Ka Nupepa Kuokoa, Volume I, Number 42, 13 September 1862 — Page 2

Ka N upepa Kuokoa.

            " Aole a'u e hoolohe i kau, e make ana no oe ia'u."
            I mai la o Debolo, " Alia hoi au e make, e hele hou oe a ko wahi i oki iho la i ka ululaau, alaila, e hoolilo ae oe ia wahi i mala, a e kanu aku oe i na mea kanu o kela ano a me keia ano. Eia na mea au e kanu ai, i ko, maia, ipuhaole, ipupala, kulina, kapiki, akaakai, uala, &c., A eia kou makemake loa, e kanu no oe i keia mau mea a pau i ka la hookahi, a ulu no i ka la hookahi, a hua no, a oo no, a pala no i ka la hookahi, a ai no i ka la hookahi ; a ina i pau keia mau mea a pau i ka la hookahi imua o ko'u alo, alaila hoi ea aiake au."
            Ka wili aku la no ia o ua o Debolo nei i ke kapa, o ka moe aku la no ia. Hoi aku la o Keaka Pepa a hiki i ka hale, ike mai la no hoi ka wahine, ninau mai la ia Keaka Pepa, " Pehea mai nei keia hana a olua ? Pane aku la no hoi o Keaka Pepa, " Eia mai nei ka hana hou la; a ua hoa pepa nei o'u i i mai nei, O kahi ululaau no a'u i oki ai e hoolilo i mala, a e kanu i na mea kanu o kela ano keia ano. O ke ko, ka maia, ka ipuhaole, ipuala, a me na mea kanu no a pau. Kanu no i ka la hookahi a ulu no i ka la hookahi, a hua no i ka la hookahi, a oo no i ka la hookahi, a pala no i ka la hookahi, a ai no ka ia i ka la hookahi."
( Aole i pau.)

Ka Nupepa Kuokoa.
HONOLULU, SEPA. 13, 1862.

No ke Aupuni.

