Ka Nupepa Kuokoa, Volume I, Number 55, 13 December 1862 — Page 3
Ka Nupepa Kuokoa.
Parker; aka, ua hoole like lakou a pau, o Kitchin kekahi. Pilikia loa ka ekalesia hou.
Eia nae ka mea i haiia mai e ka poe Episekopale: I mai lakou, na Barlowe i hoolaa ia Parker, a na Parker i hoolaa mahope i na mea e ae i kohoia i Bihopa hou; a malaila hoomaka ka lalani Bihopa o ka ekalesia Enelani hoole pope. O na Bihopa a paa o ka Ekalesia Episekopale ma Enelani e noho nei, he mau moopuna lakou a Parker ma ko lakou ano Bihopa. Nolaila, i na aole i hoolaa ponoia o Parker, i na aole hoi he Bihopa hookahi. Eia na mea pohihihi.
1. Aole maopopo he Bihopa o Barlowe, aole palapala, aole hoike maoli no kona hoolaaia'na. Ua koi pinepine ka poe pope i ka poe Episekopale e hooiaio i ke kuleana Bihopa o Barlowe ; aole hiki ia lakou ke hoopuka mai. Nolaila, aole paha Bihopa, a ina aole Bihopa o Barlowe, i na aole hiki ia ia ke hoobihopa ia Parker, i na aole he Bihopa o ia Ekalesia mahope mai, aole hoi he Kahuna maoli ka poe i Orinatioia e lakou.
2. Aole i ike makaia ka hoolaa ana o Barlowe ia Parter, koi pinepine ka poe pope i ka Ekalesia Enelani e hoopuka mai i ka palapala hoike no ia mea. Paa ka waha o ka poe Episekopale, a hala na makahiki 50, akahi no a hoopuka mai o Mason i palapala moolelo no ka hoolaa ana o Barlowe ia Parker. Aole nae i pau ka pohihihi o ka poe kanalua ; no ka mea, manao lakou he palapala apuka kela, na ka lima o Mason ia i kakau, pela paha!
3. Aole o ka poe kue wale no ke kanalua, ua kanalua pu ka nui o na Bihopa, a me na Kahuna o ka Ekalesia Episekopale kekahi. Nolaila, kukala o Elisabeta, ma kona mana Moi Wahine, a me kona mana poo no ka Ekalekia, he mau Bihopa oiaio, Kahuna oiaio, Diakona oiaio no ka poe i hoonohoia eia, a nana no i pani ma kona mana i na hakahaka, a me na hemahema a pau, i komo paha ma ko lakou Orinatio, a me ko lakou hoohaahaa ia ana. Ua pau paha ka pihoihoi o ka poe i waiwai maloko o ia hana; aole nae e pau ke kanalua o ka poe imi oiaio, akaaka wale no lakou i kela hana kupanaha a Elisabeta, me he hana pupule la.
4. Ua haalele ka Ekalesia Enelani hou i ke ano o ka Orinatio, a me ka hoolaa Bihopa o ka wa kahiko. Ua hanaia mamuli o ke kauoha o ka " Book of Common prayer" o Edward VI. A o ka pule hooko ana ka hoolaa Bihopa, he olelo hemahema loa. Oia nae ka olelo i malama mauia e ua Ekalesia nei ma ka Orinatio, a me ka hoolaa Bihopa, ma na makahiki he 100. A mahope mai ua haaleleia no ka hemahema, a hookomoia he pule hou ma kona wahi. Nolaila, ninau au i ka poe Episekopale, ua hoololiia kela olelo no ke aha ? Ina i kupono kela olelo mua i ka hoolaa Bihopa; no ke aha ka hoopau ana ? Ina i hewa kela olelo mua, aole Bihopa oiaio o ko oukou Ekalesia ma na makahiki 100. Alaila, makehewa ke hooluli i ka olelo mahope mai; no ka mea, ua maloo kahiko ke kiowai o ka mana Bihopa, no ka hemahema o ka olelo ma na makahiki he 100.
Wahi hoi a Kuhele, aole na Henery VIII, i kukulu i ka ekalesia Episekopale o Enelani. Lalau ! Ke ku mai nei na hoike no ia mea e hooiaio, ua kukulu o Henry VIII i ka ekalesia Episekopale mamuli o ka lima kakauha o ka puni koko, a me ka manao ino o kana mau hana haumia he nui wale. A ua lilo na Kiritiano Katolika i puuhonua no kona ekalesia haumia. Ke hilinai mai nei nae o Kuhele mamuli o kona ike i na Moolelo, me he mea la, ia ia wale no ia mea. Ua koe paha kekahi mau Moolelo e ae ia oe; nolaila, ke kumu o kou hoole ana, aole na Henry VIII i kukulu ke kahua o ka Ekalesia Episekopale o Enelani, a oia hoi kana pulapula e hookawowo nei ma Peleula.
E ke hoa! e hoopau i kou kuhihewa, a huli hoi mai ma ka ekalesia ku mau mai a Iesu mai, ke kahua o na pomaikai he nui wale o ka uhaue. Malaila e loaa'i ia oe ka maha mau. Me ke aloha nui.
B. K. KAULAOKANAELE.
[Ua pai iho makou i ka haiolelo a Mr. W. Humphreys (Uwelealea,) ma ka la 28 iho nei o Novemaba, ma kekahi ahaaina a na keiki papa o ka malu ulu o Lele, a o ke kumu o ke pai ana o ia no ke kauoha ana mai a kekahi poe hanohano o ia wahi, a penei no ia:]
He Haiolelo ma Lahaina.
