Ka Nupepa Kuokoa, Volume I, Number 26, 24 May 1862 — Page 4

Page PDF (1.49 MB)

Ka N upepa Kuokoa.

Mai na Aina e mai.

                Ke kapa mai nei na nupepa o ka He-ma, i na Koa o ka Akau, he poe Popoki eleele. Ua olelo waleia, ua Kauoha'ku o Enelani ia Farani, e hoopau i ka hoonoho ana i na koa ma Roma. O ka hana ana i na moku kaua hao, ka mea kamailio nuiia o neia mau la, e na alo Alii a pau o Europa. Ma Tureke, ua hoopoinoia e ka enemi, he ewalu Kulanakauhale ma ke puhiia'na i ke ahi, a me ka maka o ka pahikaua. He nui loa ka minaminaia o Generala Kokerana (Corcoran) kekahi Generala o ka Akau i pio ai i ke kaua ana ma Bulu Rana, aole oia i hookuuia mai e na kipi a hiki i keia la. He eono moku kaua nui o Beritania Nui, e holo ana i Kereboga, i ukali no ka Moi Napoliona o Farani, i ka wa ana e holo ai e makaikai i ka hoike makahiki nui o ka honua ma Ladana. Aole i 40 na makahiki o Gen. Garana (Grant,) aka, ua 17 kana hoouka kaua ana, ekolu hoouka ana oia no ke Generala i hoouka ai. Oia no hoi kekahi i ke kaua ana o Amerika Huipuia me Mesiko. Ua hoike mai ka Luna Hana manuwa o Beritania Nui, i kona manao e hoopauia ka hana ana i na mokukaua laau, he hao wale no ka moku kupono i kona ma-nao. Ua nui ka olioli o ka poe Alii Ahaolelo oia Aupuni i ka lohe ana ia mau mea. Ke loohia nei na wahi a pau a na kipi i noho ai a haalele iho i ke puhiia i ke ahi, a me ka poino nui i ka pololi. Oiai hoi o kahi i hikiia mai e na Koa Aupu-ni, malaila kahi i hikiia e ka maluhia a me ka oluolu. " He dala maikai no nae paha keia ?" Pela ka ninau ana mai a kekahi kanaka mea hale kua'i i kekahi mea i hele aku e kuai " He maikai no ka hoi paha ; no ka mea, na'u no i hana." Ia manawa koke no, hopuia iho ia ua kanaka nei, no ka hana i ke dala pono ole. I ka wa nae i hookolokoloia'i, hoike mai na hoike o ka mea i hoopiiia, nana ponoi i hana ke da-la ; no ka mea, nana i hana ke kamaa i kuaiia mai ai i ke dala. No ia mea, ua hoopaiia ka mea nana i hoopii i ua wahi kanaka nei.

Na pu kah iko ma Europa.

                Aole i haiia mai ma ka moolelo kahiko, ka wa mua i hanaia ai na pu kaua. Ua manaoia ma ka moolelo o Kina, ilaila ka-hi mua i hanaia ai ka pauda me nu pu-kuniahi, i na makahiki he tausani a keu mamua o ko lakou ikeia ana ma Europa. He mau mea ohe hao liilii na pukuniahi mua ma Europa, e hoolei ana i na poka kepau. Ua kauia kela mau pu maluna o na kaa, a ua paleia na koa kipu i na palehao poepoe. I ke Kenetulia 15, ua loaa i na koa a pau o Europa na pu kaupoohiwi, a me na pu kuniahi. I keia manawa, ke mahalo aku nei kakou i ke kupanaha o ka pu kuniahi nui e hoolei ana i ka poka e kaupauna ana i na pauna he 120. Aka, i na keneturia ekolu mamua, ua hanaia na pu kuniahi ma Tureke, e hoolei ana i na poka nui aku i keia. Hoolei na Tureke i na poka pohaku, o na pauna he tausani. He nui na mea e ae i kipuia mailoko ae o ia mau pu ; na pua wela, na pohaku wela, na boma, na ipu keleawe i piha i na poka liilii.
                Ua hanaiia na pu hao i hooheeheeia, a me na pu hao i kuiia, a i apoia i na liki hao nui. Maloko o Fara-ni, makahiki 1408, ma ka hoouka kaua o Tongere, ua kipuia na pu kuniahi e hoolei ana i na poka o na haneri pauna elima. Ua kapa muaia na pu kaupoohiwi, na laka kuniahi ; no ka mea, ua hooia ka pauda i na ahi kuni. Mahope wale mai, ua kuniia ka pauda i na laka mea paea, i ke kau ia Kale II, o Enelani. He anana ka loa o na barela pu kaupoohiwi mua, a ua lawe puia ke kookoo i mea ohelo no ka pu, no kona loihi. He mea hou ka laka o ka pu i hanaia i keia wa, ua loaa mua ia Rev. Alekanedero Forsyth, ke kahunapule o na Sekotia, i ka makahiki 1807.

