Ka Nupepa Kuokoa, Volume II, Number 9, 28 February 1863 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE 11.  HELU 9.         HONOLULU. FEBERUARI 28, 1863.     NA HELU A PAU 66.

 

He Kanikau Aloha no T. Lonokaipo.

 

He uhe aloha no Tamara,

Kuu keiki aloha o ke Kaona,

Kuu hoa o ka ua Kukalahale o Honolulu,

Kuu hoa pili o ke kula o Nini,

A me ka wai huihui o Niupaipai,

Kuu keiki mai ka ai haaheo o ka aina,

Mai ka i-a lomi luna la e Ulakoheo,

Kuu keiki mai ka makani kaili kapa o Nuuanu,

Mai ka ua awe loloa o Leleanae,

Mai ka makani hooholu Kawelu o Lanikuli,

Mai ka makani holo uha o Kaholoakeahole,

I hoopumehana mai ke anu i Hapuu,

Hapuu kuu kini aloha no Honolulu,

Aloha au o kou keiki kino wailua,

Ua hala me ka u, me ka minamina,

Kuu hoa o ka ua olelo mai iluna o ka Hala,

Hala ke keiki, ka hoa noho o ka hale,

Hoa hoolaukanaka o kahi kanaka ole,

Aohe hoi na o kuu hoa o ka ua Lanipolua,

Kuu keiki o ka aina makamaka ole,

Hookahi no makamaka o na keiki o ke aloha,

Kuu keiki o ka wai o Waikahalalulu,

A me ke kawa lele o Puehuehu,

Kuu hoa nana i na koa kaua lio,

A me na Kaawai o ke Kaona,

Hoa hoolono o na bele kuihone, kani hone o ke aumoe,

I moe a hooholo i ke kani a na Pukaa,

Ua hookaaia ka aie o keia ao,

Ua hele aku la oe imua o ka Mea Mana,

Aole oe i haumia ia na hewa kino,

Ua pau kou luhi me ke kaumaha,

Ua ili mai ia kaumaha a luuluu,

Maluna o kou mau makua,

Ke kanikau nei laua me ka minamina ia oe.

            W.N.P. KAPOLOLU.

@, Honolulu, Feb 23, 1863.

 

 

 

Ahaolelo Kahu Ekalesia.

E ka Nupepa Kuokoa e, Aloha oe:

  Ma ka la 21 o Ianuari iho nei, ka Ahaolelo a na kahu ekalesia o Hamakua nei, mai Waimanu mai a Kaala, a me ke Kahunapule pu no hoi kekahi.

  Ua kohoia o L. Laiana, i Luna Hoomalu, a o D. Wainu i Kakauolelo, a pau ia.  Ua heluhelu mai na kahu i na palapala hoike makahiki o ko lakou mau ekalesia, e hoomaka ana ma Waimanu, a mailaila mai a i Kaala ka pau ana, a ua mahaloia ia mau palapala, a pau na palapala i ka hoikeia, ua hookuuia ka aha i hookahi hora.

  A pau ka paina awakea ana, u akoakoa hou mai na mea a pau ma ka Luakini hou, pule a pau.  Ku mai o P. Kaaekuahiwi, a hai mai i kona kumu manao i haawi e ia mamua me ka wehewehe nui ana, a pau kana, hoike mai na komite i kohoia mamua i na hana o ka M.H. 1863, ua aponoia, a pau na hana ia la, ua hookuuia ka aha.

  A ma ka la 25, ua hooliloia ka Luakini hou, eia ka hana mua, o ka hoohui ana i na ekalesia elua, (o Kaohe, a me Hanakamalii) a hookahi, ma ka paa ana o na lima akau o na kahu, a na S. Kukahhekahe ka olelo kauoha ia laua e noho kuikahi mau loa aku, aole kaawale hou, a ua haiia ka pauku olelo kupono o ia hana.   Ezekiela 37: 17 – 19.

  Ia L. Laiana ka hoolilo ana i ka Luakini, a me ke kapa ana o ka inoa o (Maunahoano,) aia ka olelo ma Ezekiela 37:26, hapa hope o ia pauku.