"E NA HOA.—Ua akoakoa mai nei kakou i keia la, e hapai pu, a e hooko hoi i keia hana nui hanohano a kakou e hana nei me ua manao iini o kakou iho i hookikina oleia mai, i ka hoohui ana i ko kakou mau manao lokahi iloko o ka umii hookahi o ke aloha olioli, ma ke kukulu ana iho nei i keia ahaaina nui hookaulana, i mea e ike leaia'i ko kakou mau manao kupaa mau i ka malama ana i ka hanohano o ko kakou Moi, a me ko kakou Aupuni, a me ko kakou Lahui hoi. No ka mea, o keia la, o ka la no keia i loaa ai i ko kakou Aupuni nei ke Kuokoa ana.
"E mau ke ea o ka aina i ka pono."
Ke hoike pu nei no hoi kakou i na kahoaka o ko kakou aloha pumehana io i ko kakou Aupuni, ma ka houluulu ana mai nei ia, kakou pakahi e halawai pu ma keia wahi, me he mea ia he ohana hookahi e puliki pu ana i na aweawe makalii o ka manaolana, ma ka houluulu ana mai nei i na momona o ko kakou one hanau ponoi, a hoouka maluna o keia Papaaina, i mea e hooluolu ai i ko kakou mau naau, i pipii mai ai na manao hauoli o kakou, a hooho lokahi ae i na hua olelo. Huro! Huro!! Huro!!!
E ke kanaka Hawaii, e olioli oe i kou Hawaii ana, e hauoli hoi i kou kupa ponoi ana no keia mau mokupuni luaole, e ani mauia nei na kahakai e na welau makani moana. Owai la o kakou ke ku me na maka hilahila no kona kapaia mai he " Kanaka Hawaii," aole anei he hookano loa ae kakou ia inoa? Ke olelo nei au, i na owau ke kapaia mai pela, hookano loa ae au. A he mau kumu nui no hoi e loaa'i ia kakou ka hookano loa ana ma ia inoa. No ka mea, auhea na mokupuni ma keia moana a ke Akua i hoopomaikai kelakela ai e like me kou one hanau nei. E hoomanao iho oe i na mea nui a ke Akua i lokomaikai wale mai ai, maluna wale no o ko kakou mau mokupuni, aole ma na wahi e ae a keia la e hoomalamalama nei, na wai ono e kahe nei a puni ko kakou mau mokupuni, na welau palupalu o na makani kai e ani mau nei, na hua ai nui a ka la e ulu wale nei, na mea uliuli hooluolu maka a ka mahina, e lipolipo mai nei, na lokopaakai i hana lima oleia, na ipu hahao i hoomakaukau muaia, a me ka mahele ana hoi o ka manawa, i kou one hanau wale nei no ia. Penei.
A i makemake oe i kahi anu, i kahi wela a i kahi oluolu paha ma kou mau mokupuni nei, e loaa no ia ia oe, maanei koke iho, iloka o na hora pokole, aole pela ma na aupuni e ae, nolaila, i na oe e makemake i anu, a i wela, a i oluolu paha, he tausani na mile au e hele ai, a he mau malama hoi na wa kali. Nolaila, auhea hou aku a kakou mau mea e olioli ai mamua o ka olioli i loaa ia kakou i keia la kuokoa. O ka naauao anei ? Aole anei i loaa ka naauao ia kakou i keia wa, mamuli o ka lokomaikai hoomanawanui o na makua " misionari " o kakou e noho mai nei, i ao mai ai ia kakou, a apo koke no kakou me ka manao lokahi kanalua ole, a i keia la, ke kaena hilahila ole nei au, o ko kakou mau mokupuni nei, ua helu puia iloko o ka papa helu naauao o keia honua, aole pela kekahi mau mokupuni e ae ma keia moana, aole loa, i na aole au i kuhihewa.
A no ko kakou naauao ana, ua lilo maoli no kakou he mau hoa'loha pumehana io no na aina e, he mau hoa lululima pu, a he mau hoa kuikui no hoi e puliki pu ana i na kaula liilii palupalu o ke aloha, ke ike pinepine ia aku nei ko lakou hoolauna ana mai ma na moku o lakou, ke welo ae nei na Hae o ko lakou mau aupuni ma ko kakou mau kahakai i haliiia i na one keokeo alohilohi, ke noho pu nei lakou me kakou, ua ewe, a ua kawowo loa iloko nei o ko kakou mau mokupuni. E lawelawe pu ana me kakou i ka make nui iloko nei o ko kakou aupuni, no na " Kuloko," a me na " Kuwaho," a o ka lakou mau mamo, ke lilo nei i mahele iloko o ko kakou lahui makamae, a ke noho pu nei me kakou ma keia papaaina i keia la, me ka hoonani pu ana me na naau i piha i ka olioli, no ke Kuokoa ana o ko kakou aupuni.
" E mau ke ea o ka aina i ka pono"
Eia kekahi, i keia la no hoi, ke awili pu mai nei kakou i kekahi mea nui luuluu a kakou e hoomanao pu ai, a he mea kaumaha hoi ia ke hoopuka'ku, oia hoi ko kakou hui pu ana mai nei, i ka hoomanao kumakena ana no ko kakou Alii opio i make aku nei, no ka Haku o Hawaii, ka Lani o na'lii, ka hooilina o ke Kalaunu o kona makuakane Ilihia, a kona kupunakane koa luaole o keia moana i luhi ai, a ke hoike akaka nei kakou i ko kakou aloha kumakena io ia ia i keia la, me na naau paumako, e hoopiha pu ana hoi i ko kakou mau walua i ke aloha walania io nona, a no kona mau makua i pouli i ke aloha luuluu, ma ke kau kehakeha ana i kona mau hoailona kumakena, maluna o ko kakou mau kahiko nani iloko o keia ahaaina olioli, a oia no ke kumu o ka pelupeluia'na mai o na welau o ko kakou mau manao hauoli nui no keia la. Nolaila, e nonoi pu aku kakou a pau me na naau haahaa, i KA MEA MANA LOA, i ole ai oia e awili pu mai ma keia hope aku, i ke kumakena iloko o kekahi o na la nui olioli o ko kakou aupuni."
