Ka Nupepa Kuokoa, Volume I, Number 32, 5 Iulai 1862 — No ka pilikia ma Kau, Hawaii. [ARTICLE]

No ka pilikia ma Kau, Hawaii.

E ka Nupepa Kuokoa e; Aloha hou oe: He nui na pilikia, ma ko makou mau aina ma Kau nei, eia na pilikia. 1, o ka La; 2, o ka wi; 3, o na holoholona. O ka pilikia nae i oi mamua o keia mau pilikia ekolu i haiia maluna, o na holoholona. Aole makou i pilikia no ka holoholona o na kanaka; aka, i ka holoholona o na Haole, koele mai, kauluwela ka aina, pepe na mea kanu. Aole o makou wahi pono iki, hana aku ana na kanaka, paki mai na Bipi. O na wahi i hana mua ia e ka poe kahiko, a ua ikeia ka momona, ka nui o ka ai, ka ipu, ke ko, a me kekahi mau mea e ae; a i keia mau makahiki elua, a kahi makou a ike i na pilikia, a me ka nui o ko makou poino. Ua pono ka holoholona a ka Haole, ma ko lakou aina no e hele ai; eia ka hewa, o ka hele ma ko makou mau aina. No ka mea, he wi no makou ma na makahiki i hala aku nei, no ka la no nae, a ina i haule ka ua, manao no ke ola, kanu na mea kanu, o ka pau no ia o ka pilikia, a i keia manawa, aole wahi kupono e kanu aku ai, na mea kanu. Aia wale no kahi mea kupono iki, o kahi dala wale no, me ka poino pu no kekahi. A pehea la anei e pau ai keia pilikia o makou? Ina ua ike kekahi o oukou e ko'u poe hoa, i ke kumu e pau ai keia pilikia, e hai mai no ma ka akea, i ike ka poe holoholona nui, o makou nei, a ina i pohihihi ia oukou, a ia lakou la ae hoi, a ina i holo ole hoi ia lakou, a ia lakou la aku hoi. Nolaila, e wikiwiki oe, i loaa aku lakou la, a me lakou la ae hoi, na hale opu noonoo i kukuluia ma ke Aupuni Hawaii nei, i pakele makou i keia pilikia nui, a me keia poino nui o makou, aole keia o ka pilikia a oukou e nana maka mai ai. E ahoia, o hai mai, pohala na maka. Me ke aloha no. W. KAHALELAAU. Kau, Hawaii, Iune 12, 1862.