  Ia Kamelamela ke kauoha i na hoahanau e malama ia lakou, no ko lakou hele ana iloko o ka Luakini, e like me ka olelo ma Kinohi 28:17.

  Ia D. Kaanehe ka hoolilo ana i ka Baibala, a me ke kauoha i na hoahanau e malama pono ia waiwai nui a maikai i haawiia ia lakou, e like me ka elelo ma 2 Timoteo 3:16.

  Ia N. Keikenui ke kauoha i na kahu, e like me ka olelo ma I Petero 5:2—4.  Ia N. Keau ke kauoha i na Diakona, a me ka haawi ana i ke pa, a me ke kiaha.  Ia I. W. Keawe ke kauoha i na Luna haiolelo. Ia J. S. Kekoi ke kauoha i na Luna nana e malama pono i ka waiwai o ka ekalesia, a me ka haawi ana i ke ki o ka Luakini. Ia E. Nainoa ka Paresidena o lakou.

  Ia P. Wahakane ke kauoha i na hoanahau.  Ia D. Waiau ke kauoha i na hoahanau, a me na makua, na keiki, ka Lunakula, a me ke Kumukula e malama i ka Luakini, a me ka haawi ana i ka palapala aelike ia E. N.  Ia I. W. Awa ke kauoha i ka poe himeni, a me ka haawi ana i ka himeni no ka Luakini.

  Ia Keawe ke kauoha i na hoahanau e hookipa i na malihini.  Ia E. Nainoa ke kauoha i na hoahanau e malama pono i ka la Sabati.  Ia L. Laiana ka pule hookuu, a o ka pau no ia, a hoi nui aku na kanaka.  Ma ka mahalo.                 J.S. KEKOI.

  Kaapahu, Hamakua, Hawaii, Ian. 29, 1863.

 

Gen. George Washington.

  O ke kii i paiia maluna’e nei, o ia no ka helehelena o ka Mea Kaulana George Washington, ka makua nana i kukulu paa ke aupuni o Amerika Huipuia; ka aina nona ka naueue ana i keia mau la.  Ua hoomanaoia kona la hanau ma ka Poakahi iho nei o keia pule; o ka la 22 o keia malama, kona la hanau, aka, no ka ili ana o ia la ma ke Sabati, nolaila, ua hoomoeia ka hoolioli ana a i ka Poakahi mai.  Ua kahikoia na pahu hae he nui wale ma ke Kaona nei, a he mau hula ma na hale hula ma ke ahiahi ana iho.  He nui ka hauoli ana o ka poe akau e noho nei iwaena o makou nei, a me ka poe e ae no hoi e noho ana me ke aloha ia ia.

 

 

KA MOOLELO

-- O –

LAIEIKAWAI.

MOKUNA XXV.

 

MA KEIA MOKUNA, E KAMAILIO kakou no ke kii ana o Kahalaomapuana ia Kaonohiokala i kane hoopalau na Laieikawai, a me kona hoi ana mai.

  A pau ke kauoha a Kahalaomapuana i kona mau kaikuaana, a makaukau hoi kona hele ana.

  Ma ka puka ana o ka la, komo ae la o Kahalaomapuana iloko o Kihanuilulumoku, a au aku la ma ka moana a hiki i Kealohilani, eha malama me ke anahulu, hiki keia iloko o Kealohilani.

  Ia laua i hiki aku ai, aole laua i ike ia Mokukelekahiki ke kiai nana e malama ko Kaonohiokala waiwai, kona Kuhina Nui hoi iloko o Kealohilani, elua anahulu ko laua kali ana, hoi mai o Mokukelekahiki mai ka mahina mai.

  Hoi mai la o Mokukelekahiki, e moe ana keia moo iloko o ka hale, i ke poo no piha o loko o ua hale o nui nei o Mokukelekahiki, o ke kino no a me ka huelo o ua moo nei, iloko no o ke kai.

  He mea weliweli ia Mokukelekahiki ka ike ana i ua moo nei, lele aku la oia a hiki iluna o Nuumealani, ilaila o Kaeloikamalama ke kupua nui nana e pani ka puka o ka pea kapu o Kukuluokahiki, kahi i hunaia’i o Kaonohiokala.

