Ka Nupepa Kuokoa, Volume I, Number 15, 8 Malaki 1862 — He Inoa no Emalaina. [ARTICLE]

He Inoa no Emalaina.

Auhea wale ana oe E ka pua i ke anu Anu wale o Malamanui, Nui mai nei ke aloha, I ke kula o Kemoo, Moe au i Waialua, Hoolohe i ka ehukai, Akahi hoi a ike, I ke kau a ka moewaa, Hoi nele mai Puuiki, I ke anu o Lihue, Hue wahahee o Kalena, Halawai mai au, Me ka ua i Kipapa, Ua paa ka manao mua, Kuka me Kapuulena, E aho ke kaona nui, O ko'u hoa ilaila, Ilaila iho kaua, E pue ai i ke anu, Hookahi kau o ka like, Ke kaina Wailiula, O ka kohae-ha-e, Kukuna ka'u e ike, Ike aku i ke onaona, I ka pua o ka Melekule, Kuleana no ke aloha, Kamaaina ilaila, NA K. MILILANI. Ke holo mai nei ka Puakea, Ke lai mai nei ke kula e-a, I ka luna i-u-i-u o Kake-a, Ilaila kuu kuko, kuu lia ana, O kau no ia e ike nei, Ka lai ana iho ma ke kaona, Manao aku au o oe ke hoa, I hoa pukui i ke kehau, Ka hau anuanu o Mana, Nana aku au o ke onaona, O ka lai mai no i Makanoano, Ke holo mai nei o Ianake, Ke hao mai na pea heke O ka ihu wale no ka'u i ike, Ma-u ia la ke honi aku, Ka pua Komela pili me ia la, Ka'u no ia e manao nei, Manao ae ana i ka hoa luhi, Ke hoa pili o ke kulu aumoe, La welawela o Honolulu, Huikau lua ke i kaona. NA KOPE. Nani wale ka luna i Kakea, Kela uka koi-u-i-u, Ano wale mai no ke aloha, Ke pili holu nape i ke kula, Ka la hiki ma Haehae, Haehae wale ka hiki'na mai Kainoa ua pau ka pili-wi, Ko lei Pikake mua, Au i hooluhi iho ai, Paulehia au ilaila, Ilaila aku no ka manao, Ka po ua nui lokuloku, Noho au i ka poli o Liua, Hoolohe i ke kani a ka O-o, Ua ao kaua e ke hoa, Ka ua lelehuna i ke kula, Koha-i-ha-i i ke ahiahi, Ua ahi oe la e ka hoa, Pa mea hou ia paha la, Mai kuhi mai oe no Kaula, Ka mole aku o Nihoa, A he kupa au no Keaona, Eleu au no Puukapu, Ua kapu ko kino i ke aloha, Na'u i lahui ia pua. NA APAHU.