Ka Nupepa Kuokoa, Volume I, Number 43, 20 September 1862 — Page 2
Ka Nupepa K uokoa.
i ho la iluna o Debolo, puoho ae la no hoi ka hiamoe, pane iho la o Keaka Papa, " Kau-a hooluhiluhi ana oe ia'u, e hooluhiluhi ai, i kuhi paha oe he hapa mana ko'u, e laa la, make oe ia'u, aole ou wahi e pakele ai."
Pane mai la o Debolo, "Alia hoi au e make, hookahi a'u hana i koe ia oe, o ko nana ia'u mau kaikamahine i wahine nau. Oia ka hana i koe, alaila, ilaila hoi au e make ai. Apopo nae oe, hele mai i o'u nei, a hele pu aku kaua." O ka wili aku la no ia Debolo i ke kapa moe. O ka hoi aku la no ia o Keaka Pepa a hiki i ka hale; ninau mai la ka wahine. " Pehea mai la ia hana hou a olua."
H ai aku la o Keaka Pepa, me ka olelo pu aku i ka wahine. " Hele aku nei no hoi au a ka pali, kahea aku nei no hoi au e like me kau mea i olelo mai ai oe ia'u, Hoea mai ana ka moku aniani, ko'u hoi ae nei no ia a hiki, hoala aku nei no hoi au, a ala no hoi; pane iho no hoi au e make. Olelo mai nei kela, hookahi hana i koe o kuu nana ka ia oukou i wahine na'u, alaila la make.
E o lelo ana no laua nei, hoea mai ana na mea ai o ka aina ahiahi, ai iho la laua nei a maona, hiki ana no hoi na poo umi, hana no hoi lakou i ka lakou hana, a pau hoi aku la lakou, noho iho la no hoi laua nei. A hoomakaukau iho la laua nei no ka moe ana, moe laua nei a ao, hiki ana na poo umi, hoonani no hoi lakou ia laua nei e like me ka lakou hana mau, a pau lakou i ka hoi, hiki ana na mea ai, ai laua nei a maona, hiki hou mai la na poo umi, hana no hoi lakou, a pau lakou i ka hoi.
Ia manawa, kahea aku la ka wahine ia Keaka Pepa. " E Keaka Pepa-e ! " E-o mai la no hoi o Keaka Pepa, " E-o." Olelo aku la ka wahine, "I keia la e hanaia'i oe imua o makou, a i keia la no hoi e akaka ai kou ola, a me kou make. I keia la auanei la ea ! o keia nani auanei o'u la ; e lilo ana ia nani i o'u mau kaikuaana, a owau hoi, e lilo ana wau i wahi luahine haalele loa, o'u mau maka nei la, e lilo ana i makole, o ko'u wahi kapa auanei la he wahi kapa inoino loa, o ko'u mau wahi pua, he mimino loa. A o na nani auanei a pau o'u nei la, e pili ana ia i o'u mau kaikuaana, a e huiia'na makou a loko o ka hale hookahi, a o ko'u wahi noho auanei la, he wahi noho inoino, o ka noho o'u mau kaikuaana, he mau noho maikai ko laua. A o na mea maikai loa a pau, i o'u mau kaikuaana ia, a o na mea inoino hoi a pau, ia'u ia.
Aka nae ! i ike oe i ko'u inoino, a lalau oe ia laua, alaila, o kou make no ia. Aole oe e hiki ke hoi hou i kou wahi. No ka mea, he nui lou na hana make a Debolo e pau ole ai ia oe i ka heluia. Ua imi mai nei o Debolo i wahi nou e make ai, a no ko make ole, nolaila, ke imi mai nei no kela i wahi nou e make ai. Oia hoi kou koho ana i kekahi o makou.
" Ina oe e koho i kekahi kaikuaana o'u i wahine nau, alaila, o kou make no ia, no ka mea, aohe mana ia laua, eia wale no ia'u na hana mana a pau a Debolo. A o kuu kino luahine e pau wale ae ana no ia, a o kuu kino nani no e hoi mai ana no ia a pili.
" Eia wale no kou ola, o ko ike mai no ia 'u he inoino, koho mai no oe ia'u i wahine nau. A penei auanei oe e hana ai ke hele mai olua me Debolo, a ia makou auanei e noho pu ana, ku ae no auanei oe a luna, hele mai no auanei oe, a i kekahi kaikuaana o'u, hopu iho no oe me ka olelo iho penei: Wahine maikai oe, maikai kou kino, maikai kou mau maka, maikai kou mau kapa, maikai kou mau pua hoonani, o na mea ou a pau mai luna a lalo he maikai wale no, a owau nei la he pupuka ; aole oe e kohu me a'u.
