Ka Nupepa Kuokoa, Volume I, Number 18, 29 March 1862 — Page 1
KA NUPEPA KUOKOA
Ke Kilohana Pookela ka Lahui Hawaii
BUKE I. HONOLULU. MARAKI 29, 1862. HELU 18.
O kekahi keia o na Mele i hakuia no ke Mele Makana a makou i uku ai i ka $10. 00. Na Peter K. Kaleikini i haku.
Leo Mele "God save the King. "
Ke Akua e hoomaikai
I ko makou Alii!
E ola mau.
E mau kou ola nei,
E mau kou Aupuni.
Mai ke Akua mai
E ola ke 'Lii.
Ke mele nei makou
I ka Moi Wahine!
Ke Akua e hoola.
E hai i kou aloha
I kou poe kanaka.
Ke Akua e hoola
Ke 'Lii Wahine.
Ke Akua e hoomaikai
I ka hooilina Alii,
Ka Haku Hawaii!
Na ke Akua e kiai
I kou mau kapuai.
Ke Akua e hoomaikai
Ke 'Lii Opio.
Na na kanaka hoi
I koho ia oukou,
E noho Alii.
Ka Lani e kiai
Ko oukou Aupuni.
Ao na hanauna a pau
I oni paa.
Eia malalo iho ka J. P. Kanealii Mele i haku ai no ka makana no e like me maluna.
Tune - God save the King. "
E ke Akuu e,
Kapuuhonua mau
E malu ai.
Malama i ka Moi
O keia lahui.
E ola ka Moi
Hawaii nei.
Hoolea kakou nei,
I ke Akua mau
E ola ai.
I ola pomaikai.
Ka Moi Wahine,
A lanakila mau
I keia ao.
Akua mana mau,
Hoomaikai i ka Haku
Hawaii nei.
Ke Kamakahi e,
Aloha nui mai.
E ola ka Haku
Hawaii nei.
E mau no hoi lakou,
Na hanaua Moi
Hawaii nei.
Kau ke Kalaunu hou,
Na Iesu i hoomaikai.
E ola na Moi
Hawaii nei.
Ninau Helu.
E noho ana kekahi kamana ma ka puu o Halai, a i ka la 28 o Feberuari, kauoha mai la o Spencer (Poonahoahoa) ia ia, e iho aku e olo i na Kua o kona Hale.
I kona iho ana a puka ma kona Hale; kuhikuhi mai la oia i na Kua ana e olo ai, a me ka nui o ke olo ana, a me ka nui o na pauku.
Penei ke ano o kana kuhikuhi ana; "E G. Waakauhonua, e olo oe i keia mau Kua e 3, a ekolu no olo ana, a eiwa nae pauku; me kau hana i na pauku a like loa. "
Eia ka ninau aku. Pehea la ke olo ana a ua kamana nei, i na Kua ekolu, i pau pono ai na pauku eiwa?
E hoike mai i ke kii a ua kamana nei e olo ai.
Me ka lana o ka manao, e loaa i ka poe kamana o Ulakoheo.
K. W. KAWAIAHAO.
Hilo. Mar. 3. 1862.
HE MOOLELO UMI.
KEKAHI ALII KAULANA O KO
HAWAII NEI PAE AINA.
HELU 8.
A KOKOKE MAI O PIIKEA E PAE iuka o Waipio. Uhi paapu ae la ka lani i na ao ua, a iho mai la ke anuenue, e ku ana mamua o ka ihu o ka waa o ka Alii Wahine, a hala mahope o ka auwaa o ua Alii Wahine nei. Me he papale mahiole la, ka hele a kalali lua maluna pono o ke Alii Wahine. I ka pae ana o ka waa o ke Alii Wahine iuka, na Omaokamau i hapai ia ia, mai luna ae o ka waha o ka waa, a hiki imua o ke alo o ke Alii kane, a hoonoho iho la o Omaokamau maluna o na uha o Piimaiwaa.
