Ka Nupepa Kuokoa, Volume I, Number 20, 12 April 1862 — Page 1

KA NUPEPA KUOKOA

Ke Kilohana Pookela no ka Lahui Hawaii

BUKE I.  HONOLULU, APERILA 12, 1862.  HELU 20.

 

He Mele.

Kuikuia mau haakuia ka manao,

Konikoni ha ka lau o kuu manawa,

O kau manawa la hoi la,

Ua eha, ua opa, ua wali,

Ua wali, ua nawaliwali,

Ua wali, ua mala i ke kuko,

Kuko ka po, i po kuko wale no,

Lia ke ao, i ao lia wale no,

Uluku ka maka, uluku i ke aloha,

I uluku nui hoi i ua hoa la,

Aohe la e puwai leo mai ai,

I na i hoi paha la, hai — e, hai — e, — e.

 

Hai ka iwi o ke ake ka lau ka liko,

Ka liko ke kanaka maoli nei no,

Kanaka maoli nei no i ka honua nei,

I na hoi oe i manu lele luna,

Hoohulu aku la ua hoa nei,

Nana aku la makou ilalo nei,

I ka la lalahai ana mai, la lalaha, — a — ea;

Ike aku la makou, he okoa ia le, — e — ole,

O kakou no kakou, o kakou no,

Wahi a kamalii, — i, ma — i — e — e.

No Kauikeaouli I.

Na ONI, i haku.

 

Halawai ma Kaumakapili.

                Ma ka po o ka la 1 o Aperila, oia ka Poalua, he halawai ma ka luakini, ia Laioha ka olelo mua ia po, ma Ioaba 16 : 22. Ua we-hewehe mai no ia ma na mea e pili ana i ke kumu olelo, me ke ano hooia. Ku mai la kana wahine a kamailio i ke ano o ko laua hele ana me ka ikaika o ka leo, e huli ana io a ianei, imua o ke anaina, ua lawe mai ke anaina e ku poai mai ana, me ka mahalo aku i ka olelo a Leioha, o kana olelo i pili i ke ku-mu olelo, ua pili i ka hanau ana o ka Makahiki i na la o na la ua hanau i na hora, o na hora ua hanau i na minute o na minute i na sekona, pela wahi ana, he olelo hookamani i ka nana aku, aole he wehewehe pololei i ke ano o ko laua holo ana. Aole au i ike i kona wehewehe nui ana i ke ano o ko laua holo ana, nolaila ko'u mahalo ole i kana olelo.

                Ku mai o P. Kapohaku, a wehewehe iki no i na mea e pili ana i ka olelo a Laioha, pauia, ku mai ke kanaka Nuuhiwa a olelo mai i mua o ke anaina ma ka olelo Nuuhiwa, ku mai o P. Kapohaku, a unuhi ma ka olelo Hawaii, mai loko ae o ka olelo Nuuhiwa. Eia ke ano nui o na mea i unuhiia mai. E hoi ana au a hoohuli mai i ko'u alii ma keia pono maikai o ke Akua a me ka'u mau kei-ki a me ko'u ohana, wahi a ua Nuuhiwa la, no ka mea, ua ike he maikai loa na ko oukou malama i ke Akua, aole pela makou, ua mahalo loa au no ko'u hiki ana ma keia aina, ua maikai loa oukou aole i paeleia, e hoi ana au a i ka'u mau keiki, aole ou makemake e paele ia laua, oia kekahi o kana mau olelo, wahi a ua kanaka Nuuhiwa la, ua makemake au e hoonoho i kekahi keiki a'u me A Kaukau, a o kekahi keiki a'u me kekahi mau kumu e ae, a ke hoi nei a'u a hoohuli mai i ko'u alii, a i huli ole mai, alaila hoi mai au i Ha-waii nei, ua lawe mai ke anaina pule ia mau olelo me ka mahalo nui.

