Ka Nupepa Kuokoa, Volume II, Number 7, 14 Pepeluali 1863 — Page 2

Ka Nupepa Kuokoa

KE KILOHANA POOKELA NO KA LAHUI HAWAII.

 

          Ninau mai o Malio, hai aku la oia i kana @@@ i lohe ai no Laielohelohe.

          I ak@ o Malio ia Halaamani, " E hoi kaua a kakahiaka hiki hou mai kaua ianei, ia manawa e lohe maopopo aku ai kaua i kona manao."

          Hoi aku la laua, a ma kekahi kakahiaka ana ae, pii hou aku la. Ia laua i hiki aku ai a noho iho, hiki mai la o Laielohelohe ma kona wahi mau e kui lehua ai.

          Ia manawa, hookani aku la o Malio i ka hano ia Laielohelohe e hoomaka aku ana e ako lehua, aole nae e hiki, no ka mea, ua lilo loa o Laielohelohe i ka hoolohe i ka mea ka@i.

          Ekolu hookani ana a Malio i ka hano.

          Ia manawa no, pane mai o Laielohelohe,

          "Ina he wahine oe ka mea nana keia hano, alaila, e honi no kaua."

          A no keia olelo a Laielohelohe, hoopuka aku la o Malio imua o Laielohelohe, a ike mai la kela ia ianei, a he mea malihini hou ia i ko Laielohelohe mau maka.

          Ia wa, hoomaka mai la kela e hooko e like me kana olelo mua ma ka honi ana o laua.

          A no ka hahai ana mai o Laielohelohe e honi me Malio, i aku o Malio, "Alia kaua e honi, me kuu kaikunane mua oe e honi aku ai, a pau ko olua manawa, alaila, honi aku kaua."

          I mai o Laielohelohe, "E hoi oe a kou kaikunane, mai hoike mai ia ia imua o'u, e hoi olua ma ka olua wahi, mai hele hou mai. No ka mea, o oe wale no ka'u mea i ae aku e haawi i ko'u aloha nou ma ko kaua honi ana, aole au i ae me kekahi mea e ae. Ina e hooko au i kau hoi, alaila, ua kue wau i ka olelo a ko'u mea nana e malama maikai nei."

          A lohe o Malio i keia olelo, hoi aku la a hai i kona kaikunane, me ka i aku, "Ua nele ae nei kaua i keia la, aka, e hoao wau ma kuu mana, i ko ai kou makemake."

          Hoi aku la laua a hiki i ka hale, ia manawa, kena ae la oia ia Halaaniani e hele e makai aku ia Laieikawai.

          Ia Halaaniani i hiki ai ma Keaau, mamuli o ke kauoha a kona kaikuahine, aole oia i ike a i lohe hoi no Laieikawai.

          Ia manawa nae ana i hiki aku ai, lohe iho la o Halaaniani, he la nui no Kekalukaluokewa, he la hookahakaha, no ka hoao o Laielohelohe me ua Kekalukaluokewa nei. A maopopo iho la ia Halaaniani ka la hookahakaha o na 'Lii, hoi aku la oia a hai aku i kona kaikuahine no keia mea.

          Ia Malio i lohe ai, olelo ae la oia i kona kaikuanane, "A hiki i ka la hookahakaha o Kekalukaluokewa me Laielohelohe, oia ka la e lilo ai e Laielohelohe ie oe."

          A he mea mau hoi i na kaikuahine o Aiwohikupua ka iho i kai o Keaau e hoohalua ai no ka lakou kane, no ka make a make ole paha.

          I ua mau kaikuahine nei o Aiwohikupua e iho ana i Keaau, lohe lakou he la nui no Kekalukaluokewa me Laielohelohe.

          I ke kokoke ana aku i au la nui nei, iho aku la o Waka mai Paliuli aku e halawai me Kekalukaluokewa.

          I aku o Waka ia Kekalukaluokewa, "Apopo, i ka puka ana o ka la, e kuahaua oe i na kanaka a pau, a me kou alo alii e hele aku ma kahi au i hoomakaukau ai no ka hookahakaha, malaila e akoakoa ai na mea a pau. Ia manawa e hele aku oe e hoike mua ia oe, a kokoke aku i ke awakea, alaila, e hoi oe i kou hale; aia a hiki aku mahope iho o ka auina la, ia manawa, e hoouhi aku wau i ka noe maluna o ka aina, a maluna hoi o kahi e akoakoa ai na kanaka.