"E OLA KA MOI I KE AKUA."
Kupaianaha!
E ka Nupepa Kuokoa e; Aloha oe :
He nui kuu haohao ana, i ko'u heluhelu ana i na nupepa ma ka olelo Hawaii i keia mau la iho nei. Ke hakaka mai nei ka poe Pope a me ka Bihopa hou mai nei, no ke kahiko o na oihana a lakou. A ke manao nei na hoa paio, ma ko lakou aoao wale no ka oiaio a me ke ola ; a malaila wale no. Lapuwale!
Eia ko'u; o ka ekalekia o Iesu, (oia hoi ka ekalesia oiaio.) oia na mea manaoio ia Iesu a pau loa, a ua hoohamama ko lakou naau e ka Uhane Hemolele. A o na mea i hoohanau hou ole ia, aole lakou i pili i ka ohana a Iesu. Pela kana olelo ma Ioane 3: 7. " E pau oukou i ka hanau hou, e pono ai."
Aole olelo mai a Iesu " E komo oukou iloko o ka ekalesia Roma e pono ai," aole loa. Aole no i olelo mai i na kanaka, "E komo oukou iloko oka ekalesia Enelani e pono ai.' aole loa. Aka, ua kauoha mai i kana mau haumana penei: Mat. 28:19. " E hele ae oukou e hoohaumana aku i na lahuikanaka a pau, e pabetizo ana ia lakou iloko o ka inoa o ka Makua, a o ke Keiki, a me ka Uhane Hemolele." Ua akaka keia, a mamuli o keia kauoha a ka Haku, ua hele mai nei i keia Pae Aina na haumana a Iesu. I na makahiki he kanaha a keu aku nei, ua haiia mai ka olelo o ke ola, a ua hoohaumanaia na kanaka o keia mau mokupuni he nui wale, ua pau lakou i ka lohe, aole paha he kanaka ma keia Pae Aina nei, i lohe ole i ka olelo a ke Akua. Ua paiia ka olelo ma ka lakou olelo, a ua hoonaauaoia ka nui ma na Kula; a ke hiki nei i na kane a me na wahine, a me na kamalii o keia Pae Aina, e heluhelu i ka ke Akua olelo, no lakou iho no. He oiaio keia ; aole e hiki ke hoole. Ua oiaio no.
A nolaila, ua kahaha kuu naau i ka hiki ana mai o na Kumu hou ma keia Pae Aina. Ua lako no keia aina i na ekalesia, a me ka Baibala, a me na Kula, a me na Misionari; a ua hoouna aku nei na ekalesia o keia Pae Aina i mau Kahunapule Hawaii i na mokupuni naaupo o keia moana nui, o ka Pakipika nei, mamuli o ke kauoha a ka Haku ; aka hoi, ua hiki mai nei iwaena o kakou he mau Misionari hou, e kue ana i ka olelo a Paulo, ma Roma 15 :20 "Nui aku la no hoi ko'u makemake e hai aku i ka euanelio ma kahi i hai ole ia aku ai ka inoa o Iesu Kristo, o kukuiu aku au maluna o ko hai kumu ; aka, e like me ka mea i palapalaia. O ka poe i ao ole ia nona, ike no lakou, a o ka poe i lohe ole, e hoomaopopo lakou."
Ua nui na aina i koe o ka honua nei, i lohe ole i ka olelo a ke Akua; ma ka moana Pakipika kekahi; ma Inia kahi; ma Asia kahi; ma Aferika kahi; a pela aku no. Ina ua manao keia poe Kumu hou e hoolohe i ka olelo a Iesu, a e hai aku i ka olelo ma kahi i hai ole ia, ua pono no ; aole mea hoole. Aka i ko lakou hele ana mai ia nei, ma kahi i hai mua ia ka olelo, ke " kukulu aku nei maluna o ko kai kumu" i ko'u manao. He hoohaunaele keia a me ke kue. A ua lohe au, ua paakiki lakou i ka hoole i ke kanalua ana o na Kumu kahiko o kakou, no na mea i aloha nuiia e makou. "Ma ko lakou hua e ike aku ai oukou ia lakou," Mat. 7:16. Pela kakou e ike ai i na Kumu o kakou. Ua hooholoia ka lakou hana, a ua hoopomaikaiia ka lakou hooikaika ana i ka Haku. Nolaila, he pono ole keia hoino ana ia lakou, e keia poe hou mai nei. KAMAAINA.
Lahaina, Maui, Dek. 9, 1862.
Hookeke kumu ole.
ALOHA KE KUOKOA.—Ua koiia mai au e pane pokole aku i na ololo lehulehu wale e puka mau mai nei iloko o na nupepa a kakou, me ka manaolana e waiho aku imua o ka lehulehu i ko'u wahi manao haahaa no na mea e kamailio nuiia nei i keia mau la—ka hookeke kumu ole no na aoao hoomana.
He nui a lehulehu wale na manao i kakau ia e AEIOUYM, Kuheleloa, M. Kuhele a me Hoonioniolo ma, a ua moakaka no hoi na olelo i weheweheia mai e ia poe naauao ; aka, ua kanalua au i ke kumu o keia hookeke ana, a ua imi nui au i wahi e loaa'i ke kuleana iki, i lilo ai keia hoopaapaa ana i mea pono, a i mea hoi e hoopomaikai ai i ko'u lahui nei. O ka helehelena nui nae o na olelo a ka poe a'u i hai mua ae nei, he ano e hoole aku ana kekahi aoao hoomana i kekahi aoao. Pela ma ka'u koho wale ana aku i ke ano o ka lakou mau olelo.