                Eia kekahi mea maikai o ka iho mai o P. Kapohaku, ma ka olelo o kona aina iho, a pauia, iho mai ma ka olelo o ko Nuuhiwa pae aina, na kulu aku na kulu mai ua mea he piha i ka olioli.

                Ku mai o Kenui o Lahaina, a hai mai i ko-na manao i mua o ke anaina, penei kana, "Ua maikai na olelo a kakou i lohe ae nei, a ua mahalo au i ka olelo a keia Nuuhiwa, no-laila, o wau kekahi e holo pu ana me ia nei, a he hoike au no laua nei i keia holo ana.

                I holo au a he oiaio ka laua nei e olelo nei, hoi mai no au a hai aku ia oukou, e! ua oi-aio ka olelo a ua mau kanaka la, a i ike aku no hoi au ua oiaio ole ka oleloa laua i olelo iho nei a ua haalele iho no ia Oahu nei, na'u no e hai hou mai ia oukou, i ka oiaio ole o ka mea a laua i olelo ai, alaila e hoohalike au ia laua nei e like me Makunui a kakou i ike ai."

                Aka, maanei paha he oiaio ka hoohiki ana a hiki paha auanei ma o hoi hou laua nei i ka hewa haalele i ka oiaio. Ua mahalo nuiia he wahi makana kekahi i kokuaia i kela po, he dala kuai hainaka, lole, a pela he mea kokua alohaia,

J. K. KAUNAMANO.

Aperila 3, 1862.

 

HE MOOLELO NO UMI.

KEKAHI ALII KAULANA O KO

HAWAII NEI PAE AINA.

HELU 9.

                HOI O KIHAAPIILANI, A HIKI IUKA o Kalaniwai, kanu ia i ka haawe lau ana a pau, mahi oia i ka mala uala ana a oo, i aku ia i kana wahine, "E hele paha kaua e nana i ka mala uala." I mai la ka wahine, "He mala uala no ka kau ! "Ae aku la keia, aole i manao ka wahine, he mala uala io ; no ka mea, ua maopopo i ka wahine, he wahi manawa iki ka hele ana, he nui ka noho ana maloko o ka hale.

            I ko laua nei hele ana e nana i ka mala uala, a ike iho la ka wahine, he mala uala nui, aole e ike aku ma kekahi aoao, hookani aku la ka wahine no ka nui launa ole o ka mala, ua oo ka uala, kohi iho la o Kihaapiilani a loaa na uala, hoi laua nei a ka hale, ike mai la na makuahonowai o ia nei, e hoi aku ana laua nei me na kiki uala. Olelo iho la na makuahonowai o ia nei, ke kane me ka wahine, "Nohea la ka laua uala i hele aku nei e makilo, hilahila ino, o ka noho palaualelo ana ka ia, a hele e makilo i ka hai ai, o ke nui hea la o na poohiwi, hoao iho no ka ikaika i ka mahiai?" Hiki ana ke kaikamahine a laua nei ma ke alo o laua, a o Kihaapiilani hoi, hiki ae la ia ma kahuna-imu, wehe keia i ka pohaku o ka imu.

            Ninau mai la na makua o ua kaikamahine la ia ia, "Nohea aku nei ka olua uala i hele aku nei e makilo?" I aku la ke kaikamahine me na olelo haanui ia laua, "Nohea mai ka ka olua ! Koi mai nei o ua o ia'la e hele maua e nana i ka mala uala ana, i hele aku nei hoi ka hana o mana, aole no hoi o ka mala uala nui o kana mai! Aole no hoi e ikeia aku kela aoao ke nana'ku, ua like ka nui o na kanaka e pau ai kela mala uala nui, me na kanaka hookahi kaau, oia hoi he 40 ka nui." Pa iho la i ka naau o ua mau makuahonowai nei o Kihaapiilani, wai olu wale ka manao.