  Hai aku la o Mokukelekahiki ia Kaeloikamalama i kona ike ana i ka moo.  Ia manawa, lele aku la o Kaeloikamalama me Mokukelekahiki, mai luna mai o Nuumealani, he aina aia ia ka lewa.

  Ia hiki ana mai o Mokukelekahiki ma ma ka hale e moe nei ka moo.

  Ia manawa, olelo aku la Kihanuilulumoku (ka moo) ia Kahalaomapuana, “I hiki mai ananei keia mau kanaka e lele mai nei i o kaua nei, alaila, e luai aku wau ia oe a kau ma ka a-i o Kaeloikamalama, a i ninau ae ia oe, alaila, hai aku oe, he kama oe na laua, a i ninau mai i ka kaua hana i hiki mai ai, alaila, hai aku oe.”

  Aole i upuupu iho mahope iho o ka laua kamailio ana, halulu ana o Mokukelekahiki laua me Kaeloikamalama ma ka puka o ka hale.

  I nana aku ka hana o ua moo nei, e ku mai ana o Kaeloikamalama me ka laau palau, o Kapahielihonua ka inoa, he iwakalua anana ka loa, eha kanaka nana e apo puni.  Manao iho la ka moo he luku keia, aia nae e oniu ana o Kaeloikamalalam i ka laau palau i ka welau o kona lima.

  I manawa, hapai mai la o Kihanuilulumoku i kona huelo mailoko ae o ka moana, pii ke kai iluna, me he poi ana a ka nalu i ke kumu pali, me he akuku nalu la i poi iloko o ka malama o Kaulua, pii ke ehu o ke kai iluna, pouli ka la, ku ka punakea iuka.

  Ma ia wa, kau mai la ka weli ia Kaeloikamalama ma, hoomaka laua e holo mai ke alo aku o ua moo nei.

  Ia manawa, luai aku ana o Kihanuilulumoku ia Kahalaomapuana, kau ana iluna o ka a-i o Kaeloikamalama.

  Ninau ae la o Kaeloikamalama, “Nawai ke kama o oe?”

  I aku la o Kahalaomapuana, “Na Mokukelekahiki, na Kaeloikamalama; na kupua nana e malama ka pea kapu o Kukulu o Tahiki.”

  Nina laua, “Heeaha ka huakai au e kuu kama i hiki mai ai?”

  Hai aku la o Kahalaomapuana, “He huakai imi Lani.”

  Nina hou laua, “Imi i ka Lani owai?”

  “O Kaonohiokala,” wahi a Kahalaomapuana, “ka Lani kapu a Kaeloikamalama laua o Mokukelekahi.”

  Ninau hou no laua, “A loaa o Kaonohiokala, heaha ka hana?”

  I aku la o Kahalaomapuana, “I kane na ke kaikamahine Alii o Hawaiiakea, na Laieikawai  ka Haku o makou.”

  Ninau hou no laua, “Owai oe?”

  Hai aku la keia, “O Kahalaomapuana, ke kaikamahine muli a Moanalihaikawaokele laua me Laukieleula.”

  A lohe o Kaeloikamalama laua me Mokukelekahiki, he mea e ko laua aloha, ia manawa, kuu iho la mai ka a-i iho, honi aku la i ka ihu o ke kaikamahine.

  No ka mea, o Mokukelekahiki, a me Kaeloikamalama, he mau kaikunane no Laukieleula ka makuahine o lakou me Aiwohikupua.

  I aku la o Keoloikamalama, “E hele kaua a loaa ke alanui, alaila, pii aku oe.”

  Hele aku la laua hookai anahulu, hiki i kahi e pii ai, kahea aku la o Kailoikamalama, “E ka Lanalananuiaimakua – e! kuuia mai ke alanui, i pii aku wa – u!! ua hewa o lalo ne – i!!!”

  Aole i upuupu iho, kuu mai ana o Lanalananuiaimakua i ka punawelewele, hihi pea ka lewa.

  Ia manawa, aoao aku la i Kaeloikamalama, “Eia ko alanui, i pii auanei oe a hiki iluna, a i ike oe hookahi hale e ku ana iloko o ka mahina, aia ilaila o Moanalihaikawaokele o Kahakaekaea ia aina.

