Ka Nupepa Kuokoa, Volume I, Number 37, 9 August 1862 — Page 4

Page PDF (1.71 MB)

Ka Nupepa Kuokoa.

(Unuhiia no keKuokoa.)
HE KAAO
NO KA POE ILIHUNE E NOHO ANA MA NU IOKA.
HELU 12.

            MA IA HOPE IHO, IHO AKU LA keia , a kahakai, i nana pono aku ka hana o ia nei i ke maopopo loa aku la keia i na pua oluna o ua wahi moku aniani nei, maikai launa ole, o ko ia nei kii aku la no ia a ako iho la i ka pua e ku ana iwaena o na pua e ae a pau e ku poai mai ana i ua wahi pua nei, i loa no a haki ua wahi pua nei, o ka holo aku la no ia o ua wahi moku aniani nei, a o ka Eiki Peki hana hoi, o ka hoomau no i ka hahai i ua wahi manu nei, o ka hahai no ia i ua manu nei a hiki i ka muliwai, o ka nalowale loa iho la no ia o ua manu nei, huli iho la o Eiki Peki, aole nae he loaa, o ko ia nei hoi no ia i ka hale. A o ua wahi manu nei hoi, lele e aku la no keia a hiki i ka hale o laua nei, ike aku la ua wahi manu nei i ka pahi a Eiki Peki, o ka lawe aku la no ia a hiki i ka hale kuke, hou iho la ua wahi manu nei i ka pahi a Eiki Peki iloko o ke ahi, ia manawa no, pii mai la ka eleele o ua pahi nei, pii no hoi ko Eiki Peki elele, a hiki i ke kumu o ka pahi ka eleele, o ka make koke iho la no ia o Eiki Peki, aole nae e hiki aku i ka hale, make e.
            E nana kakou i ke kii ana mai o ke aikane e hoola ia Eiki Peki, i ka noho ana o ke aikane e like me ke kauoha a Eiki Peki, nana iho la keia i na Eiki elua, ike iho la keia, ua hele ka Eiki Peki a hui me ka Eiki Daimana, manao keia ua make ke aikane, o ko ia nei kii aku la no ia a ka Noholele, a o ka lele no ia o ia nei, aole nae keia i hai aku i na hoa hele ona, (oia hoi na keiki kuaaina,) o ka lele no ia o ua aikane nei a hiki i ke Aupuni o Eiki Peki ma i noho ai, ike ke-ia i ka Hale Alii, iho iho la keia i ka honua, hele aku la keia a hiki i ka Hale Alii, aole nae ke aikane, o ko ia nei huli no ia a loaa ka pahi iloko o ka hale kuke, ike keia i ka hulali o ke kumu o ka pahi iloko o ka ke ahi, o ko ia nei kii no ia a lawe mai, huli keia a loaa ke aikane e waiho ana ua make, anai iho la keia a puu ka eleele o ka pahi, mai ke kumu a ka welau, i loa no a pau ka eleele o ka pahi, o ke ola hou no ia o ua o Eiki Peki, pane ae la o Eiki Peki i ke aikane, " Lealea hoi ka hiamoe ana o keia mau la." Olelo aku la ke aikane, " Aole paha kou he hia-. moe, he make hoi paha kou, i noho mai nei hoi au me ka malama i ko kauoha, a i ko'u nana hope loa ana ; ike iho la au, ua hele ka Eiki Peki a hui pu me ka Eiki Daimana, a manao iho la au ua make io oe, a o ko'u kuleana ia o ka hele ana mai nei, a ua pomaikai hoi au no kou loaa ana." Hoi aku aku la laua nei a ka hale, aole ua kaikamahine Lauoho Gula nei.
            E nana kakou i ka holo ana o ua kaika-mahine Lauoho Gula nei, ma kahi moku aniani, a hiki i ke Aupuni o ka makuakane, oia hoi o Kini Gula, laweia'ku la keia a ka Hale Alii, nui loa ka olioli o na makua, a lohe na'lii aupuni a pau a me na makaainana, ua loaa hou mai ua kaikamahine nei i nalowale ai, nui no hoi ko lakou olioli a me ka hauoli, no ka noho hou ana ma kona wa-hi i noho mua ai me ka hanohano nui, a me ka mahaloia no kana mau hana maikai he nui wale. Ia la no, he la nui ia, paa na pu-ka o na hale paahana, kani na pu aloha, kaiahuakai na kanaka i ke alanui, uwa ae la ka pihe a haalele wale, pela na mea a pau i olioli ai a pau keia la.
            E nana kakou i ka huli ana o Eiki Peki me Pama, i ke kaikamahine Lauoho Gula. Komo ae la laua nei iloko o ka Noholele, o ko laua nei lele aku la no ia a hiki i ke Au-puni o Kini Gula, hele aku la laua nei a ke kulanakauhale, uwa ka pihe no ke kanaka maikai o ia nei, ia manawa, pihoihoi ka ma-nao o ua kaikamahine Lauoho Gula nei, o ko laua nei hele aku la no ia a waenakonu o ke alanui, ike e mai la no ua kaikamahine Lauoho Gula nei, o ka holo mai la no ia a halawai me Eiki Peki, ike mai la na kanaka me na'lii, olelo ae la lakou, " O ke kane no ka paha ia." Ninau aku la o Eiki Peki, " Auhea ke Alii ? " Olelo mai la ke kaika-mahine Lauoho Gula, " Aia uo i ka hale kahi i noho ai." Olelo hou aku la o Eiki Peki, " Auhea ka luahine kupua ?" Pane hou mai la no ua kaikamahine Lauoho Gu-la nei, " Aia no paha i kona wahi kahi i no-ho ai." Kiiia'ku la ua wahine kupua nei, a laweia mai la imua o Eiki Peki, pepehiia a make loa ua wahine kupua nei. Hoi pu aku la lakou nei a hiki i ka Hale Alii, ia hiki ana o lakou nei, kani na pu aloha o ka aina, no ka hoi ana mai Eiki Peki, a me ka lilo ana o ua kaikamahine Lauoho Gula nei i wahine ua Eiki Peki, lilo pu no hoi me na Aupuni ehiku.
