Ka Nupepa Kuokoa, Volume I, Number 55, 13 December 1862 — Page 1

KA

NUPEPA KUOKOA:

Ke Kilohana Pookela no ka Lahui Hawaii.

BUKE I. HONOLULU, DEKEMABA 13, 1802. HELU 55.

 

KA MOOLELO

—O—

LAIEIKAWAI.

MOKUNA III.

                I HELE ANA O KA MAKAULA mahope iho o ko laua halawai ana me kahi kanaka, hiki mua keia iluna o Kawela, naua aku la oia, e pio ana ke anuenue i kahi a ua wahi kanaka nei i olelo ai ia ia; alaila, hoomaopopo lea iho la ka Makaula o kana mea no e ukali nei.

                A hiki keia i Kaamola ka aina e pili pu la me Keawanui, kahi hoi a LAIEIKAWAI ma e kali nei i ka mea waa, ia manawa, ua poeleele loa iho la, ua hiki ole ia ia ke ike aku i ka mea ana i ike ai iluna o Kawela, aka, ua moe ka Makaula malaila ia po, me ka manao i kakahiaka e ike ai i kana mea e imi nei.

                I kela po a ka Makaula e moe la i Kaamola, aia hoi, ua hiki ka olelo kauoha a Kapukaihaoa ia Laieikawai ma ka moe uhane, e like me ke kuhikuhi ia laua iloko o ko laua mau la ma Malelewa.

                Ia wanaao ana ae, loaa ia laua ka waa e holo ai i Lanai, a kau laua malaila a holo aku la, a ma Maunalei ko laua wahi i noho ai i kekahi mau la.

                Ia Laieikawai ma i haalele ai ia Kalaeloa ia kakahiaka, ala ae la ka Makaula, e ku ana ka punohu i ka moana, a me ka ua koko, aia nae, ua uhi paapuia ka moana i ka noe a me ke awa, mawaena o Molokai, a me Lanai : Ekolu mau la o ka uhi paapu ana o keia noe i ka moana, a i ka eha o ko ka Makaula mau la ma Kaamola, i ke kakahiakanui, ike aku la oia e ku ana ka onohi iluna pono o Maunalei; aka, ua nui loa ka minamina o ka Makaula no ka halawai ole me kana mea e imi nei, aole nae oia i pauaho a hooki i kona manaopaa.

                Ua aneane e hala na la he umi ia ia ma Molokai, ike hou aku la oia e ku ana ka punohu iluna o Haleakala, haalele keia ia Molokai, hiki mua oia iluna o Haleakala ma kela lua pele, aole nae oia i ike i kana mea e imi nei.

                I ua Makaula nei nae i hiki ai malaila, ike aku la oia ia Hawaii, ua uhi paapuia ka aina i ka ohu, a me ka noe; A haalele keia ia wahi, hiki mua keia i Kauwiki, a malaila oia i kukulu ai i wahi heiau, kahi hoi e hoomana ai i kona Akua, ka mea hiki ke kuhikuhi i kana mea e imi nei.

                I ua Makaula nei e kaapuni ana ma na wahi a pau ana e kipa aku ai, ua kauoha mua aku ka Makaula, i na e loaa kana mea e imi nei, alaila, e huli aku ia ia ma kahi e loaa ai.

                A pau ke kapu heiau a ua Makaula nei ma Kauwiki na po o Kane, a me Lono paha, alaila, ike maopopoia aku la ke kalae ana o ka aina a puni o Hawaii, a ua waiho pono mai na kuahiwi.

                Ua nui no na la o ka Makaula ma Kauwiki, aneane makahiki a oi ae paha, aole nae oia i ike iki i ka hoailona mau ana e ukali nei.