            Alaila, akahi no na makuahonowai a oluolu loa i ka laua hunona, pau ke oi ana o ko laua mau kino, pau ko laua mau maka huhu, pau ka laua olelo pakike ana, haule loa ko laua leo malalo o ka laua hunona. Ia la no, hele na makuahonowai e nana, ia hele ana a laua, ua like me na olelo a ke kaikamahine a laua nei, manao iho la ua mau makauhonowai nei, na kekahi poe e aku kekahi aoao. Hele laua nei i kekahi poe kamaaina o lakou e ninau ai, i ka hele ana a laua nei e ninau i na kamaaina o lakou nei a pau. Hoole like mai lakou, aole lakou i mahiai ma ia wahi, me ko lakou olelo like mai ia laua, na ka hunona no a olua ia mala uala, alaila, komo iloko o laua nei ka manao hilahila i ka hunona, no ka laua mau olelo inoino, a na laua keia inoa i kapa aku o Kenuipoohiwi, no ke nui o na poohiwi o Kihaapiilani, a me na lima, no ka noho wale iho no o Kihaapiilani, he palaualelo ke ano i ko laua manao ana, oia ko laua mea i kapa aku ai i keia inoa ona o Kenuipoohiwi, oia kona inoa i hea mau ia, ma ia wahi ana i noho ai, a ua o aku no ia ia inoa ona, ua oluolu maikai no ia i kona mau maka.

            Hoi aku la ua mau makuahonowai nei a ko lakou hale, e huai ana ka hunona i ka imu uala, ua moa ka ai, ai uala hou lakou nei a maona. Kukule loa iho la ua mau makuahonowai nei o ia nei, me ko laua manao nae ola ko laua mau iwi i ka laua hunona, no ka ikaika i ka mahiai.

            A poeleele loa iho la, hoomakaukau ihola lakou e moe. Ia Kihaapiilani e moe ana ma ko laua wahi moe, me kana wahine, olelo kauoha aku la ia i kana wahine, "E hele ana wau, haalele au ia oe, he nani ia, ua mahi iho la au i ka ai a ua oo, a nau no e ai ka luhi o kaua." I aku ka wahine, "O kou hele loa no ka keia, aole oe e hoi hou mai." Ae aku ke kane, ua nui ke kaohi ana a ka wahine me na olelo hoalohaloha imua o kana kane, aole ona manao i ka noho, manao nui ia i ka hele. I aku ke kane, "E hele ana wau, a kau, a hooilo, ina he manao aloha kou ia'u, e noho kane ole oe a hiki i ko'u wa e hoi mai ai : aka hoi, ina oe e moe hou aku i ke kane nau, he pono hoi ia."

            Aole he hai iki mai o ka ka wahine kaohi ia ia e noho, manao o Kihaapiilani, aole mea e pau ai o ka ka wahine kaohi ia ia, hai aku ia i kana wahine i mea e pau ai kona manao kaohi, "Auhea oe e kuu wahine, ke hai aku nei au ia oe, mai hai iki i kuu inoa, o Kihaapiilani au, e hele ana au e imi i hoa kumakaia no kuu kaikuaana, no Lonoapii, oia o Piilani."

            Alaila, maopopo iho la i ka wahine o Kihaapiilani no keia, he Alii nui, hookuu aku la ia e hele. O ka hele no ia o Kihaapiilani a hiki i Waikapu, malaila o Pao, he wahine kaula ia. Ia ia nei nae e hele aku ana i ke alanui, ua wehewehe o Pao no kana moe i ko lakou poe, penei kana wehewehe ana, "He Alii hoi keia e hele mai nei e imi i hoa kumakaia nona." Ia ia nei nae e kokoke e hiki aku i ka hale o Pao, ku iho la ke anuenue, ku ana keia ma ka puka o ka hale. I iho la o Pao, eia ae, a kaei ae la ke anuenue, ku ana keia ma ka puka o ka hale, pane mai la o Pao, "Mama ino e kuu Haku."' Aloha iho la laua nei a pau ke aloha ana. Hookipa maikai iho la o Pao i ke Alii, a pau kana hookipa ana, ninau mai o Pao i ke Alii, "Heaha ka huakai a ka Haku o ka hele ana mai o ka ikiiki o ka la?"

