Ka Nupepa Kuokoa, Volume I, Number 35, 26 July 1862 — Page 1

KA NUPEPA KUOKOA.
Ke Kilohana Pookela no ka Lahui Hawaii.
BUKE I. HONOLULU, IULAI 26, 1862. HELU 35.

He Kanikau Aloha no J. D. Kenao.

He Uhane la he aloha,
Nou no la e J. D. Kenao,
Kuu hoa make anu wai o Kaulea,
E pue ana i ke koekoe,
Eloku ana iloko o ka io ka hui,
Li aipo i ka hele kua,
Ka leina a ka uhane la liuliu,
Paa i ke anu ka noe o ka mauu,
Holu ka manawa mauna i ka makemake,
Naha ke keiki au o Kalena,
Puai ka ena ka pua o ke aalii,
He alii ko aloha he hoa no'u i ka po—e pola,
Po ke kula o Kamahoke i ka noe,
Honi aku ka uhane i ke ala o ka pua laniuma,
I kui a lei no kuu hoa e,
Hoomaha ka wela i ka wai o Pulepule,
Huli nana o ke anu o Mauna Gula,
O ka nani hoi o Kienemela,
Auau i ka wai e Hualamea,
O ka ua koiawe i na pali,
E huli e hoi eia wau.
O ka hoa kuili o ke aumoe,
Naha kaawale ua hele oe,
Ko-o ka ka pili me ke aloha,
Ua hala, ua hele, ua nalo loa,
Pau ka ike ana la e ka hoaluhi,
Uhia paaia e ka ua noe,
E ka ua noe anu o Hiilei,
Ua kuhi ka manao o ka hoa oe,
Aole e hiki, ua kino lau,
Ua kuniia e ke sila, ua paa loa,
He paa hemo ole i ka weheia,
O ka leo o ka manu ka'u e lohe nei,
I ke kani hoene lua mai i ke ahiahi,
O ke ahi keia, ua wela wau,
Ua wela i ke aloha,
Paila ka manao e noho nei,
I ka eha konikoni a kuu kino,
Ua hala, ua hele, ua nalo ia.
M RS. MARY W. P. KENAO.
Irish Creek, Kaliponia, Iune 14, 1862.

(Unuhiia no ke Kuokoa.)
HE KAAO
NO KA POE ILIHUNE E NOHO ANA MA NU IOKA.
HELU 10.

            MA IA MANAWA KOKE NO, HAI aku la ua keiki Alii nei, ia ku ana o makou i ke Aupuni Kamana, holo makou iuka o ka uapo, a ku makou ilaila, olelo aku au i ke Kapena, "E hoi oe a kuu makuakane, olelo aku, e kali mai a hala na makahiki elima; alaihi, kii hou mai ka moku ia makou ; no ka mea, o ko makou manawa no ia e puka like ai." Ae mai no ke Kapena, o ko makou hele no ia a hiki i kekahi Hotele, ninau aku makou, ." Heaha ka hana o keia Aupuni ?" Hai mai la na kamaaina, "He Kamana ka hana o keia Aupuni." Ninau hou aku la makou i na kamaaina, "Aia i hea ka hale o ke Alii
            Kamana nona keia Aupuni ?" Hai mai no na kamaaina. " Aia iuka." O ko makou hele aku la no ia a hiki i ka hale o ke Alii Kamana ninau aku makou, " Auhea ke Alii mana ?" Hai mai la na kamaaina, " Aia no maloko o ka hale." Hele aku la kekahi kanaka kamaaina a ku imua o Alii Kamana, ninau mai la ua Alii Kamana nei, " Heaha kau?" Olelo aku la ke kanaka kamaaina, " I kii mai nei hoi paha au ia oe, e hele ae e halawai me na keiki malihini ekolu e ku mai la mawaho o ka hale." Kena mai la ua Alii nei, " O hoi a i ua poe keiki nei, olelo aku oe, e komo mai iloko nei." la manawa no, hele aku la makou a ku- imua o ua Alii nei, aloha aku makou ia ia, a aloha mai no hoi kela ia makou me ka oluolu o na manao o makou a pau.
