Ka Nupepa Kuokoa, Volume II, Number 14, 4 April 1863 — Page 1

Ka Nupepa Kuokoa

KE KILOHANA POOKELA NO KA LAHUI HAWAII

 

BUKE II.  HELU 14              HONOLULU, APERILA 4, 1863.          NA HELU A PAU 71.

 

He mele no ka Ahahuialoha

O LAHAINALUNA, MEI, M.H. 1862.

 

1.  Ke hula nei kakou,

     Na hoa Lahainaluna,

     Me ua kumu kekahi,

     Aloha pu kakou.

 

2.  I keia la no,

     E hui ae kakou,

     Na hoa o ka inea,

     O ka imi naauao.

 

3.  Ka makua no keia,

     O kakou a pau;

     I ao ai i ka ike,

     Me ka noiau pu.

 

4.  Akahi no ka ikena,

     I ka maka o na hoa,

     Ma ke komo akahi ana,

     Ahiki keia wa.

 

5.  Pomaikai kakou,

     Keia hui kamahao,

     Aole mai mua mai,

     Keia wa wale no.

 

6.  Hoomau aku kakou,

     Keia hna maikai,

     Ahiki i ka hopena,

     O keia ola ana.

 

7.  No oukou ke aloha,

     E ka poe e puka ana.

     Me ka poe noho iho hoi

     E aloha auanei.

 

8.  No oukou ke aloha,

     E ka poe makaikai,

     I naue mai e ike,

     Keia hana maikai.

 

9.  Mahalo ia ke Akua,

     No kona lokomaikai,

     Ka waiho ana mai hoi,

     Ko kakou ola nei.

 

10.Na la paha keia,

     O ka launa pu ana,

     E auwe ! auwe!!

     Auwe ! no kakou,

     Auwe ! kakou.

No ka hoouna oleia, ke hoouna nei au.                                               M. KUAEA.

 

KA MOOLELO O LAIEIKAWAI.

MOKUNA XXVIII.

[Hopena]

A NO KEIA OLELO A KA WAHINE kamaaina, alaila, ua ano e ko ke Alii wahine manao, aole nae oia i wikiwiki i ka huhu; aka, i mea e maopopo ai ia ia, hoomanawanui no o Laielohelohe.  I aku nae oia i ke kamaaina, "Malia i hookina ai kuu kane ia'u ka inu awa, ia'u paha e moe ana i ka ona awa, hele kela; aka, ma keia po, e ukali ana wau ia ia."

Ia po iho, homaka hou o Kekalukaluokewa e haawi i ka awa, alaila, hooko aku la no kana wahine; aka mahope o ka pau ana o ka inu awa ana, puka koke aku la o Laielohelohe iwaho o ka hale, a hoolualuai aku la, a pau loa ka awa i ka luaiia, aole nae i ike mai kana kane i keia hana maalea a kana wahine; a i ka hoi ana aku i ka hale, haawi mua iho la ua o Laielohelohe ia ia i ka kiamoe nui ma kona ano maalea.

A ike mai la o Kekalukaluokewa, he hiamoe io ko kana wahine no ka ona awa; ia manawa, hoomaka hou ke kane i kana hana mau, a hele aku la i o Hinaiakamalama la.

A ike o Laielohelohe, ua hala aku la kela, ala ae la oia, a ukali aku la ia Kekalukaluokewa me kona ike oleia.

Ia ukali ana o Laielohelohe, aia hoi ua loaa pono aku la kana kane ia ia e hana ana i ka hewa me Hinaiakamalama.

Ia manawa, olelo aku o Laielohelohe ia Kekalukaluokewa, oiai aia ma ko Hinaiakamala wahi moe laua;  "E kuu kane, ua puni wau ia oe, malia oe e hookina nei ia'u i ka awa, he hana ka kau, a nolaila, ua loaa maopopo ae nei olua ia'u, nolaila, ke olelo nei wau ia oe, aole e pono ia kaua ke hoomanawanui i ka noho ana maanei, e pono ia kaua ke hoi i Kauai, a nolaila, e hoi kaua ono."