            Ma ia hope iho, hoomakaukauia kekahi ahaaina mare no laua nei, a pau ka ma re ana, ma ia hope mai, mahele ae la keia i kekahi mau Aupuni a haawi aku la no na keiki kuaaina kekahi mau Aupuni, elua laua, a elua no hoi mau Aupuni, noho hou iho la lakou nei a loaa na wahine a ua mau keiki kuaaina nei, a hoomakaukau hou iho la o Eiki Peki me ke aikane ana e hele i ka huli Aupuni hou, kauoha aku la o Pama, i kana mau aikane, e noho olua ianei, e hele maua i ka imi Aupuni hou ; no ka mea, ua loaa iho la no ko olua mau Aupuni, ina olua i manao e hoi, oia iho la no. Noho iho la lakou nei a hapai ka wahine a Eiki Peki, a kauoha iho la keia i ka wahine. " I noho oe a hanau mai he keiki kane, e kapa oe i ka inoa o Eiki Haka, a i hanau mai he kaikamahine, e kapa oe ma kou aoao." E hele maua i ka imi Aupuni a hoi mai, hoomakaukau laua nei e hele. Komo ae la laua nei iloko o ka Noholele, a lele aku la iloko o ka lewa, uwa ae la ka pihe o ke kulanakauhale, no ka hele ana o ke kane a ke kaikamahine Lauoho Gula.
            Lele aku la laua nei a hala kekaki makahiki, hiki laua nei i ke Aupuni o ke kaikamahine Lauoho Daimana, i ka hiki ana o laua nei i ke Aupuni akahi, ike iho la laua nei aohe he kanaka, ninau ae la keia i na kupuna ona, " Auhea ke kanaka o keia Aupuni ?" Pane mai la na kupuna, "Aohe he kanaka, ua pau i ka lukuia e ka Pilikua." Pela no i ka lua o ke Aupuni, aohe no he kanaka, ua pau no i ka lukuia e ka Pilikua, a hiki laua nei i ke kolu o ke Aupuni, aohe no he kanaka, a hiki laua nei i ke Aupuni eha, a me ka lima, aohe no kanaka, ua pau loa no i ka lukuia e ka Pilikua, a hiki laua nei i ke ono o ke Aupuni, ike laua nei i ke kaikamahine Lauoho Daimana, e noho ana no me na kaikaina ona, a me na kahu no hoi, o ko lakou wahi nae i noho ai, he puu kiekie loa, ua hanaia a pahee ma na aoao a puni o ua puu nei, aole e hiki i na kanaka ke pii maluna o ua puu nei; no ka mea, ua oi loa aku kona kiekie, maluna pono iho o ua puu nei, he aina papu palahalaha maikai, a e ku ana no hoi na hale noho o ka Pilikua, a ma ko laua nei nana ana, he Aupuni maikai no; eia nae ka hewa, o ka makaainana ole nana e mahiai, a e hanai holoholona, maluna o keia mau Aupuni a pau.
            O ko lakou nei lele aku la no ia iloko o ka Noholele, a kiekie loa iluna o ua puu nei, a mai luna iho ko lakou hoi ana iho a ku ana i ka honua maluna o ua puu nei, hele aku la laua nei a hiki i ka hale o ka Pilikua, ua hele nae ua poe Pilikua nei i ka lakou wahi i hele ai, hookokoke loa aku laua nei i ka hale, ike mai la ua kaikamahine Lauoho Daimana nei, he mau keiki kanaka maikai keia e hele mai nei, o ko laua nei hele aku la no ia a halawai me ua kaikamahine Alii Lauoho Daimana, aloha mai la ua kaikamahine Lauoho Daimana nei, aloha aku la no hoi laua nei, olelo hou mai la ua kaikamahine Lauoho Daimana nei, " He huakai hele aha ke kumu o ko olua hiki ana mai nei ianei ? " Pane aku la no o Eiki Peki, " He huakai hele imi Aupuni ke kumu o ko maua hiki ana ianei." Olelo hou mai no ua kaikamahine Lauoho Daimana nei, " Minamina wale ko olua mau kino kanaka maikai i ka make i na kane Pilikua a maua ; no ka mea, ua lukuia iho nei o'u mau makua, a me na makaainana a pau loa, koe no maua, a me keia mau wahine, i kahu nana e hooponopono i na mea o ka hale nei." Ninau aku la o Eiki Peki, " A ka manawa hea hoi mai ko kane Pilikua ? " Pane mai la ua kaikamahine Lauoho Daimana nei, " A hiki i ka hora akahi, mahope iho o ka aina awakea, oia ko lakou manawa e hoi mai ai." A ua maikai no ia mau olelo a pau imua o ko Eiki Peki mau maka.
            Kakali iho lakou nei o ke kokoke aku i ka manawa e hoi mai ai ua poe Pilikua nei, a ninau maopopo aku la keia i ua kaikamahine Lauoho Daimana nei, i ke ano o ka manawa e hiki mai ai i ka hale nei, hai maopopo mai la ua kaikamahine Lauoho Daimana nei, penei ke ano o ka hiki ana mai, " Na ka makani a haalele wale, nu hou a haalele wa-le, oia ko lakou manawa e ku ai ma ka puka o ka hale." A no ko laua nei manao ana, ua hai maopopo mai ua kaikamahine Lauoho Daimana nei, noho iho la laua nei me ka makaala, olelo hou mai no ua kaikamahine Lauoho Daimana nei, " Minamina ino olua ke make." Pane aku la o Eiki Peki, " Aia no hoi paha i ka hana ana, he alo no he alo; alaila, ikea na mea ikaika." Olelo hou mai no ua kaikamahine Lauoho Daimana nei, " Aole paha olua e pakele ana; no ka mea, o keia ululaau a pau loa e ku mai nei, he mea ole wale no ia, a o ko olua kino ka hoi ka mea aloha, ke make." I ka pau ana o keia mau olelo a ua kaimahine Lauoho Daimana nei, ike iho la laua nei, ua kokoke loa mai ka manawa e hoi mai ai ua poe kane Pilikua nei a ua kaikamahine Lauoho Daimana nei. (Aole i pau.)