          "Aia a hoomaka mai ke poi ana o ka noe ma ka aina, alaila, e kali oe ia wa, a lohe oe i ka leo ikuwa a na manu a haalele wale. Kali hou aku oe ia wa, a lohe hou oe i ka leo ikuwa hou o na manu a haalele wale.

          "A mahope oia manawa, e hoopau aku no wau i ka noe maluna o ka aina. Alaila, e nana oe ia uka o Paliuli, i pii ka ohu a uhi iluna o na kuahiwi, ia manawa e uhi hou ana ka noe e like me mamua.

          "E kali oe ia manawa, ina e lohe oe i ke keu a ka Alae, a me ka leo o ka Ewaewaiki e hoonene ana. Ia manawa, e puka oe mai ka hale nei aku, a ku mawaho o ke anaina.

          "Hoolohe oe a e kupinai ana ka leo o na manu Oo a haulele, alaila, au makaukau wau e hoouna mai ia Laielohelohe.

          "Aia kupinai mai ka leo o na Iiwipolena, alaila, aia ko wahine ma ke kihi hema o ka aha. A ma ia hope koke iho oia manawa, e lohe auanei oe i ka leo o na Kahuli e ikuwa ana, ia manawa e hui ai olua ma ke kaawale.

          "Ia olua e hui ana, hookahi hekili e kui ia manawa, nakolo ka honua, haalulu ka aha a pau. Ia manawa, e hoouna aku wau ia olua maluna o na manu, a mao ae ka ohu a me ka noe, aia olua e kau aku ana iluna o na manu me ko olua nani nui. Ia manawa e ku ai ka makaia o Laieikawai, i ike ai oia i kona hilahila, a holo aku me he pio kauwa la."

          (Me keia wahi, e kamailio hou kakou no Halaaniani, a me kona kaikuahine.)

          A pau keia mau mea, hoi aku la o Waka iuka o Paliuli.

          Mamua iho nei, ua oleloia ua hiki aku o Halaaniani i Keaau, e ike i ka pono o kana wahine (Laieikawai,) a ua oleloia no hoi, ua lohe oia he la hookahakaha no Kekalukaluokewa me Laielohelohe.

          I kela la a Waka i hiki ai i Keaau e halawai me Kekalukaluokewa, e like ma ka kakou ike ana maluna ae.

          Oia no ka la a Malio i olelo aku ai ia Halaaniani e hoomakaukau no ka iho e ike i ka la hookahakaha o Laielohelohe ma; "me ka i aku nae o Malio i kona kaikunane, "Apopo i ka la hookahakaha o Laielohelohe me Kekalukaluokewa, ia manawa e lilo ai o Laielohelohe ia oe, no laua auanei ka hekili e kui, a mao ae ka ohu a me ka noe, alaila, e ike auanei ka aha a pau, o oe a me Laielohelohe ke kau pu mai iluna o ke eheu o na manu."

          I ke kakahiaka nui o kekahi la ae, oia hoi ka la hookahakaha o ua mau Alii nei, kiiia aku la o Kihanuilulumoku, a hele mai la imua o na kaikuahine o Aiwohikupua kona mau kahu nana e malama.

          A hiki mai la au moo nui nei, olelo aku la o Kahalaomapuana, "I kiiia aku nei oe e lawe ae oe ia makou i kai o Keaau, e nana makou i ka la hookahakaha o Kekalukaluokewa, aia a hiki i ka auina la a mahope iho oia manawa e kii mai oe a iho aku kakou."

          Hoi aku la o Kihanuilulumoku, a hiki i ka manawa i kauohaia'i, a hele mai la.

          I ua moo nei i hoomaka ai hele e mai imua o kona mau Haku, aia hoi, ua uhi paaia ka aina i ka noe mai uka o Paliuli a puni ka aina, aka, aole i wikiwiki o Kihanuilulumoku i ka lawe i kona mau Haku, no ka mea, ua maopopo no ia Kihanuilulumoku ka manawa e hui ai na 'Lii.

          A ike o Kekalukaluokewa i keia noe i uhi mua mai maluna o ka aina, alaila, hoomanao ae la ia i ke kauoha a Waka.

          Kakali hou aku la no oia i na hoailona i koe. Mahope iho oia manawa, lohe ae la kela i ka leo o ka Ewaewaiki a me ke Kahuli, ia manawa, puka aku la o Kekalukaluokewa mai kona hale aku a ku mawaho o ka aha, ma kahi kaawale.

          I keia manawa, oia ka manawa a Kihanuilulumoku i kuu aku ai i kona alelo i waho i noho iho ai o Laieikawai me na kaikuahine o Aiwohikupua.