             Ma ia hope iho, olelo mai la ua Alii nei, "Heaha ke kuleana o ko oukou hele ana mai nei ianei ? " Olelo aku la makou, " I hele mai nei makou i ka imi naauao." Olelo mai la ua Alii Kamana nei, " Eia ka hana o kuu Aupuni, he Kamana, he Amara, he Kupa, a he hana lole, a me kekahi mau mea paahana naauao e ae, oia ka hana o kuu Aupuni, a ina e makemake oukou e komo iloko o ke kula e aoia'i i ka ike a me ka naauao ma keia Oihana, ua pono, aia no nae ia oukou ke koho mai i ka oukou Oihana e makemake ai." Ua maikai ia i ka manao o ua poe keiki nei, a hoonoho a ku la o Pama ia Keoki, ma ke kula kahi e aoia'i ka Oihana Kamana.
            Olelo aku la o Pama, " E Keoki, ke noho la oe ma ke kula e aoia'i i ke Kamana, mai pakike oe, e hoolohe no a pau na makahiki   elima ; alaila, puka kakou." O ko laua nei hele aku la no ia a ke Aupuni Amara, hoonoho aku la o Pama ia Keoni, a olelo aku la, " E Keoni, ke noho la oe ma ke kula e aoia'i i ka Oihana Aniani, mai pakike oe, e hoolohe no a pau na makahiki elima; alaila, puka kakou." O ko ia nei hele aku la no iaa hiki i ke Aupuni hana Lole, noho iho la keia. O ko lakou nei noho iho la no ia a pau na makahiki elima, puka'ku la o Pama, a hoi aku la a ke Aupuni i noho ai o Keoni, puka mai la no hoi o Keoni, hoi pu aku la laua nei a hiki i ke Aupuni i noho ai o Keoki, puka mai la no hoi o Keoki, o ko lakou nei hoi aku la no ia a hiki i ka Hotele a lakou i ninau ai mamua, noho iho la lakou nei ilaila e kali ana i ke ku mai o ka moku o lakou i holo mai ai.
             A nui no na la a lakou nei i noho ai ilaila, olelo aku la o Pama, i kona mau hoa, " Pehea kakou, e hoi paha, e hele paha kakou e imi i Aupuni no kakou ?" Pane mai la kona mau hoa, " E hoi no paha kakou, i ike i na maka o na makua, a i ao aku hoi i ka kakou mea i imi ai a loaa." Hoole loa mai no ua keiki Alii nei, me ka olelo mai, " E hele no kakou i ka imi Aupuni no kakou, a loaa, hoi kakou." Olelo hou mai la na keiki  kuaaina, "I aha auanei ko kakou pono o ka hele ana, aole a kakou ai, aole no hoi he mahuahua o ka kakou wahi dala ? " Oelelo hou aku no ua keiki Alii nei, " Hookahi no no a'u wahi daia a ko'u makua i haawi mai ai." Pane aku la ua mau keiki kuaaina  nei, " Pela no hoi maua, elua maua, elua dala pakahi a ko maua mau makua i haawi mai ai." Hui ae la lakou nei i na wahi dala a lakou nei, a ekolu no hoi lakou nei, ekolu no hoi dala, hele lakou nei e kuai i ka ai, a me ka bipi, a loaa mai keia mau mea ai i o no ka hele ana. Hoomakaukau lakou nei no ka hele ana i ka imi Aupuni no lakou, ko lakou nei hele aku la no ia a hala mai ka palena o ke kulanakauhale, moe iho la lakou a ao ae, olelo aku la ua keiki Alii nei, imua o na keiki kuaaina, " Heaha ka olua mea hou a ka olua mau kamu i haawi mai ai ia olua ? " Olelo aku la kekahi, " Eia ka mea a ka'u kumu i haawi mai ai, he Noho." A hoike mai la no hoi ka lua, "Eia ka mea a ku'u kumu i haawi mai ai, he Papakaukau." A o ia iho la no ka waiwai a ka maua kumu o ka haawi ana mai ia maua.