He keu ke kupaianaha o keia hoopaapaa ana ; no ka mea, ua maopopo hookahi wale no ilina nui i manao nuiia e na Kahuna a pau i hiki mai nei iwaena o kakou, oia hoi ke alakai ia kakou hupo nei i ka malamalama, a me kahi e loaa'i ia kakou ka hooilina mau loa o ke ola pau ole, a o ka hana pono hoi i na Kahuna, oia no ka hopu like o nalima, a e hooikaika lokahi i ka huki ana ae i ka lahui nei iloko o ka manaoio, a me ka hana pono. Eia ka aole! no ka mea, i ka hiki ana mai nei o ka Bihopa hou o kakou nei, ua hoomaka na leo makawalu e o mai ma o a maanei, e hoomaikai ana kekahi, e hakukole ana hoi kekahi me ka hoinoino, a ke ane aku nei e komo iloko o ka hoopaapaa ino loa ; a me he mea la hoi e hooikaika ana kekahi aoao hoomana e alakai i ka lahui iloko o ka lua ahi o Gehena, a o kekahi la hoi e alakai i ka lahui i ka pono, pela ke ano o ka helehelena hookeke e hoomakaia mai nei e ka poe kakau manao naauao o na nupepa a kakou.
Kainoa no e hookuu no i na aoao hoomana a pau e hana i ko lakou mau oihana hemolele, a na lakou no e olelo aku i ka lehulehu, i kela a me keia o na mea a lakou i manao ai, a na ko ke kanaka manao no hoi e koho i kahi ana i manaoio aku ai; no ka mea, he pomaikai hoi ia i hoolawaia mai e ke Kumukanawai maikai o ko kakou aupuni nei, oia ka hiki i kela kanaka keia kanaka ke hoomana e like me kona manao he pono. Kainoa o ka huialoha me na malihini a me ka haawi aku hoi ia lakou i ka lima akau o ke aloha a me ka welcome aku ia lakou ma na kapakahakai lailai wale o kakou nei ka pono, aole ka! Eia ka he kue aku me he mea la me na kiwi loloa e houhou aku ai ia lakou. A ina hoi ua ike aku na kamaaina i ka hewa o ka malihini, e huipu aku a e kuka ma kahi malu, a pela hoi ke hewa ka hana a ke kamaaina, i nakii mai ai ke kaula o ka manao lokahi i ua poe hai ola nei o kakou, a pela la hoi e hele malino ai ke kai o ko lakou noho ana ; aka, ua okoa loa ka helehelena o keia mau la, a ke nee aku nei i ke kahua o ka mokuahana, me ka hoino aku, a hoino mai, me ka hoala ae hoi i na hoopaapaa hopena ole.
No ka mea, ua nui ka hoopaapaa ana mai ka wa kahiko mai, a hiki i ke au naauao a kakou e noho nei; aka, aole nae i ko kekahi aoao a me kekahi, aole wale ma ka leo ka hoopaapaa ana o na au i kaahope ae no na hoomana, me na pahikaua a me ke koko, a ua hoomau ia no hoi ka noho ko ole ana o kekahi aoao a me kekahi aono, a hiki wale mai i keia la A pehea la i keia wa ? Ke lana nei anei ko oukou manao e ka poe e hoala mai nei i ka hoopaapaa hoomana, e hiki ana ia oukou ke kauo mai i ka hopena, maluna o keia kumu hoopaapaa nui i hoouka mauia'i ke kaua leo, mai na wa kahiko mai a ia kakou nei ? Ke manao nei au aole! A nolaila, e hooikaika kakou ma ka mea hookahi, oia hoi o ka hookomo i ka manao lokahi iwaena o na aoao hoomana a pau e noho pu nei me kakou, pela no hoi e loaa'i ia kakou kekahi pono uuku no ko kakou lahui; no ka mea, aia a nui na poohiwi nana e olokaa mai i ka huila, alaila, holo ka hana. Me ke aloha.
AIPUALEHUA.
Moa kani hewa.
E ka Nupepa Kuokoa e ; Aloha oe:
Ua hoea ae kekahi Moa Nui kani hewa mai Waikiki mai, a pee ae malalo o ka nupepa Hoku Pakipika, Buke 2, o ka la 11 o keia malama, a ua kani hewa mai me ke kohu ole; aka i kuu nana ana a me ka poe e ae paha, he Moa kuaaina, no ka mea, ua kani kuaaina mai, ina paha he moa no ke alo Alii, ina ua kani mai ma ke kani kupono o ke alo Alii. A nolaila, no ua moa kani hewa la ka'u olelo i koe, e like me malalo iho.
E Kamoana. Ua kapa aku wau ia oe he " Moa kani Hewa" e like me ka olelo ma ke poo o keia kumu kamailio.
Ma ka Helu 9, o ka kaua nupepa Buke 2, Hoku Pakipika o ka la 11 o Dekemaba nei, na ka Buke 2 ka ninau a me ka olelo no'u, aka hoi ma ke poo a me ke kakau inoa malalo, ua akaaka na Kamoana no, nolaila e waiho wau i ke kamailio no ka nupepa, no ka mea, aole i kamailioia ma ka aoao o ka nupepa, ma ka aoao o na kaao a me na mele ke kamailio ana.
Ma kekahi mau kumu wehewehe au no na mea e pili ana i ka ole papa, he " sohu ole" a he "uso ole." A nolaila, ke hai maoli nei wau ia oe i ka mea i haiia mai ia'u a me ka Ahahui pu, a mahope ka hai aku no kau ninau.