  “I nana aku auanei oe, ka elemakule e loloa ana ka lauoho, ua hina ke poo, o Moanalihaikawaokele no ia.  Ina e noho ana iluna, mai wikiwiki aku oe, o ike e mai auanei kela ia oe, make e oe, aole e lohe i kau olelo, kuhi auanei ia oe he maea e.

  “Kali aku oe a moe, e huli ana ke alo i lalo, aole i moe, aka, i nana aku oe, a i huli ke alo iluna, ua moe ka hoi, alaila, hele aku oe, mai hele oe ma ka makani, hele oe ma ka lulu, a noho iluna o ka umauma, paa oe a paa i ka umiumi, alaila, kahea iho oe:

“E Moanalihaikawaokele – e!

Eia wau he kama nau,

He kama na Laukieleula,

He kama na Mokukelekahiki,

He kama na Kaeloikamalama,

Na kaikunane o kuu makuahine;

Makuakane, makuahine hoi,

O o’u me o’u kaikuaana,

Me kuu kaikunane o Aiwohikupua hoi,

Homai he ike, he ike nui, he ike loa,

Kuuia mai kuu Lani,

Kuu kaikunane Haku --- e.

E ala!  Eala mai o – e!!”

  “Pela auanei oe e hea iho ai, a ina e ninau mai kela ia oe, alaila, hai aku oe i kau huakai i hele mai ai.

  “I pii auanei oe, a iuhi ke awa, na ko makuakane ia hana, i hiki mai ke anu ma ou la, mai maka’u oe.  Alaila, pii no oe, a i honi oe i ke ala, o ko makuahine no ia, nona ke ala, alaila, palekana, kokoke oe e puka iluna, pii no oe, a i o mai auanei ka kukuna o ka la, a i keehi ka wela ia oe, mai maka’u oe, i ike auanei oe i ka oi o ka niho o ka la, alaila, hoomanawanui aku no oe a komo i ka malu o ka mahina, alaila, pau ka make, o ko komo no ia iloko o Kahakaekaea.”

  A pau ka laua kamailio ana no keia mau mea; pii aku la o Kahalaomapuana, a ahiahi, paa oia i ke awa, manao ae la keia o ka ka makuakane hana ia, mai ia po a wanaao, honi oia i ke ala o ke kiele, manao ae la keia o ka makuahine ia, mai ia wanaao a kiekie ka la, loaa oia i ka wela o ka la, manao ae la oia, o ka hana keia a kona kaikunane.

  Ia manawa, ake aku la keia i komo i ka malu o ka mahina, a ma ke ahiahi, hiki aku la oia i ka malu o ka mahina, manao ae la keia, ua komo i ka aina i kapaia o Kahakaekaea.

  Ike aku la oia i keia hale nui e ku ana, ua po iho la, hele aku la oia ma ka lulu, aia no e ala mai ana o Moanalihaikawaokele, hoi mai la oia a ma kahi kaawale, e kali ana o ka moe iho, e like me ke kuhikuhi a Kaeloikamalama.  Aole nae i loaa ka hiamoe ia Moanalihaikawaokele.

  A ma ka wanaao, hele aku la keia, iluna ke alo o Moanalihaikawaokele, manao ae la keia ua hiamoe, holokiki aku la keia a paa ma ka umiumi o ka makuakane, kahea iho la e like me ke aoao ana a Kaeloikamalama i hoikeia maluna.

  Ala ae la o Moanalihaikawaokele, ua paa kahi e ikaika ai, o ka umiumi, kupaka ae la aole e hiki, ua paa loa ka umiumi ia Kahalaomapuana, o i noke i ke kupaka i o ianei, a pau ke aho o Moanalihaikawaokele.

  Ninau ae la, “Nawai ke kama o oe?”

  I aku la keia, “Nau no.”

  Nina hou kela, “Na’u me wai?”

  Hai aku keia, “Nau no me Laukieleula.”

  Nina hou kela, “Owai oe?”

  “O Kahalaomapuana.”

  I ae la ka makuakane, “Kuuia ae kuu umiumi, he kama io oe na’u.”