" A pela no auanei i ka lua , a i hiki oe i o'u la, alaila, hopu iho no auanei oe ia'u me ko olelo iho penei: A o oe hoi; he oi oe o ka wahine inoino, inoino kou kino, inoino kou mau maka, inoino kou kapa, inoino oe mai luna a lalo, a he oi loa no oe a ka inoino, a owau nei la he inoino, kokohu kaua. Pela no auanei oe e hana ai, alaila ka hoi ola oe, a o ko'u manawa no hoi ia e haalele ai i kuu makua. A e lilo ana no hoi ia i mea minamina nui na ua makuakane la o'u, a e lilo pu ana no hoi ia'u ka mana.
( Aole i pau.)
Olelo kike ia
J. P. KELIIKANAKAOLE.
E Ka Nupepa Kuokoa e ; Aloha oe:
Ina he mea kupono i kou manao, e oluolu mai i keia mau manao pokole, e hai ae ia J. P. Keliikanakaole , no na hailoaa ana i hai mai nei.
E J . P. Keliikanakaole e! ke waiho aku nei au imua ou me ka haahaa loa, i keia mau manao pokole, penei; Ma ka ninau 1, aole i loaa, ua hemahema ka hana ana ma na degere, a me na latitu.
Ma k a ninau 2, penei: aole no hoi i loaa, no ka mea, he okoa ka ninau, a he okoa ka haina, a he hemahema loa no hoi ka hoohalahala ana.
Ma ka ninau 3, ua like pu no, aole no i loaa, he okoa ka ninau, a he okoa loa ka haina, a he lalau no hoi ka hoohalahala ana. Ke hoole aku nei au, aole i loaa na ninau a ekolu, e imi ikaika i loaa ; he mau manao e ae no ko'u no keia mau ninau ; aka, no ko'u hoopokole ana i ko'u manao, ua pau iho la no. Me ka mahalo.
P. R. HEEIA.
Koloa Hikina, Kauai, Aug. 4,1862.
Ka Nupepa Kuokoa.
HONOLULU, SEPA. 20, 1862.
UA eehiaia mai makou e na manao minamina, no ke koi pinepineia mai e hookui aku i na olelo apuhi wale a hoino no hoi i ka poe maikai, a ko makou hoa ka Pakipika e hoopuapuai mai nei ma kona kukulu manao ana a me he mea la, ua hiki ole ia ia ke naue ma na pae moku nei, ke ole e hui puia me na olelo e akiaki wale ana i ka poe pono, a me ka hoinoino mai no hoi i keia pepa. Ua hamau makou i kekahi mau manawa i ka pane ana'ku ia ia, me ka manao ma ia hana la, e hiki ai ia makou ke alakai aku ia ia ma ke alanui maemae, a me ka oiaio; aka, ua ike makou i ka nele ana o ko makou manaolana ana no ia mea, a ua maopopo ae nei ia makou kona hele loa ana'ku iloko o ka nenelu ma kona aoao mau, me ka hoopakela loa aku i ka huaipau ana mai i na manao hoino poe pono a me ke Kuokoa. E like me ka auwaha i kahe mauia e ka wai, he ololi wale no i ka hoomaka ana a ka wai e kahe aku ma ua auwai la; aka, a hala kekahi manawa o ko ka wai kahe ana, e hele aku no auanei ua auwaha la i ka nui; pela ko makou hoa, ua hoomaka mai oia me ka auwaha uuku ; aka, no ke kahe mauia no o kona auwai manao e na manao hoino a hakukole hoi, nolaila, ua hele loa aku nei oia i ka naele o alakai ma ka olelo hoinoino ana mai, i na Misionari, a me ka mea nana e hoopuka nei i keia pepa, o ko lakou hoomaona ana no ia.
Ke i mai nei lakou i ke kue ka o na kumu i ua pepa la i ka wa i hoomakaia'i; aka, aole nae lakou i hai mai i ke kumu o ia kue ia ana, a me ke kumu ole. Ke hoole nei makou i ka oiaio o ia mea i oleloia e lakou, a aole no hoi e hiki ia lakou ke kukulu mai i kekahi mea nana e hooiaio i ka lakou mea e olelo nei. A ke manao paa nei no nae makou, ina ua kue na kumu i ua pe pa la ; alaila, na na manao haumia, a pono ole no hoi lakou i koi aku e hana pela, oiai lakou e noho ana ma ka oihana kahuna, e manao mau ia no o ka lakou hana ke alakai i na poe a pau e huli ma ka pono, ma na wahi e haumia ole ai; a ina ua ike lakou i na manao ino a haumia hoi maloko o ua pepa la ia wa, ua kupono ko lakou kue ana. E like me ka makua maluna o kona ohana, o ke ake mau o ia poe ke kaawale o ka lakou mau ohana, mai ka launa ana me na mea nana e alakai i ko lakou mau manao a me na kino ma na mea pono ole ; a ma i hana ole na poo o na ohana pela ; alaila, e aho e haawiia nona ka inoa Demona.