            Kanikau aloha no H. Keowai.

He u he aloha keia nou e H. Keowai,
Kuu kane mai ka ua kukalahale o Makahi-kilua,
Mai ka ua apuakea o Mololani,
Ola kaua i ka makani pakaiaulu o ka aina,
Kuu kane mai ka ua koko ula i ka moana,
Kuu hoapili mai ka ua poaihala o Kahaluu,
Luuluu au la e noho nei i ko aloha,
Kuu kane mai ka paia ala i ka hala o Kekele,
Mai ka la kahiko a maikai,
Mai ka pihana kanaka o Mokapu,
A me ke koa mokumoku o Heeia,
A me ke kawelu holu o Lanihuli;
Huli au nana o kuu mea aloha he kane,
Hele aku la oe i ke ala hoi ole mai,
Ike aku la oe i na hoku paa o ka lewa.
Noho iho nei au me ka minamina,
E uwe ae ana i ke hoa o ke anu.
Kuu kane mai ke kula wela o Panioi,
Ka pua rose nani a'u e u nei.
Kuu kane mai ka piina loa o Pohakuloa,
Mai ka la ikiiki o ka makalii,
Kuu kane mai ka po loloa o ka hooilo.
Mai ka po anuanu i ke kehau.
Kuu kane mai ka po kapa ole e moe ai,
Hookahi no kapa o ka poli o ke kane me ka wahine,
He u he aloha ia oe—la—e.

REBEKA KEKULU.

Aloha kuu kaikuaana mai ka wai hu mai i na pali,
Kuu hoa i ke kula o Pahele,
Ua heleia e kaua ia wahi i ke kau a kau,
Kuu kaikuaana mai ke one hauli o Heeiakea,
Mai ke one paapaaina i ka wawae o ka lio,
Kuu kaikuaana mai ke kai o Maluaka,
A me ke one o Mahinahina,
Ake aku kaua e inu i ka wai o Puulu,
Kuu kaikuaana mai ka wai auau o Paukawa,
Pae aku kaua o ka Lanimua,
Iho aku kaua o ka wai o Kilioe,
E waha mai ana maluna o Kaikolu,
Me he opua'la i ka lai o Molii,
A me ka wai ike oleia o Pohukaina.
Kuu hoapili i ka pohu o Kualoa,
Hoomaha aku kaua i ka lae o Kaoio,
Kuu kaikuaana i ke kula laula o Kaaawa,
Hele aku kaua o na iliili nehe o Makaua,
Hoomaha aku kaua i ka luna o Puuomahia,
I ka ahiu makani o Kahana,
Kuu kaikuaana mai ka aina makamaka ole,
Hookahi no makamaka o ke aikane,
Kuu kaikuaana mai ka ia a ke dala,
Mai ka hana luhi o ke kino,
Kuu kaikuaana aloha—e.