Ka Wahine Maikai.

                Oia ko ka lani haawina hope lokomai-kai loa i ke ao nei. A o ka helehelena maikai ka kakou e mahalo nei ; aka, o ka naau aloha, lokomaikai, a malama, oia ka kakou e mahalo ai.
                He anela kokua ia i ko ke kanaka pilikia, ka mea hana ma u i na mea oluolu he lehulehu, ka mea kiai i ka pono maloko o ka hale o ke kane, ka mea pale i ka hewa mai kona hale aku, ka mea hoomau i ka haipule, ka mea e ao ana a e alakai ana i kana mau keiki ma ka pololei, a ma ka pono oiaio o ke Akua. Oia ka momi makamae a ke kane i ma-reia me ia. Me he anela maikai la kona leo ia ia, o ka mea e akaka'i ka malamalama ma ko ke kane mau maka, a he mea hemolele kona mau pono. O kona wahi maluhia ma ke apoia ana e kona mau lima, a o ke ano io o kana mau hana ke kumu waiwai o laua. Ma kona malama mau ana me ka hoomaunauna ole, ke kumu o ka lako pono ana o kona ohana a pau. Aole no hoi i ikeia aku ka laua mau keiki e hele kapa ole ana, a me ka makilo ai ana. Ua hoaahu maikaiia lakou, a ua maona maikai i kela la keia la, a e hoomaikai aku ana kana mau keiki ia ia, aole hoi lakou e haalele wale ia ia e no ho nele i kona wa e luahine palupalu ia ai. Pomaikai ke kane i loaa ka wahine e hana ana pela, a ua pomaikai hoi na kei-ki i loaa i ka makuahine e hana maikai ana.

K a Pepehi Hoomainoino Ana
O NA MAHOME DA MA DAMASEKO.

                I na makahiki i hala iho nei ka pepehi ana o na Mahomeda o Suria i na Karistiano o ia aina. Ua lohe no kakou ia mau mea a pau maloko o na nupepa. Eia kekahi hana ana a lakou ma ke kulanakau-hale o Damaseko, ma Suria. E noho kuai ana kekahi poe o Holani ma ia wa-hi. I ko lakou lohe ana i ka pepehiia ana o na Karistiano, wikiwiki lakou e huna iho i ko lakou mau mea makamae ma kekahi hale e ae, i mea e malu ai.
                 Komo mai na Mahomeda e pepehi, a e hao waiwai iloko o ka hale kuai o Mika Verene, a ike lakou, ua hunaia aku na momi me na daimana kuai o Verene, lalau aku lakou ia Verene wahine a hikii i kekahi wawae ona mawaho o ka puka aniani, e lewalewa ana kona poo ilalo. Waiho iho la lakou ia ia pela e oni ai, a liuliu, kipu aku lakou ia ia me na pu panapana a na Mahomeda mawaho mai, a kuni lakou i na welu i ke ahi, a hoolei aku i na welu ahi maluna ona. Hookahi no hora o ka hana ana pela ; alaila, make iho la kela me ka eha nui loa.
                 O Verene kane hoi kekahi i hikiia a paa, a ua hahaoia iloko o kekahi kapuahi hao i wela oloko i ke ahi, me ka ike aku i kana wahine e lewa ana iwaho. Alaila, koi ikaika aku na Mahomeda ia ia e hai mai i kahi i hunaia ai o kona mau waiwai. Hai mai kela i ka hale i laweia aku ai na moni me na daimana. Aole lakou i manao he oiaio kana i hai mai ai. A mahope wale iho, hookuu lakou ia ia ; aka, ua moa olalo o kona kino i ka wela o ke kapuahi hao, a make iho hoi kela i ka wela.
                 Ka hua maoli keia o ka hana hoomainoino a na kanaka hoomaloka ia Kristo. Aole i loaa keia ano like me ia ma na ai-na Karistiano, a iwaena o ka poe malama i ka olelo a ke Akua. Pomaikai nui ko na aina i lohe i ka olelo a ke Akua, no ka hoopauia o na hana hoomainoino e hanaia ana ma na aina pegana.

He Kanika u Aloha
KEIA NOU E LUAKAUWAHINE.

