Ka Nupepa Kuokoa, Volume I, Number 42, 13 September 1862 — Minamina Ino! [ARTICLE]

Minamina Ino!

I nehinei, ua ike ae makou maloko o na nupepa, ua haule ae nei ka pua rose a keia Lahui i mohala a ohaoha iloko o kona wa kakahiaka. Ua kaomiia ko'u puuwai e na pouna kaumaha o ke aloha, e lu helelei ana i na kiowai a ka waimaka e haloi nei. O ke keiki i haawiia na kakou e ka Lahui Hawaii, ua hoi, a ua hala i ka hooilina lilo loa mai ia kakou pakahi. He nui ko makou minamina ia ia, a ua manao ae hoi, e loaa ana ka kakou hua hiapo; aka, ua kikoo e mai la no ka mea. nana Loa, a ua lawe e aku la no kela ia ia, nana ia hiapo, a ua nele kakou ia. E ka hanauna hou, e kanikau oukou i ko oukou hoa holoholo o ka wa opiopio ; no ka mea, ua hala e kela, a ua koe iho oukou. E ka lahuikanaka okoa, ua lilo ka kakou milimili, e kulou haahaa kakou a e noi aku i ka Mea Mana Loa, e haawi hou mai i pani hakahaka no ka kakou mea i lilo, e like me Seta, i panihakahaka no Abela. E pule hoi kakou i ke Akua, e hooluolu mai i ka manao kaumaha o ko kakou mau Moi. E ka Haku o Hawaii— e, Ua pouli Hulihee, ua hala e oe, Ke haohao nei ke ahemakani o Kona, Auwe ! ua hala oe, ua hele loa. Me ke aloha. G. W. P, Sepetemaba 3, 1862.