            I ke awakea, hora 12 o ka Poakahi, la 8 o Sepatemaba, 1862, ua hele ke Komisina o Beritania me kana wahine, makua hanai Inoa o ka Mea Kiekie i make, a me na Alii o ka manuwa o H. B. M's. moku Termagant i holo aku nei, e ike i ka Moi, a me ka Moi Wahine. Ua piha oloko o ka Rumi i na Alii a me na'Lii wahine.
            Ku mai ilaila ka Mea Hanohano R. C. Wyllie, a hoike aku la i ka Moi a me ka Moi Wahine, ia Mrs. E. Follet Synge, ka wahine a ke Komisina o Beritania Nui, a mahope o Mr. W. W. Follet Synge ke Komisina, ua noiia'ku o Mrs. Synge e noho. Ku mai ilaila ke Komisina, a hoopuka mai la : " E KE ALII, ME KA MAHALO IA OE E KA MOI :
            Ke waiho aku nei a u iloko o ka lima o ka Moi he palapala na ka Earl Russell, ko ka Moi Wahine nui o Beritania Kakauolelo o ke Aupuni no ko na aina e. E hoike ana ia oe i ka Moi Wahine, ko'u Haku Alii, ua oluolu oia e hoike aku ua koho mai oia ia'u i Komisina a Kanela Kanikela no ke Aupuni Hawaii.
            Ua loaa mai ia'u na kauoha a ka Moi Wahine e hooia aku nei ia oe e ke Alii, e mau no ka manao nui ana o ka Moi Wahine a me ke Aupuni o Beritania Nui, i na pono a me na pomaikai ou e ka Moi, a me ka maluhia o kou Aupuni, au a ka Moi e noho Alii nei me ka naauao a me ka noiau.
            Ua k auoha ia mai no hoi au e ka Moi Wahine o Beritania, e hoike aku ia oe, e ke Alii, me ka manao aloha nui i kona ae ana e lilo i makua hanai no ka Mea Kiekie i make, ka Haku o Hawaii; no ka mea, ua hiki ia ia ke ike i ke aloha lokomaikai i manao mau ai ia nou e ka Moi, a me kau wahine, a me kou Hale Ohana Alii. A e manao nui au me ka hanohano a me ka hauoli ia'u iho i ke koho ana o ko'u Haku Alii ia'u a me ka'u wahine, i makua hanai mamuli ona, i ka Mea Nui o ka Hoano a me ka Babetizo ana o ka Mea Kiekie.
            O ka makemake nui ia o ka Moi Wahine i haawi mai ai i ka Makana Hoolaa, ana i hoouna mai ai na ke Keiki Alii, a i lilo ai ia'u ka hoohanohano ana, o k a waiho aku i ua makana nei ia olua e na Moi, mamuli o ka inoa o ke Alii Wahine. E pono loa e malamaia e ia, i hoike mau no ke aloha a me ka mahalo o kona Makua Hanai Alii ia ia.
            Aka, ua oluolu i ka manao o ka Mea Mana Loa, e hoonele i k a makemake a ko'u Haku Alii, a e hoonawaliwali i ka manaolana ou e ka Moi, a me ka Lahui Hawaii. O ka maikai hemolele o ke Keiki Alii, ma kona ano iho, i aloha nuiia'i e na mea a pau, a o kona opuu akamai i ikeia'ku ai, ua manaoia e lilo ana i hopena malamalama nona iho a me kona lahui, a oiai aole me kakou i keia manawa. Ua mae aku ka Lei Kalaunu i hanaia nona ma ka honua nei e ke Alii, ua hoonaniia oia i ke Kalaunu Hemolele o ka haumia ole iloko o ka Lani.
            Iloko o keia hoike ana, a mamuli o ka mahalo a me ke aloha o kou lahui, a me na haole e noho nei ma kou Aupuni, he mea hiki paha ia oe e ka Moi ke hoike i ke kau wahi manao hooluolu aku imua o lakou.
            O Quee n Victoria, me ia iho i inu iho nei i ke kiaha o ka naauau-wa ana no kana kane, ke owili pu mai me ka naau kaumaha, me ka Moi a me kau Moi Wahine iloko o keia kumakaia weliweli loa i kau iho nei maluna ou, ae minamina nui no ka make ana o ke Keiki Alii ana i hilinai ai i ka pono ana i manao nui ai.
            Mamuli hoi o'u iho, o ka'u wahine, a me Captain Hall, a me kona mau Alii, e hoike aku nei i ko makou manao kaumaha like, a e hoike pu aku ua kanikau like ko makou naau e like me ka mea i loohia i keia Pae Aina mai o a o.
            Ke nonoi haahaa pu aku nei no hoi au, me ka hoomaopopo aku ia oe e ka Moi, ke kokoke mai nei ka manawa e hoomaka ai au i ka hana i ka'u hana; aka, me ka ikaika nae, a me ka manaolana e imi i ka pono, a e hii me ka hoomau aku i ke aloha, a me ka manao maikai e noho ia nei mawaena o ke Alii o na kanaka o Hawaii nei, a me Beritania Nui. Ma ia hana au e manaolana ai au e makemakeia'i au e oe ka Moi, a me ke Aupuni Hawaii, a me ka apono pu ana mai o ko'u Aupuni ia'u e like me na kauoha a'u e hana'ku ai."
            K ii mai la ka Moi a pane mai la i kana mau olelo penei:
            "O kau olelo e Mr. Syn ge, ua haawi mai ia'u i ka manao kanalua ole. Ua hoopaia kekahi aa o ke aloha e haalulu nei i kuu puuwai, e manao likeia no e ke Aupuni Hawaii mai o a o.
            Ia oe hoi e Mrs. Synge ka mea kupono mua e pane aku i ka manao hauoli no ka hookipa ana ia oe , ma kou noho ana mai i Makua Hanai ma o ka Moi Wahine o Beritania Nui la, a me ka Babatizo ana i kuu keiki a ke Akua mana loa iloko o kona lokomaikai i lawe aku nei mai o kakou aku.
            Ia oe e Mr. Synge, ke hoike aku nei me ka manao pono, no ke ano o kou noho Aupuni ana i hope no ka Moi Wahine, a o ka hauoli no k a hookipa ana'ku ia oe e hoolawaia no ia mamuli o kau kauoha pololei ia ana mai ia'u, a e noho oe me ka hoomanao o oe ke Kuhina noho mua o ko'u Aha Alo Alii.
            O na noho aloha loihi ana o kou Aupuni a me ko'u, e manao mauia'i a hoomau loaia aku ma kou ano noho pono mai kou hiki ana mai a hiki i keia manawa, a hoike mai no hoi oe me ka hoomanawanui i ka mea kaumaha i kau iho nei maluna o'u, a ua hoolilo ia ko'u Aha Alii a me ko'u Aupuni i kanikau.
            O ka makana Babatizo i haawiia mai no kuu keiki, a i haawiia mai ma ka inoa o ka Moi Wahine ke Queen, e mau no auanei ka hoomanaoia ana o keia hana lokomaikai, a aloha nui hoi.
            E oluolu oe e hai aku i kou Haku Alii i ko'u aloha nui ma ka hilinai ana, aole e haule ka manao nui ana o'u a me ko'u Aupuni no ka pono, a me ka noho aloha i na manawa loihi i keia hope ae nei.
            E oluolu hou no hoi oe i ka hooia ana'ku i ka Moi Wahine kou Alii, ko'u hoohanohanoia a me ka'u wahine no ka hana kiekie i hooiliia mai maluna o ko maua noho Alii a me ko maua aupuni, mamuli o ka lawe ana i ke keiki a maua e noho mai i makua hanai nona. O kona nalowale ana kana kanaka e nonoi nei a iloko o ka owili aloha ana, o maua e hui pu mai ia iloko oia mea. A o kona kumakena no kekahi mea e kaumaha nei, ka manao aloha a pau no kona pilikia.
            E hoike hou aku ia oe e Mr. a me Mrs. Synge i ko maua hookipa olioli ana'ku ia olua iloko o ko'u Aha Alii a me ka aina, a e haawi aku ia olua i ke aloha oiaio me ke kokua aku i ko olua noho oluolu ana ma keia wahi."
            Pau keia haiolelo ana, hoike mai ke Komis ina i ke Kapena o H. B. M's. moku Termagant, a na ke Kapena i hoike aku i na'lii o luna o kona moku, a pau, ia hele ka Moi a kamailio pu me ke Komisina. A ma ka nana 'ku he kanaka oluolu no.
            Pomaikai kakou i ka loaa ana o ke kanaka akamai, me ke kupono no ko kakou pae aina, a ina peia ko Amerika kanaka e hoouna mai ai alaila kupono; o ke kanaka ike i na Rula, a me ka noho ana o ka poe maikai, aole o ka hele a loko o ka Hale Alii alaila e hoohilahila ia'i no ka ike ole i na mea kupono e hana'i.