            I aku la ke Alii ia Pao, "I hele mai nei au e imi i mea e make ai o kuu kaikuaana o Piilani, ua hana ino ia'u." Alaila, kuhikuhi aku la o Pao i ke Alii, "Aia ka mea e make ai o ka hoa paio i kai o Kalepolepo." Pela ka Pao kuhikuhi ana ia ia, olelo aku o Pao i ke Alii, "E iho oe a hiki i kai o Kalepolepo, ina oe e ike he kanaka makole la, pihekaheka o na maka la, oia no ia." Iho aku la ke Alii a hiki i kai o Kalepolepo, nana aku ka hana o ke Alii, e noho mai ana ua kanaka la. Ku ana keia ma kona alo.

            Ninau mai la ua kanaka nei i ke Alii, Heaha ka huakai a ke Alii o ka hiki ana mai?" I aku la ke Alii, e like me kana mau olelo ia Pao, a lohe iho la ua kanaka la. Hoolale ae la ua kanaka la i na mea nana e hoe ke Alii a hiki i Hawaii, io Piikea me Umi. A koakoa iho la ka poe nana e hoe ka waa, kau iho la ke Alii, a holo aku la lakou nei a ahiahi, pae aku la lakou nei i Waipio.

            Hiki keia ma ka hale o ke kaikuahine o ia nei, aloha iho la laua nei, me ka hanini o ka waimaka, a pau ka uwe ana, ninau mai la o Piikea ia Kihaapiilani no ko laua noho ana me kona kaikuaana, "Pehea ko olua noho ana ia Maui?" I aku o Kihaapiilani i kona kaikuahine, "He pono anei kahi o ko maua noho ana, aole pono, he hana ino kuu kaikuaana ia'u." Lohe iho la o Piikea i keia olelo a kona kaikunane, uwe helu aku la o Piikea ma kahi i noho pu ai me kona kaikunane, a me ko laua wahi i hele pu ai. Lohe mai la o Umi i ka uwe kanikau a kana wahine.

            Puka ae la o Piikea iwaho me ka uwe nui, a haalele i ke kapa, a kuu i kona wahi hilahila, a ike mai la o Umi, ua ane like o Piikea me he pupule la. Ko Piikea mea i uwe ai a nui ka leo, me ke kuu i kona wahi hilahila, i mea e ike mai ai o Umi, ka mea kanaka nui o Hawaii, a ua ko io no ka Piikea hana ana pela.

            I ka pau ana o kana uwe ana, i aku la o Umi, "Heaha la kou mea i uwe nui loa ai me ka leo nui, a me ke kuu ou i kahi hilahila?" I mai la o Piikea, "No ko'u aloha nui i ko'u kaikunane, akahi maua a halawai, no ko'u lohe ana mai nei kekahi ia ia, no ka hana ino o ke kaikuaana ia ia, e pono paha e kii kaua e kaua ia ia a make." I aku la o Umi ia ia, "Aole paha e pono kaua ke kii e kaua ia Piilani; no ka mea, o kekahi kaikunane ponoi no ia ou, aole ma ko aoao." I aku o Piikea ia ia, " Ina aole oe e ae mai i ka'u e koi aku nei e kii kaua e kaua ia Piilani, alaila, e aho kuu make ana, mamua o keia ola ana o'u." Manao iho la o Umi, he mea pono ole ia ke hooko ma kona manao, e pono paha ia ia ke ae aku i ka manao o kana wahine.

            Alaila, pane ae la o Umi ia Omaokamau, Piimaiwaa, a me Koi, no ka hoomakaukau kaua ana. Ua nui ko lakou aa ana e holo i Maui, e kaua me Piilani, aole e lakou wahi kaualua iki; aka, ua kanalua ko Umi manao ia Imaikalani, no ko Umi lohe ana, ua noho pu o Imaikalani me Piilani. O Imaikalani, he kanaka koa ikaika, a ano akamai i ka o-o makaihe ana, oia ka oi ma keia Pae Aina, mai Hawaii a Niihau ia manawa.