             Kii aku la ua keiki Alii nei, a ka Noho o ke keiki kuaaina, huki ae la keia iluna, o ka lele aku la no ia o ka Noho me ua keiki Alii nei a liuliu, hoi iho la keia ku ana i ka honua. Olelo aku keia i ua keiki kuaaina nei nana ka Noho, " He mea maikai kau, loaa ko kakou alanui e hele ai." Kii hou aku la no ua keiki Alii nei a ka Papakaukau a ka iua o ke keiki kuaaina, huki ae la keia i ka pahu ume o ua Papakaukau nei, i nana iho ka hana, ahu ana mea ai o na ano a pau iloko o ka pahu ume o ua Papakaukau nei. Olelo hou aku la ua keiki Alii nei, i ua mau keki kuaaina nei, " He mau mea maikai ka olua i haawiia mai ai e ka olua mau kumu." E haalele kakou i na mea ai a kakou na kamaaina, eia no ka kakou ai a me ka i-a iloko o ka pahu ume o ka Papakaukau. Ia manawa no, hoomakaukau iho la lakou nei no ka hele ana, hookomo aku la lakou nei i ka Papakaukau iloko o ua Noho nei, a komo aku la no hoi lakou nei, a noho like iho la iloko o ua Noho nei. Ia manawa koke no, huki ae la ua keiki Alii nei i ka Noho, o ko lakou nei lele aku la no ia iloko o ua Noho nei, i nana iho ka hana o lakou nei, he keu ka hoi keia o ka mea kupanaha i ka lele. A kapa iho la ua poe keiki imi naauao nei i ka inoa o ua Noho nei, " O Noholele." Maanei kakou e waiho i ka nana ana i ka moolelo o ua poe keiki imi naauao nei; no ka mea, ua pau ka hai ana a Pama i ko lakou moolelo ia Eiki Peki.
             E hoi hou kakou maanei i ka moolelo no Eiki Peki, ia lele ana a lakou nei a liuliu, ninau ae la keia i na kupuna ona, " Aohe anei he Aupuni mamua aku nei o kakou ? "
            Olelo mai la na kupuna, " He Aupuni no, o ke Aupuni o ke kaikamahine lauoho gula." Ninau hou aku la o Eiki Peki, " Po paha keia la, hiki aku kakou ilaila ? " Olelo hou mai la na kupuna, " Aole e po keia la, i ka ho ra 4 paha o ke ahiahi o keia la, hiki aku kakou ilaila." I ko Eiki Peki lohe ana i keia mau olelo, olioli iho la keia, no ka maopopo loa o ko lakou manawa e hiki ai ilaila, a kokoke pau ka hora 4, hiki lakou nei i ke Aupuni o ua kaikamahine lauoho gula nei, ku ana lakou nei i ke kuahiwi, lohe aku la lakou nei i ka leo kumakena o na makaainana, a maopopo ia lakou nei he alii make ke kumu o ko lakou uwe ana, hele aku la lakou nei a hiki i kekahi hale. Ninau aku la o Eiki Peki i na kamaaina, " E uwe ana oukou i ke aha ? " Hai mai la na kamaaina, "E uwe ana makou i ko makou Alii Wahine ua nalowale." Ninau hou aku la o Eiki Peki, " Owai ka inoa o ko oukou Alii Wahine i nalowale ? " Hai aku la na kamaaina, "O Mere Lauoho Gula." Ninau hou aku la o Eiki Peki, " Ehia la i hala mai kona manawa i nalowale ai ? " Hai mai la na kamaaina, " Akolu ae nei pule i hala, a o ka ha keia." Ninau hou aku la o Eiki Peki. "Heaha ke kumu o ka nalowale ana ?" Hai mai la no na kamaaina, " I hele i ka hookelekele waapa, a o ka nalowale no ka ia." A ua olelo no ka makuakane o ua kaikamahine nei, " Ina e loaa i ke kanaka e loaa'i o ke kane ia a ua kaikamahine nei, o na Aupuni ehiku o ua kaikamahine nei, lilo pu no i ka mea e loaa'i." Uo maikai no ia i ka manao o Eiki Peki.
