olelo paa ma ke alo o na mea a pau, ame kuu hoa paio, a e haliu mai hoi na makamaka ke akea, a e nana mai i na mea o maua i hewa ma keia hooponopono ana.

Ke olelo kaena mai nei kuu hoa, me ke kuhikuhi mai i o'u aina, o Hokukekii i kai o Kahua, ma Kohala, me ka pili ole i kana kumu hoohalahala, ame ka pii ae mawaho o na lala laau maloo hua ole i pili ole i ke kumu, auwe! auwe!! auwe oe e J.A. Kaelemakule-e, kou lauwili ia oe iho, a loaa paha ua nei ia oe ka mai loihi ola ole, (Hano) aloha ino, a eia ea, e ka ua nu hewa iloko o ka ohia.  He ike ole no ka paha ko maka, a he kuli paha ko pepeiao, i lohe ole ai oe i ka olelo i pili i ke kau Kanawai o ka makahiki 1861 i hala ae nei, e olelo ana.  Aole no e ae ia kekahi e noho ma ka oihana o ke Aupuni, ke ao ole ia i ka olelo Beritania, pela ka mea i hooholoia maloko oia Ahaolelo ana i lohe oe

Aka, ke paakiki loa nei na aa koko o kou poo i ka hoohalahala ano e, i like pu ai oe me kou hoa H.K. Poikeke, a ke olelo nei au, mehe mea'la e uhi mai ana ka noe naaupo o ka wa i hala iluna pono o kou mau kuemaka, e poi iho ano i ka ike a kou mau lihilihi, me he mea ala ua pouli hou o Hawaii nei, a me he mea'la o oe wale no oe i kou manao naaupo, auwe! kuhihewa maoli o Kauahuhewa i ke pili, a malie ae, aloha ino oe ke poho iloko o ka auwaha o ke kuhihewa, ame ka lalau, ame ka hoopaapaa ano ole, a ke i mai nei oe.  "He kaua kamalii au he hohe wale, " E ke hoa, alia e pane kaena pela, no ka mea, aole oe i ike pono i kau mea e hana ai, aole no au e lohe ana ia oe, aole au e makau ana i kau mau olelo, no ka mea, o ka nui o kau mau olelo pane, ke i aku nei au, he opala ia he mea puhi na ka makani, aole nae he ano, e manaoio mai ai ka lehulehu, he oiaio kau hoohalahala ana.

Ke ki mai nei oia i kana pu, me ka poka lehu, a ua hala ae'la ia ma kalalau, kahi kokoke i Puueo ko aina, a ma kau pane mua i i  paiia ma ka Helu 73 o ke Kilohana Pookela o ka Lahui Hawaii, ua i mai ua hoa paio nei o'u, ua lapuu ka kuu pahi keleawe, ke hoole aku nei au, aole ka'u he pahi maoli e e  nihomole ai a lapuu ia oe.  Aka, he mea kau pahi ma ko lae wale no e pa ai, a e ike ana no oe i ko ku iho ma ka puka o ka hoka a me ko holo aku i Honolulu aia kou aina la o Hamohamo, kahi nui o ke ahuawa, nolaila, ua oki kau pane ohikau ana, mai hoopiha wale i ka nupepa.

A ina he aa kou e hoolilo mai ia'u i hoa kaua mau no kou mau la i aki ai ke kuakoko, alaila, e huli ae auanei au i hope a nana aku ia oe, a e hai aku no hoi ia oe, e pono oe e wahi mua iho i ko lae a paa me ka lole kapolena manoanoa, i paa hoi paha, aole hoi e pa ko lae; no ka mea, ua lohe au ia Pikoiakaalala, he pana kana ua ku nae ka iole, ma ka umiumi e paa ai, o ka'u hoi he maa, ma ka lae wale no e pa ai, he pohunae ka mea malama.  Eia neia ke i mai nei oe, me ke kaena lua ole, o Beni kuku ole au ma ka pakeke o E. Makaioulu, pau pu kaua a Lanai, kahi o ke aea, no ka mea, o Kauakanilehua kuku ole oe ma ka pakeke o ke Aupuni, a ma ka eke pukapuka a Hakai.  A ke hoike nei au ia oe, o ko ka Moi Ilihia makemake no ia, o ke ao nui ia o kona poe kanaka i ka olelo Beritania.

Eia kana ma ka halawai M.H. 1862 ma Kawaiaho.  E na hoahanau e pule oukou i ke Akua no'u, a no kou lahui kanaka, no ka mea, ke pii nei ka ike hohonu o ka poe opiopio i aoia ma ka olelo Beritania, a o kou makemake nui no ia, o ka hoololi ae o na kula apana o Honolulu, Lahaina, ame Hilo, i mau kula haole, no ka mea, o ka ike ana o na keiki ma ia olelo, he mea ia e pono ai oukou, ame ko'u Aupuni, a he makemake nui au e hoololi ae i na kula o na wahi i oleloia maluna, a na ke Aupuni e uku ka hapa nui a pela aku, aole i pau kuu pane ana ia oe.

S.W. BENI KAULAINAMOKU.

Keaau Puna, Hawaii, Iulai 1, 1862.