Aloha ino no kuu wahine,
Mai k a la wela o Puuhale,
Mai ke kaha kulolia ai ole. Ai ole a maua e noho ai,
Ola maua i ke ahe a ka makani,
Auwe ka mea aloha o ka wahine,
Kuu wahine mai ke kula wela o Keawehala,
Hala ke aloha, noho au me ka-u,
Me ka minamina ia oe la—e,
Kuu wahine mai ke kai o Iwilei,
Ka'u ia e lei mau nei i ko aloha,
Auwe ka mea aloha o ka wahine,
Kuu wahine mai ka makani Kukalahale o Honolulu,
Mai ka huikau lua a na haole,
Mai ka pihe kanaka o Ulakoheo,
Kuu wahine mai ka la kikiki o Keoneula,
Kuu wahine i ka malu Inia o Kapalama,
Kuu wahine i ka wai lau o Niuhelewai,
Hookahi waiwai e noho nei,
O ka-u o ka minamina i ko aloha,
Auwe ka mea aloha o ka wahine,
Kuu wahine o ke kula wela o Kaiwiula,
O ia kula Iniko a kaua e hele ai,
Kuu wahine i ka malu o ka Niu o Apili,
I ka pili no kaua a hele oe,
Haalele i ka pili me ke kane,
Kuu wahine i ka ai haaheo a ke dala.
Kuu wahine mai ka hale paa i ka ehukai.
Kuu wahine mai ka i-a pa kanaka o Keehi.
Mai ka i-a uhai aholo a pau ke aho.
Kuu wahine mai na ale pukuilua o Pailolo,
Noho ana ka uhane i ka pohu o Lele,
Auwe ka mea aloha o ka wahine.
Kuu wahine mai ka ua nahua o Kaanapali,
He pali nui na'u ke aloha e malama nei:
Inai pu no me ka waimaka,
Kuu wahine mai ka makani Kilioopu o Wai-hee,
Mai ka malu o ka hekuawa o Wailuku,
Mai ke one ku-a-kii o Kahului,
Hului ke Akua i kana waiwai o ka uhane,
Uhane kino makani, kino wailua;
Elua hana i kuu manao,
O ka-u o ka minamina i ko aloha,
Auwe ka mea aloha o ka wahine,
Kuu wahine mai ka ua Ukiukiu o Makawao,
Mai ka ua Ulalena o Piiholo,
Holo ka uhane noho i ka malu Kukui,
Uhane lei hala o ke Koolau,
Au hula ana o ka pili kaunoa,
Niau ka uhane pahee i Kaliae,
A Kauiki, ulaia ka uhane,
Auwe ka mea aloha o ka wahine,
Kuu wahine mai ka i-a iki o Hana,
Mai ka ua Oninipua i ke kai,
Huli aku ka Uhane nana ia Kumukahi,
Akahi au a ike i ka mea aloha o ka wahine,
Kuu wahine mai ke kai hawanawana o Kawaihae,
Mai ka ua Kipuupuu o Waimea,
Huli aku ka uhane nana i ke ahe a ka ma-kani,
Auwe ka mea aloha o ka wahine,
Kuu wahine mai ka ihu o na moku,
Mai ka ua popo kapa o Nuuanu,
U ka uhane honi i ke ala o ka hala,
Mai ke Kawelu o Lanihuli,
Kuu wahine mai ka ua Kua-o-e o Mololani,
Mai ke ko-a mokumoku o Heeia,
Aloha ia wahi a kaua i hele ai,
Kuu wahine mai ka ua poaihale o Kahaluu,
He luuluu, he kaumaha i ko aloha e noho nei,
Kuu wahine i ka makani anu o Kahana,
Mai ka uka anu o Kaliuwaa,
O ia uka mehameha kanaka ole,
Hoolau kanaka i ka leo o ka manu,
Kuu wahine mai ka ua maakua o Hauula,
Kuu wahine mai ke one hanana o Pupukea,
Kuu wahine mai ka malu hee puewai o Waimea,
Mai ka i-a kahea kanaka o ka aina,
Mai ke kai leo nui o Waialua,
Elua manao a loko e noho nei,
Kuu wahine mai ka hau anu o Kaala,
Ke opu mai ia iluna o Kamaoha,
Hoolue iho la i ke kula o Malamanui,
A nui no ko aloha, e uwe no wau—e,
Kuu wahine i ka i-a hamau leo o Ewa,
A pane ae ka leo makani i-a,
Kuu wahihe mai ka i-a hawanawana i ka wawae,
Olelo ana i ka lau o ka lima,
E hai mai ana i kona inoa, he Mahamoe,
Mai ka makani kuehu lepo o Ewa,
Me he kanaka la ka wiliwili o Kaupea, i Kanehili.
Ua hili au, ua mihi alua i ko aloha,
Kuu wahine mai ke awalau o Puuloa,
Mai ke kula wela la o Peekua,
Kahi a kaua e noho ai,
Kuu wahine mai ke kaha loa o Kumumamo,
O ia wahi a kaua e hele ai,
I ke anu a me ka makani,
Kuu hoa o ka i-a leo nui o Keehi,
Kuu hoa pili o ka po a me ke ao,
Kuu wahine i ke kai o Mokulau,                        [ne,
Hele hookahi aku nei oe i ka polikua a Ka-
Noho au me ke keiki a kaua,
Uwe helu ae nei o Kaiona,
Aloha ino no kuu makuahine,
Mai ka ua hau a pepe o Kalihi,
Mai ka la wela o Kaiwiula,
Mai ka hale pihe kanaka nui,
Auwe ka mea aloha o ka wahine.
PAWAI. Puuhale, Kalihi, Mei 12, 1862.