Eha o'u malama ka noho Kakauolelo ana no ka Ahahui, hookahi hoi makahiki ka noho Kakauolelo ana malalo o ka Luna Hooponopono, oia hookahi makahiki me eha malama.
Iloko o keia manawa, ua aoia mai la ka Ahahui a me a'u pu no na hana ana e pili ana i ka nupepa e ka Luna Nui mua o ka nupepa, a me na Luna Nui i keia manawa.
"O ka aoao mua a me ka aoao 4 o ka nupepa, no na kaao a me na mele, a me na olelo hoolaha, o ka aoao 2 no ka pepa ia, a o ka waha nana e kamailio, o ka Luna Nui noia me ke kakau inoa ole, a makemake kekahi e waiho i olelo na ka pepa, e waiho aku no me ke kakau inoa ole ke ae nae ka Luna Nui."
A i ko'u ike ana i keia olelo pepa, aia ma kahi hiki ole ke olelo pepa, nolaila wau i oleloia ma ke poo ke " Moa kani hewa."
Ua ninau mai oe i ke kumu o kuu " hoomoe ana i ka moolelo o Laieikawai mai Waialua mai" He ninau kupono ia au e Kamoana; eia. Ua hoomoeia kela wahi moolelo, no ka like ole me ka'u kuamoo moolelo o Laieikawai; no ka uuku loa, hookahi no pepa a me ka hapa, elima aoao wale no i kakau ia, me ka hai mai o ka mea nana i kakau a pau, oia na kumu i hoomoeia ai. ? Oia iho ia no,
A heaha kau malaila? o ka alaala palu a Humehume, e ninau ia J. L. Kapahi.
Ua olelo oe, " no kuu hilahila i ka pau o kuu noho Kakauolelo " ana ke kumu o kuu kuai ana i ka moolelo o Laieikawai i ke dala.
O kekahi kumu keia a'u i kapa ai ia oe he "Moa kani hewa." Kuhi wau ua ike oe i kuu olelo pane aku no kau ninau ma ka Helu 7, Buke 2, i hoikeia ia e a'u ma ke Kuokoa, Helu 53, aoao 3. A ua hoike no hoi wau ma ka Pauku 3 o kuu olelo hoakaka no ka moolelo o Laieikawai o ka Mokuna 1 o ua moolelo la; e pono ke nana malaila.
Ke olelo mai nei nae oe," no kuu hilahila" ke kumu oia haawi ana. He mea kupanaha loa, ke olelo nei wau, he ninau keia a kekahi hupo, aole pili keia ninau i ka naauao.
O kuu hoopauia ana mai ka noho Kakauolelo ana, aole wau i hoopau ia ma ke ino, aole no hoi i hoohilahilaia. Aka o ka Luna Nui o ka pepa, ka mea nana i hai mai ia'u iloko o kekahi Room hooluana, aole wau i ike a i lohe hoi i kekahi mea pono ole no'u ia manawa i haiia mai ai ia'u. A i mea e like ai me ke Kumu Kanawai, nolaila, hoomakaukau wau i " palapala hoike" o ka'u oihana ma ka la 17 Oct. a waiho aku imua o ka Hui, aole nae i Hui ma ia hope iho a hiki i keia wa.
Eia ka ninau ia oe e ka Moano. Auwe! hewa aka la wau, o Kamoana ka hoi ka pono.
E waiho ana oe i kekahi mai aneane make a lohe oe i kekahi laau ola, he dala nae ka mea e loaa mai ai ua ola ala ia oe, aole nae au dala e lilo mai ai ka laau i ola oe, a he waiwai nui kou e waiho ana, ua haawi wale aku oe i kekahi hapa oia waiwai no kou makemake.
A pehea? Aole anei oe e hoolilo i ua waiwai la ou i ke dala i mea e loaa ai ke ola nou?
Hoole aunei oe, aole ou makemake e loaa ke ola, aia no paha kou kuai aku i kou waiwai a loaa kou hilahila.
Ina pela. He keu o ka hupo a me ka poeleele loa,—Eia'ku no ma o aku o Hamohamo.
S. N. H*.
AWA O HONOLULU.
No ka Moku ku mai.
Dek. 4—Emma Ruka, mai Ulupalakua a me Lahaina mai, me 190 pahu ko, 68 barela malakeke, 29 ili bipi, 30 barela aila, 1 mea wili iwi, 3 barela aila bipi, 60 ili kao, 2 lio, 10 puaa, a me 97 ohua.
5—Neke, mai Hilo a me Kohala mai, me 130 barela malakeke, 78 pahu a me 87 eke ko, 1 lio, a me 16 ohua.
5—Kalama, mai Koloa a me Nawiliwili mai, me 1 1/2 paila wahie, 7 pahu puaa, 2 barela aila bipi, 5 ili bipi, 2 kukaa moena, 2 pahu waiubata, 1 pahu mui, a me 4 ohua.
6—Moku Kiakolu Am. Lotus, he 18 la mai Kapalakiko mai, ku no mawaho, a holo i Kina ia la no, me 22,166 paona pepeiao laau- ka loaa mai, $1, 772.48.
6—Kilauea, mai Hawaii a me Lahaina mai, me 23 bipi, 25 hipa, 40 puaa, 19 kukaa aila bipi, 95 ili bipi, 2 barela malakeke, 241 pahu uala, 12 eke pepeiao laau, 8 kukaa pulu, 105 pai ai, 15,000 alani.