            Ui ae o Umi i kana Kahuna ia Kaleioku, "Pehea keia holo i Maui e kaua me Piilani?" I mai o Kaleioku i ke Alii, " E ke Alii e ! e holo no oe i Maui e kaua ai, aole Alii nana oe e kaua mai, he kaua makaainana no a pio aku lakou, aole e eha ka ili." Lohe iho la ke Alii i ka olelo a kona Kahuna, ua oluolu ia i kona manao.

            Hoolale ae la o Umi i kona poe hoa aina. ia Omaokamau, Koi, a me Piimaiwaa, e kuu aikane, e Kaleioku, e kuahaua i na kanaka ma kela wahi keia wahi i haawiia ia lakou, a me na waa imua o ko ke Alii mau maka. Ua nui loa na waa a me na kanaka.

            Ike iho la ke Alii, ua pono ka hele ana i ke kaua. O ka holo iho la no ia o na kanaka maluna o na waa, a hiki ka makamua o ka waa i Kapueokahi, ma kela awa ma Kauiki, ma Hana, Maui Hikina. Aia no ka maka hope i Waipio, ma Hawaii.

            I ka hoea ana aku o ka auwaa o Hawaii, ma Kapueokahi, ike mai la na kamaaina, ua nui loa na waa. Lohe no hoi lakou, o Umi me Piikea, e kii aku ana e kaua ia Piilani. Aole nae o Piilani, ua hala ia i ka make, o kana keiki ponoi ke ola ana, o Kalanikupuapaikalaninui, ia ia o Maui ia wa. O ka pau no ia o na kanaka o Hana, a noho maluna o kela puu o Kauiki.

            I aku o Umi ia Piikea, aole e kaua, hoopaakiki no o Pikea o kaua me Kalanikupuapaikalaninui, no ka manao o Umi, he keiki ponoi na Piikea o Kalanikupuapaikalaninui, ua pono no i ko Umi manao ka lilo ana o Maui ia ia, o Piikea no ka makua. Hoole loa o Piikea, no kona manao, o kipi mai ia mahope aku, makemake o Piikea e kaua a make. Ua ae kunukunu no o Umi, no kona minamina ia Kalanikupuapaikalaninui.

            Olelo ae la o Umi i kana mau koa, ia Omaokamau, Piimaiwaa, a me Koi, e hele i ke kaua maluna o kela puu o Kauiki. Ua holo like ia i ko lakou manao. O ka hele aku la no ia o Omaokamau, a hiki ma kahi hulili, maluna o Kauiki, aole e hiki aku ke pii iluna, ua hanaia ka pohaku ekolu huina, i oia pohaku ka mea e hookuuia mai ai, ma kahi e pii aku ai. Oia ka mea e hiki ole ai iluna, ua hana aku o Omaokamau i ka mea e hiki ai iluna, aole nae ona hiki iki iluna. A ua manao o Omaokamau, o ka po ka mea e loaa ai o luna, i kona noho ana a poeleele loa, aneane pii hou o Omaokamau, a hiki ma ua hulili la, i nana aku ka hana o Omaokamau, e ku mai ana keia kanaka nui, ua like paha me ewalu kapuai kona kiekie, me ka laau palau, ua hume i ka malo a ku ka puali, o kana laau e paa ana, ua oi ae ka nui a me ka loihi mamua o ka Omaokamau laau, o ke akea mawaena o kahi ana e ku ana me ua kanaka la, 240 kapuai, manao iho la keia e hele aku a kokoke, hookahi mai no ka ia la hahau, a o ka loihi o kana laau, a me ka nui, koele iho iluna ona, paki liilii, makau o Omaokamau, hoi oia a hiki ilalo, ninau mai ke Alii, "Pehea kau pii ana'ku nei iluna?" I aku o Omaokamau, "Pehea mai ka kau! e ke Alii!! ua ike aku nei au i kela kanaka, he kanaka nui launa ole, aole kanaka Ha-waii i like ka nui me keia kanaka, nui no a nui! loa no a loa !! hoi iho o ka loa o kana laau, loihi loa, aole e kokoke aku iloko, ina e kokoke iki aku iloko, o ka manawa no ia paki liilii."

