Ka Nupepa Kuokoa, Volume I, Number 4, 2 December 1861 — Page 1

Ka

Nupepa Kuokoa:

BUKE I.  HONOLULU , DEKEMABA 2, 1861. HELU 4.

 

Olelo Hoolaha.

 

E pai hou ia ana ke Kuokoa, penei:

Poakahi,............................Dekemaba 16.

Poakolu,............................Ianuari 1.

Poaono,............................Ianuari 11.

Mahope aku, kela Poaono, keia Poaono.

                He mea pono i kela mea keia mea i kakau i kona inoa no keia pepa, e hoomakaukau i na DALA Elua ($2.00.) a e uku mai mamua ae o ka la mua o Ianuari, 1862.

                Aole e haawiia'ku ka pepa i ka poe i uku mua ole mai i ko lakou mau dala, ke hiki mai ka maluna o Ianuari, 1862. E hoomaopopo i keia mau olelo maluna, e ka poe e makemake ana i keia Nupepa maikai.

H. M. WINI,

Luna Pai.

 

He Mele no ka Nupepa Kuokoa.

Auhea wale ana oe,

Ka NUPEPA KUOKOA,

E lawe oe a Linohau,

A ai ka manu iluna,

O kou lani no ia,

Kohukohu ke noho mai,

He nohea ke ike aku,

Mai noho oe a henehene,

E like me kou lua,

Ka Hoku Pakipika,

Ke ao i ka wahakole.

                He wahine waha nuku paha,

Kohu like me ka hale kulu,

Elelou ma ke kuono,

Ekekou i ke aumoe,

Moe lolii no oe,

Me Hiolani i ka pono,

Me Niolopua i ke ao,

Nau keia eha,

E ka NUPEPA KUOKOA,

Hopo ole i ka aha nui,

Ahahui a na Manu,

I luna o ke kukui,

Kukui o-a paha,

Hakake i ka iliwai,

O kou wa lati nei,

Kuu pau ia ke aloha,

I ko ko makemake,

I kena ko make wai,

O ko'u makemakeia,

E pili me ka hana pono,

I ka noe o Alakai,

E kai aku no oe,

I keia Lahui,

I naue aku i ke ao,

Ka puu keu o ka ike,

Ka makau aku i ka Haku,

O ka noiau no ia,

O ka haalele i ka hewa,

O ka naauao keu ia,

Ua pono ka ia nei hana,

                E ka Hoku Pakipika,

Ua hala kou palena,

Ua pau kou mahele,

Ko ia nei mahele nei,

Kupono i ke kiko kahi,

I ke kiko hoeueu,

Eu like mai kakou,

Na 'Lii me na Luna,

Na Kumu na Haumana,

Na hoa hui o ka pono;

Hui mai kakou a lawe like,

I ke Aupuni Kuokoa

O Iolani ke Alii,

E ku nei i ka lai,

I ka piko o ke aloha,

O kou Aupuni na

O kuokoa i ka pono,

O peku kahi i ka hewa,

O lanakila i ka malu,

O huai pau i ke ola,

E ola na 'Lii me ka Nupepa Kuokoa,

Ka inoa o ke Aupuni Kuokoa

O Kamehameha IV.

W. L. HOLOKAHIKI.

Kaaawa, Koolauloa, O., Nov. 1, 1861.

 

                NA KOA AUPUNI MA MISSOURI.— Ke alualu ikaika nei o Generala Fremont i na koa kipi, me na koa he 35,000. Ua holo aku na kipi, aia i Springfield, ma ke komohana hema o Missouri; a ua manao ia ana, aole e hiki i na kipi ke holo hou aku. No ka mea, ua puni loa i na koa Aupuni na wahi a pau e hiki ai ke holo; nolaila, e hoopuehu ia ana paha na kipi malaila.

 

[Unuhiia no loko mai o ka olelo Geremania.]

HE KAAO

No kekahi Ohana Keiki Kane he umikumamalua.

 

                I kekahi wa, e noho ana kekahi Alii kane a me kana wahine, a me na keiki kane a laua he umikumamalua. I kekahi la, olelo aku ke kane i ka wahine, "O keia keiki au e hanau mai ai, oia ka umikumamakolu o ka kaua mau keiki; i hanau mai oe a he kaikamahine, alaila, e make na kaikunane ona a pau loa, i lilo ai ka hooilina o ka waiwai a me ka Mokupuni ia ia wale no."