He Inoa no Uila.

Auhea wale ana oe,
E ka pua Kamakahala,
Mai hoohala mai oe,
I ka pili la ua paa,
Ko kino kai au mai,
A loaa wau ianei,
Ka waiho no a ka i-a,
Aole e amu ia iho,
Kau nui ko'u manao,
I ke kahuli leo lea,
Ai lehua o kanahele,
Kuu maka kai ike pono,
I ka nani o ia pua,
Ke ala ka'u i honi,
Kuu kino kai Waolani,
He makani ka'u i lono,
I ka lawe olelo ae,
A ka ua Apuakea,
Aneane e iho mai,
Paio me ka Hoolua,
Elua o'u kikina,
Laki maoli ia mana,
E ai haaheo nei,
I ka pua o ka Oliana,
Kai noa ua ana oe,
I ka i-a ka okoa,
Mai ke poo a ka hiu,
I haawi hemolele ia,
Kuu pau aku ai au.
Keia kino me oe.
Eia mai he aloha.
A he lai no ko kino.
Auhea l a hoi oe.
Ka la wela i Haili.
Ilihia iho nei au,
I ka nui o Kanahele,
I ke alu a na manu,
Wa olelo ia uka,
He aloha wale Lilinoe,
E pue nei i ke anu,
E alo nei i ka ino,
Pa ka makani Ulumano,
Hali ala o Mahiki,
A kahi a hiki mai,
A lana mai ka manao,
E ako no ia pua,
I ka ai a na a ka manu,
A kahi a aloha ae,
I ka pua o ke Kukui,
Kuhi au ua lawa pono,
Kuu lei e kui nei,
He manao e hoolawa,
Me ka pua o ka makemake,
Eia ke hoi nei,
O ka la welo i Lehua,
E napoo i ka ili kai,
Kipuia ka manao,
A kau ma ka Hikina,
Eia mai he aloha,
A he lai no ko kino.
L. HALEAKALA.

PAPA MAKEPONO!

                AIA KA HALE KUAI O LUI (C. H. LEWERS.) ALANUI PAPU, kahi e kuai oluolu ai. NA PAPA OREGONA 1 a hiki 3 iniha, LAAU KAOLA, ua a me na pou, a me na opaka e ae. LAAU PA a me na PINE PA. LAAU AHO HALEPILI. PAPA ULAULA, PAPA PAINA, PAPA KEPA, PILI ULAULA a me KEOKEO. PENA KEOKEO, OMAOMAO, ELEELE, ULAULA. POHO, GALU, HULU PENA. KUI o na ano a pau, LAKA. AMI, KILOU, KUI KAKIAMOENA, KUINAO. PEPA HOONANI KEENA. PANI HALE, PANI ANIANI. ANIANI KAAWALE, PATE. PANI OLEPELEPE. Eia ka mea kupanaha ma keia wahi, na ka mahu e hana i na pahu apo, he hikiwawe, kupanaha. E hele nui mai e kuai a e ike wale i keia KAMELO. Ua hoeomi ia na Laau Oregona i keia wa, i ELUA KENETA ME KA HAPALUA no ka kapuai. 8-6m

OLELO HOOLA HA.

                O KA MEA NONA KA INOA MALAlo nei, ke papa aku nei oia i na kanaka, haole, a me ka pake, o kela ano kanaka keia ano kanaka a pau, e nana mai ana. Ke papa aku nei au i na mea a  pau, mai hookuu wale oukou i ko oukou mau holoholona, ma ka Apana kula o Ukumehame, mai ka pali o Manowainui, e pili ana me Waikapu, ua kapu ia Apana kula. Ina i loaa hookahi holoholona e hele ana ma ia Apana kula i oleloia maluna, e uku mai ka mea holoholona $1.00 (hookahi dala.) me ke kao, a me ka hipa, ewalu poo $1.00 (hookahi dala.) Ina aole e loaa mai ka uku e like me na mea i oleloia maluna, alaila, e hookomo ana kuu kanaka ma ka Pa Aupuni, no ke kolohe i ka mauu o ua Apana kula la me ke kuleana ole.
P. NAHAOLELUA. Hope Luna Aina o ka Moi.
Lahaina, Maui, Maraki 31, 1862. 19-tf

KINI PAI KII!