  Kuu ae la keia, ala ae la ka makuakane, a hoonoho hoi la iluna o ka uha, uwe iho la, a pau ka uwe ana.

  Ninau iho la o Moanalihaikawaokele, “Heaha kau huakai e kuu kama i hiki mai ai?”

  “He huakai imi Lani,” wahi a Kahalaomapuana.

  “Imi owai ka Lani e imi ai?”

  “O Kaonohiokala,” wahi a ke kaikamahine.

  “ A loaa ka Lani, heaha ka hana?”

  I aku la o Kahalaomapuana, “I kii mai nei au i kuu kaikunane Haku, i kane na ke kaikamahine Alii o Hawaiiakea, na Laieikawai, ke aikane Alii a makou, ko makou mea nana i malama.”

  Hai aku la oia i na mea a pau i hanaia e ko lakou kaikunane, a me ka lakou aikane.

  I mai la o Moanalihaikawaokele, “Aole na’u e ae aku, na ko makuahine wale no e ae aku, ka mea nana ke Alii, aia ke noho la i kahi kapu, kahi hiki ole ia’u ke hele aku, aia hanawai ko makuahine, alaila, hoi mai i o’u nei, a pau na la haumia o ko makuahine, alaila, pau ka ike ana me a’u, hoi no me ke Alii.

  “Nolaila, e kali oe, a hiki i na la hanawai o ko makuahine, i hoi mai kela, alaila, hai aku oe i kau huakai i hiki mai ai ianei.”

  Kakali iho la laua ehiku la, maopopo iho la na la e hanawai ai o Laukieleula.

  I aku la o Moanalihaikawaikele ia Kahalaomapuana, “Ua kokoke mai ka la e hanawai ai ko makuahine, nolaila, ma keia po, e hele mua oe ma ka Helepea, malaila oe e moe ai, i hiki mai kela i kakahiaka, e moe aku ana oe i ka hale, aole ona wahi e hele e aku ai, no ka mea, ua haumia, ina e ninau ia oe, alaila, hai pololei aku oe e like me kau olelo ia’u.”

  Ma ia po iho, hoouna aku la o Moanalihaikawaokele, ia Kahalaomapuana iloko o ka Halepea.

  Ma ke kakahiaka nui, kiki na o Laukieleula, i nana mai ka hana e moe ana keia mea, aole nae e hiki i ua o Laukieleula ke hookaawale ia ia, no ka mea, ua haumia, o kela hale wale no kahi i aeia nona, “Owai oe e heia kupu, e keia kahlohe, nana i komo kuu wahi kapu, kahi hiki ole i na mea e ae ke komo ma keia wahi?”  Pela aku ka mea hale.

  Hai aku ka malihini, “O Kahalaomapuana au, ka hua hope loa a kou opu.”

  I aku ka makuahine, “Auwe!  E kuu Haku, e hoi oe me ko makuakaue, aole e hiki ia’u ke ike ia oe, no ka mea, ua hiki mai kuu mau la haumia, aia a pau kuu haumia ana, e launa no kaua no ka manawa pokole a hele aku.”

  A no keia mea, hoi aku la o Kahalaomapuana me Moanalihaikawaokele, ninau mai la ka makuakane, “Pehea mai la?”

  I aku ke kaikamahine, “Olelo mai nei ia’u e hoi mai me oe, a pau ka manawa haumia, alaila hele mai e ike ia’u.”

  Noho iho la laua ekolu la, kokoke i ka wa e pau ai ka haumia o Laukieleula, olelo aku o Moanalihaikawaikele i ke kaikamahine, “O hele, no ka mea, ua kokoke mai ka wa mau o ko makuahine, hele no oe i kakahika nui peeleele o ka la apopo, a noho ma ka lunawai, kahi ana e hoomaemae ai ia ia, mai hoike oe, aia a lele kela iloko o ke kiowai, a i luu ilalo o ka wai, alaila, holo aku oe a lawe mai i ka pau, a me ke kapa ona i haumia i koina mai, i auau kela a hoi mai ma kapa, aole ke kapa, alaila manao mai ua kiiaku au, i hoi mai ai kela i ka hale nei, alaila ko kou makemake.”