             Ma ia manawa koke no, komo aku la keia iloko o ka Noholele, o ko lakou nei lele aku la no ia a hiki i ke kulanakaule, ike mai la ko ke kulanakauhale ia lakou nei, uwa ae la ka pihe no ke kanaka maikai o Eiki Peki, a aneane haunaele maoli ko ke kulanakauhale, kui aku la ka lono o keia haunaele, a hiki i ka Hale Alii o Kini Gula, oia ka makuakane o ua kaikamahine nei i nalowale ai. A hoounaia kekahi mau keiki Alii, e hele a e nana i ke kumu o keia haunaele, holo aku la ua mau keiki Alii nei maluna o ke kaa kapu o ke kaikamahine Alii. Olelo aku la o Kini Gula i na keiki Alii, " I holo auanei olua a hiki i ke kulanakauhale, ina olua e ike he kanaka maikai, hooili ae olua iluna o ke kaa, a e lawe mai a hiki i ka Hale Alii nei." Ae aku la no ua mau keiki Alii nei, holo aku la ua mau keiki Alii nei a loaa o Eiki Peki ma me kona mau hoa, e hele mai ana, hooili ae la ua mau keiki Alii nei i ua poe kanaka maikai nei iluna o ke kaa, a holo mai la lakou a hiki i ka Hale Alii, o ka pau no ia o ka haunaele o ke kulanakauhale, ia lakou nei nae i hiki ai i ka Hale Alii, iho iho la lakou nei mai luna iho o ke kaa a ku ilalo, ike mai la o Kini Gula ia lakou nei. Wehe keia i ka papale, aloha mai ia lakou nei, wehe like ae la no hoi lakou nei i na papale, a aloha aku la i ke Alii, ia manawa no, kukuluia mai la na noho, ninau aku la o Eiki Peki ia Kini Gula, " Heaha ka mea hou o ko oukou Aupuni ? " Olelo mai la ke Alii, " O kuu kaikamahine, ua nalowale." A olelo hou mai la ke Alii, " Ina e loaa kuu kaikamahine i kekahi kanaka, lilo ia i wahine nana, a lilo pu no hoi ia ia na Aupuni ehiku. I ko ia nei lohe ana ia mau olelo a pau, olioli iho la keia i ka lilo o ia mau Aupuni, ke loaa ia ia nei kana kaikamahine. Olelo hou aku la o Eiki Peki imua o ke Alii, "Heaha la hoi auanei ka hewa, aia no hoi paha i ka imi ana, ina hoi i loaa, lilo ke Aupuni ia'u, a i loaa ole hoi, oia iho la no." O ke kumu hoi ia o ko makou hiki ana mai nei ianei, o ka imi Aupuni no makou, oia la i lohe oe.