Ike mai la kana kane i ka maikai o ka manao o ke Alii wahine, ku ae la laua a hoi aku la i Honokalani.  A ma ia ao ana ae, hoomakaukau koke na waa no ka hooko i ka olelo a Laielohelohe, me ka manao ia po iho

 

Ke kaa hoomanaia o Juggernaut.

O ke kii maluna ae nei oia no ke kii o ke kaa o Juggernaut, he kaa keia i kauia maluna o na huila he umi, a he mea i hoomanaia e na kanaka a pau o Hinidu.  He hookahi wa o ka makahiki hookahi e laweia mai ai ua kaa nei, mai kona wahi hoano mai, a kauo heleia ma na kulanakauhale; a ua moe iho na kanaka malalo o kona mau huila nunui a make iho la, me ka manaoio hoi, ma ia hana ana; ua loaa ia lakou ke alohaia e ko lakou mau akua.  O ka nui o na kanaka e hele mau ana i kahi a ua kaa nei e ku ai, i ka makahiki hookahi he 1,200,000, a iloko o na mile he 50 ma ke ala mai ia wahi mai, ua piha na kapa alanui i na iwi kanaka, i make i ua kaa nei.  I ka wa nae i lilo ae nei ka hooponopono o ia wahi ia Beritania Nui, a ua papa loaia ka hana ana ia mau hana hupo, a hoomana kii no hoi.

 

e holo ai, aole nae i holo, no ka mea, ua hoomaimai ae la o Kekalukaluokewa, a nolaila, ua hala ia po; a i kekahi po iho, hana hoi no o Kekalukaluokewa i kana hana, a no ia mea, ua haale o Laielohelohe i kona aloha i kana kane, a hoi aku la i Kauai ma kona mau waa, me kona manao hou ole aku ia Kekalukaluokewa.

Ia Laielohelohe ma Kauai mahope iho o kona haalele ana i kana kane; i kekahi la, hiki hou mai, a halawai iho la me Laielohelohe, no ka mea, ua hoomau paa loaia ka iini ia Kaonohiokala, me ka manao e lawe loa, a hoonoho ma ka hakahaka o kona kuko ino e like me ka aoao mau o ke Alii.

Ia laua e launa ana, ninau mua ae la o Kaonohiokala ia Laielohelohe no ka pau o kona mau la haumia, ma ka aoao mau o na wahine no ka manawa mai.  Aka hoi, wahi a Laielohelohe, "Aole haumia i koe;" a nolaila, lawe loa ae la o Kaonohiokala ia Laielohelohe.

A hala eha malama o ko laua hui kalohe ana; he mea haohao nae ia Laieikawai keia hele loihi o Kaonohiokala, no ka mea, eha malama ka loihi o ka nalo ana.  A mahope oia manawa haohao o Laieikawai, hoi aku la Kaonohiokala iluna.

Ninau mai la nae o Laieikawa, "Pehea keia hele loihi ou aha malama, no ka mea, aole oe pela e hele nei."

I mai la o Kaonohiokala, "Ua hewa ko Laielohelohe ma noho ana me kana kane, ua lilo o Kekalukaluokewa i ka wahine e, a oia ka'u mea i noho loihi ai."

A no keia mea, olelo aku o Laieikawai i kana kane, "E kii oe i ko wahine a hoihoi mai e noho pu kakou."

Ia manawa no a laua e kamailio ana no keia mau mea, haalele aku la o Kaonohiokala ia Laieikawai, a iho mai la, me ka manao o Laieikawai e kii ana mamuli o kana kauoha, aole ka!

I keia hele ana o kaonohiokala, hookahi makahiki; ia manawa, aole o kanamai o ka haohao o Laieikawai no ka hele loihi o kana kane.  Ua manao ae o Laieikawai i ke kumu o keia hele loihi, ua pono ole la o Laielohelohe me Kekalukaluokewa.