  “Ina i uwe olua a i pau ka uwe ana, a i ninau mai ia’u i ke kapa ona au i lawe mai ai, alaila, hai aku oe, aia ia oe; a e hilihila kela me ka menemene ia oe i ko haumia ana, oia hoi, aole ana mea nui e ae e uku mai ai no kou haumia i koina kapa i hoohaumiaia i kona mai, hookahi wale no mea nui ana o ka Lani au i kii mai nei, aia a ninau kela i kou makemake, alaila hai aku oe, o ko ike ka hoi ia i ko kaikunane, ike pu me a’u, no ka mea, hookahi wale no a’u ike ana i ka makahiki hookahi, he kiei mai ka, o ka nalo aku la no ia.”

  A hiki i ka manawa a ka makuakane i olelo ai, ala ae la ke kaikamahine i kakahiaka nui poeleele, a hele aku la e like me ke kauoha a kona makuakane.

  Ia ia i hiki aku ai, pee iho la ma kahi kokoke i ke kiowai, aole i upuupu iho, hiki ana ka makuahine, a wehe i ke kapa i hoohaumiaia, a lele aku la iloko o ka wai.

  Ia manawa, lawe ae la ke kaikamahine i ka mea i kauohaia ia ia, a hoi aku la me ka makuakane.

  Aole keia i liuliu iho, halulu ana ka makuahine, ua hookaawale mua ae o Moanalihaikawaokele ia ia ina ke kaawale, o ke kaikamahine wale no ko ka hale.

  “E Moanalihaikawaokele, o kuu kapa i haumia, homai, e lawe ae au e hoomaemae i ka wai.”  Aole nae he ekemu mai, ekolu ana kahea ana, aole nae he ekemuia mai, kiei aku la keia iloko o ka hale, e moe ana o Kahalaomapuana, ua pulou iho i ke kapa i hoohaumia ole ia.

  Kahea iho la, “E Moanalihaikawaokele, homai kuu kapa i haumia i kuu mai, e lawe ae au e hoomaemae i ka wai.”

  Ia manawa, puoho ae la o Kahalaomapuana, me he mea la ua hiamoe, me ka i aku i ka makuahine, “E kuu Haku makuahine, ua hele aku nei kela, owau wale no ke ka hale nei, a o ko kapa nae i haumia i ko mai, eia la.”

  “Auwe!  E kuu Haku, he nui kuu menemene ia oe i kou malama ana i ke kapa i haumia ia’u, a heaha la auanei ka uku o kuu menemene ia oe e kuu Haku?”

  Apo aku la ia i ke kaikamahine, a uwe aku la i ka mea i oleloia ma ka pauku maluna ae nei.

  A pau ka uwe ana, nina iho ka makuahine, “Heaha kau huakai i hiki mai ai i o maua nei?”

  “I kii mai nei au i kuu kaikunane i kane na ke aikane a makou, ke Aliiwahine o Hawaii-nui- akea, o Laieikawai, ka mea nana i malama ia makou iloko o ko makou haalelelia ana e ko makou kaikunanae aloha ole, nolaila, ua hilahila makou, aole a makou uku e euku aku ai no ka malama ana a ke Alii ia makou: a no ia mea, e ae mai oe e @ au me kuu kaikunane Lani Hale, a lawe mai ia Laieikawai iluna nei.”  O ka Kahalaomapuana olelo keia imua o kona makuahine.

  I mai la ka makuahine, “Ke ae aku nei au, no ka mea, aole o’u uku no kou ma@ ana i kuu kapa i haumia ia’u.

  “Ina no la hoi he mea e ka mea nana i ke mai nei, ina no la hoi aole wau e ae aku ia ko kii paka ana mai nei, aole au e ana aku.

  “Oia hoi, ua olelo no ko kaikunane oia hookahi no kana mea i oi aku ke aloha, a me ka manao nui; a nolaila, e pii kaua o ia i ko kaikunane.

  “Nolaila, e kali oe pela, e hea ae au i ke kahu manu o olua, a nana kaua e lawe aku a komo i ka pea kapu o Kukulu o Tahiti.”

  Ia manawa, hea aku la ka makuahine.