                I kekahi la, i ka malama o Kaaona, i na Ku i ka manawa kakahiakanui, ike aweawea aku la oia he wahi onohi ma Koolau, o Hawaii, ia manawa, puiwa koke ae la oia me ka lele o kona oili me ka maikai ole o kona noonoo ana, aka, ua kali loihi no oia me ka hoomanawanui a maopopo lea ka hana a kela wahi onohi; a pau ia malama okoa i ka hoomanawanuiia eia, a i kekahi malama ae, i ka la o Kukahi, i ke ahiahi, mamua o ka napoo ana o ka la, komo aku la oia iloko o kona wahi heiau, kahi i hoomakaukau ai no kona Akua, a pule aku la oia.

                Ia ia e pule ana, a i ka waenakonu o ka manawa, ku mai la imua o ua Makaula nei ke kahoaka o LAIEIKAWAI, a me kona kupunawahine, a no keia mea, hooniau aku la oia i ka pule ana, aole nae i haalele kela kahoaka ia ia a hiki i ka maamaama ana.

                Ia po iho, iloko o kona manawa hiamoe, halawai mai la kona Akua me ia ma ka hihio, i mai la, " Ua ike au i kou luhi, a me kou hoomanawanui ana, me ke ake e loaa ia oe ka moopuna a Waka, me kou manao hoi e loaa kou pomaikai no kana moopuna mai. Iloko o kau pule ana, ua hiki ia'u ke kuhikuhi, e loaa no o Laieikawai ia oe, mawaena o Puna, a me Hilo, iloko o na ululaau, e noho ana iloko o ka hale i uhiia i na hulu melemele o ka Oo, nolaila, apopo e ku oe a hele."

                Puoho ae la oia mai ka hiamoe, aia ka he hihio, a no keia mea, pono ole iho la kona manao, aole e hiki ia ia ke moe ia po a ao.

                Ia po a ao ae i ke kakahiakanui, ia ia maluna o Kauwiki, ike aku la oia i ke kilepalepa a ka pea o ka waa ilalo o Kaihalulu, holo wikiwiki aku la oia a hiki i ke awa, ninau aku la i kahi a keia waa e holo ai, haiia mai la, " E holo ana i Hawaii,"a noi aku la oia e kau pu me lakou ma ka waa, a ae ia mai la oia pu me lakou.

                Hoi hou aku la ka Makaula iluna o Kauwiki, e lawe mai i kana mau wahi ukana, na mea ana i hoomakaukau ai i kanaenae.

                Ia manawa aia nei i hiki ai i ka waa, hai mua aku la oia i kona manao i na mea waa. " E na mea waa, e hai mai oukou i ka'u hana ma keia holo ana o kakou, ma ka oukou mea e olelo mai ai, malaila wau e hoolohe ai, no ka mea, he kanaka wau i hana pono oleia e na mea waa i ko'u holo ana mai Oahu mai, nolaila wau e hai mua aku nei ia oukou e na mea waa, malia o like oukou me laua,"

                A no keia olelo a ka Makaula, olelo mai la ua mea waa, aole e hanaia kekahi mea pono ole ma ia holo ana o lakou; a pau keia mau mea, kau lakou ma ka waa a holo aku la lakou.

                Ma ia holo ana hiki mua lakou i Mahukona, ma Kohala, moe malaila ia po, a i ke kakahiaka ana ae, haalele ka Makaula i na mea waa, pii aku la oia a hiki i Lamaloloa, a komo aku la i Pahauna ka heiau, he heiau kahiko kela mai ka po mai, a hiki i keia manawa.

                Ua nui loa na la ona malaila o ka noho ana, aole nae oia i ike i kana mea e imi nei, aka, ma kona ano Makaula, hoomau aku la oia i ka pule i ke Akua, e like me kona mau la ma Kauwiki, a no ka pule hoomau a ua Makaula nei, ua loaa hou ia ia ke kuhikuhi ana e like me kela hoike ia ia ma Kauwiki.

                A no keia mea, haalele oia ia wahi, kaahele aku ia oia ia Hawaii, ma Hamakua kona hiki mua ana, oi hele aku oia mai ka manawa uuku o kahi puaa a nui loa, a na ka puaa no e hele.

                Ia ia i hiki ai i Hamakua, malalo o Waipio, kona wahi i noho ai ma Pakaalana, aole nae he nui kona mau la malaila.