A no kiea mea, ake nui ae la oia e ike i ka pono o kona kaikaina, ia wa, hele aku la o Laieikawai imua o kona makuahonowaikane, me ka ninau aku, "Pehea la wau e ike ai i ka pono o ko'u kaikaina? No ka mea, ua olelo mai nei kuu kane Lani, ua hewa ka noho ana o Laielohelohe me Kekalukaluokewa, a no ia mea, ua hoouna aku nei wau ia Kaonohiokala e kii aku i ka wahine a hoi mai; aka, i ka hele ana aku nei, aole i hoi mai; o ka pau keia o ka makahiki o ka hele ana, aole i hoi mai, nolaila, e haawi mai oe i ike no'u, i ike hiki ke ike aku ma kahi mamao, i ike au i ka pono o ko'u hoahanau."

A no keia mea, olelo mai o Moanalihaikawaokele, kona makuahonowaikane, "E hoi oe a ma ko olua wahi, e nana aku oe i ko makuahonowaiwahine, ina ua hiamoe, alaila, e hele aku oe a komo iloko o ka heiau kapu, ina e ike aku oe i ka ipu ua ulanaia i ke ie, a ua hakuia ka hulu ma ka lihilihi o ke poi oia ua ipu la.  O na manu nui e ku ana ma na aoao o ua ipu la, mai maka'u oe, aole ia he manu maoli, he mau manu laau ia, ua ulanaia i ke i-e a hanaia i ka hulu.  A i kou hiki ana i kahi o ua ipu la e ku ana, wehe ae oe i ke poi, alaila, hookomo iho oe i ko poo i ka waha o ua ipu la, alaila, kahea iho oe ma ka inoa o ua ipu la, "E Laukapalili - e, Homai he ike."  Alaila loaa ia oe ka ike, i hiki ia oe ke ike aku i kou kaikaina a me na mea a pau a lalo.  Eia nae, i kou kahea ana, mai kahea oe me ka leo nui, o kani auanei, lohe mai ko makuahonowaiwahine o Laukieleula, ka mea nana e malama i ua ipu ike la."

A lohe o Laieikawai i keia mau mea, alaila, manao ae la keia ua hai pauia mai keia mea ia ia.

He mea mau nae ia Laukieleula, ma ka po oia e ala ai e malama i ua ipu la o ka ike, a ma ke ao, he hiamoe.

I kekahi kakahiaka, i ka wa e hoomaka mai ai ka mehana o ka La maluna o ka aina, hele aku la oia e makai ia Laukieleula, aia nae e hiamoe ana.

A ike iho la kela ua hiamoe, hooko ae la o Laieikawai i ke kauoha a Moanalihaikawaokele, a hele aku la oia e like me ka mea i aoaoia mai ia ia.

A hiki keia ma kahi o ka ipu, ka mea i kapaa, "KAIPUOKAIKE," wehe ae la keia i ke poi o ka ipu, a kupou iho la kona poo ma ka waha o ua ipu nei, a kahea iho la maka inoa o ua ipu nei, ia wa ka hoomaka ana e ike i na mea a pau i hanaia ma kahi mamao.

Ia awakea, leha ae la na maka o Laieikawai ilalo nei, aia hoi, ua hana o Kaonahiokala i ka hewa me Laielohelohe.

Iloko o keia manawa, hele aku la o Laieikawai a hai aku la ia Maonalihaikawaokele, no keia mau mea, me ka olelo aku,  "Ua loaa ia'u ka ike mai a oe mai.  Aka, i kuu nana ana aku nei, aia nae ua hewa ha Haku Lani o'u, ua hanaia kekahi hewa me kuu kaikaina, akahi no a maopopo ia'u na kumu a me ke kuleana o kona noho loihi ana ilalo."

A no keia mea, he mea e ka inaina o Moanalihaikawaokele, a lohe pu ae la o Laukeileula, hele aku la kona mau makuahonowai i kahi o ka ipu ike, aia hoi, ike lea aku la laua e hana ana i ka hewa, e like me ka Laieikawai mau olelo.

I kekahi la ae, akoakoa ae la lakou a pau, o Laieikawai me na makuahonowai, e hele e ike i ka pono Kaonohiokala, a hooholo ae la lakou ia mea.