Ua lawa'e la ko makou hoohalike ana ma kahi e aku ; aka, e huli koke ae no makou i ua hoa nei o makou, a e koi aku ia ia e ninau koke iho i kona Lunaikehala, ina paha oia he makuakane no kekahi ohana opiopio, a ike oia i ke komoia o ua ohana la, e na mea nana e kauo aku ia lakou iloko o ka nenelu make mau o ka haumia ana, aole anei oia e hoao me kona ikaika a pau e kipaku aku ia mea mai kona ohana aku ? Ke hawanawana ae nei o Eko, e kipaku no ia. A pela no hoi na kumu, i ko lakou ike ana, e komoia ana ko lakou mau ohana e na olelo haumia, a e hanaiia'na na manao o ko lakou mau ek alesia, i na mea pono ole i hoopukaia e ko makou hoa ka Pakipika, e wikiwiki no lakou e kapae ae i ka haumia nui e puapuai mai ana, o poino auanei na keiki o ko lakou mau ohana. Ua hewa anei lakou ma ia hana ana me ke kumu pono, ina lakou i hana ? Ke olelo nei makou, aole! no ka mea, ina ua hewa lakou, alaila, ua hewa ka makua i ke ao ana i kana keiki, a me ka hoomalu ana hoi i kona ohana.
Eia no keia mau olelo kupanaha a ua hoa nei o makou, o ka "uhi" ka o na kumu i ka malamalama malalo o ke poi; he mea i maopopo i na poe o pau e heluhelu ana ia mau manao, he oiaio ole ia mau olelo mai ka mua a hiki i ka hope. Ina paha i manao na kumu e huna i ka malamalama, a ua hoa nei o makou e haanou mai nei, no keaha la i ike ai na kanaka o keia Pae Aina i ka noho naauao ana ? No keaha la lakou i lilo ai he poe kaulike me na aupuni nui e ae o ka honua nei? O ka hailiili ka ka uku a kakou e haawi aku ai i na kumu, ka poe nana o Hawaii nei i kauo ae mai ka moana hohonu o ka noho hupo ana, a i ke kihapai o ka naauao a me ka ike. Menemene ole maoli ke alelo o ke kanaka nana e aa ka hoopuka'na ia mau hua olelo oiaio ole imua o ka lehulehu. Nana kumu no kakou i ao mai i na mea a pau o ka ike, ua noho lakou iloko o ka mea o ka hoomanawanui ana i ili mai ai ia kakou ia mau mea. A ke olelo nei makou ua holopono ko lakou hana. Ua ko ka lakou mea i hoomanawanui ai, a ua hoea ae nei o Hawaii nei mai ka puuwai hohonu o ka noho hupo ana, a ke noho nei oia ma ka helu o na aupuni naauao o keia ao.
O keia kauo ana ae anei ia kakou mai ka poli o ka hupo, ka uhi i ka malamala malalo o ke poi ? Ke hoole aku nei makou, aole! Ua waele lakou i ke kihapai o ka pono, a ua kanu iho i na hua ma ua mala la, a ke ohi nei kakou i na hua oia mala a lakou i kanu ai, oia hoi ka naauao, a me ka ike. Ina ua heluhelu ko makou hoa i na moolelo o ka honua, mai ke au ia Parao a hiki wale mai i keia wa, aole loa e hiki ia ia ke hoike mai i kekahi lahukanaka i oi mamua o ko Hawaii nei, ma ka holo ana a hiki i ka pane poo o ka naauao a me ka ike, iloko o na makahiki pokole he 40. I ke aha la ka mea i holo ai o ka ike, ka pono, a me ka naauao iloko o keia lahui, ina ua uhiia ka malamalama malalo o ke poi; e like me ka huaolelo hoolili a ko makou hoa e pane mai nei ?