                Haalele ka Makaula ia wahi, hiki aku oia i Laupahoehoe, a malaila aku a hiki i Kaiwilahilahi, a malaila oia i noho ai he mau makahiki. (Maanei, e waiho kakou i ka moolelo no ka imi ana o ka Makaula.) Pono e kamailio no ka hoi ana o Kauakahialii, i Kauai, me Kailiokalauokekoa, i ike ai kakou, aia o LAIEIKAWAI i Paliuli.

                Ma na Helu mua o keia Kaao, ua ike kakou na Kapukaihaoa i kauoha ia Waka ma ka moeuhane e hoihoi ia Laieikawai i Paliuli, mamuli o ka ike a ka Makaula: Ua hookoia no nae e like me ke kauoha, ua noho o Laieikawai ma Paliuli, a hiki i kona hookanakamakua ana,

                Ia Kauakahialii, laua o Kailiokalauokekoa i hoi ai i Kauai, mahope iho o ko laua halawai ana me ka Olali o Paliuli, ( LAIEIKAWAI,) a hiki lakou i Kauai, mauka o Pihanakalani, kui aku aku la ka lono ia Kauai a puni, akoakoa mai la na'lii, na kaukaualii, a me na makaainana a pau e ike i ka puka malihini ana aku o Kailiokalaokekoa ma, e like me ka mea mau, o Aiwohikupua nae kakahi oia poe Alii i akoakoa pu mai ma keia aha uwe o na malihini.

                A pau ka uwe ana a lakou, ninau aku la na'lii ia Kauakahialii, " Pehea kau hele ana aku nei mamuli o kou hoaa ia ianei," ( Kailiokalauokekoa.) Alaila, hai aku la o Kauakahialii i kona hele ana, penei:

               "I ko'u hele ana mai anei aku mamuli o ke aloha o ka wahine, a puni Oahu, a me Maui, aole i loaa ia'u kekahi wahine e like me Kailiokalauokekoa nei, a hiki au i Hawaii, kaapuni wau ia mokupuni, ma Kohala kuu hiki mua ana. Kaahele au ma Kona, Kau, a hiki au i Keaau, ma Puna, a malaila wau i noho ai, a malaila wau i halawai ai me kekahi wahine maikai i oi aku mamua o ianei, (KAILIOKALAUOKEKOA.) A o ka oi no hoi ia mamua o na wahine maikai o keia mau mokupuni a pau."

               Iloko o keia olelo ana a Kauakahialii, hoomaopopo loa mai la o Aiwohikupua i ka helehelena maikai o ua wahine nei, alaila, hai aku la o Kauakahialii,

               "I ka po mua, mahope iho o ko laua halawai ana me kuu wahi kahu nei, hai mai la oia i kona manawa e hiki mai ai i kahi o ko makou wahi e noho ana, a hai mai la no hoi oia i na hoailona o kona hiki ana mai, no ka mea, ua olelo aku kuu wahi kahu nei i kane au na ua wahine nei, me ke koi aku no hoi e iho pu mai laua me ua wahi kahu nei o'u, aka, ua hai mai kela i kana olelo. E hoi oe a ko hanai, kuu kane hoi au e olelo mai nei, olelo aku oe ia ia, a keia po wau hiki aku, i ua e kani aku ka leo o ka Ao, aole wau iloko oia leo, a kani aku ka leo o ka Alala, aole no wau iloko oia leo, i na e kani aku ka leo o ka Elepaio, hoomakaukau wau no ka iho aku, a i kani aku ka leo o ka Apapane, alaila, ua puka wau mawaho o kuu hale nei, hoolohe mai auanei oe a i kani aku ka leo o ka Iiwipolena, alaila, aia wau mawaho o ka hale o ko hanai, imi ao olua a loaa wau mawaho, oia kuu manawa e launa ai me ko hanai," pela mai ka olelo a ua wahi kahu nei o'u.