            Ua koiia mai nei no makou e na manao aloha e wikiwiki ae, a e kamakamailio pu hou me na hoa lulana o makou, a ina ua nui loa ko makou haaliki ana ma ia mea, e kau ae no i ka hewa o ia hana ana ma ka ipuka o ko makou mau manao aloha.
            —Ke palapala mai nei o J. Nawahi, o Halai, Hilo, no kekahi kalo nui, a penei no kana olelo:
            " O ke anapuni o kona huli, ma kahi e pili ana i kona kino e aiia'i 2 1/6 na kapuai; a o ke kiekie o kona ha kupono iluna, 8 na kapuai ia, a o ka loihi o ka aoao o ka pua i hoea mawaho o ka huli, 5 na kapuai ia ; a o ke anapuni o kekahi lau ona, he 11 kapuai no ia, a o ke anapuni o kekahi ha ona ma kahi e hui ai na aoao mai ka hoomaka ana mai o ka ha, he 6 iniha no ia. He keu a ke kalo nui! kohu kumu ape ka hoi ua mea he nui? E pono no ia kakou e hooikaika, i ole e pilikia. E noonoo oe e ka mea palaualelo ea ! a ina e noonoo koke oe e hilahila koke no oe ea ! e hooikaika oe me na lima a loaa, alaila, olioli loa oe ea. O ka pono loa no ia, he ole ka noho wale."
            —He leta hoi ka T. Covers e kue ana ia G. M. Koha, a penei no kana mau olelo: " Oia na ninau a G. M. Koha i paiia ma ka Helu 39 aku nei.
            I ka nana ana, a me ka noonoo ana iho, aole i ulu mai ia mau ninau noloko mai o ua ano ninau pono maoli: aka, noloko mai no o na ohana ninau lapuwale loa. Nolaila, ke ninau aku nei au ia oe ; No ka nele loa anei i na ninau kupono maoli, i hoopuka ae ai oe ia mau hoku powehiwehi, na mea kino hiki ole ke hoomalamalama ia lakou iho ? Ina pela, alaila, he mau ninau maluna o na ninau ; a eia hoi na ninau i ulu mai noloko mai o na ohana ninau.
            1. Owai ka mea nana i humuhumu ka mikinilim a o Iehova ?
            2. Owai ka inoa o ua mea la nana i humuhumu ?
            3. Ehia kapuai ka loihi o ua mikini la ?
            4. Ma ka lima hea la i komoia' i ua mikini la ?
            5. I ka mana wa hea i humuhumuia'i ?
            6. Owai ka inoa o ka Pikawai einu o Iehova ?
            7. Owai ke Kupakako a Satana, nana i kakau ka Buke o ka make ?
            Ina e hiki ia oe ke pan e mai ia mau ninau a kupono like i ko'u manao, alaila, e pane no au i kau. Aka, i pane ole mai oe, pela no au e pane ole aku ai i kau ohana hoku io ole, i mea e hoomaopopo lea ia ai kou hawawa, a me kou hemahema ma na ninau au i hoopuka ai. Iwaena o ka poe naauao maoli, aole loa lakou i hoopuka i na ninau ano like me keia, mai ka wa kahiko mai a hiki mai i keia manawa ; aka, oia mau ninau lapuwale kau i kapa'ku ai. " He mau hoku no ka Baibala."
            Eia hoi ma kau mau ninau i hoopukaia ma ka Helu 39 aku nei, ua akaka loa kou nele ninau ; a no ka nele, ua hoopuka ae oe i ua mau hoku maka powehiwehi la, i hoohilahilaia'e lakou e ka hoku o ke kakahiaka, " the morning star." O oe ka mea a kekahi poe i kapa'i, " he kanaka naaupo loa;" aka, ke hoike mai nei kau hana i kou hawawa, a me ka hemahema o kau hana. O Helekela kekahi kanaka naauao loa ; aka, aole keia i hoolilo ia ia i mea hawawa, ma ka hoopuka ana i na ninau ano like me keia.
            Nolaila, mai hoolilo ka mea naauao io maoli ia ia iho i mea hawawa ; ma ka hoopuka ana i na ninau ano like me ka Koha, i ikeia ma ka helu 39 aku nei. T. COVERS."
            —Eia iho no keia mau lalani pokole i kakauia mai ia makou e kekahi o ko makou mau makamaka e pili ana ia makou, a me na makamaka o makou, a ua lawe iki mai makou i kekahi o kana mau olelo e i ana:
            " He mea kupanaha maoli no hoi ka haalele ana o na Kuhina e ae i ka lakou Oihana, oiai hookahi wale no Kuhina i hoohalahala ia no ka ona, a me ka hemahema o kana Oihana. He makemake no ka paha lakou e hoomauia ka noho ana o ka mea ona mau ma ka Oihana ? Penei ka ke kanaka i oi aku ka naauao. " He mea henehene ka waina, he walaau nui hoi ka mea e ona'i; o na mea a pau i puni malaila, aole i naauao." A penei hou hoi: Aole na na'lii e Lemuela e, aole na na'lii e inu i ka waina, aole hoi na ka poe aialo e inu i ka mea ikaika. O inu lakou a hoopoina i ke Kanawai, a kapae i ka pono o ka poe pilikia. Ua pili loa keia olelo i na'lii, a me ka poe a pau ia lakou ka mana e hooponopono ai maluna o ka lehulehu. Aole no hoi he pono iki e kohoia kekahi mea ona i Lunakanawai. He pono ole no hoi ka haalele ana i ka Oihana i ekolu malama a oi ae, a holo aku e imi puu dala hou ai, a waiho wale kana Oihana iloko o ia manawa, a pilikia no hoi kekahi poe i ke kali ana ma na mea e pili ana i kana Oihana. He mea kupanaha no hoi, i na e ukuia ana kona uku makahiki a pau pono, me ka hoemi oleia o kekahi hapaha, e like me ka loihi o ka manawa ana i waiho wale ai i ka Oihana."