Ua lohe wale paha kekahi poe no keia huaolelo ka paepae kapu o Liloa, oia ka mea i hoonohoia'i iluna o na uha o Piimaiwaa, i lilo ia i paepae; aka, aole nae keia o ka paepae pololei o Liloa, o Ahaula ka paepae pololei o Liloa, aole nae i weheweheia mai e ka mea nana i hoopuka ma ka Helu 2, o keia Moolelo.
I ka noho ana a laua, he kane a he wahine, a liuliu, aia no i Maui na kaikunane o Piikea, o Piilani ka mua, he kane, o Piikea, ka wahine, o Kihaapiilani, he kane, o Kalaniapiilani, he kane, aha lakou. Ua make nae o Kalaniapiilani, koe lakou ekolu.
A no ka make ana o Piilani ko lakou makuakane, hooiliia ka aina o Maui ia Piilani, kana keikikane mua. Noho aku o Piikea, a me Kihaapiilani, malalo ona. A no ka loaa ana o ka Piikea kane, o Umi, noho ia i Hawaii, koe na kaikunane ona i Maui, ua hana no o Piilani ia Kihaapiilani, oia kahi kaiku-ne aloha loa o Piikea. [E nana kakou no Kihaapiilani, no ka hana ino ana a kona kai-uaana ia ia. ]
I ko laua noho ana ma Kauiki, i Maui, o Piilani, me Kihaapiilani. Ua kauoha ae ko lakou makuakane ia Piilani, e malama i kona mau pokii, oiai laua aole i nui ia mananawa. Aole nae o Piilani i malama i kela kauoha a ka makuakane. Noho pu iho la aua, o na hoa ai o Piilani, he poe e wale aku no, aole he wahi i-a ma ko Kihaapiilani alo, pau loa aku no ka i-a ma ko lakou papa aina, kau wale aku no keia ma ko lakou kua. No ke kokoke o ka ipukai Ohua ma kona alo, lalau iho la o Kihaapiilani elua Ohua, a ho-o ma kona waha, ike mai la o Piilani i ka ai ana a Kihaapiilani, i ua ipukai Ohua la, lalau aku la o Piilani, a i aku la i kona kaikaina, "Nawai la i ai iho nei ka ipukai Ohua?" I aku la kona kaikaina, "Na'u no i ai aku la, aole hoi a'u wahi i-a. " E kiola aku ana o Piilani i ka ipukai Ohua, a pa ma ka lae o Kihaapiilani, naha ae la ka ipukai ma kona lae, paumaele kona mau maka i ke kai o ka Ohua, a wewela loa iho la.
Nolaila, oia ke kumu o kona holo mahuka ana, a noho ae oia ma Makawao, ma kela wahi pana o Kalaniwai, a moe wahine oia malaila. [E ike auanei kakou i ka hiki ana o Kihaapilnni i Hawaii, i o Piikea la kona kaikuahine, o ka Umi kaua ana ia ia Maui. ] I kona moe ana malaila i ka wahine, aole i ikeia o Kihaapiilani keia, ua manao kona mau makuahonowai, he wahi kanaka kuaaina loa ia. Olelo iho la kona mau makuahonowai i ka palaualelo, i ka moe wale no iloko o ka hale, aole hele i ka mahiai. Lohe no keia ia olelo ana a kona makuahonowai no ia nei, ala ae la kona kakahiakanui, iho i ka ako lau i kai o Haiku, ma kela wahi pana o Kaluaaama.