Aole no o makou makemake e kau iho i ka mana o ka hooholo ana ia mea; aka, ua waiolu no makou i ka waiho ana'ku i ka hooholo i ka lahui manao kaulike holookoa o Hawaii nei; a o ka hoike o na kumu ke waiho kehakeha mai nei no ia, o ia hoi ka pono, ka maluhia, ka ike, a me ka naauao i loaa i ke kanaka Hawaii. " Ma kau hana e ikea ai kou ano." A pela no hoi na kumu i hoike mai nei i ko lakou ahonui ana ma ka hoonaauao ana i keia lahui, ma na hana maikai he lehulehu wale e ku kilakila mai nei imua o kakou a pau, mai kela kihi a keia kihi o ka aina; aka, aole no o makou kahaha i keia hoinoia o na Misionari, no ka mea, he mea no ia i kuluma mau i na poe pono mai mua loa mai a hiki i keia wa ; aka, heaha ka lakou manao no ia hoinoia'na mai, oiai ua oleloia. " Pomaikai ka poe i hana inoia mai no ka pono; no ka mea, no lakou ke aupuni o ka lani."
Ke i mai nei ka HOKU O KA PAKIPIKA, " na na kanaka Hawaii i kukulu ia pepa ;" ea, e ua hoa nei o ka ili kai hoehoene wela i ke aloha, a me ke anu o ka makani ahai aala o ke kupukupu he Waikoloa; ina na ka lahui Hawaii i kukulu ia pepa, no ke aha la i hoohalahala'i i ke kokua oleia mai? Aole no he mea mau ke kiola, a hoowahawaha aku hoi o ka makuakane i kana keiki, a i ka makuahine hoi ka hoowahawaha'ku i ke keiki ana e hoomo ana i kona waiu, aole, a nolaila, e hana ma ka oiaio i keia mea. He mau pepa elua kai paiia iho nei—o kekahi ke keiki ponoi a Hawaii nei, oia ke KUOKOA, a o kona poe nana i hoomakua mai he poe iwihilo no, no keia lahui o Hawaii nei, ka poe nana oia i hoohanau mai, ka poe nana e kipulu nei i kona kihapai i ke aloha a me ka wai e ola'i; a ke hiipoi nei lakou ia ia e like me ka hiipoi ana a ka makuahine i kana keiki aloha, me ke kokua oluolu mai i kukulu paaia'i ke kiahoomanao o ko lakou holo mua ana i ka moana hiwahiwa o ka ike a me ka naauao ; me ke kau ole mai hoi o ka pilikia maluna o ka Luna nana e hoopuka nei ke KUOKOA ma ka lakou kauoha; a me ka AHAHUI KUOKOA, ka poe nana i kiola ka anoano iluna o ka mala pua i hanauia'i o ke KUOKOA. No ke aha la ka i lawe ai na poe he nui wale mai Hawaii a Niihau, i aneane e hiki ka nui i ka 3,000? No ke aha la ke uku nui mai lakou a pau me ka olioli, i ka uku pepa na lakou? Ua ike pono oukou i ke kumu o keia lawe nui ana a me keia uku ana, me ka olioli nui. Me ka loa mai o na maka o ka poe e noho ana ma na aina kua, o ka hiki aku o ko lakou Kilohana. Ma ke kilohi ana iho i ka moolelo o ka makahiki i hala, e ike no auanei o ke KUOKOA no ka pepa a ka lahui Hawaii ; o ka hoku akau ia o ko lakou mau manao ake oiaio, a naauao no hoi. Ua ike no makou i ke alohaia ona a me kona kokuaia'na mai e na manao aloha o na keiki mai ka hikina a ka la i Kumukahi, a ka welona a ka la i Lehua ; a e malama mai ana no lakou i kona ola ana, me ke kupono no i ko lakou ano maikai mau, a me ko lakou mau kulana.
" Ka nupepa a na kanaka Hawaii i kukulu ai," pela ka PAKIPIKA e olelo mai nei. Ina pela, eia ka ninau, "O ka pepa hea la kai hooponopono ponoiia e na kanaka Hawaii, ma ke pai ana, a me ka hoopuka ana, a me na mea no a pau e pili ana i ka hoopuka nupepa ana? Ke olelo nei makou, o keia pepa no kai hoopuka holookoa ia e ka poe o Hawaii nei.
Ua maopopo ke haalele nei na kanaka i ka PAKIPIKA ; a no ia mea, mai manao like oukou me na luna ona; aka, e maliu mai, a e hiipoi aloha no i ko oukou KILOHANA POOKELA O KA LAHUI HAWAII.
Ua makaukau mau keia pepa e pai i na manao oka poe a pau, ina paha e kue ia mau mea e kakauia mai ai; no ka mea, ua hiipoi makou i ka olelo e i ana, " O ka N upepa ka palekaua ikaika o ko kela a me keia kanaka mau pono."