                Hoolale iho la ua makuakane nei o lakou nei e hana i mau pahu kupapau he umikumamalua, i ka manawa i pau ai ua mau pahu kupapau nei i ka paa, hoihoi laua nei a loko o kekahi lumi, ki i ka puka a paa, haawi aku ke kane i ke ki o ka puka i ka wahine e malama ai; a papa aku ua kane nei i ka wahine, mai noho oe a hai i na keiki a kaua i ka'u mea i hana iho nei.

                Noho iho la keia me ka uwe a po ua la nei; a ninau aku kahi keiki muli loa, o Beniamina ka inoa, "Heaha kou mea e uwe nei a po ka la?" olelo aku ka makuahine, "Aole e hiki ia'u ke hai aku ia oe." Aka, aole nae pau ke koi ana o ua keiki nei; a no ke koi loa o ua wahi keiki nei, lawe ai ka makuahine a ka lumi i huna ia ai na poe pahu kupapau nei, olelo aku ka makuahine, "E ka'u keiki aloha, o keia poe pahu kupapau au e ike nei a pau loa, na ka makuakane o oukou i hoomakaukau iho nei no na kino kupapau o oukou; ina wau e hanau i keia keiki a'u e hapai nei, a he kaikamahine, alaila, pau oukou i ka make i ka makuakane o oukou; alaila, hookomoia na kino o oukou iloko o keia poe pahu e kanuia ai."

                A uwe iho la ua makuahine nei i ke aloha i na keiki; olelo aku ua wahi keiki nei, "Mai uwa oe, no ka mea, aole makou e make ana, e mahuka ana makou." A olelo aku ka makuahine i i ua wahi keiki nei, "O hele nui a loko o kela ululaau la, ilaila e noho ai, a e huli oukou a loaa kekahi laau kiekie loa, alaila pii kekahi o oukou iluna olaila e noho ai, a nana mai i kai nei. I noho au a hanau he keiki kane, alaila kau aku au i ka hae keokeo, alaila hoi mai oukou, a i hanau au a he kaikamahine, kau aku au i ka hae ulaula. A o ke alanui no ia e imi aku ai i kahi o ke ola, o ke Akua ko oukou mea nana e kokua, a o ka'u hana ka pule no oukou i ke Akua, i mehana oukou i na po anu o ka hooilo, a no na la wela o ka makalii"

                A pau ae la ka olelo ana a ka makuahine, o ko lakou nei hele aku la no hoi ia iloko o ka ululaau, huli lakou nei a loaa kekahi laau kiekie. Noho lakou nei a hala ka umikumakahi o ka la, hiki mai ko kahi muli la e pii ai iluna o ua laau nei e nana ai i ke kau mai o ka hae; ko ia nei pii no hoi ia a hiki iluna, ike aku la keia i ka hukiia ae o ka hae, he hae ulaula, o ka hoailona ia o ka make o lakou nei. A olelo iho la lakou nei ia lakou iho, "Eia ka ko kakou mea e auwana ai, o ka hanau ana o keia kaikamahine. Heaha la hoi, e hoohiki kakou ia kakou iho? Ma na wahi a pau loaa ai ia kakou kekahi kaikamahine, e hookahe kakou i kona koko."

                Ia manawa, nana aku la lakou nei ma kahi pouliuli loa o ka ululaau, malaila ko lakou nei wahi o ka hele ana, o ko lakou nei hele aku la no hoi ia a ahiahi, loaa ia lakou nei he wahi hale ua nahaha. Aohe he kanaka oloko, ilaila ko lakou nei wahi i noho ai. A olelo aku lakou nei ia Beniamina, "O oe o kahi mea uuku, aohe ou ikaika, e aho o kau hana ka malama i ka hale o kakou, a me ka hana i ka mea ai; a o ka makou hana hoi ka hele i ka huli mea ai, i ki manu, dia hihiu, a me na mea e ae." A ao ka la mua o ka noho ana o lakou i ua wahi hale nei, hele aku la no hoi lakou la i ke ki manu a me na mea e ae, a hoi mai o kahi kaikaina ke hana a moa, ai lakou nei. A pela ko lakou nei noho ana a hala na makahiki he nui; me he manawa pokole wale la no ia ia lakou.