            —Ke i mai nei kekahi makamaka o makou o I kona inoa, ma na mea e pili ana i na kii penei:
            "Ke wahakou pinepine mai nei ka Pakipika no na kii e paiia nei ma ke Kuokoa, me ka olelo mai, he mea hoopiha pepa wale no. I kuu manao, ua oi aku ka pomaikai o kahi o ke Kuokoa i piha i ua mau kii la, mamua o kahi a ka Pakipika i piha i na olelo kue kii, a me kekahi mau olelo hoopaapaa ano ole. A ke ike nei no hoi au i ka poe lawe Kuokoa, ua piha loa i ka olioli, a ua lele maoli hoi ka hauli o ka poe lawe Pakipika i ko lakou ike ana mai, ua lai ke Kuokoa i na kii. He hana kamalii, wahi a ua Pakipika nei. He hana kamalii ka paha ka ka poe o na aina naauao e ao nei i ke kaha-kii, a e hoopiha nei i na nupepa a lakou i na kii maikai ? He hana kamalii no ka paha ka ua Pakipika nei e hookomo nei i na kii ma ka aoao o na Olelo Hoolaha ? E aho no ka noho malie, i na no ua nele ea, e noho malie no. Ke i mai nei oe, he mau kii kahiko no o ke pai ana ma na nupepa haole. He oiaio no paha ia ; aka, he mau kii hou no ia ia makou, no ka mea, a kahi no makou a ike."
            —Ke kamailio mai nei no hoi kekahi mea e pili ana i na olelo a ko makou hoa, a penei no nae kona wahi manao la :
            "Ke olelo mai nei no: Ua hoolaha no keia nupepa mamua, he mea pomaikai ole no ka rama, ke aeia ke puhi ana o ka rama ma keia Pae Aina. Pela paha; aka, o ka'u mea i ike nui ma ua nupepa'la, oia no ka akena nui i ka pono o ke puhi rama ke aeia, aia no ma ka Helu 46 kekahi olelo o ia ano, a ma na Helu mua aku no hoi."
            —Ke kakau mai nei kahi hoa o makou no kekahi mau mea e pili ana ia Beni, a eia iho no kana mau olelo :
            " Ke olelo mai nei o Beni, ua loaa ka ia ia na ninau a G. M. Koha ; a aia ka a waiho mai o G. M. Koha nana e hai, alaila oia hoike mai. Penei ka G. M. Koha ia Lipoa, E J. W. Lipoa, ke ninau aku nei au ia oe, e hai mai i na haina o keia mau ninau lae Keleawe, a i ole hoi ia oe, ia lakou la ae hoi. Aole anei i pili ia oe a me ka poe e ae ? Ua pili no, a no keaha hoi kou hoike ole mai, i na ua loaa ia oe ? A o no hoi e i ae, no ka loaa ole no hoi."
            —He olelo hoolaha kekahi i hiki mai nei na W. Kaul ulaau o Kau, aole nae i hiki pu mai me ke dala; nolaila, aole no e paiia. He manao hoakaka kekahi i hiki mai nei, na A. Kaualelehuna o Lahainaluna Maui, no na mea e pili ana i na mea i oleloia no G. W. Pilipo, a no ko makou manao ana, ua lawa kupono no na mea i paneia iho nei, nolaila, ua kapae makou, a ma keia hope aku paha e hoopuka'i.
            —Ke kakau mai nei o J. B. R. Kainanu, o Ohikilolo, Waianae, i kekahi manao ninau, no ke pai oleia o na Mare, Hanau, a me na Make, a penei no kana mau olelo :
            " E KA NUPEPA KUOKOA E ;—Aloha oe: Ua lana mai ko'u manao e wehewehe aku, no ko makou apana o Waianae nei, penei na olelo wehewehe, no ka hoopuka oleia mai o ko makou poe Mare, Hanau, Make, ma na nupepa, oia ke Kuokoa, a me ka Hoku Pakipika, no keaha la ka puka ole ana mai o keia mau mea, no ka hai oleia'ku paha e na luna? no ke pai oleia paha e na nupepa; nolaila, ke noi aku nei ka oukou kauwa me ka oluolu, e hai mai i ke kumu o keia hoopuka ole ana mai. He makemake makou e ike i ko makou poe hanau, mare, make, ma na nupepa elua, o ka hoopuka oleia mai hoi ka hewa. Nolaila, ka ulu ana mai o ko'u manao, a wehewehe aku imua o ka lehulehu, a me lakou la ae hoi, ina ua hewa au ma keia wehewehe ana, no ka hoopuka ole ana mai o keia mau mea ekolu. E kala mai no i ko'u hewa, oia iho la no kahi manao wehewehe, ua pau me ke aloha."
            Eia ko makou manao no keia mea maluna ae nei i ninauia mai nei ia makou , he makemake nui no makou e pai, a e hoolaha ae i ke akea i ka poe mare, hanau, a me ka poe make, a o na mea a pau o ia ano i hoounaia mai io makou nei, ua paiia no e makou ; no ka mea, o ko makou "hulu aa ia i ka hala o Mokuena."