H. PALAPU.

He u he aloha keia ia oe e H. Keowai,
Kuu keiki i hele aku nei i ka polikua a Kane,
I hele aku la i ke ala ula a Kanaloa,
I ai na'ku wewela ka wawae,
Hoomaha aku kaua i ka olu o ka hale,
Kuu aku ka luhi i ka wai o Puuiki.
E aloha ae ana au i kahi a kaua e noho ai,
Kuu hoa hoomanawanui o kahi mehameha,
Hoolaukanaka i ka leo o ka ilio,
Auwe! kuu mea aloha he keiki—e.

ZAKALIA KAIA.

Kuu keiki mai ke kula o Kapunahala,
Mai ka la pa pono mai ma ka umauma,
Mai ka hale anu o ka hooilo,
Mai ka ua liilii noe mai i ka lau o ke kukui,
E hahi ana i ka lau o ka amau,
Kuu keiki mai ke kula o Luluku,
Mai ka wailele o Hiilaniwai.
Ke paio ae la me Mamalahoa,
Kuu keiki mai ka malu o ka ohia o Makaalamihi,
Mai ka ai pala mai iluna o ka laau,
Mai ka ua hahi mai iluna o ka hala o Keapuka,
Mapuna wale mai ana no kou aloha ia'u,
Me he makani la ke aloha ke hiki mai,
Kuu keiki mai ka piina anu o Hapuu,
Huli au nana o ka huakai hele o Puna.

M. WAIKANE,
& L. MAAU.

He kanikau keia nou e H. Keowai,
Aloha ino no kuu keiki o ka la wela,
Hoomaha i ka olu o ka lehua,
Hala oe me ke aloha,
Noho makou me ke kaumaha,
Auwe ! auwe ! kuu keiki.
Kuu keiki i ka ua kiawe ula i na pali,
Ke halii mai la ia i ke pili,
Kuu keiki i ke ahe a ka makani he moae,
Kuu keiki, kuu keiki aloha—e.

Mrs. KAMALA.

He kanikau keia nou e H. Keowai,
Kuu kane aloha i hele aku nei,
Hele oe la nalo na maka ;
Kuu hoa i ke kai o Mokuleia,
A po Kaena i ke ehu o ke kai,
Inu aku kaua i ka wai o Kawaihapai,
Pae aku kaua i ke kula o Mokuleia,
Noho kaua i ka pohu o Waialua.

Mrs. TASALINA.

He u he aloha no H. Keowai,
Kuu keiki o ka la o Kaneohe,
A me ka ua nihi pali o Kekele,
A me ka hau anu o Kaala.
Ka pua ala o ke Kamakahala,
Ke nee ae la ka ua mauka o Maunahuila,
La aloha keia nou i hiki mai.

Mrs. KAHULA.

Kanikau aloha ia oe e H. Keowai,
Kuu kane mai ke kula loa o Keaahala,
Mai ke kahawai lehulehu na alu kapekepeke,
Kuu kane mai ka leo o ke kahuli leo lea,
I ke kani haanoke mai iluna o ka laau,
Hoolaau ka manu eena i ke kula,
Kunana wale ana au i ko aloha,
Lele mai ana ko aloha maluna mai o Ahuimanu,
Manuahi ke aloha no ka ekeu.

Mrs. KANAKOLU.

He u he aloha no H. Keowai,
Kuu hoahele o ke kula wela i ka la,
Hele aku kaua o ke kula loa o Alele,
Lele mai ana ka hauli me ka halia ;
Kuu hoa o ke kula o Mahinui,
Hookahi no a'u hana o ka u i ko aloha,
Aloha kahi a kaua e noha ai,
Aloha kahi wai o Puiwa,
Puiwa au a hikilele i ko aloha.
Aloha kahi a kaua e noho ai i ke kuluaumoe,
Kuu hoa o kahi ia uuku hoonui i ke kai,
Kuu hoa o ka la wela o Honolulu,
Aloha ka hala o Kekele,
Oia nahele a kaua e hele ai.
Kuu hoahele o ka pali o Nuuanu,
Kuu hoa o ka makani he malua.
I hele pu mai hoi me ke anu.
Ke pai mai la e ka makani he Kona.
O kou aloha ka'u e kanikau nei,
Kuu hoapili o na makani eha,
I pai puia mai e ka Moae.
KOKO. Kaneohe, Koolaupoko, Oahu Iulai 23, 1862.

Moolelo Hawaii.