                A o ua wahi kaikamahine nei, ua kiekie loa ia manawa, he wahine maikai, me ka Hoku Gula i ka lae. I kekahi la holoi lole, ike ua wahi kaikamahine nei he poe palule liilii he umikumamalua, a ninau aku la keia i ka makuahine, "Nowai la hoi keia mau palule liilii he umikumamalua, aole paha e ku ia papa?"

                A hai aku ka makuahine me ka manao kaumaha, "No kou poe kaikunane he umikumamalua ia poe palule liilii,"

                A ninau hou aku la ua kaikamahine nei, "Aia la hoi i hea ko'u poe kaikunane a'u i lohe ole ai mamua?"

                Pane aku ka makuahine, "Aia la i hea, o ke Akua wale no paha ka mea i ike, o ka lakou hana ka lalau maluna o ka aina."

                Ia manawa, alakai aku la ka makuahine a ka lumi i huna ia ai ua mau pahu kupapau nei, i hanaia ai no na kaikunane, no ka mea, i kuu wa e hapai ana ia oe, olelo ka makuakane o oukou, "Ina wau i hanau ia oe a he kaikamahine, pau ou kaikunane i ka pepehiia, i lilo ai ka hooilina ia oe wale no. A o ka holo ana i ka nahelehele ko lakou mea i pakele ai."

                I ka manawa o ua kaikamahine nei i lohe ai i ke kumu o na kaikunane i holo ai i ka nahelehele, olelo aku la keia i ka makuahine, "Mai uwe oe, e hele ana no au e imi i ko'u poe kaikunane."

                O ko ia nei hopu iho la no ia i ua mau palule liilii nei he umikumamalua, a hele pololei aku la no keia ma ka ululaau a na kaikunane i hele ai. Mai ke kakahiaka a ahiahi, hiki keia i kahi hale a na kaikunane e noho ana; i ko ia nei wa i hoomaka aku ai e komo, ike aku la keia i ke kanaka e noho mai ana iloko, o Beniamina. A ninau mai kela, "Mahea mai nei oe, a heaha kau o onei?" me ke ano hikilele o ua kaikamahine nei, me ka Hoku Gula iluna o ka lae.

                A pane aku la ua kaikamahine nei, "He kaikamahine au na ke alii, a e hele ana au e imi i ko'u poe kaikunane he umikumalua. O ko'u auwana iho la no ia a hiki i ko lakou manawa e loaa ai ia'u"

                A hoike aku la keia i ua mau palule liilii nei he umikumamalua. Ua ike mai no o Beniamina, o ke kaikuahine keia ona, a olelo mai ai kela, "Owau ka muli loa o kou poe kaikunane." Manao aku la no hoi keia he oiaio ka iala mea i olelo mai ai, nolaila, hoomaka keia i ka uwe.

                A lele mai la o Beniamina e honi, a uwe pu iho la laua nei, a pau ae la ka uwe ana, olelo aku la o Beniamina, "Hookahi mea i hewa ai ko kaua halawai ana, ua hoohiki makou ia makou iho, e pepehi i na wahine a pau loa e loaa ai ia makou; no ka mea, he wahine ko makou mea i auwana ai."

                A pane aku keia, "He aa no au i ka make, ina o ko oukou mea ia e hoihoi ia ai i na makua o kakou."

                A hoole mai kela, "Aole oe e make; e pee ae oe malalo o keia pahu, a hiki i ka manawa o'u kaikuaana e hoi mai ai; alaila, imi au i mea nou e ola ai." Hoolohe no hoi keia e like me ka iala kauoha.

                Ia wa, ua poeleele, a hoi mai na kaikuaana mai ka huli holoholoholona mai, i mea ai na lakou. A hoomakaukau lakou e ai, ninau aku la o Beniamina, "Heaha ka oukou nuhou? Aohe a oukou nuhou?"                Hoole mai no hoi lakou la, aohe a lakou nuhou. A olelo aku keia, "owau ka mea nuhou." Koi mai la no hoi lakou la e hai aku. A olelo aku keia, "aia oukou a hoohiki mai alaila au hai aku." Ninau mai lakou la, "heaha ka makou mea e hoohiki ai?" Olelo aku keia, "eia ka kakou mea e hoohiki ai. O ka wahine mua e loaa ia kakou e hoopakele ia." A ae mai la no hoi lakou la.