I kona iho ana i kai, ike mai la kekahi wahi elemakule, o Kukuioka'ulani, e iho aku ana keia i ke kula, i aku la o Kukuioka'ulani i kekahi wahi elemakule, "He Alii paha keia, he kanaka paha, he kahuna paha?" I ka nana ana mai o kekahi wahi elemakule, a ike pono ia, olelo aku la ia Kukuioka'ulani, " Aole keia he kahuna, he Alii keia e iho mai nei, ina hookahi anuenue; alaila, he kahuna ia, aole elua anuenue o keia e iho mai nei, he Alii keia. " Holo like ae la ia i ko laua manao; no ka mea, ua loheia ka nalowale ana o Kihaapiilani, o ko laua noho no ia a hoea ana, aia no ko laua hale ma kahi e iho mai ana o ua Alii nei. Aloha aku ua mau wahi elemakule nei. Aloha hoi paha ke Alii, aole keia i aloha aku, hamau aku la keia, "Hamau, he nani ia, ua ike iho no olua ia'u, e huna olua ia'u a nalo, a mai hoike olua ia'u. "
Iho aku la no keia a hiki i Kaluaaama, aia malaila ka lau uala, aole hoi o ka ako pono o ka lau, e like me ka ako ana, penei ka ako ana a ua Alii nei. Hoahoa ae la ia i ka lau o ka pue hookahi, a mohola pono, ako pahu pu ae la ia, a koe i kahi o ka lepo, a pela kana hana ana a pau ka mala. Hiki mai ka mea nana ka mala uala, a ike iho la ia, nui kona kumakena, hopu aku la ka mea nana ka mala uala i ka laau, hahau iho la ma kona kua, aole nae eueu ae, ako no keia a nui kana lau uala, hana no keia a haawe, a hoi iuka o Kalaniwai.
I kona hoi ana a hiki i kahi o ua mau wahi elemakule nei, hoomaha iho la oia malaila, ninau mai la na wahi elemakule, "Owai kou inoa?" I aku ke Alii, "O Kihaapiilani ko'u inoa. " Alaila, hoomaopopo ae la ua mau wahi elemakule nei, e like me ka laua mea i kukakuka ai, ninau hou aku la laua, "Pehea ka huakai nui a ke Alii, o ka hele malu ana mai?" Pane mai la ke Alii, "E imi ana i hoa kumakaia no kuu kaikuaana, no Piilani. " Hai aku la ke Alii imua o na wahi elemakule, i ka mea a ke kaikuaana i hana ino ai imua o kona lae, a lohe ae la na wahi elemakule, i aku la laua i ke Alii, "Ua make ko kaikuaana, aia ka mea e make ai, o kela hale e hamama mai la ka puka, e ku mai la i Waikapu, aia ilaila ke kaikuahine o maua, o Pao kona inoa, hele no oe a hiki ilaila, a nana no e kuhikuhi mai i kahi e make ai, o ka make ka hoi ia. " Ua holo i ko ke Alii manao; i aku la ke Alii ia laua, e hoi oia a hiki iuka o Kalaniwai, e kanu i ka lau ana a pau, mahiai ia a o-o ka uala, haaleleia, na na makuahonowai ona, i uku no ko lakou malama ana i ke Alii.
E nana kakou i keia Mele, i hakuia i ka wa I. paha, e II. paha, e III. paha, i mea e ike ai kakou i ka Umi wahine, oia o Piikea, eia malalo iho nei, a me kona mau kaikunane, a Piilani no i hanau mai.
Ke Kukaipaoa ka lani he 'lii,
He Alii aoa lani, he aoa—e,
He-a ia mau lani kumakomako,
He lani no Kahuku maka pali pohaku,
He mau lani pohaku no Lonokaeho,
No Lono ka lae poniia i ka wai niu,
I haua i ka puaa hiwa a Kane,
I ka puaa hiwa, puawa hiwa a Lono,
E Lono—e, eia ko maka lani,
Ko lau, ko muo, ko ao, ko liko,
Ko Alii kapu e Kahaipiilani,
Ko maka e ku ana hoi ka malama,
Malamaia ka lau kapu o Keaka,
Ka lau oheohe o Keakamahana,
I kupu a kapalulu, ka palule ka pua,
Ka pua ololo hemahema o Kaikilani,
Nana ia lau ololo, no Kanaloa,
No ka ilio hulu pano i ka maka,
I noho ka eleele iloko o ka onohi,
He kakau kioki onio i ka lae,
He kioki o ke ki kakapu,
O ka i-a kapu hilia au awahia,
Awahia i lani Keaka wahine,
I kupu a mala-o Keakealani kane,
Ia laua hai ka haka o ke kapu,
Hakahaka i ka momona o na 'lii nui,
He 'lii ku moku ai moku nui hoi nei,
He nui hoi Kauhi, he mau hono ko na aina.