             I keia manawa a Eiki Peki e olelo ana pela, nui loa ka hauoli o ka makuakane o ua kaikamahine nei no kela olelo a Eiki Peki. Olelo hou mai la o Kini Gula, " Haha k hoi ka hewa, he naniia, ua maikai uo hoi i kou manao." A pau keia olelo ana, hoomakaukau ka ahaaina, hele nui mai ka poe hanohano a pau o ke kulanakauhale, a piha loa ka Hale Alii; no ka mea, ma ia po iho no, he po nui ia, no ka hoike ana o ua Eiki Peki me kona mau hoa, a makaukau na mea ai, hele aku la lakou nei a noho pu iho la i ka papa aina, olelo mai la o Kini Gula, " E ai hoi paha kakou." Olelo aku la o Eiki Peki, " He wahi ai no ka makou, he Laumaona." Olelo hou mai la no o Kini Gula, " Kupanaha no ka oukou wahi ai, o ka hoopa wale ae no ka i ke alelo, o ka maona no ia, pela hoi ke make wai, o ka hoopa wale ae no ka i ka puu kena ae la no ka make wai." Ae aku no o Eiki Peki, me ka olelo aku, " O ka makou ai no keia o ka hele ana mai nei, he mea luuluu ia makou ke lawe i ka ai maoli, he luhi ka waha i ka nau ana." Olelo mai la ka muli o Mere, " Owau paha ko makou e hele aku e hoao i ka ai ana i ka ai a na malihini." Ku ae la ua kaikamahine nei a hele aku la ma kahi a lakou nei e noho ana, no ka nui no o ka makemake ia Eiki Peki, lalau iho la ua kaikamahine nei i ka lakou nei ai, a hoopa ae la keia ma ke alelo, maona no, make wai keia, hoopa ae la keia i ka puu, kena no ka make wai, a pau ka ai ana, hoi lakou nei iloko o ka Hale Alii, hoomakaukauia kahi moe no lakou nei, moe iho la lakou nei a wanaao, hoala ana na manu daimana ia ia nei, " E ala ae hoi paha oe e Eiki Peki e moe nei, ua ao, eia ke pawai holoi maka me ke kawele." Ala ae keia kahi i ka lauoho a maikai, pela no hoi na manu gula, hoala ana i ke keiki Alii, oia hoi o Pama, a pela no hoi na manu dala, hoala ana i na keiki kuaaina, oia hoi o Keoki laua me Keoni, ia manawa, kahiko lakou nei ia lakou nei a maikai, he kapa daimana ko Eiki Peki, a he kapa gula ko Pama, a o ko na keiki kuaaina kapa he lala.
(Aole i pau.)

AHAOLELO HAWAII.
Hale o ka Poeikohoia,
LA 66.—IULAI 17.

            Heluheluia ka moolelo a aponoia. Pule a pau.
            Hoike mai o Halasi, o ke Komite Wae no ka Bila Kanawai e kokua ana i ka poe mahiai, a me na Hana Lima. Heluhelu puia me ka Bila Kanawai, o Halasi ma ka olelo haole, o Hikikoke ma ka olelo Hawaii.
            Manao o Kapena Loke, e hoopanee loaia ka noonoo ana i ka Bila Kanawai, kokua o Kaakua. Ma ke noi a Hikikoke, ua heluhelu aluaia ma ke poo. Heluhelu muaia ka Bila e Hikikoke. Ma kenoi a Hikikoke, ua heluhelu aluaia ma ke poo,
             Ma ke noi a Moku, ua haawiia i ke Komite o ka Hale i ka la apopo, a ua aponoia. Ma ke noi a Kamalo, ua heluhelu puia me ka Bila mua, a aponoia. Kue o Kapena Loke.
             Heluhelu mai o Moku, he Bila Kanawai no na wahine haalele kane, a pela no hoi na kane, e hoopaiia he $50.00, a e hoohanaia i ka hana oolea i hookahi makahiki. Kue o Kaakua, e hoomoe ma ka papa, hooleia.
            Ma ke noi a Kamalo, ua kapaeia na rula, a ua heluhelu aluaia ma ke poo, a aponoia. Ma ke noi a Kamalo, ua haawiia i ke Komite o ka Hale i ka la apopo. Ma ke noi a Hikikoke, e hoomoe ma ka papa. Kue o Moku, a me Kaapa, hoopaapaa hou o Hikikoke, kokua o Kipi, e hoomoe ma ka papa.
            Ma ke noi a Wilimana, e hoopanee loaia. Kue hou o Kamalo ia Wilimana, hooholoia e na Lunamakaainana e hoomoe ma ka papa.
            Koe wale no ka poe makamake e lawe a e noonoo.
            OLELO HOOHOLO.