                A olelo e aku ai keia, "o ka wahine mua a oukou e ike ai o ko kakou kaikuahine ponoi." A wehe ae la keia i ka pahu, a ike aku la lakou nei i ua kaikuahine nei e ku mai ana me ke kapa alii a me ka hoku gula iluna o ka lae. O ko lakou nei lele aku la no hoi ia honi, uwe; a pau ia hana a lakou nei, hooponopono lakou nei no ka lakou mau hana.

                O ka Beniamina a me ka ke kaikuahine hana, o ka noho i ka hale e hoopopono ai i na hemahema o ka hale; a o ka lakou nei hana, o ka hele no hoi i ka huli mea ai na lakou. Pela ko lakou nei noho oluolu ana.   I kekahi manawa, manao na kaikunane e imi i makana na ke kaikuahine; o ka lakou makana i manao ai e haawi, he pua lilia, he umikumamalua pua lilia e ulu ana iloko o kahi pa mea kanu, o ko lakou nei hele aku la no hoi ia a ako i ka pua o ka lilia, i ka wa o lakou nei i ako ai, o ko lakou nei manawa ia i kuamuamu ai a lele iloko o ka laau, a o kahi hale a me kahi pa mea kanu nalowale pu ia manawa hookahi, a o ke kaikuahine wale no ka mea i koe. Ku hoaa wale iho la no keia, a i huli ae keia, e ku aku ana he wahi luahine. Ninau aku ua wahi luahine nei, "heaha kau mea i hana iho nei? no keaha la oukou i waiho malie ole ai i na pua lilia ulu."

                "No ka ako ana ou poe kaikunane i lilo ai lakou i poe manu. Auwe! auwe!!" pela iho la ua kaikamahine nei.

                A ninau aku ua kaikamahine nei, "aole anei he mea o lakou e pakele ai?" Hoole aku ua luahine nei, "aole, aole he mea ma ka honua nei, aka hookahi wale no, a no ka paakiki loa oia mea, aole paha e hiki ia ia ke hana."

                Alaila olelo aku ua kaikamahine nei, "aohe he mea e koe ia'u i ka hanaia no ke ola o kou poe kaikunane.

                Alaila hai aku ka luahine, "e imi oe a hala na makahiki ehiku, mai noho oe a pane, mai noho a akaaka, i na oe e noho a hookahi wale no hora i koe pau na makahiki ehiku, pane oe hookahi hua olelo, alaila o ka make no ia ou kaikunane." A manao iho la ua kaikamahine nei iloko ona e imi i mea e pakele ai na kaikunane. O ko ia nei hele no ia e kuli a loaa ia ia nei kekahi laau kiekie, pii keia iluna olaila e noho ai, aole he ekemu, aohe akaaka. Ilaila ko ia nei wahi i noho ai a hala kekahi manawa; hele mai kekahi keiki alii i ka huli holoholona, he ilio ke kokoolua, mamua ua ilio nei kahi i hele ai, a mahope mai ke alii; ka ike no nei o ua ilio nei i ke kaikamahine iluna o ka laau, noke keia i ka hae malalo, a hiki mai ke kahu, ike i keia kaikamahine wahine maikai i ke kau iluna o ka laau, kahea aku, i wahine oe na'u, aole oia nei pane aku, aka luliluli aku la keia i ka poo. Pii ua keiki alii nei a hiki iluna o ka laau, kaikai mai i ua kaikamahine nei a hiki ilalo, hoouka keia iluna o ka lio, hoi laua nei a hiki i ka hale, mareia laua nei a pau, aole no he pane iki o ua kaikamahine nei, aole no he akaaka, pela ko laua nei noho oluolu ana a hala elua makahiki. O ka makuahine o ke alii he wahine inoino loa.

                A hala ua mau makahiki nei elua, hoomaka ka makuahonowai o ia nei, e henehene, a nuku i ike keiki, "a heaha la kau mea i lawe mai ai i keia wahine ino iloko o ka hale alii; no ka hewa o keia kaikamahine kona mea e pane ole mai nei; he mea mau no i na kuli he akaaka mai no i kahi manawa, a o keia wahine ka hoi aohe noho a akaaka iki, olelo hou iho la ua wahine nei, manao au ua hana oia nei i kekahi hewa ino loa oia ka mea i hookuke ia ai iloko o ka nahelehele."