                O ka moolelo Hawaii keia i kakauia ma Lahainaluna, i ka M. H. 1842; aole i nui ka poe i loaa keia Buke, o ka poe wale no i komo iloko oia kula, a ua pau paha i ka nahaehae, a lilo i mea ole, o ka poe wale no i malama pono loa i ua Buke nei, oia paha ka poe i ike iki, uuku wale no ka poe ike a koe ka hapanui e noho mai nei. Nolaila, ke kope nei au i ua moolelo la, a hooili liilii aku au ma ka Nupepa Kuokoa, i maopopo like ia kakou ke ano o ka noho ana o keia Lahui mamua a hiki i keia manawa.
            No Kapena Kuke: Ma Waimea, i Kauai, ke ku mua ana mai o Lono. Ma ka mala-ma o Ianuari, M. H. 1778; O Kaneoneolaua o Keawe na'lii o Kauai ia wa. Ku mai oia ma Waimea i ka po, a ao ae ; ike aku la na kanaka o uka e ku mai ana keia mea kamahao, kahaha aku la lakou me ka u-wa nui.
            I ae la kekahi i kekahi; " Heaha la keia mea nui manamana?" I mai la kekahi, "He ululaau, ua nee ae la iloko o ke kai." Nui loa iho la ka pioloke ana.
            Alaila, kena ae la na'lii i kekahi mau ka-naka e holo e nana, i ike pono i kela mea kamahao. Holo aku la lakou a pili i ka moku, ike aku la lakou i ka hao e pili ana mawaho o ka moku, olioli iho la lakou no ka nui o ka hao.
            No ka mea, ua ikea muaia ka hao no na laau hao i pae mua mai, a ua uuku ia, ua nui loa'ku keia. A pii aku la lakou iluna o ka moku, a ike aku la lakou i kanaka, ua keokeo ka lae, ua alohilohi na maka, ua alualu ke kapa, ua kihikihi ke poo, ua namu ka olelo. Alaila, manao iho la lakou he wahine wale no kanaka, no ka like pu me ke poo o ka wahine o ia manawa ; ike iho la lakou ua nui ka hao maluna, makahehi iho la lakou i ka hao.
            Hoi aku la lakou a hai i na'lii i na mea a lakou i ike ai, a me ka nui loa o ka hao.
            Lohe iho la kekahi koa a ke Alii, i ae la ia ;
            "E kii au e hao i kela waiwai, no ka mea, o ko'u aina no ia o ka hao wale aku no ? " Ae mai la na'lii ia ia. Alaila, holo aku la ua koa nei a pii iluna o ka moku, lawe ae la ia i ka hao oluna, kiia mai la oia i ka pu, a make iho la ua koa nei, o Kapupuu kona inoa.
            Auhee mai la ka auwaa, a hai mai la i na'lii na make o Kapupuu i ka waiki. Ia po iho, ki mai la na pu, a lele ke ahi iluna ; manao ae la lakou he akua, kapa'ku la lakou i kona inoa o Lonomakua, manao iho la na kanaka e kaua. I mai kekahi Aliiwahine o Kamakahelei kona inoa, ( o ko Kaumoalii makuahine ia.) "Aole pono e kaua aku i ko kakou akua, e hooluolu aku ka pono i oluolu mai ke akua."
            Alaila, haawi aku la o Kamakahelei i ka-na kaikamahine ia Lelemahoalani, i wahine na Lono. Launa iho la o Lono me ua wa-hine ia, moe iho la no hoi na haole me na wahine o Kauai, ma ka hookamakama i ka hao. Mahope iho, pau iho la na wahine o Kauai i ka pala. A laha loa ae la keia mai ino ma Hawaii nei. Oia ka luapa-u o keia Pae Aina ? O ka hewa a me ka make kai hoolaha muaia mai ma Hawaii nei. Hila-hila ino ka poe nana i hoolaha mua mai. Holo aku o Lono mai Kauai aku a i ka aoao Komohana Akau o Amerika. A hala kekahi mau malama, hoi hou mai oia a ku ma ka aoao akau o Maui Hikina. I ka la 20 o Novemaba, M. H. 1788, oia makahiki no a na i ku ai ma Waimea Kauai. I ke ku ana mai o Lono i Maui, ua holo mai o Kalanio-puu, mai Hawai mai a Maui e kaua me Ka-hekili. Ua lilo no ka aoao Hikina o Maui ia Kalaniopuu, ma Hamakualoa, a hoi mai o Kalaniopuu mai ke kaua mai, a noho iho la ma Wailuaiki, i Koolau. Moe iho la lakou ia po, a ala ae la i kaka-hiaka nui o ua po la, alaila, ike aku la lakou ia Lono e ku kokoke mai ana makai o lakou. O Haaluea ka inoa o ia wahi moana, aia no ia wahi ma Wailua i Koolau. Ike aku la lakou i ke ano o ka moku, a me na mea ma-luna o ke kia, a me na puka e hamama mai ana ma ka aoao o ka moku. Kahaha'ku la na kanaka mauka, i ae la kekahi i kekahi. " Aia no ka poka o ka waiki a kakou i lohe ai, he mea kani."
            No ka mea, ua lohe muaia ka waiki, he mea kani, no ka mea, ua holo mua mai ko Kauai poe kanaka i Oahu, a olelo mai lakou i ko Oahu poe kanaka, i na wa a pau a la-kou i ike ai no Lono. A lohe kekahi kanaka o Hawaii e noho ana ma Oahu i ka lakou olelo ana i ua mea o Lono, o Moho ka inoa o ua kanaka la, oia kai holo mai Oahu mai, a loaa o Kalaniopuu ma Hana, Maui. Hai aku la ia i na mea a pau ana i lohe ai no Lono. Ninau aku la ko Hawaii poe i ke ano o ka moku. Hai mai ia ia i ke kia, a me ka pea, a me ka hae. Ninau hou aku la ko Hawaii poe i ke ano o kanaka, hai mai la ia. He kanaka keo-keo, he ili alualu, he poo-kihikihi, he akua lakou, he pele, no ka mea, ua a mai ke ahi ma ka waha, he puka waiwai ma ko lakou aoao, ua puka loa no iloko o ke kino. A ma ua puka la e nao iho ai ko lakou lima, a unuhi ae i ka hanaoi, a me ke kanikani, a me ka hao, a me ka lei, a me ka lole, a me ke kui, a me na mea e ae a pau. Na keia kanaka i hoakaka e mamua i ke ano o ka haole, a me ke ku ana mai o Lono. A ike aku la no lakou i ka moku, a me na mea a pau o ka moku, ua like io no me ko lakou lohe mua ana mai i ua kanaka la.
            Alaila, holo aku la o Kamehameha a pii iluna o ka moku, a ahiahi ae nalowale ka moku ma ka moana, a moe no o Kamehameha ma ka moku ia po. Manao ae la na kanaka ua laweia o Kamehameha i Kahiki; minamina na kanaka ia Kamehameha. Ia kakahiaka ae, hoihoiia mai la o Kamehame-ha, uwe iho la o Kalaniopuu me na kanaka ia Kamehameha, a lele o Kamehameha i uka, nalo hou ka moku, oia ka holo ana i Hawaii. J. A. NAUI.
Keei, Kona Hema, Hawaii, 1862.