          A i ke kui ana o ka leo o ka hekili, uhi ka ohu a me ka noe, a i ka mao ana ae, i nana aku ka hana o ka aha, aia o Laielohelohe me Halaaniani e kau mai ana iluna o na manu.

          Ia manawa no hoi, ikeia mai la o Laieikawai me na kaikuahine o Aiwohikupua e kau mai ana iluna o ke alelo o Kihanuilulumoku ka moo nui o Paliuli.

          Ia lakou i hiki ai i kela manawa hookahi me na mea nona ka la hookahakaha. Aia hoi ua ike aku la o Laieikawai ia Halaani- @@@ @@ @@@ @@@@ @@@@ i ka olelo wanana a Kahalaomapuana.

          I kela manawa a Kekalukaluokewa i ike aku ai e kau mai ana o Halaaniani me Laielohelohe iluna o na manu, alaila, manao ae la o Kekalukaluokewa i kona nele ia Laielohelohe.

          Ia manawa, pii aku la o Kekalukaluokewa iuka o Paliuli e hai aku i keia mea ia Waka.

          A hai aku la o Kekalukaluokewa ia Waka i keia mau mea, "Ua lilo o Laielohelohe ia Halaaniani, aia oia ke kau pu la me Halaaniani i keia manawa."

          I mai la o Waka, "Aole e lilo ia ia, aka, e iho aku kaua a kokoke aku wau i ka aha, ina ua haawi aku oia i kona ihu e honi aku ia Halaaniani, ka mea a'u i kauoha aku ai aole e lilo i ka mea e ae, a ia oe wale no e laa'i ka ihu o kuu moopuna, a laa pu no hoi me kona kino, alaila, ua nele kaua i ka wahine ole, alaila, e lawe aku oe ia'u i ka lua me ko minamina ole. Aka hoi, ua hoolohe aku la ia i ka'u kauoha, aole e lilo i kekahi mea e ae, aole no hoi e lilo ka leo ma kona pane ole aku ia Halaaniani, alaila, ua wahine no oe, ua hoolohe no kuu moopuna i ka'u olelo."

          Ia laua i kokoke e hiki aku, hoouna aky la o Waka i ka noe a me ka ohu maluna o ka aha, a ike ole kekahi i kekahi.

          Ia manawa i hoouna aku ai o Waka ia Kekalukaluokewa maluna o na manu, a i ka mao ana ae o ka noe, aia hoi e kau pu mai ana o Laielohelohe me Kekalukaluokewa iluna o na manu, alaila, uwa ae la ke anaina kanaka a puni ka aha, "Hoao na 'Lii e! hoao na 'Lii e!!"

          A lohe o Waka i keia pihe uwa, alaila, hiki mai la o Waka imua o ka aha, a ku mai la iwaenakonu o ke anaina, a hoopuka mai la i olelo hoohilahila no Laieikawai.

          A lohe o Laieikawai i keia leo hoohilahila a Waka ia ia, walania iho la kona naau, a me na kaikuahine pu kekahi o Aiwohikupua, ia manawa, lawe aku la ke alelo o Kihanuilulumoku ia lakou a noho iuka o Olaa, oia ka hoomaka ana o Laieikawai e hoaaia i kona hilahila nui no ka olelo a Waka, a hele pu no hoi me kona mau hoa.

          I kela la, hoao ae la o Kekalukaluokewa me Laielohelohe, a hoi aku la iuka o Paliuli a hiki i ko lakou hoi ana i Kauai. A lilo iho la o Halaaniani i mea nele loa, aole ona kamailio i koe.

          Noho iho la o Kekalukaluokewa me Laielohelohe ma Paliuli a pau na la, hoomakaukau ae la lakou e hoi i Kauai.

          A ma ko ke Alii kane manaopaa, e hoi no i Kauai, lawe ae la oia i kana waine, a me ko laua kupunawahine i Kauai, o na kanaka pu me lakou.

          A makaukau lakou e hoi, haalele lakou ia Keaau, hiki mua lakou i Oahu nei, ma Honouliuli, a lawe ae la ia Kapukaihaoa me lakou i Kauai, a hiki lakou i Kauai, ma Pihanakalani, a ili ae la ka hooponopono o na aina, a me ke aupuni ia Kapukaihaoa, a hooliloia iho la o Waka oia ke kolu o ka hooilina o ka noho alii.

          (Ma keia wahi, e kamailio kakou no Laieikawai, a me kona loaa ana i ka Makaula ia Hulumaniani.)