  Ia wa, kuu iho la ua manu nei i na eke i lalo, a o ke kino aia no i luna.  Ma ia wa kau aku la o Laukieleula me Kahalaomapuana i luna o ka eheu o na manu nei, o ka lele aku la no ia a hiki i o Awakea, ka mea nana e wehe ke pani o ka la, kahi i noho ai o Kaonohiokala.

  Ia manawa a laua i hiki aku ai, ua nana aku la ko ke Alii wahi e na ao hekili.

  Alaila, kena ae la o Laukieleula ia Awakea, “weheia mai ke pani o kahi o ke Alii.”

  “E Haluluikekihiokamalama – e,

Ka manu nana e pani ka la,

Hoi ka wela i Kealohilani,

Ka manu nana e alai ka ua,

Maloo na kumu wai o Nuumealani,

Ka manu nana i kaohi na ao luna,

Nee na opua i ka moana,

Huliamahi na moku,

Naueue Kahakaekaea,

Palikaulu ole ka lani,

O na kupu, na eu,

O Mokukelekahiki,

O Kaeloikamalama,

Na kupu nana e pani ka pea kapu o kululu Tahiti,

Eia la he Lani hou he kama nau,

Kiiia mai, lawe aku i luna i o Awakea.”

  Ia manawa, ku ae la o Awakea me kona wela nui, a auhee aku la na ao hekili nana ona.  Aia hoi ikeia aku la ke Alii e moe mau ana i ka onohi i pono o ka la, i ka puukuoko hoi o ka wela loa, nolaila i kapaia’i ka inoa o ke Alii, mamuli oia ano (Kaonohiokala.)

  Ia manawa, lalau iho la o Laukiekeula i kekahi kukuna o ka la a kaohi iho la.  Ia manawa, ala mai la ke Alii.

  Ia Kahalaomapuana i ike aku ai i kona kaikunane, ua like na maka me ka uwila, a o kona ili a me kona kina a puni, ua like me ka okooko o ke kapuahi hooheehee hio.

  Kahea aku la o Laukieleula, “E kuu Lani, eia ko kuahine o Kahalaomapuana, ka mea au e aloha nui nei, eia la ua mai nui nei ia kaua.”

  A lohe o Kaonohiokala, ala mai la mai no na hiamoe ana, alawa ae la kela la Laukieleula, e hea aku i na kiai o ka malu.  Kahea ae la.

  “E ka Mahinanuikolune,

E Kaohukolokaialea,

Na kiai o ka malumalu, kulia imua o ke Alli.”

  Ia manawa, hele mai la na kiai o ka malu a ku iho la imua o ke Alii. Aia hoi, ua lilo ka wela o ka la mai ke Alii aku.

  A loaa ka malumalu imua o ko ke Alii wahi moe, alaila, kahea mai la i ke kaikumahine, a hele aku la a uwe iho la, no ka mea, ua maeele kona puuwai i ke aloha no kona kaikuahine opiopio.  A he nui no hoi na la o ke kaawale ana.

  A pau ka uwe ana, ninau iho la, “Nawai ke kama o oe?”

  Pane aku ke kaikuahine, “Na Mokukelekahiki, na Kaeloikamalama, na Moanalihaikawaokele laua o Laukieleula.”

  Nina hou mai la ke kaikunane, “Heaha ka huakai?”

  Alaila, hai aku la kela e like me kana olelo i ka makuahine.

  A lohe ke Alii keia mau olelo, haliu aku la oia i ko laua makuahine, me ka niniu aku, “Laukieleula, ua ae anei oe ia’u e kii i ka mea a ianei e olelo mai nei i wahine na’u?”

  “Ua haawi mua wau ia oe ua lilo, e like me kana noi ia’u, ina o kekahi o lakou ka kii mai nei, ina aole e hiki mai i o kaua nei, i lalo aku la no hoi; aeia aku ka olelo a kou pokii, no ka mea, nau i wehe mua ke alanui, a na ko kaikuahine i pani mai, aohe he mea mamua ou, a aohe no hoi he mea mahope iho.”

  A pau keia mau olelo, ninau hou mai ke kaikunane i kona mau kaikuaana a me kona kaikunane.  Alaila hai aku la keia (Kahalaomapuana,)  “Aole he pono o ko ma-