                Pela ke kuawili mau o ua wahine nei a hala kekahi manawa, manao maoli ke keiki he oiaio ka ka makuahine; hooholo ai ua alii nei i kanawai no ka wahine e make. Hoa ia mai la no hoi ke ahi a nui no ua kaikamahine nei e puhi ia ai, a o ke alii kane ma ka puka aniani kahi i ku ai e nana ana no i ka wahine, no ka mea, aole i pau kona aloha i kana wahine. Kii ia mai la no hoi ua kaikamahine nei, lawe ia aku la keia a nikiiia i ka pahu laau i kukulu ia ai nona, i wahi no ia nei e paa ai a ai mai ke ahi.

                I ka manawa i hoomaka mai ai ka ula o ke ahi e a mai i ka lole o ia nei, ia wa lohe ia aku kekahi mea halulu e iho mai ana mai luna mai, he umikumamalua manu ka mea i ike ia aku e lele mai ana, a haule ma na wawae o ua kaikamahine nei, i ka manawa i pa ai o ua poe manu nei i ka lepo, oia ko lakou manawa i kua kanaka ai, no ka mea, ua hiki mai ka manawa hope loa o na makahiki ehiku; oia na kaikunane o ia nei he umikumamalua, i ola hou mamuli o ko ia nei hoolohe; i ko lakou wa i kua kanaka hou ai, kinai lakou nei i ke ahi a pio, wehewehe lakou nei i ke kaula i paa ai a hemo, akahi no a hiki i ua kaikamahine nei ke kamailio, no ka mea, ua ola hou ko ia nei poe kaikunane ko ia nei mea i nui ai.

                Ia wa akahi no a ike ke kane i ke kumu o ka wahine i pane ole ai, a i akaaka ole ai, a loaa pu ia ia nei ka olelo, no ka hewa ole o ka wahine, a oi aku kona aloha ia ia ia manawa mamua o ka wa mamua. A o ka makuahine o ke alii, hookomoia iloko o ka pahu me ka aila wela, a me ka nahesa, a pela oia i make ai i ka make inoino, ka hoopai o kana mau hana ino.

 

Kela mea keia mea o na Aina e mai.

 

                Aole e hiki ia Prince o Wales, (ka Hooilina o Victoria,) ke mare i ka wahine, me ka ae ole o kona makuahine, oiai ua emi iho kona mau makahiki malalo o ka iwakaluakumamalima, a mahope oia manawa, he hiki no ia ia ke mare i ka mea ana e makemake ai, ke hai mua aku nae oia i kona manao i ka Aha Kukamalu, i hookahi makahiki mamua o ka manawa ona e manao ai e mare, me ka ae ole mai o ke Kalaunu. Aka, ina e kue mai na Hale Ahaolelo a elua, mamua o ka pau ana o ka makahiki; alaila, aole e hiki ia ia ke mare.

 

                He wahine hopohopo o Kipekona wahine, i kona moe ana i ka po, ua mau kona nana ana malalo o ka moe, i loaa ai paha ka aihue e pee ana ilaila. I kekahi po, nana aku ia i na kamaa buti o kana kane malalo o ka moe, kahea ikaika mai la ia i ke kane, "E Kipekona! E Kipekona e! Eia ka aihue malalo o ka moe, ke ike nei au i kona mau kamaa! Pane mai la ke kane, "Ua pomaikai no ka loaa ana, ua huli wale oe ia ia i na makahiki he iwakalua, akahi no a loaa." Lalau aku la ke kane, a puka mai na kamaa buti ona.

 

                O kekahi kanaka koa o ka Papa 69, o Nu Ioka, oiai ua hoomanawanui oia i ka wa e okiia ana kekahi o ona mau lima, ike aku la oia e lawe ia ana ka lima i okiia e kanu, kahea aku la ia i ka mea nana e lawe ana e hele mai i ona la, a hiki mai la ka mea e lawe ana me ka lima pu; alaila, lalau koke aku la ia i na manamanalima a lulu iho la; a olelo aku la oia i ka lima make, penei, "Aloha oe e kuu aikane, ua hana maikai mai oe ia'u iloko o ka wa pilikia, a ua manao au e lawe pu ia oe iloko o ka lua kupapau. Aka hoi, ke hele e nei oe mamua o'u, aloha no." Aloha io no ka hoapili o ke kanaka, o kona mau lala.