          Ia Laieikawai ma ma Olaa. e noho ana no oia me kona nani, aka, o ka mana noho iluna o ka eheu o na manu, oia ka mea i kaawale mai o Laieikawai aku, koe no nae kekahi mau kahiko e ae, a me kekahi mau hoailona alii ia ia, mamuli o ka mana i loaa i na kaikuahine o Aiwohikupua, mai a Kihanuilulumoku ae.

          (Aole i pau)

 

Ka Nupepa Kuokoa

HONOLULU, FEB. 14, 1863.

 

          He mea olioli mau ia makou ka lilo ana i poe nana e hoike aku i na hana lokomaikai. a me na hana ku i ke aloha i hanaia iloko o keia pae aina, a me na wahi e aku no hoi o ka honua a pau; a no ia mea, ke wikiwiki nei e hoike aku ma ke akea i kekahi hana kaulana, a lokomaikai, a ku no hoi i ke aloha, i hoomaikaia iloko o keia kulanakauhale iloko o keia mau la iho nei, o ia hoi ka hoohui ana o ka Moi Wahine aloha o Hawaii nei ia ia iho, me kekahi poe lede hanohano e ae, ma ke kukulu ana i ahahui, no ke kaahele ana i na hale a pau e huli ana i ka poe i loohia i ka mai a me na pilikia e ae o keia ola ana.

          Ke kaahele nei lakou ma na hale o kela ano keia ano, me ka hoomanawanui i ka hookuia mai i na mea e loohia mau ana i ka poe e kaahele ana ma kekahi o na wahi maemae ole o keia wahi, a he nui ka poe i hoopomaikaiia, a i auaia paha mai ka naue ana i ke ala hoi ole mai, e ko lakou hik iana'ku, a me ko lakou kuhikuhi ana'ku i kahi e maha'i. No ka mea, o ka poe i loaa ia lakou e noho nawaliwali ana, au kokua lakou, a au hai aku no hoi i na huaolelo hooluolu manao, me ke koi aku no hoi i ua poe la e huli a e imi i ka pono, a e hele e hana; aole make noho palaualelo, a e malama no hoi i ka noho maemae ana, ame na oleloao maikai e ae no he nui wale.

          Ua maopopo no paha i ka hapa nui o keia @@@@, @@ @@@@ @@@@ @@ @@@ o ka poe i loaahia i na mai nana i hoonawaliwali mai i ke kino, a ua make aku he nui wale o ia poe, no ka mea, aole mea nana e malama,  e kuhikuhi aku no hoi i ka mea e hiki ai ke hoola mai, oiai hoi ina e malamaia, a e kuhikuhi pono ia hoi i na laau, ame ke ano o ka malama ana i ke kino, e pakele no ua poe la mai ka make ana. A nolaila, i ka hoea ana'e o ka Moi Wahine, ame kona mau hoa, iloko o keia hana Hemolele, a aloha no hoi, he kumu pono ia nana e koi mai i ko kakou mau waimaka aloha e kahe no ke aloha iaia, ame ka hana Hemolele ana e lawe nei, a he kumu pono no hoi ia nana kakou e koi mai e halalo i ko kakou mau puuwai, a e hoomaemae, ia wahi me ka hakalia ole oiai he mea pono ia kakou ke hoopili aku i na hana maikai a pau, a he kumu alakai keia no keia lahui mai o a o, i hoopili aku ai kakou i ka hana aloha a ko kakou Moi wahine aloha i hookumu mai nei imua o kakou.

          E na kaikuahine, na kaikuaana a me na makua, a me na kupuna, e ala'e oukou ano, a e hele aku e kokua i ka poe mai a me ka poe i loohia i ka nele, i kanu pu ia'i ko kakoua mau inoa me ko kakou mau Moi, a me ke au hoi a kakou e noho nei iloko o ke kihapai o ke kaulana mau loa, no keia hana maikai e hanaia nei. Aole anei oukou e na kaikuahine e ku koke ae a e kaapuni i ko oukou mau kulana hale, me ka huakai a ke aloha e like me keia? E nana maka mai no auanei oukou i ko oukou Moi wahine, e komo hele ana iloko o kela a me keia wahi pupuhale, a me kela wahi pelapela keia wahi pelapela me ka hoomanawanui? E ku wale mai no anei oukou me he mau kii la, me ka hoopili ole mai i ka hana hemolele a aloha no hoi, ana i kukulu ai i rula no oukou? Aole, aole! mai hana pela, aka, e hele koke ano, a e hoike i ko oukou aloha i ko oukou mau Moi, a me ko oukou lahui nei, ma ka hahai ana mahope o na rula a ko oukou Moi wahine i waiho mai nei imua o oukou. Ua hoomaka kela, a e aho ia kakou ke koena.

