Ka Nupepa Kuokoa, Volume I, Number 16, 15 Malaki 1862 — Untitled [ARTICLE]

Piha loa ua kaikamahine nei i ka olioli. i ka laua'la mea i olelo mai ai ; a ninau aku i ka inoa o ia Alii Wahine, a me kona wahi i hiki mai ai, a olelo aku la laua. " Aole he mea i ike ; a nolaila, ua pilikia loa ka manao o ke Alii opio, a ua olelo ia e haawi i makana nui i ka mea nana e hai mai kahi o ua kaikamahine nei i hiki mai." Nani maoli aku la paha ! Pomaikai maoli olua ! Ina hoi paha au e ike aku i wahi manawa aaka ! " E Miss Kaloke, e haawi mai oe ia'u i ko wahi pukiki melemele au e koo nei i na la a pau loa, a hookuu mai ia'u e hele au e ike ia ia." " Ae no hoi paha ka loaa aku o ko'u lole i ka ehuahi. Manao anei oe he kauwa au " E Miss Mahaoi, e malama oe i kou wahi, a e waiho i ka lole a me ka hula, na ka poe maluna ou." Ua akaka no ia ia e paneia mai ana pela ; nolaila, aole no ia i minamina ; no ka mea, mai akaka ole ia ia kana mea e hana ai, ina kela e haawi mai i ka lole ana i noi ai. I kekahi la ae, hiki hou no ua mau kaika-

mahine nei i ka hula, a me Cinikalela pu kekahi, ua oi aku nae ka nani o kona kapa mamua o ka po mua. Ma kona aoao mau ke Alii e olelo ai i na olelo hoihoi loa. No ka hoihoi loa o ua kaikamahine nei i na mea ana i ike ai ; nolaila, poina ia i ke kauoha a ka makuahine. A lohe aku la keia i ke kani o ka Uwaki, a hele aku la, akahi, alua, akolu, a hiki i ka umikumamalua, a me he mea la i kona manao, aia no i ka hora umikumamakahi. Ko ia nei ku ae la no ia a hoi; hahai aku la ke Alii me ka manao e loaa aku, no ka makau paha, mama loa kela i ka holo. Ia ia e holo ana, haule iho kekahi Kamaa Aniani ona, a kulou iho la ke Alii e hopu, a lawe me ka manao e malama loa. Hiki aku keia i ka hale iloko o na wahi lole kakiko ona, aolhe ke kaa a me na kahu, aohe he mea i koe iho o kona nani, hookahi wale iho no o ka lua o ke Kamaa aiani. Ia manawa, ninau aku ke Keiki Alii i na Koa kiai puka, " Aole nae paha oukou i ike mai i kekahi Alii Wahine nani e puka aku ana ? " Olelo mai ua poe Koa nei, " Aole lakou i ike i ke alii Wahine," hookahi wale no a lakou mea i ike, he wahi kaikamahine me kahi lole nahaehae, i like ka nana ana aku, me he wahi kaikamahine makilo la. I ka hiki ana o na kaikaina i ka hale, ninau aku la kela i ka like o ko lakou lealea me ka po mua, a ua hiki hou aku no paha ua Alii Wahine nei ilaila " Olelo aku no hoi laua, ua hiki aku no; a i ke kani ana o ka hora umikumamalua, e holo iho ana ua kaikamahine la, no ka wikiwiki loa i ka holo, a haule iho ana kekahi Kamaa aniani, o ke ano waiwai loa, a na ke keiki no a ka Moi i hopu, aole ana hana e ae, o ka nana wale no i ua Kamaa nei a pau ke koena o ia po ; a ua manao na mea a pau, ua aloha loa ia i ka wahine maikai nona ia Kamaa. He oiaio ia ; he mau la mahope mai, kukalaia mai ke kauoha a ke alii, maloko o ka olelo, e mare ia i ka wahine e ku ai ke Kamaa i loaa ia ia. Hopu iho la na ahai olelo i ua kamaa nei, a lawe aku i ka poe alii wahine opio, a i na alii malalo iho ; i ka hoopokole ana, i ka poe no a pau o ka aha Kiekie, aole nae i loaa. Alaila, laweia mai i ua mau kaikamahine nei, noke laua nei i ka opa i na wawae o laua i komo iloko, a ike iho la, aole e hiki. O Cinikalela, e nana aku ana ia laua la, ua ike aku no o ke Kamaa ona ; a olelo aku, " Homai hoi e hoao aku au." A olelo mai la ke kanaka e noho ilalo ; a hookomo mai i ke Kamaa, a ike iho la ua pili pono ia ia e like me ke kepau. O ua mau kaikamahine nei, haohao no ke ku ana o ke kamaa ia Cinikalela ; a pehea ka nui o ko laua hoohuoi i ko ianei unuhi ana ae i ka lua o ke Kamaa, mialoko ae o ka pakeke, a hookomo! Ia manawa, komo mai la ua luahine nei, a hoopa i ka lole o Cinikalela me ka laau mana, a ike mai la laua la, ua oi aku ka nani o ua kaikamahine i keia wa, mamua o ka ike mua ana a laua Ike iho la ua mau kaikamahine nei, o ke Alii Wahine keia a laua nei i ike ai i ka hula. Kukuli mai la ua mau kaikamahine nei, a mihi mai no ka hewa a laua i hana aku ai ia Cinikalela. Kokua aku o Cinikalela ia laua a ku iluna, a olelo aku, Ua kala aku ia i ko laua hewa a pau loa. Laweia aku ua o Cinikalela a kahi o ke Alii, a ike mai la kela, ua oi aku ka nani mamua o kana ike mua ana, a koi koke mai e ae i kona lima. O na kaikaina, mare me kekahi mau kaukau alii. J.W.