Ia manawa, kuuia aku la ke alanui mai Kahakaekaea aku a ku imua o Kaonohiokala, ia wa, ua lele koke ka oili o Kaonohiokala, no ke alanui i kuuia mai imua ona.  Aole nae i luiliu mahope iho o ko Kaonohiokala haohao ana.

Ia manawa, ua hoopouliia ka lewa, a hoopihaia i na leo wawalo o ka hanehane, me ka leo uwe,  "Ua haule ka Lani !  Ua haule ka Laui !!"  A i ka pau ana ae o ka pouli ma ka lewa, aia hoi e kau mai ana o Moanalihaikawaokele me Laukeileula a me Laieikawai, iluna o ke alanui anuenue.

A olelo mai la o Moanalihaikawaokele imua o Kaonohiokala, "Ua hewa kau hana, e Kaonohiokala-e, no ka mea, ua haumia loa oe, a nolaila, aole e loaa hou ia oe he wahi noho iloko o Kahakaekaea, a o kou uku hoopai, e  lilo ana oe i mea e hoomaka'uka'uia'i ma na alanui, a ma ka puka o na hale, a o kou inoa, he Lapu, a o kau mea e ai ai, o na pulelehua, a malaila kou kuleana a mau i kau pua."

Ia manawa, kailiia aku la ke alanui mai ona aku la, mamuli o ka mana o kona makuakane.  A pau keia mau mea, hoi aku la lakou i Kahakaekaea.  (Ua oleloia ma keia Kaao, o Kaonohiokala ka lapu mua na keia mau moku, a ma ona la na lapu e auwana nei i keia mau la, ma ka hoohalike ana i ke ano o ka lapu, he uhane ino.)

Ia lakou i hoi ai iluna, mahope iho o ka pau ana o ko Kaonohiokala ola, halawai aku la lakou me Kahalaomapuana iloko o Kealohilani, akahi no a lohe lakou aia oia malaila.

A ma keia halawai ana o lakou, hai aku la o Kahalaomapuana i ka moolelo o kona hoihoiia'na e like me ka kakou ike ana ma ka Mokuna 27 o keia kaao, a pau keia mau mea, laweia'ku la o Kahalaomapuana e pani ma ka hakahaka o Kaonohiokala.

Ia lakou ma Kahakaekaea, i kekahi manawa, nui mai la ke aloha o Laieikawai ia Laielohelohe, aka, aole e hiki ma kona manao, he mea mau nae ia Laieikawai ka uwe pinepine no kona kaikaina, a he mea haohao no hoi i kona mau makuahonowai ka ike aku i ko Laieikawai mau maka, ua ano maka uwe.

Ninau aku nae o Moanalihaikawaokele i ke kumu o keia mea, alaila, hai aku la oia, he maka uwe kona no kona kaikaina.

I mai nae o Moanalihaikawaokele, "Aole e aeia kou kaikaina e noho pu me kakou, no ka mea, ua haumia oia ia Kaonohiokala; aka, ina he manao kou i ko kaikaina, alaila, e hoi oe a e pani ma ka hakahaka o Kekalukaluokewa."  Aka, ua ae koke ae la o Laieikawai i keia mau mea.

A ma ka la o Laieikawai i hookuuia mai ai, olelo mai la o Moanalihaikawaokele, "E hoi oe a me kou kaikaina, e noho malu oe a hiki i kou manawa e make ai, a mai keia la aku, aole e kapaia kou inoa o Laieikawai; aka, o kou inoa mau o KAWAHINEOKALIULA, a ma ia inoa ou e kukuli aku ai kou hanauna ia oe, a o oe no ke akua o kou mau hauauna."

A pau keia kauoha, lawe ae la o Moanalihaikawaokele a kau aku la iluna o ke alanui a kau pu aku la me Moanalihaikawaokele, a kuuia mai la ilalo nei.

Ia manawa, hai aku la o Moanalihaikawaokele i na mea a pau e like me ka mea i oleloia maluna, a pau ia, hoi aku la o Moanalihaikawaokele iluna, a noho ma ka pea kapu o kukulu o Tahiti.

