Ka Nupepa Kuokoa, Volume I, Number 45, 4 October 1862 — Page 4

Ka Nupepa Kuokoa.

KA NU HOU!

MA ka moku Young Hector i ku mai nei i ke ahiahi o ka Poalima, la 26 o Sepatemaba iho nei, ua loaa mai ia makou na mea hou mai na mokuaina Hikina mai nei, e pili ana i ke kaua ma Amerika Huipuia, a me na mea nui no hoi e hanaia mai nei ma na aupuni o Europa. Eia iho na mea i loaa lima mai nei ia makou :

Ua hoikeia mai nei ke pio pinepine ana o na koa aupuni ma na hoouka kaua a pau i hooukaia i keia mau la mai nei, ma na wahi e pili ana i Bulu Rana ; ua haaleleia ke kulana mua o na koa aupuni ma ka muliwai o ka Rapahanoka, a ua emi hope aku na koa a pau o ka akau, a aia i Wasinetona kahi i noho ai me ka makaukau e pale aku i ke komo ana o na koa o ka Hema ilaila. Ua haaleleia o Faredarikabuga me Aquia Creek e ka akau.

Ma ka la mua o Sepatemaba iho nei, ua komo hou mai kekahi mau koa hou e kokua i na puali o ka akau, he 60,000 paha a oi ae. Ua nui no ka weliweli o na hoouka ana mai nei, a ua oleloia o ka nui o na koa kipi i pio he aneane hiki i ka 17,000. O ke kahua kaua kaulana o Bulu Rana, ua lilo holookoa no i na kipi, a ua loaa hou no hoi ia lakou na lua mua no a lakou i hana'i i kela kaua mua ana'i ma ia wahi, a ua lilo no ia wahi i wahi no lakou e pee ai me ka hoomake nui mai hoi i na koa aupuni. Ke olelo nei kekahi nupepa o ka nui ka o na koa aupuni i pio, make a nalowale i na hoouka ana a pau i keia mau la mai nei, he 10,000 a hiki i ka 12,000 koa, a ma ka aoao ka o na kipi aole i nui loa ; no ka mea, ua paa ka hapa nui o ia poe i ka pakuia e na lua, anolaila, i manaoia'i aole i nui loa na koa i make o ia aoao.

Aole no o kanamai ka mama o Gen. Iakesona, no ka mea, i na la koke no mamua iho nei la, ua noho oia ma ka aoao Hema o ka muliwai Rapahanoka, a o na koa aupuni malalo o Gen. Pope, Sigela, a me kekahi poe Generala e ae ma keia aoao aku, a o Gen. Makalelaua hoi ma Alexandria, he mau mile mahope ponoi mai o na koa aupuni. Ua hoao pinepine mai o Gen. Iakesona e pae ma ke kapa Hema o ka muliwai Rapahanoka, a ua kue pinepineia'ku e Gen. Sigela, ilaila no lakou kahi i apa ai i ka wa i lohe mua ia mai nei. Eia ka ua hele ae nei ua o Gen. Iakesona a ma ke poo o ke kahawai Rapahanoka, a malaila mai kona iho ana a hiki ma ka aoao akau o ua muliwai la, a ahai loa mai la i kona puali a hiki mahope ponoi iho o na koa aupuni malalo o Gen. Pope ma, a mamua ponoi hoi o na koa aupuni malalo o Gen. Makalelana. Elua la o kona haohaoia'na e na'lii koa aupuni, a i ke kolu o ka la hoea ana kela mahope ponoi aku o lakou. He 40 mile ka loihi o kahi ana i hele ae ai, mai kahi ana i noho mua ai a hiki i kahi i noho iho ai mahope o na koa aupuni, aole nae he wahi puolo iki ma ka lima o na koa ona ma ia hele ana mai, aka, ua waihoia no ia mau ukana a lakou i na poe koa malalo o Gen. Lee, oia kekahi o na Alii Koa ui ma Amerika Huipuia. A i kona komo ana ma ia wahi, alaila, ua hoomaka kokeia na hoouka nui i hee pinepine ai o na koa aupuni; a ma keia manawa mai nei ua hee hou ae nei kela, a aia ma ka aoao hikina akau o Wasinetona, he 20 paha mile mai ke kulanakauhale alii mai, ma kekahi wahi i kapaia o Faredarika City, oia hoi he umi paha mile mai Hapa Fere. A ua nui ka weliweli ma ke kulanakauhale alii nona. Ke manao waleia nei e hele loa ana o ua o Stonewall Iakesona a hiki i Hanova, he 25 paha mile oia wahi mai kahi aku ana e noho nei, aia iluna ponoi o ka palena Hema o ka mokuaina o Peneselevenia. O ke kumu i manaoia'i e hele ana oia ilaila, i hiki ai ia ia ke oki i ke alanui kaamahu mai ka mokuaina o Peneselevenia, oia hoi ke alanui e holo ana mai Piledelefia a ma Balatimoa aku a hiki i Wasinetona; no ka mea, e manao ana paha kela e oki mai ia wahi e hiki ai i ke kokua o ke aupuni ke komo i ke kulanakauhale alii. O kekahi manaoia hoi, e holo ana kela a hiki i Westminister a malaila aku a hiki i Balatimoa, he 10 paha mile oia wahi mai kahi ana e noho nei, a he 22 hoi mile mai ke kulanakauhale mai o Balatimoa, aia ilaila (Balatimoa ) ka hookui ana o na alanui kaamahu mai Piledelefia a me Nu Ioka mai ; a ina e lilo ia ia ia wahi, alaila, e hiki ana no ia ia ke oki i ka hiki ana o na koa kokua i Wasinetona ; aka, aole paha e hiki ia ia ke komo ia wahi, no ka mea, he mau papu ma ia wahi me na koa he 25,000, a keu ae. Aka, ua nui no nae ka hooleleia'na o ka oili o ka aoao akau e ua eu la o ka Hema. Ua lana no paha kona manao e komo i ka mokuaina o Marilana, no ka mea, he nui no na kanaka oia wahi i makemake nui e kokua i ka Hema. Ke hele nei ka ke kulanakauhale alii a puni i ke kamailio no ke kuua i neia mau la iho nei, a me ke pio ana o na koa aupuni.

