Ka Naʻi Aupuni, Volume V, Number 87, 1 Mei 1908 — Me na Pomaikai o ka Makahiki hou ! [ARTICLE]

Me na Pomaikai o ka Makahiki hou !

Ka Moolelo Walohia –o– Hainakolo KA UI PUA KA-MAKA-HALA O KA WAILELE O HIILAWE MOKUNA V Ua ola o Lonokaiolohia ia oe, Ua ola i ka popolo hua ono a Kane, Ka popolo au, e Kane i kanu ilalo, I ulu ilalo, lau ilalo, Hua ilalo a oo a pala ilalo, Puiliia ka popolo a Kane, Eia la, ke puiliia a ke hii nei au, I ko popolo hua mikomiko, e Kane, E Kane-i-ka-wai-ola, a ola, Ua ola kuu kama, Ua pau kuu hewa. Pau kei pule a Luukia, uhoi aku la laua a komo iloko o ka hale, a haawi iho la na aialo o laua i ke aloha i ka moopuna alii. Ia la no ua hoea mai la o Loheloa ame Mailelaulii me ke aikane me Koiahi e ike ia Luukia; a mahope mai hoi o Hainakolo me Keaniniulaokalani, na makua, na kupuna ame ka ohana alii apau no ka hale o Luukia ma. Ua ike iho la o Luukia i ke kaikunane ia Loheloa, a pela nohoi ia Mailelaulii, ke kaikamahine ame kana aikane o Koiahi. Ua hui hou iho la nohoi o Luukia me Hainakolo ame Keaninulaokalani. Aole no paha oe, e kuu makamaka heluhelu e poina ana i ke aikane a Leimakani, oia o Wainaia, a pela nohoi me Mailelaunui. O laua kekahi ma keia ike alii ana. I kekahi la ae, ua hoomaka ka hauoli ana o na 'lii ame na makaainana mai koa-uka mai a hoea i koa-kai, mai kela kapa a keia kapa o ka aina alo lua o Waipio no ke ola hou ana o Lonokaiolohia. A hala kekahi mau la o ka noho ana o Hainakolo me kana kane, ua nalowale hou laua mai Waipio aku; a o Ma ilelaulii hoi me ke aikane, me Koiahi, ua hoi mai laua a noho ma Waihee, Maui. No ka manaonao o Luukia i ke keiki ia Lonokaiolohia, ua olelo ia ua hoi lakou no Maui, a noho ma Honuaula; a malaila; o Lonokaiolohia i moe ai i ka wahine ui loa i ikeia ma Maui a puni, nona ka inoa o Kawalena, a na laua mai o Manumanuea (k). A mai loko mai o keia lalani alii ma ka aoao mai o ka makuahine o Kiha-nui-lulu-moku, makuakane o Liloa, i loaa mai ai o Kamehameha I, ka mea i hanau ia ma Kohala; a o ke koa hoi nana i hooko i na olelo wanana a Leimakani ame Loheloa, elike me ka mea i hoikeia ae nei. O keia kuauhau alii i loaa i ka mea kakau o ka moole

lo o Hainakolo, e hoomaka ana mai a Luukia ame Leimakani aku. Luukia w. ia Leimakani k., loaa o Lonokaiolohia k. Lonokaiolohia k, ia Kawalena w, loaa o Manumanuea k Manumanuea k. ia Kaumana w., loaa o Kawaikapu Kawaikapu, ia Haakua, loaa o Neula w. Waiola w. Neula w. ia Kauhola k., loaa a Kihanuilulumoku k. Kiha k. ia Waiolea w., loaa o Liloa k. Liloa k. ia Pinea (Piena) w., loaa o Hakau k, Kapukini w Liloa k. ia Akahiakuleana w., loaa o Umi-a Liloa. Mai loko mai o Umi-a-Liloa, i loaa mai o Kamehame ha I, ke koa a o KA NA'I AUPUNI O HAWAII. Aole hiki i ka mea kakau ke hooiaio i ka pololei loa o keia mookuau hau. O kahi mea iki ia i loaa; a hoomahuahua iho no me ke aloha. Ua hoea mai la kau e kuu makamaka heluhelu i kahi ano nui o ko kaua hooipoipo ana me Hai i ka pali kapu o Waipio; a ke noi nei au ia oe, e kala mai i kou mea kakau no kahi i kulike ole o keia moolelo me ko na mea i loaa mua a i ike mua ia e oe; a e nana kaua na ke au o ka manawa e hooiaio i na mea apau. Ma keia wahi, ke hoomanao hou ae nei ka mea kakau i keia mau wahi lalani mele: O oe ia e kuu ipo pehi pua hinano Ki-ke hala hoomaui I lu ka ua i ke ala a waiho malie He haupu, he halia i ka moe I moe ia e kaua a aloha E Hai-wahine, Hainakolo I ka pali kapu o Waipio He hoapili, ho hoa oe no Laukaieie He hoa hooulu lei no ka ua A maliu mai oe pono Ae mai oe, e ola hoi—e E ola i ka loaa mai Ia makou na kini, i hoohihi iho la ia oe Amama. Ua noa. Aloha oukou a nui loa.