EPA MAOLI KA PAKIPIKA.—Ke olelo mai nei ka Pakipika i ko makou kaili ka i ke kope a lakou, no na mea e pili ana i ka halawai ana, a me na olelo mawaena o ka Moi a me W. W. F. Synge, ke Kanikela Generala o ka Moi Wahine o Enelani, ma ka Poakahi la 8 o Sept. nei. Ke hoole nei makou i ka oiaio o na mea i oleloia e ko makou hoa, no ka mea, ua laweia mai no ke kope ma ke keena o ke Kuokoa, a pehea la e hiki ai ia makou ke hoole aku i ke pai ana, oiai ua hele kino mai no hoi ka Lunahooponopono o ka Pakipika e ninau ia makou no ia mea, a ua hooakaka aku no makou, mai ka mua, a hiki i ka hope, i na loina o ka laweia ana mai o ua kope la i ko makou pepa. Ua piha ka pepa i ka wa i hiki mai ai o ua kope la, a no ko makou manao ana he mea ano hou ia ke hoolaha'ku imua o ka lehua lehu, aole nae me ka manao e kaili mai i ke kope o lakou la e noke hala ole mai nei. I aha ai la ka hana ana pela ? Ua laweia mai ke nope i ko makou nei pepa, aole makou i ike ua kakauia mawaho, Na ka Hoku Pakipika, ua kope la, he oleloa no; nolaila, o ka mea pono loa ia oe ke hana, oia ka hamau i kou leo mai-i pane mai.
Na Palapala.
Pake i nahuia e ka Moo,
A ME KONA O ANA I KA PAHI IA IA IHO, AIA MA MAKAWELI.
Penei kona nah uia ana e ka Moo, e kuke ana o Alama i ka mea ai, oia no kai nahuia e ka moo.
Ike aku la kekahi Pake o Alo i ka eku ana mai iloko o ka Laiki, i aku la o Alo ia Alama, heaha la keia e eku mai nei, ku aela o Alama a nana aku, e nahu ae ana ua moo nei ma ke kuekue wawae, a pauia nahu ana nahu hou no ua moo nei, ma ka oloolo wawae, maia wawae hookahi no,
Ike ua Pake nei o Alo i ka moku ana o Alama i ka moo, hapai ae la e hoihoi iloko o ka hale, i hapai ae ka hana ua paa i ua moo nei, Alaila, pule iho la o Alo i kona Akua, alaila hoihoi aku la i loko o ka hale.
I kekahi la ae, puni maila oia i ka eha nui ma kahi a ua moo nei i nahu ai, holo aku la oia i waho o ka hale a kuapupule iho la.
Ike aku la kona kaikoeke o Ka uahikaua i kona ano pupule hoohei aku la i ke kaula a hei, oki aela o Alama i ka pahi a moku, hele mai la kekahi poe kanaka. Alaila, kahea aku la o Kauahikaua i kanaka mai hele mai oukou, he pahi ma ka lima o Alama. Alaila kahea aku la ua Pake la i kekahi kanaka ia Keoni, aole au e o ia oe i ka pahi. Alaila kii aku la o Keoni, hoihoi aku la i loko o ka hale.
Hele aku la o Keoni i kekahi hale aku alaila o ka o iho la no ia o ua Pake nei i ko, na opu, e kolu no hoi hou ana, e kolu no hopuka.
Alaila kahea aku la kekahi poe wahine ia Keoni, e Keoni e ! e Keoni e !! ua hou iho nei o Alama i ka opu ona i ka pahi.
A lohe o Keoni, holo aku la, a kaili ae la i ka pahi. O ka pilikia noia o ua Pake nei, aole i maopoopo kona pono.
J. W. KAPIH E.
Waimea, Sepatemaba 2, 1862.
Ka Hailoaa o na Ninau
WAHA LIONA A R. P. HEEIA.
E ka Nupepa Kuokoa e; Aloha oe :
Eia mai ka Hailoaa o na Nina u a ka mea nona kela mau hua e kau kehakeha'e la maluna, ka mea hoi i kapaia he kanaka oi kelakela o ka Lahui Hawaii, oia hoi ka Ahuimanu Boy.
Ninau 1. " Ehia na Kilometera huinahalike ka laula o Helevitia ?" Haina.— He 295,282,603,000.
Ninau 2. " Ehia na Kilometera ka loa o ia Aupuni?" Haina.—He 258,375,120,125,000.
Ninau 3. " Ehia na Kilometera huinahalike o Idem ?" Ma keia ninau, ua hewa ko kakau ana i keia huaolelo Idem , aole pololei, ma ka Buke Sepera o ka Latina, eia no ia, Iden, i hiki ai ke unuhi ae ma kau olelo iho, Ladana, no ka lalau o ka ninau, aole e haiia ka haina.