          Aole keia o ka makamua o kana mau hana maikai, no ka mea, aia ke ku nei ka Halemai e o nei o kona inoa - Halemai o ka Moi wahine, i hoike ku mau no kona aloha i kona lahua kanaka, a o ka lua keia, oia ano like no ka awili loa ia iloko o ke aloha. E ke Akua, e malama mai i ko makou mau moi.

 

          PEPEHI KANAKA WELIWELI MA KAU. - Ua loaa mai ia makou he palapala na J. A. Kaelemakule, e hai mai ana, he pepehi kanaka weliweli kai hanaia ma Kapapala, Kau, Hawaii; o Pahee ka inoa o ka mea nana i pepehi, ekolu i make, a ekolu i ola mahunehune, ua hopuia no nae o ua Pahee, o ka lili ke kumu o ka pepehi ana ia lakou. A keia pule ae hoike pauia'ku ka moolelo no ia mea.

 

NA MEA HOU O HAWAII NEI.

 

LA HANAU O KA MOI. - Ua malamaia no ka la hanau o ka Moi, me ka maikai e kona mau makaainana, a ua haawi ae na koa he ahaaina hoomanao no ia la ma Huehue, a ua kai hele no hoi na Kaa Kinai Ahi o ke kaona nei, mai ka Helu 1, a hiki i ka Helu 4, ame na mea lealea maikai e ae no hoi kekahi, i hanaia ma ia ia.

 

PAKELE MAHUNEHUNE. - Ua pakele mahunehune kekahi keiki uuku ma ke ahiahi o ka Poakolu iho nei, i alualuia e ka Bipi, mawaho ponoi iho o Kanaana, me ke Alanui Alii, a kuia ua keiki nei hina ilalo, hou no ka Bipi ia manawa, aole nae i ku ua keiki nei i ke kiwi; he wahi moku uuku wale no ma ka lehelehe luna, ina paha e ku, in a la ua make loa. He pakele mahunehune maoli keia.

          MAKE EMOOLE. - Ma ke ahiahi o ka la 4 o Feberuari iho nei, ua make emoole aku o Mrs. Wahinekapu Kaihuna, he wela ma ka houpo ka mai i lele ai o kona ea. Ua haalele iho oia he kaikamahine a me na hoahanau e ae ma keia honua pau wale, i poe nana e u a me ke kanikau no kona make ana. Auwe! aloha ino ia.

 

HALAWAI KOA PUALU HAWAII. - Ua lohe mai makou he Halawai ka na Koa Pualu Hawaii ma ko lakou keena, ma ke ahiahi o keia Poaha ae. Nolaila, e pono i na hoa oia hui ke hoomaopopo i ka manawa i haiia. Me na kapa koa no e hele ae ai no ka paikau oia ahiahi. He minamina makou ina ua kuemi hope kekahi poe me ke kanalua. o kapa ponoia mai ka poe kanaka Hawaii he poe loli wale; nolaila, e hoomaopopo, a e hele ae e hoomau i ko oukou noho hui ana, o i ia mai kakou he poe kamalii.

 

          HANA POLOLEI OLE. - He palapala kai hiki mai na J. W. AIPUALEHUA, o Kawaihaeuka, o Waimea, Hawaii, e hai mai ana i ka hana pono ole o ka poe maauaua pai poi o Kohala, no ka mea, ua lawe ae lakou i ka ai me ka ili no. He nui ko makou mau makamaka ma Kohala, a nolaila, in a he oiaio ka mea i hoikeia maluna, alaila, ke nonoi aku nei makou, e hooki i ka hana ana pela, a e alualu pono aku mahope o ka huaolelo pololei, a me ke kaulike.