                MAKAUKAU LOA E PAI I NA KII O OUKOU. Aole o kanamai o na pahu KII Ano Hou. MA KA AOAO HIKINA O KA HALE LETA. 24-2m

I NA KANAKA HAWAII PAE AINA !

                KE HOIHOI AKU NEI AU I ALOHA NO ka lokomaikai a oukou i haawi mai ia'u iloko o na makahiki he umikumamakahi i kaa hope ae, a e koi aku hoi ia oukou e hele mai e kuai. Ua hooili aku nei au ma ka moku Cometa, mai keia wahi aku, he mau WAIWAI HOU no ka Hale Kuai Nalomeli ! Ua manao au e makemake nui ana, oukou i kekahi o na mea a'u i hooili aku nei. E holo ana au mai anei aku i keia la ma ka Mokuahi Golden Age: Ahiki i Nu Ioka, he 2200 ka nui o na tona o keia moku. Ma ia hope aku, e holo loa ana au i Enelani, a me Secotia, a malia paha o hala loa au i Farani, e kuai ai i mau lole a me na waiwai hou no oukou. E hooikaika ana au e imi i na mea i ike mua ole ia e oukou, me ka hooikaika e hooluolu ia oukou, a e imi hoi i ke dala mai a oukou mai. Ua lawa ko'u manao e ike i kekahi mau mea hou ma ka hoike makahiki nui, a i na au e hiki aku, e hai no au i na mea a pau Mai poina i ko oukou manawa e makemake ai i na palule o na ano a pau, na koloka, na papale, na papale oo na, na holoku maikai, a me na hulu maikai, a oukou i ike ole ai mamua, a me na waiwai e ae he nui wale. E na makamaka, e hele mai e kuai ma ka Hale Kuai Nalomeli. Aloha oukou a pau loa.
JOHN THOS. WATERHOUSE.
Kapalakiko, Aperila 1, 1862.

HALE KU AI MAKEPONO.
MANUAHI LAUNAOLE

                AIA MA KE ALO O KA LOIALA HOTELE, ma ke kihi o ke Alanui Nuuanu me ke Alanui Manini. E loaa'i na lole  MAKEPONO LOA, na ano a pau. He nui loa ka AILA manuahi ma ia Hale Kuai. E hele mai e nana no oukou iho, e na makamaka kanaka maoli a pau. A e kuai aku no au me ka maikai, a me ke ku i ke oukou makemake.
KALE, (Charles Brenig.)

PALENA! PALAOA!
A M E KA
Aila Kukui Makepono.

                E IKE NA KANAKA A PAU, UA MAKAU-kau au ka mea nona ka inoa malalo nei, e kuai aku i ka Palena, Palaoa, a me ka Meaono, maikai loa, ma ko'u Hale Kuai, ma ke kihi e ke Alanui Hotele Honolulu, Aperila 1862.
G. WILIHEMA  22-3m

MANUAHI, MANUAHI.

                IKE OUKOU E NA KANAKA a pau, eia ma ko'u Hale Kuai Bipi, ma Ulakoheo. Na io bipi momona loa o na bipi kupaluia a pau o na kuaaina mai, i laweia mai ma ko'u HALE KUAI BIPI, Io Bipi Momona, Waliwali, a Palupalu hoi. O na io ma ka ai ana iho, aole hoohalahala iki ka puu i ka ono oia mau mea. E hiki ia'u ke kuai aku ma ka paona, a me ke KUAI MANUAHI, me ka paona ole. Pono oukou ke hele nui mai e kuai me a'u, i ike io oukou i ka oiaio o na olelo maluna. Ua loihi loa ko'u noho ana ma keia oihana, no kuu aloha loa i na keiki a me ka lehulehu a pau o ke Kaona, a me keia Mokupuni okoa, a no ka pono o ka poe ma ka moana a me ko na aina e, a ua kamaaina loa au ia oukou. E hele nui mai oukou oiai au e noho ana i Kuene na oukou. E wiki mai oukou.
J. W. KAIKAINAHAOLE.
Honolulu, Aperila 23, 1862. 22 tf

OLELO HOOLAHA.
Mea Makemakeia!