Ninau 4. " Ehia na kapu ai ke kiekie o ka Mauna Ulala?" Haina—He 7,860. Ma ia papa no o Kasetila ma Nu Ioka, o kona loihi 1,500 mile no ia.
E kuu hoa, o na ninau anei keia e liia'i kuu poo maluna o ka niu o kuu aina ? Ke hai aku nei au ia oe, aole keia he ninau, he mea paani wale no keia, a he lealea kalakalai wale no, a he makemake e hoopuka ma ke akea, i ikeia mai ai he aka mai.
A no kau mau olelo pane, ua like oe me he kanaka naaupo la, no kuu pane ana ka i ka naaupo o W. Piliole ; nolaila, wikiwiki mai nei oe e hoopuka ma ke akea, i mau ninau. Ke olelo mai nei oe, aia ma kou lima ka palapala a W. Piliole, i hea la hoi oe i kinohi, hoolaha'e imua o ka akea, me ka olelo iho, " He palapala keia no ka hookiekie o J. W. Maluna."
Eia iho malalo he wahi ninau Baibala, a nau no e koho mai i kon a hailoaa oiaio.
Ninau 1. He 16 iniha ke anawaena o ka Pu Dala o Mose. Ehia la na pouna leo o Iosua e hiki ai ke puhi i ua Pu Dala la ?
Ninau 2. Owai ka inoa o ka holoholona i haule mawaho o ka Halelana, a make iho la i ke Kaiakahinalii, i hoolikeia kona inoa me ka inoa o ke Akua ?
Ninau 3. Ma ka olelo a ka aoao hoomana o Mahomeda, ua ikeia'ku kekahi Moa kane e kau ana ma kekahi kiko o ka Lani, a i kona kani ana, ua lohe na Moa a pau o ka Honua nei. Eia ka ninau : Ehia la na makahiki, a me na malama, a me na hebedoma, a me na la, e holo ai kona leo mai kahi ana e kau ai a hiki i ka Honua nei, i lohe ai na Moa a pau o ka Honua, a kani mai lakou i ka wa hookahi? Ehia hoi na mile o ka holo ana mai o kona leo a hiki i ka Honua nei, mai kona wahi e kau ana ?
He ma-u iho la ia mau wahi Kua-Hao o Lohakahinu, o ka lolohi ka o ka poohiwi o ka hai keiki i ka poluku me ka Ham are, ike aku i ua mea he maluuluu o na lima, a o ka mai no hoi ia e moe ai, mai hele e makilo i kauhale. Owau no me ka mahalo.
J. W. MAL UNA.
Waianae , Oahu, Sept. 6,1862.
E hiipoi kakou i ka pono, i po maika ai.
Ke Kii o ke Kaua ma Amerika.
O ke Kii i hoikeia maluna, oia no ke Kii o ke kulana o na Koa Aupuni, a m e na poe Hema, e hoomakaukau nei no ka hoouka kaua, ma na kapa o ka muliwai Rapahanakoka, ma ka moku aina o Vereginina, he 60 paha na mile mai ka Hema aku o Wasinetona, ma ka la 25 iho nei o Augate. O ka muliwai wale no ka mea iwaena o na Puali Koa o ka Akau a me ka Hema, ma na Alahaka wale no e hiki ai ke hele, mai kekahi aoao aku a i kekahi aoao. Ma keia mau moku mai paha e lohea mai ai na mea i hanaia ma ia hoouka kaua ana, iwaena o na Koa Aupuni he 200,000 a me na koa o ka Hema he 100,000.
O na huahelu 1, 2, 3, 4, me na kaha eleele, me na huahelu 1, 2, 3, oia no ka puali koa o ka Hema ma ka aoao Hema o ka muliwai Rapahanakoka, me na koa kipi he 100,000 paha ka nui. Huahelu 5, na Koa Aupuni, he 20,000 malalo o Gen. Sigela.
" 6, " " 20,000 " Gen. Banks.
" 7, " " 30,000 " Gen. Pope. " 8, " " 20,000 " Gen. McDowell. " 9, " " 30,000 " Gen. Burnside ma Faredarikaboga. " 10, " " 80,000 " Gen. Makalelana.
Aia no na Koa Aupuni ma ka aoao Akau o ka muliwai, o ka laina eleele, oia ke alanui kaamahu, e holo ana mai Wasinet ona aku a i ka Hema, ma ka moku aina aku o Vereginia.
Olelo pane ia
F. W. K. KAMAHUALELE.
E ka Nupepa Kuokoa e ; Aloha oe :
Akahi no auanei a halawai kaua la i keia manawa, no ka mea, o oe no kekahi hoa kamailio o makou ma ka makou olelo kamaaina, ina he mea oluolu ia imua ou, a me kou Lunahooponopono e hoopuka ae.
