Ka Nupepa Kuokoa, Volume I, Number 42, 13 Kepakemapa 1862 — He kanikau no Kamae. [ARTICLE]

He kanikau no Kamae.

Aloha kuu wahine o ka lai o Kuhiau, Kuu lehua maka onaona i Anoilele, I awili puia me ka Ohelopapa, Eia wale ana hoi au o kou luhi mua, E aloha ae ana i ka lai o Awa, Malama ana au o ko aloha, O ko'u makamaka o keia wahi, Hiki mai ke aloha naue pu no me ke kino, O ke kino keia luhi ia ia la, Au wale ana au o ko'u hoa, O ke hoa alo anu o ka nahele, Hele oe haalele i ka pili a kaua, He uwe aloha nou no e Kamae. Huli ae nei au aole oe, Aia paha i ka luna o Waialeale, E walea ana hoi i ke kapili manu, Eia wale ana hoi o kou hoa, E uwe ana me ke kaumaha, Kuu hoa alo anu o ka moana, I hoomehana i ka poli o ke hoa,

O oe ka ia e Hauailiki, Iliki iho i ka manao, Hoohanini i ke kula waimaka, He makamaka ke aloha e hiipoi nei, Aloha o Kuhiau wela i ka la; I malumalu i ka Hekuawa, Aloha kuu wahine, Kuu makamaka o keia wahi, O oe ka la i ka luna o Kalanipuu Nana aku o ke ahe a ka makani, E kilohi iho ana ia Limaloa, Aohe loa oia kula a kaua e hele ai, Auwe kuu wahine. Kuu hoa mai ke one kani o Nohili, A me ka pahapaha o Polihale, I walea paha oe i ka hale a Limaloa, Hele oe i ke ala loa hoi ole mai, O ka hooilina mau o ke ao nei, He kanikau aloha no Kamae. Kuu hoa pili o ka ua me ka la, Hoohehelo ana ka uhane i ka malu ulu, I ka malu ulu la o Lele, Lele ko aloha pili ia nei, I ka pa kolonahe a ka makani la he Aa, Kuu wahine mai ka malu hale o Haupu, Haupu kuu manao o ka ike aku ia oe, Aohe e hihi ua lilo i ka Pilikua, Aia paha i Kupakoili, Ke a-u ae la me na hala o Naue i ke kai, Kai aloha na'u kahaka lewa i Nualolo, I lohe olelo au i ke alialia liu la o Mana, Kuhi aku ka manao he oiaio, aohe ka, Kuu wahine mai ka ohai o Papiohuli, Mai ke kula ohai o Limaloa, Auwe kuu wahine - e, Kuu wahine mai ka makani Kukalahale o Honolulu, Mai ka ua kuahine o Manoa, Mai ke kawelu holu o Lanihuli, Huli ae au a hoolono i ka leo o ke Kahuli, I ka hoene leo lea i ke kuluaumoe, He uwe he aloha nou e Kamae, Kuu wahine mai ka ua a ke Kamahala, Ua hala aku nei paha oe i Lehua, I ka inu wai a ka Paoo, E uwe ae ana ia oe e ke hoa, Ana ke kino luhi i ke aloha, Apikipiki ke aloha me ka manao, E kuu kaumaha ia oe - e. S. W. KALEO. Nawiliwili, Kauai, Sep. 4, 1862.