               "I ka po hoi ana e kauoha nei, aole i hiki ae, o i kali aku makou a ao ia po, aole i hiki ae, o na manu wale no kai kani mai, manao iho la wau he wahahee na kuu wahi kahu, i Punahoa nae lakou nei, (Kailiokalauokekoa

 

Na Ana.

Ua pai iho makou maluna'e nei i ke Kii o kekahi Ana. Ma kekahi mau wahi o ka honua, ua nui loa na Ana nui a hohonu no hoi. Ma ka mokuaina o Kenetuke, ua lehulehu loa na Ana a ua nunui no hoi, a o ka oi hoi o ka nui, oia no ke Ana Mammoth, aia mawaena o ke alanui e hele ana i Luisavili a me Nasavili, he umi mile o kona loa malalo o ka honua, a oia hoi kekahi o na mea kupanaha nui o ka honua. Iloko iho nei o keia wa kaua malaila, ua lilo ia mau Ana i wahi na na kipi e huna'i i ko lakou waiwai me ko lakou ai, a i wahi no hoi e huna'i i na waiwai a lakou i haowale mai ai mai ka lima mai o na poe makamaka o ke aupuni, a me ko lakou mau lako kaua pu no hoi. Malaila na kipi e huna'i i ko lakou mau koa, a me ko lakou mau lio, a o na kiu a lakou ke hele e hoomakakiu i ka wa kupono e kii aku ai e hoouka i na poe enemi o lakou, alaila, holo aku la lakou he 100 paha a keu ae, a hao mai ia i ka ai, a me na mea kaua e loaa ana ma ko lakou lima, a holo loa'ku la i na kulanakauhale e puhi ai i ke ahi, a hoi aku la iloko o ua mau Ana nei, mamua o ka hiki ana i na koa aupuni, ke aua i ka lakou hana ino ana.

 

ma) kahi i moe ai me na aikane. No kuu manao he wahahee na kuu wahi kahu, no-laila, kauoha ae ana wau i ka Ilamuku e hoopaa i ke kaula ; aka, ua hala e ua wahi kahu nei o'u i uka o Paliuli, e ninau aku i ua wahine nei i ke kumu o kona hiki ole ana i kai ia po, me ka hai aku no hoi e make ana ia, a pau kana olelo ana ia Laieikawai i keia mau mea.   "I mai la ka wahine i ua wahi kahu nei o'u, e hoi oe a ma keia po hiki aku au, e like me ka'u kauoha ia oe i ka po mua, pela no wau e hiki aku ai ; ia po iho, oia ka po e hiki mai ai ua wahine nei, ua puka mua ae lakou nei, (KAILIOKALAUOKEKOA MA ) i ke ao, i ua po nei e Kaao ana no o ianei ia makou, i ke kihi o ke ahiahi, kani ana ka leo o ka Ao, a i ka pili o ke ahiahi, kani ana ka leo o ka Alala, a i ke kau, kani ka leo o ka Elepaio, a i ka pili o ke ao, kani ana ka leo o ka Apapane, a i ka owehewehe ana o ke alaula, kani ana ka leo o ka Iiwipolena, ia kani ana no hoi, malu ana ke aka ma ka puka o ka hale, aia nae, ua paa oloko i ka noe, a i ka mao ana ae, e kau mai ana kela iluna o ka eheu o na manu, me kona nani nui."

                A no keia olelo a Kauakahialii imua o na'lii; ua hookuiia mai ko Aiwohikupua kino okoa e ka iini nui, me ka ninau aku, "Owai ka inoa oia wahine ?" Haiia aku la nae oia o Laieikawai.

                A no ka iini nui o Aiwohikupua i keia mea a Kauakahialii e olelo nei, manao iho la ia e kii i wahine ( MARE ) nana, aka, ua haohao o Aiwohikupua no kela wahine, nolaila, hai aku oia i kana olelo imua o Kauakahialii.

                "Ke haohao nei wau i keia wahine, no ka mea, owau ka mea nana i kaapuni keia mau mokupuni, aole wau i ike i kekahi wahine e kau mai ana iluna o ka eheu o na manu, me he mea la no kukulu o Tahiti mai ia wahine, noloko o Moaulanuiakea."