NA MEA HO U O HAWAII NEI.

            POINA.—O kahi i ahaaina'i i haiia ma ka palapala a H. R. N., a me M. N. i paiia ma ka Helu 41, oia hoi ka pepa o kela pule iho nei, aia no ia ma Irish Creek, Kaliponia.

            Ua oluolu makou i ka lohe ana mai i ka nui ka o ka poe Hawaii nei e kanu nei i ko lakou mau loi i ka Laiki ma ka Apana o Koolaupoko, a maikai wale no hoi ina e huli like mai na makamaka a pau, a hapai like i keia hana maikai.

            KA NUPEPA K II HAWAII.—O ka poe a pau mai Hawaii a Niihau e makemake ana e lawe i na helu he 13 i koe o ka Nupepa Kuokoa, oia hoi mai ka la mua o Okatoba a hiki i ka pau ana o keia makahiki 1862. E loaa no ka pepa ia lakou ma ka uku ana i ka HAPALUA DALA ($0.50.) E wikiwiki mai.

            HUA PAI.—Ua makaukau ae nei o Mr. Thrum e hana i na hua pai Kaha Keleawe, i mea e hoailona ai i na Palule, a me na mea e ae no hoi e pili ana i ka aahu, a he emi loa no hoi ke kumukuai ; o ka poe e makemake ana ia mau mea e pono ke kakau mai ia W. P. R. Bila, ma ke keena o ka Nupepa Kuokoa.

            HULIHIA.—Oiai e hoi ana o Rev. P. J. Gulick, ma Kapunahou, ma ka Poaha o keia pule i hala ae nei, aia hoi puiwa ia hoi ka lio o ke kaa lio ona, a haule mai oia mai ke kaa mai a haki kona iwi a-i, a kahe mai ke koko ma ka ihu. Aka, aole no nae he nui loa kona pilikia, a e ola'na no.

            PAKELE MAHUNEHUNE.—Ma keia mau ahiahi aku nei la, oiai e hoi mai ana ke Komisina Beretania a me kona ohana maluna o kekahi kaa lio mai iuka mai o Nuuanu, aia hoi puiwa ia ka lio, lele liilii ka lehu o kapuahi, owala ka lio, a ua eha loa ; ua nahaha ke kaa, a ua eha ka mea nana e hoa'na ka lio. A aole kekahi o ka ke Komisina ohana e kau ana maluna i eha, nani ka pakele mahunehune.

            HO OKAHUNAIA.—Ma kekahi halawai ana a ka hui Misionari o Oahu nei, ua hookahunaia o Henry H. Parker (Hanale H. Pareka)a me Orramel H. Gulick (Oramela H. Kulika,) i mau kumu. E noho ana o Mi. Pareka, me E. W. Kalaka ma Kawaiahao, o Mi. Kulika hoi, ke manaoia nei e hoi ana e pani i kahi i hoohakahaka'a ma ka make ana o Mi. Shipman o Kau.