             He Olelo Hooholo ka Kapena Loke, e noonoo i na hoololi o ke Kumukanawai, ua hooleia e Kaakua ua Olelo Hooholo la. Kamailio mai o Halasi, e hai i ka la e noonoo ai no ka Olelo Hooholo a ke Komite. Na na mea e pili ana i ka hooilina Moi a i Kahu paha. Noi mai o Kapena Loke, no ka Olelo Hooholo, Pela no o Halasi. Lawe o Kapena Loke i kana Olelo Hooholo.
            Ma ke noi a Kimo Pelekane, he Luna Hoomalu o ke Komite hui no na Bila Kanawai i kakau Poepoeia, a ua aponoia. Eha Kanawai i hooholo loaia a kakau inoaia e ka Moi, a e hoolahaia e ke Kuhina Kalaiaina.
            Heluhelu mai o Wepa. he palapala no ka Hale o nalii mai, e pili ana i na Puuku kula, ua hooholoia. He Kanawai e kau ana i ke du te 1 keneta no ka paona o na mea ulu mai na aina e mai, ua hoole ia. Hooholoia ke Kanawai Mokumahu.—Hooholoia ke Kanawai no na Hipa.
            Ma ke noi a Kipi, hapaiia na hana i hoopaneeia. Ma ke noi a Nuuanu, lilo ka Hale i Komite.
            Komi te KA HALE.
             Noho o Nuuanu ma ka noho Luna Hoomalu.
            Heluheluia na palapala a ka Luna Hoomalu o ke Komite Waiwai, a me ke Kuhina Waiwai. Ua nui ka hoopaapaa ana o na Luna. Noi mai o Kipi. e hoole i keia Haawina no C. G. Hapakini $776.94, no ka nui loa o na dala i hooliloia ia ia, no kona hoi ana i Beritania.
             Manao o Manini, e hele mai ke Kuhina, Waiwai, a me kekahi mahele olelo kupono, e hooponopono i kana hoike, no ka mea, ua huikau. Manao o Kaapa, e hele na Komite e nana i na Buke. Hoole o Moku, kokua o Kipi e hoole i keia Haawina no C. G. Hapakini.
            Noi mai o Wilimana, aole make hoole.
            Wehewehe mai o Kauhane i ka pono a me ka ole o keia Haawina; aka, e Kauohaia ke Komite e kii i ka olelo ae like, a e nana i ike leaia ka pono a me ka ole.
             Ma ke noi a Barenaba, hoopauia ke Komite.
                Ua nui ka hoopaapaa ana o na Luna. Olelo mai o Barenaba, ua pono ka lilo ana o keia dala ia C. G. Hapakini, malalo o ka olelo ae like. Kokua o Kahalewai, a me Kamalo.
            Kue o Wilimana ma.
            Noi mai o Halasi, kupono e hoopauia i keia manawa, o ka mea imua o ka Hale, o ke kupono a me ka ole, o keia hana a ke Kuhina Waiwai. Ua nui loa ka hoopaapaa, o na Luna. Ku mai o Kahananui a olelo mai, ua hewa keia hana a ke Kuhina Waiwai, i ka hoolilo ana i ke dala. No ka mea, aole ia i hoike mai i keia Hale. Kamailio hou mai ka Luna Hoomalu o ke Komite Waiwai, ua ninauia aole maopopo.
            Heluhelu mai o Hikikoke, he Olelo Hooholo, Kue o Wilimana, Kamailio mai o Kaauwai, e hana na Komite malalo iho o nai Haawina i kupono ma ia hana; aka, i kuu manao, ua maikai ka hana a na Komite.