                No ka manao o Aiwohikupua no Moaulanuiakea, o Laieikawai, oia kona mea i manao ai e kii i wahine nana : No ke mea, mamua aku o kona lohe ana i keia mau mea, ua olelo paa o Aiwohikupua, aole e lawe i kekahi wahine o keia mau mokupuni i wahine mare (HOAO) nana, ua olelo oia, aia kana wahine makemake noloko o Moaulanuiakea. A pau ke kamailio ana a na'lii no keia mau mea, a me ka walea ana e like me ka mea mau o ka puka malihini ana, a mahope koke iho oia mau la. Lawe ae la o Aiwohikupua i kahi kahu o Kauakahialii i kanaka lawelawe imua o kona alo, me ka manao o Aiwohikupua o kela wahi kanaka ka mea e loaa ai ko ke Alii makemake.

                A no keiki kumu, hoolilo loa ae la o Aiwohikupua i ua wahi kanaka nei i poo kiekie maluna o na mea a pau, o ko ke Alii mau aina a pau, a me na kanaka a pau loa, na'lii a me na makaainana, ma kona ano Kuhina Nui.

                A lilo ae la ua wahi kanaka nei i mea nui, huahua mai la na punahele mua a Aiwohikupua, aka, he mea ole lakou i ko ke Alii manao.

 

MOKUNA IV.

                MA HOPE IHO O KA LILO ANA O ua wahi kanaka nei i mea nui imua o ke Alii, me he Kuhina Nui la ; a oia ka hoa kuka mau o ke Alii ma na mea e lealea ai ke Alii, me ka manao aku o ka poe e, e kuka ana ma na mea pili i ka aina, a me na waiwai e like me ka mea mau i ka noho Alii ana. Eia ka o Laieikawai no ka laua kuka mau, a he uuku ke kuka ma na mea e ae.

                Mamua aku nae o ko Aiwohikupua lohe ana ia Kauakahialii no Laieikawai, ua hoike e oia i kana olelo paa imua o kona mau kaukaualii, a me na kaikuahine ona, a me kona poe aialo a pau, a eia kana olelo paa,

                "Auhea oukou e ko'u mau kaukaualii, a me na kaikuahine o'u, ko'u mau aialo a pau ; mai keia la aku a hiki i ko'u mau la hope, aole loa ana wau e lawe i kekahi wahine o keia mau mokupuni i wahine hoao ( MARE ) na'u, mai Kauai nei a hala loa i Hawaii, i na i oleloia mai he mau wahine maikai, aole no hoi au e haawi i ko'u kino e komo aku ma ke ano kolohe he oleloa no. No ka mea, he kanaka hana pono oleia wau e na wahine, mai ko'u wa opiopio mai a hiki i ko'u hookanakamakua ana. Aia no ka'u wahine ae ke kii mai no kekahi mau aina e mai, i na noloko mai o Moaulanuiakea, kahi o na wahine oluolu a'u i lohe ai, alaila o ka'u wahine makemake ia, i na i kiiia mai wau ma na ano elua."

                Iloko o ko Aiwohikupua lohe ana ia Kauakahialii, a me ko laua kuka mau ana me kona Kuhina Nui no Laieikawai, alaila, manaopaa ae la ke Alii no Tahiti mai ua wahine la.

                I kekahi la, i ke awakea, hiamoe iho la ke Alii, loaa iho la o Laieikawai ia Aiwohikupua ma ka moeuhane, ua like kana ike ana ia Laieikawai ma ka moeuhane me ka Kauakahialii olelo ana ia ia. A puoho ae la ke Alii he moeuhane kana.

                Iloko oia ala ana ae, aia hoi, he mea minamina loa i ke Alii i kona ike ana ia Laieikawai ma ka moeuhane, no ka mea, ua ala e mai ka hiamoe o ke Alii; a no ia mea, makemake iho la ke Alii e loaa hou ia ia ka hiamoe loihi ana ma ia awakea, i kumu e ike hou aku ai i kana mea i ike ai ma ka moeuhane.