            O keia kanaka a Omaokamau i kuhihewa ai, aole he kanaka, he Kii, o Kawalakii kona inoa. Lohe iho ia ke Alii i ka Omaokamau mau olelo, kaumaha kona naau.

 

                ELIMA HUA.— He hoahanau Kristiano e holo ana, i kekahi wa, ma ka moku ahi, maluna o ka muliwai Misisipi; a ua makana oia i kekahi mau palapala liilii (Tracts.) i kona poe hoa hele. Aia malaila kekahi haole hoomaloka. Ua lawe nae oia i kekahi pepe liilii, a opiopi ia ia, alaila, me kona pahi, ua okioki liilii ia ia, a kiola aku la, e olelo ana, aia la, ke helelei nei kou mea aloha mai.

                Ua haule nae kekahi apana pepa ma kona puapuamoa, a nana aku la oia i keia mau hua, "KE AKUA PAU OLE." Oia mau hua elima ke kumu o kona noonoo nui ana, i ke ao a me ka po. Ua inu oia i ka rama, a ua hana lealea, i mea e poina ai, a e palaka hou ai ka manao. Aka, ua kani mau keia mau hua i kona pepeiao, "KE AKUA PAU OLE."

 

HE KAAO NO

KANANI !

ME KA

HOLOHOLONA.

HELU 1.

                I KEKAHI MANAWA E NOHO ANA kekahi kanaka kalepa waiwai, me na keiki ana eono, ekolu keikikane, a ekolu kaikamahine. He kanaka naauao keia, a nolaila, aole ia i aua i kona waiwai no ka naauao o kana mau keiki.

            O na kaikamahine, he poe wahine maikai, o ka muli nae ka oi. No ka ui loa i ka wa uuku, nolaila i kapaia'i kona inoa o Kanani, a i ka nui ana ae, oia mau no, nolaila, aole ona inoa e ae i kapaia ai, a lilo iho la i mea huhu na na kaikuaana. Aole o ka nani wale no o ua kaikamahine nei mamua o na kaikuaana, o ka oluolu kekahi. He mau kaikamahine kuko i ka waiwai, me ka hookano e olelo ai i ka poe malalo iho. Hele mau laua i ka hula, o me na hana lealea a pau; henehene i kahi kaikaina, i ka lilo loa o kona manawa i ka heluhelu palapala, a me na hana pono e ae. Ua keia he mau kaikamahine waiwai, nolaila, he nui ka poe kalepa i manao mai ia mau wahine, o ka ua mau kakamahine nei mea e olelo aku ai, aole o laua manao e mare i kekahi mea malalo iho o ke Duke a me ka Earl.. (he mau inoa malalo iho o ka Moi.) Ua like no ka nui o ka poe i koi mai i kahi kaikaina, a me ka oluolu ia e hoihoi aku ai i ka lakou la noi; ua oluolu ia i kana poe ipo, aka, he makemake nae ia e noho me kona makuakane, a hala kekahi mau makahiki, a ua manao ia, he opiopio loa no ia ke mare.