            KA HOOLEWA O PRINCE ALBERT O HAWAII. —Ua hele aku na'lii a me na poe alii koa, a me na poe hanohano e ae no hoi i kauohaia mai, e ike i ka waiho ana mai o ka mea aloha a Hawaii nei i make aku nei, ka Mea Kiekie ke Alii PRINCE ALBERT EDWARD KAUIKEAOULI LEIOPAPA A KAMEHAMEHA, ma Hale Alii. Ma ka hora 11 ka hoomaka ana o ka halawai; o Rev. E. W. Clark, a me ka Rev. Saml. C. Damon na kahuna, ua hanaia ka hoomana ana ma ke ano o ka hoomana o Beritania : Ma ka hora 6 oia la, ua hoomaka ke ki ana o ka pu ; a ua hoomau no hoi a hiki wale aku i ka pau ana o ka hoolewa, oia paha ka hapalua o ka hora 11.

            E makaukau ana ka mokumahu hou o Annie Laurie, e holoholo ma keia mau kai ma keia pule ae paha. Ua paa kona huila, o na ipuhao nae koe. Ua lohe mai makou e lilo ana o Kapena Henere ke alii moku ; e kokua nui ana no paha na poe aukai ia moku, i paa'i na waa mahu iwaena o kakou; a i kaukai oleia a ka makani wale no e holo mama'i. E holo ana oia e hoa o i ka Poakahi o kela pule aku.

            He palapala na kekahi o ko makou poe makamaka i kakau ponoi ia mai ia makou, a ua ike iho makou malaila, i ka holo o ka hana ma ka Mokupuni o Kauai; oia hoi, ua loaa na dala he kanaono ( $ 60.00,) i mea e kokua'i i ka kukulu hou ana i ka Hale Kula ma Lahainaluna. Oia mau dala i loaa mai ai, na ka poe no mai Lihue a Waimea. Ke hooikaika mai nei auanei na Apana e ae o kakou pela ?

Ka Halawai o ka Ahahui
O NA EKALE SIA MAOLI MA OAHU.

            Ua halawai hou keia Aha, maloko o ka Halepule ma Kaneohe, i ka la 2 o Sepatemaba nei.
            Ua hoomakaia ka hana me ka haiao, e Rev. L. Kamika, ma I Timoteo 3 : 1. "He olelo oiaio keia, ina makemake kekahi i ka ke Kahunapule oihana, he hana maikai kana i makemake ai."
            A pau ka haiao, ua kohoia o Rev. B. W. Pa reka i Lana Hoomalu ; a o Rev. M. Kuaea i Kakauolelo.
            Eia na Kahu a me na Luna ekalesia i hihi mai.
            No Kawaiahao; Rev. E. W. Kalaka, Ehu, M oo, Kawelohelii, Kanuku, Kiha.
            No Kaumakapili; Rev. L. Kamika, Solomona, Hu, Pohaku, Kaanaana, Kaululaau.
            No Ewa ; Kaeku, Kelama, Makanui.
            No Waianae ; Kaoliko, Kalama, Kalino, Poomahoe.
            No Waialua; Rev. J. S. Emesona, Hanaloa, Kukea, Koiniho, Kuia, Kauwalu.
            No Hauula : Rev. M. Kuaea, Holokahiki, Naumu, Kauluae, Nahinai, Napa hu.
            No Kaneohe ; Rev. B. W. Pareka , Pii, Maka, Kekeni, Kapu, Mahoe.

NA KOM ITE.