J. H. COLE.
LUNA. KUDALA,

                Ma ka Hale Pohaku o Mi. Aniani ma. Ma ke Alanui Alii Wahine. 33-6m

H. W. SEVARANA.

                Luna Ku dala a mea Kalepa. Hale Mahoe. Alanui Aliiwahine.33-6m

ILI BIPI, ILI KAO.

                E UKU AKU NO O F. S. Pratt & Co., ma ko laua Hale Kuai, ma ka Hale Mahoe. I ka uku makepono loa no ka mea i haiia maluna. O Mr. J. C. Spalding(Polena,) ka mea i kamaaina loihi ma ke kuai ana ma a mea, ka mea nana i hooponopono ma ia mea. 32-3m

OLELO HOOLAHA.

                O MAKOU O KA POE NONA NA INOA malalo iho, ke papa aku makou ina mea holoholona, Lio, Bipi, Miula, Kao, Hipa, Puaa, a me na kanaka kuleana ole, a me na keiki, aole e hele wale maluna o keia mau aina kula i papa ia, e hoomaka ana ke kapu Mai Kaaipuluna a hiki i Halelena, e waiho nei ma Manoa, ina e kue kekahi i keia olelo hoolaha, e hoopaiia oia e like me ke Kanawai.
J. HEOLO. KAILIAHI, KIKIPINE, AKAHI, E. EHU, KAILILEHIWA.
Manoa, Oahu. Iune 30,1862 34-1m*

HALE PAI KII.

                KA HALE PAI KII O Chase, MA KE Keena Pai o ke Kuokoa, maluna ae, e pili la ma ka aoao hikina o ka HALE LETA. E paiia na KII o na ano a pau ma ke Aniani, Ili, Pepa, a me ka mea Laholio, &c., a e paiia o hoi i a kii iloko o na ko-molima a me na pine umauma, a me na mea hoomanao e ae. 32-m  
H. L. CHASE.

Pa ddy!

                O KA POE MAKEMAKE E KUAI MAI IA MAUA I KE Padi (oia ka hua Raiki me ka ili.) e haawi no maua i 3 Keneta no ka pauna Padi oo-maikai, mai keia la aku.
G. P. JU DD A ME S. SAVIDGE.
Honolulu, Mei 15,1862. 25-3m

KA LAKO HALE Pahu Kupapau!

                AUHEA OUKOU, E KA POE E MAKEMAKE ANA E kuai ma ke ano makepono wale ! Eia no ke waiho la ma kuu Hale Paahana, ma Alanui Papu. NA PAPA KAUKAU! NA LAKO HALEI KA PAHU KUPAPAU! PAHU KOA.....$12. Ua loaa mai hoi na mea hoonani Pahu Kupapau he nui loa, a e kuaiia no ka uku makepono. A ua makaukau no hoi au e kuai aku i na mau mea hoolako hale, a ka poe e makemake ana e kuai me a'u no ke daia. Nolaila, ke makemake nei au e kuai aku i na lako hale o hai me ka uku ako i ke dala maoli, a na lako hoi i na mea hoolako hale no ke kuai aku ia hai, no ke kumukuai emi loa. HANALE ALENA. 12-6m Alanui Papu.