Aia ma ka waha oaka o na kanaka Hawaii, Helu 47, la 14 o Aug., o ka Hoku Pakipika. Aia malaila ka olelo pane a Kamahualele ia'u, e hou hewa ana kona poo i ka paia paa o Kauai o Mano, penei : " Ke ku aku nei au imua ou me ke ani peahi o na lima, e pee ka waha, e hamau ka leo, e kui ka hele, e akahele ka olelo, e lohi ke kakau hoopuka i na olelo ano ole." Ke lilo io nei ia i auwaha e poho ai kana mau olelo pane iloko o ka poliuliu hohonu o ke kuhihewa : a iloko hoi o ka eloelo huhewa o kona kii gula. Aka, ke lana nei ko'u manao maloko, e pau ana ko lima i ka alaihi kala loa, ka ia kuku e pau ai na lima i ka ekeeke. E kiei aku oe a hulei ae i ke poi o ka ipukai a Paulo, ma Roma 2:21.
Wahi au, " he lalau ia kope, he kope oiaio ole." Ei ala e ; alua ou huhewa ana iloko o ka uluhe, a me ka palai, a maoeoe ko nui kino iwaena o ko alakai makapo ana imua o ka lehulehu. Nolaila, ke ninau aku nei au ia oe, a imua hoi o na makaaloha o ka lehulehu. E lele anei ka manu maluna ae o kakou nei la, ke nele i ka ehu ? E lilo anei oe i Generala no na hoouka kaua, ke nele oe i ka naauao, a me ka ikaika, a me ka hopo wale ? E maona anei kekahi ke ai i ka makani, ke nele i ka poi ? Nolaila, ke kukulu aku nei au i mau hoike, i akaaka ai no ka manu ka nele i ka eheu, no ke Generala ka nele i ka naauao, a me ka ikaika, a me ka hopo wale, a no ke kanaka hoi ka maona ole i ka makani, ke nele i ka poi. Nolaila, ke waiho aku nei au imua ou, a me ka lehulehu. E hele anei ke kino ke ole ke poo ? aole paha ea ? Pela hoi, aole hoi e hiki ia W. Piliole, a me Kahinalua, ke ekemu wale imua o kakou ke akaka io aole i hele o G. M. Koha, aole hoi i ninau aku imua o Ioseve i ke ano o ka olelo Latina ; ina ua hala loa o G. M. Koha. A ina imua o Ioseve, kulike loa no ka Ioseve i kakau ae ai ia W. P., a me P. M. K., a ke i mai nei oe " he lalau a oiaio ole." Ke pane aku nei au ia oe, he oiaio iki, oiaio nui, oiaio mau loa, mai ka lima akau o Waialua a ia W. P., a me P. M. K.
E ke hoa e ; wahi au, " ua haukeke i ke anu o W. P. i ka ua Popohala o Nuuanu, imua o G. M. Koha." Aole! o oe no ke oki loa i ke hoa, i ka ua a me ke anu, e haukeke ai oe i ka malu o Olekukahi, ahiki aku iloko o ka ehuehu o Kupau. Papau oe e ke hoa, hohonu koiuiu lipolipo kela, mai ka ale iluna o ka ilikai a hiki i ka papa koa o lalo lilo, oia o Vigolino Piliole, au e hoohoa aku nei i ka iki nioi e mue ai ko nuku ; no ka mea, o ko Farani keiki puukani oi kelakela okoa iho la no ia.
E ke hoa e ; he moe'na na ka laau loa na manao o W. P., a me P. M. K. Kue ka laau haale o Kahihikolo, hooko loia a loaa o Kupakoli, hooiliia a piha i ka hilahila ka opu o ka hai milimili, i awala mai nei i ka ala a Davida i maa'i i ka lae o Golia.
Ei ala e ; i hiamoe anei oe i ka po, a kakau moeuhane ia kela pahu o ke Akua ma kau pane olelo ma ka waha ae o Paulo ia Timoteo 3:1, 2 ? Olelo maoli keia kukulu manao ana o Kamahualele, he okoa ke kahua i paneia no'u, a he laukua mai ia i nui ai paha ka manao a kaulana ka inoa. Minamina ino ko kino i ka hei maloko o ka upena a ka apiki.