                K E MAKEMAKE NEI KA MEA NONA KA INOA MA-lalo iho, e kuai aku i ke Kukane (Citron,) a me ke KUKANE MAKA, a e ukuia no ke kumukuai makepono, i ka poe a pau e lawe ka poe i lako i na hua KUKANE MAIKAI ! E hele mai ma ko'u Hale Kuai, ma kekahi o ke Alanui Alii a me Alanui Maunakea, e pai ana ma ka aoao ma Ewa e ka pa O Keoni Miki.
WILLIAM HORNE.
Honolulu, Maraki 5, 1862. 15-3m.

B IPI
Momona Makepono.

                MA KA HAL E KUAI BIPI KULA- nakauhale o H. Conawela, mala-ila kahi e loaa ai ka Bipi momona, Puaa momona, a me ka Hipa momona, a me na mea e ae he nui wale oia ano, no ka uku emi loa. E hele mai na kanaka a pau, i ike maka i ka MAKEPONO, A i pau hoi ke kuhihewa. Aia ma ke Alanui Alii, ma ka aoao ma Waikiki o ka Hale Kupa Pahu, ma Polelewa,
H. CONAWELA.
H onolulu, Mar. 13, 1862. 16-3m

KA LAKO HALE
A ME NA
Pahu Kupapau!

                AU HEA OUKOU, E KA POE E MAKEMAKE ANA E kuai ma ke ano makepono wale! Eia na ke waiho la ma kuu Hale Paahana, ma Alanui Papu. NA PAPA KAUKAU! NA LAKO HALE! NA PAHU KUPAPAU! PAHU KOA......$12. Ua loaa mai hoi na mea hoonani Pahu Kupapau he nui loa, a e kuaiia no ka uku makepono. A ua makaukau no hoi au e kuai aku i na mau mea hoolako hale, a ka poe e makemake ana e kuai me a'u no ke dala. No laila, ke makemake nei au e kuai aku i na lako hale o hai me ka uku aku i ke dala maoli, a ua lako hoi i na mea hoolako hale no ke kuai aku ia hai, no ke kumukuai emi loa.
HANALE ALENA. 12-6m
Alanui Papu.

MAKE MAKEIA.
ILI BIPI, ILIKAO,
a me ke KELEAWE kahiko.

                UA MAKEMAKEIA NA MEA I HAIIA maluna e C. Brewer & Co. (Burua ma) ma ko laua Hale Kuai i kai o ka Uapo. E uku no laua i ke kumukuai makepono no ia mau mea.  20-3m.

C. BREWER & Co.

LA LA MANO
A M E KA
Pepeiao Laau.

                KE MAKEMAKE NEI NA MEA nona na inoa malalo, e kuai i ka Lala Mano a me ka Pepeiao Laau. Me ka uku aku i ke kumukuai make pono, penei :No ka paona hookahi o ka Lala Mano he 15 keneta. No ka Pepeiao Laau, 7 1/2 keneta no ka paona hookahi. O ka poe e loaa'na na mea i haiia maluna, e pono e hele mai ma ko makou hale kuai, ma ke Alanui Alii, e pili ana ma ka aoao komohana, o ko Daimana ma Hale Kuai. 19-3m
UTAI A ME AHEE.

PA AUPUNI MA K UALOA.

                NO KA MEA UA KOHOIA MAI maua i mau Luna no ka pa holoholona hele hewa, e ka mea Hanohano M. Kekuanaoa, Kiaaina o Oahu, ke hoolaha aku nei maua, aia ka pa ma Kualoa, Koolaupoko, ua makaukau maua e hana e like me ke Kanawai.
JUDD A ME WILDER.
Honolulu, Maraki 1, 1862. 19-3m

KAM ANO!
KAMANO!!

                1050 PAHU KAMANO MAIKAI LOA i loaa mai nei. A e kuaiia aku e like me ka makemake o ka poe kuai mai. Ma kahi o 20-3m.
H. HACKFELD & Co. (KALEMA.)

Ha ule, $20 00 Makana !

                UA HAULE NO HE KOMOLIMA DAIMANA nunui, kupono no ke kane, hookahi pohaku e kau ana, a ua kuniia ka pohaku i kekahi mea uliuli (pulu:) a ua haule hoi he mea gula hoailona o ka poe Hui Masona me na hua-olelo "Honolulu, R.A.C." i kahaia ma kekahi aoao. O ka mea nana e lawe mai, a hai mai paha i kekahi mea e pili ana i ua mau mea haule nei, i ka mea nona ka inoa malalo nei, e ukuia oia i ka makana i oleloia maluna ae nei. E loaa no wau ma ka Hale Hookolokolo, Oahu
THOMAS BROWN.Luna Kakau Kope o ke Aupuni
Honolulu, Maraki 31, 1862. 19-tf

KAKELA ME KUKE.