Ia manawa, hooili aku la o Kawahineokaluila i ke aupuni i ka Makaula, o Laieikawai hoi ka mea i kapaia o Kawahineokaliula, ua noho oia ma kona ano akua, a ma ona la i kukuli aku ai ka Makaula, a me kona hanauna e like me ka olelo a Moanalihaikawaokele ia ia.   Ama ia ano no o Laieikawai i noho ai a hiki i kona make ana.

A mai ia manawa mai a hiki i keia mau la, ke hoomanoia nei no e kekahi poe ma ka inoa o Kawahineokaliula (Laieikawai.)

(picture) HOPENA.

 

KA MOOLELO O KAWELONAAKALAILEHUA.

Helu 3.

 

A PAU A E LA KA KE KAHUNA hai ana i ke ano o ka ke Alii moe, alaila, kaohi iho @ ke Alii ke Kahuna e noho pu me ia i hookahi malama, a ua hooko koke ke Kahuna i ka ke Alii olelo kaohi ia ia:  alaila, noho iho la oia me ke Alii a hala hookahi anahulu me umi la, a hiki mai la i ka po o Kane, ia manawa, kui iho la no hekili ekolu, olapa mai la na uwila ekolu, a naha iho la kekahi kala o ko ke Alii hale, a eehia iho na na mea a pau o loko me ka maka'u nui; alaila, puka'e la kela mea keia mea mawaho o ka hale e nana'i i keia mea ano e; ia manawa, nana ae la lakou i ka lani, aia hoi, aole i ikeia'ku kekahi ao e kau mai ana, aka, ua kalae loa, a o ka mahina hoi, e kau pono ana ma ke kiko waena o ka lani, a ua ula hoi kona ano ke nana aku, ua like me ka ula o ke ahi e alapalapa ana; alaila, mahalo aku la na kanaka a me na kaukaualii i keia mea kamahao, me ka hooho nui,  "Ka mea nani e ! Ka mea nani e !! Auwe ka mea nani e !!! He akua, he ahi, aia iluna o ka mahina e lapalapa mai la e."  A no ka nui loa o ko lakou u-wa ana, nolaila, ua ha ko lakou mau leo a hiki ole ke pane, alaila, hooki iho la lakou i ko lakou u-wa ana.

O ke kumu nui nae o ka pau ana o ko lakou walaau, no ke kulikuli o ke Alii.  Ia manawa, hoouna mai la oia (Naniwaialeale) i kona Alihikaua ia Kupakoili, alaila, hopu ae la oia i kana laau palau o Kauneunepuuwai ka inoa, a oniu ae la oia ma ka welau o kona lima, a me kona kua, me ka papa aku hoi i na kanaka e noho malie, a no ka ikaika loa o ka ianei oniu ana i ua laau nei ma kona kua, ia wa, ikaika loa ae la ke kapalulu ana o ua laau nei, a nu ka makani a haalele wale, nu hou ka makani a haalele wale, alaila, lohe aku la na'lii o kai o Wailua, a me Waimea, nolaila, hoomanao ae la lakou o Kupakoili keia, ia manawa, noho malie iho la lakou, o ka loa nae o ua laau nei he iwakaluakumamalima anana, eono kanaka nana e apo, alaila puni ae.

A i ke ao ana'e, ala mai la ke Alii, me ke Kahuna pu no hoi kekahi o ke ala anu mai ia manawa, ninau aku la ke Alii i ke Kahuna, "Heaha la ke ano o na hekili i kui ai i ka ponei me na uwila ekolu, a me ke ano e ana o ka mahina?  Alaila, hai mai la ke Kahuna, "Ua hapai hou ko wahine i ke keiki,"

Aka, aole nae i manaoio ke Alii i keia mau olelo a ke Kahuna, aka, manao iho la oia e hailona i akaka'i ka oiaio o ka ke Kahuna mau olelo.

Ia manawa, pane mai la ke Alii, "ke manao nei au e hailona mai no oe, i pau ai ko makou kuhihewa."  Alaila, nonoi aku la ke Kahuna i ke poiwai i ke Alii, ia manawa, haawi mai la ke Alii i ke poi i ke Kahuna.

