Ka Nupepa Kuokoa, Volume I, Number 1, 1 ʻOkakopa 1861 — He moololo e paipai aku ana ia oukou e ka poe e makemake mai ana e lawe i 'Ka Nupepa Kuokoa.' [ARTICLE]

He moololo e paipai aku ana ia oukou e ka poe e makemake mai ana e lawe i 'Ka Nupepa Kuokoa.'

E HAWAII O KEAWE. Aloha oukou a pau, na hoalauna ma ka naauao. O oukou no ka poe o kakou i pomaikai, no ka mea, aia no oukou ke noho la ma Kumukahi; Ma kahi a ka la i puka mai ai, ma ka hikina i Haehae; Malaila no na lehua o Malio; Me ka hooku i ka ua o Nahunahu; E nana mai ana i na ki o Wahinekapu ; Me ka makani he moani Puulena; E lu ana i na lehua o Hiulani; E nana ia ana e Pahuluhala ; Hala Malama ka aina o Pele ; Me na pu-e uai o Pu-a-laa; Me ka Ulu hua i ka hapapa; Me ka poho o Kawaiwelawela; E ka Milo-holu i Waiakaea; O ka ipo hala o Pohina; O ka hala i Halaaniani; Me ka wahine ai laau o Puna; Me ka pali haili kanaka, amuamu kanaka o Holei; Me na kanaka alualu la hopuhopu la o Kumukahi; Hookahi no mea a kakou e alu ai, e kokua ai, e hiipoi ai, e hooipo ai, e hookane ai. E alu na manao, na makemake, na iini pau ole i ka "Nupepa Kuokoa!" E like me ka mea i olelo ia e ka poe kahiko. He kini ka Kailua, he ma-no ka Kaneohe, e alu ka pule ia Hakalau. Pela no kakou e kokua ai i ko kakou elele ahai lono, Oia hoi o " Nupepa Kuokoa;" aole ona mea e like ai, oia wale iho no ia i kona ano, he ano maemae, he maemae na hua olelo, maemae na noonoo, maemae na manao. Nolaila, he pono no kakou ke olelo iho, he kini ka Kauaiomano, he mano ka Oahu o Kuihewa. E kokua like na manao e Maui o Kama, me Hawaii o Keawe, i ka hapai ana i ka "Nupepa Kuokoa." O ka Nupepa paha kela e holo ana a puni keia mau Mokupuni, e hoike ana ia i kona malamalama. E like me ka la i ke awakea loa e hoike ana i kona malamalama. Pela no hoi i hoike mai ai o Hokuloa, o Ukali, o Holoholopinaau, o Kaawela, o Naholoholo, o Helekela, o Wenuka i ko lakou mau malamalama. O keia "Nupepa Kuokoa," aia no ia ma ka hale pai o H. M. Wini. Ua oluolu paha oukou e na hoalauna misionari, a me na hoahanau a pau, a me na Kumu kula, na Kahu kula, na Luna kula, e launa mai me keia "Nupepa Kuokoa." lna pela ko oukou manao, ea, e wiki kakou, e holo ka hana, e holo ka noonoo, e lokahi like i ka ua o Eleao. O ka uku o keia Nupepa, he elua $2.00, oia kona ola i kela makahiki, keia makahiki; Nolaila, e lilo ana keia Nupepa i wili hou puka nana e wili aku i ka naaupo. O ke kui nao mai keia e hemo ole ai i ke kui ka-la ; O ka Upamakani mai keia e aa ai ke kapuahi a ka poe amara; O ke kukui mahu mai keia e maloeloe ole ai ka waha i ke puhi; O ka moku Kilauea mai keia e poluea ole ai oe i ka moana ; Eia mai ka huila mahu o Ulakoheo, nana e hoohehee na hao paakiki o ka naaupo; Eia mai hoi ka hao kuni, e lilo ole ai ko holoholona i ke anapuni; Eia mai ka Loio akamai, e pau ai ko pilikia; Eia mai ka makua o ka lehulehu, e lawa pono ai na kanaka ilihune; O ka hao makeneki mai keia nana e kuhikuhi pono i ka Akau. E Maui o Kama, e ala mai oukou e ku iluna, aia malaila ke kumuwai o ka naauao, oia hoi o Lahainaluna, a ma ia ano, ua lilo keia mau Mokupuni i mau Panalaau no Maui o Kama. A ma ka hoopuka Nupepa, ua lilo hoi na Mokupuni a pau i mau Panalaau no Oahu o Kuihewa. Nolaila, ke manao nei no hoi au e oluolu paha ke kahu o ka "Hae Hawaii," a me na luna hoopuka i ka "Hoku Loa,'' e kokua like mai i keia Nupepa. "Ina pela, e olioli auanei na keiki puni Nupepa o ke kuaaina, e haanui hoi na kaikahine puni nani o ke kaona. Eia nae, e koho kakou i ka kakou mea e koho ai, ina o lehova ke Akua, e hoomana ia lehova; Ina o Baala. Peke Akua, e hoomana ia Baala. Pela no hoi, ina o ka "Nupepa Kuokoa" ka mea e makemake ai, e hoopaa ia mea ma ko oukou naau, a hiki aku na pepa manuahi ekolu, a mahope aku, i ka malama o lanuari 1862, e hoopuka ia ka Helu mua. W. N. PUALEWA.