            Kohoia o Emeso na a me Pii i Komite e imi i na kumu manao no keia halawai.
            Kohoia o Parek a a me Kuaea, i Komite, no na halawai pule me na Kamaaina.
            Kohoia o Kalaka, Kaholokahiki, a me Solomona, i Komite e imi i mau kumu manao no kela halawai ma ka malama o Feberuari, 1863.
            Kohoia o E mesona, i Komite e palapala aloha aku i ka Ahahui Ekalesia ma Hawaii.
            Kohoia o Pareka, i Komite e palapala aloha aku i na Ahahui Ekale sia ma Maui.
            Kohoia o Kuaea, i Kom ite e palapala aloha aku i ka Ahahui Ekalesia ma Kauai.
            Kohoia o Kamika i Komite e palapala aloha aku i na Ekalesia ma Kaleponia.
            Noi mai o Kamika e lilo o J. H. Moku, a me H. H. Pareka, i mau hoa kuka pu me keia Aha. Ua aponoia.
            Eia ka hana mua a ke Komite i haawi mai ai.
            1. E heluheluia ka moolelo o na halawai ma Kaumakapili, Feb., 1862. A ua heluheluia no.
            2. E hoike mai na kahu ekalesia i ke ano o ko lakou mau kihapai, mai Feberuari mai a hiki i keia manawa. A ua hoike mai no.
            Hoomaha, a halawai hou.
            Kapaeia na kumu manao, a heluheluia na palapala hoopii, na G. P. Judd, a me kekahi mau hoahanau o Waikane, e noi ana e hoonoho ia J. H. Moku i Kahunapule ma Waikane.
            Noonoo nuiia, a hooholoia, "E waihoia keia mau palapala hoopii ma ka lima o Rev. B. W. Pareka, a nana e kuka pu me na hoahanau o Waikane."
            Hoopaneeia ka hana apopo, ho ra 9. Pule a pau, hoi aku la. Sepatemaba 3. Halawai hou keia Aha ma ka hora 9. A pau ka pule, heluheluia ka moolelo o ka la inehinei. Ua aponoia.
            Heluhelu mai o Kalaka i kona haawina ; " Ka lilo loa ana o na Kahunapule i ka lakou oihana." Ua aponoia.
            Heluhelu mai o Kamika i kona haawina ; " Na hana maoli, a me na kuai ana i kupono i ka la Sabati." Ua aponoia.
            Heluhelu mai o Emesona i kona haawina ; " Na hana mamua, a mahope o ka halawai o na Sabati." Ua aponoia.
            Heluhelu mai o Pareka i kona haawina ; " Na kumu o ka ilihune o na ekalesia ma Hawaii nei." Ua aponoia.
            Hoomaha a halawai hou.
            Heluhelu mai o Pii i kona haawina ; " He pono anei ke kapae i kekahi hoahanau i ka ahaaina, ke hookuli oia i ka manao ae like o kona ekalesia ?"
            Heluhelu mai ke Kakauolelo i ko S. Kahoohalahala haawina ; " No ke Kanawai mare, a me ka mare ana o ka hoahanau me ka hoomaloka. Ua aponoia.
            Heluhelu mai ke Kakauolelo i ko Pualewa haawina ; " He pono anei e kukuluia ka halawai no na ekalesia a pau ma Hawaii nei ?"
            Ua hoaponoia, ke ae like mai ko Hawaii, Maui, a me Kauai mau Ahahui, ma ka palapala launa aloha a ke komite e palapala aku ai.
            Heluhelu mai o Kalama i kona haawina ; " No ka haipule io." Aponoia.
            Hoopaneeia ka hana, apopo ho ra 9. Pule a pau; a hoi aku la.

SEPATEMABA 4.

                Halawai hou i ka ho ra 9. A pau ka hapa hora haipule; heluheluia ka moolelo o ka la inehinei, a ua aponoia.
            Heluhelu mai o Kaoliko i wahi iwi haiao ; Ioane 3:7. " E pau oukou i ka hanau hou e pono ai." Aponoia.
            Heluhelu mai o Kawelohealii i ko Naone haawina; " Ka rula pono no ka manawalea ana i ka poe ilihune." Ua aponoia.
            No ka hiki ole mai o Koha, a me kana palapala no kona haawina; " Pehea la e ola'i na Kahuna pule ?"
            Ua lawe keia Aha, a kuka nui ma ia mea ; a ua waihoia i kumu manao no ka halawai hou aku.
            Hapaiia ka noonoo ana no ka Nupepa— " Hoku Loa." Ua hooholoia, e hookomoia keia manao maloko o ka palapala aloha, i na Aha Kahunapule o na mokupuni e ae.
            He mau kumu manao no ka halawai o Feberua ri, 1863.
            1. He haiao o ka hoomaka ana. Pa reka.
            2. Pehea la e naauao ai, a e pono ai ka noho ana o na kaikamahine o Hawaii nei. Gulika.
            3. Heaha ka mea e emi ai na kanaka o Hawaii nei ? Bihopa.
            4. E pono anei ke kapaeia ka hoahanau, ke kokua ole i ke aupuni o Kristo ? Kamika.
            5. Heaha ka mea e pau ai ke kaawale pinepine ana o na mea mare ? Pareka.
            6. E pono anei e hoololiia na Kula Hawaii, e lilo lakou a pau i kula e ao aku i ka olelo Beritania ? Kalaka.
            7. Pehea la e lilo ai na ekalesia o Kristo i malamalama io ? Kuaea.
            8. Ka pule i ke Akua, heaha la ka pule pono ? H. H. Pareka.
            6. Ka manawalea ka pono, a me na rula kupono ia hana. Emesona.
            10. Pehea la e hiki ai i ke kanaka ke malama i ko na ohana ? S. Kahoohalahala.
            11. Ka pono o na ku la Baibala. Kaoliko.
            12. Heaha ka pono a me ka pilikia no ke ku ole mai o na moku Okohola ?Kawaiahao.
            13. O ke kanu Raiki, e kupono anei keia hana i ko Hawaii nei ? Kaneohe.
            14. "I na la eono e hana'i oe i kau mau hana a pau." Waialua.
            l5. Pehea la e pau ai ka ilihune o na eka lesia ma Hawaii nei. Waianae.
            16. Pehea la e ola'i na Kahunapule ? Ewa.
            17. Heaha ka pono a me ka hewa o na mele kahiko o Hawaii nei ? Hauula.
            18. He pono anei ke haawiia ka hanai kumu i k a la Sabati ? Kaumakapili.
            19. Ka iwi haiao. Na Kahunapule Hawaii.
            Ma ke noi o L. Kamika, ua hooholoia ka manao, e pai i ka moolelo o keia Aha ma ka Nupepa Kuokoa.
            No ka pau o ka hana, ua lilo ka hapalua o ka hora i ka olelo paipai a me ka haipule.
            Nolaila, ua hoopaneeia keia Aha, e halawai hou ma Kawaiahao, i ka la 3 o Feberuari, M. H. 1863.
M. KUAEA. Kakauolelo.