Alaila, ninau aku la ke Kahuna i ke Alii, "Aia la ma ka puka hea o keia hale e puka pono mai ai ka la?  Alaila, hai aku la ke Alii."  Aia ma ka hakala."

Ia manawa, kena aku la o Naniwaialeale (ke Alii) i kekahi o na kaukaualii e kii e wehe i ua puka nei, alaila, kiiia'ku la a weheia'e la, alaila, mohala pono mai la ka la ma ko lakou nei mau alo, ia manawa, ke ae la ke Kahuna a hele aku la a noho ma ua puka nei, a e ku ana hoi kekahi manu nui a ke Alii mawaho iho o ka puka o ka hale, a o kona inoa o Piaiakanene, o ka hana aia manu, o ka inu mau i ka wai o ka hawane, ke hiki i ka wa e ua ai, alaila, hoani ae la ke Kahuna i ke poi e paa ana ma kona lima mawaho o ka hale, ia manawa, holo kiki mai la ua manu nei a kokoke i ke poiwai, kau mai la kona nuku iluna a luai mai la i ka wai o ka hawane, a piha ae la ke poi a hu iwaho ka wai.

A i ka piha ana o ua poi nei i ka wai (hawane,) ia manawa, haule iho la elua mau pua lehua a komo iloko o ua poiwai nei i kikoia iho e ka manu, (no ka mea, he kumu lehua no ma ua puka nei,) o kekahi pua nae he lehua ula, a o kekahi hoi, he lehua kea, alaila, ku la ke Kahuna a kaikai mai la i ke poiwai imua o ke Alii, me kana wahine, a me na kaukaualii, alaila, kukuli iho la ua Kahuna nei me ka paa no o kona mau lima i ke poiwai, ia manawa, hapai ae la oia i kana wahi mele penei:

Aia no ka Lani ia i ka nuu.

I ka welelau makani o ka opua.

Ke @ ka houpo o Kane,

He kane ka lani @ hapai lani,

I k@a ia Lani i ke ak@ o ka wai.

I ka piko ula o Hokukalani

I ka lihilihi o ke anuenue.

Welo aku la ke ahi noho i na kuahiwi,

Welo aku la i ke kihi o ka malama,

I ka malama oe o Ikuwa e hanau ai la-e,

He aloha-e

A pau ae la keia oli ana a ua Kahuna nei alaila, hai aku la oia imua o ke Alii, a me kana wahine, a me ka poe i akoakoa mai, na Kaukaualii,)  "Ke ike nei oukou, eia ka lehua kea, a me ka lehua ula, ke lana nei iho ko o keia poiwai," ia manawa no nae, pane aku la ke Kahuna i ke Alii wahine, "E kau mai oe i ou mau lima maluna nei o ke poiwai."  Alaila, kau mai la oia i kona ma i lima maluna me ka hookomo iho o kona mau manamanalima iloko o ka wai, alaila, wanana ae la ke Kahuna, "Ina i ko'u wa e pule ai a ku ka punohu iluna o ke poiwai, a hele hoikeia pua lehua ula ma ka lima akau oia nei (ke Alii wahine,) a i hele hoi ka  pua lehua kea ma ka lima hema, alaila, ua hapai oia nei, aka, ina e hele ka pua lehua ula ma ka lima hema, a o ka pua lehua kea hoi ma ka lima akau, alaila, aole i hapai ke Alii wahine."

A pau ae la kana hai ana i keia mau olelo, alaila, hooluli ae oia i ke poi a aleale ae la ka wai me na pua, ia manawa, pule iho la oia, a ia ianei e pule ana, alaila, ku iho la ka punohu iluna o ke poiwai, a hele hoi ka pua ulaula a pili ma ka lima akau, a oka pua kea hoi, m ka lima hema, ia manawa, amama ae la oia i kana pule ana, a hai mai la ke Kahuna, "Ua hapai ka oia nei."