A ke kamaalau mai nei oe i ke uki moe poli o Kaukoopua, me ka manao o kulaiia e ka makani Waikoloa o Makaha, penei: " E nana iho oe ma ke Kuokoa, Helu 26, aia malaila ka ala a kahi keiki o Kaena, ka mea o hanane ai ko kikala a pela aku. Aohe ou kanalua, a hopohopo oe i ka pahu o ka noonoo, ina nau ia ma ka Helu 26 o ke Kuokoa, a aole no hai mai, alaila, e au au mai ka loa a ka laula o Makaha, Waianae.
E Vigolino Piliole, a me P. M. Kahinalua a me ka nui Katolik a a pau ; e alualu ae kakou ia F. W. K. Kamahualele, a noho iho me Haakulou i ka la o Makaha. Ia nei la hoopale au ia oe, hoi oe i ka pohu o Waianae; a huli hoi no hoi ko Koloa, Kauai keiki. Boy. Na kekahi haumana Katolika. Me ka mahalo.
J. K. KAHAKOIWAIOKANEKI.
Koloa, Kauai, Augate 28, 1862.
Ho-a Hewa i na Holoholona.
E o'u mau hoa lawe nupepa mai Hawaii o Keawe, a Kauai o Mano, ua ike ae la paha oukou i kela mau huaolelo e kau kehakeha'e la maluna o ke poo o keia kumu manao, a makemake paha oukou e lohe i ka io maoli o keia kamailio ana, eia no ia.
Ma ka pule mua o Augate i hala'ku nei, ua kauoha'ku o Francis Spen cer, i na Paniolo ona a me ka poe i hoolimalimaia, e kii a hoohuli i na Lio a pau e holo ana ma ke kula, ma kahi e waiho la mai Hanaipoe, a hiki i Laumaia. Ua hookoia ka olelo a ua haole nei, ua ho-a loa ia na Lio makai o Hamakua, me ka hoopaa loa ia ma ka lima o ka Luna, a hiki mai i keia la.
A penei ka uk u ana ke kii aku ka poe mea Lio, $1.00 no ka hele ana ma ke kula, a he $2.00 no ka poe nana i hoohuli, he $0.25 no ka noho ana ma ka pa, no ka la hookahi, a pela no a nui na la, nui loa ka uku ana, ua hiki i ka $6.00 o kekahi Lio. Aole nae keia he Pa Aupuni, ua hanaia keia ma ka manao wale no o ua haole nei. Eia ka ninau, Ua kupono anei keia hana i na Kanawai Aupuni e noho nei ? Ua pono anei ka hoopaa ana ma na Pa Aupuni ole ?
Ua kauia he Palapala Hoolaha make ak ea e hai ana i ka la e kudalaia'i o kekahi mau Lio, oia ka la 9 iho nei o Sepatemaba, aole nae i hookoia ia olelo ana, ua hiki e mai ka Loio Kuhina, oia hoi o Mi Halasi, a hooponopono iki oia no keia mea. Oiai ua hemahema keia hana ana wahi ana, a ke hoopaaia nei keia mau lio me ka maopopo ole o ka la e kudalaia'i.
Ke noi aku nei a u, a me lakou nei, ke oluolu ka manao o ka Luna Hooponopono, e pai holookoa mai i na Kanawai e pili ana i keia mea, a me na Kanawai e pili ana i ka pono nui o ka lehulehu, he oi loa aku ka pono o ia mamua o ka hoopaapaa ano ole a kekahi poe e waiho nei iloko o ka nupepa. Aole no au i manao e noi aku ; aka, no kuu ike ana, ua kupono ia mea ia oe, i ike ai o'u mau hoa ike ole i ke Kanawai; no ka mea, ua poho lakou iloko o ko lakou ike ole i ke Kanawai.
Ua hoolaha hou no hoi o ua o Fran cis Spencer nei, e kii kela mea keia mea i ko lakou mau holoholona e holo ana maluna o ka aina o ka Ahahui, aole nae kuhikuhi mai oia i ka inoa o na aina i oleloia maluna, a nolaila, aole makou i manao ua hoolimalima lakou, manao no makou, o ka Bipi wale no ko lakou mea i hoolimalima, eia ka o ka lepo no kekahi.
Ke waiho aku nei au me ka haahaa, me ka lana o kuu manao, e weheia mai ana ke ki o na mea ano nui i waiho akea ia'ku la, a i mohala ae n a maka o na hoa o kaua, me kuu manao hoi, ina ua hewa au ma keia kamailo ana, e kala mai no. E aho ia, na lakou nei, a me lakou la aku, e kiei, a e halo iho. Ke uhi mai nei ka malu o ke Ko o Kaomalo, ke hoi nei au i ka lai o Wailehua. E aloha auanei.
Z. P. NOHOIKEANU.
Waimea, Hawaii, Sepat. 10, 1862.