7—Moiwahine, mai Kauai mai, me 45 pahu bipi, 12 pahu puaa, 2 barela aila bipi, 2 pahu elelo bipi, 1 pahu aila bipi moa, 2 pahu waiubata, 286 kiwi bipi, 176 ili kao, 15 ili bipi, 4 kukaa pepeiao laau, 47 eke padi, 10 puaa, 13 pu kuniahi, 2 lio, 10 paila wahie, a me 14 ohua.
7—Odd Fellow, mai Hanalei mai, me 50 pahu ko, 12 barela malakeke, 13 eke pepeiao laau, 11 ili bipi, a me 11 ohua.
7—Annie Laurie, mai Kauai mai, me 9 paila wahine, 1 lio, 5 puaa, 1 eke pepeiao laau, a me 7 ohua.
8—Moku Kiapa Am. Young Hector, he 15 la mai Kapalakiko mai.
8—Piliki Keomolewa Lopud, he 30 la mai Puget Sound mai, e holo ana i Adelaide, A. H., me ka piha papa.
9—Maria, he 32 la mai Howland's Island mai.
9—Kamehameha, mai Maliko mai, me 82 barela malakeke, 30 pahu ko, 62 ili kao, 12 eke huita, 2 eke pepeiao.
HANAU.
Dek. 4, ma Kaneohe, Koolaupoko, Oahu, hanau o Keoni (k,) na W. B. Kapu me Maria.
Nov. 27, ma ia wahi no, hanau o Kaiewe Kimohoni (k,) na Kimo Honi me Lipeka.
Nov. 23, ma Waikiki, Oahu, hanau o Mokulehua (w,) ma Kumukahi me Kapaku.
Oka. 17, ma Hokukano, Kona A, Hawaii, hanau o I. Kanehoalani (k,) na Kailikini me Huia.
Nov. 26, ma Kuamoo, Kona A, Hawaii, hanau o Ioane Kaneikawiwilani (k,) na T. W. Alapai me Maria Keaweaheulu.
Dek. 21, ma Kapalama, Oahu, hanau o Kahkukaalani (k,) na Kekoi me Haliimaile.
Sept. 23, ma Kalepolepo, Hilo, Haw., hanau o Kalewe (k,) na Kamakaino me Unina.
Nov. 8, ma Puaaloa, Hilo, Haw., hanau o Hapuku (k,) na Mahina me Nuuanu.
MAKE.
Dek. 6, ma Puulena, Manoa, make o Mary Kalaheenalu (w.)
Dek. 7, ma Kamoiliili, Waikiki, mai o Popoki (w.)
Dek. 11, ma Waikahalulu, Honolulu, make o Paahao (w.)
Dek. 12, mai ia wahi no, make o Wahineiki (w.)
Nov. 26, ma Kapoko, Puna, Hawaii, make o Kaolulo (k.)
Nov. 26, ma ia wahi no, make o Ikanaka (k.)
Nov. 28, mai ia wahi no, make o Wahaa (k.)
Nov. 5, ma Halaula, Kohala, Hawaii, make o Puana (k.)
Nov. 29, ma Honokohau, Kona A., Hawaii, make o Kauhanehaukae (k.)
Nov. 30, ma Kahua, Hilo, Hawaii, make o Kaanaana (k.)
Oct. 20, ma Hamakua, Hawaii, make o Malaia (k.)
Sept. 23, ma Kalepolepo, Hawaii, make o Kaiewe (w.)
Nov. 2, ma Kanakea, Hilo, make Nome (w.)
Nov. 25, ma Pookeokeo, Hilo, make o Lepa (w.)
Nov. 27, ma Hanakahi, Hilo, make o Kahaoi (k.)
OLELO HOOLAHA.
E IKE AUANEI NA MEA A PAU, KE nana mai lakou. Owau ka mea nona ka inoa malalo nei, ke papa aku nei au i na kanaka a pau, o kela ano, keia ano, mai haie mai oukou i kuu wahine mare,
Ia NAOMI,
ua haalele mai oia ia'u, a ke noho wahine ole nei au. Nolaila e noonoo oukou e ka poe mea waiwai, a me ka poe mea Hale Kuni, e waiho nei mai Hawaii a Niihau, o poho auanei oukou. Aole loa au e hookaa i kona aie. P. FERNANDES.
Kapalama, Dek. 10, 1862. 55-4t*
Welu Lole! Welu Lole!
E UKU NO KA MEA NONA KA INOA ma ke dala maoli no na WELU LOLE LILINA a pau e awe ia mai ma kona Hale Kuai, a e lawe mai no hoi i uku no ke Kuokoa, me ka uku ana, penei:
No na welu lole keokeo, he 3 keneta no ka paono, oia he 33 paono. $1.00.
No na welu lole kalakoa, 2 keneta no ka paona, oia he 50 paona, $1.00.
O na welu a pau e lawe ia mai ana, he pono ke holoiia a maemae, a e wae ae hoi i ka WELU KEOKEO ma ke eke okoa, a pela no hoi i ka WELU KALAKOA. Aole makemakeia o na welu lole huluhulu. He Anoano Pulupulu kekahi e waiho nei ma ko'u Hale Kuai, i mea kukai aku no na welu lole, a no ke dala no hoi, he hapawalu no ka paona pulupulu hookahi.
Pulupulu!
A UA MAKAUKAU NO HOI AU E KUAI aku i ka pulupulu, penei:
PULUPULU i pau i ka waeia, 20 ken. no ka paona.
PULUPULU me ka anoano i wae oleia, 6 ken. no ka paona.
E lawe no au i ka welu lole a me ka pulupulu i uku no ke Kuokoa. H. M. WINI.
55-2m Luna Pai o ke Kuokoa.
OLELO HOOLAHA.