Ke olelo nei kekahi mau nupepa o Kapalakiko, ua makemake nui ka aoao aupuni i keia komo ana o na kipi iloko o na moku akau, me ka olelo iho, ina e komo na kipi iloko o ka mokuaina o Peneselevenia, alaila, e hiki koke ana i na koa aupuni ke hoopio aku ia lakou ; no ka mea, aole he mau papu nana e kokua mai i na koa kipi; a wahi no hoi a ua nupepa la, ua hiki mai ka wa e uku aku ai i ka Hema no kana ino i hana mai ai; mahope aku e maopopo ai ia kakou ia mea ; aka, ma ka nana ana iho i ke kulana o na koa kipi i keia wa, ke hamama nei o hope o lakou ; oiai aia no hoi ke awaawa o ke Senadoa, ke hamama nei ma ka aoao hikina o Hapa Fere i alanui no na koa kokua e hiki mai ai i kahi a na puali koa kipi e noho nei ma Hapa Fere a me Faredarika City. Eia nae ke oleloia nei e hoi ana o Makalelana a me kona poe koa a ma ka aoao komohana o Hapa Fere, i hiki ai ia ia ke oki ae i na puali koa kipi e hele ana e kokua ia Stonewall Iakesona. Ina io paha pela, alaila, e puni io paha auanei ua kamaeu akamai la o ka Hema ; aka, ua ike no paha kela i kana mea e hana nei. Ua nui no kona mahaloia no kona akamai.

I ka hiki ana mai o na puali koa kipi i Fairfax Court House, ua nui loa ka olioli o kolaila poe kamaaina, a ua lawe mai i na kaa me na mea ai, a o na wahine hoi a pau, ua hoike mai i ko lakou hauoli me ke kau ana i na hae iluna me ka hoopulelo aku ia mea, ma na eheu o ka makani, " ua hele wale no a hala iluna i ka uluku ohia a ka moe, moe honi pakanaka, o ko uhane kai hiki i ka ponei, i ala pu no maua a mai a-o-e." Ua piha loa la hoi lakou la i ka olioli, ke lawe mai la i na mea ai ma na kaa, a me na holoholona me ka lawe ole mai i ka uku no ia mea.

Ma ka la 8 iho nei o Sepatemaba, ua haiia mai i ka poe ma Wasinetona e na koa i pio a hookuuia mai, ua ike ka lakou i ke komo ana o na koa kipi he 50,000 iloko o ka mokuaina o Marilana, a ua manaoioia no ia mea, e na'lii koa i lohe ia mea.