 

          KE KANAKA HIHIU O NUI. - Ua hoalaia mai kekahi mau wahi minute pioloke iloko o keia kulanakauhale lailai wale, i ka hiki ana mai o ka lono, ua loaa kekahi kanaka hihiu ma Niu, ua holo koke kekahi poe ilaila, a ua ike maka no hoi i keia kanaka kupanaha ma ka hale o Isaac Adams ma Niu. He 1S paha a oi ae na makahiki o ko keia kanaka noho ana ma ke kuahiwi o Niu a me na wahi e pili ana, me ka launa ole me kekahi kanaka e ae. Ua pinepine no kona ikeia ana ma kekahi mau makahiki i hala ae nei, a ua hopuia no e Mr. Isaac Adams (Aikake,) a laweia a hoopaaia i ka hao i kona wahi; aka, i ka wa no nae i hiamoe ai i ka po, ua wehe no ia i ka lima on a mailoko mai o ka hao, a holo hou no i ke kuahiwi. A i keia hopuia ana iho nei, ua laka maoli mai; aka, aole nae he kamailio akaka mai no kekahi wahi mea hookahi; me he mea la ua nalowale ka olelo ia ia, ke aoia nei no nae i ke kamailio, ua nui no kona hoaoia ana e kamailio mai ma na ano olelo he lehulehu wale, aole no on a kamailio mai.

          He elima kapuai kona kiekie, me he Malaia la kona helehelen. Aohe no hoi ona aahu i kona wa i hopuia'i. Aole ona ano hihiu. aka, he mea ano pioo wale no. Eia oia ke hoikeikeia nei ma Halehai, ma ka aoao Hikina o ka Halepai Kuokoa.

 

Pomaikai maoli.

 

          E ka Nupepa Kuokoa e; Aloha oe:

          Ua pomaikai no ka poe i loaa ke kii o ka Moi Kamehameha IV, ma ka hookaa ana i na dala elua no kana Kuokoa iho, no ka mea, hookahi dala no ia kii ke kuai ma ka hale pai kii maluna ae o ka hale pai o H. M. Wini, a ma keia hookaa mua ana ua loaa wale ka Pomaikai maoli.

          Eia hoi, ua hauoli au i ka hai aku, ua halawai au me ke kino wailua o ke Alii, ua kupono ia mailuna a lalo, aole wahi wehena iki, ua kupono i ka nani a me ka hanohano Alii, akahi no ka launa, a me ka noho Pomaikai maoli.

          Eia hoi, ua kaumaha au i ka hai aku, ua kue maoli o Pakipika i ka Moi, ma kona hoinoino ana i ke kii o ke Alii, no ka mea, o kona hoinoino ana i ke kii o ke Alii i hoolele pono ia ma ka hale pai kii, oia no kona hoowahawaha ana i ke kino o ke Alii, a me kona kahiko Alii, auwe! ka mea nana keia olelo hoino, e aho no ia, i na aole i hoohanauia mai.  Nohea la keia wahi kanaka hoino i ka "Nupepa Kuokoa," a hili hewa i luna o ke Alii kana hoina ana? aole i hoino mai na'lii no ka mea, ua ike au ia Noa e lawe ana i ka M. Kekuanaoa kii makana e hana i aniani no waho, e like me ka nui o ke kii pela ka nui o ke aniani, i mea hoonani no kona hale malama Alii, hoowahawaha ke kuaaina, auwe oe! i na aole i hanauia mai e aho la ia, aole la hoi e lohea na olelo kikoi.

          NA MAKAMAE.

 

KA NU HOU!

Lanakila na Kipi ma Galavesetona.

Hoopaa loa ia na Alii Koa Kipi

Hoopauia o Generala Burnside.

O GENERALA HOOKER KONA HOPE.

Ke pio ana o ka Moku Kaua Hatteras i ka Moku Kipi Alabama.

 

          Ma ka moku kialua Amerika Florence, i ku mai nei i ka Poakahi iho nei, a me ka moku Young Hector, ma ka Poakolu mai, ua loaa mai na nupepa o Kapalakiko, o ka la 17 a hiki i ka la 31 o Ianuari iho nei, a ua ikea iho no hoi na mea hou o ke kahua kaua i keia mau la mai nei, a penei iho no ke ano nui o na mea i hiki mai io makou nei.