E IKE AUANEI NA KANAKA A PAU. ke nana mai i keia Olelo Hoolaha; o ke kuleana
O Mahoe,
o Wailuku, Mokupuni o Maui, nona ke Kuleana Helu 3290. Ua loaa mai no ia'u ka Palapala Sila Nui, a ke papa aku nei au, o ua Palapala Sila e ae a kope, o ka Palapala Sila paha mahope o ka loaa ana ia'u o ka Palapala Sila mua, e lilo lakou i mea ole. Ke papa loa aku nei au ia KAHALELAAU, aole oia e hana a lawelawe ma ua aina la, me ko'u ae ole. O ka mea hookuli e hoopii no au, o na mea kanu a pau e waiho la mana aina la, no'u wale no ia, o ka aina o AHUENA, no'u ia.
MRS. KAHULA.
Makuahine o Mahoe.
Honolulu, Dek. 12,1862. 55-1t*
OLELO HOOLAHA.
UA HOOPII MAI O
NAWAI (w,)
kue i kana kane o Kamauoha, no Koolaupoko, Oahu, mamua, e hooki i ko laua mare ana, no ka haalele wale ana no na makahiki ekolu o Kamauoha i kana wahine. E hanaia kela hoopii imua o ka Mea Hanohano o John Ii, kekahi Lunakanawai o ka Aha Kiekie, ma ka la 24 o Dekemaba, i ka hora 9 o kakahiaka, aia ma ka Hale Hookolokolo, ma Honolulu, Oahu.
JNO. E. BARNARD.
Kakauolelo o ka Aha Kiekie.
Honolulu, Dek. 8, 1862. 55-2t
OLELO HOOLAHA.
UA HOOPII MAI O
MEENUI (k,)
kue i kana wahine o Kaihi, na Kau, Hawaii, e hooki i ko laua mare ana no ka haaele wale ana no na makahiki ekolu o Kaihi, i kana kane. E hanaia keia hoopii imua o ka Mea Hanohano John Ii, kekaai lunakanawai o ka Aha Kiekie, ma ka la 24 o Dekemaba, i ka hora 9 o kakahiaka, aia ma ka Hale Hookolokolo, ma Honolulu, Oahu.
JNO. E. BARNARD
Kakauolelo o ka Aha Kiekie.
Honolulu, Dek. 8, 1862. 55-2t
OLELO HOOLAHA.
NO KA MEA, UA NOI IA MAI KA MEA Hanohano, John Ii, kekahi Lunakanawai o ka Aha Kiekie e Kauluae, ma Kukona, e hookohu ia ia i Luna Hooponopono Waiwai no Kanehue, o Koolau, Oahu, i make aku nei: Nolaila, no hoikeia i na kanaka a pau loa, ke pili, o ka Poakolu, oia ka la 24 o Dekemaba, i ka hora 9 o kakahiaka, oia ka la a me ka hora i oleloia no ka hoolohe i ka oiaio o keia Palapala Kauoha, a me keia noi ana mai, a me na mea hoole i hoikeia, aia ma ka Hale Hookolokolo ma Honolulu, Oahu.
JNO. E. BARNARD.
Kakauolelo o ka Aha Kiekie.
Honolulu, Dek. 8, 1862. 55-2t
OLELO HOOLAHA.
UA HOOPII MAI O
MULEKA (w,)
kue i kana kane o KAPANA, no Molokai mamua, e hooki i ko laua mare ana, no ka haalele wale ana no na makahiki ekolu o Muleka i kana wahine. E hanaia keia hoopii imua o ka Mea Hanohano o John Ii, kekahi Lunakanawai o ka Aha Kiekie, ma ka la 10 o Dekemaba, i ka hora 10 o kakahiaka, aia ma ka Hale Hookolokolo ma Honolulu, Oahu.
JNO. E. BARNARD.
Kakauolelo o ka Aha Kiekie.
Honolulu, Dek. 2, 1862. 54-2t
KA MOKUAHI
'KILAUEA.'
E HOLO ANA O "KILAUEA" MAI Honolulu aku, ma ka
Poaha, Dekemaba 18.
A MA KA
Poakahi, Ianuari 5, 1863
Ma ka hapalua o ka hora Eha o ke ahiahi.
NO
LAHAINA,
KALEPOLEPO.
ULUPALAKUA,
KEALAKEKUA.
HONOIPU,
KAWAIHAE.
KAILUA.
A ME HILO.
KA MOKUAHI
"ANNIE LAURIE,"
E HOLO ANA KA MOKU Annie Laulie,
Ma ka Poaha Dekemaba 18..
Ma ka hapalua a ka hora Eha o ke ahiahi.
NO
KOLOA.
Ma keia hope aku, e holo mau ana ka Annie Laurie no KOLOA, i kela Poaha, keia Poaha; a no NAWILIWILI, i kela Poakahi, keia Poakahi.
JANION, GREEN & CO
Honolulu, Nov. 13, 1862. 51-tf
CROCKETT ME HARPER.
Hale Amala ma Ainahou mauka iho
O KA
HALE DUTE HOU.
UA MAKAUKAU NA MEA NONA na inoa i haiia maluna, e hana i ke
KAMAA LIO
maikai loa, na ka poe a pau o makemake ana e hanaia ko lakou mau lio i ke KAMAA HAO MAIKAI. E hele mai no e hoao no oukou iho. 54-4t
OLELO HOOLAHA.
E IKE AUANEI NA MEA A PAU, UA koho au ia
M. Kuaea,
i hope no'u, ma ka hooponopono ana i ka waiwai o Nalehu, i make ma Hauula. E like me ka mana i loaa ia'u mai ka Aha Kiekie mai. A o ka poe a pau a Nalehu i aie aku ai, e hele mai lakou imua o M. Kuaea, e hookaa ai, a i ole e hele mai kekahi iloko o ka malama o Dekemaba, l862, alaila, aole kuleana e koi mai ai ma ia hope aku. Na PAIKI.