Ua lohe wale ia mai ma Nu Ioka, ua hoihoi aku o Edwin Stanton ke Kuhina Kaua o ke Aupuni o Amerika Huipuia, i kona palapala hookohu no ia oihana, a ua aeia; a ua haawi ia ia wahi ia Gen. Haleka, a ua ae no hoi oia e lawe ia noho ana nona.

Ua olelo waleia ma Wasinetona e kapae iki ana o Gen. Pope i kona noho ana i hiki ai ke hoopii no Gen. Fitzjohn Porter, Sumner a me kekahi alii pukaa, no ka hoolohe ole i ke kauoha. Ke komo nei na koa hou iloko o Wasinetona, he 5,000 paha a oi ae i kela la keia la, a ke hoouna koke ia nei ia poe iloko o na puali koa kahiko e aoia'i.

Ua hoolaha'e o Jeff Davis ka Paresidena o ka Hema, e hookaawale ana i ka la 28 o Novemaba ae nei, i la e hookeai ai, a e pule ai hoi me ka hoomaikai aku i ka MEA MANA LOA, no KONA lokomaikai ma kona haawi ana mai i ka lanakila iloko o ko lakou lima ma ka hoouka kaua ma Rikemona, a me Manasa, a ua kauoha aku oia i na kanaka a pau o na moku hui o ka Hema e hoomaikai aku i ke Akua.

Ua hiki ae o Gen. Hunter ma Nu Ioka a me kona mau alii, mai Karolina Hema mai, a ua hoonohoia o Gen. Mitchell ma kona wahi.

WASINETONA SEPT 9. Ua hooliloia o Gen. Pope i Luna Nui no na koa a pau o ka Akau Komohana, ka poe e hoouka nei me na Inikini. Heaha la ke kumu o keia hoololiloli pinepineia o na Generala ? He loaa paha no kekahi mea popopo iloko o ko lakou hana ana.

Ua hopuia o Gen. McDowell ma Nu Ioka, o ke kumu ka o ia hopuia'na, no ke kipi ka. Aole nae i maopopo ka mea nana i hoopii.

Ua hooliloia o Gen. Makalelana i Alihikaua no na koa a pau o Vereginia, a me ka Patomaka, a ua kauoha'ku nei oia i na koa a pau, e hoomakaukau i ai e lawa ai na la ekolu, me ke ku makaukau mau no hoi e hele i ka wa e kauohaia'i. O kahi nae e hele ai, aole no i haiia mai. O ka hapanui o na kanaka pili aupuni o Leesburg a me Winchester, ua pau aku i ka holo iloko o ka mokuaina o Marilana, a o ka poe no hoi i loaa mai i na kipi, ua hoopaaia e na puali koa Hema.

Ua wawa wale ia mai, ua paa hou ae nei he mokuhao kaua no ka Hema, ua like no ke ano me ka Pilikua mua iho nei me Merimaka. A he mokuhao mahu kipi no hoi kekahi i hiki aku i Havana, aole i haiia kona inoa, ua nui no na moku Kalepa i pio ia ia. Ua manao waleia o ka Oviete ka inoa o ua moku la. He ewalu ka nui o kona mau pu, a ua hoikeia aku kona hiki ana ilaila, i na moku kaua o ke aupuni, a ke kali nei lakou nona.

Ma ka la 3 o Sepatemaba iho nei, ua kaua aku na koa aupuni ma Forrest City Minesota me na Inikini, a he elua hora o ke kaua ana, hee na Inikini. He ekolu koa aupuni i make, a he 15 i hoehaia, aole no i maopopo ka nui o na enemi i make. Ua hoike mai ke alii koa aupuni e noho nei ilaila, i ka luuluu no ona i na kaumaha malaila, no keia ala ana mai a na ili ulaula o ka ululaau e kaua.

Ua hopuia kekahi mokumahu Beritania mawaho iho o Kaletona Karolina Hema, e ka moku kaua hou lawe pu Octoroon, iloko iho nei o na la hope o Augate ka hopuia'na.

NO EUROPA.

—O na mea hope i loheia mai nei ma Turins oia no ka hoomau o ka hele ana'ku o Garibaldi i Regio me na koa malalo ona. Ke alualuia aku nei nae hoi e kekahi mau puali koa Bergsatare. Mahope iho o ka lohe ana o na kanaka i na olelo kuahaua a Garibaldi i hoopuka'i ma Katenia, ua ala nui mai lakou e kokua ia ia. Mai Ladana mai nei, ua loheia ke pio ana o Garibaldi, a ua lawe pioia oia maluna o kekahi moku kaua o Italia, a aia i keia wa ma Sepasia. A nolaila, ua hiki mai ka hopena o ka haunaele ma ia aupuni.