          Ma ka la mua iho nei o Ianuari, ua hoouka mai na koa kipi ma ka moana a me ka aina, ma Galavesetona, Tekasa, a ua hoopio nuiia mai ka Akau ma ia wahi. He elima mokumahu kipi nana i hoouka mai na moku Akau, ua paleia o waho o na moku kipi i na pela pulupulu, a no ia mea, ua@aneane e hiki ole i na poka ke komo iloko o ke kino o ka moku. Ua makaukau no na koa aupuni i na pu, aka, ua io aku nae ka moku mahu Harriet Lane, he elua wale no on a alii i koe ola iho, a he 15 paha luina - make ke Kapena me 130 luina, a me kekahi o na'lii. Ua komo no iloko oia hoouka ana na mokumahu aupuni Clifton a me O@asso, aole nae laua i pio. O ka moku o ke Kamadoa Renshaw, o Westfield kona inoa, aole i komo iloko o ke kaua no ka ili ana, a no ka manao ana o ke Kamadoa Renshaw o lilo au moku la i na kipi, nolaila, ua hooholo koko oia i ka manao e hoopahu ia ia i ka pauda, a ia ia no e holo mai ana ma kona waapa, aia hoi pahu mai la ka moku, a pau pu aku la lakou i ka make, o ke koena iho oia poe ua hiki ola'ku i Nu Olina. Aole no i hiki aku ilaila na koa aupuni i hoounaia aku nei, a mahope iho o ka pau ana o ka hoouka ana, hoea aku ana lakou ilaila. Ke hoi aku nei na koa a me na moku aupuni a pau ma Nu Olina. O ka nui ka o na koa kipi malaila he 5,000 malalo o ka mea kaulana Generala Magaruda (Magruder.) O ka nui o ka poino o ka Akau ma ia hoouka kaua ana, he 260 i make, a he 200 i pio. O na au moku kaua no nae ka poe i nui loa ka poino. Ua manao waleia no ua mahuahua no ka poino o ka aoao kipi.

          Ua hoopuka'e ke Generala Nui o na koa aupuni ma Murfreesboro i kekahi olelo kuahaua i na'lii kipi e noho pio nei me ia, a penei no ke ano nui o kana mau olelo:

          "Ke ehaeha nei au i ka hai aku i na'lii koa o na moku Hui o ka Hema i pio mai nei i ke aupuni, no ka hana pono ole a Paresidena Davis, ma kana olelo kuahaua i hoopuka'i mamua aku nei, e hoole ana i ke kukaiia o na'lii koa aupuni i pio aku i na puali koa o ka Hema, nolaila, ua koiia mai makou e hana like aku pela i na'lii koa o na moku Hui o ka Hema e noho pio nei i ke aupuni. He mea minamina ia'u ka hanaia ana o keia mau mea hookaumaha wale me ke kumu ole, a ke lana nei ko'u manao, e hiki aku ka lono i ka poe Luna Aupuni o na moku Hui o ka Hema, ma ka inoa o ke aloha kanaka, ke kaulike, a me ka naauao no hoi, e hoopau ai i keia mea hookaumaha wale, i hiki ai ia'u ke haawi aku i na'lii koa o ka Hema, i ka mea olioli mau ia'u ke hana aku i na kanaka koa a pau, oia hoi ka haawi aku i ko lakou lanakila, oiai no hoi e kaua ana lakou ma ka aoao a'u i manao ai e kue ana i ka pono a me ke kaulike."

          - Ke hoikeia mai nei ka hoomakaia'na o na Nika e hoolilo i koa ma Nu Olina, ke kukuluia nei he mau puali koa noloko ae oia poe kanaka, i poe nona e noho ma ka poe pakaua ma kai ae o Nu Olina.

          - Ua hoikeia mai e kekahi nupepa o ka Hema. ka hiki ana ae o kekahi mau moku lawe koa ma Nubena, Karolina Akau, he 55 ka nui oia mau moku, a ua manaoia ka nui o na koa o luna he 55,-000.

          - Ua hoikeia mai ka moolelo oihana o ka lilo ana o Holy Spring ia Gen. Grant. a ma ia palapala, ua ikea ka hana menemene ole a Gen. Van Dorn o ka Hema. I ka wa a lakou (na kipi) i haalele ai ia wahi, ua hoao lakou e hoopahui ka Halemai me ka pauda, me na poe mai he 500 e waiho ana iloko. Ua houluulu a kekahi mau mea make mamua ponoi iho o ua Halemai nei, a ua kuniia i ke alii mamua aku o ka laweia'na o na poe mai. mai kahi a lakou e waiho ana. A i ka wa i pahu ae ai o ka pauda, aia hoi ua hele ka Halemai a pukapuka i ka poka. He iwakalua o ka poe koa mai i make @ ua mau poka la. He 150 mau koa mai i kukuluia i ka laina me ko lakou nawaliwali nui, a no ko ke Kauka kue loa ana ia mea, ua hooweliweliia oia e kiia i ka pu. O kekahi o ka poe mai, au aneane hiki ole ia lakou ke hele, aka, ua ka@a ka waha o ka pu i o lakou la, a au ha@a e hele, a i ole, alaila e kiia no i ka pu@a no ia mea, ua hooikaika'e no ka poe mai i pakele ai i ka waha o ka make e kau makaukau mai ana e ale aku ia lakou. Mahope iho o keia mau hana, ua ae aku ke alii koa o na kipi e hooki i ka hana hoomainoino ana, no ka hoohiki ana mai a kekahi poe Kahunalapaau he lehulehu wale i ka hiki ole maoli i ka poe koa mai ke hele.