A ike mai la ke Alii, a me na kaukaualii, ua ko ka mea a ke Kahuna (Hoakalei) i hoakaka'i, alaila, hooiaio mai la lakou, ia manawa, nonoi aku la ke Kahuna i ke Alii e hookuu mai ia ia e hoi i kona wahi, alaila, olelo aku la ke Alii, "Ae, e hoi oe a kokoke nae i ka wa hanau o ke Alii wahine, alaila, hoouna aku au i kuu elele ia oe, alaila, hele hou mai oe."  Ae mai la kela me ka oiaio.

Aia manawa i pau ai keia mau olelo i haiia'e nei maluna, alaila, puka aku la ke Kahuna mailoko aku o ka hale alii, ia manawa, hapai ae la o Kapuakoili i ua laau nui nei ana ia Kauneunepuuwai, a ku pololei ae la ma kona alo, a paa ae la kona lima hema mawaenakonu,  papai ae la kona lima akau ma ka walau o ua laau nei, alaila, wehe mai la o Hoakalei i ka papalu.

A i kona wehe ana ae i ka papalu ma kona poo, alaila, aloha aku la oia ia Kupakoili, ia manawa, hoi loa aku oia a hiki ma kona wahi, a noho oia me ka maluhia.

A i ke kokoke ana mai o ka manawa e hanau ai ke Alii wahine, alaila, hoouna mai la ke Alii (Noaniwaialeale) ia Kukalakamanu kona elele e kii mai ia Hoakalei ke Kahuna, alaila, ua hooko koke o Kukalakamanu i ka olelo a ke Alii.

Ia manawa, hele mai la oia a hiki imua o ke Kahuna, alaila, ninau aku la ke Kahuna ia ia, "Heaha kou manao i hele mai nei?"  hai mai la o Kukalakamaanu, "I kauoha mai nei ke Alii ia'u e hele oe ilaila, e nana i ka hanau ana o ke Alii wahine."

A lohe ke Kahuna i keia mau olelo, alaila, pane aku la oia.  "E hoi oe a ke kakahiaka o ka la apopo, alaila, hiki aku wau ilaila, e hai aku nae oe i ke Alii, ma ke kakahiaka nui o ka la apopo, mamua ae o ko'u hiki ana aku, e olelo aku oia i na kaukaualii a pau e hoopiha i ke poi i ka wai noloko mai o ka pua lehua i uaia e ka  ua."

A pau ae la keia mau olelo a ke Kahuna ia Kakalakamanu, alaila, hoi aku la oia a hiki imua o ke Alii, a hai aku la i na olelo a ke Kahuna i hai mai ai ia ia, a lohe ke Alii i keia mea, alaila, he mea hauoli loa ia i kona manao, alaila, moe iho la lakou ia po.

A i ke kakahiaka nui o kekahi la ae, ia wa, hoouna aku la ke Alii i na kaukaualii a pau e hoopiha i ke poi i ka wai noloko a ka pua lehua, a he mea manawa ole hoi ia, ua piha ke poi, alaila, laweia mai la ua poiwai nei imua o ke Alii kane, a me kana wahine.

Ia manawa koke no hiki mai la ke Kahuna imua o ke Alii me na pua elua ma kona mau lima, he pua painiu ma ka lima akau, a he pua hinahina ma ka lima hema, ia manawa, kukuli mai la oia imua o ke Alii, a hapai ae la oia i kana wahi mele penei:

"Eia a'u pua la i ka wai,

Ke niniu mai la ma ke kua o Haena,

A ke ahi a ka welo i Milolii e.

He Alii he kamakahi na ke Ahilani,

He kualua na Hiilinanea e!

He kuakolu hoi na Iukalanipo e.

Puka ka pua a ka po e,

Ke hii ia mai la e Lehua i ke kai - la,

No Lehua ka ua kama - e,

He aloha - e.

 

A pau ae la keia wahi mele a ke Kahuna, alaila, wanana ae la oia imua o ke Alii kane, a me ke Alii wahine, a me na kaukaualii, "Ina e hoolei au i keia mau pua iloko o ke poiwai, a ina e niniu, a pio na anuenue ekolu maluna o ke poiwai, alaila, he keiki maikai loa keia o olua, aka, ina e lana malie na pua a uhi ka ohu maluna o ke poiwai, alaila, he keiki ano e no keia a olua."

(Aole i pau,)