            Hapai o Kipi i ka Olelo Hooholo a Hikikoke e noonoo hou na Komite Waiwai, a hiki mai imua o ka Hale. He Olelo Hooholo na Halasi e pili ana no na wehewehe a ke Kuhina Waiwai, no kona hoike e waiho mai imua o ka Hale. Noi mai o Kaakua, e waihoia ma ka papa. Noi mai o Balawina e hoololi i ka Olelo Hooholo, e hele mai ke Kuhina Waiwai, e hoike mai imua o ka Hale i kona mau hoike. Noi mai o Kahalewai, e haawi houia i na Komite e noonoo. Kue o Manini, aole au i ike i na rula o keia Hale e kauoha ana e hana hou na Komite, Kamailio loihi o Kaauwai no na mea e pili ana i keia haawi ana. Ua nui ka hoopaapaa ana o na Luna. Heluhelu mai o Balawina, he Olelo Hooholo, hooleia e Wepa, me he mea la e hoahewa ana i na Komite Waiwai.
            Hooponopono hou o Balawina i kana Olelo Hooholo, hooholo loaia.
            Ma ke noi a Wilimana, hoopauia ke Komite ana, a aponoia na hana. Ma ke noi a Kahalewai, hoopaneeia ka hana.

LA 67.—IULAI 18.

             Heluheluia ka moolelo a aponoia. Pule a pau.

NA OLELO HOOHOLO.

            Heluhelu mai o Kapena Loke, he Olelo Hooholo. E kohoia i mau Komite o ka Luna Hoomalu kahi hoa oia mau Komite, e hoomakaukau i mau ninau, a aponoia e ko ka Hale, mamua o ka hiki ana mai o ke Kuhina Waiwai. Ua hooholo loa ia.
            Heluhelu mai o Kahalewai, he Olelo Hooholo, e Kauohaia ka Unuhiolelo e hele mai e mahele i na olelo a pau a ke Kuhina Waiwai.
            Noi mai o Kapena Loke, e lawe hou ka Luna o Koolauloa i kana Olelo Hooholo. Heluhelu hou mai o Kapena Loke, he Olelo Hooholo, e hele mai ke Kuhina Waiwai, i ka Poakahi, a la e ae paha, e wehewehe mai i kana hoike M. H.
             Hapai houia ka Olelo Hooholo a ka Luna o Koolauloa. Kue o Moku i ka Olelo Hooholo, apono o Kaakua i ka Olelo Hookolo, a pela no o Kipi, a me Halasi, Kanalua o Kaauwai i keia Olelo Hooholo, Kokua o Kamalo i ka Olelo Hooholo. Lawe o Kaauwai i kana olelo, a a ponaia ka Olelo Hooholo. Kohoia na Komiie, o Wilimana, Kapena Loke, Wepa, Kaauwai, a me Moku. Hoololiia o Wilimana, a me Wepa, ka Luna Hoomalu. Ma ke noi a Kamalo, ua Komite ka Hale.
            KOMITE KA HALE.
            Noho o Kamalo i Luna Hoomalu. Noi mai o Kaakua, e heluhelu i ka Bila Kanawai no na leta. Noi mai o Barenaba, e hoopanee loa, a ua hooloia. Ma ke noi a Kahalewai, e hoopauia ke Komiie. Hapai hou ia na hana i hoopaneeia. Ma ke noi a Kahalewai, e Komiie ka Hale. Noho o Pomaikai i Luna Hoommlu. Heluheluia ka Bila Kanawai no ka mahiai. Ma ke noi a Kaakua, e heluhelu pu me ka Bila mua, kue o Kapena Loke. Hoopaa nui na Luna. Ma ke noi a Kaakua, e heluhelu pakahiia na Pauku.
             Ma ke noi a Kaakua' e waiho i ka Bila ma ka papa, ua hooleia. Ma ke noi a Kahananui, e hoopanee loa i ka noonoo ana ia Bila. Ma ke noi a Kahananui, e hoopau i ke Komite. Heluhelu mai ka Luna Hoomalu he palapala no ka Hale Alii mai, a heluhelu pu ia me ka Bila Kanawai, no ke kukulu i Hale no na pupule, a me ke Kanawai no ka launahele, a me ke Kanawai no ka hookaawale i na Hale Kula o na keikikane, a me na kaikamahine, ua hooholoia e ka Hale Alii, a ua apono ka Hale o ka Poeikohoia a koe nae na mea no ka pupule, apopo noonoo hou. Ma ke noi a Kaakua, e hoopanee ka hana apopo hora 10.