—Ua komo aku i ke awa o Falmouth Enelani, ka moku kaua Tuscarora o ka akau, i hiki ai ia ia ke haiia i kona mau mea i hemahema, a e kapili hoi i kona wahi i poino iki; aka, ua haawiia mai ia ia he 24 wale no hora e ku ai, oiai ua holo aku kekahi o kona mau alii i Ladana a hoi mai, a ma ia manawa no, kipakuia mai ua moku la, me ka ae oleia e lawe i nanahu nona, a e kapili hoi i kona mau hemahema.

—Ua olelo waleia e lilo ana o Cialdini i Alihikaua Nui no Italia. Ua kakau aku na Kuhina i ka Moi Victor Emanuela i ko lakou manao e ahewa loa ana ia Garibaldi, e kapa ana ia ia he kipi.

—Ke manaoia nei he hana nui kai hiki mai imua o ka Moi Napoliona, o Farani, no ka mea, ua kahea mai oia i kona mau Kuhina e hui aku me ia, a e kuka no kekahi mea i hai oleia mai imua o ka lehulehu. Aole no i hemolele loa o Italia, i ka manao o ka Moi Farani, ma na mea i hanaia iho nei e Garibaldi.

—Ke oleloia mai nei e hana ana ka o Sir Joeseph Paxton i Hale aniani no ka Moi o Farani, a e pakela loa ana ka nani o ua hale la mamua o ka Hale aniani e ku nei i Enelani.

—Ma keia mau la aku nei la, oiai e kaahele ana ka Moi o Rusia iloko o kona malapua i St. Petersburg, aia hoi kiia mai oia i ka pu, a ua hala nae ka poka ma kona aoao, a ua pakele mahunehune mai oia mai ka waha o ka make. Nani no hoi ka nui o ka haunaele ma ia aupuni. I kekahi mau la mamua'ku nei, i ka hele ana mai o kekahi Luna ahai olelo o Beritania Nui, ua hopuia oia, a ua nanaia kana mau palapala a pau, a mahope mai o ka heluheluia'na, alaila, silaia, a hoouna loaia'ku i ka mea nana ka palapala i hoounaia mai ai.

—Ua mahalo nuiia kekahi kanaka o Fela kona inoa, no Belegiuma kona one hanau. Ua hanau mai oia aohe lima ; aka, ke pena nei oia i na kii me kona wawae, a he maikai loa kana mau kii i hiki mai nei i ka hoike makahiki nui ma Ladana.

Aina Hoolimalima.

O KE AHUPUAA o Nanue, APANA O HILO, e hoolimalimaia mai ka aina a hiki i ka akolu makahiki, me na pono o ka lawaia, aina holoholona, a me pulu, &c. He aina nui maikai. E ninau ia JAMES D. MILLS.

Hilo, Hawaii, Sept. 22, 1862. 44-4t

He Uhane no Keliikuewa.

He uhane imi akamai,

Nou no e Keliikuewa,

Aia paha ka uhane,

I ke one o Punahoa,

A he luna ae Halai,

He lalo iho Upeloa,

I walea paha ka uhane,

I ke kope i ke kanana,

Ku na ipu inika,

Kapakahi ko peni Sila,

Ani peahi ko lima,

Kani mai ana ka Piano,

Makaukau ka uhane,

Hao oe a Pikimana,

A lilo i Kapena,

Kapakahi ka Holokahiki,

Huli hoi mai ka uhane,

E waiho i ka pahu ulu,

A he uhane manuahi,

Nou no e Keliikuewa KAHEMA.

Kanikau la he aloha,

Nou no e Keliikuewa,

He aloha no Wailua,

Kela wai kupanaha,

Wai halulu i ka Uwapo,

Ne-ne-i i na pali,

Kuu keiki la ua lilo,

I ke ala hoi ole mai,

Polikua ka ike'na,

I kou klno wailua,

Hui aku paha olua,

Me ke koa lau liilii,

Luhi ehu e ka mamane,

Halii mai i ka hau,

Ua pau ae la nei. MAIANU.