                MA KA HALE POHAKU HOU, MA POLELEWA kahi kokoke i ka Halepule Betela ma Honolulu, Oahu. Na laua no e kuai i na lole o Kela ano keia ano. NA MEA AI, NA BAKEKE, NA IPU TINI, NA PA LEPO, NA KAMAA, NA PAHI me na O-O NA PAPA me na NOHO NA IPUHAO, NA NOHO LIO, NA MEA E KAKAU, NA PENA ME NA AILA, NA MEA MAHIAI. A me kela mea keia mea. Me na laau a Dr. D. Jayne. Honolulu, Dekemaba 1861

PAPA MANUAHI.

                EIA KA MEA H OU LOA NO NA KANA-ka maoli o Hawaii nei, ua loaa mai ia'u na papa Oregona o kela ano keia ano, me ke kumu kuai make pono loa. E po-no e hele mai oukou e hoakaka i ka oiaio no keia mea. Eia ke ano o na laau a me na papa. Papa paina no Amerika a me na Pine pa, Pili. Laau nui, Laau Liilii, Papa hele, Papa kahiia, Papa kalakala, Eia kekahi: Wai hoomaloo a me na mea e ae, kupono no na hale, Pena keokeo Pelekane maikai loa, Pena omaomao lenalena, Aila pena. Aia ma kai, ma Aina Hou, Mauka iho o ka Hale Dute Hou.
Honolulu, Maraki, 1862.
GEO. G. HOWE. 19-3m

J. H. COLE.

                LUNA KUDALA. Ma ka Hale Pohaku o Mi. Aniani ma Ma ke Alanui Alii Wahine.  7-6m

H. W. SEVARANA.

                Luna Kudala a mea Kalepa, Hale Mahoe. Alanui Aliiwahine. 5-6m

OLELO HOOLAHA.

                E IKE AUANEI NA KANAKA A PAU MA keia Aupuni, ua hoopauia ka noho Luna Hana ana o AKO (Pake,) ma ko maua aina mahiai, ma Amauulu Hilo, Hawaii, ma ka la 4 o Aperila nei. A ua lilo o AHANA (Pake,) a me AKANA liilii (Pake,) na Luna ma kona wahi, a na laua no e hana oluolu aku i ka poe a pau e makemake ana e hana KU MAKAHIKI, a Eia hou.— O ka poe a pau i mahuka aku e pono e hoi mai, aole lakou e hana ino ia'ku, o na Luna Hana hou a maua i koho aku nei, ua kauohaia e hana me ka oluolu loa i na kanaka paahana.
UTAI & AHEE
Honolulu, Aperila 28, 1862. 22-1m

AKE, (A. S. CLEGHORN.)
Olelo Hoolaha.

                O KA POE A PAU E MAKEMAKE ANA i na lole maikai a me na kamaa paa. E aho ia lakou ke hele ma ka Hale Kuai o Ake, (A. S. Cleghorn,) make. Ua lako mau ia Hale Kuai i na WAIWAI KALEPA, i kela ano keia ano. Na KALAKOA PELEKANE, a me na waiwai maikai eae he nui wale. Aia na Hale Kuai ma ke Alanui Nuuanu mauka iho o "HALEOLA,'' a ma ke kihi o ke Alanui Nuuanu me ke Alanui Ka-epa, makai iho o ka Loiala Hotele. 19-3m

KA LE ONILA.
FARANI ALABINE
Hale Hana Waihinuhinu.
ALA BINE ME KALE.

                O KA POE A PAU E MAKEMAKE ana i mau mea hoonani Hale maikai, e poo ke hele ma ka Hale o na mea nona na inoa maluna, malaila e loaa'i na Papakaukau Koa. Papakaukau Paina, Moe Koa. Moe Paina Koki. Noho maikai, A me na mea e ae he nui wale, no ka uku Emi loa. O na mea nona na inoa maluna, oia no na haole i hana'i mamua ma ka hale o C. K. Uilama. Aia ko laua Hale ma ka aoao Komohana o ka Hale noho o J. H. Brown Esq., ka Makai Nui o Oahu, ma ke Alanui Alii. 7-6m.