            E loaa iho ana ua kanaka kalepa nei i ka poino ili wale ma, a pau loa ka waiwai ona, a koe he wahi pa hale wale no: nolaila, olelo aku i na kaikamahine, me ka waimaka e kahe ana i na papalina ; "E kuu poe keiki, e hoi kakou a imi i ko kakou ola ma ka hana, no ka mea, aole he mea e ae e loaa ai ia kakou." Olelo mai la ua mau kaikamahine nei, aole laua i ike i ka hana, nolaila, aole laua e haalele i ke Kaona; no ka mea, he nui no ka poe e makemake mai ana ia laua e mare. I keia mea, ua kuhihewa laua ; i ko lakou la wa i lohe ai i ka poino, olelo iho la lakou. No ka hookano a me ka huhu, o ua mau kaikamahine nei, nolaila, hookahi wale no a lakou mea i makemake ai o ka waiwai: nolaila, aole o lakou minamina i ka ike ana ua hoohaahaaia o ko laua hookano. Ua minamina na mea a pau ia Kanani, no kona oluolu i na mea a pau i ike ia ia, a nolaila, ua lehulehu ka poe Keonimana i koi aku e mare, a hoole aku ia, aole e hiki ia ia ke haalele i kona makuakane, iloko o kona wa pilikia.

            I kinohi aole e hiki ia Kanani ke umi i ka waimaka no ka pilikia i loaa ia ia ; aka, olelo iho la ia ia ia iho, "O ka uwe ana a pau loa ma ka honua, aole e loaa ia'u ka pomaikai, e aho e hooluolu au ia'u me ka waimaka ole."

            Ia lakou i hoi ai i ua wahi nei o lakou, palau ka makuakane i ka aina me na keiki kane, a hana no hoi o Kanani i kona haawina ; i na kakahiaka a pau ia e ala ai e kahu i ke ahi, hana i ka hale, hana i ka mea ai na lakou a pau.

            Hookahi makahiki i hala o ko lakou noho ana me keia, loaa mai i ua kanaka nei he palapala e olelo ana, o kekahi moku waiwai ana i manao ai ua poho, ua ku mai.

            I ka lohe ana o ua mau kaikamahine nei i keia nuhou, kokoke laua e pupule i ka piha i ka olioli, a manao iho la laua, ua kokoke i mai ka manawa o lakou e haalele ai i ua wahi nei, a hoi hou i ke Kaona. Ike iho la laua e hele ana ka makuakane i ka moku, a i koi aku laua, aole make poina i ka hoi-hoi mai i mau lole hou no laua, i papale, i komo, a me na mea e ae. Aole i noi aku o Kanani i kekahi mea, no kona manao, o ka waiwai a pau o ka moku, aole e hiki ke kuai i ka mea a na kaikuaana e makemake ana.

                "E Kanani," wahi a ka makuakane, "Heaha la kou mea e noi ole nei, heaha ka'u mea e lawe mai ai nau e kuu kaikamahine?" Pane aku ke kaikamahine, "No kou lokomaikai i ka ninau ana mai ia'u, nolaila, he makemake au e lawe mai oe i Rose na'u, no ka mea, aohe he Rose o ka kakou pa mea kanu." Aole keia i makemake maoli i ka Rose, a i kekahi mea e ae, i olelo wale aku no ia, i mea e huhu ole mai ai na kaikuaana, o i mai auanei laua, e makemake ana i ka makuakane e mahalo aku ia ia, i kona noi ole.

            I ka hele ana o ka makuakane, a hiki i ka moku, hookolokolo ia me kekahi kanaka no ka waiwai, a ua nui ka luhi, hoi mai ua kanaka nei i ka hale, e like ka ilihune me ka hele ana aku. He kanakolu mile i koe hiki aku i ka hale, maloko aku o ka ululaau ke alanui ; ia ia e hoi ana me ka olioli i ka ike hou i na keiki, e loaa iho ana i ka ua, a nalowale ke alanui. No ka nui loa o ka ua, a me ka hau, a me ka ikaika o ka makani, elua haule ana mai ka lio iho. E uhi mai ana ka po, a manao iho la ia, e make ana i ke anu, a me ka pololi, a me na Ilio hihiu ana i lohe ai e hae ana. I huli ae ka hana ona a nana aku ma ka aoao loihi o ka ululaau, ike aku ia he kukui e a mai ana mahope, me he mea la nae aia i kahi e loa. Wikiwiki aku la keia a hiki, a ike aku la keia he hale alii, maikai loa kahi i a ai. Ia ia i komo aku ai iloko o ka pa, aole ia i ike aku i ke kanaka, a i kekahi mea e ae oloko. Komo aku ka lio ona iloko o ka hale-lio, nikii keia a paa, hele aku la keia a komo iloko o ka hale, aole nae ona ike iki i kekahi mea ola iloko. Kou o aku la keia a kekahi lumi hookipa. E a ana ke ahi, a me ka papakaukau ua kauia i na mea ai maikai, a hookahi wale no pa e kau ana, me ka pahi a me ke o.