He nui hoi Keaka, hea walu iwaho,
He kai papa nene ko na aina,
He ulu papa kai holo papa no Kahiki,
Hiki o Keawe, ke kupu kia aumoku,
Ka hua hookahi a Kaao, i ka lani,
Na Kalani, Kalanikauleleiaiwi,
Na Keaka, na Keawe keia lani,
Na kela eke hului o Piilani,
I noho o Keawe io Piilani la,
Ahu ko-o-ka o na Alii nui,
He 'lii, he ma Alii ka ike ana'ku,
He mau lani haele wale iho no,
Hele hehi i ka lihi o ka La,
I ka malama hanau o Ikiiki — la,
Ua ikiiki ka lani iluna,
Ua u-i a ia ka malama,
Ka pili o hoehu ka ua,
Ke iloli nei ka Honua,
Na ku ka Mauna wai kahe ino,
Ino ua kahuli lewa na Aina,
Ua lewa ka houpo o ka moku,
Ke au o malele o Kuala,
O kanaka iki o ka moku,
O ka u-u-i-na i wawau — e, a — he.
O na 'lii o ka nuu pule,
O kanaka o ka hale hiwa,
O loko o Mana ka moo,
O ka hina kii o Haloa,
O Kulani o—i—oia—i—a pa—he.
Ke paha l—a—i—kona makemake—i—a,
A hiki mai ka—o—le—ole—hoi—ana,
Ko Aupuni— la, nana—i—a.
No Ikiiki, no Kaaona ke 'lii,
No Hanaia, no Hinaiaeleele,
Nolaila o Piikea, wahine a Umi.
Ka Laielohelohe hiapo ia,
A Piilani no i hanau mai,
Hanau o Lonopii, he kane,
A Piilani no i hanau mai,
Hanau o Kihaapiilani, he kane,
A Piilani no i hanau mai,
O Kihaapiilani Kalanilonakea,
I ili kea, malo kea, malailena a Kihaapiilani,
O ua ha ia e Laielohelohelohe,
Ia lakou Kapena o ke Kapu,
Ia Kalamakua a Kaihuholua,
Na Kaihuholua, na Lupekalani,
Nanalu e hilo i ke aho a Makalii,
Ke aho kaa-kolu ia i kela ka loa,
Ka maawe huna lau ia o ke 'lii,
I heia i Miloa, e Hanauane,
Hanau mai o Kuihewa,
He muli Kaihikapu a Kuihewa,
O Kaihikapu ili manoa,
Ili pepee, pepee, pee ku-e i ke kapu,
Ka ili pee ku-e o ke 'lii o Mano,
No Mano ia ili oi, ili kalakala,
Ke kalakala o ka lau ea pu,
Ke kalakala o ka i-a ili—e—e.
Ka ili—e—e o Mano lae pohaku,
O ka ulu a Mano, a Mano no,
He mau puha ia na Mano,
Na laua o Noheamakalii,
Noho o Mano moe ia Pulanaieie,
O Kalanipiilani kana keiki,
He niu kaukahi na Manokalanipo,
He mau lani olu iho no ka maka,
I luna wale no e lili nei la—e.
Lili ka ua i ka Makalii,
Puehu i ke kula o Kailo,
Lulana i Hauoa Keawe,
Kakaulua i Kealawela,
Hiki loa io lua ka lai i ua mali—e.
Ua luhea ka iki o Puna,
O Puna, o Puna maka inaina,
Ke kahu hoi o Kahinanalo,
Moku Ohikihokolia,
Ho-a e ia no kuu lani,
No ua Ohiki kau ka oli—e—e—a—he.