J. P. HUGHES.
MEA HANA NOHO LIO!

                A IA MA KA HALE KUAI O KA mea nona ka inoa maluna nei, he Noholio Pelekane a he Noholio Meleka, a me na Noholio Wahine, o na ano a pau, na Noho Paniolo nu hou. NA HAO WAHA a me NA KEPA o na ano a pau NA KAULAWAHA, a me na mea e pono ai ka lio. NA ILI KAUO o na ano a pau. NA EKE ILI. NA HUIPA. KA HAO KEEHI. NA PALAKI LIO. NA KAHI LIO. A me na mea e ae a pau loa e pili ana i na lio a me na kaaholo, a e kuai ana no ia mau mea, No ke kumukuai makepono loa ! Aia no ke waiho mau nei malaila na pela mauu. O na pela pulu, na pela hulu, a me pela uwaea.  E hanaia no e like me ka mea i kauohaia mai. Ua hanaia no na kaa lealea me ka maikai loa, a me ka makepono hoi. Ua hana hou ia na mea a pau e pili ana i ka'u oihana me ka maikai. E malama pono ia no na mea a pau i kauohaia mai e pili ana i ka'u oihana. E loaa no wau ia oukou ma Monikahaae, ma ke kihi o ko Alanui Hotele a me ke Alanui Papu        
J. P. HUGHES.
H onolulu, Aperila 1, 2862. 19-1y

HOONANI HALE,
MAKEPONO.

                O KA POE A PAU  E MAKEMAKE ana e loaa na mea maikai e hoonani i ko lakou mau hale, e aho e naue mai i ka Hale Kamana o ka mea nona ka inoa malalo, ma ke Alanui Hotele, a malaila e loaa'i ia lakou na PAPA KAUKAU Nui A LIILII HOI, NOHO O NA ANO A PAU.MOE O NA ANO A PAU. PAHU KUPAPAU. E ku mai ana mai Bosetona mai, ma ka moku George Wasinetona, ma ka malama ae nei o Ianuari, he mau mea HOONANI HALE o na ano a pau, a e kuai Emi aku no au E hele mai e nana a Kuai iho.
C. E. WILIAMA. (UILAMA)
H onolulu, Ianuari 6, 1862. 6-6m

OLELO HOOLA HA.

                NO KA MEA, UA NOIIA MAI AU, E KAUAUA, e hoolaio i ka Palapala Kaouoha o Kahopu, no Hilo, Hawaii, i make aku nei: Nolaila, ke hoike ia aku nei i na kanaka a pau, ke pili, o ka Poaono, oia ka la 3 o Mei, i ka hora 9 o kakahiaka, oia ka la a me ka hora i oleloia, no ka hoolohe ka oiaio o keia noi ana mai, a me na mea hoole i hoikeia, aia ma kuu Keena ma Hilo, kahi e hana ai.
S. L. AUSTIN. Lunakanawai Kaapuni.
Hilo, Hawaii, Aperila 2, 1862. 20-tf

Ana Aina.

                AUHEA OUKOU E NA ME A PAU E MAKE make ana e "ANA" a ko oukou mau kuleana aina, e ma- hele ia ko oukou aina hui, e hoomaopoopo ia ko oukou mau palena aina i pau ka hoopaapaa. Eia no au ua makaukau e hana i ka oukou hana, ina ma ka Apana o Hilo a me Puna
paha, me ka uku haahaa. Ina ua pilikia au, o ko'u kaikaina no ka mea e kokua mai ia'u. E loaa no wai ia oukou ma ko'u  hale, ma Hilo Hawaii.
D.H. HITCHCOCK.
Hilo, Hawaii, Maraki 20, 1862. 18-3m

HALE K UAI MEA HAO.

                UA HIKI MAI MA BOSETONA MAI, NA na mea hao hou loa. A eia ma ko'u hale kuai, ma o keena mauka o ka Hale Uinihepa ma ke Alanui Papu. Na waiwai hou he nui wale, o kela ano keia ano. Na laka puka hale. Pahiolo a na kamana. Koikahi o na ano a pau. Kui hana hale, hana pa a me ke kui hana waapa. Kui keleawe a me ke kui kepau no ka waa. Kuaina kupono no ka hana upena. Koi nui a me na koi liilii. No ka poe oo a me ka poe opiopio. Mau oo pe maikai no ka mahi loi. Mau ho maikai kekahi. Palau maikai. Pahi oki laiki Me na oo he nui wale. A me na mea e ae he nui wale. He EMI loa ke kumukuai no na mea i haiia maluna. E hele nui mai i pau ko oukou kuhihewa. 19-3m
W. N. LADD

WI LIAMA DUFENA.
ME A
HALE KUAI BIPI.

                KE HOOLAHA'KU NEI AU I NA KANAKA a pau, eia ma ko'u Hale kuai Bipi, ma ke Alanui Alii, ma ka aoao hikina hema o ka Hale Kuai o Daimana ma kahi i waiho mai ai o ka Bipi Momona Maikai, me ka Puaa, a me na mea e ae a pau he nui wale. A e kuai aku no au i na kanaka maoli me ke KUMUKUAI EMI LOA. E hele mai e ike no oukou iho (8-6m)
W. DUFENA, (W. Duffin.)