            No kona pulu ana i ka ua, a me ka hau, nolaila, hele keia a ma kapuahi olala. Olelo iho la ia, "Manao au e kala mai ka mea nona ka hale, a o kona poe kauwa paha ia'u, no ka mea, aole paha e loihi, ike aku au ia lakou." Kakali iho la ia a loihi, aole nae he mea i hiki mai; a mahope kani ka hora umikumamakahi, pololi loa ua kanaka kalepa nei, o kona hopu iho la no ia i ka moa a ai ae la, elua no piha o ka waha pau, a inu ae la he mau kiaha uwaina, aka, ia manawa a pau loa, e haalulu ana ia i ka makau. Noho keia a kani ka hora umikumamalua, aole no he mea i hiki mai; ia manawa loaa mai ia ia ka aa, a me ka manao e nana ma o a maanei ona; a wehe aku la ia i ka puka ma ke kihi o ka lumi, a hele aku la ia a loko o kekahi lumi maikai, a iloko olaila e waiho ana he pela maikai; a no kona palupalu, a me ka luhi, pani ia i ka puka, wehe i na wahi lole, a komo iho la iloko olaila.

            I ka hora umi o kakahiaka kona ala ana ae, a ike aku la ia me ka olioli i na paa lole hou, e waiho mai ana me ka makaukau nona, aole kona mau wahi lole ponoi, ua okiloa ia. Olelo iho la ia iloko ona ; "He oiaio paha, no kekahi wahine mana keia wahi, i aloha i ko'u pilikia." Nana aku la keia ma ka puka aniani, a ike keia i ka pa mea kanu, e ulu ana na pua o na ano a pau loa. Hoi aku la keia a ka lumi, kahi i ai ai i kona aina ahiahi, a ike iho la ia, he pakaukau no ka aina kakahiaka, a me ke ki koko i hoomakaukauia nona. "He oiaio, e kuu wahine mana maikai," pela kana olelo ana ae me ka leo nui, "He nui loa ko'u aie ia oe, no kou malama lokomaikai ana ia'u."

            Ai iho la keia a maona, hopu iho i kahi papale ona, a hoomaka aku e hele i ka hale lio, e ike i ka lio ona ; ia ia e hele ana malalo o kekahi kumu mea kanu, ua hele a luluu i ka rose, a nana iho ia i ka mea a Kanani i kauoha aku ai ia ia e hoihoi aku, o kona hopu iho la no ia he pu-a rose, i mea e hoihoi ai. Ia manawa, lohe aku la i ka halulu, a me ka ike aku he holoholona weliweli e hele mai ana imua ona, a ua makaukau ia e hina ilalo no ka makau. "Kanaka aloha ole," pela aku ka holoholona, me ka leo weliweli, "ua hoopakele au i kou ola, me kuu hookuu ana ia oe iloko o kuu hale alii, a o kau e hoihoi mai nei, o ko aihue i kuu rose, ka mea au i manao nui loa ai mamua o ka'u mau mea a pau loa. E hookaa ana oe me kou ola no kou hewa, ilo-ko o ka hapaha hora oe e make ai." Kuku-li aku ke kalepa imua o ka holoholona, a puliki i na lima ona a olelo aku ; "E kuu haku, ke noi haahaa aku nei au ia oe, aole au i manao e huhu ana oe ke ako au i rose,