                Hoao hou iho la ke Alii e hiamoe hou, loaa hou no o Laieikawai ma ka hihio pakole loa, aole nae oia i ike maopopo loa aku, he wahi helehelena wale no kana ike lihi ana, a hikilele ae la oia.

                A no keia mea, ua ano e loa ko ke Alii manao, ia manawa ka hoopuka ana a ke Alii i olelo paa imua o kona mau mea a pau, penei no ia:

                "Auhea oukou, mai walaau oukou iloko o kuu wa hiamoe, mai hamumumu, a ina e walaau, he alii aimoku, e pau kona aimoku ana, i na he alii aiahupuaa, e pau ia, a ina he konohiki, a lopa paha ka mea nana i hahai kuu olelo paa, alaila, o ka make ka uku."

                Oia iho la ka olelo paa a ke Alii, no ka mea, ua makemake loa ke Alii e loaa ia ia ka hiamoe loihi i kumu e launa hou ai laua ma ka moeuhane me Laieikawai.

                A pau ka ke Alii olelo ana no keia mau mea, hoomaka hou oia e hiamoe, aole nae i loaa ia ia ka hiamoe a hiki i ka napoo ana o ka la.

                Iloko o keia hana a ke Alii, aole nae oia i hai aku i keia mea ana e ike nei ma ka moeuhane, ua huna loa ke Alii i kona hoa kuka mau, manao la hoi oia, aia loaa hou aku, alaila hai aku i kona hoa Kuhina Noi.

                A no ka makemake loa o ke Alii e loaa mau ia ia ka moeuhane mau no Laieikawai, kauoha ae la oia i kona Kuhina Nui e mama i awa.

                A nolaila, hoolale koke ae la ke Kuhina i na mea mama awa o ke Alii e mama i ka awa, a makaukau ko ke Alii makemake, a laweia mai la, inu iho la ke Alii me kona Kuhina, a oki mai la ka ona a ka awa. Kau koke mai la nae iluna o ke Alii ka halialia alona o Laieikawai, me he mea ala ua launa kino mamua. Alaila, hapai ae la ia i wahi olelo ma ke mele penei.

                                "Kau mai ana i o'u nei,

                                Ka halialia nae lehua o Puna,

                                I lawea mai e ka lau makani,

                                E ke ahe makani puulena o ka lua,

                                Hia—a moe ole loko i ka minamina,

                                I ka makemake—e."

                I aku la ke Kuhina o ke Alii, mahope iho o ka pau ana o ke mele ana, " He mea kupanaha aole hoi au wahine a kaua e noho nei, aka, iloko o kau mele e heluhelu nei, me he wahine la kau."

                I mai la ke Alii; " Ua oki na olelo a kaua, no ka mea, ke oki mai nei ka ona o ka awa ia'u." Iloko oia manawa, haule uku la ke Alii i ka hiamoe nui, o ke oki no ia, no ka mea, ua poina loa ka hiamoe o ke Alii, ua ike ole ke Alii i kana mea e manao ai.

                Hookahi po, hookahi no o ka moe ana mama ka ona awa o ke Alii. Olelo aku la ke Alii i kona hoa kuka, " Ma keia ona awa o kaua, aole i waiwai iki."

                I mai la kona hoa kuka, "Pehea la ka hoi ka waiwai o ka ona awa ? Kainoa o ka ona no kona waiwai, o ka mahana alua." I mai la ke Alii, " Aole hoi paha oia, o ka ike aku ka hoi paha la ia Laieikawai, alaila, waiwai ka ona ana o ka awa."

                Mahope iho oia manawa, hoomau aku la ke Alii i ka inu awa a hala na la he nui, ua like paha me hookahi makahiki, aole nae ko Alii i ike i ka waiwai oia hana ana, nolaila, hoopau iho la ke Alii ia hana. Mahope iho o ko ke Alii hoopau ana no ka inu awa, akahi no a hai aku ke Alii i ka loaa ana o Laieikawai ma ka moeuhane, a me ke kumu o kona hoomau ana i ka inu awa, a hai pu aku la no hoi ke Alii i ke kumu o kona kau ana i kanawai paa, no ka mea walaau iloko o kona wa hiamoe.