OLELO HOOLAHA.

                O KA MEA NONA KA INOA MALAlo nei, ke papa aku nei oia i na kanaka, haole, a me ka pake, o kela ano kanaka keia ano kanaka a pau, e nana mai ana. Ke papa aku nei au i na mea a pau, mai hookuu wale oukou i ko oukou mau holoholona, ma ka Apana kula o Ukumehame, mai ka pali o Manowainui, e pili ana me Waikapu, ua kapu ia Apana kula. Ina i loaa kekahi holoholona e hele ana ma ia Apana kula i oleloia maluna, e uku mai ka mea holoholona $l OO (hookahi dala,) me ke kao, a me ka hipa, ewalu poo $100 (hookahi dala.) Ina aole e loaa mai ka uku e like me na mea i oleloia maluna, alaila, e hookomo ana kuu kanaka ma ka Pa Aupuni, no ke kolohe i ka mauu o ua Apana kula la me ke kuleana ole.
P. NAHAOLELUA. Hope Luna Aina o ka Moi.
Lahaina, Maui, Maraki 31,1862. 19-tf

KAKELA ME KUKE.

                MA KA HALE POHAKU HOU, MA POLELEWA kahi kokoke i ka Halepule Betela ma Honolulu, Oahu. Na laua no e kuai i na lole o Kela ano keia ano. NA MEA AI, NA BAKEKE, NA IPU TINI, NA PA LEPO, NA KAMAA. NA PAHI me na O-O, KA PAPA me na NOHO, NA IPUHAO, NA NOHO LIO. KA MEA E KAKAU,  NA PENA ME NA AILA, NA MEA MAHIAI. A me kela mea keia mea. Me na laau a Dr. D. Jayne.
Honolulu, Dekemaba, 1861.

OLELO HOOLAHA.

                KE KAUOHA AKU NEI AU I NA MEA a pau, nana i AIE mai ia'u, e hookaa aku i ko'u hope, oia no o C. S. Bartow (Bako.)
K. P. BONA.
Lahaina. Mei 10, 1862. 26-3m*

KAMANO! KAMANO !!

                1050 PAHU KAMANOMAIKAILOA i loaa mai nei. A e kuaiia aku e like me ka makemake o ka poe kuai mai. Ma kahi o 33-3m
H. HACKFELD & Co. (Kalema.)

Kau Leo!

                KE KAUOHA AKU NEI AU I KA POE A PAU, E HOPU ana i na holoholona hele hewa, ma ka mokupuni o Maui, i kuniia penei q, e hele mua ia'u, mamua o ka lawe ana i mau holoholona'la i na Pa Aupuni; no ka mea, o ko'u hao kuni ia.
JAMES LOUZADA (KIMO LUSEDA.)
Waikapu, Feb. 11, 1862. 12-6m.

J. P. HU GHES.
MEA HANA NOHO LIO!

                AIA MA KA HALE KUAI O KA mea nona ka inoa maluna nei, he Noholio Pelekane a he Noholio Meleka, a me na Noholio Wahine, o na ano a pau, na Noho Paniolo nu hou. NA HAO WAHI a me NA KEPA o na ano a pau. NA KAULAWAHA, a me na mea e pono ai ka lio NA ILI KAUO o na ano a pau. NA EKE ILI, NA HUIPA, NA HAO KEEHI, NA PALAKI LIO, NA KAHI LIO, A me na mea e ae a pau loa e pili ana i na lio a me na kaaholo, a e kuai ana no ia mau mea, No ke kumukuai makepono loa! Aia no ke waiho mau nei malaila na pela mauu. O na pela pulu, na pela hulu, a me pela uwaea. E hanaia no e like me ka mea i kauohaia mai. Ua hanaia no na kaa lealea me ka maikai loa, a me ka makepono hoi. Ua hana hou ia na mea a pau e pili ana i ka'u oihana me ka maikai. E malama pono ia na na mea a pau i kauohaia mai e pili ana i ka'u oihana. E loaa no wau ia oukou ma Monikahaae. ma ke kihi o ke Alanui Hokele a me ke Alanui Papu.
J. P. HUGHES.
Honolulu, Ape rila 1, 2862. l9-1y