Kanikau la he aloha,

Nou no e Keliikuewa,

He uwe helu ae nei,

Mailuli no he makua,

He aloha kuu keiki,

Kuu hoa pili o ke anu,

Mai ka ua nui o Hilo,

Mai na pali hulilua,

Huli ae au nana,

Ua lilo oe i Lehua,

I ka pua hehi a ka manu,

Aia paha ka uhane,

Ka hiki'na mai a ka la,

Pane mai ko leo la,

Aloha no oukou la,

Ke imi nei no au,

I kuu muli pokii,

O Moenahele he inoa. MAIWELA.

Kapaukolo, Sept. 9, 1862.

MAKEMAKEIA!

LOLI, PEPEIAO LAAU!

A ME KA

LALA MA.NO

PENEI KA UKU ANA:—

NO ka Pepeiao Laau, 8 ½ keneta.

" " Lala Mano, 15 keneta.

" " Loli Kohola, 12 ½ keneta.

" " Loli Koko, (ke nui,) 4 keneta.

" " Loli Kae, (ke nui,) 4 keneta.

E hele mai ma ko maua hale kuai, ma ka aoao komohana o ka Hale Kuai o Daimana, ma Alanui Alii.

UTAI & AHEE.

Honolulu, Aug. 1, 1862. 38-3m

HALE PAI KII

J. W. KINI.

INA MAKAMAKA A ME KA POE NO A pau o keia mau Mokupuni ka'u e kahea nei, ina e makemake ana e piia ko lakou kii, e hele mai no ma ko'u

HALE PAI KII,

ma ka aoao hikina o ka hale kuai o Daimana ma, maluna ae o ka hale kuai Bipi o Wiliama Dufena, ma ka aoao makai o ke Alanui Alii e pili kokoke ana me ke Alanui Papu. Ua makaukau loa au e hooko koke aku i ka makemake o ka poe a pau ma ka Oihana Pai Kii, a ke hilinai nei no au ma ka'u mea i ikeia imua o ka lehulehu no ka

Hana Pai Kii.

Honolulu, Aug. 7, 1862. 37-2m

MOKU HOLO MAU

Nawiliwili, Koloa a me Waimea,

KAUAI.

E HOLO MAU ANA KA MOKU kialua maikai mama

"KALAMA,"

no na awa i haiia maluna, a me na awa e pili ana ma ka aoao kona o Kauai, ma keia hope aku. He hiki i na kanaka ke hilinai ia ia. F. MOKINA, Ka hope.

Honolulu, Aug. 7, 1862. 37-3m

Olelo Hoolaha.

KEMAKEMAKE NEI AU, KA mea nona ka inoa malalo, e kuai i na bipi kane hoounauna, ina ua lawe ia mai ma ko'u hale, ma Hilo. Penei ka'u kuai ana, ina he bipi nui loa, laka, a ua maa i ka hoounauna ia, haawi no au he $17. Ina he emi mai ka kino o ka bipi, e haawi no au mai ka $10 a i ka $15, e like no me ka nui a me ka maikai o ka bipi. Na'u na

D. H. HITCHCOCK.

Hilo, Hawaii, Aug. 30, 1862. 41-3m

HANA! HANA!!

UA MAKAUKAU AU E kepa i NA kanaka Hana Mahina, no na

KANU KO,

ma Hilo nei. Ina ua makemake kekahi kanaka e loaa i hana nona iho, ma na aina o Kaupakuea, Onomea, Kaiwiki, Paukaa, a me Amauulu paha, e hele mai ia'u, a na'u no e hoomaopopo ia oukou ka uku, a me na mea a pau e pili ana. Na'u na

D. H. HITCHCOCK.

Hilo, Hawaii, Aug. 20, 1862. 41-3m

HALE KUAI BIPI!

KE HOOLAHAIA'KU NEI I NA kanaka a pau, ua hoi hou ae nei na mea nona na inoa malalo, i ka Oihana Kuai Bipi, a ke makaukau nei laua e kuai aku i ka

Bipi Momona Loa,

i na mea a pau e lokomaikai ana, a hele mai i ko laua hale e kuai ai. Ua lako mau maua i ka

Bipi, Puaa, Hipa, Naaukake,

a me na mea e ae no he nui wale. E hele kino mai no e na makamaka i ikemaka'i no oukou i ka Momona maoli o ka maua bipi. Aia ko maua Hale Kuai Bipi makai iho o ka hale puh palaoa o R. Love, ma Kolopo mauka iho, ma ka aoao komohan o ke Alanui Nuuanu. AILUENE & UWILA.