          - Ua haiolelo o Jeff. Davis, imua o ka Hale Ahaolelo o Misisipi, ma ka la 26 o Dekemaba iho nei, no na mea e pili ana i ke kaua. Wahi ana, i kona hiki ana mai, e hakilo hele mai ana o Gen. Grant me kona puali koa aupuni; aka, i ko lakou hele ana aku i Garanada, aohe wahi mea a ike ikiia o au poe la, o ka mehea wale no o ke alanui ka mea ike ia. A ua ike maopopoia'e nei e ia i Vicksburg a me Port Hudson, kahi maoli a ka Akau e manao nei e hoouka aku. A o ka poe a pau e makemake ana e hoopakeleia na Moku Hui o ka Hema, e hele koke ilaila e kokua'i. Ua pono ke malamaia keia mau wahi, no ka mea, in a e pio, alaila o ka mokupu no ia o ka Hema iwaenakonu, a ua loihi kana wehewehe ana i ka pono o ka malama loa ia mau wahi, alaila, e ano e ae auanei na mokuaina o ka Akau ma ka Akau Komohana. alaila, haalele lakou i ke kokua ana i ke aupuni i keia kaua, a aia malaila mai e hoea mai ai ke alaula o ko ka Hema kuokoa ana.

          - Ua loaa mai i kekahi o na Kakauolelo o ke Keena Kuhina o Farani ma Amerika Huipua, kekahi palapala mai kona aupuni mai, e hoike ana, au hoouna'e ke Kuhina Nui o Farani i kekahi palapala aupuni, e ahewa ana ia Enelani, no kona hana ana i na moku powa iloko o kona mau awa, me ka hai pu mai no hoi, ma ia mau hana ana, ua kue oia i ke kuikahi o Parisa, a no ia mea, ua pili i ke kue maoli i na kanawai o na aupuni. Ke waiho nei ia mau kumu manao imua o ka Aha Kuhina o Enelani; ma keia hope aku e lohe ai kakou i kona mau kumu pale no na olelo a ke Kuhina Nui o Farani.

          KAUA PAHA AUANEI. - Ma ka nupepa Bulletin o Kapalakiko, ua ikea iho ka i@iki ana mai o kekahi mokumahu ka@a Beritania o Ga@a@aea kona inoa, ma Bamuda, a ua hoike ae kona Kapena, ua kauoha mai kona Aupuni ia ia e hopu ia Adimarala Wilkes, oia ke Alii Manuwa o Amerika e alualu hele nei ia Alabama. a oia no hoi ka mea i holo pu me Dr. G. P. Judd i Hawaii, a hele loa ai i ka lua o Pele. A mahope o kona hopuia ana e laweia oia a i Bamuda, ilaila oia e hoopaa pio ia'i a hiki i ka wa e hiki hou mai ai ke kauoha mai Beritani Nui mai. Ina he oiaio keia mau mea, alaila, o ke kaua maoli no ia o Amerika Huipuia me Enelani. No ka mea, o Adimarala Wilkes, kekahi o na Alii Manuwa kaulana loa o ke Aupuni Akau.

          PIO KA MOKU KAUA HATTERAS O KE AUPUNI I KA ALABAMA.- Ua pio mai nei kekahi moku kaua o ke aupuni, nona ka inoa Hatteras i ka moku powa o ka Hema, mawaho iho o ke awa o Galavesetona, mokuaina o Tekasa, oiai e hoom@ana ana na moku aupuni ma ia wahi, aia hoi hoea mai ana kekahi moku mahu ma waho o ke awa, nolaila, au hoomakaukau koke ka moku mahu kaua Hatteras o ke aupuni e alualuia ia, i kona holo ana'ku a kokoke e hiki i kahi a ua moku nei i lana mai ai, i kahi hoi e hiki ke loha mai i ke kahea aku, ia wa, ninau aku la ka poe o luna o ka moku aupuni i ka inoa a me kahi nona ua moku nei, a ua paneia mai, me ka i ana mai, "Ka moku kaua o ka Moi wahine, o Spitfire ka inoa." A no ia mea, lele koke iho la ke Kapena o ka moku kaua aupuni i luna o kona waapa, me ka manao e holo aku i luna o ua