Na Palapala.

Ka po haku e polea ai ka auwae
            O J. P. KELIIKANAKAOLE.

E ka Nupepa Kuokoa e ; Aloha oe :
            Ia J. P. Keliikanakaole.—Ua loaa mai ia'u ka Helu 37, o ka la 9 iho nei o Augate. A ma ia Helu, ua ike a'u i na manao pane a J. P. Keliikanakaole, i kuu heluhelu ana i kona mau manao, a me kuu hoomaopopo pu ana iho no hoi, a eia ka mea i maopopo ia'u ma ia mau mea ; ua ku kela i keia mau hua olelo, Kupanaha oukou e ka Lahainaluna ka hoakamai, hoio, hoomikioi me he naauao la! Ua hoopono mai no kela i kuu pane ana ia Beni, Keliikuoe, eia ka hewa o kuu huipu ana ia lakou a pau. I ko'u manao ua pono ia a me ka pololei no hoi, penei ka mea i pololei ai; i na makahiki i hala iho nei hele mai la ka poe Lahainaluna e paio me Pomaikai ma ka halepule ma Roma, ua nui ka poe Lahainaluna i hele mai ma ke ano hoakamai, hooio, hoomikioi kahi waha imua o Pomaikai; aka, aole nae he mea puka o lakou ma ia paio ana, o Pomaikai wale no ka mea puka ma ia mea. Eia ka ninau ia oe. Heaha la kela poe, he poe kuihao anei ? He poe maauauwa anei no Koolaupoko ? He poe kahu bipi anei ? He poe Pake kuai mea ono anei no ke Kaona o Honolulu ? Aole e ke hoa, he poe Lahainaluna no, a he poe e ae paha i hao a paihi launa ole, e hoohehelo ana mamua ae o ka paio ana, mai hoole mai oe o loaa auanei oe i keia mau hua mele penei : A-ha-ha ku aku la paha oe i ka pana oi; E! hene, ke hene mai lapahai ke kai o Kapuukolo e ; ke apo mai la paha i ka lau o ke ahuawa la ; ke ha-ha poele mai nei i ka papai o Honolulu. Ke olelo mai nei oe penei: " I ko'u manao ana, ina ma ka olelo Hawaii ka Ahuimanu boy (keiki,) me ka Lahainaluna boy e hoopaapaa'i, aole no paha i akaka." Ka! aole ka paha oe i ike a heluhelu iho i kela mau ninau waha Liona i hoopukaia'i ma ka Helu 36, a me na ninau noi na keia mau huaolelo nui i kakauia ma ke poo; Ka Owili pauda e pau ai o Keawaula i ke ahi. Ina aole oe i ike a heluhelu iho hoi i kela Helu, he mea kupanaha maoli ia, loaa ka hoi ia makou i ka poe kuaaina loa nei, a ia oe ka hoi aole loaa o kela Helu. Ma ka olelo Hawaii no nae ko'u ninau ana'ku ia mau ninau e waiho nei ma ua Helu la. Ina ua makau oe i kela mau ninau i ninauia'ku ia oukou ma ka olelo Latina, e waiho no ia a mahope hai mai oe. Ke ninau mai nei oe penei: O oe no anei ke pookela o na kanaka Hawaii ? O oe no anei ka Loio pookela o ka Lahui Hawaii? A ua hai mai nei oe, o J. W. H. Kauwahi ka Lahainaluna, ka Loio pookela o ka Lahui Hawaii. Eia ka ninau a oe, ia Kauwahi wale no anei e kii aku ai na kanaka hihia ma na Kanawai, i o Loio no lakou imua o na Lunakanawai mai Hawaii a Niihau ? Ke kauoha aku nei au ia oe, e hele ae imua o Ami, i wehewehe mai kela ia oe i ka olelo pololei, o pane hupo mai auanei oe e like me keia. Ua waiho mai oe i kau mau ninau ano ole ma ke akea, he ano naaupo loa kau pane ana. Eia ke waiho aku nei au imua ou i na Rula o ka poe naauao, mai ninau mai oe ia'u, me kou hai ole mai i kuu ninau i ninauia'ku ia oukou. Eia hou ke ninau aku nei au ia oe, ua loaa anei ia oe kela mau ninau ma ua Helu la ? ina aole i loaa, mai ninau hou mai me ka hoomaopopo ole mamua, e i mai paha auanei oe, aole hoi he loaa ana iho o kuu wahi ninau ia oe. Mai pane mai pela, o kapa koke aku auanei au ia oe, aole oe he Lahainaluna, he naaupo maoli. Ua ike iho la no i na ninau i haiia ae la maluna.
R. P. HEEIA.
Koloa Hikina, Kauai, Aug. 14, 1862.