Honolulu, Sept. 12, 1862. 42-4t

J. H. COLE.

LUNA KUDALA,

Ma ka Hale Pohaku o Mi. Aniani ma.

Ma ke Alanui Alii Wahine. 53-6m

H. W. SEVARANA.

Luna Kudala a mea Kalepa.

Hale Mahoe.

Alanui Aliiwahine.

33-6m

OLELO HOOLAHA.

$50 MAKANA.

E UKU IA NO HE $50 I KA MEA A MAU mea paha, nana e hai mai i kekahi mea e hoomaopopo mai ai i ka poe nona na ilio i pepehi nui i na hipa o ka

Ahahui Hanai Holoholona a me

Ka Mahiai,

a ina e ike ia kekahi mea e hele kuleana, ole ana maluna o na aina e pili ana mai Pohinahina a Lamaloloa, Kohala Akau, a maluna paha o kekahi aina e ae o ua Ahahui nei, e hoopii ia no e like me ke Kanawai. E pepehiia no na ilio a pau i loaa maluna o ko makou aina hanai hipa ; a o na holoholona, na lio, hipa, kao, e hanaia no e like me na holoholona hele hewa, a e hoopii ia no ka poe nona ua mau holoholona nei. O ka poe mea holo-holona e holo nei maluna a ka aina o ka Ahahui, ua ae ia lakou e lawe aku i ko lakou mau holoholona a hiki i ka la 1 o Augate, 1862, a mahope oia manawa, e hanaia no e like me ua holoholona hele hewa. O ka palapala ae, e lawe aku i na holoholona, e palapala lima ia, a e kakau inoaia e ka Luna o ka Ahahui.

FRANCIS SPENCER.

Luna o ko Waimea A. H. H. a me ka M.

Puuloa, Hawaii, Iulai 14, 1862. 35-3m

OLELO HOOLAHA.

O KA MEA NONA KA INOA MALAlo nei, ke papa aku nei oia i na kanaka, haole, a me ka pake, o kela ano kanaka keia ano kanaka a pau, e nana mai ana. Ke papa aku nei au i na mea a pau, mai hookuu wale oukou i ko oukou mau holoholona, ma ka Apana kula o

Ukumehame,

mai ka pali o Manowainui, e pili ana me Waikapu, ua kapu ia Apana kula. Ina i loaa kekahi holoholona e hele ana ma ia Apana kula i oleloia maluna, e uku mai ka mea holoholona $1.00 (hookahi dala,) me ke kao, a me ka hipa, ewalu poo $1.00 (hookahi dala.) Ina aole e loaa mai ka uku e like me na mea i oleloia maluna, alaila, e hookomo ana kuu kanaka ma ka Pa Aupuni, no ke kolohe i ka mauu o ua Apana kula la me ke kuleana ole. P. NAHAOLELUA.

Hope Luna Aina o ka Moi.

Lahaina, Maui, Maraki 31, 1862. 19-tf

OLELO HOOLAHA

I NA KANAKA HAWAII!

Makai iho o AIGUPITA!

Ma hope iho o ka Pa

O MAHUKA !

Pa Kuai Papa

LUI, C. H. LEWERS,

MALAILA E LOAA AI NA PAPA O KELA ano keia ano, me ke kumukuai makepono loa, nolaila, e naue mai oukou e ike i ka oiaio o keia leo paipai ia oukou e na makamaka Hawaii.

NA PAPA OLEGONA,

LAAU HALE A ME NA POU,

LAAU KAOLA A ME NA PINE PA,

LAAU AAHO HALE PILI MAOLI,

PAPA ULAULA, PAPA PAINA,

PAPA KEPA A ME KA AAHO,

PILI ULAULA A ME KE KEOKEO.

Eia ka mea

KUPANAHA

Ma keia hale — maanei i wiliia'i ka

PALAOA a ma ka HANA PAHU,

e like loa me ko

ULAKOHEO

mamua, i kona wa e kau ana, aole i pau i ke ahi mamua ; nolaila, e naue mai e makaikai.

Na Pena Keokeo a me ka Omaomao,

Na Pena Ulaula a me ka Eleele,

Poho, Kolu, Hulu Pena,

KUI o na ano a pau,

LAKA o na ano a pau,

Ami, Kilou, Kui kakai moena,

Kui Nao,

Pani Hale,

Pani Aniani, Pake,

Aniani kaawale,

Pani Olepelepe,

A PELA WALE AKU.

Honolulu, Iulai 22, 1862. 36-3m

MAKEMAKEIA.