LA 68.—IULAI 19.

                Halawai ka Hale e like me ke ano mau.
            HOIKE KOMITE MAU.
            Hoike mai o Wilimana, no ke Kanawai e auhau ana i ka poe a pau e hoopukapuka ana i na laau lapaau. Ua waihoia ka Bila mua ma ka papa, a o ka Bila a ke Komite Wae i hoomakaukau ai ka mea e noonooia'i.
                HOIKE KOMITE WAE.
            Hoike mai o Wepa, o ke Komi te i kohoia e noonoo i mau ninau e hoopuka aku ai i ke Kuhina Waiwai i kona wa e hiki mai ai imua o keia Hale, e hai mai ana ewalu ninau i hoomakaukauia, me ka ninau hou no nae ke loaa ke kumu ma na olelo pane mai a ke Kuhina Waiwai. Ua aponoia ka hoike a ke Komite.
            Ua kohoia o Halasi i Luna Hoomalu no ke Komite Wae, ma kalii o Wepa.

                OLELO HOOHOLO.
            Heluhelu mua mai o Wilimana, i ka Bila Kanawai e pili ana i ka poe kuai i na laau lapaau. Ma ke noi a Kaakua, ua haawiia i ke Komite o ka Hale i keia la. Noi mai o Wilimana, e hapai houia ka noonoo ana o ka Bila e ae ana e aie ke Aupuni, a ua aeia. Hapaiia na hana i hoopaneeia. komite KA HALE.
             Noho o Kahananui i Luna Hoomalu. Noonooia na hoololi a na'lii iloko o ka Bila a Kimo Pelekane e malama'i i na Pupule. Manao o Halasi, Kaakua, Kapena Loke, a me kekahi poe e ae e kupono no keia Haie no ka waiho ana i ka huaolelo i Honolulu i hoololiia e na'lii. Kue o Kamalo, a ua nui ka hoopaapaa ana.
             Noi mai o Kimo Pelekane, e kupaa keia Hale me ka ae ole aku i ka hoololi a na'lii ma ka Pauku 1. Ua hooleia. Ma ke noi a Halasi, ua hooleia ka hoololi a na'lii.
            Hoopauia ke Komiie ana, a aponoia na hana.
            Lilo ka Hale i Komite no ka Bila Kanawai a Wilimana, e pili ana i ka hoouku aku i na Kauka Lapaau, e kuai ana i na laau lapaau, he $40.00 ka o na poe Kauka ma Honolulu, Lahaina, a me Hilo, a ma na wahi e ae he $10.00. Noho o Kauhane i Luna Hoomalu. Heluhelu Paukuia ka Bila, ua hooholo loaia ka Bila. Hoopauia ke Komite ana, a aponoia na hana. ma ke noi a Kahalewai, ua haawiia e kakau Poepoeia.
            Lilo ka Hale i Komite no ka Bila Kanawai, e ae ana i ke Kuhina Waiwai e aie aku i $100,000.00. Mr Alapai ka Luna Hoomalu. Heluheluia ka Bila, a hoopaapaa na Luna. Manao o Barenaba e hoopaneeia ka noonoo ana o keia aia pau ka pohihihi o ka hoike a ke Kuhina Waiwai; alaila, hapai hou ka noonoo ana. No ka mea, malia paha ua hewa ka helu i haiia mai no ka aie o ke Aupuni, he kumu pono e manao ai pela, no ka mea, ua hewa kekahi o kana hoike, malia paha pela no hoi ka hewa o kana hai ana mai i ka aie o ke Aupuni. Manao o Wilimana, he pono ke hooholo i ka Bila.
            Wehewehe mai o Kaauwai i kona manao; aka, no kona kue anaia mai e Kanuka, no ke koe i na rula, ua hooki koke no ia i kana kamailo ana. Ma ke noi a Kipi, ua