Honolulu, Dek. 2. 1862. 54-3t
Olelo Hoolaha.
KA POE JURE KANAKA MAOLI NO KA Aha Hookolokolo Kaapuni ma ka Apana Eha ma Lahaina, e kau ana ma ka Poalua, Dekemaba 9, e hiki mai ana,
Kealakai, Kane,
M. Kaniau, Luluka,
Kainalu, Kahue,
Kainikino, Moi,
Naiapaakai, Issac Brevere,
Hahiewalu, Kaholokahiki,
A. Kaukau, Hoaai,
C. Kalu, Napeha,
J. S. Maipinepine, Kaeka,
Hakalaau, Kahananui,
Davida Barrows, Kuihelani.
J. Crowningburg, J. Sylva.
JNO. E. BARNARD.
Kakauolelo o ka Aha Kiekie.
Honolulu, Dek. 2,1862. 54-2t
OLELO HOOLAHA.
NO KA MEA, UA NOI IA MAI KA MEA Hanohano, G. M. Robertson, ka Lunakanawai o ka Aha Kiekie e Kaohi w, no ka hooiaio i na Palapala Kauoha o Kaumakaowakea, no Manoa, Oahu, mamua, i make aku nei: Nolaila, ua hoikeia i na kanaka a pau loa, ke pili, o ka Poaono, oia ka la 27 o Dekemaba, 1862, i ka hora 9 o kakahiaka, oia ka la a me ka hora i oleloia no ka hoolohe i ka oiaio o keia Palapala Kauoha, aia ma ka Hale Hookolokolo, ma Honolulu, Oahu. JNO. E. BARNARD.
Kakauolelo o ka Aha Kiekie.
Honolulu, Dek. 1,1862. 54-2t
OLELO HOOLAHA.
UA NOI MAI O HOLUALOA, OIA KE kane a Kamai mamua, i ka Mea Hanohano G. M. Robertson, kekahi Lunakanawai o ka Aha Kiekie, e ae aku ia ia e mare hou, e like me ke Kanawai o ka la 22 o Iune, 1856. O ka la 20 o Dekemaba, oia ka la hana i keia hoopii, ma ka hora 10 o kakahiaka. JNO. E BARNARD.
Kakauolelo o ka Aha Kiekie.
Honolulu, Dek. 1, 1862. 54-2t
MAKEMAKEIA!
LOLI, PEPEIAO LAAU!
A ME KA
LALA MANO.
PENEI KA UKU ANA:—
No ka Pepeiao Laau,
" " Lala Mano, 15 keneta.
" " Loli Kohola, 12 1/2 keneta.
" " Loli Koko, (ke nui) 4 keneta.
" " Loli Kae, (ke nui,) 4 keneta.
E hele mai ma ko maua hale kuai, ma ka aoao komohana o ka Hale Kuai o Daimana, ma Alanui Alii.
UTAI & AHEE.
Honolulu, Aug. 1, 1862 51-3m
Olelo Hoolaha.
E IKE MAI NA MEA A PAU, OWAU O ka mea nona ka inoa malalo nei. O kuu kane mare,
O BILA,
ua holo aku oia i ka moku okoholo i ka M. H.1853, aole nae oia i hoi mai a hiki i keia la a'u e hoolaha nei. Nolaila, ke hai aku nei au ma keia hoolaha, e mare ana au i ke kane hou no ka pilikia i loaa ia'u. Ina he mea pono ia mai na luna mare mai, ina eia oia ke ole nei ma na wahi o keia ao ; ke kauoha ia aku nei oia e hoi mai, i ka wa i koe o keia makahiki. A i ole, e mare ana au i kane hou i ka hebedoma mua o Ianuari, 1863.
Na HIIKUA (w.)
Kahana, Koolauloa, Nov. 12, 1862. 52-1m*
Olelo Hoolaha.
OWAU O KA MEA NONA KA INOA MAlalo iho nei, ke hookapu aku nei au i kuu aina kuai e waiho nei
Ma Waimea, Hawaii,
e pili ana ma ke kua o na puu i kapaia o Hokuula a me Puowaoka. Ua kahea ia na mea holoholona, Lio, Bipi, Hoki, Kekake, e kii i ko lakou mau holoholona a pau, o kela ano keia ano, e lawe koke, a hiki i ka la 1 o Dekemaba, ua kapu loa na aina nei, a i na e komo kekahi holoholona, e uku no e like me ke Kanawai. E lawe koke ia no na Lio, Bipi, Hoki, Kekake, Hipa, Kao, ma ka Pa Aupuni, ke komo lakou mahope aku o ka la 1 o Dekemaba. D. PAUKEAHO.
Hokuula, Waimea, Hawaii, Nov. 13, 1862. 53-1m*
Olelo Hoolaha.
E IKE AUANEI NA MEA A PAU MA keia olelo hoolaha, owau o ka mea nona ka apana aina kuai e waiho la
Ma Manienie, Hamakua, Hawaii,
ke papa aku nei au i na mea a pau, mai kii wale oukou i na mea e ulu ana, na laau, a me na pepeiao laau e waiho la maluna o kou aina, o ka mea kue i keia mau olelo, a komo hewa i ko'u waiwai, e hiki no ia'u ke hoopii imua o ka Lunakanawai a loaa ia oukou ka pilikia e na makamaka, he naniia ua ike aela oukou i na olelo maluna i haiia aela. T. NAKUPUNA.
Kemau, Hamakua, Hawaii, Oka. 15, 1862. 53-1m*