Ke—li—i—loa—a—la malama i—e.
Auhea oukou e ka poe e heluhelu ana i keia Moolelo. Aole keia Mele, i hakuia i ko Umi ma wa, he Mele hou loa keia, no keia wa aku nei no; aka, ua pakui aku no au malalo o keia Moolelo, i maopopo paha ka lilo ana o Piikea, i wahine na Umi, a me kona mau kaikunane, aole nae au i manao, ua pololei wale no na lalani huaolelo o keia Mele, ua hewa iki no kekahi. E nana kakou ma kekahi lalani o ua Mele nei, he makahiapo o Piikea. A Piilani no i hanau mai, aole ia he hanau mua, o Lonoapii no ka mua, (oia o Piilani. )
(Aole i pau. )
KI-PU. — Ma ke kulanakauhale o Rikemona, ma Vireginia, ua ki-pu kekahi o na 'lii kipi i kekahi, o ke kumu o ka hoopaapaa, a me ke kumukuai o kekahi pahu kukui ihoiho.
No ia hoopaapaa ana, ua koi like laua e hele e ki-pu aku a e ki-pu mai, a o ka mea e make, alaila, oia iho la ka mea i hewa. Haele malu no laua a mawhao o ka hale a laua i kuai ai i ka pahu kukui ihoiho, malaila laua i hoomakaukau ai e hana aku i na mea a laua i makemake ai. Ku laua a elua me ke kaawale iki o kekahi me kekahi; alaila, ki mai i na pu a laua, no ka like loa o ke kani ana o na pu; nolaila, ua make like no laua. He nui ka minamina ia o na mea i make, e ko laua mau hoa.
O na keiki ma Farani e pono ke aoia i ka palapala, 5, 200, 000 lakou. He 16, 000 na kumu kula na lakou.
[Unuhiia no ke Kuokoa. ]
NA MEA HUNA
-O-
KE ALO ALII
-O-
NAPELA!
HELU 2.
OIAI UA HELE AKU LA KA ROSE o Katenia me ka poe koa nana oia i kii mai, aia hoi kahea aku la o Lupo i kana keiki ia Lopaka, a pane aku la ia ia penei. "E kuu keiki, e aa no anei oe e hele e kiu ma ke alanui a kou makuahine i hele aku nei?" Ae mai la o Lopaka, a hoopiha mai la kana huaolelo ae i ka naau kaumaha o kona makuakane me ka olioli nui. Olelo aku la kona makuakane, "E hele oe a e makai aku i kahi a ko makuahine e hele ai, mai hoike nae oe ia ia i kou hele ana, e huna oe, a hoi mai ia, alaila oe hoi mai. " O ke ku ae la no ia o ua keiki nei a hele aku la, ma kahi a kona makuakane i kauoha'i ia ia e hele.
Ma ke alo o ka Hale Alii o Napela, malaila kahi i ku ai o kekahi hale no kekahi Alii nui oia aina. O Kale di Durasa (Charles de Duras) kona inoa, a he keiki uila o na maka ke nana mai ke inaina nae, a he keiki Alii nui punahele i kona makuahine. Ma ke alo o ua pa nei o Kale di Durasa kahi i noho ai o ua wahi keiki nei o Lopaka a kakali i kona makuahine, ma ke kauoha a kona makuakane.