NUHOU, NUHOU

                OWAU O A.CLEGHORN(AKE.) UA KOMO no au iloko o kekahi HALE KUAI HOU, ka Hale Kuai o Halewai mamua, mauka ae o ka Halemahoe, a kokoke hoi i ka Banako o Bihopa ma. Eia no ke waiho nei na mea a pau a ka naau e anoi ai, kupono loa no na kane, na wahine a me na keiki. O keia mau lole he lole NU HOU WALE NO. A HE Makepono loa ke Kumukuai. e haele nui mai oukou e makaikai, no ka mea, aole he uku ke nana wale aku i na mea nani ma keia Hale Kuai. E hele mai e nana no oukou iho, i pau ko oukou kanalua, aole no he Hale Kuai e ae ma Honolulu nei i hoolako ponoia i na Lole maikai loa a makepono loa hoi e like me ko'u A nolaila, o na kanaka a pau mai Hawaii a Niihau, aia a holo mai oukou i Honolulu nei, e naue mua mai a kuu HALE KUAI e nana a e kuai, aole e hele ma ko hai wahi ma mua, o ka hele mai imua o'u. EIA KEKAHI: Auhea oukou e na holokahiki, ke waiho la kuu Hale Kuai ma kahi kokoke loa i ka uapo, a ua hiki ia'u ke hoolako ia oukou i na mea a pau e pono ai no ka uku emi loa. 25-3m

E Makaala ! E Makaala !!

                MA KAHI O C. Brewe r & Co., E LOAAI I NA kanaka Hawaii ka Waapa okohola maikai, Pena hale o na ano a pau, Aila pena, Wai hoomaloo pena. A me na mea e ae e pili ana i ka hoomaikai hale.  
C. BREWER & CO., (Burua ma )
Hale Makeke, Alanui Kaahumanu, Honolulu, Feb. 13, 1862. 25-3m

MOMONA MAKEPONO.

                MA KA HALE KUAI BIPI KULA. nakauhali o H. Conawela, mala-ila kahi e loaa ai ka Bipi momona, Puaa momona, a me ka Hipa momona , a me na mea e ae he nui wale oia ano, no ka uku emi loa. E hele mai na kanaka a pau, i ike maka i ka MAKEPONO, A i pau hoi ke kuhihewa. Aia ma ke Alanui Alii, ma ka aoao ma Waikiki o ka Hale Kupa Pahu, ma Polelewa.
H. CONAWELA.
Honolulu, Mar. 13, 1862. 29-3m

MANUAHI, MANUAHI.

                E IKE OUKOU E NA KANAKA a pau. eia ma ko'u Hale Kuai Bipi, ma Ulakoheo, Na io bipi momona loa o na bipi kupaluia a pau o na kuaaina mai, i laweia mai ma ko'u HALE KUAI BIPI, a he manuahi loa ke kuai ana. Maanei wale no ke keu o na Io Bipi Momona, Waliwali, a Palupalu hoi, O na io ma ka ai ana iho, aole hoohalahala iki ka puu i ka ono oia mau mea. E hiki ia'u ke kuai aku ma ka paona, a me ke KUAI MANUAHI, me ka paona ole. Pono oukou ke hele nui mai e kuai me a'u, i ike io oukou i ka oiaio o na olelo maluna. Ua loihi loa ko'u noho ana ma keia oihana, no kuu aloha loa i na keiki a me ka lehulehu a pau o ke Kaona, a me keia Mokupuni okoa, a no ka pono o ka poe ma ka moana a me ko na aina e, a ua kamaaina loa au ia oukou. E hele nui mai oukou oiai au e noho ana i Kuene na oukou. E wiki mai oukou.
J. W. KAIKAINAHAOLE.
Honolulu, Aperila 25,1S62. 22 tf

HALE HANA PIULA. o
F. H. & G. SEGELKEN.

                MA KE ALANUI NUUANU, MA KAI IHO o ka Loiala Hotele. Mau mea hana, a kuai Piula, Hao, Keleawe, a me na mea e ae e pili ana i ka Oihana Piula, A e hoomoe hoi i ka Piula Wai, me ka hooponopono kupono i na mea a pau e pili ana ia oihana. Ua lako mau i ka Piula Wai maikai. E hele mai e ike no oukou iho. 33-6m

PAPA MAKEPONO!

                AIA KA HALE KUAI O LU I (C. H. BREWERS,) ALANUI PAPU, kahi e kuai oluolu ai. NA PAPA OREGONA 1 a hiki 3 iniha, LAAU KAOLA, na a me na pou, a me na opaka e ae. LAAU PA a me na PINE PA, LAAU AHO HALE PILI, PAPA ULAULA, PAPA PAINA, PAPA KEPA, PILI ULAULA a me KEOKEO. PENA KEOKEO, OMAOMAO, ELEELE, ULAULA, POHO, GALU, HULU PENA. KUI o na ano a pau LAKA. AMI, KILOU, KUI KAKIAMOENA, KUINAO. PEPA HOONANI KEENA. PANI HALE, PANI ANlANI ANIANI KAAWALE, PATE. PANI OLEPELEPE. Eia ka mea kupanaha ma keia wahi, na ka mahu e hana i na pahu apo, he hikiwawe, kupanaha. E hele nui mai e kuai a e ike wale i keia KAMELO. Ua hoeomi ia na Laau Oregona i keia wa, i ELUA KENETA ME KA HAPALUA no ka kapuai, 33-6m