Ka Nupepa Kuokoa, Volume I, Number 30, 21 June 1862 — Wailele o kauai. [ARTICLE]

Wailele o kauai.

E ka Nupepa Kuokoa e: Aloha oe: Ua loohia mai au e na manao o G.W. Kahiolo, ma ka Helu 25 o ka Nupepa Kuokoa, i kakauia ma kona poo, "Mea Hoakaka." No ka'u mau olelo pane, a me na haina pu i paiia ma ka Helu 19. No na ninau a G.W. K., ma ka Helu 16 o ke Kuokoa. Ke pale nei au ia'u iho, no na manao o G. W. Kahiolo i pane hou mai nei, me ka pakui hou mai i na manao hou, i mea e lilo ai ka'u alakai ana i mea ino. Ke manao lana nei au. aole o ia kou mea e nalo ai ka haulehia ana o kou mau manao. "He mea hoakaka ke poo, aole nae he kulike me kona poo." No kou manao paha o oe no o kaua ke lanakila. Pela io no hoi paha. ina no la hoi ua pono ole ka'u alakai ana, a ina no hoi he loaa makilo, o like me kau e pane ana mahope loa, e aho no la hoi paha ia. malia o kau ka oiaio, ka mea i hana io a hooko io i ka hana. Ke nuku mai nei oe, me ka olelo mai aole i paupauaho ka nupepa, ia iala ka naenae, me he mai hano la. He mnnao hikau a pea wale ia ou, ua ike anei oe ma na wahi kuai a pau, e kaniuhu ana no ke kau pu ana o na mea ino, a me na mea maikai, aole loa ; aka. o ka poe loiloi, o lakou kai wae ae me ka hoowahawaha, pela no hoi iwaena o ka poe ake mea ano hou a maikai hoi, oia na nu hou, a pela'ku. I ko'u heluhelu ana ma ka Helu 16 o ke Kuokoa, ua kahaha loa no au i kou mau manao, a aole no hoi owau wale no ; aka, o ka poe no paha a pau e lawe ana i keia nupepa, no keia mau ninau, " Eia ka ua puni loa o Oahu i ke kanu i ka raiki, ninau ana no." Nohea mai la keia manao hoopiha wale i na kowa o ka pepa, a me ka lilo i mea hoopaapaa wale aku. I Oahu aku nei no hoi au, a hala loa ma Waialua, i ka malama o Aperila i hala aku nei, ia'u i hiki ai nn Kalihi, ua ike au i kekahi mau loi nui loa, ua pau i ka hoomaikai loa ia, a ua kanuia i ka raiki, a i ko maua la i hoi mai ai mai Waialua mai, ike hou no maua ua paa loa ka loi nui mauka o ke alanui Aupuni, a i ko'u nana ana ia Kalihi, he aina uliuli maoli i ka raiki. A oluolu na maka i ka nana ana'ku. Ua kuhi au, aole la i kanu i ka raiki, aia la a hai mai ka pepa, alaila la kanu iho ua poe nei nona ia mau manao ninau ma ka Helu 16, o ke Kuokoa, a ina no ke kaulana kou mea i manao lana'i, ke hai aku nei au i ke ano o ia mea e loaa'i, "O ka ikaka ka mea e kaulana'i ka poe ui. 0 ka pono a me ka pololei, ua makemakeia ia e Iehova mamna o ka mohai." Kainoa paha he ahonui loa oe, i kapa mai ai oe ia'u he pnupauaho, ma kou kukulu ana i ka Pauku 1, 2, 3, -6, aia anei a hoolahaia kahi o ka raiki mea kanu, i mea e loaa'i i na kanaka, a me kahi hoi e loaa'i ka pahi oki raiki. He mea aha iho la ia i kou manao ana, aia ka paha a emi loa ke kumukuai o ka anoano kanu. i ekolu keneta no ka paona ; alaila, kanu oukou i ka raiki. A nohea mai la hoi kela poe nana i kanu i kela mau loi raiki nui a'u i ikemaka ai e ulu maikai ana ma Kalihi ? Eia hoi kekahi, aole au i pane ia oe noloko mai o ka manao o ka Nupepa Kuokoa Helu 1. aia malaila kela mau haina 3-6 aole pela ko'u manao pane ; aka, ua olelo au ia oe, aia ilaila na olelo waiwai loa, aole no hoi au i pane aku ia oe, o ka'u na olelo waiwai loa. Ma kou manao pakui hou mai 1, 2, 3 ; eia ka'u mea e pane aku ia oe. Aole au e apono aku ia mau mea au i pane mai nei, ina wau e apono aku, ina aole oe e ku-aki iloko o ka'u mau pane ana. ua lawe mai oe i na laau paepae waa, i mea hooili no ko waa e au mai ai i na ale o Kaieiewaho. Ua manao anei oe, o kau mau hua olelo hakukole, a me ka hoonaukiuki, ka mea e nalo ai ka haulehia ana o kou mau manao, me ko olelo mai, "No Keei au, no lalo lilo o Auahikika." Ea! e akahele oe ika pane ana mai pela, a me kou manao ana he aina lalo ia. Ke hai aku nei au ia oe, o kou ka aina kauwa, oia o Kalihi, kahi au i kukulu mai ai i kou mau manao, ua puka ka leo o ka poe kahiko, G. W. K. o Kalihi, a pela aku.

E ao oe o lalau ka Aama pii i ka pali, aole au nolaila, o Puna ko'u aina, oia kahi i laha aku ai, a nohea mai la hoi oe? Malia nae paha no ka papa mai oe o Wakea, a i ole ia, o ke kaikunane paha oe o Kamoeamakalii, ka mea a Kane ma laua o Kanaloa i hanai ai, ia ia i naku-i ai e ike i ka walaau a kanaka o Manokalanipo. ia lakou e pani ana ia Kahakiamano, (oia ke poowai,) a ke Alii Mahiai o Kauai, i ka manawa oiai aole i hiki mai ka raiki ma Hawaii nei. Aole no hoi he mau mea hoonaauao i kanaka; aka, loaa i na kanaka ke akamai noiau, ma ka hana auwai ana me ka rula ole, a pela no hoi ke kalai ana i ka ipu laau. Ua ike ae ia kakou i na noiau elua a ke kanaka, a pehea hoi kakou ka poe i aoia, e pakui hou iho no anei kakou, a pela'ku. Ke hooki loa nei au i ka'u mau olelo pane hou aku. ua nui ae la keia, ke haiki mai nei ka malamalama o ke ano ahiahi. E aho au e hooluolu i kuu kino, a mamuli e naue aku ma kahi paapaa hana. H**.