ILI BIPI,

ILI KAO,

a me ke KELEAWE kahiko.

UA MAKEMAKEIA NA MEA I HAIIA maluna e C. Brewer & Co. (Burua ma,) ma ko laua Haie Kuai i kai o ka Uapo. E uku no laua i ke kumukuai makepono no ia mau mea. 46-3m. C. BREWER & Co.

KA LAKO HALE

A ME NA

Pahu Kupapau!

AUHEA OUKOU, E KA POE E MAKEMAKE ANA E kuai ma ke ano makepono wale! Eia na ke waiho la ma kuu Hale Paahana, ma Alanui Papu.

NA PAPA KAUKAU!

NA LAKO HALE!

NA PAHU KUPAPAU!

PAHU KOA......$12.

Ua loaa mai hoi na mea hoonani Pahu Kupapau he nui loa, a e kuaiia no ka uku makepono.

A ua makaukau no hoi au e kuai aku i na mau mea hoolako hale, a ka poe e makemake ana e kuai me a'u no ke dala. No-laila, ke makemake nei au e kuai aku i na lako hale o hai me ka uku aku i ke dala maoli, a ua lako hoi i na mea hoolako hale no ke kuai aku ia hai, no ke kumukuai emi loa.

HANALE ALENA.

37-6m Alanui Papu.

J. P. HUGHES.

MEA HANA NOHO LIO!

AIA MA KA HALE KUAI O KA mea nona ka inoa maluna nei, he Noholio Pelekane a he Noholio Meleka, a me na Noholio Wahine, o na ano a pau: NA HAO WAHA a me NA KEPA o na ano a pau. NA KAULAWAHA, a me na mea e pono ai ka lio. NA ILI KAUO o na ano a pau. NA EKE ILI. NA HUIPA. NA HAO KEEHI. NA PALAKI LIO. NA KAHI LIO. A me na mea e ae a pau loa e pili ana i na lio a me na kaaholo, a e kuai ana no ia mau mea,

No ke kumukuai makepono loa!

Aia no ke waiho mau nei malaila na pela mauu.

O na pela pulu, na pela hulu, na pela mauu, a me pela lelele. E hanaia no e like me ka mea i kauohaia mai.

Ua hanaia no na kaa lealea me ka maikai loa, a me ka makepono hoi.

Ua hana hou ia na mea a pau e pili ana i ka'u oihana me ka maikai.

E malama pono ia no na mea a pau i kauohaia mai e pili ana i ka'u oihana. E loaa no wau ia oukou ma Monikahaae, ma ke kihi o ke Alanui Hokele a me ke Alanui Papu.

J. P. HUGHES.

Honolulu, Aperila 1, 2862. 19-1y

E Makaala! E Makaala!!

MA KAHI O C. Brewer & Co., E LOAAI I NA kanaka Hawaii ka

Waapa okohola maikai,

Pena hale o na an a pau,

Aila pena,

Wai hoomaloo pena,

A me na mea e pili ana i ka hoomaikai hale.

C. BREWER & CO., (Burua ma.)

Hale Makeke, Alanui Kaahumanu, Honolulu, Feb. 13, 1862.

37-3m

MANUAHI, MANUAHI.

E IKE OUKOU E NA KANAKA a pau. eia ma ko'u Hale Kuai Bipi, ma Ulakoheo.

NA io bipi momona loa o na bipi kupaluia a pau o na kuaaina

mai, i laweia mai ma ko'u

HALE KUAI BIPI,

a he manuahi loa ke kuai ana. Maanei wale no ke keu o na Io Bipi Momona, Waliwali, a Palupalu hoi,

O na io ma ka ai ana iho, aole hoohalahala iki ka puu i ka oo oia mau mea. E hiki ia'u ke kuai aku ma ka paona, a me ke o

KUAI MANUAHI,

me ka paona ole. Pono oukou ke hele nui mai e kuai me a'u i ike io oukou i ka oiaio o na olelo maluna. Ua loihi loa ko'u noho ana ma keia oihana, no kuu aloha loa i na keiki a me ka lehulehu a pau o ke Kaona, a me keia Mokupuni okoa, a no ka pono o ka poe ma ka moana a me ko na aina e, a ua kamaaina loa au ia oukou. E hele nui mai oukou oiai au e noho ana i Kuene na oukou. E wiki mai oukou.

J. W. KAIKAINAHAOLE.

Honolulu, Aperila 25, 1862. 22-tf

HALE HANA PIULA.