Hele aku la ua Rose nei o Katenia me na koa nana oia i kii mai, a lawe ia'ku la oia a ma ka puka mahope o ka Hale Alii, malaila kona hookomoia ana, a laweia'ku la a ma ke keena o ka Moi i waiho ai me kona mai, malaila kahi i noho ai o Anadariana ke Kahuna, ka mea nana oia i kii aku. A i ke komo ana o ua wahine nei iloko o ke keena mai o ke Alii, alaila kipaku ia mai la na koa na na oia i alakai aku, a papaniia mai la ka puka, alaila, hele mai la ua o Anadariana a hopu mai la i ka lima o ka Rose o Katenia a lulu iho la me ka hoopili pu iho me ia lulu ana i na kaomi pumehana o ke aloha. A pau ko laua aloha ana aku, a loha ana mai; alaila. pane mai o Anadariana i ka Rose o Katenia. "I ko kaua wa e noho ana ma ke Aupuni o Katenia, ua ike lea au i ka ouli o kou manao, oia hoi ko makemake e lilo i mea nui a Hanohano, ano la, ua hiki mai ka manawa e hiki ai ia oe ke hopu aku i ua mea la o ka Hanohano, ke ae mai nae oe e kokua ia'u ma ka lapaau ana i ka mai o ka Moi. Eia ke ano o kona mai, Ua kupalu oia ia ia iho me ka pakela hoohialaai i na mea maikai o keia ola ana, no ia mea, ua maloohaha kona mau aa koko, a no ia kona nawaliwali, me ka ane e naue ma ke ala o ka poe hiki hou ole ke hoi mai ma keia ao; a eia wale no kona mea e ola ai, aia a loaa kekahi wahine opiopio, alaila, e hookomoia kona koko iloko o ke aa koko o ke Alii, a me ia wale no e hiki ai ke kauaia oia mai ka make ana; nolaila, e ae mai oe e okiia kekahi aa koko ou, a e paumaia ia mea mai ou aku la a i ko ke Alii aa koko, alaila, ola ke Alii. Ina oe e ae mai alaila, e loaa no ia oe ka Hanohano nui, a me kau keiki pu. " Alaila ae mai la ka Rose o Katenia, e komo kona koko iloko o ka Moi, alaila, hoomaka iho la o Anadariana e kaha i kekahi aa koko, a hooinu ia iho la na aa koko o ka Moi i ke koko o ka Rose o Katenia, a lawa pono ka mea a ke Kahuna i makemake ai, alaila, hoopaa iho la ka hookuuia ana o ke koko e like me ka pono i kona manao, maule nae o ka Rose o Katenia aka, wikiwiki no nae ia e hoola hou i ka maule ana, a ola ae la ia, a pou ka hana ana a Anadariana, i ka nawaliwali ana o ua wahine nei, alaila, haawi aku la ia i hookahi eke dala gula na ua wahine nei, a hoi aku la ia ma ke alanui a lakou i hele mai ai. Me ka hai aku nae, aia a maha ke Alii, alaila, kiiia aku oia i ike ai ka Moi i kona mea nana i hoola, a i ukuia ai hoi oia me ka Hanohano.
I kona puka ana mai a mawaho o ka pa o ka Hale Alii, ia manawa holo mai la o Lopaka kana keiki a kahea mai la, "E Mama! E Mana!" I alawa iho auanei ka hana o ua wahine nei o ke keiki no ana o Lopaka i iho la kona makuahine ia ia. "I nehea nei kou hele ana mai nei, a nawai hoi oe i kena mai nei?" Hai ae la no ua keiki nei na ka makuakane no i kena mai e hele e kiu i ua makuahine nei; aole hoi i hoomanao i na olelo kauoha a ka makuakane ona. alaila, papa iho la ua makuahine nei, aohe make hai ia Lupo i kahi ana i hele ai, me ka hai pu aku no nae e loaa ana ma ka hila o kona kamaa ke kepa gula, no ka mea oia ka hoailona o ka poe Hanohano. Ae mai la no kana keiki mamuli o kana kauoha a maluma pono hoi i ua mau olelo la. A hiki laua nei i ko laua hale noho, alaila, hele mai la o Lupo kana kane, me ka naau kaumaha no nae, a ike mai la kana wahine, alaila, pane mai la ia penei, "E kuu Lupo aloha e! Eia mai ka waiwai o kaua, ka pomaikai i loaa ma kuu hele ana aku nei. " I ka wa a kana kane i lohe ai i keia mau olelo a kana wahine, o kona lele aku la no ia a hopu i ka eke dala a ka wahine ana i haawi aku, a pane mai la me ka menemene nui. "E kuu wahine aloha e! no hea keia mau dala i loaa mai nei ia oe? He oiaio he dala haumia keia, a ua hoohaumiaia ka'u wahine e Anadariana Taresepolo. "A holo hele aku la oia ma kapa kahakai, a kiola aku la i ka eke dala iloko o ka opu o ka moana. I kona olelo ana nae me ka hoohiki i ka inoa o Taresepolot ua loheia e ka lehulehu o ko lakou wahi iho. He nui ka uwe ana o Lupo no kana wahine, no ka mea iloko o kona manao paa ua haumia kona maluhia.