                Ia laua e kamailio ana no keia mau mea, alaila, hoomaopopo loa ae la ke Alii e holo i Hawaii e ike ia Laieikawai. Ia wa ka hoopuka ana o laua i olelo hooholo no ke kii ia Laieikawai i wahine mare (HOAO.)

                I ka pau ana o na la ino, a hiki mai ka manawa kupono no ka holo moana. Kauoha ae la ke Kuhina i na Kapena waa o ke Alii, e hoomakaukau i na waa no ka holo i Hawaii ia po iho, ia manawa ke koho ana a ke Alii i na hoewaa kupono ke holo pu, ko ke Alii mau Iwikuamoo ponoi.

                Mamua o ka napoo ana o ka la, kauohaia ka poe nana uli o ke Alii, a me na Kilokilo e nana i na ouli o ke ao a me ka moana, i na he hiki i ke Alii ke hele, a ina he hiki ole o like me ka mea mau ; aka, ua maopopo i kona poe nana uli a Kilokilo hoi, he hiki i ke Alii ke hele i kana huakai.

                A i ka wanaao, i ka puka ana o ka Hokuhookelewaa, kau aku la ke Alii a me kona Kuhina, na hoewaa he umikumamaono, na hookele elua, he iwakalua ko lakou nui maluna o na kaulua, a holo aku la.

                Ia holo ana a lakou ma keia holo ana, hiki maa lakou ma Nanakuli, i Waianae, ia wanaao, haalele lakou ia wahi, hiki mua lakou i Mokapu, a malaila lakou i noho ai he umi la, no ka mea, ua loohia lakou e ka ino, hiki ole ke holo i Molokai. A pau na la he umi, ike maopopoia aku la ka malie, a maikai ka moana, la po iho a ao, hiki lakou i Polihua, ma Lanai, a mailaila aku hiki ma Ukumehame, a no ka makani ino ia la, ua noho lakou malaila, a i kekahi la ae, haalele lakou ia wahi, hiki lakou i Kipahulu ia la.

                Ia lakou ma Kipahulu, hooholo ae la ko Alii i olelo e hele wawae mauka, a ma na waa na kanaka. Ma kahi nae a lakou i noho ai, ua nui ka poe mahalo no Aiwohikupua no ke kanaka maikai.

                Haalele lakou ia Kipahulu, hiki lakou ma Hana, ma uka no ke Alii me kona Kuhina, ma na waa no na kanaka. I ke Alii nae e hele ana, he nui ka poe i ukali ia laua, no ka makemake ia Aiwohikupua.

                Ia lakou i hiki aku ai ma ke awa pae waa o Haneoo i Hana, he nui ka poe i lulumi mai e makaikai i ke Alii, no ka pakela o ka maikai.

                Ia Aiwohikupua ma nae i hiki aku ai, e heenalu mai ana na kane a me na wahine i ka nalu o Puhele, aia nae ikiia kekahi kaikamahine Alii maikai kaulana o Hana, o Hinaikamalama kona inoa. Iloko hoi o ko laua ike ana i ua kaikamahine Alii nei o Hana, alaila, na hoopuniia ke Alii kane, a me kona Kuhina e na kuko; a oia no hoi ke kumu o ko Aiwohikupua ma noho ana malaila ia ia.

                A pau ka heenalu ana a na kamaaina, a i ka nalu pau loa o ko Hinaikamalama hee ana, o ka nalu ia i pae, hoopololei mai la ka hee ana a ke kaikamahine Alii ma ka wai o Kumaka, kahi hoi a Aiwohikupua ma e noho mai ana.

                I ke kamahine Alii nae e auau ana i ka wai o Kumaka, ua hoopuiwaia ke Alii kane, a me kona Kuhina e ke kuko ino. A no ia mea, iniki malu aku la ke Kuhina o ke Alii ia Aiwohikupua, e hookaawale ia laua mai