 

                KA MANAO HUHU.— He mea ano pupule ka manao huhu, e hana ana ka mea huhu me ka noonoo ole. Aohe manao ka mea huhu i ka hope o kana hana ana, e like me ka mea ona, e hana pupule ana me ka manao ole; pela no ka like o ka mea huhu, ua hala kona noonoo, a e hana ino wale ana no oia me ka makau ole i ka hope ino o kana hana ana. Me ka ike ole i ka eha o ka naau e pili mai ana ia ia, ua hana aku ka mea huhu i ka ino a me ka make. A pau ka huhu ana, a hoi mai ka manao, alaila ua maopopo ia ia ka hope awahia o kana mea i hana ai.

 

                HE KANAKA MAKE I KA MAKINA OKI MAUU. — Ma Harefoda, Amerika Huipuia, e oki mauu ana o Mr. Sisona, a e noho ana ia maluna o ka Makina, a e kauo ia ana e na lio. I ka hoomaka ana e oki, ua hina e iho la kela imua o ka pahi oki mauu, a kaa ka Makina maluna ona, me ke oki iho i kona mau uha, e akaa ana i ka io a moku ka iwi o kekahi uha. No ka moku ana o na aa koko, kahe nui mai la ke koko a pau, a hala kekahi mau hora a me ka hapa, o kona make loa iho la no ia.

 

                KA LUAKINI NUI O MEKIKO. — O kela luakini nani ma ke kulanakauhale o Mekiko, ka hale nui loa iloko o Amerika. He 500 na kapuai o kona loa, a he 400 kapuai kona laula, a e hiki no i na kanaka he 80,000 ke komo maloko. Maluna o kekahi kuahu kiekie, e kau ana na ipu kukui gula, a me na ipu kukui dala he lehulehu, oia a me na kea he nui, a me na mea nani e ae he nui. Ilaila no ke Kii o ka Virigine i hoonaniia i na daimana, me na minerala makamae e ae, he 2,500,000 ke kumukuai. Ma na wahi e ae a pau o ka luakini, he nui na mea nani makamae i pau ole i ka heluia. Aka, he poe ilihune loa na kanaka o Mekiko, e pili wale ana no ka maluhia ole.

 

                Ka manao oluolu, oia ka mea maikai loa no na mea a pau e noho pu ana iloko o ka hale, he nui na tausani o ka poe noho pono ole, a kaumaha ka naau, no ke ano manao ino o kekahi poe o lakou. Ka manao huhu wale, nuku wale, a huwahuwa, a kuhihewa no ka hoowahawahaia, he mea ino ia e hoopau wale ana i na hana oluolu o na mea a pau e noho pu ana.

                E kinai iho i na manao ino aku, a e hanai i ka manao aloha, makemake oe e alohaia mai, ea? E aloha mua aku oe i kou mau hoa a pau, a e hana oluolu aku ia lakou i keia la, a i kela la, a e nui mai ke aloha o lakou i ke kau mai maluna ou, a e pomaikai nui auanei kou noho ana.

 

                HE MAKANI WILI INO. — I ka la 19 o Iune i hala aku nei, hoea mai la he ao eleele paapu maluna o Kamapaina, ma Ilinoi, oia kekahi moku aina o Amerlika Huipuia, mai ka Akau Komohana mai.

                Mama loa mai la kona lele ana mai, aole i liuliu a kupono maluna o ke kulanakauhale, a pa mai ka makani ikaika e kulai ana i na laau nui, a e hapai ana i na pa laau a pau, a e hoohina ana hoi i na hale a pau me ka naha liiliii, a hapai ae ia i na papa o lakou a pau iluna i ka lewa.

                A pau ka ino o ka makani, alaila haule mai la na huahekili nui maluna o ka aina. Ua pau loa na kihapai palaoa, a me na kihapai kulina, a me na mea kanu a pau i ka pepe loa; pau pu me na laau a me na mea ulu i ka make. Manoanoa mai la a paapu ka waiho ana o na huahekili maluna o ka honua, weluwelu ka lau o na laau a me na mauu a pau, aohe mea ola i koe. He 20 mile ka laula o keia luku ana, a he nui loa aku paha, aole nae i lohe ia. Ua make no kekahi mau kanaka, aole nae he nui. Pakele wale no ko lakou ola i ka holo ana iloko o na wahi malumalu e pee ai.