I ka maha ana o ka mai o ka Moi, i ke ao ana ae, aole i hai mua ae o Anadariana i ka mea i ola ai o ka mai o ua Moi nei.
Ke hala nei he mau pule mai ka wa i laweia'i o Ka Rose o Katenia, a i kekahi ahiahi, ua pouli ka mahina, alaila, hoomakaukau iho la o Taresepolo e hele i ka hale o ka Makuesa o Alatamura, e hai aku i ke ano o ka noho ana o kana keiki, a i ka hora eiwa oia po hele aku la o Taresepolo. I kona hele ana a kekahi alanui ololi, aia hoi houia mai la oia i ka pahi, a make koke iho la oia, me ka ike ole ia nae o ka mea nana i pepehi; a i ke kakahiaka ana ae la, ike ia ua make o Taresepolo, a no ia mea, uwe kumakena aku la o Anadariana no kona kaikuaana. Hoolahaia mai la ma na alanui o Napela he uku makana he $50, 000, no ka mea nana e hoike mai i ka mea nana i pepehi o Kauka Taresepolo, ke kaikuaana o Anadariana, ke Kahuna Lapaau nui o ka Moi o Napela. Lilo iho la no o kona kaikaina ka hooilina o na waiwai a pau o ka mea i make; oia waiwai hoi, aole o kana mai ka nui, nolaila, lilo iho la o Anadariana he kanaka waiwai loa no ia Kulanakauhale. a lilo pu iho la no hoi oia, he mea nui imua o ke Alii, ka Moi oia Aupuni.
E hoomanao iho kakou i ka po a ka Rose o Katenia i hoi aku ai, a hoike i kana kane i ka eke dala gula ua lawe koke aku o Lupo ia mea e kiola iloko o ka muliwai, me ka olelo pu iho nae, ua haumia kana wahine ia Anadariana Taresepolo. A no ia hoopuka ana ia inoa ma ia po, nolaila, manao ia iho la nana i pepehi o Taresepolo, nolaila, kiiia aku la o Lupo a hoopaaia i ka hale paahao no ka hihia pepehi kanaka. Noho iho la ia me ke kaumaha i ke aloha i kana wahine a me kana keiki, aka, he kanaka manaoio oia i ka pono o ke Aupuni o ka lani, no ia mea, ua hoomamaia kona mau minute o ka noho pilikia ana a i ka maopopo ana no o kona manao, a me kona ike maoli iho no i kona hala ole ma na mea ona i hoohihia waleia mai ai e ka poe imi hala; a me ka hilinai ana iho hoi ina oia e ahewaia e ka Aha Hookolokolo o keia ao, ua maopopo no ia ia, he Aha Hookolokolo ko kela ao, na na e nana pololei ka poe i hewa a me ka poe pono.
Noho oia, a i kekahi mau la hele mai kana wahihe a me kana keiki e ike ia ia, no ke aloha no hoi o ka wahine i kana kane a me ke keiki i kona makuakane. Komo aku la ka Rose o Katenia a me ka kua keiki, i ka ike ana mai o Lupo i kana wahine a me kana keiki, lele mai la oia me ke aloha nui, a uwe iho la, a pau kana uwe ana, pane aku la ka Rose o Katenia i kana kane. "No ke-