F. H. & G. SEGELKEN.

MA KE ALANUI NUUANU, MAKAI IHO o ka Loiala Hotele. Mau mea hana, a kuai Piula, Hao, Keleawe, a me na mea e ae e pili ana i ka

Oihana, Piula,

A e hoomoe hoi i ka Piula Wai, me ka hooponopono kupono i na mea a pau e pili ana ia oihana. Ua lako mau i ka Piula Wai maikai. E hele mai e ike no oukou iho. 33-6m

PAPA MAKEPONO!

AIA KA HALE KUAI O LUI (C. H. LEWERS.) ALANUI PAPU, kahi e kuai oluolu ai. NA PAPA OREGONA 1 a hiki 3 iniha, LAAU KAOLA, oa a me na pou, a me na opaka e ae, LAAU PA a me na PINE PA. LAAU AHO HALEPILI. PAPA ULAULA, PAPA PAINA, PAPA KEPA, PILI ULAULA a me KEOKEO. PENA KEOKEO, OMAOMAO, ELEELE, ULAULA. POHO, GALU, HULU PENA. KUI o na ano a pau, LAKA. AMI, KILOU, KUI KAKIAMOENA, KUINAO. PEPA HOONANI KEENA. PANI HALE, PANI ANIANI. ANIANI KAAWALE, PATE. PANI OLEPELEPE.

Eia ka mea kupanaha ma keia wahi, na ka mahu e hana i na pahu apo, he hikiwawe, kupanaha. E hele nui mai e kuai a e ike wale i keia KAMELO

HOONANI HALE.

Makepono.

O KA POE A PAU E MAKEMAKE ana e loaa na mea maikai e hoonani i ko lakou mau hale, e aho e naue mai i ka Hale Kamana o ka mea nona ka inoa malalo, ma ke Alanui Hotele, a malaila e loaa'i ia lakou na

PAPA KAUKAU NUI A LIILII HOI,

NOHO O NA ANO A PAU.

MOE O NA ANO A PAU.

PAHU KUPAPAU.

E ku mai ana mai Bosetona mai, ma ka moku George Wasinetona, ma ka malama ae nei o Ianuari, he mau mea HOONANI HALE o na ano a pau, a e kuai Emi aku no au. E hele mai e nana a Kuai iho.

C. E. WILLIAMA. (UILAMA.)

Honolulu, Iulai 2, 1862. 32-6m

KAMANO! KAMANO!!

1050 PAHU KAMANO MAIKAI LOA i loaa mai nei. A e kuaiia aku e like me ka makemake o ka poe kuai mai. Ma kahi o

33-3m H. HACKFELD & Co. (Kalema.)

KAKELA ME KUKE.

MA KA HALE POHAKU HOU, MA POLELEWA kahi kokoke i ka Halepule Betela ma Honolulu, Oahu. Na laua no e kuai i na lole o Kela ano keia ano. NA MEA AI, NA BAKEKE, NA IPU TINI, NA PA LEPO, NA KAMAA, NA PAHI me na O-O, NA PAPA me na NOHO, NA IPUHAO, NA NOHO LIO, NA MEA E KAKAU, NA PENA ME NA AILA, NA MEA MAHIAI. A me kela mea keia mea.

Me na laau a Dr. D. Jayne.

Honolulu, Dekemaba, 1861.

MEA ONO KA RAIKI!

E ka poe Kanu Raiki!

KE MAKEMAKE NEI KA MEA NONA ka inoa malalo iho, e kuai nui i ka

RAIKI,

a o ka poe mea Raiki hou paha, e ulu ana aole i oo, e hiki no ke ohi mua kekahi uku hapa, ke kuai e ia ka Raiki me a'u. Eia kekahi, na'u no e hoolawa i na eke i mea e pono ai ke halihali, a e hele koke nui mai ka mea Raiki oo, a me ka mea Raiki e ulu ana e kuai me a'u. Aia ma ka Hale Kuai o

KEOKI OLELO E.

Ma ke kihi o ke Alanui Papu.

35-3m

ILI BIPI, ILI KAO.

E UKU AKU NO O F. S. Pratt & Co., ma ko laua Hale Kuai, ma ka

Hale Mahoe.

I ka uku makepono loa no ka mea i haiia maluna. O Mr. J. C. Spalding (Polena,) ka mea i kamaaina loihi ma ke kuai ana ma a mea, ka mea nana i hooponopono ma ia mea. 32-3m